राैतहट । प्रादेशिक अस्पताल गौर परिसरमा नव-निर्मित पञ्चमुखी हनुमान मन्दिरको उद्घाटन गौर नगरपालिकाका नगर प्रमुख शम्भु साहले गर्नुभएको छ। नगर प्रमुख साहले वि.सं. २०८० फागुन २४ गते शिलान्यास गर्नुभएको उक्त मन्दिरको निर्माण कार्य गौर नगरपालिकाको बजेटबाट सम्पन्न गरिएको हो। मन्दिरमा स्थापित पञ्चमुखी हनुमानको मूर्ति भने नगर प्रमुख साहको व्यक्तिगत सहयोगमा प्राप्त भएको जनाइएको छ।

मन्दिर उद्घाटन कार्यक्रममा बोल्दै नगर प्रमुख साहले धार्मिक तथा सांस्कृतिक सम्पदाको संरक्षण र प्रवर्द्धनका लागि नगरपालिकाले निरन्तर सहयोग गर्दै आएको बताउनुभयो। उहाँले अस्पताल परिसरमा निर्माण गरिएको मन्दिरले बिरामी, उनका आफन्त तथा सर्वसाधारणलाई आध्यात्मिक शान्ति र धार्मिक आस्थाको केन्द्रका रूपमा सेवा पुर्‍याउने विश्वास व्यक्त गर्नुभयो। अस्पताल प्रशासनका अनुसार मन्दिरको दैनिक पूजा–आराधना तथा व्यवस्थापनसम्बन्धी खर्च अस्पताल प्रशासनले व्यहोर्नेछ। धार्मिक तथा सांस्कृतिक महत्व बोकेको उक्त मन्दिरले अस्पताल परिसरमा आउने श्रद्धालु तथा सर्वसाधारणलाई पूजा–आराधना, ध्यान तथा आध्यात्मिक शान्ति प्राप्त गर्ने उपयुक्त स्थल प्रदान गर्ने अपेक्षा गरिएको छ। उद्घाटनसँगै मन्दिर सर्वसाधारणका लागि खुला गरिएको छ।

सर्लाही, १० गते असार । सर्लाहीको धनकौल गाउँपालिकाको १७ औँ गाउँसभा भव्य रूपमा सम्पन्न भएको छ । गाउँपालिका अध्यक्ष राम आश्रय साहले आर्थिक वर्ष २०८३÷०८४ का लागि नीति तथा कार्यक्रम प्रस्तुत गर्दै ४२ करोड ५५ लाख ३५ हजार रुपैयाँ बराबरको बजेटसहित शिक्षा, कृषि, पूर्वाधार विकास, सुशासन तथा आर्थिक समृद्धिलाई प्रमुख प्राथमिकतामा राखिएको बताएका छन् । गाउँसभामा मधेश प्रदेशसभा सदस्य तथा पूर्व स्वास्थ्य तथा जनसंख्या मन्त्री बिरेन्द्र प्रसाद सिंह, गाउँपालिका उपाध्यक्ष, वडा अध्यक्षहरू, कार्यपालिका सदस्य, गाउँसभा सदस्य, कर्मचारी, सञ्चारकर्मी, राजनीतिक दलका प्रतिनिधि, बुद्धिजीवी, समाजसेवी तथा स्थानीय सर्वसाधारणको उल्लेखनीय सहभागिता रहेको थियो ।

नीति तथा कार्यक्रम प्रस्तुत गर्दै अध्यक्ष साहले नेपालको संविधान, संघीय लोकतान्त्रिक गणतन्त्रको भावना तथा “समृद्ध नेपाल, सुखी नेपाली” को राष्ट्रिय आकांक्षालाई आत्मसात् गर्दै स्थानीय तहको समृद्धि र नागरिकको जीवनस्तर उकास्ने लक्ष्यसहित कार्यक्रम ल्याइएको बताए । उनले शहीदहरूको योगदानको स्मरण गर्दै लोकतान्त्रिक मूल्य–मान्यता, मानव अधिकार, सामाजिक न्याय र समावेशी विकासप्रति गाउँपालिका प्रतिबद्ध रहेको स्पष्ट पारे ।

अध्यक्ष साहका अनुसार सार्वजनिक सेवा प्रवाहलाई छिटो, छरितो, पारदर्शी र नागरिकमैत्री बनाउने, भ्रष्टाचार नियन्त्रण गर्ने, विकास आयोजनाको प्रभावकारी कार्यान्वयन गर्ने तथा स्थानीय स्रोत–साधनको अधिकतम उपयोगमार्फत आर्थिक गतिविधि विस्तार गर्ने नीति अवलम्बन गरिएको छ । शिक्षा क्षेत्रमा व्यापक सुधार गाउँपालिकाले शिक्षा क्षेत्रलाई विशेष प्राथमिकतामा राख्दै विद्यालयहरूलाई क्रमशः प्रविधिमैत्री तथा डिजिटल प्रणालीमा रूपान्तरण गर्ने योजना अघि सारेको छ ।

प्रत्येक विद्यालयमा इन्टरनेट सेवा, ल्यापटप, प्रिन्टर तथा आवश्यक डिजिटल उपकरण उपलब्ध गराइने, विद्यालय प्रशासनलाई सफ्टवेयर प्रणालीमा आबद्ध गरिने तथा गुणस्तरीय शिक्षाका लागि आवश्यक वातावरण निर्माण गरिने नीति लिइएको छ । त्यस्तै, विद्यार्थी सङ्ख्याको आधारमा शिक्षक व्यवस्थापन गरिने, विषयगत शिक्षक अभाव भएका विद्यालयमा योग्य युवालाई स्वयंसेवक शिक्षकका रूपमा परिचालन गरी शिक्षासँगै स्थानीय स्तरमै रोजगारी सिर्जना गर्ने कार्यक्रमलाई प्राथमिकता दिइएको छ ।

