बज्जिकाञ्चल संवाददाता,०७ गते माघ २०८१ ।
काठमाडौं । दैनिक १८ घण्टासम्मको लोड सेडिङ अन्त्य गर्न आफुलाई उपभोक्ताले ठूलो सहयोग गरेको नेपाल विद्युत प्राधिकरणका कार्यकारी निर्देशक कुलमान घिसिङले बताउनु भएको छ । २०७३ सालको तिहारदेखि काठमाडौंलाई लोडसेडिङ मुक्त गरेसँगै २ वर्षभित्रै देशलाई लोडसेडिङ मुक्त बनाउने अभियानमा आफुलाई उपभोक्ताले ठूलो साथ दिएको उहाँले जिकीर गर्नु भयो ।
शनिबार नेपाल इन्जिनियरिङ कलेजबाट स्नातक पुरागरी विदा भएका विद्यार्थीहरुलाई संवोधन गर्दै कार्यकारी निर्देशक घिसिङले उपभोक्ताले विद्युत प्रयोग गर्ने बानी व्यवहार परिवर्तन गरेकाले आफु लोडसेडिङ हटाउन सफल भएको बताउनु भयो । ‘उपभोक्ताको मागलाई कसरी म्यानेज गर्ने, उपभोगको शैली कसरी सुधार गर्ने कसैले सोचेकै थिएन । मैले एक नम्बरमा उपभोक्ताको व्यवहार र उपभोगको शैलीलाई परिवर्तन गरे ।
उपभोक्ताले पनि साथ दिनुभयो, त्यसपछि म सफल भए ।’ लोडसेडिङ एकै पटक अन्त्य गर्न नसकिने अवस्थामा आफुले काठमाडौंबाट सुरुवात गर्दा देशभरका जनताले साथ दिएको उहाँको जिकीर छ ।
कार्यकारी निर्देशक घिसिङले डेडिकेटेड र ट्रङ्क लाइनको बक्यौदाको विषय जनतालाई दैनिक १८ घण्टासम्म अन्धकारमा राखेर उद्योगहरुलाई दिइएको विद्युत भएको बताउँदै उक्त विद्युत उपभोगको रकम तिर्नैपर्ने बताउनु भयो । ‘जनतालाई लोड सेडिङमा पारेर तत्कालिन म्यानेजमेन्टसँग पनि मिलेर उद्योगीले २० घण्टा २४ घण्टासम्म विद्युत उपभोग गरेको पैसा नतिरेको आज मात्र हैन त्यो बेलादेखि नै लिन खोजेको हो । विचमा उहाँहरुले धेरै अदालत र मुद्दा गर्नुभयो । त्यो लिनुपर्छ ।’ उहाँले भन्नुभयो ।
लोडसेडिङको समय एउटै उद्योगलाई ४० मेगावाट सम्म सप्लाई हुने गरेको जिकीर गर्दै कार्यकारी निर्देशक घिसिङले ४० मेगावाट विद्युतले ४० वटा पहाडी जिल्लालाई पुग्ने दावी गर्नुभयो । ‘४० मेगावाट एउटै उद्योगमा सप्लाई हुन्थ्यो । ४० मेगावाटले १० वटा जिल्लालाई पुग्छ । बेलुकाको टाइममा एउटै उद्योगले ४० मेगावाट चलायो भने १० वटा जिल्ला अन्धकार हुन्छ ।’ पहाडी जिल्लामा ४ मेगावाट पनि खपत नहुने घिसिङ भन्नुहुन्छ ।
सप्लाई साइटको म्यानेजमेन्ट र डिमाण्ड साइटको म्यानेजमेन्टमा काम गर्दा लोडसेडिङ अन्त्य गर्न सफल भएको उहाँको दावी छ । २०७३ सालमा ५० प्रतिशत जनतामा विद्युत पुगेकोमा आजको दिन ९९ प्रतिशत जनताको घरमा विद्युत पुगेको उहाँको दावी छ । ‘लोडसेडिङको अन्त्य शहरी क्षेत्रको मात्र गरिराख्यौं, तर, काठमाडौं वरीपरीमै विद्युत पुगेको थिएन । जहाँ २४ सै घण्टा लोडसेडिङ थियो त्यहाँ विद्युत पुर्याउने हाम्रो काम नै महान काम हो । अहिले ९९ प्रतिशत जनताले विद्युत पाईरहेका छन् ।’ १ प्रतिशत जनताको घरमा आफ्नै कार्यकालमा प्ुर्याउने भन्दै उहाँले भन्नुभयो, ‘अब ६, ७ महिना छ यही कार्यकालमा १ प्रतिशत जनताका घरमा विद्युत पुर्याउँछु ।’
लोडसेडिङ अन्त्यसँगै अरबौं घाटामा रहेको प्राधिकरणलाई नाफामा लैजानु आफ्नो सबैभन्दा ठूलो उपलब्धी रहेको कार्यकारी निर्देशक घिसिङको जिकीर छ । ‘२०६९ सम्म २७ अर्बजति घाटा थियो त्यसलाई सरकारले जिरो बनायो । त्यसपछि ५ वर्षमा ०७२ सालसम्म ३५ अर्ब घाटा पुगेछ । म आउनुअघि एक वर्ष करिब ९ अर्ब जति घाटा थियो । म आएपछि ०७३÷०७४ मा एकै वर्ष त्यसलाई नाफामा कन्भर्ट गर्यौं । करिब डेढ अर्ब नाफाबाट सुरुभयो, त्यसपछि लगालग नाफामा गयौं । अहिले करिब ८५ अरब जति ब्यालेन्स बनाउन सफल भएका छौं ।’ प्राधिकरणमा नाफामा पुर्याउन चुहावट नियन्त्रणको पनि महत्वपूर्ण भूमिका रहेको घिसिङको भनाई छ ।
