काठमाडौँ । अख्तियार दुरुपयोग अनुसन्धान आयोगले सिरहाको बन्दीपुरस्थित सव–डिभिजन वन कार्यालयका प्रमुख राम केवल राय यादवविरुद्ध भ्रष्टाचार मुद्दा दायर गरेको छ।

आयोगका अनुसार उद्योगका लागि ल्याइएको काठ सिलबन्दीअनुसार भए/नभएको जाँच गरी कागजातसहित फाइल फिर्ता गर्ने क्रममा सेवाग्राहीसँग घुस मागेको सूचनाका आधारमा खटिएको टोलीले यादवलाई १२ हजार रुपैयाँ घुससहित नियन्त्रणमा लिएको थियो।

अनुसन्धानका क्रममा यादवले काष्ठ उद्योगमा ल्याइएका काठ बोकेका ट्रकको सिल खोलेको मुचुल्का तयार गरिदिने क्रममा विभिन्न बहाना बनाएर सेवाग्राहीलाई दुःख दिई रकम माग गरेको पुष्टि भएको आयोगले जनाएको छ।

यादवको उक्त कार्य भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुर भएको भन्दै आयोगले १२ हजार रुपैयाँ बिगो कायम गरी कैद र बिगो बराबर जरिवाना सजायको मागदाबीसहित विशेष अदालत, काठमाडौँमा आरोपपत्र दायर गरेको छ।एभरेष्ट न्यूज एजेन्सी

शिवनाथ कुशवाहा, महोत्तरी, साउन १८ अगते ।

साउन महिनाको सुरुवातसँगै महोत्तरीको बर्दिबास नगरपालिका–५ स्थित पौराणिक टुटेश्वरनाथ महादेव मन्दिरमा श्रद्धालु भक्तजनको उल्लेखनीय घुइँचो लागेको छ।

देशका विभिन्न जिल्लाबाट आएका काँवरिया भक्तहरूले ‘बोल बम’को जयघोष गर्दै पवित्र जल अर्पण गरिरहेका छन्। भक्तजनको निरन्तर आगमनसँगै टुटेश्वर क्षेत्र यतिबेला शिवभक्तिमय वातावरणले भरिएको छ।

नेपालको ‘बाबाधाम’का रूपमा समेत परिचित टुटेश्वरनाथ महादेव मन्दिर साउन महिनामा विशेष धार्मिक आस्थाको केन्द्र बन्ने गरेको छ। यहाँ भगवान् शिवको दर्शन तथा जलाभिषेकका लागि हरेक सोमबार हजारौँ भक्तजन पुग्ने गरेका छन्।

आस्था, विश्वास र भक्तिको अनुपम संगमका रूपमा परिचित ‘मधेशको कैलास’ टुटेश्वरनाथले यतिबेला धार्मिक पर्यटनलाई समेत टेवा पुर्‍याउँदै देशभरका श्रद्धालुलाई आकर्षित गरिरहेको छ।

काठमाडौँ । प्रतिनिधि सभाका चार समितिको बैठक आज बस्दैछ ।

आज अर्थ समिति, महिला तथा सामाजिक मामिला समिति, शिक्षा, स्वास्थ्य तथा सूचना प्रविधि समिति र सार्वजनिक लेखा समितिको बैठक बस्दैछ ।

आज दिउसो १ बजे बस्ने अर्थ समितिको बैठकमा नेपाल राष्ट्र बैंक ऐन, २०५८ लाई संशोधन गर्न बनेको विधेयकमाथि दफावार छलफल हुने समितिले जनाएको छ । बैठकमा अर्थमन्त्री, अर्थसचिव, कानुन मन्त्रालयको सचिव र नेपाल राष्ट्र बैंकका प्रतिनिधि सहभागी हुने समितिले जनाएको छ ।

त्यस्तै आज बिहान ११ बजेदेखि बस्ने महिला तथा सामाजिक मामिला समितिको बैठकमा साइबर सुरक्षा सम्बन्धमा छलफल हुने कार्यसूची रहेको छ । छलफलमा महिला, बालबालिकामन्त्री र सचिव, गृहसचिव, कानुन सचिव, नेपाल प्रहरीका प्रतिनिधि सहभागी हुने बताइएको छ ।

