राैतहट । प्रादेशिक अस्पताल गौर परिसरमा नव-निर्मित पञ्चमुखी हनुमान मन्दिरको उद्घाटन गौर नगरपालिकाका नगर प्रमुख शम्भु साहले गर्नुभएको छ। नगर प्रमुख साहले वि.सं. २०८० फागुन २४ गते शिलान्यास गर्नुभएको उक्त मन्दिरको निर्माण कार्य गौर नगरपालिकाको बजेटबाट सम्पन्न गरिएको हो। मन्दिरमा स्थापित पञ्चमुखी हनुमानको मूर्ति भने नगर प्रमुख साहको व्यक्तिगत सहयोगमा प्राप्त भएको जनाइएको छ।
मन्दिर उद्घाटन कार्यक्रममा बोल्दै नगर प्रमुख साहले धार्मिक तथा सांस्कृतिक सम्पदाको संरक्षण र प्रवर्द्धनका लागि नगरपालिकाले निरन्तर सहयोग गर्दै आएको बताउनुभयो। उहाँले अस्पताल परिसरमा निर्माण गरिएको मन्दिरले बिरामी, उनका आफन्त तथा सर्वसाधारणलाई आध्यात्मिक शान्ति र धार्मिक आस्थाको केन्द्रका रूपमा सेवा पुर्याउने विश्वास व्यक्त गर्नुभयो। अस्पताल प्रशासनका अनुसार मन्दिरको दैनिक पूजा–आराधना तथा व्यवस्थापनसम्बन्धी खर्च अस्पताल प्रशासनले व्यहोर्नेछ। धार्मिक तथा सांस्कृतिक महत्व बोकेको उक्त मन्दिरले अस्पताल परिसरमा आउने श्रद्धालु तथा सर्वसाधारणलाई पूजा–आराधना, ध्यान तथा आध्यात्मिक शान्ति प्राप्त गर्ने उपयुक्त स्थल प्रदान गर्ने अपेक्षा गरिएको छ। उद्घाटनसँगै मन्दिर सर्वसाधारणका लागि खुला गरिएको छ।
करण कुमार मिश्र,रौतहट, असार १० गते । रौतहट जिल्लाका सातवटा स्थानीय तहले आगामी आर्थिक वर्ष २०८३÷०८४ का लागि बुधबार आ–आफ्नो बजेट सार्वजनिक गरेका छन् । कृषि, शिक्षा, स्वास्थ्य, पूर्वाधार विकास, पर्यटन प्रवद्र्धन तथा रोजगारी सिर्जनालाई प्राथमिकतामा राख्दै पालिकाहरूले बजेट ल्याएका हुन् ।
अन्तरसरकारी वित्तीय व्यवस्थापन ऐन, २०७४ को दफा २१ अनुसार प्रत्येक स्थानीय तहले असार १० गतेभित्र आगामी आर्थिक वर्षको आय–व्यय अनुमान सम्बन्धित नगरसभा वा गाउँसभामा पेश गर्नुपर्ने कानुनी व्यवस्था अनुसार बजेट सार्वजनिक गरिएको हो । संघीय तथा प्रदेश सरकारबाट प्राप्त हुने वित्तीय समानीकरण, सशर्त, विशेष तथा समपूरक अनुदानसँगै आन्तरिक आयलाई आधार बनाएर बजेट निर्माण गरिएको जनाइएको छ ।
जिल्लामध्ये सबैभन्दा ठूलो बजेट चन्द्रपुर नगरपालिकाले ल्याएको छ । १७ औँ नगरसभाबाट पारित बजेटअनुसार चन्द्रपुरले आगामी आर्थिक वर्षका लागि १ अर्ब २१ करोड ८० लाख रुपैयाँको बजेट सार्वजनिक गरेको हो । चन्द्रनिगाहपुरस्थित होटल ए.एन. प्लाजामा आयोजित नगरसभामा नगर उपप्रमुख जयमाला चौधरीले बजेट प्रस्तुत गरेकी थिइन् ।
