संजय गुप्ता,सर्लाही,२०८२ जेठ १३ गते ।
बरहथवा — सर्लाही जिल्लाको बरहथवा नगरपालिका–३ स्थित श्री जनता आधारभूत विद्यालयमा दुई तले नयाँ विद्यालय भवनको शिलान्यास गरिएको छ । एक विशेष समारोहका बीच लोकतान्त्रिक समाजवादी पार्टी (लोसपा) नेपालका केन्द्रीय सदस्य प्रमोद प्रसाद रौनियारले भवनको शिलान्यास गरेका हुन् ।
मधेश प्रदेश सरकारको ४० लाख रुपैयाँको बजेटबाट निर्माण हुने उक्त भवनले विद्यालयको भौतिक संरचना मजबुत पार्ने विश्वास लिइएको छ । कार्यक्रममा विद्यालय व्यवस्थापन समिति अध्यक्ष भिमप्रसाद सापकोटा, सदस्य विजय महतो, वडा सदस्य रामउदेस महतो, माओवादी केन्द्रका नेता विरेन्द्र महतो, लोसपा जिल्ला सदस्य रविन्द्र यादव, दिनेश यादव लगायतको उपस्थिति रहेको थियो ।
शिलान्यास कार्यक्रममा वक्ताहरूले गुणस्तरीय शिक्षा प्रदान गर्न विद्यालयको पूर्वाधार सुदृढ हुनु आवश्यक रहेको धारणा राखेका थिए । भवन निर्माण सम्पन्न भएपछि विद्यार्थिहरूको सिकाइ वातावरण थप सहज र प्रभावकारी हुने अपेक्षा गरिएको छ ।
आरके श्रीवास्तव, रौतहट, २०८२ जेठ १२ ।
रौतहटको चन्द्रपुर नगरपालिका स्थित होटल आरोहीमा सोमबार साइबर सुरक्षा र कृत्रिम बुद्धिमत्ता (एआई) सम्बन्धी एकदिने अभिमुखीकरण कार्यक्रम सम्पन्न भएको छ । कार्यक्रम आमसञ्चार प्राधिकरण मधेस प्रदेशको आयोजनामा तथा नेपाल पत्रकार महासंघ रौतहटको समन्वयमा आयोजना गरिएको थियो ।
कार्यक्रमको पहिलो सत्रमा उद्घाटन चन्द्रपुर नगरपालिकाका प्रमुख सञ्जय काफ्लेले गरेका थिए । कार्यक्रम आमसञ्चार प्राधिकरण मधेस प्रदेशका अध्यक्ष जितेन्द्र खडकाको अध्यक्षतामा सम्पन्न भएको हो । कार्यक्रम सञ्चालन नेपाल पत्रकार महासंघ रौतहटका सचिव गौतम श्रेष्ठले गरेका थिए ।
कार्यक्रमको दोस्रो सत्रमा एआई अध्येता तथा अभ्यासकर्ता जीवन भण्डारीले एआईको प्रयोग, प्रभाव र सम्भावनाका विषयमा प्रशिक्षण दिएका थिए । तेस्रो सत्रमा पत्रकार प्रकाश मैनालीले डिजिटल मिडियाका अवसर र चुनौतीबारे सहजीकरण गरेका थिए ।
कार्यक्रमका प्रमुख अतिथि चन्द्रपुरका नगरप्रुख काफ्लेले पत्रकारिता राष्ट्रलाई अग्रगामी दिशा देखाउने माध्यम भएको उल्लेख गर्दै लुकेका तथ्यहरू उजागर गरी समाजमा नयाँ आयाम दिन पत्रकारको भूमिका महत्वपूर्ण रहेको बताए ।
नेपाल पत्रकार महासंघ रौतहटका पूर्व अध्यक्ष प्रेमचन्द्र झाले अभिमुखीकरण कार्यक्रमले पत्रकारहरूलाई समाजप्रति उत्तरदायी र सुसूचित बनाउने दृष्टिकोण प्रदान गर्ने बताए । पूर्व केन्द्रीय सदस्य शिवपुरीले कार्यक्रम आयोजना गरेकोमा आमसञ्चार प्राधिकरणलाई धन्यवाद दिंदै पत्रकारले यस्ता विषयमा ज्ञान लिन आवश्यक रहेको उल्लेख गरेका थिए ।