आज बिहान ११ बजेदेखि शुरु हुने शिक्षा, स्वास्थ्य तथा सूचना प्रविधि समितिको बैठकमा राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१ सम्बन्धमा छलफल हुने कार्यसूची रहेको छ ।

त्यसैगरी दिउसो २ बजेदेखि शुरु हुने सार्वजनिक लेखा समितिको बैठकमा समितिमा प्राप्त उजुरीउपर छलफलको कार्यसूची रहेको छ । एभरेष्ट न्यूज एजेन्सी

काठमाडौँ । जल तथा मौसम विज्ञान विभाग अन्तर्गत मौसम पूर्वानुमान महाशाखाले हाल देशभर मनसुनी वायुको प्रभाव रहेको र मनसुनको न्यून चापीय रेखा सरदर स्थानभन्दा केेही उत्तरतर्फ नेपालको तराई भू-भाग नजिक रहेको जानकारी दिएको छ । हाल देशभर साधारणतया बादल लागेको छ। कोशी, बागमती, गण्डकी, लुम्बिनी र कर्णाली प्रदेशका थोरै स्थानमा साथै सुदूरपश्चिम प्रदेशका एक-दुई स्थानमा हल्का वर्षा भइरहेको छ ।

आज दिउँसो देशभर साधारणतया बादल लाग्नेछ। देशका हिमाली भू-भागका केही स्थानमा मध्यमसम्मको वर्षा/हिमपातको सम्भावना छ। देशका पहाडी भू-भागका धेरै स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। बागमती र गण्डकी प्रदेशका तराई भू-भागका धेरै स्थानमा तथा मधेश प्रदेश साथै कोशी, लुम्बिनी र सुदुरपश्चिम प्रदेशको  तराई भू-भागका  केही स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ।  कोशी, बागमती र गण्डकी प्रदेशका हिमाली र  पहाडी भू-भागका एक-दुई स्थानमा भारी वर्षाको सम्भावना छ । गण्डकी र बागमती प्रदेशको पहाडी भू-भागका एक-दुई स्थानमा धेरै भारी वर्षाको सम्भावना छ ।

त्यस्तै आज राति देशभर साधारणतया बादल लाग्नेछ। देशका हिमाली  भू-भागका केही स्थानमा मध्यमसम्मको वर्षा/हिमपातको सम्भावना छ। कोशी, बागमती, गण्डकी  र लुम्बिनी प्रदेशका पहाडी र तराई भू-भाग साथै मधेश प्रदेशका धेरै स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। कर्णाली प्रदेशका पहाडी भू-भाग र सुदूरपश्चिम प्रदेशका पहाडी र तराई भू-भागका केहि स्थानमा  मेघगर्जन/चट्याङ्ग सहित मध्यमसम्मको वर्षाको सम्भावना छ। कोशी, बागमती र गण्डकी प्रदेशका हिमाली, पहाडी र तराई भू-भाग, तथा लुम्बिनी प्रदेशको पहाडी र तराई भू-भागका एक-दुई स्थानमा भारी वर्षाको सम्भावना छ । कोशी, बागमती र गण्डकी प्रदेशको पहाडी तथा तराई भू-भागका एक-दुई स्थानमा धेरै भारी वर्षाको सम्भावना छ।एभरेष्ट न्यूज एजेन्सी

आजको राशिफल बिस २०८३ साउन १८ गते सोमबार ईस २०२६ अगस्ट ३ नेपाल सम्बत ११४६ दिल्लाथ्व पञ्चमी, रौद्र नाम संवत्सर सूर्य दक्षिणायन, वर्षा ऋतु, असार शुक्ल पञ्चमी, चन्द्रमा मीन राशिमा, उत्तरभाद्रपदा नक्षत्र, सुकर्मा योग, कौलव करण । आज नेपालमा सुर्योदय बिहान ५ बजेर २८ मिनेटमा र सूर्यास्त साँझ ६ बजेर ५३ मिनेटमा बजे हुनेछ । आज जन्म लिने बच्चा मीन राशीको हुनेछ ।