त्यसैगरी गौर नगरपालिकाले ५३ करोड ८८ लाख १२ हजार रुपैयाँ बराबरको बजेट सार्वजनिक गरेको छ । १८ औँ नगरसभामा नगर प्रमुख शम्भु साहले समग्र विकास, सुशासन र समृद्धिलाई केन्द्रमा राख्दै बजेट प्रस्तुत गरेका हुन् । राजदेवी नगरपालिकाले ५० करोड ९० लाख ४० हजार रुपैयाँको बजेट सर्वसम्मत रूपमा पारित गरेको छ । नगर प्रमुख भिखारी यादवले सीमित स्रोत–साधनको अधिकतम उपयोग गर्दै स्वरोजगार सिर्जना तथा आधारभूत सेवाको गुणस्तर सुधारलाई प्राथमिकतामा राखिएको बताए । परोहा नगरपालिकाले ६८ लाख ९७ हजार ४ सय ४४ रुपैयाँको बजेट सार्वजनिक गरेको छ ।
नगर प्रमुख शेख वकिलका अनुसार शिक्षा, सामाजिक विकास, महिला सशक्तीकरण, कृषि आधुनिकीकरण, पर्यटन तथा युवा रोजगारीलाई मुख्य प्राथमिकता दिइएको छ । बजेटले कृषि व्यवसायीकरण, महिला उद्यमशीलता, सहकारी सुधार तथा युवालाई स्वरोजगारमुखी कार्यक्रममार्फत आर्थिक समृद्धिको लक्ष्य लिएको छ । मौलापुर नगरपालिकाले आगामी आर्थिक वर्षका लागि ४२ करोड ३० लाख १ हजार रुपैयाँको बजेट ल्याएको छ । नगरपालिकाले ‘नगर मास्टर’ र ‘नगर डाक्टर’ कार्यक्रमलाई निरन्तरता दिनुका साथै निःशुल्क बिजुली, निःशुल्क खानेपानी तथा ‘छोरीसँग मेयर कार्यक्रम’लाई पनि निरन्तरता दिएको छ ।
साथै दलित समुदायका लागि नमूना एकीकृत दलित बस्ती निर्माण तथा ‘कच्ची सडक मुक्त नगर’ अभियानलाई अघि बढाउने घोषणा गरिएको छ। नगर प्रमुख रीना साहले यी कार्यक्रमले मौलापुरलाई आधुनिक र समृद्ध नगरका रूपमा स्थापित गर्ने विश्वास व्यक्त गरिन् । दुर्गाभगवती गाउँपालिकाले ३९ करोड ३८ लाख ८१ हजार रुपैयाँको बजेट सार्वजनिक गरेको छ । शिक्षा, कृषि, स्वास्थ्य, पर्यटन, पूर्वाधार विकास तथा रोजगारी सिर्जनालाई प्राथमिकतामा राख्दै ‘समृद्ध गाउँपालिका, सुखी नागरिक’ अभियानलाई प्रभावकारी रूपमा कार्यान्वयन गर्ने लक्ष्य लिइएको छ ।
यमुनामाई गाउँपालिकाले पनि आगामी आर्थिक वर्षका लागि ३६ करोड ९ लाख ८२ हजार रुपैयाँ बराबरको बजेट सार्वजनिक गरेको छ । यद्यपि जिल्लाका तीन स्थानीय तह फतुवा विजयपुर नगरपालिका, कटहरिया नगरपालिका र गरुडा नगरपालिकाले भने निर्धारित समयभित्र बजेट सार्वजनिक गर्न सकेनन्। ती पालिकाहरूमा बजेट प्रस्तुत हुन नसक्नुको कारण खुलाइएको छैन् । जिल्लाका अधिकांश स्थानीय तहले कृषि उत्पादन वृद्धि, उद्यमशीलता विकास, सेवा प्रवाहमा सुधार तथा पूर्वाधार विस्तारलाई प्राथमिकता दिएका छन् । तर सीमित आन्तरिक आम्दानी र संघीय अनुदानमाथिको उच्च निर्भरता आगामी आर्थिक वर्षमा पनि स्थानीय सरकारका लागि प्रमुख चुनौतीका रूपमा रहने देखिएको छ ।
