आरके श्रीवास्तव,रौतहट,०४ गते वैशाख ।
रौतहट । जिल्ला प्रहरी कार्यालय रौतहट ले विभिन्न मुद्दामा अदालतबाट सजाय तोकिएका फरार ६ जना प्रतिवादीलाई पक्राउ गरेको जनाएको छ । प्रहरीका अनुसार सम्मानित अदालतको फैसला कार्यान्वयन अभियान अन्तर्गत खोजतलास तीव्र बनाइएका क्रममा फरार रहेका व्यक्तिहरूलाई पक्राउ गरिएको हो । पक्राउ परेकाहरूलाई आवश्यक कारवाहीका लागि रौतहट जिल्ला अदालतमा बुझाइएको छ । पक्राउ पर्नेहरूमा दिनेश सहनी, सुरेस साह सोनार, सर्वजित कुमार साह, राम नरेश प्रसाद, मुकेश साह तेली र राम सोगारथ राय यादव रहेका छन् ।
उनीहरू विरुद्ध लेनदेन, चोरी तथा चेक अनादर लगायतका मुद्दामा अदालतले कैद तथा जरिवाना सजाय तोकेको थियो । प्रहरीका अनुसार पक्राउ परेका व्यक्तिहरूमध्ये कसैलाई १ वर्षसम्म कैद सजाय तोकिएको छ भने केहीलाई १ महिना १५ दिनदेखि ३ महिनासम्म कैद सजाय निर्धारण गरिएको छ । त्यस्तै, १,५०० रुपैयाँदेखि १०,००० रुपैयाँसम्म जरिवाना समेत तोकिएको जनाइएको छ । प्रहरी नायव उपरीक्षक एवं सूचना अधिकारी बिष्णु प्रदिप बस्यालले अदालतका फैसला कार्यान्वयनलाई प्राथमिकता दिँदै फरार प्रतिवादी पक्राउ अभियानलाई निरन्तरता दिइने बताएका छन् ।
आरके श्रीवास्तव,रौतहट,०३ गते वैशाख ।
रौतहट जिल्लाको फतुवा विजयपुर नगरपालिकामा बिजुलीको बिल भुक्तानी र सुशासनको माग गर्दै स्थानीयवासीहरूले विरोध प्रदर्शन गरेका छन् । आज नगर क्षेत्रमा स्थानीयहरू सडकमा उत्रिएर नाराबाजी गर्दै नगरपालिकालाई दबाब दिएका थिए । प्रदर्शनका क्रममा “बिजुलीको बिल भुक्तानी गर”, “जिरो फाइलको सिद्धान्त लागू गर” लगायतका नारा लगाइएको थियो । आक्रोशित स्थानीयहरू नगरपालिकामा पुगेपछि प्रमुख प्रशासकीय अधिकृत कमल प्रसाद दहालले समस्याको समाधानका लागि दुई हप्ताको समय माग गरेका छन् । साथै उनले नदीको ठेक्का प्रक्रिया आगामी आर्थिक वर्षमा अघि बढाउने प्रतिबद्धता जनाउँदै विकास निर्माणका काम गुणस्तरीय बनाइने बताएका छन् ।
यता कार्यवाहक नगरप्रमुख अम्बेया खातुनले यस विषयमा कार्यपालिका बैठक बस्ने जानकारी दिँदै बजेट सञ्चालन नभएको अवस्थामा पनि नियमअनुसार जहाँ सम्भव हुन्छ त्यहाँबाट बिजुली बिल भुक्तानी गराउन निर्देशन दिएकी थिइन् । प्रदर्शनकारीहरूको तर्फबाट स्थानीय नेता शिवपूजन यादवले नगरपालिकाको आश्वासनकै कारण सर्वसाधारणको बिजुली बिल बढेको आरोप लगाएका छन् । उनले समयमै बिल तिर्ने व्यवस्था नगरिँदा यस्तो अवस्था सिर्जना भएको बताए । साथै उनले नगरप्रमुखको नीतिका कारण नागरिकहरूलाई “भिख माग्नुपर्ने अवस्था” आएको टिप्पणी गर्दै छिटो कार्यपालिका बैठक बसेर निर्णय गर्न माग गरेका छन् ।