मेष (चु, चे, चो, ला, लि, लु, ले, लो, अ) –

आजको दिन आत्मविश्वास, ऊर्जा र नयाँ सम्भावनाले भरिएको रहनेछ। बिहानदेखि नै मनमा सकारात्मक सोच जाग्नेछ र अधुरा रहेका कामलाई पूरा गर्ने उत्साह बढ्नेछ। कार्यक्षेत्रमा तपाईंको मेहनत, समय व्यवस्थापन र नेतृत्व क्षमताले राम्रो परिणाम दिलाउनेछ। वरिष्ठ व्यक्तिबाट प्रशंसा र नयाँ जिम्मेवारी प्राप्त हुने सम्भावना छ। व्यापार–व्यवसायमा विस्तारका अवसर देखिनेछन्। आर्थिक रूपमा आम्दानी बढ्ने संकेत छ भने रोकिएको रकम पनि प्राप्त हुन सक्छ। परिवारमा सुख, शान्ति र आत्मीयता कायम रहनेछ। प्रियजनसँगको संवादले सम्बन्ध थप मजबुत बनाउनेछ। स्वास्थ्य राम्रो रहनेछ। पर्याप्त पानी पिउने र नियमित आराम गर्ने बानीले थप स्फूर्ति दिनेछ।

वृष (इ, उ, ए, ओ, वा, वि, वु, वे, वो) –

आज विवेक, धैर्य र व्यवहारिक सोचले तपाईंलाई सफलता दिलाउनेछ। कार्यक्षेत्रमा सहकर्मी तथा वरिष्ठ व्यक्तिको सहयोग प्राप्त हुनेछ। लामो समयदेखि रोकिएका कामले गति लिने सम्भावना छ। व्यापार–व्यवसायमा नियमित लाभ कायम रहनेछ र नयाँ योजना बनाउन प्रेरणा मिल्नेछ। आर्थिक अवस्था सन्तुलित रहनेछ। अनावश्यक खर्च नियन्त्रण गर्न सके बचत बढ्नेछ। परिवारका सदस्यहरूसँग खुसी साट्ने अवसर प्राप्त हुनेछ। सामाजिक क्षेत्रमा पनि सम्मान बढ्ने संकेत देखिन्छ। स्वास्थ्य सामान्यतया राम्रो रहनेछ। मानसिक रूपमा सन्तुष्टि र स्थिरता कायम रहनेछ।

मिथुन (का, कि, कु, घ, ङ, छ, के, को, ह) –

आज तपाईंको बोली, व्यवहार र सिर्जनशील सोचले धेरैको मन जित्नेछ। अध्ययन, लेखन, सञ्चार, शिक्षण तथा सिर्जनात्मक क्षेत्रमा राम्रो उपलब्धि हासिल हुने सम्भावना छ। कार्यक्षेत्रमा नयाँ अवसर प्राप्त हुनेछ र आफ्नो क्षमता प्रमाणित गर्ने मौका पनि मिल्नेछ। आर्थिक रूपमा अतिरिक्त आम्दानीको सम्भावना देखिन्छ। साथीभाइ तथा सहकर्मीको साथले महत्त्वपूर्ण योजना सफल बन्नेछ। परिवारसँग खुसीका क्षण बित्नेछन्। नयाँ चिनजानले भविष्यमा लाभदायक अवसर दिलाउन सक्छ। स्वास्थ्य राम्रो रहनेछ। मानसिक रूपमा उत्साह र आत्मविश्वास उल्लेखनीय रूपमा बढ्नेछ।

कर्कट (हि, हु, हे, हो, डा, डि, डु, डे, डो) –

आज पारिवारिक जीवन सुखद र सन्तोषजनक रहनेछ। परिवारका सदस्यहरूसँगको सम्बन्ध अझ सुमधुर बन्नेछ। घरमा शुभ कार्यको चर्चा हुन सक्छ। कार्यक्षेत्रमा तपाईंको इमानदारी, जिम्मेवारी र लगनशीलताको प्रशंसा हुनेछ। अधुरा रहेका काम पूरा हुने सम्भावना बलियो छ। आर्थिक पक्षमा सुधार आउने संकेत देखिन्छ। घर वा सम्पत्तिसँग सम्बन्धित निर्णय लिन समय अनुकूल रहनेछ। स्वास्थ्य राम्रो रहनेछ। मानसिक रूपमा शान्ति र आत्मसन्तुष्टि महसुस हुनेछ।

