काठमाडौं । श्रम संस्कृति पार्टीका अध्यक्ष हर्क साम्पाङले सरकार असफल भएको बताएका छन् ।
प्रतिनिधि सभाको बैठकमा बोल्दै साम्पाङले सरकारले जनताको बाच्न पाउने संबिधान अनुसारको अधिकारको उलंघन गरेको आरोप लगाउदै सरकार असफल भएको बताए ।
उनले सुकुम्बासीको होल्डिङ सेन्टरमा प्रधानमन्त्री नगएको आरोप लगाउदै सीमामा पठाउनुपर्ने सेनालाई सुकुम्बासी बस्तीमा पठाएको भन्दै आलोचना गरेका छन् । उनले भने- ‘नेपाली सेनालाई सीमा रक्षा गर्न पठायो कि सुकुम्वासी बस्तीमा दादागिरी देखाउन पठायो ? सीमा बचाउन नसक्ने तर सेनाको दुरुपयोग गरेर आफ्नै गरिब जनतामा आतंक फैलाउनुको कारण के हो ? त्यसको उत्तर चाहिन्छ ।’
उनले देश अभिभावक विहीन बनेको बताउदा सरकारको औचित्य नभएको जिकिर गरे । साम्पाङले सरकारले भारतलाई नोट पठाएर मात्र सीमा समस्या समाधान नहुने भन्दै दुई पक्षीय वार्ता गर्न नसकेको आरोप लगाए । एभरेष्ट न्यूज एजेन्सी
जनकपुरधाम । मधेश प्रदेशमा सरकारमा सत्तासाझेदार चार दलहरुले वर्तमान सरकारलाई निरन्तरता दिने निर्णय गरेका छन् ।
सरकारका चार दल नेपाली काँग्रेस, जसपा नेपाल, नेकपा र लोसपा नेपालले काँग्रेस नेता कृष्ण प्रसाद यादव नेतृत्वको सरकारलाई निरन्तरता दिने निर्णय गर्दै यथाशिघ्र विश्वासको मत लिने निर्णय गरेका छन् ।
यादव नेतृत्वको सरकारमा रहेको जनमतले वैशाख २२ गते सरकारलाई दिएको समर्थन फिर्ता लिएपछि सरकार परिवर्तनको चलखेल शुरु भएको थियो ।
१०१ सदस्यीय प्रदेशसभामा बहुमतका लागि ५१ सिट आवश्यक पर्दछ । जसमा सरकारमा रहेका चार दलमा काँग्रेसको २२, जसपा नेपालको १८, नेकपाको १५ र लोसपाको ८ सिट गरेर कुल ६३ सिट रहेको छ ।
मधेश प्रदेशमा नेकपा एमालेको सबै भन्दा धेरै २४ सिट रहेको छ भने नेपाली काँग्रेसको २२, जसपा नेपालको १८, नेकपाको १५, जनमत पार्टीको १२, लोसपाको ८ तथा राप्रपा र नेपाल संघीय समाजवादी पार्टीको एक एक सिट रहेको छ । एभरेष्ट न्यूज एजेन्सी
काठमाडौं । राष्ट्रिय परीक्षा बोर्डको एसइई परीक्षा नियन्त्रण कार्यालयले २०८२ को नतिजा प्रकाशनको अन्तिम तयारी गरिरहेको छ ।
गत चैत्र १९ देखि २९ सम्म भएको यस बर्षको एसइई परीक्षाको नतिजा एक महिना भित्र प्रकाशित गर्न सरकारले दिएको निर्देशन अनुसार बैशाख २९ गतेभित्र नतिजा प्रकाशित गर्ने गरि तयारी गरिरहेको हो ।
परीक्षा नियन्त्रण कार्यालयले एक सूचना जारी गर्दै एसएमएस, आईभीआर तथा वेबसाइटमार्फत नतिजा सार्वजनिक हुने जानकारी दिएको छ ।
कार्यालयले एसईई २०८२ को नियमित तथा ग्रेडवृद्धि परीक्षाको नतिजा एसएमइस,आईभीआर र वेबसाइटबाट हेर्न सकिने व्यवस्था गरिएको जानकारी दिएको छ ।