इन्जिनियरिङका विद्यार्थीलाई संवोधन गर्दै कार्यकारी निर्देशक घिसिङले इन्जिनियरका विद्यार्थीहरुका लागि विद्युत प्राधिकरण पाठशाला रहेको बताउनु भयो । ‘तपाईहरु अहिले जति पास आउट गर्नुभएको छ त्यो सबै बेसिक छ । अब प्रोफेसनल लाइफमा धेरै सिक्नुहुन्छ त्यो चैं ठूलो पाठशाला हो । विद्युत प्राधिकरण सबै प्रकारका इन्जिनियरहरुको लागि ठूलो पाठशाला हो ।’ आफुले प्राधिकरणमा ३१ वर्ष सेवा गर्दा ठूलो अनुभव हासिल गरेको उहाँको भनाई छ ।
उहाँले इन्जिनियरहरुका लागि सरकारी र प्राइभेटमा दुवै क्षेत्रमा धेरै अवसर र संभावनाहरु रहेको जनाउनु भयो । साथै, इन्जिनियरहरुले नेतृत्व पनि गर्न सक्ने दावी गर्नुभयो । ‘इन्जिनियर भनेको टेक्नोक्रयाट मात्र हैन, इन्जिनियर भनेको समाज बुझ्ने, वातावरण बुझ्ने हुनुपर्छ । जब प्रोफेसनल लाइफमा जानु हुन्छ तपाई ठूलो म्यानेजर हो ।’ इन्जिनियरिङमा प्राविधिक क्षेत्रमा परामर्श दिएर अगाडी बढ्ने प्राविधिक फिल्डमा पनि व्यवसायिक नेतृत्व गर्न सकिने घिसिङको भनाई छ ।
कार्यकारी प्रमुख घिसिङले लिडरसिपमा आएका इन्जिनियरहरु सफल भएको जिकीर गर्नुभयो । ‘इन्जिनियरहरुले जहाँ जहाँ नेतृत्व गरेका छन् त्यो राष्ट्र धेरै छोटो समयमा विकास भएको पनि देखिन्छ ।’ एक समय चीनको नौ वटा स्ट्याण्डिङ कमिटीमा इन्जिनियरहरु रहेको उदाहरण दिँदै उहाँले भन्नुभयो । बर्तमान चीनको राष्ट्रपति समेत केमिकल इन्जिनियर भएको भन्दै उहाँले इन्जिनियरहरुले प्राविधिक, सामाजिक, वातावरणीय र राजनीतिक नेतृत्व दिन सक्ने दावी गर्नुभयो ।
कार्यकारी प्रमुख घिसिङले विद्यार्थीहरुलाई पढ्नका लागि विदेश गएपनि देशका लागि सोच्नुपर्ने उल्लेख गर्नुभयो । ‘देशका लागि के गर्न सकिन्छ भनेर अगाडी बढ्नु पर्छ । विदेश जानै हुन्न भन्ने लाग्दैन । जानुपर्छ, अनुभव गर्नुपर्छ तर, तपाईले गर्नुभएको अनुभव राष्ट्रको लागि हुनुपर्छ ।’ नेपालमा इन्जिनियरहरुका लागि धेरै अवसर रहेको भन्दै घिसिङले भन्नुभयो । धेरै चुनौतिहरु भएको स्थानमा अवसर पनि हुने उहाँको अनुभव छ ।
विदाई कार्यक्रममा बोल्दै कलेजका प्राचार्य दुर्गा प्रसाद भण्डारी, सहायक प्राचार्य मोहनध्वज केसी लगायतले स्नातक तहमा हासिल गरेको ज्ञान र सीपलाई व्यवहारिक जीवनमा इमान्दारिता र लगानशीलताका साथ प्रयोग गर्न सुझाब दिनुभएको थियो ।
बज्जिकाञ्चल संवाददाता,राैतहट,०७ गते माघ २०८१ ।
रौतहट । नेपाल भारत मैत्री संघ केन्द्रीय कार्यालय काठमाण्डौको सहयोग र नेपाल भारत मैत्री संघ जिल्ला कार्य समिति रौतहटको सहकार्यमा अग्नि पीड़ित परिवारलाइ सोमबार कपडा सहित खद्यान्न सामग्री बितरण गरिएको छ ।
गएको पुष १४ गते मध्यरातमा भएको आगलगीबाट घर जलेर नस्ट भएका रौतहट जिल्लाको राजदेवी नगरपालिका वड़ा नम्बर ५ पताहीका ८ घर परिवारलाइ नेपाल भारत मैत्री संघ केन्द्रीय कार्यालयले राहत उपलब्ध गराएका हुन ।
जिल्ला कार्य समिति रौतहटको पहलमा केन्द्रीय कार्यालयले उपलब्ध गराएको राहत सामग्री पीड़ित परिवारलाई बितरण गरिएको जिल्ला अध्यक्ष गृसनंदन कुमार सिंहले जनकारी दिएका छन ।
केन्द्रीय कार्यालयको कार्यवाहक अध्यक्ष चन्द्रमोहन झा ,केन्द्रीय सदस्य सत्यनारायण अग्रवाल ,केन्द्रीय सदस्य अरुण सिंह , मधेश प्रदेश अध्यक्ष रणधीर कुमार सिंह , राजदेवी नगरपालिका वड़ा अध्यक्ष सुरेश पंडित लगायतका उपस्थतिमा पीड़ित परिवारलाइ राहत सामग्री दिइएको हो ।