सिंह (मा, मि, मु, मे, मो, टा, टि, टु, टे) –

आज आत्मविश्वास र नेतृत्व क्षमताले तपाईंलाई विशेष सफलता दिलाउनेछ। कार्यक्षेत्रमा नयाँ जिम्मेवारी प्राप्त हुन सक्छ र त्यसलाई सफलतापूर्वक पूरा गर्न सक्नुहुनेछ। वरिष्ठ व्यक्तिको विश्वास अझ मजबुत बन्नेछ। व्यापार–व्यवसायमा लाभदायक सम्झौता हुन सक्छ। आर्थिक अवस्था बलियो बन्ने संकेत देखिन्छ। सामाजिक क्षेत्रमा प्रतिष्ठा र सम्मान बढ्नेछ। परिवारको साथ र सहयोगले मनोबल उच्च रहनेछ। स्वास्थ्य राम्रो रहनेछ। दिनभर शरीरमा स्फूर्ति र ऊर्जा कायम रहनेछ।

कन्या (टो, प, पि, पु, ष, ण, ठ, पे, पो) –

आज नयाँ ज्ञान र अनुभव प्राप्त गर्ने अवसर मिल्नेछ। अध्ययन, अनुसन्धान, तालिम वा बौद्धिक कार्यमा उल्लेखनीय सफलता प्राप्त हुनेछ। कार्यक्षेत्रमा अनुशासन र लगनशीलताको राम्रो मूल्यांकन हुनेछ। आर्थिक अवस्था स्थिर रहनेछ। योजनाबद्ध खर्चले भविष्यका लागि बचत बढाउन मद्दत गर्नेछ। परिवारमा आपसी सहयोग र समझदारी कायम रहनेछ। छोटो दूरीको यात्रा लाभदायक बन्न सक्छ। स्वास्थ्य राम्रो रहनेछ। नियमित व्यायाम र पर्याप्त आरामले थप ऊर्जा दिनेछ।

तुला (रा, रि, रु, रे, रो, ता, ति, तु, ते) –

आज आर्थिक क्षेत्रमा उत्साहजनक उपलब्धि हासिल हुने सम्भावना छ। रोकिएको रकम प्राप्त हुन सक्छ वा नयाँ आम्दानीको स्रोत खुल्न सक्छ। व्यापार–व्यवसायमा लाभ बढ्ने संकेत देखिन्छ। कार्यक्षेत्रमा सहकार्य र समन्वय उत्कृष्ट रहनेछ। नयाँ योजना सफल हुने सम्भावना बलियो छ। परिवारसँग खुसीका क्षण बित्नेछन्। सामाजिक क्षेत्रमा प्रभाव बढ्नेछ र नयाँ सम्बन्धले भविष्यमा राम्रो अवसर प्रदान गर्नेछ। स्वास्थ्य राम्रो रहनेछ। मानसिक रूपमा आत्मविश्वास र सकारात्मक सोच बढ्नेछ।

वृश्चिक (तो, ना, नि, नु, ने, नो, या, यि, यु) –

आज निरन्तर मेहनत र धैर्यको राम्रो प्रतिफल प्राप्त हुने दिन रहनेछ। कार्यक्षेत्रमा तपाईंको अनुभव र कार्यदक्षताको उच्च मूल्यांकन हुनेछ। प्रतिस्पर्धात्मक क्षेत्रमा सफलता प्राप्त हुने सम्भावना बलियो छ। व्यापार–व्यवसायमा उल्लेखनीय लाभ हुनेछ। आर्थिक अवस्था थप मजबुत बन्ने संकेत देखिएको छ। परिवारमा प्रेम, विश्वास र आत्मीयता बढ्नेछ। प्रियजनसँग भविष्यका योजना साझा गर्ने अवसर मिल्नेछ। स्वास्थ्य राम्रो रहनेछ। मानसिक रूपमा उत्साह, आत्मबल र सकारात्मक ऊर्जा कायम रहनेछ।

