काठमाडौँ । आज प्रतिनिधि सभाको बैठक बस्दैछ । संघीय संसद सचिवालयले आज बिहान ११ बजे बैठक बस्ने तालिका सार्बजनिक गरेको छ ।

आजको बैठकमा सभामुखले राष्ट्रपतिको कार्यालयबाट प्राप्त विधेयक प्रमाणिकरणसम्बन्धी पत्रको बेहोरा पढेर सुनाने कार्यसूची रहेको छ भने प्रधानमन्त्री वालेन्द्र शाहको तर्फबाट विज्ञान प्रविधि तथा नवप्रवर्तन मन्त्री महावीर पुनले ‘महालेखा परीक्षकको ६३औं वार्षिक प्रतिवेदन पेश गर्ने कार्यसूची रहेको छ ।

त्यस्तै प्रधानमन्त्री वालेन्द्र शाहको तर्फबाट माननीय विज्ञान, प्रविधि तथा नवप्रवर्तन मन्त्री महावीर पुनले सार्वजनिक खरिद (दोस्रो संशोधन) विधेयक, २०८३’ लाई प्रस्तुत गर्न अनुमति माग्ने प्रस्ताव, ‘सार्वजनिक खरिद (दोस्रो संशोधन) विधेयक, २०८३’ प्रस्तुत गर्ने कार्यसूची रहेको छ ।

त्यस्तै अर्थमन्त्री डा. स्वर्णिम वाग्लेलेले ‘सम्पत्ति शुद्धिकरण (मनि लाउन्डरिङ्ग) निवारण (तेस्रो संशोधन) विधेयक, २०८३’ लाई प्रस्तुत गर्न अनुमति माग्ने प्रस्ताव, ‘सम्पत्ति शुद्धिकरण (मनि लाउन्डरिङ्ग) निवारण (तेस्रो संशोधन) विधेयक, २०८३’ प्रस्तुत गर्ने कार्यसूची रहेको छ ।

त्यस्तै भूमि व्यवस्था, सहकारी, सङ्घीय मामिला तथा सामान्य प्रशासन मन्त्री प्रतिभा रावलले ‘सहकारी (पहिलो संशोधन) विधेयक, २०८३” लाई प्रस्तुत गर्न अनुमति माग्ने प्रस्ताव र ‘सहकारी (पहिलो संशोधन) विधेयक, २०८३’ प्रस्तुत गर्ने कार्यसूची रहेको छ ।

त्यसैगरी स्वास्थ्य तथा खाद्य स्वच्छता मन्त्री निशा मेहताले स्वास्थ्य विज्ञान प्रतिष्ठान सम्बन्धी केही नेपाल ऐनलाई संशोधन गर्ने विधेयक, २०८३’ लाई प्रस्तुत गर्न अनुमति माग्ने प्रस्ताव प्रस्तुत गर्ने छन् भने ‘स्वास्थ्य विज्ञान प्रतिष्ठान सम्बन्धी केही नेपाल ऐनलाई संशोधन गर्ने विधेयक, २०८३’ प्रस्तुत गर्ने कार्यसूची रहेको छ ।

त्यसैगरी आजको बैठकमा ‘आर्थिक विधेयक, २०८३’ माथि प्राप्त संशोधनसहित छलफल हुने कार्यसूची छ भने छलफलपछि ‘आर्थिक विधेयक, २०८३’ माथि प्राप्त संशोधनहरूलाई निर्णयार्थ प्रस्तुत गरिने कार्यसूची रहेको छ । त्यस्तै अर्थमन्त्री वाग्लेले ‘आर्थिक विधेयक, २०८३ लाई पारित गरियोस् भन्ने प्रस्ताव प्रस्तुत गर्ने छन् भने ‘राष्ट्र ऋण उठाउने विधेयक, २०८३ माथिको दफावार छलफल सदनमा गरियोस्’ भन्ने प्रस्ताव प्रस्तुत गर्ने छन् ।

त्यस्तै ‘राष्ट्र ऋण उठाउने विधेयक, २०८३’ माथि प्राप्त संशोधनहरूलाई निर्णयार्थ प्रस्तुत गरिने कार्यसूची छ भने अर्थ मन्त्री डा. वाग्लेले ‘राष्ट्र ऋण उठाउने विधेयक, २०८३ लाई पारित गरियोस् भनी प्रस्ताव प्रस्तुत गर्ने कार्यसूची रहेको छ ।

त्यसैगरी आजको बैठकमा सभामुखले प्रतिनिधि सभाका पूर्व सदस्य राजेन्द्र खरेलको शोक प्रस्ताव प्रस्तुत गर्ने कार्यसूची रहेको छ ।एभरेष्ट न्यूज एजेन्सी