अग्नि पीड़ित जगरनाथ पासवान , बाबूलाल पासवान , कान्ति देवी पासवान , रामनाथ पासवान , सोगारथ पासवान , प्रदीप पासवान नागेन्द्र पासवान र दीपेन्द्र पासवानलाइ चामल २५ किलो , दाल ३ किलो ,खानेतेल १ लीटर , नून १ किलो , कम्बल २ थान , साडी २ थान ,लुंगी १ थान , नुहाउने साबुन २ वटा र लुगा धुनें साबुन २ वटा प्रति परिवारलाइ दिइएको जिल्ला अध्यक्ष सिंहले जानकारी दिएका छन ।
राहत सामग्री हस्तान्तरण गर्न घटना स्थल पुगेका कार्यवाहक अध्यक्ष झाले आगलगीको घटनाले आहात भएको बताए ।
दुखद घटनाको बारेमा जानकारी पाएपछि पीड़ामा सहयोगीको भूमिका निर्वाह गरेको बताए ! हामीले घाउमा मलहम लगाउने कार्य गरेको छू थप हुन सक्ने सहयोग गर्ने प्रयास गर्ने छू उनले भने अवस्था देखेर दुखित भएकोले आउने दिनमा हुन सकने सहयोग गर्ने प्रतिबद्धता जनाए ।
पीड़ित परिवारहरुले आगोबाट घर र घरमा भएको सामग्री समेत जलेर नस्ट भएकोले आफुहरुलाई घरको व्यवस्था गराई दिन आग्रह गरेका थिए ! पीड़ितहरुको आग्रह सुनेर नेपाल भारत मैत्री संघ मधेश प्रदेशका अध्यक्ष रणधीर कुमार सिंहले स्थानीय सरकारले जग्गाको व्यवस्थापन गर्नु पर्ने र वड़ा तथा नगरपालिकाले सिफारिश गरेमा घर निर्माणको लागि जस्ता पत्ताको सहयोग गर्ने बताए ।
वड़ा कार्यालय र नगरपालिकाबाट नेपाल भारत मैत्री संघको नाउमा सिफारिश गराएर पठाए हामीले आवश्यकता अनुसारको घर निर्माणमा सहयोग गराउने प्रयास गर्ने पीड़ितलाइ सुझाव दिए । सामाजिक कार्यमा रूचि राख्ने प्रदेश अध्यक्ष सिंहले पीड़ितहरुको अवस्था हेरेर चिन्ता व्यक्त समेत गरेका छन । उनले यस्तो दुःखको बेला सबैले सहयोग गर्नु पर्ने धारणा राखे । याे खबर राैतहट अनलाइन बाट लिइएको हाे ।
प्रविण शर्मा,राैतहट,०८ गते माघ २०८१ ।
रौतहटको दुर्गा भगवती गाउँपालिका वडा नम्बर ०२ र ०३ मा बागमती नदीको स्पर मरम्मत नहुदा स्थानिय चिन्तित भएका छन् ।
असोज १२ गते आएको बाढिले दुर्गा भगवती गाउँपालिका वडा नम्बर ०२ भलोहिया र वडा नम्बर ०३ मत्सरीका गरि ३ वटा स्पर मा बढि मात्रामा क्षति भएको छ भने केहिमा आंशिक क्षति भएको छ ।
१४ नम्बर स्पर करिव २०० मिटर पानीले बगाउदा दुवै तर्फ खेति गर्ने कृषकहरु समेत मारमा परेका छन् स्पर नहुदा जान आउन समस्या हुने तथा बगाएको भाग करिव २० फीट गहिरो रहेकोले तत्काल मरम्मत गराउन स्थानिय रजनीश झाले प्रदेस्झ सांसद इन्दु कुमारी सह संग आग्रह गरेका छन् ।
स्पर तत्काल मरम्मत नहुदा बर्षायाममा झन् जोखिम बढने तथा बाढि आए पछि छेउको बस्ति नै बगाउने डर रहेकोले तत्काल मरम्मत सम्भारको लागि पहल गरि दिन वडा नम्बर ०२ का वडा अध्यक्ष सुरेश चौधरीले प्रदेश सांसद साह संग आग्रह गर्नु भएको छ ।
वडा अध्यक्ष चौधरीका अनुसार वडाको बजेटले नभ्याउने अवस्था रहेकोले प्रदेश सरकार मार्फत तत्काल मरम्मत कार्यको लागि पहल गरिदिन प्रदेश सांसद साहलाइ आग्रह गरेका छौं , प्रदेश सांसद साहले पनि चाडै स्पर मरम्मत शुरु हुने बिश्वास दिलाउनु भएको बताउनु भएको छ ।
जलश्रोत तथा सिचाई विकास डिभिजन कार्यालय रौतहटका प्रमुख भक्तलाल कर्णका अनुसार सो कार्य बागमती तथा लाल बकैया नदि नियन्त्रण कार्यालय परवानीपुरको रहेता पनि कामको प्रकृति हेर्दा तत्काल शुरु गर्नु पर्ने अबस्था रहेको र प्रदेश सान्सद इन्दु कुमारी साहको गृह पालिका रहेको कारण उनको बारम्बारको दवावको कारण समेत हामीले तत्काल मरम्मत गर्नु पर्ने अबस्था रहेको बताउनु भएको छ ।