विद्यालय पूर्वाधार विकास, खेलकुद सामग्री, बेन्च–डेस्क, पंखा तथा अन्य शैक्षिक सामग्री व्यवस्थापनमा समेत विशेष ध्यान दिइने जनाइएको छ । कृषि र आर्थिक समृद्धिमा विशेष जोड कृषि उत्पादनको दृष्टिले सम्भावनायुक्त क्षेत्र रहेको धनकौल गाउँपालिकाले कृषिको व्यवसायीकरण, आधुनिक प्रविधिको प्रयोग, उत्पादन वृद्धि तथा किसानको आयआर्जन बढाउने कार्यक्रमलाई उच्च प्राथमिकता दिएको छ ।

स्थानीय उत्पादनको प्रवद्र्धन, उद्यमशीलता विकास तथा रोजगारी सिर्जनामार्फत आर्थिक समृद्धिको आधार तयार गर्ने लक्ष्य नीति तथा कार्यक्रममा समेटिएको छ । बहुवर्षीय योजनामार्फत दिगो विकास गाउँपालिकाले गौरवका आयोजनाहरूलाई बहुवर्षीय योजनाका रूपमा सञ्चालन गर्ने नीति अवलम्बन गरेको छ । ठूला तथा महत्वपूर्ण विकास आयोजनाका लागि पर्याप्त बजेट सुनिश्चित गर्दै ठेक्का प्रक्रियामार्फत समयमै सम्पन्न गर्ने लक्ष्य लिइएको छ ।

यसले विकास निर्माण कार्यलाई थप व्यवस्थित, प्रभावकारी तथा दिगो बनाउने अपेक्षा गरिएको छ । गाउँसभामा प्रस्तुत नीति तथा कार्यक्रमले शिक्षा, स्वास्थ्य, कृषि, पूर्वाधार, युवा तथा खेलकुद, महिला सशक्तीकरण, सामाजिक सुरक्षा, वातावरण संरक्षण तथा सुशासनका क्षेत्रलाई समेट्दै “समृद्ध, सक्षम र आत्मनिर्भर धनकौल” निर्माणको स्पष्ट मार्गचित्र प्रस्तुत गरेको सहभागीहरूले बताएका छन् । उक्त जानकारी नेपाली कांग्रेस मधेश प्रदेश सूचना तथा सञ्चार विभागका सचिव निकेश त्रिपाठीले दिएका हुन् ।

आरके श्रीवास्तव,रौतहट,१० गते असार ।

“सभ्य र समृद्ध परोहा ः हाम्रो परोहा, राम्रो परोहा” भन्ने मूल नारासहित परोहा नगरपालिकाको १० औँ नगरसभा आर्थिक वर्ष २०८३÷०८४ का लागि सम्पन्न भएको छ । नगरपालिकाको नव निर्मित भवन, लौकाहामा आयोजित सभामा आगामी आर्थिक वर्षका नीति तथा कार्यक्रम तथा बजेट प्रस्तुत गरिएको हो । नगरसभाको प्रारम्भमा प्रमुख प्रशासकीय अधिकृत विष्णुप्रसाद शर्माले स्वागत मन्तव्य व्यक्त गर्दै रोजगार प्रवद्र्धन, नागरिक सशक्तीकरण तथा समग्र विकासलाई प्राथमिकतामा राखेर बजेट तर्जुमा गरिएको जानकारी दिए । कार्यक्रमका प्रमुख अतिथि नेपाली कांग्रेसका नेता रामचन्द्र गिरी रहेका थिए ।

नगरप्रमुख शेष वकिलको अध्यक्षतामा सम्पन्न नगरसभामा उनले आगामी आर्थिक वर्ष २०८३÷०८४ का नीति तथा कार्यक्रम प्रस्तुत गर्दै आफ्नो कार्यकालको यो अन्तिम नगरसभा भएकाले नगरको समग्र हितका लागि अहोरात्र खटेर काम गरेको बताए । नगरप्रमुख वकिलले शिक्षा, पूर्वाधार र सामाजिक विकासलाई प्राथमिकतामा राखिएको उल्लेख गर्दै नगरभित्र हाल ६ वटा माध्यमिक विद्यालय सञ्चालनमा रहेको, नगर शिक्षक भर्ना गरिएको तथा पालिकालाई पूर्ण साक्षर बनाउन विभिन्न शैक्षिक कार्यक्रम सञ्चालन गरिने जानकारी दिए । उनले ‘मेयर छात्रवृत्ति कार्यक्रम’ सञ्चालन गरिने तथा नगरका सबै क्षेत्रमा सडक पहुँच विस्तार गरिने प्रतिबद्धता पनि व्यक्त गरे । साथै, आफ्नो कार्यकाल विवादरहित र जनतासँगको सम्बन्ध सुदृढ रहेको दाबी गरे ।

नगरसभामा प्रस्तुत बजेट वक्तव्यअनुसार आर्थिक वर्ष २०८३÷०८४ का लागि परोहा नगरपालिकाले ४९ करोड ६८ लाख ९७ हजार ४ सय ४४ रुपैयाँ बराबरको बजेट विनियोजन गरेको छ । नगरसभामा उपप्रमुख सुगन्धी गिरी, सबै वडाका वडाध्यक्ष, वडा सदस्य, कार्यपालिका सदस्य, महिला स्वास्थ्य स्वयंसेविका, कर्मचारी, नगर प्रहरी, सुरक्षाकर्मी, पत्रकार तथा विभिन्न क्षेत्रका अतिथिहरूको उल्लेखनीय उपस्थिति रहेको थियो । नगरपालिकाले प्रस्तुत गरेको नीति तथा कार्यक्रम तथा बजेटले शिक्षा, रोजगारी, नागरिक सशक्तीकरण र पूर्वाधार विकासलाई प्राथमिकतामा राख्दै समृद्ध परोहा निर्माणको लक्ष्य अघि सारेको जनाएको छ ।

करण कुमार मिश्र,रौतहट, असार १० गते । रौतहट जिल्लाका सातवटा स्थानीय तहले आगामी आर्थिक वर्ष २०८३÷०८४ का लागि बुधबार आ–आफ्नो बजेट सार्वजनिक गरेका छन् । कृषि, शिक्षा, स्वास्थ्य, पूर्वाधार विकास, पर्यटन प्रवद्र्धन तथा रोजगारी सिर्जनालाई प्राथमिकतामा राख्दै पालिकाहरूले बजेट ल्याएका हुन् ।