शिवनाथ कुशवाहा ,रौतहट,०८ गते असार ।
रौतहटको गुजरा नगरपालिका को १४औँ नगरसभाले आगामी आर्थिक वर्षका लागि कुल ५६ करोड २५ लाख ७० हजार रुपैयाँको अनुमानित बजेट सार्वजनिक गरेको छ । नगरसभामा चालु तर्फ ३२ करोड ६४ लाख १ हजार रुपैयाँ तथा पुँजीगत तर्फ २३ करोड ६१ लाख ६९ हजार रुपैयाँ खर्चको अनुमान प्रस्तुत गरिएको छ । नगरप्रमुख सन्तलाल चौधरी ले नगरसभाको अध्यक्षता गर्दै विकास, सुशासन र जनमुखी सेवा प्रवाहलाई केन्द्रमा राखेर बजेट ल्याइएको बताउनुभयो ।
उपप्रमुख रत्ना लामाले नगरको समग्र विकास र जनअपेक्षा सम्बोधन गर्ने कार्यक्रमहरू बजेटमा समेटिएको उल्लेख गर्नुभयो । प्रमुख प्रशासकीय अधिकृत डमरु दाहालले बजेट तथा कार्यक्रम कार्यान्वयनमा प्रशासन प्रतिबद्ध रहेको जानकारी दिनुभयो । लेखापाल शैलेन्द्र श्रीवास्तवले प्रस्तुत बजेट नगरपालिकाको आन्तरिक आम्दानी, राजस्व बाँडफाँट, संघीय तथा प्रदेश सरकारबाट प्राप्त हुने अनुदानलाई आधार बनाएर तयार गरिएको बताउँदै विकास निर्माण, सेवा प्रवाह र संस्थागत सुदृढीकरणलाई प्राथमिकतामा राखिएको जानकारी दिनुभयो ।
नगरसभामा सबै वडाका वडा अध्यक्ष, वडा सदस्य, कर्मचारी तथा अन्य सरोकारवालाहरूको उपस्थिति रहेको थियो । सभाले आगामी आर्थिक वर्षका लागि प्रस्तावित बजेट, नीति तथा कार्यक्रम पारित गरेको जनाएको छ ।
आरके श्रीवास्तव,रौतहट,०८ गते असार । रौतहटको इलाका प्रहरी कार्यालय मौलापुरको आयोजनामा सोमबार लागुऔषध दुव्र्यसनविरुद्ध जनचेतनामूलक कार्यक्रम सम्पन्न गरिएको छ । कार्यालय प्रमुख प्रहरी निरीक्षक भरत के.सी.को नेतृत्वमा मौलापुर नगरपालिका–८, सोनरनियास्थित श्री जनता माध्यमिक विद्यालयमा अध्ययनरत कक्षा ८, ९ र १० का विद्यार्थीहरूलाई लक्षित गरी कार्यक्रम सञ्चालन गरिएको हो ।
कार्यक्रममा विद्यार्थीहरूलाई लागुऔषधको प्रयोगबाट हुने शारीरिक, मानसिक तथा सामाजिक असरका बारेमा जानकारी गराइएको थियो । साथै, लागुऔषधको कुलतबाट टाढा रहन, स्वस्थ जीवनशैली अपनाउन तथा समाजमा बढ्दो दुव्र्यसन नियन्त्रणमा युवाहरूको भूमिका महत्वपूर्ण रहने विषयमा समेत सचेतना प्रदान गरिएको थियो । प्रहरी निरीक्षक भरत के.सी.ले विद्यार्थीहरूलाई लागुऔषधको दुष्प्रभावबारे जानकारी दिँदै यसको प्रयोगले व्यक्ति, परिवार र समाजमा गम्भीर असर पार्ने भएकाले यसबाट बच्न आग्रह गर्नुभयो ।
कार्यक्रममा सहभागी विद्यार्थीहरूले समेत लागुऔषधविरुद्ध सचेत रहने र अरूलाई पनि सचेत गराउने प्रतिबद्धता व्यक्त गरेका थिए । विद्यार्थीहरूमा सकारात्मक सोचको विकास गर्दै लागुऔषध दुव्र्यसन न्यूनीकरण गर्ने उद्देश्यले सञ्चालन गरिएको उक्त कार्यक्रम प्रभावकारी तथा उपलब्धिमूलक रहेको आयोजकले जनाएको छ ।