बाढिले स्परमा क्षति पुर्याए पछि प्रदेश सांसद साहको अनुरोधमा नेपालि कांग्रेश मधेश प्रदेश सभापति कृष्ण प्रसाद यादव,अर्थ मंत्री सुनिल कुमार यादव तथा उर्जा सिचाई तथा खानेपानी मंत्री शेष नारायण यादव समेतले सो ठाउँ अवलोकन गर्नु भएको थियो ।
आरके श्रीवास्तव,रौतहट,०७ गते माघ ।
क्रिकेटलाई यस्तै अनिश्चितताको खेल भनिएको होइन् । कटहरियामा आज सम्पन्न भएको टि १० क्रिकेट टुर्नामेन्टको फाइनल खेलले यसलाइ सावित गरेको छ । फाइनल खेल सुपर ओभरमा पुुगेर सम्पन्न भएको छ । रोमाञ्चक खेलमा हर्षाहा टिमलाइ हराउँदै बहादुुरीका साथ बहादुरपुरको टिमले कप माथि कब्जा जमाएको छ ।
सोमबार कटहरिया क्रिकेट ग्राउण्डमा भएको फाइनल मुुकाबलामा टस जितेर बहादुरपुरको टिमले क्षेत्ररक्षण गर्ने फैसला गरेको थियो । हर्षाहाको टिमले बल्लेबाजी गर्दै निर्धारित १० ओभरमा ७ विकेट गुमाउँदै ७० रन बनाएको थियो । जवाफी बैटिङ्गमा उत्रेको बहादुरपुरको टिमले निर्धारित ओभरमा ७० रन बनाउँदै खेललाइ बराबरीमा पुुर्याएका थिए ।
खेल बराबरी भएपछि नतिजा निकाल्नको लागि सुपर ओभर खेल भएको थियो । जसमा बहादुरपुरको टिमले १ विकेटको क्षतीमा ८ रन बनाएको थियो । सुपर ओभरमा ९ रनको लक्ष्य पाएको हर्षाहाको टिमले विना कुनै रनको २ विकेट गुमाउँदै हार व्यहोर्न पुग्यो ।
सुपर ओभरमा २ विकेट लिएका मासुुमलाइ खेलमा मैन अफ द मैच घोषित गरिएको थियो । टुर्नामेन्टभरी १३ विकेट लिएर प्रतियोगिताको बेस्ट बलरको रुपमा असलम खान घोषित् भएका थिए ।
विजेता टिम बहादुरपुरलाइ कटहरिया वडा नम्बर ४ का वडा अध्यक्ष चन्दन कुशवाहाले नगद २० हजार, प्रमाणपत्र र ट्रफि हस्तान्तरण गरेका थिए भने निराला जेनरल स्टोर कटहरियाका सञ्चालक महाशक्ति निरालाले क्यूरी मसलाको तर्फ बाट उपविजेता टिम हर्षाहालाइ नगद १० हजार ,प्रमाणपत्र र ट्रफि हस्तान्तरण गर्नुु भएको थियो । निरालाले खेलाडीहरुको हौसला प्रदान गर्न आफूलाइ अवसर दिएकोमा आयोजकलाइ धन्यावाद पनि दिएका थिए ।
फाइनल खेलको पुरस्कार वितरण कार्यक्रमलाइ सम्बोधन गर्दै कटहरिया ४ का वडा अध्यक्ष चन्दन कुशवाहाले विजेता र उपविजेता दुवै टिमलाइ बधाइ तथा शुुभकामना दिदै खेलमा सहयोग गर्नु हुने सम्पूर्ण दाताहरुलाइ धन्यवाद ज्ञापन गरेका थिए ।
कुशवाहाले भने–स्थानिय स्तरमा हुने यस्ता क्रिकेट प्रतियोगिताले नै राष्ट्रिय खेलाडी उत्पादन गर्ने भएकाले यसलाइ बढावा दिनुपर्ने बताएका छन् । कटहरिया क्रिकेट ग्राउण्डले क्रिकेटको हिरा उत्पादन गरेर दिनेमा आफू विश्वस्त रहेको धारणा राखेका थिए ।
यस्तै अर्का वक्ता श्री जनता मावि कटहरियाका प्रधानाध्यापक सचिन्द्र प्रसाद यादवले यो टुर्नामेन्टले खेलाडीमा लुकेर रहेको प्रतिभालाइ बाहिर ल्याउने अवसर प्रदान गरेको बताए । यसको लागि उनले वडा अध्यक्ष कुशवाहालाइ धन्यवाद ज्ञापन गरेका थिए । आउँदो दिनमा कटहरिया क्रिकेटको लागि उर्वरभूमि सावित हुनेमा आफू आशावादी रहेको बताए ।
बौधीमाई क्रिकेट क्लब कटहरिया ४÷५ को आयोजना र कटहरिया वडा नम्बर ४ का वडा अध्यक्ष एवम् ग्राउन्ड निर्माता चन्दन कुशवाहाको समन्वय तथा विभिन्न दाताहरूको सहयोगमा गत पुस २५ गते देखि क्रिकेट प्रतियोगिता चलिरहेको थियो । जसमा २४ वटा टिम सहभागी भएका थिए ।