अन्तरसरकारी वित्तीय व्यवस्थापन ऐन, २०७४ को दफा २१ अनुसार प्रत्येक स्थानीय तहले असार १० गतेभित्र आगामी आर्थिक वर्षको आय–व्यय अनुमान सम्बन्धित नगरसभा वा गाउँसभामा पेश गर्नुपर्ने कानुनी व्यवस्था अनुसार बजेट सार्वजनिक गरिएको हो । संघीय तथा प्रदेश सरकारबाट प्राप्त हुने वित्तीय समानीकरण, सशर्त, विशेष तथा समपूरक अनुदानसँगै आन्तरिक आयलाई आधार बनाएर बजेट निर्माण गरिएको जनाइएको छ ।

जिल्लामध्ये सबैभन्दा ठूलो बजेट चन्द्रपुर नगरपालिकाले ल्याएको छ । १७ औँ नगरसभाबाट पारित बजेटअनुसार चन्द्रपुरले आगामी आर्थिक वर्षका लागि १ अर्ब २१ करोड ८० लाख रुपैयाँको बजेट सार्वजनिक गरेको हो । चन्द्रनिगाहपुरस्थित होटल ए.एन. प्लाजामा आयोजित नगरसभामा नगर उपप्रमुख जयमाला चौधरीले बजेट प्रस्तुत गरेकी थिइन् ।

त्यसैगरी गौर नगरपालिकाले ५३ करोड ८८ लाख १२ हजार रुपैयाँ बराबरको बजेट सार्वजनिक गरेको छ । १८ औँ नगरसभामा नगर प्रमुख शम्भु साहले समग्र विकास, सुशासन र समृद्धिलाई केन्द्रमा राख्दै बजेट प्रस्तुत गरेका हुन् । राजदेवी नगरपालिकाले ५० करोड ९० लाख ४० हजार रुपैयाँको बजेट सर्वसम्मत रूपमा पारित गरेको छ । नगर प्रमुख भिखारी यादवले सीमित स्रोत–साधनको अधिकतम उपयोग गर्दै स्वरोजगार सिर्जना तथा आधारभूत सेवाको गुणस्तर सुधारलाई प्राथमिकतामा राखिएको बताए । परोहा नगरपालिकाले ६८ लाख ९७ हजार ४ सय ४४ रुपैयाँको बजेट सार्वजनिक गरेको छ ।

नगर प्रमुख शेख वकिलका अनुसार शिक्षा, सामाजिक विकास, महिला सशक्तीकरण, कृषि आधुनिकीकरण, पर्यटन तथा युवा रोजगारीलाई मुख्य प्राथमिकता दिइएको छ । बजेटले कृषि व्यवसायीकरण, महिला उद्यमशीलता, सहकारी सुधार तथा युवालाई स्वरोजगारमुखी कार्यक्रममार्फत आर्थिक समृद्धिको लक्ष्य लिएको छ । मौलापुर नगरपालिकाले आगामी आर्थिक वर्षका लागि ४२ करोड ३० लाख १ हजार रुपैयाँको बजेट ल्याएको छ । नगरपालिकाले ‘नगर मास्टर’ र ‘नगर डाक्टर’ कार्यक्रमलाई निरन्तरता दिनुका साथै निःशुल्क बिजुली, निःशुल्क खानेपानी तथा ‘छोरीसँग मेयर कार्यक्रम’लाई पनि निरन्तरता दिएको छ ।

साथै दलित समुदायका लागि नमूना एकीकृत दलित बस्ती निर्माण तथा ‘कच्ची सडक मुक्त नगर’ अभियानलाई अघि बढाउने घोषणा गरिएको छ। नगर प्रमुख रीना साहले यी कार्यक्रमले मौलापुरलाई आधुनिक र समृद्ध नगरका रूपमा स्थापित गर्ने विश्वास व्यक्त गरिन् । दुर्गाभगवती गाउँपालिकाले ३९ करोड ३८ लाख ८१ हजार रुपैयाँको बजेट सार्वजनिक गरेको छ । शिक्षा, कृषि, स्वास्थ्य, पर्यटन, पूर्वाधार विकास तथा रोजगारी सिर्जनालाई प्राथमिकतामा राख्दै ‘समृद्ध गाउँपालिका, सुखी नागरिक’ अभियानलाई प्रभावकारी रूपमा कार्यान्वयन गर्ने लक्ष्य लिइएको छ ।

यमुनामाई गाउँपालिकाले पनि आगामी आर्थिक वर्षका लागि ३६ करोड ९ लाख ८२ हजार रुपैयाँ बराबरको बजेट सार्वजनिक गरेको छ । यद्यपि जिल्लाका तीन स्थानीय तह फतुवा विजयपुर नगरपालिका, कटहरिया नगरपालिका र गरुडा नगरपालिकाले भने निर्धारित समयभित्र बजेट सार्वजनिक गर्न सकेनन्। ती पालिकाहरूमा बजेट प्रस्तुत हुन नसक्नुको कारण खुलाइएको छैन् । जिल्लाका अधिकांश स्थानीय तहले कृषि उत्पादन वृद्धि, उद्यमशीलता विकास, सेवा प्रवाहमा सुधार तथा पूर्वाधार विस्तारलाई प्राथमिकता दिएका छन् । तर सीमित आन्तरिक आम्दानी र संघीय अनुदानमाथिको उच्च निर्भरता आगामी आर्थिक वर्षमा पनि स्थानीय सरकारका लागि प्रमुख चुनौतीका रूपमा रहने देखिएको छ ।

काठमाडौँ । वैदिक सनातन धर्मावलम्बीले घरघरमा औषधीय गुणले युक्त बिरुवा तुलसीको बिउ राखी आज निर्जला एकादशी पर्व मनाउँदैछन् । प्रत्येक वर्ष ज्येष्ठ शुक्ल एकादशीका दिन तुलसीको दल राख्ने गरिन्छ ।