उनले माग सम्बोधन नभए राजीनामा दिन बाध्य पारिने चेतावनी समेत दिएका छन् । यसैबीच, उक्त विषयमा कार्यपालिका बैठकमा साँझ अबेरसम्म छलफल जारी रहेको बैठकको निर्ण सार्वजनिक भो नगरिएको सहकर्मी रुपेश यादवले जानकारी दिएका छन् ।
आरके श्रीवास्तव,राैतहट,०३ गते वैशाख । राैतहटकाे कटहरिया नगरपालिकाले उखु उत्पादन गरी चिनी मिलमा बिक्री गर्ने कृषकहरूलाई अनिवार्य रूपमा दर्ता हुन आग्रह गरेको छ । नगर कार्यपालिकाको कार्यालयबाट जारी सूचनाअनुसार आर्थिक वर्ष २०८२/८३ का लागि उखु उत्पादक कृषकहरूको अभिलेख व्यवस्थित गर्न यो अभियान सञ्चालन गरिएको हो । कृषि विभाग तथा को निर्देशनअनुसार नगरपालिकाभित्र उखु खेती गर्दै आएका सबै कृषकहरूले २०८३ वैशाख मसान्तभित्र नगरपालिकाको कृषि शाखामा गई दर्ता गराउनुपर्नेछ ।
नगरपालिकाले समयमै दर्ता नगरेका कृषकहरू भविष्यमा प्राप्त हुन सक्ने सेवा, सुविधा तथा अनुदानबाट वञ्चित हुन सक्ने जनाएको छ । दर्ताका लागि कृषकहरूले नेपाली नागरिकताको प्रतिलिपि, जग्गाको लालपुर्जाको प्रतिलिपि, लिजमा लिएको भए करारनामा, लालपुर्जा नभएको अवस्थामा चारकिल्ला विवरण तथा सम्बन्धित वडा कार्यालयको सिफारिस अनिवार्य रूपमा पेश गर्नुपर्नेछ । नगरपालिकाका निमित्त प्रमुख प्रशासकीय अधिकृत ले सबै सरोकारवालालाई समयमै दर्ता प्रक्रिया पूरा गर्न आग्रह गर्दै कृषकको तथ्यांक व्यवस्थापनमार्फत कृषि क्षेत्रको योजना तथा सहयोग प्रभावकारी बनाइने बताए । स्थानीय कृषकहरूको पहिचान र समर्थनका लागि यो पहल महत्वपूर्ण हुने अपेक्षा गरिएको छ ।
बज्जिकाञ्चल संवाददाता,रौतहट, २९ चैत ।
रौतहटको देवाहीगोनाही नगरपालिकामा नेकपा (एमाले) बाट निर्वाचित मेयर प्रेमलाल साह आम जनता पार्टी (आजपा) मा प्रवेश गरेका छन्। मेयर साहको प्रवेशसँगै स्थानीय राजनीतिमा नयाँ तरंग उत्पन्न भएको छ।
देवाहीगोनाहीमा आयोजित भव्य कार्यक्रमबीच मेयर साहसहित वडा नं. ४ का अध्यक्ष रामप्रवेश पटेल, वडा नं. ९ का अध्यक्ष बिरबहादुर साह लगायतका जनप्रतिनिधिहरू सामूहिक रूपमा आजपामा प्रवेश गरेका हुन्। आम जनता पार्टीका सचिवालय सदस्य रामशरण यादवका अनुसार अझै अन्य जनप्रतिनिधि र कार्यकर्ताहरू पनि पार्टी प्रवेशको तयारीमा रहेका छन्।
कार्यक्रममा आजपा अध्यक्ष तथा पूर्वमन्त्री प्रभु साहले नवप्रवेशी नेता तथा जनप्रतिनिधिहरूलाई खादा तथा अबिर लगाएर स्वागत गर्दै पार्टीलाई अझ सशक्त बनाउने विश्वास व्यक्त गरे। उनले जनताको अपेक्षा अनुसार काम गर्न र वैकल्पिक राजनीतिक शक्तिको रूपमा आजपालाई स्थापित गर्ने प्रतिबद्धता जनाए।
पछिल्लो समय अध्यक्ष साह विभिन्न नगर तथा गाउँस्तरमा सक्रिय रूपमा जनभेटघाट गर्दै आएका छन्। फतुवा विजयपुर, कटहरिया, मौलापुर लगायतका स्थानहरूमा नेता–कार्यकर्तासँग छलफल गर्दै जनताको समस्या र सुझाव संकलन गरिरहेका उनी आज देवाहीगोनाहीमा पनि व्यापक भेटघाट तथा अन्तरक्रियामा सहभागी भएका थिए।