फाइनल खेलमा अम्पायरको भूमिका संजिव अधिकारी र पुरूषोतम सोनीले गरेका थिए । फाइनल खेल हेर्न मावि कटहरिया नगरपालिकाका शिक्षा संयोजक अनिल निधी,मावि बगहीका प्रधानाध्यापक सरोज साह,मावि भसेढवाका प्रधानाध्यापक राममंगल यादव,सुरक्षाकर्मी,पत्रकार लगायत क्रिकेट प्रेमी दर्शकहरूको बाक्लो संख्यामा उपस्थिति रहेको थियो ।
फाेटाे फिचर:
रौतहट, माघ ७ गते २०८१ ।
सशस्त्र प्रहरीको गस्ती टोलीले गएराती रौतहटको सीमाक्षेत्र बाट अबैध पेस्तोल र गोली सहित एकजना भारतीय नागरिक लाई पक्राउ गरेको छ ।
भारत बिहार जिल्ला पूर्वी चम्पारण मोतिहारी बसन्तपुर ग्राम पंचायत ९ बस्ने बर्ष २६ को धनन्जय कुमार झा पेस्तोल र गोली सहित पक्राउ परेको सशस्त्र प्रहरी रौतहटका प्रमुख एसपी बिक्रम हुमागाईंले बताएका छन्। उनको साथबाट सेमी अटोमेटिक पेस्तोल १ नाल , सोको म्यागजिन १ वटा र ७.६५ एम एमको ४ राउण्ड गोली बरामद गरिएको एसपी हुमागाईंले बताएका छन।
बरामाद पेस्तोल गोली र आरोपीले प्रयोग गरेको मोटरसाईकल सहित नियन्त्रणमा लिई आवश्यक अनुसन्धान एवं कारबाहीको लागि आईतवार राती नै जिल्ला प्रहरी कार्यालय रौतहटमा बुझाईएको एसपी बिक्रम हुमागाईंले जानकारी दिएका छन्।
भारतीय सीमामा संग जोडिएको ईशनाथ नगरपालिका ४ लतमरी नाका ईलाकाबाट सशस्त्र प्रहरी बल नेपाल FOB मठिया बाट खटिईगएको टोलीले लतमरी नाका नजिकै सुनिल होटलमा खाजा खाईरहेका शंकास्पद ३ जना व्यक्तिहरुलाई चेकजाच गर्ने क्रममा २ जना व्यक्तिहरु तत्कालै फरार भएको थियो।
पेस्तोल बोकेका धनन्जय कुमार झा पक्राउ गरिएको तथा उनको साथबाट विआर ०५ वि डी १२२४ नम्बरको अपाचे मोटरसाईकल १ थान र सामसुङ्ग कम्पनीको ए ३५ मोबाईल १ थान बरामद भएको सशस्त्र प्रहरी बल नम्बर ११ गण हेक्वा रौतहटले जानकारी दिएको छ । खरीबोट
राैतहट, ०६ गते माघ २०८१ ।
रौतहट बचत तथा ऋण सहकारी संघले सहकारी अध्यादेश र राष्ट्र बैंकद्वारा जारी सहकारी मस्यौदाका विषयमा अन्तरक्रिया कार्यक्रम सम्पन्न गरेको छ। संघका अध्यक्ष बिभु पोखरेलको अध्यक्षतामा सहकारी क्षेत्रका विभिन्न व्यक्तित्वहरू, संघका प्रतिनिधिहरू, र सहकारीप्रेमीहरूको उपस्थितिमा कार्यक्रम सम्पन्न भएको हो ।
होटल आरोहीमा भएको कार्यक्रमको प्रारम्भमा बिशिष्ट अतिथि रौतहट दुग्ध सहकारी संघका अध्यक्ष श्रीकृष्ण अधिकारीले ब्यानर पढेर उद्घाटन गर्नुभएको थियो । संघका उपाध्यक्ष राम बिश्वास पासवानले स्वागत मन्तव्य राख्दै सहकारी क्षेत्रलाई दीर्घकालीन रूपमा सबल बनाउने उद्देश्यले कार्यक्रम आयोजना गरिएको जानकारी दिनुभयो। कार्यक्रम सञ्चालन संघका महासचिव देव बहादुर सापकोटाले गर्नुभएको थियो ।
कार्यक्रमका दौरान सहकारी क्षेत्रमा देखिएका चुनौती र समाधानका उपायहरूबारे उपस्थित व्यक्तित्वहरूले आ–आफ्ना धारणा राखेका थिए । संघका पूर्व सल्लाहकार तथा संकल्प साकोसका अध्यक्ष गणेश पौडेलले सरकारले जारी गरेको अध्यादेशले सहकारीहरूलाई व्यवस्थित गर्न सहयोग पुर्याउने भए पनि केही प्रावधानले सहकारी क्षेत्रको व्यावहारिक पक्षलाई असर पुर्याउने भएकाले सुधारको आवश्यकता रहेको बताउनुभयो ।
नवविकास बचत तथा ऋण सहकारी संस्था लिमिटेडका अध्यक्ष राजु तिवारीले अध्यादेशका केही प्रावधान सहकारीहरूको हित विपरीत रहेको भन्दै यसलाई सच्याउनका लागि संघले आवश्यक पहल गर्नुपर्ने र सुधार नभए आन्दोलनको बाटो रोज्नुपर्ने धारणा व्यक्त गर्नुभयो। उहाँले सहकारीहरूको दीर्घकालीन अस्तित्वका लागि एकताबद्ध रूपमा अघि बढ्न आग्रह गर्नुभयो।