आज बिउ राखिएको तुलसी एक महीनापछि अर्थात् आषाढ शुक्ल एकादशीका दिन मोठमा रोपिन्छ । आषाढ शुक्ल एकादशीदेखि कात्तिक शुक्ल एकादशीसम्म चार महीना भगवान् विष्णुको प्रतीकका रुपमा तुलसीको पूजा आराधना गरिन्छ । यो चार महीने अवधिलाई चतुर्मासा समेत भनिन्छ ।

आयुर्वेदमा उल्लेख भए अनुसार तुलसी रोपिएको स्थानलाई पवित्र मानिन्छ । तुलसी भएको स्थानमा मलेरिया फैलाउन सक्ने विषाक्त वायु समेत हटाउने क्षमता हुने तथ्य वैज्ञानिक रुपमा प्रमाणित भएको छ । तुलसीमा सबै प्रकारका प्रदूषणलाई हटाएर स्वच्छता कायम गर्न सक्ने क्षमता हुन्छ । सनातन हिन्दू धर्मावलम्बीले जीवनको अन्तिम क्षणमा पुगेकालाई तुलसी मिश्रित जल पिलाउने गर्छन् । यसो गर्दा आत्मा पवित्र हुने र लोकान्तर प्राप्तिमा सहयोग पुग्ने शास्त्रीय मान्यता रहेको धर्मशास्त्रविद बताउछन् । यस्तै महत्व भएको प्रमाणित भएपछि नै ऋषिमुनिले तुलसीलाई घरमा रोपी पूजा आराधना गर्ने रीत बसालेको बताइन्छ ।

तुलसीको पूजा आराधाना हुने घरलाई तीर्थको रुप मानिन्छ । यस्तो घरमा यमदूत समेत प्रवेश गर्दैनन् भन्ने विश्वास समेत छ । तुलसी पत्रले हरि एवं हरको पूजा गर्नेले फेरि गर्भमा आउनु पर्दैन भन्ने मान्यता छ । तुलसीको पूजा आराधना गर्नेले मोक्ष प्राप्ति गर्छन् भनी विभिन्न पुराणमा उल्लेख गरिएको छ ।एभरेष्ट न्यूज एजेन्सी

काठमाडौँ । ब्राजिलले स्कटल्यान्डलाई ३-० गोल अन्तरले पराजित गर्दै विश्वकप फुटबल २०२६ को समूह ‘सी’ विजेता बनेको छ । मियामीमा भएको खेलमा स्कटल्यान्डको कमजोर रक्षापङ्क्तिको फाइदा उठाउँदै ब्राजिलले सहज जित निकालेको हो ।

समूह चरणबाट इतिहासमै पहिलो पटक नकआउट चरणमा पुग्ने लक्ष्यसहित मैदान उत्रिएको स्कटल्यान्डलाई कम्तीमा एक अंक आवश्यक थियो । तर लगातार भएका रक्षात्मक गल्तीले टोलीको सपना संकटमा परेको छ । अब स्कटल्यान्डको भविष्य अन्य समूहका नतिजामा निर्भर रहनेछ ।

खेलको सुरुआतमै स्कट म्याकेन्नाले बल नियन्त्रणमा ढिलाइ गर्दा ब्राजिलका युवा खेलाडी रायनले बल खोसेका थिए । त्यसपछि उनले दिएको पासलाई भिनिसियस जुनियरले गोलमा परिणत गर्दै ब्राजिललाई अग्रता दिलाए । त्यसपछि ब्राजिलले खेलमाथि पूर्ण नियन्त्रण कायम राख्दै थप दुई गोल गर्‍यो र सहज जित सुनिश्चित गर्‍यो । ब्राजिलका लागि भिनिसियस जुनियरले यस खेलमा २ गोल गरे भने माथेअस कुन्हाले एक गोल गरेका थिए । ब्राजिलका लागि यस खेलमा नेइमार २०२३ पछि पछिलो पटक राष्ट्रिय टिममा फर्किनु सुखद पक्ष रह्यो ।

जितसँगै ब्राजिल समूह ‘सी’ को शीर्ष स्थानमा रहँदै अन्तिम ३२ मा प्रवेश गरेको छ । पराजित स्कटल्यान्ड भने तीन अंकमा सीमित रहँदै उत्कृष्ट तेस्रो स्थान प्राप्त गर्ने टोलीहरूको सूचीमा पर्ने आशामा रहेको छ । तर त्यसका लागि उसले अन्य समूहका खेलको नतिजा कुर्नुपर्ने अवस्था आएको छ ।

समूह ‘सी’ को अर्को खेलमा मोरक्कोले हैटीलाई ४-२ ले पराजित गरे पनि समूह विजेता बन्न भने सकेन । ब्राजिलको जितसँगै मोरक्को दोस्रो स्थानमा रहँदै नकआउट चरणमा पुगेको छ ।

एटलान्टामा भएको खेलमा विश्व वरियतामा ८३औँ स्थानमा रहेको हैटीले दुई पटक अग्रता बनाएर मोरक्कोलाई दबाबमा पारेको थियो । खेलको १०औँ मिनेटमा लेनी जोसेफको प्रहार मोरक्कोका गोलरक्षक यासिन बोनोमा लागेर जाली चुम्दा हैटीले अग्रता लियो । उक्त गोल आत्मघाती गोलका रूपमा दर्ता भयो ।

मोरक्कोका लागि अच्राफ हाकिमीले ३९औँ मिनेटमा बराबरी गोल फर्काए । त्यसको तीन मिनेटपछि विल्सन इसिडोरले उत्कृष्ट प्रहारमार्फत हैटीलाई पुनः अग्रता दिलाए । तर पहिलो हाफको अतिरिक्त समयमा इस्माइल साइबारीले गोल गर्दै मोरक्कोलाई २-२ को बराबरीमा ल्याए । दोस्रो हाफमा मोरक्कोले दबाब बढाउँदै खेल आफ्नो पक्षमा पार्‍यो। खेल सकिन १२ मिनेट बाँकी रहँदा सुफियान रहिमीले गोल गर्दै टोलीलाई पहिलो पटक अग्रता दिलाए। निर्धारित समय सकिन एक मिनेट बाँकी रहँदा गेसिम यासिनले अर्को गोल थपेपछि मोरक्कोले ४-२ को रोमाञ्चक जित हात पार्‍यो ।