धनु (ये, यो, भ, भि, भु, ध, फा, ढ, भे) –

आज नयाँ अवसरले भविष्यको बाटो फराकिलो बनाउने संकेत देखिएको छ। अध्ययन, व्यापार, वैदेशिक क्षेत्र वा यात्रासँग सम्बन्धित कार्यमा राम्रो परिणाम प्राप्त हुनेछ। कार्यक्षेत्रमा तपाईंको मेहनतको उचित मूल्यांकन हुनेछ। आर्थिक रूपमा सुधार आउने सम्भावना बलियो छ। परिवारका सदस्यहरूसँगको सम्बन्ध थप आत्मीय बन्नेछ। सामाजिक क्षेत्रमा प्रतिष्ठा र सम्मान बढ्नेछ। नयाँ योजना सुरु गर्न र दीर्घकालीन लक्ष्य तय गर्न समय अनुकूल रहनेछ। स्वास्थ्य राम्रो रहनेछ। मन दिनभर उत्साहित र प्रसन्न रहनेछ।

मकर (भो, ज, जि, खि, खु, खे, खो, गा, गि) –

आज जिम्मेवारी बढे पनि योजनाबद्ध रूपमा अघि बढ्दा सबै काम सफलतापूर्वक सम्पन्न हुनेछन्। कार्यक्षेत्रमा वरिष्ठ व्यक्तिको सहयोग र मार्गदर्शन प्राप्त हुनेछ। आर्थिक रूपमा खर्च नियन्त्रण गर्न सके बचत बढ्नेछ। दीर्घकालीन आर्थिक योजना बनाउन दिन उपयुक्त रहनेछ। परिवारका सदस्यहरूको सुझाव लाभदायक सावित हुनेछ। घरमा शान्त र सुखद वातावरण कायम रहनेछ। स्वास्थ्यमा सामान्य थकान महसुस हुन सक्ने भएकाले पर्याप्त आराम गर्नु उचित हुनेछ। साँझतिर मनमा सन्तुष्टिको अनुभूति हुनेछ।

कुम्भ (गु, गे, गो, सा, सि, सु, से, सो, द) –

आज सिर्जनशील सोच, नयाँ योजना र सकारात्मक दृष्टिकोणले उल्लेखनीय सफलता दिलाउनेछ। कार्यक्षेत्रमा रोकिएका काम पूरा हुनेछन् र नयाँ अवसर प्राप्त हुनेछ। व्यापार–व्यवसायमा नयाँ सम्झौता वा सहकार्यको सम्भावना देखिन्छ। आर्थिक पक्षमा सुधार आउनेछ। परिवारमा प्रेम, मेलमिलाप र समझदारी बढ्नेछ। सामाजिक क्षेत्रमा प्रभाव विस्तार हुनेछ र नयाँ सम्बन्धले भविष्यमा राम्रो अवसर दिलाउन सक्छ। स्वास्थ्य राम्रो रहनेछ। दिनभर स्फूर्ति, ऊर्जा र आत्मविश्वास कायम रहनेछ।

मीन (दि, दु, थ, झ, ञ, दे, दो, च, ची) –

आज धैर्य, विवेक र सकारात्मक सोचले तपाईंलाई हरेक क्षेत्रमा सफलता दिलाउनेछ। सुरुमा केही चुनौती देखिए पनि तपाईंको अनुभव र आत्मविश्वासका कारण सबै काम सहज रूपमा अघि बढ्नेछन्। कार्यक्षेत्रमा मेहनतको उचित प्रतिफल प्राप्त हुनेछ। आर्थिक पक्ष सन्तुलित रहनेछ र बचत गर्ने अवसर पनि मिल्नेछ। परिवारको साथ र सहयोगले मनोबल बढाउनेछ। अधुरा रहेका योजना पूरा हुने सम्भावना बलियो छ। साँझतिर प्राप्त हुने शुभ समाचारले भविष्यप्रति नयाँ आशा, उत्साह र आत्मविश्वास थप मजबुत बनाउनेछ। स्वास्थ्य राम्रो रहनेछ। मानसिक रूपमा शान्ति, सन्तुलन र सकारात्मक ऊर्जा दिनभर कायम रहनेछ ।एभरेष्ट न्यूज एजेन्सी