सूचनाअनुसार नेपाल टेलिकमको १६०० नम्बरमा एसएमएस,युएसएसडी र आईभीआर सेवा उपलब्ध हुनेछ। यस्तै जानकी टेक्नोलोजी प्रालिको ३५००१ तथा एम्बिसन गुरु प्रालिको ३१००३ नम्बरमार्फत पनि एसएमएस सेवा प्रयोग गर्न सकिनेछ।साथै अन्य प्राविधिक साझेदारमार्फत् विभिन्न वेबसाइट तथा मोबाइल एपमार्फत् पनि नतिजा हेर्न सकिने व्यवस्था गरिएको छ ।
यस बर्षको एसइईमा सहभागी हुने विद्यार्थीको संख्या ५ लाख १२ हजार ४२१ रहेको थियो । यो वर्ष पहिलो पटक परीक्षा केन्द्रमै उत्तरपुस्तिका परीक्षण र सम्परीक्षण गरिएको थियो ।
हरेक दिन परीक्षा सकिनासाथ उत्तरपुस्तिका परीक्षण गरिएको र प्रत्येक तेस्रो दिनमा अंक जिल्लास्थित शिक्षा विकास तथा समन्वय एकाइमा उपलब्ध गराइने गरि व्यवस्थापन गरिएको थियो । त्यस्तै परीक्षा सकिएको चौथो दिनमा विद्यार्थीले प्राप्त गरेको अंक परीक्षा नियन्त्रण कार्यालयमा आइपुग्ने गरी व्यवस्था मिलाइएको थियो ।
एभरेष्ट न्यूज एजेन्सी
काठमाडौँ । रोयल च्यालेन्जर्स बैंगलुरुले जारी आइपिएलमा मुम्बई इण्डियन्सलाई पराजित गरेको छ । गएराती सम्पन्न खेलमा बैंगलुरुले लखनउलाई २ विकेटले पराजित गरेको हो ।
मुम्बईले दिएको १६७ रनको लक्ष्य पछाएको बैंगलुरुले २० ओभरमा ८ विकेट गुमाउदै लक्ष्य पुरा गरेको थियो ।
बैंगलुरुको जितमा क्रुनाल पाण्डेयले सर्बाधिक ७३ रन बनाएका थिए भने ज्याकब बेठेलले २७, जितेश शर्माले १८ र देवदत्त पाडिकलले १२ रन बनाएका थिए । त्यस्तै मुम्बईका बलर क्रोबिन बोस्चले ४ विकेट लिए भने दीपक चहरले २ विकेट लिएका थिए ।
यसअघि पहिला ब्याटिंग गरेको मुम्बईले तिलक बर्माको ५७ र नमन धीरको ४७ रनको मद्धतले २० ओभरमा ७ विकेट गुमाउदै १६६ रन बनाएको थियो । त्यस्तै बैंगलुरुका बलर भुवनेश्वर कुमारले ४ विकेट लिएका थिए ।
यो जितपछि रोयल च्यालेन्जर्स बैंगलुरुको ११ खेलमा १४ अंक भएको छ र शिर्ष स्थानमा उक्लिएको छ । त्यस्तै मुम्बई इण्डियन्स भने यस सिजनको प्लेअफको दौडबाट बाहिरिएको छ ।
जारी आइपिएल अन्तर्गत आज पञ्जाव किंग्स र दिल्ली क्यापिटल्ससँग हुदैछ । एभरेष्ट न्यूज एजेन्सी
काठमाडौँ । आज संघीय संसदको बजेट अधिवेशन शुरु हुदैछ । सरकारको सिफारिसमा राष्ट्रपति रामचन्द्र पौडेलको आव्हानमा आज २ बजे प्रतिनिधि सभाको र २ बजेदेखि नै राष्ट्रिय सभाको बैठक छुट्टा छुट्टै शुरु हुदैछ ।
आजको प्रतिनिधि सभाको बैठकमा प्रतिनिधि सभा नियमावलीको मस्यौदा समितिका सभापति गणेश पराजुलीले पेश गर्ने कार्यसूची रहेको छ । त्यस्तै आज सरकारले ल्याएका विभिन्न अध्यादेश पेश गर्ने कार्यसूची रहेको छ ।