काठमाडौँ । जल तथा मौसम विज्ञान विभागले  हाल कोशी, मधेश र बागमती प्रदेशका सम्पुर्ण भू-भाग, गण्डकी प्रदेशको केही भू-भाग र लुम्बिनी प्रदेशको पूर्वी भू-भागको थोरै स्थानमा मनसुनी वायूको प्रभाव रहेको र अन्य भू-भागमा पश्चिमी वायू र स्थानीय वायूको आंशिक प्रभाव रहेको जानकारी दिएको छ । साथै गण्डकी र लुम्बिनी प्रदेशको बाँकी भू-भाग, कर्णाली र सुदुरपश्चिम प्रदेशका सम्पूर्ण भू-भागमा ३-४ दिनमा मनसुन बिस्तार हुने सम्भावना रहेको उल्लेख गरेको छ ।

हाल सुदुरपश्चिम प्रदेशको तराई भू-भागमा मूख्यतया सफा रहेको छ। देशका बाँकी भू-भागमा आंशिक बादल लागेको छ। । कोशी, बागमती र सुदुरपश्चिम प्रदेशका एक-दुई स्थानमा हल्का वर्षा भईरहेको छ ।

आज दिउँसो देशका हिमाली र पहाडी भू-भागमा साधारणतया बादल लाग्नेछ र तराई भू-भागमा आंशिक बादल लाग्नेछ । कोशी प्रदेशका केही स्थानमा, बागमती, गण्डकी र लुम्बिनी प्रदेशका हिमाली र पहाडी भू-भागका केही स्थानमा तथा कर्णाली र सुदूरपश्चिम प्रदेशका हिमाली र पहाडी भू-भागका थोरै स्थानमा मेघगर्जन/चट्याङ्ग सहित मध्यमसम्म वर्षाको सम्भावना छ।  मधेश, बागमती, गण्डकी र लुम्बिनी प्रदेशका तराईका थोरै स्थानमा तथा सुदूरपश्चिम प्रदेशका तराईका एक-दुई स्थानमा मेघगर्जन/चट्याङ्ग सहित हल्का देखि मध्यम वर्षाको सम्भावना छ ।  सुदूरपश्चिम प्रदेशका तराई भू-भाग तथा लुम्बिनी प्रदेशका पश्चिम तराई क्षेत्रका थोरै स्थानमा तातो लहरको सम्भावना छ ।

त्यस्तै आज राति देशभर साधारणतया बादल लाग्नेछ । कोशी, बागमती र गण्डकी प्रदेशका पहाडी र हिमाली भु-भागका केही स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ ।  कर्णाली र सुदूरपश्चिम प्रदेशको पहाडी भू-भागका थोरै स्थान तथा हिमाली भू-भागका एक-दुई स्थानमा मेघगर्जन/चट्याङ्ग सहित मध्यमसम्मको  वर्षा/हिमपातको सम्भावना छ । मधेश प्रदेश तथा कोशी, बागमती, गण्डकी र लुम्बिनी प्रदेशका तराईका केही स्थानमा र सुदूरपश्चिम प्रदेशको तराई भू-भागका थोरै स्थानमा  मेघगर्जन/चट्याङ्ग सहित मध्यमसम्मको वर्षाको सम्भावना छ। कोशी प्रदेशका पहाडी र तराई भू-भागका एक-दुई स्थानमा भारी वर्षाको समेत सम्भावना रहेको छ । कोशी प्रदेशको तराई र मधेश प्रदेशको थोरै स्थानमा हावाहुरीको पनि सम्भावना रहेको छ ।एभरेष्ट न्यूज एजेन्सी

आजको राशिफल बिस २०८३ असार १४ गते आइतबार ईस २०२६ जुन २८ नेपाल सम्बत ११४६ तछलाथ्व चतुर्दशी, रौद्र नाम संवत्सर सूर्य उत्तरायण, गृष्म ऋतु, जेठ शुक्ल चतुर्दशी, चन्द्रमा वृश्चिक राशिमा, ज्येष्ठा नक्षत्र, शुभ योग, गर करण । आज नेपालमा सुर्योदय बिहान ५ बजेर ११ मिनेटमा र सूर्यास्त साँझ ७ बजेर ४ मिनेटमा हुनेछ । आज जन्म लिने बच्चा वृश्चिक राशीको हुनेछ ।