त्यसैगरी, वृन्दावासिनी साकोसका संचालक आलोक कोइरालाले सहकारी क्षेत्रलाई थप पारदर्शी र व्यवस्थित बनाउन सरकारद्वारा जारी अध्यादेश सकारात्मक रहेको बताउँदै, सहकारीहरूले नियमअनुसार आफ्नो कार्यशैलीलाई परिमार्जन गर्नुपर्नेमा जोड दिनुभयो।
संघका लेखा समिति संयोजक जितेन्द्र चौधरीले राष्ट्र बैंकको मस्यौदाले वित्तीय अनुशासन कायम गर्न महत्वपूर्ण भूमिका खेल्ने बताउँदै, साना सहकारीहरूका लागि यसले केही चुनौती खडा गर्न सक्ने भए पनि दीर्घकालीन रूपमा यसले सकारात्मक प्रभाव पार्ने धारणा व्यक्त गर्नुभयो ।
कार्यक्रममा जिल्लाभरका सहकारी संघका अध्यक्ष, व्यवस्थापक, र प्रतिनिधिहरू गरी ५० भन्दा बढी व्यक्तिहरूको सहभागिता थियो। उपस्थित सहभागीहरूले सहकारी क्षेत्रको समग्र सुधार र पारदर्शिताका लागि यस्ता अन्तरक्रिया कार्यक्रमको आवश्यकता रहेको औंल्याए।
संघका अध्यक्ष बिभु पोखरेलले कार्यक्रमको समापन गर्दै सहकारी क्षेत्रमा आएका समस्याको समाधानका लागि संघ निरन्तर सक्रिय रहने बताउनुभयो। उहाँले सहभागीहरूको धारणा र सुझावलाई भविष्यका रणनीतिहरूमा समेटिने प्रतिवद्धता व्यक्त गर्नुभयो।
उपस्थित सबैले सहकारीहरूको दिगो भविष्य सुनिश्चित गर्न सहकार्य र संवादको आवश्यकता रहेकोमा एकमत भएका थिए।
मुकेश कुमार साह, रौतहट ६ माघ २०८१ ।
डिभिजन वन कार्यालय रौतहटको आयोजनामा सामुदायिक वनहरूको दीर्घकालीन व्यवस्थापन र आगामी कार्ययोजना निर्माणका लागि योजना तर्जुमा गोष्ठी सम्पन्न भएको छ। सामुदायिक वनका प्रतिनिधिहरू, व्यवस्थापक, र सरोकारवालाहरूको उपस्थितिमा गोष्ठीमा वन संरक्षण, वन स्रोतको दिगो उपयोग, र वातावरणीय सन्तुलन कायम गर्न आवश्यक योजनाहरूमा विस्तृत छलफल गर्दै सम्पन्न भएको हो ।
गोष्ठीको उद्घाटनमा डिभिजन वन कार्यालयका प्रमुखले वन संरक्षण र समुदायको सहभागितामा आधारित स्रोत व्यवस्थापनको महत्त्वबारे प्रकाश पारे। सहभागीहरूले सामुदायिक वनहरूको संरक्षणमा देखिएका चुनौतीहरू समाधान गर्न, हरित क्षेत्र विस्तार गर्न, र वन उपभोक्ताको भूमिकालाई सशक्त बनाउन विभिन्न सुझाव प्रस्तुत गरे। कार्यक्रममा सामुदायिक वनहरूको वार्षिक योजना निर्माण र कार्यान्वयनका लागि प्राथमिकता तय गरिएको थियो।
गोष्ठीका क्रममा सामुदायिक वन उपभोक्ता महासङ्घका अध्यक्ष वेदहरि दाहालले डिभिजन वन कार्यालयले ढिलासुस्ती गर्ने गरेको आरोप लगाए। उनले कार्यालयले समयमै गुनासा सम्बोधन नगरेको र चिरानको लागि काठ लान आवश्यक पुर्जी नबनाइएको भन्दै सुधारको माग गरे । यस्तै, अन्य सामुदायिक वनका प्रतिनिधिहरूले वन व्यवस्थापनमा थप पारदर्शिता र प्रभावकारिता ल्याउनुपर्ने खाँचो रहेको औंल्याए।
गोष्ठीमा उठेका गुनासाहरूको जवाफ दिँदै डिभिजन वन कार्यालय रौतहटका प्रमुख हेमन्त प्रसाद साहले आफ्नो कार्यकालमा त्यस्तो ढिलासुस्ती नभएको र आफ्नो कक्षमा यस्ता गुनासा कहिल्यै नआएको स्पष्ट पारे। उनले गुनासा प्रति कडा रूपमा प्रस्तुत हुँदै सामुदायिक वनका प्रतिनिधिहरूले आफ्नो जिम्मेवारी पूरा नगरेकोतर्फ पनि ध्यानाकर्षण गराए।
उनले भने, “समुदायका केही वन उपभोक्ता समितिहरूले समयमै साधारण सभा नगर्दा समस्या उत्पन्न भएको छ। आफ्नो कमजोरी छोप्न कार्यालयमाथि दोष थुपार्नु न्यायोचित हुँदैन।” साथै, उनले कार्यालयका कुनै पनि कर्मचारीले यदि गल्ती गरे वा काममा लापरबाही देखाए भने त्यसको तत्काल जानकारी दिन आग्रह गरे। यस्ता गल्तीहरूमा कुनै पनि प्रकारको सम्झौता नगर्ने र दोषी कर्मचारीमाथि तत्काल कारबाही गरिने प्रतिबद्धता व्यक्त गरे।