नेपाल पत्रकार महासंघ राैतहटकी उपाध्यक्ष विनाराउत श्रीवास्तवले प्रविधिको विकाससँगै पत्रकारितामा नयाँ पुस्ताको अग्रसरता उल्लेखनीय रूपमा देखिएको बताएकी छन् ।
उनले अहिलेको डिजिटल युगमा पत्रकारिता पनि तीव्र रूपमा परिवर्तन हुँदै गएको उल्लेख गरिन्। उनले भनिन्, “प्रविधिले नयाँ पुस्ताका पत्रकारलाई धेरै अगाडि लगिसकेको छ। उनीहरूले प्रविधिको सही उपयोगमार्फत समाचार संकलन, सम्प्रेषण र विश्लेषणमा नयाँ आयाम थपिरहेका छन्।”
एआई (कृत्रिम बुद्धिमत्ता) को प्रयोगबारे पनि उनले सबै पत्रकारले आधारभूत ज्ञान लिनुपर्ने आवश्यकता औंल्याइन् । “आजको पत्रकारितामा एआईको भूमिका बढ्दो छ, त्यसैले यसको प्रयोग, सम्भावना र चुनौतीबारे सबैले जान्न जरुरी छ,” उनले भनिन् ।
आमसञ्चार प्राधिकरण मधेस प्रदेशका अध्यक्ष जितेन्द्र खडकाले प्रविधिसँग नजिक रहेका पत्रकारहरूलाई दक्ष बनाउने उद्देश्यले यस्तो कार्यक्रम आयोजना गरिएको जानकारी दिए । उनले मोफसलमा कार्यरत पत्रकारहरूलाई साइबर सुरक्षा र एआईसम्बन्धी जोखिमबारे सजग गराउने उद्देश्यले तालिम दिइएको बताए ।
त्यसैगरी, प्रमुख प्रशासकीय अधिकृत प्रशन्नराज कर्णले मधेस प्रदेशका आठै जिल्लामा यस्ता कार्यक्रम सञ्चालन भइरहेको जानकारी दिँदै पत्रकारहरूलाई यसको लाभ पुग्ने विश्वास व्यक्त गरेका छन् । कार्यक्रम सफल पार्न सहयोग गर्ने सम्पूर्णमा धन्यवाद ज्ञापन गरिएको थियो ।
कार्यक्रममा सञ्चारकर्मीहरू, विभिन्न सञ्चार माध्यमका प्रतिनिधिहरू र पत्रकारहरूको समेत उल्लेख्य उपस्थिति रहेको थियो ।
आरके श्रीवास्तव,राैतहट,१२ गते जेठ ।
रौतहट जिल्लाको फतुवा बिजयपुर नगरपालिका–१, बैरगनियामा करिब २५ लाख रुपैयाँको लागतमा सडक स्तरोन्नति तथा आरसीसी ढलान कार्यको शिलान्यास सम्पन्न भएको छ । मधेश प्रदेश सरकार अन्तर्गत भौतिक पूर्वाधार विकास मन्त्रालयको बजेटमा निर्माण हुने यस योजनाले ग्रामीण क्षेत्रको यातायात र पूर्वाधारमा उल्लेखनीय सुधार ल्याउने विश्वास गरिएको छ ।
शिलान्यास कार्यक्रममा प्रदेश सांसद तथा पूर्व राज्यमन्त्री केशव राय चौधरी प्रमुख अतिथिका रूपमा सहभागी भएका थिए । उनले कार्यक्रममा बोल्दै भने, “यो योजना केवल सडक निर्माणको कार्य होइन, यो यहाँको जनताको जीवनशैलीमा परिवर्तन ल्याउने माध्यम हो। यातायात सुगम भएपछी शिक्षा, स्वास्थ्य र व्यापार सबै क्षेत्रमा सकारात्मक प्रभाव पर्छ। हामी जनताको सेवा र विकासमा सधैं प्रतिवद्ध छौं ।”