मेष (चु, चे, चो, ला, लि, लु, ले, लो, अ) –

आजको दिन आत्मविश्वास, उत्साह र सकारात्मक सोचका साथ अघि बढ्ने संकेत देखिन्छ। केही समयदेखि रोकिएका कामले गति लिन सक्छन् र नयाँ अवसर पनि प्राप्त हुन सक्छ। कार्यक्षेत्रमा तपाईंको मेहनत र निर्णय क्षमताको प्रशंसा हुनेछ। व्यवसाय गर्नेहरूका लागि नयाँ योजना बनाउने समय अनुकूल रहनेछ। आर्थिक पक्षमा सुधारका संकेत देखिए पनि अनावश्यक खर्चमा नियन्त्रण गर्नु आवश्यक हुनेछ। परिवारमा खुसी र मेलमिलापको वातावरण रहनेछ। स्वास्थ्य सामान्य रहनेछ, तर कामको चापले थकान महसुस हुन सक्ने भएकाले आराममा पनि ध्यान दिनु राम्रो हुनेछ।

वृष (इ, उ, ए, ओ, वा, वि, वु, वे, वो) –

आज शान्त स्वभाव र धैर्यले धेरै जटिल काम सहज बनाउन सक्छ। हतारमा निर्णय नगरी योजनाबद्ध रूपमा अघि बढे राम्रो उपलब्धि हासिल हुनेछ। कार्यक्षेत्रमा पुराना प्रयासको प्रतिफल प्राप्त हुने सम्भावना छ। आर्थिक अवस्था स्थिर रहनेछ र बचत बढाउने अवसर पनि मिल्न सक्छ। परिवारका सदस्यहरूसँगको सम्बन्ध अझ प्रगाढ बन्नेछ। आफन्त वा पुराना साथीभाइसँगको भेटघाटले मन प्रसन्न बनाउनेछ। स्वास्थ्य सामान्य रहनेछ र मानसिक रूपमा पनि सन्तुलित महसुस हुनेछ।

मिथुन (का, कि, कु, घ, ङ, छ, के, को, ह) –

आज व्यस्तता बढे पनि त्यसको प्रतिफल उत्साहजनक रहनेछ। नयाँ जिम्मेवारी प्राप्त हुन सक्छ र त्यसलाई सफलतापूर्वक पूरा गर्ने क्षमता पनि रहनेछ। सहकर्मी र साथीभाइको सहयोगले कठिन काम सहज बन्नेछ। आर्थिक पक्षमा साना लाभका अवसर देखिन सक्छन्। परिवारसँग रमाइलो समय बिताउने अवसर मिल्नेछ। अध्ययन, लेखन वा बौद्धिक काममा संलग्न व्यक्तिहरूका लागि दिन विशेष फलदायी रहनेछ। स्वास्थ्य सामान्य रहनेछ।

कर्कट (हि, हु, हे, हो, डा, डि, डु, डे, डो) –

आज पारिवारिक सम्बन्ध अझ मजबुत बन्नेछ। घरमा शान्त, सकारात्मक र सहयोगी वातावरण रहनेछ। परिवारका सदस्यहरूसँग महत्वपूर्ण विषयमा छलफल हुन सक्छ, जसले भविष्यका लागि राम्रो निर्णय लिन सहयोग पुर्‍याउनेछ। कार्यक्षेत्रमा तपाईंको मेहनतको उचित मूल्यांकन हुनेछ। आर्थिक पक्षमा सामान्य सुधार देखिन सक्छ। मनमा रहेको चिन्ता बिस्तारै हट्नेछ र आत्मविश्वास बढ्नेछ। स्वास्थ्य राम्रो रहनेछ।

सिंह (मा, मि, मु, मे, मो, टा, टि, टु, टे) –

आज नेतृत्व क्षमता र आत्मविश्वासले तपाईंलाई अगाडि बढाउनेछ। कार्यक्षेत्रमा नयाँ अवसर प्राप्त हुन सक्छ र महत्त्वपूर्ण व्यक्तिहरूसँग भेटघाट हुने सम्भावना छ। तपाईंका विचार र योजनाले राम्रो समर्थन पाउनेछन्। आर्थिक रूपमा लाभका संकेत देखिए पनि ठूला लगानी गर्दा राम्रोसँग सोचविचार गर्नु आवश्यक हुनेछ। परिवारको साथ र सहयोगले मनोबल बढ्नेछ। सामाजिक क्षेत्रमा सम्मान र प्रतिष्ठा पनि वृद्धि हुन सक्छ।

कन्या (टो, प, पि, पु, ष, ण, ठ, पे, पो) –

आज नयाँ ज्ञान हासिल गर्ने, अध्ययन गर्ने वा सीप विकास गर्ने अवसर प्राप्त हुन सक्छ। कार्यक्षेत्रमा धैर्य र निरन्तरता कायम राखे अपेक्षाभन्दा राम्रो परिणाम मिल्नेछ। आर्थिक अवस्था सामान्य रहनेछ, तर खर्चलाई व्यवस्थित गर्नुपर्ने देखिन्छ। परिवारमा खुसीको वातावरण रहनेछ। छोटो यात्रा वा बाहिरी काम लाभदायक बन्न सक्छ। स्वास्थ्य सामान्य रहनेछ, तर पर्याप्त आराम गर्न नबिर्सनुहोस्।