स्थानीय स्तरमा प्रभावशाली जनप्रतिनिधिहरूको आजपामा प्रवेशसँगै रौतहटको राजनीतिक समीकरणमा महत्वपूर्ण परिवर्तन आउने आकलन गरिएको छ।
आरके श्रीवास्तव,रौतहट,२९ गते चैत ।
रौतहट क्षेत्र नं. ३ रास्वपाबाट नव निर्वाचित सांसद रविन्द्र पटेल धिरजले आज कटहरिया स्थित विवाह भवनमा स्थानीय जनतासँग आत्मीय भेटघाट कार्यक्रम सम्पन्न गर्नुभएको छ ।
कार्यक्रममा उहाँले ठूलो संख्यामा उपस्थित जन्ताजनार्धनसँग प्रत्यक्ष संवाद गर्दै उनीहरूको समस्या, गुनासा, सुझाव तथा अपेक्षाहरू ध्यानपूर्वक सुन्नुभएको थियो । सहभागीहरूले शिक्षा, स्वास्थ्य, सडक पूर्वाधार तथा रोजगारीका विषयमा आफ्ना धारणा राखेका थिए ।
सांसद पटेलले जनताका हरेक आवाजलाई नीति तथा योजनामा समेट्ने प्रतिबद्धता व्यक्त गर्दै विकास निर्माणका कार्यलाई तीव्रता दिने बताउनुभयो । उहाँले स्थानीय तहसँग सहकार्य गर्दै दिगो विकासका कार्यक्रमहरू अघि बढाउने स्पष्ट पार्नुभयो ।
भेटघाट कार्यक्रमले जनप्रतिनिधि र जनताबीचको सम्बन्ध अझ सुदृढ बनाउनुका साथै विकासप्रति साझा सहकार्यको वातावरण सिर्जना गरेको सहभागीहरूले बताएका छन् ।
आरके श्रीवास्तव, रौतहट, २९ गते चैत ।
रौतहटको सन्तपुर क्षेत्रमा खानेपानी संकट गम्भीर बन्दै गएको छ । नेपाल विद्युत प्राधिकरण मौलापुर वितरण केन्द्रले विद्युत महसुल समयमै भुक्तानी नभएको कारण सन्तपुर खानेपानी सरसफाइ आयोजनाको विद्युत लाइन काटेपछि शुद्ध खानेपानीको हाहाकार सिर्जना भएको हो ।
फतुवा विजयपुर–५, सन्तपुर दोस्तियामा सञ्चालित उक्त खानेपानी आयोजनाको विद्युत लाइन काटिएको करिब पाँच दिन बितिसक्दा पनि समस्या समाधान हुन सकेको छैन । विद्युत आपूर्ति बन्द भएसँगै पानी आपूर्ति पूर्ण रूपमा अवरुद्ध भएको छ, जसका कारण वडा भरिका स्थानीय बासिन्दा गम्भीर समस्यामा परेका छन् ।
स्थानीयका अनुसार दैनिक उपभोगका लागि आवश्यक शुद्ध खानेपानी नपाउँदा जीवनयापन कष्टकर बनेको छ । “पाँच दिनदेखि पानीको निकै समस्या भइरहेको छ, तर अहिलेसम्म कसैले चासो देखाएको छैन,” स्थानीय मदन राय यादवले गुनासो व्यक्त गर्नुभयो ।
यस्तै, स्थानीय शेष मोमताज आलमले खानेपानी जस्तो आधारभूत सेवामा अवरोध हुनु अत्यन्तै गम्भीर विषय भएको बताउँदै तत्काल समाधानको माग गर्नुभयो । अर्का स्थानीय मुकेश कुमार पटेलले सम्बन्धित निकायको लापरबाहीका कारण सर्वसाधारणले दुःख पाएको भन्दै आक्रोश व्यक्त गर्नुभयो ।
त्यस्तै, संजय यादवले पानीको अभावले दैनिक जीवन नै अस्तव्यस्त भएको उल्लेख गर्दै विद्युत लाइन तुरुन्त पुनः सञ्चालन गर्न आग्रह गर्नुभयो ।
यता, सम्बन्धित निकाय तथा राजनीतिककर्मीहरूले समस्या समाधानमा आवश्यक पहल नगरेको भन्दै स्थानीयले चर्को असन्तुष्टि जनाएका छन् । उनीहरूले तत्काल विद्युत लाइन पुनः सञ्चालन गरी खानेपानी सेवा सुचारु गर्न माग गरेका छन् ।