यस बाहेक सभामुखले यस अधिवेशनका क्रममा बैठकको अध्यक्षता गर्ने सदस्यहरुको मनोनयन गर्ने कार्यसूची रहेको छ ।
त्यस्तै आजको राष्ट्रिय सभाको बैठकमा सरकारले ल्याएका अध्यादेश पेश हुने कार्यसूची रहेको छ ।एभरेष्ट न्यूज एजेन्सी
काठमाडौँ । जल तथा मौसम विज्ञान विभागले हाल नेपालमा पश्चिमी वायू, स्थानीय वायू र नेपालको पूर्वी भू-भाग नजिक तल्लो वायूमण्डलमा रहेको न्यून चापीय क्षेत्रको साथै मध्य र पूर्वी भू-भागको उपल्लो वायूमण्डलमा रहेको न्यून चापीय रेखाको समेत आंशिक प्रभाव रहेको छ ।
हाल कोशी प्रदेश लगायत बागमती र गण्डकी प्रदेशका पहाडी तथा हिमाली भू-भागहरूमा साधारणतया बादल तथा देशका बाँकी भू-भागहरूमा आंशिक बादल लागिरहेको छ । कोशी र बागमती प्रदेशका हिमाली तथा पहाडी भू-भागहरूमा तथा लुम्बिनी प्रदेशको हिमाली भू-भागको एक-दुई स्थानमा मेघगर्जन र चट्याङ सहित मध्यम वर्षा भैरहेको छ।
आज दिउँसो सुदूरपश्चिम प्रदेश लगायत देशका हिमाली र पहाडी भू-भागमा साधारणतया बादल लाग्नेछ र तराई भू-भागमा आंशिक बादल लाग्नेछ। देशका हिमाली र पहाडी भू-भागका थोरै स्थानहरूमा तथा लुम्बिनी र सुदूरपश्चिम प्रदेशका तराई भू-भागका एक-दुई स्थानमा मेघगर्जन/चट्याङ्ग सहित मध्यमसम्म वर्षाको सम्भावना रहेको छ।
त्यस्तै आज राती कोशी, मधेश, बागमती, गण्डकी र लुम्बिनी प्रदेश लगायत देशका हिमाली र पहाडी भू-भागमा साधारणतया बादल लाग्नेछ र बाँकी भू-भागमा आंशिक बादल लाग्नेछ। कोशी, मधेश, बागमती, गण्डकी र लुम्बिनी प्रदेशका थोरै स्थानहरूमा तथा बाँकी प्रदेशका एक-दुई स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना रहेको छ।एभरेष्ट न्यूज एजेन्सी
आजको राशिफल बिस २०८३ बैशाख २८ गते सोमबार ईस २०२६ मे ११ नेपाल सम्बत ११४६ वछलागा नवमी, सिद्धार्थि नाम संवत्सर सूर्य उत्तरायण, वसन्त ऋतु, जेष्ठ कृष्ण पक्ष नवमी, चन्द्रमा कुम्भ राशिमा, शतभिषा नक्षत्र, एन्द्र योग, गर करण । आज नेपालमा सुर्योदय बिहान ५ बजेर १९ मिनेटमा र सूर्यास्त साँझ ६ बजेर ४३ मिनेटमा हुनेछ । आज जन्म लिने बच्चा कुम्भ राशीको हुनेछ ।
मेष (चु, चे, चो, ला, लि, लु, ले, लो, अ)–
आज तपाईंमा ऊर्जा र उत्साह बढ्नेछ। रोकिएका काम पूरा हुने सम्भावना देखिन्छ। कार्यक्षेत्रमा तपाईंको मेहनतको कदर हुनेछ र नयाँ जिम्मेवारी प्राप्त हुन सक्छ। आर्थिक पक्षमा सुधार आउने संकेत छन्, तर खर्चमा नियन्त्रण राख्नु आवश्यक हुनेछ। परिवारसँग रमाइलो समय बित्नेछ। प्रेम सम्बन्धमा विश्वास र निकटता बढ्नेछ। विद्यार्थीका लागि अध्ययनमा राम्रो प्रगति हुने दिन छ। स्वास्थ्य सामान्य रहनेछ, तर अत्यधिक दौडधुपले थकान बढ्न सक्छ। यात्राको सम्भावना पनि देखिन्छ।