तुला (रा, रि, रु, रे, रो, ता, ति, तु, ते) –

आज आर्थिक पक्षमा सकारात्मक परिवर्तन देखिने सम्भावना छ। रोकिएको रकम प्राप्त हुने वा आम्दानीको नयाँ स्रोत फेला पर्न सक्छ। कार्यक्षेत्रमा सहकार्य र समन्वय राम्रो रहनेछ। नयाँ व्यापारिक योजना वा लगानीबारे सोच्ने अनुकूल समय हुनेछ। परिवारमा खुसी र सन्तोषको वातावरण रहनेछ। सामाजिक गतिविधिमा सहभागिता बढ्न सक्छ र नयाँ परिचय लाभदायक बन्ने सम्भावना छ।

वृश्चिक (तो, ना, नि, नु, ने, नो, या, यि, यु) –

आज मेहनत र लगनशीलताको उचित प्रतिफल प्राप्त हुने दिन हो। प्रतिस्पर्धात्मक क्षेत्रमा सफलता मिल्ने सम्भावना छ। कार्यक्षेत्रमा तपाईंको क्षमता प्रमाणित गर्ने अवसर प्राप्त हुनेछ। आर्थिक रूपमा लाभका संकेत देखिए पनि निर्णय गर्दा धैर्य अपनाउनु राम्रो हुनेछ। परिवारमा खुसीको समाचार आउन सक्छ। सम्बन्धमा विश्वास र आत्मीयता अझ बलियो बन्नेछ। स्वास्थ्य सामान्य रहनेछ।

धनु (ये, यो, भ, भि, भु, ध, फा, ढ, भे) –

आज सकारात्मक सोच र उत्साहले दिनभर साथ दिनेछ। नयाँ अवसरहरू प्राप्त हुन सक्छन्, विशेष गरी व्यापार, अध्ययन वा यात्रासँग सम्बन्धित क्षेत्रमा। सामाजिक क्षेत्रमा तपाईंको प्रभाव र सम्मान बढ्ने सम्भावना छ। आर्थिक अवस्था सुधारतर्फ जाने संकेत देखिन्छ। परिवारसँगको सम्बन्ध सुमधुर रहनेछ र प्रियजनसँग बिताएको समयले मन प्रसन्न बनाउनेछ। नयाँ योजना सुरु गर्न अनुकूल दिन रहनेछ।

मकर (भो, ज, जि, खि, खु, खे, खो, गा, गि) –

आज जिम्मेवारी केही बढ्न सक्छ, तर अनुशासन र धैर्यका साथ अघि बढ्दा सबै काम सफलतापूर्वक सम्पन्न हुनेछन्। कार्यक्षेत्रमा वरिष्ठ व्यक्तिको विश्वास जित्न सकिनेछ। आर्थिक रूपमा खर्चमा नियन्त्रण गर्नु आवश्यक हुनेछ। परिवारका सदस्यहरूको सुझाव उपयोगी साबित हुन सक्छ। स्वास्थ्यमा सामान्य थकान महसुस हुन सक्ने भएकाले पर्याप्त आराम गर्नुपर्छ। दिनको अन्त्यतिर सन्तोषजनक उपलब्धि प्राप्त हुने सम्भावना छ।

कुम्भ (गु, गे, गो, सा, सि, सु, से, सो, द) –

आज नयाँ सोच, सिर्जनशीलता र आत्मविश्वासले तपाईंलाई विशेष अवसर दिलाउन सक्छ। कार्यक्षेत्रमा रोकिएका काम अघि बढ्नेछन् र नयाँ योजना सफल हुने संकेत देखिन्छ। साथीभाइ तथा सहकर्मीको सहयोगले आत्मबल बढ्नेछ। आर्थिक पक्षमा सुधार आउने सम्भावना छ। परिवारमा खुसी र समझदारी कायम रहनेछ। सामाजिक सम्बन्ध विस्तार हुनेछ र भविष्यका लागि उपयोगी नयाँ सम्पर्क बन्न सक्छ।

मीन (दि, दु, थ, झ, ञ, दे, दो, च, ची) –

आज धैर्य, संयम र सकारात्मक सोचलाई प्राथमिकता दिनुपर्ने दिन हो। केही काम अपेक्षाअनुसार छिटो सम्पन्न नहुन सक्छन्, तर निरन्तर प्रयासले अन्ततः सफलता दिलाउनेछ। आर्थिक पक्षमा सोचविचार गरेर मात्र खर्च गर्नु राम्रो हुनेछ। परिवारको साथ र सहयोगले मानसिक शान्ति मिल्नेछ। पुराना अधुरा काम पूरा गर्ने अवसर प्राप्त हुनेछ। दिनको उत्तरार्धमा सुखद समाचार प्राप्त हुने वा मन खुसी बनाउने कुनै घटना घट्न सक्ने सम्भावना छ ।एभरेष्ट न्यूज एजेन्सी

