७ असोज, काठमाडौं।
प्रधानमन्त्री सुशीला कार्कीले प्रतिनिधि सभाको निर्वाचन सरकारको उच्च प्राथमिकतामा रहेको बताएकी छन् ।
मंगलबार प्रधानमन्त्री तथा मन्त्रिपरिषद्को कार्यालयमा प्रधानमन्त्री सुशीला कार्कीले निर्वाचन आयोगका पदाधिकारीहरूसँग छलफल गरेकी थिइन् ।
उक्त छलफलमा प्रधानमन्त्री कार्कीले आगामी फागुन २१ गते सम्पन्न हुने निर्वाचनको तयारीका सम्बन्धमा आयोगसँग परामर्श गरेकी हुन् ।
निर्वाचन आयोगले निकालेको विज्ञप्ति अनुसार छलफलमा प्रधानमन्त्री कार्कीले ‘प्रतिनिधि सभाको निर्वाचन स्वच्छ, स्वतन्त्र, भयरहित, निष्पक्ष र मितव्ययी रूपमा सम्पन्न गर्नु नेपाल सरकारको उच्च प्राथमिकताको विषय भएको’ बताएकी छन् ।
साथै निर्वाचन सम्पन्न गर्न नेपाल सरकारको तर्फबाट निर्वाचन आयोगलाई आवश्यक पर्ने स्रोत साधन र जनशक्ति उपलब्ध गराइने प्रतिवद्धता प्रधानमन्त्री कार्कीको छ ।
आयोगका अनुसार प्रधानमन्त्री कार्कीले शान्तिसुरक्षाको भरपर्दो व्यवस्था मिलाउने, निर्वाचनको लागि अनुकूल वातावरण तयार गर्न सरोकारवालाहरूसँग छलफल गर्ने भन्दै निर्वाचन तयारीका सम्पूर्ण कार्य तत्काल अगाडि बढाउन आग्रह गरेकी छन् ।
छलफलमा निर्वाचन आयोगको तर्फबाट कार्यवाहक प्रमुख निर्वाचन आयुक्त रामप्रसाद भण्डारीले प्रतिनिधि सभा निर्वाचन सम्पन्न गर्नका लागि आवश्यक पर्ने मतपेटिका लगायतका निर्वाचन सामग्रीहरू मौज्दातमा रहेको बताए। मौज्दातमा नभएका अन्य सामग्री समेत स्वदेशमा उत्पादित सामग्रीलाई प्राथमिकता दिई प्रतिस्पर्धात्मक तरिकाले खरिद गरिने उनको प्रतिवद्धता छ ।
सभार ओनलाईन खबर
काठमाण्डौ,०७ गते आसोज ।
जेन–जी आन्दोलनको क्रममा अराजक समूहले गरेको आगजनी र तोडफोडले क्षतिग्रस्त अवस्थामा रहेको भवनबाटै मधेशको प्रदेशसभा बैठक सुरु भएको छ । जेन–जीको आन्दोलनपछि पहिलोपटक मंगलबार प्रदेशसभाको बैठक बसेको हो ।
बैठकमा मधेश प्रदेश सरकारको नेतृत्व गरिरहेको जनमत पार्टीका सांसदहरू दुई कित्तामा बसेका छन् ।
पार्टीले मुख्यमन्त्री सतिशकुमार सिंहलाई फिर्ता बोलाए पनि उनले राजीनामा नदिने अडान लिएपछि केही सांसद सत्तापक्षमा बसेका छन् भने केही सांसद प्रतिपक्षमा बसेका छन् ।
जनमत संसदीय दलका नेता महेशप्रसाद यादवले प्रदेश सरकारलाई दिएको समर्थन फिर्ता लिँदै आफ्नो दलका मुख्यमन्त्री र मन्त्रीलाई फिर्ता बोलाउने पत्र प्रदेश प्रमुखको कार्यालय तथा प्रदेशसभा सचिवालयमा दिएका थिए । तर मुख्यमन्त्री सिंहले राजीनामा दिन नमानेपछि जनमतका बाँकी प्रदेशसभा सदस्य प्रतिपक्षमा बसेका हुन् ।