शिवनाथ कुशवाहा ,रौतहट,०८ गते असार ।
रौतहटको फतुवा विजयपुर नगरपालिका अन्तर्गत रहेको इलाका प्रहरी कार्यालय विजयपुर लक्ष्मिनियाका इन्चार्ज प्रहरी निरीक्षक सुरेन्द्र यादवको सफल कार्यकाल पूरा भई सरुवा भएपछि उहाँलाई मायाको चिनो प्रदान गर्दै भावपूर्ण बिदाइ गरिएको छ । कार्यक्रममा सहभागीहरूले इन्स्पेक्टर यादवले आफ्नो कार्यकालमा शान्ति सुरक्षा कायम गर्न, अपराध नियन्त्रण तथा नागरिकमैत्री प्रहरी सेवाको प्रवद्र्धन गर्न महत्वपूर्ण योगदान पु¥याएको उल्लेख गर्दै आगामी जिम्मेवारीका लागि शुभकामना व्यक्त गरेका थिए । यस अवसरमा सरुवा भई जाने क्रममा इन्स्पेक्टर सुरेन्द्र यादवलाई सफल र उज्ज्वल भविष्यको कामना गर्दै सम्मानसहित बिदाइ गरिएको थियो ।
त्यसैगरी, इलाका प्रहरी कार्यालय विजयपुर लक्ष्मिनियाको नयाँ इन्चार्जका रूपमा पदस्थापन भई आउनुभएका प्रहरी निरीक्षक रादेश खत्री लाई हार्दिक स्वागत गरिएको छ । स्थानीय सरोकारवाला तथा शुभेच्छुकहरूले इन्स्पेक्टर खत्रीको नेतृत्वमा यस क्षेत्रको शान्ति सुरक्षा व्यवस्था अझ प्रभावकारी र सुदृढ हुने विश्वास व्यक्त गरेका छन् । नवनियुक्त इन्चार्ज खत्रीलाई सफल कार्यकालको शुभकामना दिँदै समुदाय र प्रहरीबीचको सहकार्यलाई अझ मजबुत बनाउने अपेक्षा समेत व्यक्त गरिएको छ ।
शिवनाथ कुशवाहा ,रौतहट,०८ गते असार ।
रौतहटको बौधीमाई नगरपालिकाको १२ औँ नगरसभा तथा अधिवेशन (खुला सत्र) सोमबार नगरपालिकाको सभाहलमा भव्य रूपमा सम्पन्न भएको छ । नगर प्रमुख प्रदिप कुमार यादवको अध्यक्षतामा सम्पन्न सभामा नगर उपप्रमुख प्रमिला देवी विशिष्ट अतिथिका रूपमा सहभागी हुनुभएको थियो ।
सभामा आगामी आर्थिक वर्ष २०८३÷०८४ का लागि ६३ करोड १६ लाख ४ हजार रुपैयाँ रुपैयाँको बजेट, नीति तथा कार्यक्रम प्रस्तुत गरिएको थियो । प्रस्तुत बजेटले नगरको चौतर्फी विकास, आर्थिक समृद्धि तथा जनआकांक्षा सम्बोधन गर्ने लक्ष्य लिएको नगरपालिकाले जनाएको छ ।
कार्यक्रममा जनप्रतिनिधि, राष्ट्रसेवक कर्मचारी, पत्रकार तथा नगरवासीहरूको उल्लेखनीय सहभागिता रहेको थियो । नगरपालिकाका प्रमुख प्रशासकीय अधिकृत उदयशंकर चौधरी ले सभा सफलतापूर्वक सम्पन्न भएको जानकारी दिनुभयो । नगर प्रमुख प्रदिप कुमार यादवले सभा सफल बनाउन सहयोग पु¥याउने सम्पूर्ण जनप्रतिनिधि, कर्मचारी, सञ्चारकर्मी तथा नगरवासीप्रति हार्दिक धन्यवाद तथा आभार व्यक्त गर्नुभएको छ । यो अधिवेशन बौधीमाई नगरपालिका को आगामी आर्थिक वर्षको विकास योजना तथा बजेट पारित गर्ने महत्वपूर्ण मञ्चका रूपमा सम्पन्न भएको हो ।