डिभिजन वन प्रमुखले वन संरक्षण र व्यवस्थापनमा समयपालना र पारदर्शिता प्राथमिक आवश्यकता भएको बताउँदै सामुदायिक वनका सबै प्रतिनिधिहरूले जिम्मेवार भएर काम गर्नुपर्नेमा जोड दिए।
कार्यक्रमले सामुदायिक वन व्यवस्थापनका लागि दीर्घकालीन योजना तयार पार्न महत्वपूर्ण योगदान पुर्याएको छ ।
आरके श्रीवास्तव,राैतहट,०५ गते माघ २०८१ ।
सहिदकाे सपना साकार गर्न मधेस केन्द्रित दलहरू एकत्रित हुनुपर्ने अहिलेकाे आवश्यकता रहेको लाेकतान्त्रिक समाजवादी पार्टी नेपालका केन्द्रीय सदस्य रामप्रवेश दासले बताउनु भएको हाे । बलिदानी दिवसकाे अवसरमा बज्जिकाञ्चल खबर सँग कुराकानी गर्दै उनले यस्तो बताएका हुन् ।
मधेसी नेताहरूले अरूलाई विभेद गर्याे भन्छन् तर हामीले आफैआफैमा विभेद गरिरेका छाैं । यसलाई सच्याएर हिड्नुपर्ने देखिन्छ ।
सहिदहरूकाे बलिदानी स्वरूप मधेस आन्दोलनकै बलमा संघियता पायाैं । अहिलेकाे व्यवस्था हामीले ल्याउन सकेका हाैं । तर यसलाई जाेगाउन पनि हाम्राे उतिकै दायित्व हाे । त्यसैले सबै मधेस केन्द्रितदहरू एक ठाउँमा उभिनुपर्ने अहिलेकाे आवश्यकता हाे ।
उनी भन्छन्-मधेशलाई अधिकारसम्पन्न बनाउन अझै संघर्ष गर्न आवश्यक छ । यसका निमित्त त एकजुट हुनैपर्छ । नेता दासले, ‘मधेस आन्दोलनकै बलमा हामीले कयौं अधिकार प्राप्ता गर्याैं । अझै कयौँ अधिकार प्राप्त गर्न बाँकी छन् । यसलाई बचाइ राखने जिम्मेवारी पनि हाम्रै हाे ।
बिगतका दिनमा मधेस सरकारले सहिद परिवारलाई सहयोग गर्दै आएकाे स्मरण गराउँदै यसलाई निरन्तर दिनुपर्नेमा जाेड दिनु भयाे । जुनसुकै पार्टी मधेस सरकारमा आएपनि मधेस आन्दोलनमा ज्यान गुमाएका सहिदको बलिदान बिर्सनु हुँदैन ।
उनले थपे-जुन हिसाबले हामी संघियता ल्यान सफल भयाे । त्याे अनुरूपमा काम हुन सकिरहेको छैन् । त्यसैले बेलाबेलामा संघियतामाथि प्रश्न उठने गर्छ । यसलाई हामीले बेलैमा सच्याउनु पर्छ ।
मधेस सरकारले आफनाे बजेट खर्च गर्न नसक्नु विडम्बना हाे । याे अवस्थालाई सुधार गर्दै संघियता बाट प्राप्त उपलब्धिहरूलाई बचाउनु मधेसी दलहरू एकजुट हुनुपर्ने नै देखिन्छ ।
मुकेश कुमार साह,चन्द्रपुर, ०५ गते माघ २०८१ ।
रौतहट । जनज्योति बहुमुखी क्याम्पस, चन्द्रनिगाहपुरको १२औं क्याम्पस सभा होटल ए.एन. प्लाजामा सम्पन्न भएको छ। सभामा प्रमुख अतिथिका रूपमा प्रतिनिधि सभाका सांसद माननीय देव प्रसाद तिमल्सिनाको उपस्थिति रहेको थियो । क्याम्पस सञ्चालक समितिका अध्यक्ष संजय कार्कीको अध्यक्षतामा भएको कार्यक्रममा क्याम्पस उपाध्यक्ष बालकृष्ण श्रेष्ठले स्वागत मन्तव्य राखेका थिए। क्याम्पस प्रमुख राजन श्रेष्ठले वार्षिक प्रतिवेदन २०८१ प्रस्तुत गर्दै शैक्षिक, भौतिक, आर्थिक तथा व्यवस्थापकीय प्रगतिको विवरण प्रस्तुत गरे। उनले क्याम्पसले गुणस्तरीय शिक्षा प्रवाहमा उल्लेखनीय प्रगति गरेको जानकारी दिए ।
क्याम्पसमा स्नातक तहका मानविकी तथा सामाजिक शास्त्र, व्यवस्थापन, र शिक्षाशास्त्र संकायसहित स्नातकोत्तर तहमा समाजशास्त्र र व्यवस्थापन कार्यक्रम सञ्चालन हुँदै आएको छ। अध्ययनलाई प्रभावकारी बनाउन सेमेस्टर प्रणाली र योग्य प्राध्यापकहरूको व्यवस्था गरिएको छ।
भौतिक पूर्वाधारका क्षेत्रमा १८ कोठे व्यवसायिक सटर भवन, सभा हल, कम्पाउण्ड वाल, चमेना गृह, र सौन्दर्यकरणका काम सम्पन्न गरिएको छ। चन्द्रपुर नगरपालिकाको सहयोगमा थप भौतिक सुधार भएको जानकारी दिइयो।