पराजित भए पनि हैटीले प्रतियोगितामा सम्झनलायक प्रदर्शन गर्‍यो । यसअघि ब्राजिल र स्कटल्यान्डसँग पराजित भइसकेको हैटी प्रतियोगिताबाट बाहिरिसकेको थियो । तर विश्वकपमा ५२ वर्षपछि गोल गर्न सफल हुँदै टोलीले आफ्नो गोल सङ्ख्या दोब्बर बनाएको छ ।

समूह ‘सी’ बाट ब्राजिल समूह विजेता र मोरक्को उपविजेताका रूपमा नकआउट चरणमा प्रवेश गरेका छन् । स्कटल्यान्ड भने उत्कृष्ट तेस्रो स्थान प्राप्त गर्ने टोलीमध्ये पर्न सके मात्र अघिल्लो चरणमा पुग्नेछ भने हैटी प्रतियोगिताबाट बाहिरिएको छ ।एभरेष्ट न्यूज एजेन्सी

काठमाडौँ । जल तथा मौसम विभागले  हाल कोशी, मधेश र बागमती प्रदेशका सम्पुर्ण भू-भाग, गण्डकी प्रदेशको केही भू-भाग र लुम्बिनी प्रदेशको पूर्वी भू-भागको थोरै स्थानमा मनसुनी वायूको प्रभाव रहेको छ र अन्य भू-भागमा पश्चिमी वायू र स्थानीय वायूको आंशिक प्रभाव रहेको जानकारी दिएको छ ।

हाल देशका हिमाली र पहाडी भू-भागमा साधारणतया बादल लागेको छ। तराईमा आंशिक बादल लागेको छ। बागमती, गण्डकी, लुम्बिनी प्रदेशको पहाडी भू-भागको एक-दुई स्थानमा मेघगर्जन/चट्याङ्ग सहित हल्का वर्षा भईरहेको छ ।

आज दिउँसो देशका हिमाली र पहाडी भू-भाग साथै कोशी प्रदेशका तराई भू-भागमा साधारणतया बादल लाग्नेछ । मधेश प्रदेश तथा बागमती, गण्डकी प्रदेशको तराई भू-भागमा आंशिक बादल लाग्नेछ । लुम्बिनी र सुदूरपश्चिम प्रदेशको तराई भू-भागमा मौसम मूख्यतया सफा रहनेछ । देशका हिमाली र पहाडी भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ। कोशी प्रदेशका तराई भू-भागका थोरै स्थानमा तथा मधेश प्रदेश, बागमती र गण्डकी प्रदेशको तराईका एक-दुई स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। लुम्बिनी र सुदूरपश्चिम प्रदेशका तराई भू-भागका केही स्थानहरूमा तातो लहर तथा बागमती र गण्डकी प्रदेशका तराई भू-भागका केही स्थानमा पनि  तातो दिन हुने सम्भावना छ ।

त्यस्तै आज राति कोशी, बागमती र गण्डकी प्रदेशका हिमाली र पहाडी भू-भागका साथै कोशी प्रदेशका तराई भू-भागमा साधारणतया बादल लाग्नेछ । मधेश प्रदेश तथा लुम्बिनी, कर्णाली र सुदूरपश्चिम प्रदेशको हिमाली र पहाडी भू-भागमा आंशिक बादल लाग्नेछ ।  बागमती, गण्डकी, लुम्बिनी र सुदूरपश्चिम प्रदेशको तराई भू-भागमा मौसम मूख्यतया सफा रहनेछ । कोशी र गण्डकी प्रदेशको हिमाली र पहाडी भू-भागका थोरै स्थानमा तथा बागमती प्रदेशको हिमाली र पहाडी भू-भागका एक-दुई स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ । कोशी प्रदेशका तराई भू-भागका थोरै स्थानमा तथा मधेश प्रदेशको तराईका एक-दुई स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ ।एभरेष्ट न्यूज एजेन्सी

आजको राशिफल बिस २०८३ असार ११ गते विहिबार ईस २०२६ जुन २५ नेपाल सम्बत ११४६ तछलाथ्व एकादशी, रौद्र नाम संवत्सर सूर्य उत्तरायण, गृष्म ऋतु, जेठ शुक्ल एकादशी, चन्द्रमा तुला राशिमा, स्वाति नक्षत्र, शिव योग, वणिज करण । आज नेपालमा सुर्योदय बिहान ५ बजेर १० मिनेटमा र सूर्यास्त साँझ ७ बजेर ४ मिनेटमा हुनेछ ।

आज जन्म लिने बच्चा तुला राशीको हुनेछ । आज निर्जला एकादशी, घरघरमा तुलसीको बिउ राखी मनाइँदैछ  ।

मेष (चु, चे, चो, ला, लि, लु, ले, लो, अ) –

आजको दिन उत्साह, आत्मविश्वास र नयाँ अवसरले भरिएको रहनेछ। बिहानदेखि नै काममा सक्रियता बढ्नेछ र रोकिएका योजनाहरू अघि बढ्न थाल्नेछन्। कार्यक्षेत्रमा तपाईंको मेहनतको कदर हुनेछ र नयाँ जिम्मेवारी प्राप्त हुन सक्छ। आर्थिक पक्षमा क्रमिक सुधार देखिनेछ, तर अनावश्यक खर्चमा नियन्त्रण गर्नुपर्छ। परिवारमा खुसी र मेलमिलापको वातावरण बन्नेछ। साथीभाइसँगको भेटघाटले मन प्रसन्न बनाउनेछ। स्वास्थ्य सामान्य रहनेछ, तर पर्याप्त आराम र सन्तुलित खानपानमा ध्यान दिनु आवश्यक छ।