उदयपुर । उदयपुरको कटारी नगरपालिका १ पानीट्याङ्कीस्थित सिद्धिचरण लोकमार्गमा टर्निङ लिने क्रममा खोक्साबाट मिर्चैयातर्फ जाँदै गरेको ना १ क ५५४९ नम्बरको टिपर अनियन्त्रित भएर सडक किनारमा पल्टिँदा सात जना घाइते भएका छन ।

दुर्घटनामा कटारी नगरपालिका २ गुराँसे बस्ने ६० वर्षीय शेरबहादुर थापा, सोही स्थान बस्ने ५० वर्षीया सुनिता थापा, २३ वर्षीया जेनी श्रेष्ठ, ४८ वर्षीया सिता श्रेष्ठ, ३९ वर्षीया यशोदा खड्का, ४० वर्षीया कृजा थापा र ४० वर्षीय कुलबहादुर अधिकारी घाइते भएका छन् । शेरबहादुर थापा र सुनिता थापाको मिर्चैयास्थित मनकामना अस्पतालमा उपचार भइरहेको छ अन्य पाँच जनाको मिर्चैयास्थित विष्णु क्लिनिकमा उपचार भइरहेको छ भने उनीहरूको अवस्था सामान्य रहेको प्रहरीले जनाएको छ ।

दुर्घटनापछि टिपर चालक कटारी नगरपालिका २ ददरिया बस्ने २३ वर्षीय राजेश दनुवार फरार रहेका र उनको खोजी भइरहेको प्रहरीले जानकारी दिएको छ ।एभरेष्ट न्यूज एजेन्सी

काठमाडौँ । अमेरिकाका राष्ट्रपति डोनाल्ड ट्रम्पले अमेरिकाको स्वतन्त्रताको २५०औँ वार्षिकोत्सवको अवसरमा सीमित संस्करणको नयाँ स्मारक राहदानी (पासपोर्ट) सार्वजनिक गरेका छन् । उनले नयाँ पासपोर्टको नमुना सार्वजनिक गर्दै यसलाई विशेष सम्झना स्वरूप तयार गरिएको बताएका हुन् ।

सार्वजनिक गरिएको नमुनामा ट्रम्पको ठूलो तस्बिर राष्ट्रपति कार्यकक्षको प्रसिद्ध डेस्कमाथि देखाइएको छ । पृष्ठभूमिमा अमेरिकाको स्वतन्त्रता घोषणापत्रको मूल पाठ राखिएको छ भने तल उनको हस्ताक्षर समावेश गरिएको छ । अर्को पृष्ठमा चित्रकार जोन ट्रम्बुलले बनाएको ‘स्वतन्त्रता घोषणापत्र’ सम्बन्धी ऐतिहासिक चित्र राखिएको छ ।

यो राहदानीमा प्रयोग गरिएको ट्रम्पको तस्बिर वासिङ्टनस्थित राष्ट्रिय चित्र सङ्ग्रहालयमा रहेको उनको आधिकारिक चित्रका आधारमा तयार गरिएको देखिन्छ । यसअघि अमेरिकी विदेश मन्त्रालयले सार्वजनिक गरेको नमुनाभन्दा यो डिजाइन फरक रहेको छ ।

ह्वाइट हाउसले पनि यही डिजाइन भएको तस्बिर सार्वजनिक गर्दै ‘अमेरिकाको २५०औँ वार्षिकोत्सवको सम्झनामा नयाँ अमेरिकी राहदानी’ भन्ने सन्देश राखेको थियो।

यस राहदानीको घोषणा पहिलो पटक गत अप्रिलमा अमेरिकाको २५०औँ वार्षिकोत्सव मनाउने कार्यक्रमअन्तर्गत गरिएको थियो । यसको बाहिरी तथा भित्री आवरणमा विशेष कलात्मक डिजाइन र ऐतिहासिक तस्बिरहरू समावेश गरिएको सरकारले जनाएको छ ।

अमेरिकी अधिकारीहरूका अनुसार यो सीमित संस्करणको राहदानी उपलब्ध भएपछि वासिङ्टनस्थित राहदानी कार्यालयबाट प्रत्यक्ष रूपमा राहदानी नवीकरण गर्ने सेवाग्राहीलाई प्राथमिक रूपमा उपलब्ध गराइनेछ । अन्य कार्यालय तथा अनलाइनमार्फत राहदानी नवीकरण गर्नेहरूका लागि भने हालकै डिजाइनको राहदानी कायम रहनेछ ।