स्थानीयवासीले यस समस्यालाई गम्भीर रूपमा लिएर सम्बन्धित निकायले शीघ्र ध्यान दिनुपर्ने आवश्यकता औंल्याएका छन् ।
आरके श्रीवास्तव,रौतहट,२९ गते चैत ।
रौतहट जिल्लाको गुजरा नगरपालिका–३ बलुआ टोलमा लामो समयदेखि अपेक्षित नाला निर्माण कार्य अन्ततः सुरु भएको छ । वर्षौंदेखि विकास निर्माणमा उपेक्षित हुँदै आएको भन्दै स्थानीय बासिन्दाले गुनासो गर्दै आएका थिए, तर यसपटक स्थानीय पहल र नगरपालिकाको सहकार्यले सकारात्मक सुरुवात भएको छ ।
स्थानीय युवा समाजसेवी शेष सेराज लगायत स्थानीय युवाहरूको टिमकाे सक्रिय पहलमा नगरप्रमुख सन्तलाल चौधरीले १८ लाख रुपैयाँ बजेट विनियोजन गरी गाउँका दुई स्थानमा नाला निर्माण कार्य अघि बढाइएको हो ।
सेराजका अनुसार, “पहिला पनि स्थानीय सरकारले प्रयास नगरेको होइन, तर विभिन्न कारणले काम अघि बढ्न सकेन । यसपटक भने स्थानीय बासिन्दा आफैं सक्रिय भएर सडक खाली गरेपछि नाला निर्माण सम्भव भएको हो । ” उनले नगरप्रमुख चौधरीप्रति आभार व्यक्त गर्दै आगामी दिनमा थप विकासको अपेक्षा पनि गरेका छन् ।
यसैबीच, प्रदेश सरकारबाट सडक ढलानको काम समेत यसै वर्ष सुरु हुने विश्वास स्थानीयहरूले व्यक्त गरेका छन् । स्थानीय नैमुदिन मियाँले नाला निर्माण सुरु हुनु सकारात्मक भए पनि समयमै काम सम्पन्न हुनुपर्नेमा जोड दिए । अर्का स्थानीय जहुर मियाँले नाला निर्माणले गाउँको स्वरूप नै बदल्ने विश्वास व्यक्त गरे भने जाहिर हुसेनले ढिलै भए पनि स्थानीय सरकारले गाउँमा ध्यान दिएको भन्दै खुशी व्यक्त गरे ।
यता, जेन–जी उमेर समूहका युवाहरूले नाला निर्माणसँगै सडक ढलानको कामलाई पनि प्राथमिकतामा राख्न माग गरेका छन् । उनीहरूले समग्र पूर्वाधार विकासले मात्रै गाउँको दिगो सुधार सम्भव हुने बताएका छन् ।
स्थानीयको सक्रियता र सरकारको सहयोग मिल्दा बलुआ टोलमा सुरु भएको यो नाला निर्माण कार्यले अब समग्र विकासको नयाँ अध्याय सुरु गर्ने अपेक्षा गरिएको छ ।
आरके श्रीवास्तव,मधेस,२७ गते चैत ।
सप्तरी । मधेश प्रदेश सरकारकी शिक्षा तथा संस्कृति मन्त्री रानी शर्मा तिवारीले कृषि शिक्षालाई समयअनुकूल, व्यवहारिक र गुणस्तरीय बनाउनुपर्नेमा विशेष जोड दिनुभएको छ ।
आज मधेश प्रदेशका मुख्यमन्त्री कृष्ण प्रसाद यादवसहित मन्त्री तिवारीले सप्तरीको राजविराजस्थित कृषि विश्वविद्यालयको अनुगमन गर्नुभएको हो । अनुगमनका क्रममा विश्वविद्यालयको शैक्षिक गतिविधि, भौतिक पूर्वाधार तथा समग्र व्यवस्थापन अवस्थाबारे विस्तृत जानकारी लिइएको थियो ।
अनुगमनपछि मन्त्री तिवारीले कृषि क्षेत्रको दिगो विकासका लागि दक्ष जनशक्ति उत्पादन अपरिहार्य रहेको उल्लेख गर्दै शिक्षा प्रणालीलाई अझ व्यवहारिक बनाउनुपर्ने बताउनुभयो । “कृषि शिक्षालाई आधुनिक प्रविधिसँग जोड्दै गुणस्तरीय बनाउनु आजको आवश्यकता हो,” उहाँले भन्नुभयो ।