उनले थपे, “सरकारले ग्रामीण भेगका आधारभूत पूर्वाधार निर्माणमा प्राथमिकता दिएको छ। यसरी एकपछि अर्को विकास आयोजना कार्यान्वयनमा आउँदा मात्र समृद्ध मधेश निर्माण सम्भव हुन्छ ।”
स्थानीय जनप्रतिनिधि, समाजसेवी तथा सर्वसाधारणको उल्लेखनीय उपस्थिति रहेको कार्यक्रममा सहभागीहरूले आगामी दिनमा थप यस्ता योजनाको अपेक्षा व्यक्त गरेका थिए ।
सागर संगम ठाकुर, रौतहट, ११ गते जेठ ।
रौतहटको देवाही गोनाही नगरपालिका–९ धरहरीमा स्थानीय किसानहरूलाई स्प्रे टंकी वितरण गरिएको छ । वडा अध्यक्ष वीर बहादुर साहको अगुवाइमा आयोजित कार्यक्रममा कृषि उत्पादन वृद्धिको उद्देश्यका साथ किसानहरूलाई यो उपकरण वितरण गरिएको हो ।
वडा अध्यक्ष साहले आर्थिक वर्ष २०८१/८२ को वडा स्तरीय योजनाअन्तर्गत कूल ५ लाख रुपैयाँको लागतमा खरिद गरिएका स्प्रे टंकी १११ जना किसानलाई वितरण गरिने जानकारी दिए । “कृषिप्रति आश्रित किसानहरूको समस्यालाई ध्यानमा राख्दै स्प्रे टंकी वितरण गरिएको हो, यसले बालीको संरक्षणमा सहयोग पुर्याउने विश्वास लिएको छु,” अध्यक्ष साहले बताए ।
शनिबार वडा कार्यालयमा आयोजित औपचारिक कार्यक्रममा देवाही गोनाही नगरपालिकाका मेयर प्रेमलाल साह र उपमेयर परनिया देवी पटेलले संयुक्तरूपमा किसानहरूलाई स्प्रे टंकी हस्तान्तरण गरे।कार्यक्रममा वडा सदस्य खुबलाल दास, महिला सदस्य संजोगिया देवी, प्रमिला देवी तथा स्थानीय बुद्धिजीवी र समाजसेवीहरूको उल्लेखनीय उपस्थिति रहेको थियो ।
आरके श्रीवास्तव,राैतहट,२०८२ जेठ १२ गते ।
लोकतान्त्रिक पत्रकार संघ नेपालको केन्द्रीय नेतृत्वले पर्सा जिल्लाको संयोजकमा समसुदीन मियालाई मनोनीत गरेको छ । संघको संशोधित विधानअनुसार मधेश प्रदेश अन्तर्गत पर्सा जिल्लामा मियालाई संयोजकको जिम्मेवारी दिइएको हो ।
संघका केन्द्रीय अध्यक्ष कामरेन्द्र वर्माको नेतृत्वमा संघले हालसम्म मधेश प्रदेशका ६ जिल्लामा संयोजक मनोनीत गरिसकेको छ । यसअघि बारा जिल्लामा विनोद प्रजापति, रौतहटमा राजु कुमार श्रीवास्तव, सर्लाहीमा राजिव कुमार साह, महोत्तरीमा राजिव राय कुर्मी र सिरहामा विसुनदेव सरदारलाई संयोजकको जिम्मेवारी दिइएको थियो ।
संघले पर्सा संयोजकमा मियालाई मनोनीत गर्दै देश, मधेश, पत्रकारिता र पार्टीको हितमा उहाँको कार्यकाल उल्लेखनीय हुने विश्वास व्यक्त गरेको छ । अध्यक्ष वर्माले संयोजक मनोनयनमार्फत मधेशमा पत्रकार संगठनलाई अझ सशक्त बनाउने अभियानलाई तीव्रता दिएका छन् ।
संघले बाँकी जिल्लामा पनि चाँडै संयोजक तोक्ने तयारी गरिरहेको जनाएको छ ।
आरके श्रीवास्तव,राैतहट,११ गते जेठ ।
लोकतान्त्रिक पत्रकार संघको संशोधित विधानअनुसार विष्णुदेव सरदारलाई मधेश प्रदेश अन्तर्गत सिरहा जिल्लाको संयोजक पदमा मनोनीत गरिएको छ ।