वृष (इ, उ, ए, ओ, वा, वि, वु, वे, वो)–
आज धैर्य र समझदारीले सफलता दिलाउनेछ। व्यापार तथा रोजगारीमा सकारात्मक परिवर्तन आउन सक्छ। सहकर्मी र साथीभाइबाट सहयोग प्राप्त हुनेछ। आर्थिक लाभका अवसर देखिए पनि अनावश्यक खर्च बढ्न सक्छ। परिवारमा खुसीको वातावरण बन्नेछ। प्रेम जीवनमा मिठास बढ्नेछ र दाम्पत्य सम्बन्ध बलियो बन्नेछ। स्वास्थ्यमा सामान्य सुधार आउनेछ। धार्मिक तथा सामाजिक कार्यमा सहभागी हुने अवसर मिल्न सक्छ।
मिथुन (का, कि, कु, घ, ङ, छ, के, को, हा)–
आज नयाँ योजना बनाउने र नयाँ अवसर खोज्ने दिन छ। अध्ययन तथा बौद्धिक क्षेत्रमा प्रगति हुनेछ। कार्यक्षेत्रमा तपाईंको विचारको प्रशंसा हुन सक्छ। आर्थिक अवस्था सामान्य रहे पनि भविष्यका लागि राम्रो योजना बनाउन सकिनेछ। साथीभाइसँगको सम्बन्ध सुमधुर रहनेछ। प्रेम सम्बन्धमा खुलेर संवाद गर्दा सम्बन्ध अझ बलियो बन्नेछ। स्वास्थ्यमा मानसिक तनाव कम गर्न आराम र सकारात्मक सोच आवश्यक हुनेछ।
कर्कट (हि, हु, हे, हो, डा, डि, डु, डे, डो)–
आज परिवारको साथ र सहयोगले मन प्रसन्न रहनेछ। कार्यक्षेत्रमा केही चुनौती आउन सक्छन्, तर धैर्यले समाधान निकाल्न सकिनेछ। आर्थिक लाभको सम्भावना देखिन्छ। व्यवसायमा नयाँ अवसर प्राप्त हुन सक्छ। प्रेम सम्बन्धमा समझदारी बढ्नेछ। विद्यार्थीका लागि मेहनत अनुसार सफलता मिल्ने दिन छ। स्वास्थ्य सामान्य रहनेछ, तर खानपानमा ध्यान दिनु आवश्यक हुनेछ। धार्मिक कार्यमा रुचि बढ्न सक्छ।
सिंह (मा, मि, मु, मे, मो, टा, टि, टु, टे)–
आज सामाजिक तथा व्यावसायिक क्षेत्रमा प्रभाव बढ्नेछ। नेतृत्व क्षमता देखाउने अवसर प्राप्त हुनेछ। कार्यक्षेत्रमा नयाँ जिम्मेवारी आउन सक्छ। आर्थिक पक्ष राम्रो रहने संकेत छन्। परिवारसँगको सम्बन्ध सुमधुर बन्नेछ। प्रेम जीवनमा खुसी र उत्साह बढ्नेछ। साथीभाइसँग रमाइलो भेटघाट हुन सक्छ। स्वास्थ्यमा सामान्य सुधार आउनेछ, तर आराममा ध्यान दिनु राम्रो हुनेछ। यात्राबाट लाभ मिल्ने योग देखिन्छ।
कन्या (टो, पा, पि, पु, ष, ण, ठ, पे, पो)–
आज मेहनत अनुसार राम्रो फल प्राप्त हुने दिन छ। व्यवसाय तथा जागिरमा प्रगति हुनेछ। आर्थिक लाभको सम्भावना देखिन्छ। परिवारमा सुखद वातावरण बन्नेछ। प्रेम सम्बन्धमा विश्वास बढ्नेछ। विद्यार्थीका लागि अध्ययनमा ध्यान केन्द्रित गर्नुपर्ने दिन छ। स्वास्थ्य सामान्य रहनेछ, तर थकान बढ्न सक्ने भएकाले आराम आवश्यक हुनेछ। नयाँ चिनजानले भविष्यमा फाइदा दिलाउन सक्छ।
तुला (रा, रि, रु, रे, रो, ता, ति, तु, ते)–