बैठकमा मुख्यमन्त्री सिंहले वर्तमान अवस्थामा संविधान र संघीयताको रक्षाका लागि आफूले राजीनामा नदिएको बताए । पार्टीले राजीनामा मागे पनि आफूले प्रदेशसभाबाट विश्वासको मतको सामना गर्ने उनले बताए ।
सभार शिलापत्र
काठमाडौं, ७ असाेज ।
आम जनता पार्टी (आजपा)को केन्द्रीय कमिटी पुनर्गठन गरिएको छ । प्रभु साहको अध्यक्षतामा पुनर्गठन गरिएको केन्द्रीय कमिटीमा ३ सय ४८ सदस्यीय रहेको छ ।
१४ सदस्यीय केन्द्रीय कार्यालय, केन्द्रीय कार्यालय सदस्य सहित ८७ सदस्यीय केन्द्रीय सचिवालय सदस्य र २ सय ४७ सदस्यीय केन्द्रीय सदस्य रहेको छ । यस्तै बैकल्पिक १ सय १ जनालाई बैकल्पिक केन्द्रीय सदस्य राखिएको छ ।
प्रभु साह अध्यक्ष, तिलक थापामगर सहअध्यक्ष सहित कार्यालय सदस्यहरुमा रितादेवी साह, समिना हुसेन, बिल्टु यादव, अशोक कुमार लामा, त्रिभुवन साह, चन्द्रभुषण साह, धनकुमारी मगर, सुधिर यादव, सियाराम कुशवाहा, श्रीचन्द मुखिया, उमेश कुशवाहा, देवी पण्डित रेग्मी रहेका छन् ।
यसैगरी सचिवालय सदस्यहरुमा श्रीलाल महासेठ, रबिन्द्र प्रसाद सिंह, जुरीलाल मोची, धर्मेन्द्र पटेल, भोजराज त्रिपाठी, लालबाबु मन्सुरी, लखिन्द्र साह, उदयचन्द्र प्रसाद, नरेश तुरहा, श्रीभगवान पटेल, राधेश्याम साह, बिजय यादव, सुभाषप्रसाद साह, रामकेशव गुप्ता, ओमप्रकाश सिंह, ममता शर्मा, भोला पाण्डे, कुमारी बबिता, रञ्जुकुमारी साह, सञ्जय यादव, बबिता यादव, गितादेवी साह, ठागा दास, बालकृष्ण सापकोटा, उमाशंकर साह, उपेन्द्र साह, पासाङ तामाङ, सराज बछार, अञ्जित कुशवाहा, शिव थापा, शुभद्रा गुप्ता, अनिल झा, राजेश साह, सुरेश चौधरी रहेका छन् ।
यसैगरी सचिवालय सदस्यहरुमा मिन बहादुर खत्री, किशोरी साह, देवेन्द्र ठाकुर, रामनाथ माझी, रामबाबु कुशवाहा, राजकिशोर साह, विवेक साह, हेमप्रसाद साह, तेजनारायण चौधरी, बालाशंकर कुशवाहा, जयलाल महतो, विश्वराज पटेल, रविन्द्र यादव, भानु कोइराला, सुरेश साह, डा. नवलकिशोर साह, सिमा जैसवाल, बिजय साह, देवकुमारी साह, पप्पु साह, ब्रम्हा यादव, रामशरण यादव, रामकृत साह, अरबिन्द साह, गोपाल साह, बिरबल महतो, आर्या पाण्डे, हरि थापा, मिनादेवी साह, सन्तोष साह, प्रहलाद पौडेल, खगेन्द्र भण्डारी, कालबहादुर विक, राम बिष्ट, अमर योन्जन, एमडी सतार, शम्भु जयसवाल, बद्रि पासवान र चन्दन साह रहेका छन् ।