वृष (इ, उ, ए, ओ, वा, वि, वु, वे, वो) –

आज धैर्य, संयम र व्यवहारिक सोचले तपाईंलाई सफलता दिलाउनेछ। कुनै काममा हतार नगरी योजनाबद्ध रूपमा अघि बढे राम्रो परिणाम प्राप्त हुनेछ। पुराना प्रयासबाट सकारात्मक संकेत प्राप्त हुन सक्छ। आर्थिक अवस्था स्थिर रहनेछ र बचतमा ध्यान दिने अवसर मिल्नेछ। परिवारका सदस्यहरूसँगको सम्बन्ध थप प्रगाढ बन्नेछ। मनमा रहेको चिन्ता बिस्तारै कम हुँदै जानेछ। स्वास्थ्य सामान्य रहनेछ र मानसिक शान्ति प्राप्त हुनेछ।

मिथुन (का, कि, कु, घ, ङ, छ, के, को, ह) –

आज व्यस्तता धेरै भए पनि उपलब्धि सन्तोषजनक रहनेछ। विभिन्न काम एकैपटक सम्हाल्नुपर्ने अवस्था आउन सक्छ। सहकर्मी र साथीभाइको सहयोगले काम सहज बन्नेछ। आर्थिक पक्ष सामान्य रहनेछ, तर खर्च बढ्ने सम्भावना भएकाले योजना बनाएर चल्नु उचित हुनेछ। नयाँ व्यक्तिसँगको परिचय भविष्यमा लाभदायक बन्न सक्छ। परिवारसँग समय बिताउँदा मानसिक तनाव कम हुनेछ। स्वास्थ्यमा सामान्य ध्यान दिनु राम्रो हुनेछ।

कर्कट (हि, हु, हे, हो, डा, डि, डु, डे, डो) –

आज पारिवारिक सम्बन्ध अझ सुमधुर बन्नेछ। घरमा शान्त, सकारात्मक र सहयोगी वातावरण रहनेछ। लामो समयदेखि मनमा रहेको चिन्ता कम हुन सक्छ। कार्यक्षेत्रमा तपाईंको लगनशीलताको प्रशंसा हुनेछ। आर्थिक पक्षमा सानो सुधार देखिन सक्छ। आत्मविश्वास बढ्नेछ र नयाँ काम सुरु गर्ने प्रेरणा मिल्न सक्छ। स्वास्थ्य सामान्य रहनेछ र मानसिक सन्तुलन कायम रहनेछ।

सिंह (मा, मि, मु, मे, मो, टा, टि, टु, टे) –

आज तपाईंको नेतृत्व क्षमता र निर्णय गर्ने शैली प्रभावकारी रहनेछ। कार्यक्षेत्रमा तपाईंका विचारलाई महत्व दिइनेछ। सामाजिक क्षेत्रमा प्रतिष्ठा र सम्मान बढ्न सक्छ। आर्थिक पक्ष राम्रो रहे पनि ठूलो लगानी वा जोखिमपूर्ण निर्णयमा सावधानी अपनाउनु उचित हुनेछ। परिवारको साथ र सहयोगले मनोबल बढाउनेछ। स्वास्थ्य राम्रो रहनेछ, तर अत्यधिक कामको बोझबाट जोगिनुपर्छ।

कन्या (टो, प, पि, पु, ष, ण, ठ, पे, पो) –

आज अध्ययन, अनुसन्धान र नयाँ कुरा सिक्नका लागि अनुकूल दिन रहनेछ। काममा धैर्य र निरन्तरता कायम राखे राम्रो परिणाम प्राप्त हुनेछ। आर्थिक अवस्था सामान्य रहनेछ। परिवारमा सानो खुसीको समाचार प्राप्त हुन सक्छ। यात्रा वा बाहिरी कामबाट लाभ मिल्ने सम्भावना छ। स्वास्थ्य सामान्य रहनेछ, तर आँखाको थकान वा शारीरिक कमजोरीप्रति सचेत रहनु राम्रो हुनेछ।

तुला (रा, रि, रु, रे, रो, ता, ति, तु, ते) –

आज आर्थिक पक्षमा सकारात्मक सुधार देखिन सक्छ। रोकिएको रकम प्राप्त हुने वा नयाँ आम्दानीको स्रोत खुल्ने सम्भावना छ। कार्यक्षेत्रमा सहकार्य र समन्वय राम्रो रहनेछ। परिवारमा खुसी र सन्तोषको वातावरण बन्नेछ। सामाजिक गतिविधिमा सक्रियता बढ्नेछ। नयाँ योजना सुरु गर्न र भविष्यका लागि महत्वपूर्ण निर्णय लिन उपयुक्त समय रहेको छ। आत्मविश्वास पनि बढ्नेछ।

वृश्चिक (तो, ना, नि, नु, ने, नो, या, यि, यु) –

आज मेहनत र लगनशीलताको राम्रो प्रतिफल प्राप्त हुने दिन हो। प्रतिस्पर्धात्मक क्षेत्रमा सफलता प्राप्त हुने सम्भावना छ। आर्थिक लाभका अवसर प्राप्त हुन सक्छन्। परिवारमा सुखद समाचार आउन सक्छ। सम्बन्धमा विश्वास र पारदर्शिता कायम रहनेछ। मानसिक रूपमा सन्तुलित महसुस हुनेछ। स्वास्थ्य सामान्य रहनेछ, तर पर्याप्त विश्राम लिनु आवश्यक हुनेछ।

धनु (ये, यो, भ, भि, भु, ध, फा, ढ, भे) –

आज उत्साह, उमंग र सकारात्मक ऊर्जाले भरिएको दिन रहनेछ। नयाँ अवसरहरू प्राप्त हुन सक्छन्। यात्रा, व्यापार वा बाहिरी कामबाट लाभ मिल्ने सम्भावना छ। सामाजिक क्षेत्रमा सम्मान र लोकप्रियता बढ्नेछ। परिवारसँगको सम्बन्ध सुमधुर रहनेछ। नयाँ योजना कार्यान्वयन गर्न उपयुक्त समय रहेको छ। स्वास्थ्य सामान्य रहनेछ र आत्मविश्वास बढ्नेछ।