क्याम्पसले विद्यार्थी शुल्क, विश्वविद्यालय अनुदान, र सटर भाडाबाट आय आर्जन गर्दै आएको छ। क्याम्पस खातामा हाल ३ करोड २० लाख नगद मौज्दात रहेको छ। आगामी दिनमा B.B.A., B.H.M., B.S.W., र B.C.A. जस्ता रोजगारमूलक कार्यक्रम सञ्चालन गर्ने योजना रहेको छ।
कार्यक्रममा प्रमुख अतिथि देव प्रसाद तिमल्सिनाले क्याम्पसको प्रगतिको प्रशंसा गर्दै शिक्षा क्षेत्रलाई सुदृढ बनाउन सबै पक्षले सहकार्य गर्नुपर्ने धारणा राखेका थिए ।
कान्तिपुरका उपसम्पादक पत्रकार शिव पुरीले क्याम्पसले स्थानीय स्तरमा गुणस्तरीय शिक्षा प्रवाहमा खेलेको भूमिकाको प्रशंसा गर्दै आर्थिक पारदर्शिता र नेतृत्व क्षमतामा थप सुधार गर्नुपर्ने सुझाव दिए । प्रदेश सभा सदस्य तथा पूर्वमन्त्री युवराज भट्टराई समिरले क्याम्पसको आगामी योजना पूरा गर्न प्रदेश सरकार र स्थानीय निकायबाट पूर्ण सहयोग गर्ने प्रतिबद्धता जनाए ।
कार्यक्रममा विद्यार्थी, अभिभावक, शिक्षक, कर्मचारी, र विभिन्न क्षेत्रका प्रतिष्ठित व्यक्तित्वहरूको उपस्थिति रहेको थियो। सभाले क्याम्पसको शिक्षा र भौतिक पूर्वाधारलाई थप सशक्त बनाउन साझा प्रयास गर्ने प्रतिबद्धतासहित समापन गरेको छ।
आरके श्रीवास्तव,राैतहट,०५ गते माघ २०८१ ।
माघ ५ गते बलिदानी दिवस । मधेसभरी विभिन्न कार्यक्रम गरि मनाउने क्रममा राैतहटमा पनि आज बलिदानी दिवस मनाइएको छ । जिल्लाकाे फतुवा विजयपुर नगरपालिकाकाे वडा नम्बर ११ सहिद चाैक भैंसही बजारमा बलिदानी दिवसकाे अवसरमा श्रद्धाञ्जली अर्पण एवम् दिप प्रज्जवलन गरि मनाइएको हाे ।
बलिदानी दिवसका अवसरमा जनता समाजवादी पार्टी नेपालकाे वडा कमिटीकाे आयाेजनामा मधेश आन्दोलनका सहिदहरूलाई सम्झना स्वरूप साँझ सहिद चाैक भैंसहीमा दीप प्रज्जवलन कार्यक्रम गरेको छ । सहादत प्राप्त गरेका सहिदहरूकाे सम्मानमा एक मिनट माैन धारण पनि गरिएको थियोे ।
दीप प्रज्जलन कार्यक्रमलाई सम्बाेधन गर्दै जसपा नेपालका मधेस प्रदेश कमिटी सदस्य एवम् यूवा नेता विजय चाैधरीले मधेश आन्दोलनको बलमा मुलुकले संघीयता पाएकोले मधेसमै मात्र मनाउँदै आएको बलिदानी दिवस देशैभरी मनाउनु पर्नेमा जाेड दिएका थिए ।
oplus_0
उनले बलिदानी दिवसकाे अवसरमा सरकारले सार्वजनिक विदा दिनुपर्ने माग समेत गरेका थिए । उनले भने- सहिदहरूकाे देन हाे कि हामीले सरकारकी हरेक संयन्त्रमा मधेसीले सहभागीता पाएका छन् । मधेसी काेटा बाट सरकारी जागिरमा प्रवेशकाे अवसर पाएका छन् । यसलाई हामीले बिर्सनु हुँदैन ।
मधेस आन्दोलनका प्रथम सहिद रमेश महताे लगायतका सहिदहरूकाे समझनामा आजकाे दिन हामीले बलिदान दिवस मनाउँदै आएकाे स्मरण गराएका थिए ।
देशमा बसेकाे हिमाल देखि लिएर पहाड सम्मका नागरिकहरूले बलिदानी दिवसकाे बारेमा थाहा पाउनुपर्ने जरुरी छ । याे मधेसमा मात्रै किन? सरकारले यसमा राष्ट्रिय विदा दिनु पर्छ कि पर्दैन भन्दै प्रश्न समेत गरे ?
सहिदहरूकै बलिदानीले नै आज हामीले अहिले अधिकार पाएका छाैं । र बाँकी अधिकार प्राप्तिका लागि हामीले लडिनै रहेका छाैं ।
जसपाका नेता सिताराम चाैधरीकाे अध्यक्षतामा साे कार्यक्रम सम्पन्न भएको थियोे । जसमा जसपा नेपालका नेता कार्यकर्ताहरू ब्रहमनारायण चाैधरी, प्रभुनारायण चाैधरी, भूपेन्द्र चाैधरी,पूर्व जिल्ला कमिटि सदस्य साेहन लामा, पूर्व संघिय परिषद् सदस्य मिना रखाल लगायतका नेता कार्यकर्ताहरूकाे सहभागीता रहेको थियोे । साे अवसरमा स्थानीय भद्रभलादमी, सुरक्षाकर्मी,पत्रकार पनि सहभागीता रहेको थियो ।