आज मनमा सकारात्मक सोच र उत्साह बढ्नेछ। सामाजिक क्षेत्रमा सम्मान प्राप्त हुन सक्छ। व्यापारमा लाभ हुने संकेत छन्। आर्थिक अवस्था क्रमशः सुधारतर्फ जानेछ। परिवारसँग रमाइलो समय बित्नेछ। प्रेम सम्बन्धमा नयाँ खुसी प्राप्त हुन सक्छ। स्वास्थ्यमा सुधार आउनेछ। छोटो यात्राबाट फाइदा मिल्ने सम्भावना छ। विद्यार्थीले अध्ययनमा राम्रो उपलब्धि हासिल गर्न सक्नेछन्।
वृश्चिक (तो, ना, नि, नु, ने, नो, या, यि, यु)–
आज धैर्य र संयमले सफलता दिलाउने दिन छ। कार्यक्षेत्रमा प्रतिस्पर्धा बढ्न सक्छ, तर अन्ततः सफलता तपाईंको पक्षमा आउनेछ। आर्थिक पक्ष सामान्य रहनेछ। परिवारको सहयोगले महत्त्वपूर्ण निर्णय लिन सहज हुनेछ। प्रेम सम्बन्धमा बोलीमा संयम राख्नु राम्रो हुनेछ। स्वास्थ्यमा सामान्य कमजोरी महसुस हुन सक्छ। धार्मिक तथा आध्यात्मिक गतिविधिमा रुचि बढ्नेछ। यात्राबाट सकारात्मक अनुभव प्राप्त हुन सक्छ।
धनु (ये, यो, भा, भि, भु, ध, फा, ढा, भे)–
आज भाग्यले राम्रो साथ दिनेछ। लामो समयदेखि रोकिएका काम पूरा हुन सक्छन्। व्यवसाय तथा जागिरमा प्रगति हुनेछ। आर्थिक लाभको सम्भावना बलियो देखिन्छ। परिवारसँगको सम्बन्ध अझ नजिक बन्नेछ। प्रेम जीवन सुखद रहनेछ। विद्यार्थीका लागि अध्ययनमा सफलता प्राप्त हुने दिन छ। स्वास्थ्य राम्रो रहनेछ। धार्मिक तथा सामाजिक कार्यमा सक्रियता बढ्न सक्छ। यात्राबाट लाभ प्राप्त हुने संकेत छन्।
मकर (भो, जा, जि, खि, खु, खे, खो, गा, गि)–
आज कामको चाप बढ्न सक्छ, तर परिणाम सकारात्मक रहनेछ। व्यवसायमा नयाँ योजना सफल हुन सक्छ। आर्थिक अवस्थामा सुधार आउने संकेत छन्। परिवारका सदस्यसँग सल्लाह गरेर अघि बढ्दा फाइदा हुनेछ। प्रेम सम्बन्धमा समझदारी कायम रहनेछ। स्वास्थ्यमा थकान महसुस हुन सक्छ, त्यसैले आराम आवश्यक हुनेछ। सामाजिक क्षेत्रमा सम्मान प्राप्त हुने सम्भावना छ। यात्राको योग पनि देखिन्छ।
कुम्भ (गु, गे, गो, सा, सि, सु, से, सो, दा)–
आज सिर्जनात्मक क्षमता बढ्नेछ। नयाँ अवसर प्राप्त हुन सक्छ। साथीभाइ तथा सहकर्मीको सहयोगले काम सफल बन्नेछ। आर्थिक लाभका संकेत देखिन्छन्। परिवारसँग रमाइलो वातावरण बन्नेछ। प्रेम सम्बन्धमा निकटता बढ्नेछ। विद्यार्थीका लागि अध्ययनमा ध्यान केन्द्रित गर्नुपर्ने दिन छ। स्वास्थ्य सामान्य रहनेछ। अनावश्यक तनावबाट टाढा रहनु राम्रो हुनेछ।
मीन (दि, दु, थ, झ, ञ, दे, दो, चा, चि)–