संघका केन्द्रीय अध्यक्ष कामरेन्द्र वर्माले सरदारलाई मनोनयन गर्दै शुभकामना व्यक्त गरेका छन्। अध्यक्ष वर्माले भने, “देश, मधेश, पत्रकारिता तथा पार्टीको हितमा उहाँको कार्यकाल उल्लेखनीय रहनेमा पूर्ण विश्वास छ ।”
विष्णुदेव सरदार सिरहा जिल्लाबाट सक्रिय पत्रकार हुन् र ‘सजिलो पोस्ट’ अनलाइन समाचार पोर्टलका सम्पादक समेत हुन् ।
उनको मनोनयनप्रति पत्रकार समाज तथा विभिन्न क्षेत्रबाट बधाई तथा शुभकामना व्यक्त गरिएको छ । लाेकतान्त्रिक पत्रकार संंघले अध्यक्ष कामरेन्द्र वर्माकाे नेतृत्वमा उल्लेखनीय प्रगति गरिरहेकाे छ ।
अहिलेसम्म संघले मधेस प्रदेशका चार जिल्लामा संयोजक तोकिसकेको छ । बारा जिल्लामा विनोद प्रजापति, रौतहटमा राजु कुमार श्रीवास्तव, सर्लाहीमा राजिव कुमार साह तथा महोत्तरीमा राजिव राय कुर्मी जिल्ला संयोजकको रूपमा चयन भएका छन् ।
संजय गुप्ता,सर्लाही,११ गते जेठ ।
बरहथवा— सर्लाही जिल्लाको बरहथवा नगरपालिका वडा नम्बर ३ मा रहेको श्री सरस्वती माध्यमिक विद्यालय, हजरियामा नयाँ दुईकोठे विद्यालय भवनको शिलान्यास गरिएको छ । विद्यालय भवनको शिलान्यास लोकतान्त्रिक समाजवादी पार्टी (लोसपा) नेपालका केन्द्रीय सदस्य प्रमोद प्रसाद रौनियारले गर्नु भएको हो ।
शिलान्यास समारोहमा बोल्दै नेता रौनियारले शिक्षा क्षेत्रमा पूर्वाधार विकासमार्फत गुणस्तरीय शिक्षा प्रवाह गर्नुपर्ने आवश्यकता औंल्याउँदै भन्नुभयो, “विद्यार्थीहरूले सुरक्षित र शैक्षिक वातावरणमा पढ्न पाउनु उनीहरूको आधारभूत अधिकार हो । आज गरिएको शिलान्यास त्यो अधिकार सुनिश्चितताका लागि एउटा महत्वपूर्ण पाइला हो ।”
उहाँले मधेस प्रदेश सरकारअन्तर्गत शिक्षा तथा संस्कृति मन्त्रालयबाट विनियोजित २५ लाख रुपैयाँको बजेटमा भवन निर्माण कार्य सुरु गरिएको जानकारी दिनुभयो । “प्रदेश सरकारको सहयोगमा हामी गाउँगाउँमा शिक्षाको पहुँच विस्तार गर्ने लक्ष्यमा छौँ,” उहाँले थप भन्नुभयो ।
श्री सरस्वती माविका प्रधानाध्यापक, विद्यालय व्यवस्थापन समिति, शिक्षक, अभिभावक तथा स्थानीय जनप्रतिनिधिहरूको समेत उपस्थिति रहेको कार्यक्रममा रौनियारले शिक्षा नै समाज रुपान्तरणको बलियो माध्यम भएको भन्दै सबैलाई सहकार्यका लागि आग्रह गर्नुभयो ।
नयाँ भवन निर्माणले विद्यालयको पठनपाठन गतिविधिमा थप सुधार आउने विश्वास गरिएको छ ।
आरके श्रीवास्तव,राैतहट,२०८२ जेठ १० गते ।