हाल प्रयोगमा रहेको अमेरिकी राहदानीको भित्री आवरणमा चित्रकार पर्सी मोरानले बनाएको फ्रान्सिस स्कट कीको ऐतिहासिक चित्र रहेको छ । त्यही युद्धपछि उनले अमेरिकाको राष्ट्रिय गान बनेको गीत लेखेका थिए, जसका केही हरफहरू पनि राहदानीको भित्री भागमा छापिएका छन् ।एभरेष्ट न्यूज एजेन्सी

जनकपुरधाम । धनुषाको जनकपुर उपमहानगरपालिका ९ थापा चोकस्थित एक होटलबाट पेस्तोल र पाँच राउन्ड गोलीसहित दुई जना पक्राउ परेका छन् ।

पक्राउ पर्नेमा मुखियापट्टी मुसहरनिया गाउँपालिका ४ मुखियापट्टी बस्ने २० वर्षीय अमन यादव र हंसपुर नगरपालिका ६ सोनीगामा बस्ने १८ वर्षीय सुधिर मुखिया रहेका छन् । चेकजाँच गर्ने क्रममा उनीहरूको साथबाट काठको बिँड जडान गरिएको ‘इगल राप्टोर’ लेखिएको पेस्तोल एक थान, सोही पेस्तोलको म्यागजिन एक थान, ९ एमएमका एक राउन्ड र ७.६५ एमएमकेएफका चार राउन्ड गरी पाँच राउन्ड गोली बरामद गरेको हो।

दुवै जनालाई हातहतियारसहित नियन्त्रणमा लिई आवश्यक अनुसन्धान भइरहेको प्रहरीले जनाएको छ ।एभरेष्ट न्यूज एजेन्सी

काठमाडौँ । भेनेजुएलामा आएको विनाशकारी भूकम्पले फुटबल जगतलाई पनि ठूलो क्षति पुगेको छ । भूकम्पमा परेर राष्ट्रिय टोलीका उदाउँदा खेलाडीसहित केही युवा फुटबलरको ज्यान गएको छ भने अन्य खेलाडीका परिवार पनि प्रभावित भएका छन् ।

भेनेजुएलाको राष्ट्रिय टोली र भेनेजुएला फुटबल महासंघका अनुसार १८ वर्षीय युवा खेलाडी यिमभेर्ट बेरोतेरानको भूकम्पमा मृत्यु भएको छ । उनले केही महिनाअघि दोहामा सम्पन्न १७ वर्षमुनिको विश्वकपमा भेनेजुएलाको प्रतिनिधित्व गरेका थिए भने हालै २० वर्षमुनिको राष्ट्रिय टोलीबाट पनि खेलेका थिए ।

यस्तै, युवा फुटबलर भिक्टर पालासियोस र रजान सिजाको पनि भूकम्पमा ज्यान गएको उनीहरूका क्लब र फुटबल महासंघले पुष्टि गरेका छन् ।

यसैबीच, जुलिया फुटबल क्लबका रक्षक हेक्टर बेलोले सामाजिक सञ्जालमार्फत भूकम्पका क्रममा आफ्नी जीवनसाथीको मृत्यु भएको जानकारी दिएका छन् । उनका अनुसार श्रीमतीले भूकम्पका बेला सानो छोरीलाई जोगाउने प्रयास गर्दा ज्यान गुमाएकी हुन् । बेलोकी छोरी र उनकी फुपू भने घाइते अवस्थामा अस्पतालमा उपचाररत रहेका छन् ।एभरेष्ट न्यूज एजेन्सी

काठमाडौँ । जारी फिफा फुटबल विश्वकप अन्तर्गत समूह ‘जी’ का अन्तिम खेल आज बिहान हुदैछन् । नेपाली समय अनुसार बिहान ८: ४५ बजेदेखि शुरु हुने खेलमा बेल्जियमले न्युजिल्यान्डसँग प्रतिस्पर्धा गर्दैछ भने सोही समयमा इजिप्ट र इरान आमनेसामने हुनेछन् ।

अन्तिम खेलअघि समूहको अवस्था निकै रोमाञ्चक बनेको छ । इजिप्ट, इरान र बेल्जियम तीनै टोलीसँग समूह विजेता बन्ने सम्भावना कायम छ ।

इजिप्ट चार अंकसहित शीर्ष स्थानमा छ भने इरान पनि चार अंकका साथ दोस्रो स्थानमा रहेको छ । त्यस्तै बेल्जियम दुई बराबरीबाट दुई अंक जोडेर तेस्रो स्थानमा छ भने न्युजिल्यान्ड एक अंकसहित पुछारमा छ ।