उहाँले विश्वविद्यालय प्रशासन, शिक्षक तथा सम्बन्धित सरोकारवालाहरूलाई विद्यार्थीहरूलाई उत्कृष्ट र प्रतिस्पर्धात्मक शिक्षा प्रदान गर्न सक्रिय र जिम्मेवार ढंगले काम गर्न आग्रह गर्नुभयो । साथै, मधेश प्रदेश सरकार कृषि तथा शिक्षाको समग्र विकासप्रति पूर्ण रूपमा प्रतिबद्ध रहेको पनि स्पष्ट पार्नुभयो ।
यस अवसरमा मुख्यमन्त्री यादवले प्रदेश सरकार शिक्षा र कृषि क्षेत्रको सुदृढीकरणमा प्राथमिकताका साथ काम गरिरहेको उल्लेख गर्दै आवश्यक नीति तथा स्रोत व्यवस्थापनमा सरकार सधैं तत्पर रहने धारणा व्यक्त गर्नुभयो ।
अनुगमन टोलीले विश्वविद्यालयको सुधारका लागि आवश्यक सुझाव तथा निर्देशनसमेत दिएको थियो ।
आरके श्रीवास्तव,राैतहट,२७ गते चैत ।
रौतहटकाे फतुवा विजयपुर नगरपालिका वडा नम्बर ५ स्थित स्वास्थ्य चौकीमा कर्मचारीहरूको लापरवाही पुनः देखिएको छ । सरकारले तोकेको कार्यालय समय बिहान ९ बजेदेखि लागू भइसके पनि शुक्रबार बिहान १० बजेसम्म स्वास्थ्य चौकीको मूल गेटमै ताल्चा लागेको अवस्थामा भेटिएको हो ।
कार्यवाहक नगरप्रमुख अम्बेया खातुन नेतृत्वको अनुगमन टोली स्वास्थ्य चौकी पुग्दा ल्याबमा कार्यरत एक कर्मचारी रामईश्वर साह बाहेक अन्य कोही पनि उपस्थित थिएनन् । उक्त स्वास्थ्य संस्थामा कुल ८ जना कर्मचारी कार्यरत रहेकामा ६ जना अनुपस्थित रहेको पाइएपछि उनीहरूको हाजिरी काटिएको नगरपालिकाले जनाएको छ ।
नेपाल सरकारले चैत २३ गतेदेखि लागू हुने गरी बिहान ९ बजेदेखि साँझ ५ बजेसम्म कार्यालय समय निर्धारण गरेको छ भने हप्तामा दुई दिन सार्वजनिक बिदा दिने व्यवस्था गरिएको छ । तर, सो व्यवस्था कार्यान्वयनमा भने उक्त स्वास्थ्य चौकीमा लापरवाही देखिएको छ ।
यसअघि पनि कार्यवाहक नगरप्रमुख खातुनको टोलीले अनुगमन गर्दा कर्मचारीहरू समयमा उपस्थित नभएपछि चेतावनी दिइएको थियो । पटक–पटक निर्देशन दिँदा पनि सुधार नआएपछि यसपटक कडा कदमस्वरूप हाजिरी काटिएको जनाइएको छ ।
अनुगमनका क्रममा प्रदेश सांसद प्रत्याशी मोहम्मद सेराज समेत सहभागी थिए ।
यता स्वास्थ्य चौकीका इन्चार्ज रघुनाथ साहले भने कर्मचारीहरूको ढिलाइलाई सामान्य ठहर गर्दै “गाउँघरको अवस्था भएकाले खाना खाएर आउँदा अलि ढिलो हुन सक्छ” भन्ने प्रतिक्रिया दिएका छन् । तर स्थानीय तहका जनप्रतिनिधिहरूले भने यस्तो गैरजिम्मेवारीपूर्ण व्यवहार अस्वीकार्य रहेको बताएका छन् ।
स्थानीयवासीहरूले स्वास्थ्यजस्तो संवेदनशील क्षेत्रमा कार्यरत कर्मचारीहरूको लापरवाहीले सेवाग्राही मारमा परेको गुनासो गरेका छन् । उनीहरूले नियमित र जिम्मेवार सेवा सुनिश्चित गर्न कडा अनुगमन र कारबाही आवश्यक रहेको बताएका छन् ।