काठमाडौँ । सुनसरी जिल्लाको सुरक्षा अवस्था क्रमशः सुधार हुँदै गएपछि जिल्ला प्रशासन कार्यालयले चार स्थानीय तहमा भोली बिहान १० बजेसम्म निषेधाज्ञा कायम राखेको छ ।

प्रमुख जिल्ला अधिकारी ईश्वरीप्रसाद अर्यालद्वारा जारी सूचनाअनुसार साउन १८ गते बिहान १० बजेसम्मका लागि चार स्थानीय तहमा मात्रै निषेधाज्ञा कायम रहनेछ ।

प्रशासनका अनुसार निषेधाज्ञा देवानगञ्ज गाउँपालिका, भोक्राहा नरसिंह गाउँपालिका, कोशी गाउँपालिका र हरिनगर गाउँपालिकाको सम्पूर्ण क्षेत्रमा लागू रहनेछ ।

यी चार स्थानीय तहबाहेक सुनसरी जिल्लाका अन्य सबै स्थानबाट निषेधाज्ञा हटाइएको छ ।

प्रशासनले जिल्लाको पछिल्लो सुरक्षा अवस्थाको समीक्षा गर्दा स्थिति सुधारउन्मुख देखिएकाले स्थानीय प्रशासन ऐन, २०२८ बमोजिम अधिकांश क्षेत्रबाट निषेधाज्ञा हटाएको थियो ।एभरेष्ट न्यूज एजेन्सी

काठमाडौँ । चीनमा विद्युतीय सवारीसाधनको प्रयोग तीव्र रूपमा बढ्दै जाँदा जीवाश्म इन्धनमा निर्भरता उल्लेखनीय रूपमा घटिरहेको एक नयाँ अध्ययनले देखाएको छ ।

वित्तीय सेवा कम्पनी जेफ्रिजले सार्वजनिक गरेको प्रतिवेदनअनुसार चीनले सन् २०२६ को पहिलो छ महिनामा विद्युतीय सवारीका कारण ३ करोड ३७ लाख टन तेल बराबरको इन्धन बचत गरेको छ । यो दैनिक करिब १४ लाख ब्यारेल तेलको खपत घटेको बराबर हो ।

प्रतिवेदनले ऊर्जा तथा स्वच्छ वायु अनुसन्धान संस्थाको अध्ययनलाई उद्धृत गर्दै विद्युतीय सवारीका कारण बचत भएको इन्धनको मात्रा अघिल्लो वर्षको तुलनामा ४२ प्रतिशतले वृद्धि भएको जनाएको छ ।

प्रतिवेदनअनुसार सन् २०२६ को पहिलो छ महिनामा बचत भएको इन्धनको मात्रा चीनले सन् २०२५ मा आयात गरेको कुल कच्चा तेलको करिब ६ प्रतिशत बराबर हो ।

सन् २०२३ को पहिलो छ महिनामा विद्युतीय सवारीका कारण १ करोड १६ लाख टन तेल बराबर इन्धन बचत भएको थियो । तीन वर्षमै यो मात्रा झण्डै तीन गुणाले बढेको प्रतिवेदनमा उल्लेख छ ।

जीवाश्म इन्धनको खपत घट्नुको मुख्य कारण चीनमा नयाँ ऊर्जा सवारीसाधनको बिक्री तीव्र रूपमा बढ्नु रहेको प्रतिवेदनले जनाएको छ । नयाँ ऊर्जा सवारीमा पूर्ण रूपमा ब्याट्रीबाट चल्ने सवारी र प्लग-इन हाइब्रिड सवारी समावेश छन् ।