बेल्जियमले नकआउट चरण पुग्न न्युजिल्यान्डलाई हराउनै पर्ने अवस्था छ । जित निकाले शीर्ष दुईमा स्थान निश्चित हुनेछ । यद्यपि समूह विजेता बन्न इजिप्टले इरानसँग जित निकाल्न नहुने र आफूले राम्रो गोलअन्तरका साथ जित निकाल्नुपर्ने सम्भावना पनि छ ।

रुडी गार्सियाको टोलीले पहिलो खेलमा इजिप्टसँग १-१ को बराबरी खेलेको थियो भने दोस्रो खेलमा १० खेलाडीमा सीमित रहँदा पनि इरानसँग गोलरहित बराबरी खेलेको थियो । बेल्जियमले पछिल्ला दुई विश्वकपका पाँच खेलमा जम्मा दुई गोल मात्र गरेको छ । तीमध्ये एक गोल विपक्षीको आत्मघाती थियो ।  यद्यपि बेल्जियम लगातार १५ खेलसम्म अपराजित रहेको छ । यो टोलीका लागि सकारात्मक पक्ष हो। अनुभवी गोलरक्षक थिबाउट कोर्टुवाले यो खेल खेले विश्वकपमा बेल्जियमका लागि सबैभन्दा धेरै १८ खेल खेल्ने कीर्तिमान बनाउनेछन् ।

न्युजिल्यान्डले पहिलो दुई खेलबाट एक अंक मात्र जोडेको छ । दोस्रो खेलमा इजिप्टविरुद्ध अग्रता लिए पनि अन्ततः ३-१ ले पराजित भएको थियो । विश्वकप इतिहासमा न्युजिल्यान्डले आठ खेल खेल्दा जित निकाल्न सकेको छैन । चार बराबरी र चार हार बेहोरेको टोली यसपटक पहिलो विश्वकप जितको खोजीमा हुनेछ । विश्वकपका आठमध्ये पाँच खेलमा न्युजिल्यान्डले कम्तीमा दुई गोल खाएको छ। रक्षात्मक कमजोरी सुधार्न सके मात्र बेल्जियमलाई चुनौती दिन सक्ने देखिन्छ ।

यी दुई टोलीबीच कुनै पनि प्रतियोगितामा यसअघि भेट भएको छैन । यद्यपि न्युजिल्यान्डले विश्वकपमा युरोपेली टोलीविरुद्ध खेलेका पछिल्ला दुई खेल बराबरीमा टुङ्ग्याएको थियो । सन् २०१० मा उसले स्लोभाकिया र इटालीसँग समान १–१ को नतिजा निकालेको थियो ।

समूहको अर्को खेलमा इजिप्ट र इरानबीचको भिडन्तले शीर्ष स्थानको टुङ्गो लगाउनेछ । इजिप्टले जित निकाले समूह विजेता बन्नेछ । बराबरीले पनि बेल्जियमले न्युजिल्यान्डलाई हराउन नसके वा गोलअन्तरमा इजिप्टलाई उछिन्न नसके शीर्ष स्थान सुरक्षित रहनेछ । इरानले समूह विजेता बन्न इजिप्टलाई हराउनुपर्नेछ। साथै बेल्जियमले जित निकाल्न नसक्ने वा गोलअन्तरमा इरानभन्दा अघि नबढ्ने अवस्था आवश्यक हुनेछ । समूह विजेता बन्ने टोलीले अन्तिम ३२ को चरणमा तेस्रो स्थानमा रहने टोलीसँग खेल्ने भएकाले शीर्ष स्थानलाई विशेष महत्वका रूपमा हेरिएको छ ।

इजिप्टले दोस्रो खेलमा न्युजिल्यान्डलाई ३-१ ले हराउँदै विश्वकप इतिहासकै पहिलो जित दर्ता गरेको थियो । यसैबीच मोहम्मद सलाह टोलीका सबैभन्दा प्रभावशाली खेलाडी बनेका छन् । उनले विश्वकपमा खेलेका चारै खेलमा गोल वा गोलका लागि सहयोग गरेका छन् । यदि उनले इरानविरुद्ध गोल गरे राष्ट्रिय टोलीका सर्वाधिक गोलकर्ता बन्नेछन् ।