गरूडा – रौतहटको गरूडामा नवसर्जक साहित्यकारहरूकाे सक्रिय सहभागितामा एकदिने साहित्य सिर्जनात्मक कार्यक्रम सम्पन्न भएको छ । शनिबार गरूडा स्थित नमूना माध्यमिक विद्यालयमा नवसर्जक साहित्य चौतारी नेपाल मधेस प्रदेशकाे आयोजनामा भएको कार्यक्रममा विभिन्न विद्यालयमा अध्ययनरत नवसर्जकहरू सहभागी भएका थिए ।
साहित्यप्रति अभिरुचि बढाउने र कविता लेखनमा उत्प्रेरित गराउने उद्देश्यले आयोजना गरिएको उक्त कार्यक्रमकाे प्रमुख प्रशिक्षककाे रूपमा बज्जिका अभियन्ता तथा साहित्यकार संजय साह मित्रले प्रशिक्षण प्रदान गरेका थिए । उनले कविता लेखनका विभिन्न पाटाहरूमा सहभागीहरूलाई मार्गदर्शन गर्दै साहित्य सिर्जनामा लाग्न प्रेरित गरेका थिए ।
कार्यक्रम नवसर्जक साहित्य चौतारी मधेस प्रदेश अध्यक्ष अभिजित रामको अध्यक्षतामा सम्पन्न भएको थियो । कार्यक्रममा शिक्षक सन्तोष न्यौपाने, धनदेव जोशी र हरि जिसीले पनि नवसर्जकहरूलाई साहित्यिक सिर्जनाको महत्त्व र अभ्यासका तरिकाबारे प्रशिक्षण दिएका थिए ।
कार्यक्रममा बज्जिकाञ्चल मिडिया प्रा.लि.का सञ्चालक आरके श्रीवास्तव, बज्जिकाञ्चल दैनिकका सह-सम्पादक चन्दन यादव, स्थानीय पोस्ट साप्ताहिकका सञ्चालक एवं सम्पादक आरएन पटेल तथा प्रकाशनको तयारीमा रहेको बज्जिदूत साप्ताहिकका प्रकाशक/सम्पादक देवेन्द्र चौधरीले नवसर्जकहरूद्वारा सिर्जित रचनाहरू आ-आफ्ना पत्रपत्रिकामा प्रकाशन गर्ने प्रतिबद्धता जनाएका थिए ।
साहित्यिक गतिविधिलाई गाउँ-नगरस्तरसम्म विस्तार गर्ने अभियानस्वरूप गरिएको यस कार्यक्रमले रौतहट जिल्लामा नयाँ पुस्ताका साहित्यकार उत्पादनमा सकारात्मक टेवा पुग्ने विश्वास लिइएको छ ।
बज्जिकाञ्चल संवाददाता,राैतहट,२०८२ जेठ ०९ गते ।
चुरे तथा वनजंगल संरक्षण अभियानले मधेश प्रदेशका वन सचिव उद्धव घिमिरेलाई तत्काल बर्खास्त गरी कारबाहीको माग गरेको छ । शुक्रबार जारी प्रेस विज्ञप्तिमा अभियानले घिमिरेमाथि गम्भीर लापरवाही र वन संरक्षणमा असक्षमता देखाएको आरोप लगाउँदै उनलाई अन्यत्र सरुवा गरी योग्य व्यक्तिको नियुक्तिको माग गरेको हो ।
रौतहट डिभिजनका विभिन्न सव-डिभिजन कार्यालयहरू — गैडाटार, चन्द्रपुर, वृन्दावन, चोचा र पौराही क्षेत्रमा फैलिएको अवैध वन अतिक्रमण, काठ तस्करी र सरकारी संरचना निर्माणप्रति अभियानले गम्भीर चिन्ता व्यक्त गरेको छ। विशेष गरी चन्द्रपुर–२ मा पाँच बिगाहा भन्दा बढी वन क्षेत्र अतिक्रमण भई सयौं सिसौका रुख फँडानी गरिएको दाबी गरिएको छ ।
Oplus_0
अभियानले सार्वजनिक गरेको भिडियोमा अतिक्रमणको प्रमाण देखिएपछि उक्त प्रमाण मेटाउने उद्देश्यले वैशाख महिनाको अत्यधिक गर्मीमा वृक्षारोपण गरिएको उल्लेख छ। यस्तै, गुजरा–३ स्थित सिम्री सिक्टि टोलमा झण्डै पाँच बिगाहा वनमा मकै खेती भइसकेको छ।