आज मनमा शान्ति र सकारात्मकता बढ्नेछ। पारिवारिक सुख र सहयोग प्राप्त हुनेछ। व्यवसाय तथा जागिरमा राम्रो प्रगति हुने सम्भावना छ। आर्थिक पक्ष बलियो बन्न सक्छ। प्रेम सम्बन्धमा विश्वास बढ्नेछ। धार्मिक तथा आध्यात्मिक कार्यमा रुचि बढ्नेछ। विद्यार्थीले मेहनत अनुसार राम्रो सफलता प्राप्त गर्न सक्नेछन्। स्वास्थ्यमा सुधार आउनेछ। नयाँ योजना तथा नयाँ चिनजानले भविष्यमा लाभ दिलाउन सक्छ।एभरेष्ट न्यूज एजेन्सी
काठमाडौँ । काठमाडौँको पशुपति क्षेत्रबाट उद्धार गरिएका सडक सहयोगापेक्षीहरुको वास्तविकता पहिचान गर्न होल्डिङ सेन्टर सञ्चालनमा ल्याइएको छ ।
काठमाडौँ महानगरपालिका, पशुपति क्षेत्र विकास कोष र मानव सेवा आश्रमले संयुक्त रुपमा वडा नम्बर ८ तिलगंगामा सञ्चालन गरिएको सेन्टरमा पहिलो दिन मंगलबार २८ जनालाई राखिएको छ । यस दिन विहान ३६ जनालाई उद्धार गरिएको थियो । उनीहरुमध्ये सेन्टरमा पुगेपछि पर्खाल नाघेर ६ जना भागेको महानगरले जानकारी दिएको छ ।
मंगलबार नै काठमाडौँ महानगरपालिकाका कार्यवाहक प्रमुख सुनिता डंगोलले सेन्टरमा पुगेर पूर्वाधार, सुविधा, व्यवस्थापन र सहयोगापेक्षीका अपेक्षाका विषयमा जानकारी लिएकी थिइन् । उद्धार गरिएकाहरुसँग कुरा गर्दै डंगोलले पारिवारिक अवस्था, सडकमा आउनु परेको कारण, शारीरिक अवस्था, परिवार र सरकारसँगका अपेक्षा लगायत विषयमा जानकारी लिएकी थिइन् । खानपान र बसोबास व्यवस्थाको कुरा गर्दै उनले, विरामीलाई उपचारको व्यवस्था मिलाउन निर्देशन दिएकी छन् ।
कोषका कार्यकारी निर्देशक सुवासचन्द्र जोशीले, सेन्टरको पूर्वाधारलाई व्यवस्थित र सुरक्षित बनाउन कोषले काम गर्ने बताए । उद्धार गरिएकामध्ये ४ जनामा मानसिक समस्या छ । १ जना ज्येष्ठ नागरिकलाई कुकुरले टोकेर घाइते बनाएको छ । उद्धारबाट व्हिलचेयर प्रयोगकर्ता र वैशाखी प्रयोगकर्तालाई समेत सेन्टरमा ल्याइएको मानव सेवा आश्रमका उपत्यका इञ्चार्ज कृष्ण पौडेलले जानकारी दिए ।
उद्धार गरिएकामध्ये ६ जना महिला र बाँकी सबै पुरुष रहेको र उमेरका हिसाबले सबैभन्दा पाको उमेरको व्यक्ति ७८ वर्षको र सबैभन्दा कान्छो २५ वर्षको व्यक्तिका रहेको महानगरले जानकारी दिएका छन् । त्यस्तै उद्धार गरिएका सोलुखुम्बु, सर्लाही, मकवानपुर, साँखु, सुनसरी, मोराङ., बारा, महोत्तरी, खोटाङ्, धनकुटा, सुर्खेत, दोलखासहित स्थानका व्यक्ति रहेका छन् । एभरेष्ट न्यूज एजेन्सी
काठमाडौं । नेपाली बजारमा आज सुनचाँदीको मुल्य बढेको छ ।
नेपाल सुनचाँदी व्यवसायी महासङ्घका अनुसार बुधबार सुनको मुल्य तोलाको ५८ सयले बढेर तोलाको २ लाख ९६ हजार ८ सयमा कारोबार भइरहेको छ । यसअघि मंगलबार सुन तोलाको २ लाख ९१ हजारमा कारोबार भएको थियो ।