इरानले पहिलो दुई खेल बराबरी खेले पनि खेल प्रदर्शनका आधारमा समूहका चार टोलीमध्ये सबैभन्दा कमजोर देखिएको छ । टोलीले सबैभन्दा कम प्रहार गरेको छ भने सबैभन्दा धेरै प्रहार पनि व्यहोरेको छ । विश्वकपका २० खेलमध्ये इरानले तीन खेल मात्र जितेको छ । टोलीले अहिलेसम्म विश्वकपको पहिलो चरण कहिल्यै पार गर्न सकेको छैन । बेल्जियमविरुद्धको खेलमा इरानले विश्वकप इतिहासकै सबैभन्दा बढी उमेरको सुरुआती टोली मैदानमा उतारेको थियो । औसत उमेर ३२ वर्षभन्दा बढी रहेको टोलीमा ३६ वर्ष वा सोभन्दा माथिका तीन खेलाडी सुरुदेखि मैदानमा थिए । इजिप्ट र इरानबीच विश्वकपमा पहिलो पटक भेट हुन लागेको हो । यसअघि सन् २००० मा भएको एक मैत्रीपूर्ण प्रतियोगितामा दुवैले १-१ को बराबरी खेलेका थिए। त्यसपछि पेनाल्टी सुटआउटमा इजिप्ट विजयी भएको थियो ।

समूह ‘जी’ को सम्भावित अवस्था हेर्दा इजिप्टले जिते निश्चित रूपमा समूह विजेता बन्ने छ भने बराबरीले पनि शीर्ष स्थान सुरक्षित रहने सम्भावना छ ।

त्यस्तै इरानले जिते र बेल्जियमले अनुकूल नतिजा निकाल्न नसके समूह विजेता बन्ने छ भने बेल्जियमले नकआउट पुग्न जित अनिवार्य छ । शीर्ष स्थानका लागि इजिप्टले नजित्ने र आफूले ठूलो अन्तरको जित निकाल्नुपर्ने अवस्था छ ।

त्यस्तै न्युजिल्यान्ड नकआउट पुग्ने सम्भावना अत्यन्त न्यून भए पनि पहिलो विश्वकप जितका लागि मैदानमा उत्रने छ ।एभरेष्ट न्यूज एजेन्सी

काठमाडौँ । भेनेजुएलामा गएको शक्तिशाली भूकम्पमा परी ज्यान गुमाउनेको संख्या ९२० पुगेको छ ।

राष्ट्रिय सभाका अध्यक्ष होर्खे रोड्रिगेजले दिएको जानकारीअनुसार ३ हजार ३६० जना घाइते भएका छन् भने १७२ जना अझै पनि भत्किएका भवनको भग्नावशेषमा फसिरहेका छन् । भूकम्पबाट हालसम्म ३८३ भवन, १३ अस्पताल, २५ वटा किनमेल केन्द्र र १ हजार २ अन्य संरचनामा क्षति पुगेको सरकारी तथ्यांकमा उल्लेख छ । सबैभन्दा बढी प्रभावित ला गुआइरा क्षेत्रमा सेना परिचालन गरिएकाले त्यहाँ अनावश्यक यात्रा नगर्न सरकारको आग्रह छ ।

रोड्रिगेजले घाइतेको उद्धार र उपचारका लागि प्रयोग भइरहेका सडकमा अत्यधिक भीड बढेकाले सर्वसाधारणलाई सडक खाली राखेर उद्धार टोलीलाई सहयोग गर्न अपिल गरेका छन् ।

उद्धार तथा राहत कार्यलाई तीव्र बनाउन मेक्सिको, अमेरिका, एल साल्भाडोर, स्विट्जरल्यान्ड, कोलम्बियालगायत विभिन्न देशबाट ८६१ अन्तर्राष्ट्रिय स्वयंसेवक भेनेजुएला पुगेका छन् । आगामी दिनमा थप उद्धारकर्मी पनि आउने अपेक्षा गरिएको छ ।

संयुक्त राष्ट्रसंघका अनुसार विश्वका विभिन्न देशबाट करिब १ हजार आपत्कालीन उद्धारकर्मी २५ वटा खोज तथा उद्धार टोलीमार्फत प्रभावित क्षेत्रमा परिचालन भइरहेका छन् । मुख्य राजमार्गबाट सेना, उद्धार टोली, डम्प ट्रक र भारी उपकरण प्रभावित क्षेत्रमा निरन्तर पठाइँदै छ।

सरकारले सबै आपत्कालीन सेवा सबैभन्दा बढी प्रभावित ला गुआइरा क्षेत्रमा केन्द्रित गरेको जनाएको छ । ताचिरा राज्यबाट ४५ जना अग्निनियन्त्रक, एउटा तालिमप्राप्त खोजी कुकुर तथा आवश्यक उद्धार उपकरणसहितको टोली पनि परिचालन गरिएको छ ।

यसैबीच, अमेरिकी वित्त मन्त्रालयले राहत सामग्री र आर्थिक सहयोग सहज बनाउन केही प्रतिबन्धमा अस्थायी छुट दिएको छ । यद्यपि प्रभावित क्षेत्रमा ठूलो परिमाणमा रहेको भग्नावशेष र सीमित स्रोतसाधनका कारण उद्धार कार्य अझै चुनौतीपूर्ण बनेको अधिकारीहरूले बताएका छन् ।एभरेष्ट न्यूज एजेन्सी