आरके श्रीवास्तव,रौतहट,०८ गते असार ।
रौतहटको दक्षिणी भेगस्थित इशनाथ नगरपालिका को १३औँ नगरसभा सम्पन्न भएको छ । नगरसभामा आगामी आर्थिक वर्ष २०८३÷८४ का लागि ५२ करोड ३० लाख ७० हजार रुपैयाँको बजेट प्रस्तुत गरिएको छ । नगरसभामा नगरको समग्र विकास, आधारभूत सेवा प्रवाहको सुदृढीकरण, पूर्वाधार निर्माण, शिक्षा, स्वास्थ्य, कृषि तथा सामाजिक विकासलाई प्राथमिकतामा राख्दै बजेट प्रस्तुत गरिएको हो ।
नगरसभालाई सम्बोधन गर्दै नगरप्रमुख कौश्लया देवीले नगरवासीको आवश्यकता र अपेक्षालाई केन्द्रमा राखेर बजेट तथा कार्यक्रम तर्जुमा गरिएको बताइन् । उनले सीमित स्रोत–साधनका बाबजुद नगरको दिगो विकास, सुशासन र जनमैत्री सेवा प्रवाहलाई थप प्रभावकारी बनाउने प्रतिबद्धता व्यक्त गरिन् ।
नगरप्रमुख देवीले विकास निर्माणका कार्यलाई पारदर्शी र परिणाममुखी बनाउँदै नगरलाई समृद्धिको दिशामा अघि बढाइने बताइन् । त्यसैगरी उपप्रमुख मो.परवेजले प्रस्तुत बजेटले नगरका सबै वडालाई समेट्ने गरी सन्तुलित विकासको अवधारणालाई आत्मसात गरेको बताए । उनले शिक्षा, स्वास्थ्य, खानेपानी, कृषि तथा रोजगारी सिर्जनासँग सम्बन्धित कार्यक्रमलाई प्रभावकारी रूपमा कार्यान्वयन गरिने उल्लेख गरे ।
नगरसभामा बोल्दै प्रमुख प्रशासकिय अधिकृत महमद नावाज हुसेनले बजेट कार्यान्वयनलाई पारदर्शी, उत्तरदायी र प्रभावकारी बनाइने बताए । उनले नगरपालिकाको प्रशासनिक संयन्त्रलाई थप चुस्त बनाउँदै सेवा प्रवाहमा सुधार ल्याउने तथा विकास योजनाको समयमै सम्पन्नतामा विशेष ध्यान दिइने जानकारी दिए ।
नगरसभाबाट आगामी आर्थिक वर्षका नीति, कार्यक्रम तथा बजेटमाथि छलफल गरी आवश्यक निर्णयहरू समेत पारित गरिएको जनाइएको छ । नगरपालिकाले प्रस्तुत बजेटमार्फत पूर्वाधार विकास, सामाजिक क्षेत्रको सुदृढीकरण तथा आर्थिक गतिविधिको प्रवद्र्धनलाई प्राथमिकतामा राखेको जनाएको छ ।
शिवनाथ कुशवाहा ,रौतहट,०८ गते असार । रौतहट । गढीमाई नगरपालिकाको १३औँ नगरसभा सम्पन्न भएको छ । नगरसभामा आर्थिक वर्ष २०८३÷०८४ का लागि ५९ करोड २२ लाख ५५ हजार रुपैयाँ बराबरको अनुमानित आय–व्यय, नीति तथा कार्यक्रम नगर प्रमुख श्याम प्रसाद यादवले एक कार्यक्रमबीच प्रस्तुत गर्नुभएको छ । नगरसभाको उद्घाटन मधेश प्रदेशका मुख्यमन्त्री कृष्ण प्रसाद यादवले दीप प्रज्वलन गरी गर्नुभएको थियो ।