यस्तै, आज चाँदीको मुल्य पनि बढेको छ । महासङ्घका अनुसार आज चाँदी तोलाको १७५ रुपैयाँले बढेर ५०५५ मा कारोबार भइरहेको छ । यसअघि मंगलबार चाँदी तोलाको ४८८० मा कारोबार भएको थियो ।एभरेष्ट न्यूज एजेन्सी
काठमाडौँ । पश्चिम बंगालकी मुख्यमन्त्री ममता बनर्जीले आफू राजीनामा नदिने स्पष्ट पारेकी छन् ।
निर्वाचनमा लज्जास्पद हार बेहोरेपछि पत्रकारहरुले राजीनामाको लागि लोकभवन कति बेला जाने भन्ने प्रश्नको जवाफ दिदै आफुले राजीनामा नदिने बताएकी हुन् । उनले भनिन्- ‘म किन जाने ? हामीले हारेको भए पो जाने, यदि म जितेको भए, म शपथ ग्रहण अघि नै राजीनामा दिने थिए । लोकभवन जाने प्रश्न नै आउने थिएन । चोरी गरेर जितेपछि उनीहरुलाई लाग्छ, मैले राजीनामा दिनुपर्छ भने त्यो हुनेवाला छैन ।’
पश्चिम बंगालको निर्वाचन परिणाम सार्वजनिक भएपछि राजनीतिक माहोल तातेको छ । तृणमूल कांग्रेसकी प्रमुख बनर्जीले निर्वाचन प्रक्रियामाथि नै गम्भीर प्रश्न उठाउँदै प्रशासनिक स्तरमै अनियमितता भएको आरोप लगाएकी छन् । उनले आफूहरू पराजित नभएको दाबी गर्दै जबर्जस्ती हराइएको बताइन् । उनले निर्वाचन आयोगसँग मिलेमतो गरेर विपक्षी दल विजयी भएको आरोपसमेत लगाइन् ।
तृणमूल कांग्रेसले निर्वाचन परिणामको समीक्षा गर्न १० सदस्यीय टोली गठन गरेको छ । उक्त टोलीले हारका कारण र भनिएका अनियमितताबारे छानबिन गर्ने जनाइएको छ । बनर्जीले निर्वाचन आयोगको भूमिकामाथि पनि प्रश्न उठाएकी छन् । उनका अनुसार आयोगले जनताको संवैधानिक अधिकार संरक्षण गर्न नसकेको आरोप छ । मतदानपछि मतदान मेसिनमा उच्च मात्रामा चार्ज रहनु शंकास्पद भएको उनले उल्लेख गरिन् ।
उनले निर्वाचनअघि आफ्ना कार्यकर्तालाई पक्राउ गरिएको, विभिन्न स्थानमा छापा मारिएको र प्रशासनिक अधिकारीहरू परिवर्तन गरिएको आरोप लगाइन् । साथै सत्तापक्ष र निर्वाचन आयोगबीच मिलेमतो भएको दाबी गर्दै सम्पूर्ण राज्य संयन्त्र आफूहरूको विरुद्ध प्रयोग गरिएको बताइन् ।
मतगणनाका क्रममा पनि दुर्व्यवहार भएको आरोप लगाउँदै उनले आफ्ना प्रतिनिधिलाई गणना कक्षमा प्रवेश गर्न नदिइएको र कुटपिट गरिएको बताइन् । सुरक्षाकर्मी र बाहिरी व्यक्तिहरूले आक्रमण गरेको दाबी गर्दै आफूलाई समेत धक्का दिइएको र शारीरिक दुर्व्यवहार भएको उनले उल्लेख गरिन् । बनर्जीले यस्तो प्रकारको निर्वाचन जीवनमै पहिलोपटक देखेको बताउँदै आफ्नो पार्टीलाई योजनाबद्ध रूपमा पराजित गराइएको दोहोर्याइन् । साथै अब आफू साधारण नागरिकका रूपमा स्वतन्त्र रूपमा आवाज उठाउने उनले बताइन् ।
सोमबार सम्पन्न मतगणनामा २९४ सदस्यीय बिधान सभामा भाजपाले २०७ सिट जितेको छ भने तृणमूल कांग्रेसले केवल ८० सिट मात्र जितेको छ ।एभरेष्ट न्यूज एजेन्सी