मकर (भो, ज, जि, खि, खु, खे, खो, गा, गि) –

आज जिम्मेवारी बढ्न सक्छ र कामको चाप पनि महसुस हुन सक्छ। योजनाबद्ध रूपमा अघि बढे सबै काम सफलतापूर्वक पूरा हुनेछन्। आर्थिक पक्ष सामान्य रहनेछ, तर खर्च नियन्त्रणमा राख्नुपर्छ। परिवारको साथले मानसिक बल दिनेछ। स्वास्थ्यमा थकान वा कमजोरी महसुस हुन सक्ने भएकाले आराममा ध्यान दिनु आवश्यक छ। दिनको अन्त्यतिर सन्तोषजनक परिणाम प्राप्त हुन सक्छ।

कुम्भ (गु, गे, गो, सा, सि, सु, से, सो, द) –

आज नयाँ सोच, नयाँ योजना र नयाँ अवसरको दिन रहनेछ। रोकिएका कामहरू अघि बढ्नेछन् र कार्यक्षेत्रमा प्रगति देखिनेछ। साथीभाइ तथा सहकर्मीको सहयोग प्राप्त हुनेछ। आर्थिक पक्षमा सुधार आउने संकेत छन्। परिवारमा खुसी र समझदारी कायम रहनेछ। सामाजिक सम्बन्ध विस्तार हुनेछ र आत्मविश्वास पनि बढ्नेछ। नयाँ काम सुरु गर्न अनुकूल समय रहेको छ।

मीन (दि, दु, थ, झ, ञ, दे, दो, च, ची) –

आज मिश्रित परिणाम दिने दिन भए पनि धैर्य र सकारात्मक सोचले सफलता दिलाउन सक्छ। केही काम सहज बन्नेछन् भने केहीमा थप प्रयास गर्नुपर्ने देखिन्छ। आर्थिक पक्षमा सावधानी अपनाउनु आवश्यक हुनेछ। परिवारको साथ र सहयोगले मानसिक शान्ति मिल्नेछ। निर्णय गर्दा हतार नगर्नु राम्रो हुन्छ। दिनको अन्त्यतिर सुखद समाचार वा राहत मिल्ने सम्भावना छ ।एभरेष्ट न्यूज एजेन्सी

काठमाडौँ । उज्बेकिस्तानलाई ३–१ ले हराउँदै विश्वकप अभियानको विजयी सुरुआत गरेको कोलम्बिया आज बिहान मेक्सिकोको ग्वाडालाहारामा डिआर कङ्गोसँग भिड्दै लगातार दोस्रो जित निकाल्ने लक्ष्यमा हुनेछ । समूह ‘के’ अन्तर्गत यो खेल नेपाली समय अनुसार आज बिहान ७: ४५ बजेदेखि शुरु हुदैछ ।

दुई टोलीबीचको पहिलो भेट हुनेछ । तर उज्बेकिस्तानविरुद्ध जस्तै कोलम्बिया अपरिचित प्रतिद्वन्द्वीबाट प्रभावित नहुने विश्वासमा छ ।

हालका विश्वकप संस्करणहरूमा कोलम्बियाले समूह चरणमा प्रभावशाली प्रदर्शन गर्दै आएको छ । उसले पछिल्ला सात खेलमध्ये ६ खेल जितेको छ भने सन् २०१८ मा जापानसँग २-१ ले पराजित भएको खेल मात्रै अपवाद बनेको थियो ।

यो अवधिमा प्रशिक्षक नेस्टोर लोरेन्जोको टोलीले १७ गोल गरेको छ भने केवल पाँच गोल मात्र बेहोरेको छ । त्यसैले डिआर कङ्गोका लागि यो खेल कठिन बन्न सक्ने अनुमान गरिएको छ ।

यद्यपि, डिआर कङ्गोले पहिलो खेलमा पोर्चुगलविरुद्ध उत्कृष्ट प्रदर्शन गर्दै आफू पनि चुनौतीपूर्ण टोली भएको संकेत दिएको थियो ।

५२ वर्षपछि विश्वकपमा फर्किएको सेबास्टियन डेसाब्रेको टोलीले प्रतियोगिताकै ठूलो आश्चर्यमध्ये एक नतिजा निकाल्दै क्रिस्टियानो रोनाल्डोको पोर्चुगलसँग १-१ को बराबरी खेलेको थियो ।

त्यो नतिजासँगै डिआर कङ्गोले विश्वकप इतिहासमै पहिलो अंक र पहिलो गोल दर्ता गर्‍यो । योआने विस्साले पहिलो हाफमा हेडरमार्फत ऐतिहासिक गोल गरेका थिए ।

यसअघि सन् १९७४ मा जाइरेको नाममा विश्वकप खेलेको डिआर कङ्गोले समूह चरणका तीनै खेल हार्दै १४-० को समग्र अन्तर बेहोरेको थियो। तर यसपटकको टोलीले फरक कथा लेख्ने संकेत देखाइसकेको छ । तर लुइस डियाज र हामेस रोड्रिगेजजस्ता खेलाडीलाई रोक्नु भने डिआर कङ्गोका लागि निकै कठिन चुनौती बन्न सक्छ । किनभने कोलम्बियाले विश्वकपका पछिल्ला १० खेलमा लगातार गोल गर्न सफल भएको छ ।

यो प्रतियोगितामा साविक विजेता अर्जेन्टिनासँगै कोलम्बियाको यो सबैभन्दा लामो सक्रिय गोल गर्ने शृङ्खला हो ।

यदि कोलम्बियाले यस खेलमा जित निकाल्यो भने उसले लगातार तेस्रो विश्वकपमा नकआउट चरणको यात्रा सुनिश्चित गर्नेछ । यसअघि उसले सन् २०१४ र २०१८ मा पनि समूह चरण पार गरेको थियो। त्यसअघि भने चार सहभागितामध्ये एक पटक मात्रै अन्तिम १६ मा पुगेको थियो ।