जेफ्रिजका अनुसार सन् २०२६ को जुन महिनामा चीनमा बिक्री भएका कुल यात्रुवाहक सवारीमध्ये ६३ प्रतिशत नयाँ ऊर्जा सवारी थिए । सन् २०२४ को जनवरीमा यो हिस्सा ३३ प्रतिशत मात्र रहेको थियो ।

अन्तर्राष्ट्रिय ऊर्जा एजेन्सीको विश्वव्यापी विद्युतीय सवारी प्रतिवेदन-२०२६ ले पनि विद्युतीय सवारीको विस्तारले तेलको मागमा ठूलो प्रभाव पारिरहेको जनाएको छ ।

एजेन्सीका अनुसार सन् २०२५ मा चीनमा विद्युतीय सवारीका कारण दैनिक करिब १० लाख ब्यारेल तेलको माग घटेको थियो । यो संख्या सन् २०३० सम्म दैनिक २७ लाख ब्यारेल पुग्ने अनुमान गरिएको छ ।

जेफ्रिजले विद्युतीय सवारीको बढ्दो प्रयोगले चीनको ऊर्जा खपतको स्वरूप नै परिवर्तन गरिरहेको जनाएको छ । आगामी वर्षहरूमा नयाँ ऊर्जा सवारीको हिस्सा अझ बढ्दै जाँदा तेलको खपत निरन्तर घट्ने र देश क्रमशः स्वच्छ ऊर्जा स्रोततर्फ अघि बढ्ने अपेक्षा गरिएको छ ।

प्रतिवेदनका अनुसार चीनमा विद्युतीय सवारीको विस्तार केवल सवारी बजारमा सीमित नरही ऊर्जा सुरक्षा, इन्धन आयातमा निर्भरता र स्वच्छ ऊर्जातर्फको संक्रमणलाई समेत नयाँ दिशा दिने महत्वपूर्ण आधार बनेको छ ।एभरेष्ट न्यूज एजेन्सी

काठमाडौं । ऊर्जा, जलस्रोत तथा सिँचाइ मन्त्री विराज भक्त श्रेष्ठले ऊर्जा, जलस्रोत तथा सिँचाइ क्षेत्रको विकासमा सबैभन्दा ठूलो चुनौती आयोजना निर्माणभन्दा बाहिर रहेका नीतिगत तथा प्रक्रियागत अवरोध भएको बताएका छन् ।

जग्गा अधिग्रहण, मुआब्जा व्यवस्थापन, स्रोत सुनिश्चितता, अन्तरनिकाय समन्वय र ठेक्का व्यवस्थापनमा सुधार नगरी अपेक्षित विकास सम्भव नहुने उनको भनाइ छ ।

आर्थिक वर्ष २०८२/८३ को चौथो त्रैमासिक एवं वार्षिक प्रगति समीक्षा तथा मन्त्रालयस्तरीय विकास समस्या समाधान समितिको बैठकलाई सम्बोधन गर्दै मन्त्री श्रेष्ठले आफूले आर्थिक वर्षको अन्तिम चरणतिर मन्त्रालयको नेतृत्व गर्ने अवसर पाएको उल्लेख गर्दै छोटो अवधिमा मन्त्रालयका नीति, कार्यक्रम तथा आयोजनाको समीक्षा गर्दा गत वर्ष उपलब्धि र आत्मसमीक्षा दुवैका दृष्टिले महत्वपूर्ण रहेको बताए ।

उनले विभिन्न चुनौतीका बाबजुद मन्त्रालयले सन्तोषजनक भौतिक प्रगति हासिल गरेको बताए । मन्त्री श्रेष्ठले नेपाल–भारत ऊर्जा सहकार्य थप सुदृढ हुनु, प्रसारण पूर्वाधार विस्तारको प्रक्रिया अघि बढ्नु, नेपाल विद्युत प्राधिकरणलाई ऊर्जा बण्ड जारी गर्ने निर्णय हुनु तथा राष्ट्रिय प्राथमिकताका आयोजनाहरूलाई थप गति दिनु गत आर्थिक वर्षका महत्वपूर्ण उपलब्धि बताए ।