२०८१ पुसमा भएको काठ लिलामी प्रक्रियामा समेत अनियमितता भएको भन्दै अभियानले राजदेवी, परवेज, सुरज, आरएन, कल्याणी, नन्दनी, सुरेन्द्र, लक्ष्मी लगायत काठ मिलहरूसँग गोप्य अवैध सम्झौता गरिएको आरोप लगाएको छ। रु. २२०० को दरमा काठ बिक्री गर्नुपर्नेमा रु. १४८० मा टेन्डर गरिएर राज्यलाई ठगी भएको दाबी गरिएको छ।
अभियानले मधेश प्रदेश सरकार, वन मन्त्रालय र सम्बन्धित निकायहरूलाई निष्पक्ष छानबिन गरी दोषीमाथि कडा कानुनी कारबाही गर्न आग्रह गरेको छ। साथै, चुरे तथा वनजंगल संरक्षणमा सबै सरोकारवालाहरू — राजनीतिक दल, सञ्चारमाध्यम र नागरिक समाज — को सक्रिय सहकार्यको आवश्यकता औंल्याएको छ।
यसैबीच, पूर्व वनमन्त्रीको बर्खास्तीलाई अभियानले सकारात्मक कदम भन्दै स्वागत गरेको छ र नव नियुक्त वनमन्त्री सञ्जय यादवलाई सफल कार्यकालको शुभकामना दिएको छ। मुख्यमन्त्री सतिश सिंहलाई वैशाख २१ मा बुझाइएको ज्ञापनपत्रपछि सुरु भएको विरोध कार्यक्रमले मन्त्री बर्खास्तीको मार्ग प्रशस्त गरेको अभियानको दाबी छ।
आरके श्रीवास्तव,राैतहट,२०८२ जेठ ०९ गते ।
“निर्वाचन अघि जनतालाई दिएका वाचाहरू जस्तै कोल्ड स्टोर, सय शय्याको नगर अस्पताल र प्रत्येक गाउँमा पक्की सडक निर्माण मेरो पहिलो प्राथमिकता हो,” नगरप्रमुख जलन्धर सिंह जैसवारले स्थानीय तहको भूमिकाबारे आयोजित न्युज २४ को ‘सीधा कुरा मेयरसँग’ कार्यक्रममा स्पष्ट पारेका छन् ।
शुक्रवार पचरौता नगरपालिका अन्तर्गत बेनाैली बजारमा सम्पन्न कार्यक्रमकाे प्रत्यक्ष प्रसारण गरिएको थियो । स्थानीय तहको अधिकार, सेवा प्रवाह र विकास निर्माणका विविध पक्षमा छलफल गरिएको कार्यक्रममा सिंहले आफ्नो तिन वर्षे कार्यकालमा शिक्षा, स्वास्थ्य, कृषि र भौतिक पूर्वाधारका क्षेत्रमा महत्वपूर्ण प्रगति भएको दाबी गरेका छन् ।
नगरप्रमुख जैसवारले नगरभित्र सुशासनसहितको समावेशी विकासमा जोड दिँदै, “सहमति, सहकार्य र पारदर्शितामार्फत विकास योजनाहरू अघि बढाइँदैछ,” भने । उनले एमबिबिएस अध्ययनका लागि एक छात्र र एक छात्रालाई वार्षिक १०/१० लाख रुपैयाँ छात्रवृत्ति दिने र एसईईमा उत्कृष्ट नतिजा ल्याउने विद्यार्थीलाई नगद पुरस्कार दिने योजना सार्वजनिक गरेका छन् ।
कार्यक्रममा सहभागी भएका वडा अध्यक्षहरू र स्थानीय जनप्रतिनिधिहरूले पारदर्शिता, जवाफदेहिता र सूचना प्रवाह सुधारमा जोड दिनुपर्ने आवश्यकता औंल्याएका थिए । कार्यक्रम न्युज २४ का प्रस्तोता सुमन ढुंगानाले सञ्चालन गरेकाे पचराैता नगरपालिकाका नगर प्रवक्ता लक्ष्मी यादवले जानकारी गराएका हुन् ।