उद्घाटन समारोहलाई सम्बोधन गर्दै मुख्यमन्त्री यादवले गढीमाई नगरपालिकाको विकास तथा सञ्चालनका लागि चालु आर्थिक वर्षमा मधेश प्रदेश सरकारबाट ३० करोड रुपैयाँ बजेट विनियोजन गरिएको जानकारी दिनुभयो । उहाँले आफू मुख्यमन्त्री रहेसम्म नगरपालिकाभित्रका अधुरा विकास योजनाहरू सम्पन्न गर्ने प्रतिबद्धता व्यक्त गर्दै प्रतिनिधिसभा क्षेत्र नम्बर–४ अन्तर्गत पर्ने यस क्षेत्रलाई अन्य स्थानीय तहका लागि नमुना नगरका रूपमा स्थापित गरिने बताउनुभयो ।
मुख्यमन्त्री यादवले मधेश प्रदेशका किसानहरूलाई खेतीपातीका लागि पर्याप्त विद्युत् सुविधा उपलब्ध हुन नसकेको उल्लेख गर्दै सिँचाइ तथा कृषि कार्यलाई सहज बनाउन किसानहरूका लागि सोलार चार्जबाट सञ्चालन हुने बत्ती जडान गर्ने योजना रहेको समेत जानकारी दिनुभयो । कार्यक्रममा नगर उपप्रमुख स्मिता कुमारी यादव, प्रमुख प्रशासकीय अधिकृत इन्द्रदेव पाण्डेय, वडा नम्बर १ देखि ९ सम्मका निर्वाचित जनप्रतिनिधि, वडा अध्यक्षहरू, नगरपालिकाका कर्मचारी, महिला नगर प्रहरी, नेपाल प्रहरी तथा विभिन्न क्षेत्रका सयौँ सर्वसाधारणको उपस्थिति रहेको थियो ।
नगरसभामा प्रस्तुत बजेट तथा नीति–कार्यक्रममार्फत पूर्वाधार विकास, शिक्षा, स्वास्थ्य, कृषि तथा सामाजिक क्षेत्रलाई प्राथमिकतामा राख्दै समग्र नगरको दिगो विकासलाई अघि बढाउने लक्ष्य लिइएको नगरपालिकाले जनाएको छ । यद्यपि, सभामा बोल्ने अवसर नदिएको भन्दै वडा नम्बर १ का वडाध्यक्ष रामपुकार यादव ले असन्तुष्टि जनाउनुभएको छ । उहाँले नगरसभा औचित्यहीन बनेको आरोप समेत लगाउनुभएको छ ।
शिवनाथ कुशवाहा,रौतहट, असार ५ — कटहरिया नगरपालिकामा ‘कुपोषण मुक्त मधेश प्रदेश अभियान’ अन्तर्गत पालिका स्तरीय अन्तरक्रिया तथा बहस पैरवी कार्यक्रम सम्पन्न भएको छ। कार्यक्रम शुक्रबार कटहरिया नगरपालिका–५ स्थित श्री जनता माध्यमिक विद्यालय, कटहरियामा आयोजना गरिएको हो।
मधेश प्रदेश सरकार, स्वास्थ्य तथा जनसङ्ख्या मन्त्रालय अन्तर्गत स्वास्थ्य निर्देशनालय तथा स्वास्थ्य कार्यालय गौर, रौतहटको आयोजनामा सम्पन्न कार्यक्रममा कुपोषण न्यूनीकरण, बालबालिकाको स्वास्थ्य संरक्षण तथा पोषणयुक्त खानपानको महत्वबारे जन स्वास्थ्य कार्यालयका संयोजक सञ्जीव कुमार यादवले जानकारी दिनुभयो ।
कार्यक्रममा वक्ताहरूले बालबालिकालाई कुपोषणबाट जोगाउन सन्तुलित र पोषणयुक्त आहारको आवश्यकता, नियमित स्वास्थ्य परीक्षण तथा अभिभावकको भूमिकाबारे प्रकाश पारे। उनीहरूले कुपोषणको प्रमुख कारणमध्ये कम उमेरमा हुने विवाह पनि एक रहेको उल्लेख गर्दै कानुनी उमेर नपुगी विवाह नगर्न तथा समाजमा बालविवाहका घटना भए सम्बन्धित निकायमा उजुरी गर्न कटहरिया नगरपालिका का स्वास्थ्य संयोजक दिनेश यादवले आग्रह गरे ।