उनले चालु आर्थिक वर्ष २०८३/८४ लाई अवसर र परिणामको वर्षका रूपमा लिइएको उल्लेख गर्दै विद्युत उत्पादन, प्रसारण, वितरण तथा ऊर्जा व्यापार विस्तारसँगै हरित ऊर्जाको प्रवद्र्धन, निजी क्षेत्रको सक्रिय सहभागिता, क्षेत्रीय ऊर्जा बजारमा नेपालको उपस्थिति, भूमिगत जल व्यवस्थापन तथा बहुउद्देश्यीय आयोजनाको प्रभावकारी कार्यान्वयनमार्फत गुणात्मक परिवर्तन ल्याउने आधार तयार भएको बताए  ।

प्रगति समीक्षाअनुसार आर्थिक वर्ष २०८२/८३ मा मन्त्रालयको कुल बजेट ८४ अर्ब ३३ करोड मध्ये ५२ अर्ब २८ करोड रुपियाँ खर्च भएको छ। मन्त्रालयको वित्तीय प्रगति करिब ६२ प्रतिशत र भौतिक प्रगति ७१.३५ प्रतिशत पुगेको छ । ऊर्जा क्षेत्रको भौतिक प्रगति ६३.२७ प्रतिशत र जलस्रोत तथा सिँचाइ क्षेत्रको भौतिक प्रगति ७९.२७ प्रतिशत रहेको छ ।

बैठकमा बुढीगण्डकी र अपर अरुण जलविद्युत आयोजनाको लगानी मोडालिटी स्वीकृत हुनु, ट्यारिफ बेस्ड कम्पेटिटिभ बिडिङ मार्फत प्रसारण लाइन निर्माण प्रक्रिया अघि बढ्नु, ऊर्जा, जलविद्युत र सिँचाइका महत्वपूर्ण आयोजनालाई राष्ट्रिय प्राथमिकता प्राप्त आयोजना घोषणा गर्नु, नेपाल–भारत ऊर्जा सचिवस्तरीय संयन्त्रको १३औँ बैठक सम्पन्न हुनु, ऊर्जा तथा जलस्रोतसम्बन्धी नयाँ विधेयकहरू अगाडि बढ्नु र नेपाल विद्युत प्राधिकरणलाई २० अर्ब बराबरको ऊर्जा बण्ड जारी गर्न स्वीकृति दिनु मन्त्रालयका प्रमुख उपलब्धिका रूपमा प्रस्तुत गरिएको थियो ।

यसैगरी वैकल्पिक ऊर्जा प्रवद्र्धन केन्द्र, जलस्रोत तथा सिँचाइ विभाग र नेपाल विद्युत प्राधिकरणको प्रगति सन्तोषजनक रहेको तथा विद्युत विकास विभाग र जल तथा ऊर्जा आयोगको कार्यसम्पादन अपेक्षाकृत कमजोर रहेको जानकारी बैठकमा दिइयो । स्रोत सहमति ढिलाइ, स्थानीय अवरोध, जनशक्ति अभाव तथा वातावरणीय स्वीकृतिमा हुने ढिलाइलाई कमजोर प्रगतिका मुख्य कारणका रूपमा औँल्याइएको छ।

राष्ट्रिय गौरवका आयोजनामध्ये रानी–जमरा–कुलरिया, बबई र सिक्टा सिँचाइ आयोजनाले उल्लेखनीय प्रगति हासिल गरेका छन् भने भेरी–बबई डाइभर्सन, सुनकोशी–मरिन र बुढीगण्डकी आयोजनामा जग्गा अधिग्रहण, ठेक्का व्यवस्थापन तथा स्रोत परिचालनका चुनौती अझै कायम रहेको समीक्षा प्रस्तुत गरिएको छ । बैठकले आगामी वर्षको सफलता जग्गा अधिग्रहण, वन तथा वातावरणीय स्वीकृति, प्रसारण लाइनको ‘राइट अफ वे’ समस्या समाधान, निर्माण व्यवसायीको कार्यसम्पादन सुधार, स्रोत सुनिश्चितता तथा अन्तरनिकाय समन्वयलाई प्रभावकारी बनाउन सकिएमा मात्र सम्भव हुने निष्कर्ष निकालेको छ ।एभरेष्ट न्यूज एजेन्सी