कोलम्बियाको सफलतामा लुइस डियाजको भूमिका महत्वपूर्ण बन्न सक्छ । उनले उज्बेकिस्तानविरुद्ध एक गोल र एक गोलका लागि अवसर सिर्जना गरेका थिए । उनले विपक्षीको पेनाल्टी क्षेत्रमा छ पटक बल छोएका थिए भने चार पटक ड्रिबल, आठ द्वन्द्वमा सफलता र पाँच पटक फाउल जितेका थिए। यी सबै तथ्याङ्क टोलीमा सर्वाधिक थिए।

उता डिआर कङ्गो फेरि पनि विस्साबाट प्रेरणा खोज्नेछ । यदि उनले ग्वाडालाहारामा गोल गर्न सके भने विश्वकपका पहिलो दुई खेलमा लगातार गोल गर्ने दोस्रो अफ्रिकी खेलाडी बन्नेछन् । यसअघि सन् २०१८ मा इजिप्टका मोहम्मद सलाहले यस्तो उपलब्धि हासिल गरेका थिए ।

यस खेलमा धेरै नयाँ तथ्यहरू पनि जोडिनेछन् । यो कोलम्बिया र डिआर कङ्गोबीचको पहिलो प्रतिस्पर्धा हुनेछ । यस्तै, डिआर कङ्गोले दक्षिण अमेरिकी फुटबल महासंघअन्तर्गतको टोलीसँग खेल्ने यो दोस्रो अवसर हुनेछ । विश्वकपअघि भएको मैत्रीपूर्ण खेलमा ऊ चिलीसँग २-१ ले पराजित भएको थियो । अफ्रिकी टोलीविरुद्धको आफ्नो पहिलो विश्वकप खेलमा कोलम्बिया सन् १९९० मा क्यामरुनसँग २-१ ले पराजित भएको थियो। त्यसपछि भने उसले अफ्रिकी टोलीविरुद्धका तीनै खेल जितेको छ। कोलम्बियाले सन् १९९० मा ट्युनिसियालाई १-०, सन् २०१४ मा आइभरी कोस्टलाई २-१ र सन् २०१८ मा सेनेगललाई १-० ले पराजित गरेको थियो।एभरेष्ट न्यूज एजेन्सी

काठमाडौँ  । राष्ट्रिय स्वतन्त्र पार्टी (रास्वपा) का सदस्य ५ लाख २३ हजार ४६५ पुगेका छन् ।

चितवनमा जारी प्रथम महाधिवेशनको बन्द सत्रमा महामन्त्री कविन्द्र बुर्लाकोटीले सांगठनिक प्रतिवेदन पेस गर्दै पार्टी सदस्य पुरुषको संख्या ३ लाख ९६ हजार ७८९, महिलाको संख्या ८९ हजार ८९६, अन्य ५८८ तथा पार्टी विवरणमा लिंग नखुलेका ३६ हजार १९२ गरेर कुल ५ लाख २३ हजार ४६५ पुगेको जानकारी दिएका हुन् ।

रास्वपाको सदस्यताको आधारमा मधेश प्रदेश सबैभन्दा ठूलो प्रदेश बनेको छ भने बागमती दोस्रो स्थानमा रहेको देखिएको छ।

प्रतिवेदनअनुसार मधेश प्रदेशमा २३.३ प्रतिशत सदस्य रहेका छन्। बागमतीमा २०.५ प्रतिशत, लुम्बिनीमा १४.५ प्रतिशत, कोशीमा १४ प्रतिशत, गण्डकीमा ११.८ प्रतिशत, सुदूरपश्चिममा १०.६ प्रतिशत र कर्णालीमा ५.२ प्रतिशत सदस्य रहेका छन्।

जातीय संरचनाअनुसार खस आर्य समुदाय ४१ प्रतिशतसहित सबैभन्दा ठूलो समूह रहेको छ । त्यसपछि आदिवासी जनजाति १८ प्रतिशत, मधेसी १७.३ प्रतिशत, दलित ९.७ प्रतिशत, मुस्लिम २.५ प्रतिशत र थारु २ प्रतिशत रहेका छन्। करिब ९.६ प्रतिशत सदस्यको जातीय विवरण खुलाइएको छैन ।

उमेर समूहको तथ्याङ्कले रास्वपामा युवा पुस्ताको प्रभाव बलियो रहेको देखाउँछ । जस अनुसार ३५ वर्षमुनिका सदस्य ६४.१ प्रतिशत रहेका छन् । त्यसपछि ३५ देखि ४५ वर्ष उमेर समूहका १८.९ प्रतिशत, ४५ देखि ५५ वर्षका २.६ प्रतिशत र ५५ वर्षमाथिका ७.७ प्रतिशत सदस्य रहेका छन् ।

रास्वपाले जारी महाधिवेशन अघि ६ प्रदेशमा अधिवेशन सम्पन्न गरिसकेको छ भने मधेश प्रदेशमा तयारी जारी रहेको उल्लेख गरिएको छ । हालसम्म ६६ जिल्लामा, ६०९ पालिकामा र ६ हजार २ सय ६२ वडामा अधिवेशन सम्पन्न भएको विवरणमा उल्लेख छ।

अधिवेशन हुन बाँकी जिल्लामा डोल्पा, हुम्ला, रुकुम पूर्व, मनाङ, मुस्ताङ, धनुषा, सप्तरी, बारा र सर्लाही रहेका छन्। यस्तै सिन्धुपाल्चोक, सिराहा, महोत्तरी र रौतहटमा अधिवेशन प्रक्रिया सुरु भए पनि अझै सम्पन्न हुन बाँकी रहेको जनाइएको छ ।

प्रतिवेदनमा गण्डकी, सुदूरपश्चिम र विशेषगरी कर्णाली प्रदेशमा संगठन विस्तार अपेक्षाकृत कमजोर रहेको उल्लेख गर्दै ती क्षेत्रमा थप सुदृढीकरण आवश्यक रहेको औँल्याइएको छ । यस्ता कमजोरी सुधार गर्न नसके आगामी निर्वाचनमा चुनौती थपिन सक्ने चेतावनी पनि प्रतिवेदनमा गरिएको छ ।एभरेष्ट न्यूज एजेन्सी