सहभागीहरूलाई कुपोषणका कारण, असर तथा यसको रोकथामका उपायबारे जानकारी दिँदै स्वस्थ र समृद्ध समाज निर्माणका लागि सबैको साझा प्रयास आवश्यक रहेको धारणा व्यक्त गरिएको थियो।
कार्यक्रममा पत्रकार आर.के. श्रीवास्तव, सागर संगम, रामअधार यादव, शिवनाथ कुशवाहा, रुपेश यादव, कृष्ण तिवारी लगायत बुद्धिजीवी, समाजसेवी, स्वास्थ्यकर्मी तथा स्थानीय भद्रभलाद्मीहरूको उल्लेखनीय उपस्थिति रहेको थियो।
आयोजकका अनुसार कुपोषणमुक्त मधेश प्रदेश निर्माण गर्ने लक्ष्यका साथ प्रदेशका विभिन्न स्थानीय तहमा यस्ता जनचेतनामूलक कार्यक्रम सञ्चालन भइरहेका छन्। कार्यक्रमले समुदायस्तरमा पोषणसम्बन्धी सचेतना अभिवृद्धि गर्न तथा बालबालिकाको स्वास्थ्य सुधारमा सकारात्मक योगदान पुर्याउने अपेक्षा गरिएको छ।
रौतहट । गौर नगरपालिका–२ मा अवस्थित श्री राम लखन हरि साह गुरुकुल विद्यापीठ ले प्राक् शास्त्री कक्षा सञ्चालन गर्ने अनुमति प्राप्त गरेको छ। संस्कृत शिक्षा तथा अध्ययनको प्रवर्द्धन गर्ने उद्देश्यले सञ्चालन हुन लागेको उक्त कक्षामा विद्यार्थीहरूलाई संस्कृत भाषाको आधारभूत तथा उच्च अध्ययनका लागि आवश्यक ज्ञान प्रदान गरिने विद्यालयले जनाएको छ।
प्राक् शास्त्री संस्कृत अध्ययनको क्षेत्रमा उच्च शिक्षा अर्थात् शास्त्री वा बी.ए. तहमा प्रवेश गर्नुअघि लिइने ६ महिने वा १ वर्षे ब्रिज कोर्स (संस्कृत भाषा प्रशिक्षण) हो। यस पाठ्यक्रमले संस्कृत भाषा, व्याकरण तथा शास्त्रीय विषयहरूको आधार निर्माण गर्दै उच्च अध्ययनका लागि विद्यार्थीलाई तयार पार्ने विश्वास गरिएको छ।
विद्यालयका अनुसार प्राक् शास्त्री तहमा दुई वटा अनिवार्य विषय समावेश गरिएको छ। ती विषयहरूमा अनिवार्य संस्कृत व्याकरणम् र अनिवार्य संस्कृतभाषा वाङ्मयम् रहेका छन्।
त्यसैगरी विद्यार्थीहरूले आफ्नो रुचिअनुसार ऐच्छिक विषय छनोट गर्न सक्ने व्यवस्था गरिएको छ। ऐच्छिक विषयहरूमा संस्कृत व्याकरणम्, न्याय, ज्योतिषम् तथा वेद रहेका छन्।
गुरुकुल विद्यापीठले प्राक् शास्त्री कक्षा सञ्चालनको अनुमति प्राप्त भएसँगै रौतहट तथा आसपासका क्षेत्रका संस्कृत अध्ययनमा रुचि राख्ने विद्यार्थीहरूलाई स्थानीय स्तरमै गुणस्तरीय संस्कृत शिक्षा हासिल गर्ने अवसर प्राप्त हुने अपेक्षा गरिएको छ। विद्यालय प्रशासनले चाँडै नै भर्ना प्रक्रिया तथा कक्षा सञ्चालन सम्बन्धी थप जानकारी सार्वजनिक गर्ने जनाएको छ।