काठमाडौंको कमलादी स्थित नेपाल प्रज्ञा भवनमा ४ असोजमा केन्द्रीय कमिटी र ५ असोजमा बसेको पदाधिकारी बैठकले गरेको केन्द्रीय कमिटी पुनर्गठन गर्ने निर्णय गरेको हो ।
काठमाडौं, ६ असोज ।
प्रभु साह नेतृत्वको आम जनता पार्टी (आजपा)ले प्रदेशको नेतृत्व हेरफेर गर्दै व्यवस्था परिवर्तनका लागि जनदवाव सहित निर्वाचनमा सहभागि हुने निर्णय गरेको छ ।
काठमाडौंको कमलादी स्थित नेपाल प्रज्ञा भवनमा ४ असोजमा केन्द्रीय कमिटी र ५ असोजमा बसेको पदाधिकारी बैठकले गरेको निर्णय आज (सोमबार) सार्वजनिक गर्दै आजपा प्रवक्ता चन्द्रभुषण साहले प्रदेशको नेतृत्व हेरफेर सहित व्यवस्था परिवर्तका लागि जनदवाद सहित निर्वाचनमा सहभागि हुने जनाएका छन् ।
बैठकले प्रदेश कमिटीको इन्चार्ज, सहइन्चार्ज एवं अध्यक्षको जिम्मेवारी हेरफेर गरेको छ । कोशी प्रदेशको इन्चार्जमा तिलक थापा मगर, सहइन्चार्जमा जुरीलाल मोची, अध्यक्षमा खगेन्द्र भण्डारी, मधेस प्रदेशको इन्चार्जमा त्रिभुवन साह, सहइन्चार्जमा श्रीचन मुखिया, अध्यक्षमा उमेश कुशवाहा, उपत्यका विशेष कमिटीको इन्चार्जमा चन्द्रभुषण साह, अध्यक्षमा देवी पण्डित रेग्मी रहेका छन् ।
यसैगरी, सुदुरपश्चिम प्रदेशको इन्चार्जमा सुमिना हुसेन, अध्यक्षमा राम विष्ट, बागमती प्रदेशको इन्चार्जमा धनकुमारी मगर, सहइन्चार्जमा देवी पण्डित रेग्मी र अध्यक्षमा पासाङ तामाङ, गण्डकी प्रदेशको इन्चार्जमा तिलक थापा मगर र अध्यक्षमा भोजराज त्रिपाठी, लुम्बिनी प्रदेशको इन्चार्जमा त्रिभुवन साह र अध्यक्ष बिजय यादव र कर्णाली प्रदेशको इन्चार्जमा समिना हुसेन तथा अध्यक्ष आशा संजेल रहेका छन् ।
आजपा प्रवक्ता साहले व्यवस्था परिवर्तनका लागि पार्टी छठपछि आन्दोलनमा उत्रिने निर्णय भएको जनाएका छन् । छठपछि व्यवस्था परिवर्तनका लागि आन्दोलनमा जाने निष्कर्ष बैठकले निकालेको छ । दशैं, दिपावली, छठ पर्वसम्म पार्टीको प्रदेश, जिल्ला, पालिका कमिटीको बैठक, भेला, कमिटी गठन, पुनर्गठन, शुभकामना अदानप्रदान लगायतका गतिविधि गर्ने र चाडपर्व सकिएपछि आन्दोलनमा उत्रिने निर्णय आजपाले गरेको हो ।
‘दशैं, दिपावली, छठपर्वसम्म हामीले शुभकामना कार्यक्रम सहित बिभिन्न कमिटीको बैठक, भेला, कमिटी गठन, पुनर्गठन गर्दै अगाडी बढनेछौं । केन्द्रीय कमिटी पुनर्गठन गरेका छौं, अब प्रदेश, जिल्ला कमिटीहरु पुनर्गठन गर्दै छठपर्वपछि हामी व्यवस्था परिवर्तनका लागि आन्दोलन सहित निर्वाचनमा सहभागि हुने निर्णय गरेका छौं,’ प्रवक्ता साहले जनाएका छन् ।
‘पार्टी केन्द्र, प्रदेश तथा जिल्ला कमिटीहरुलाई पूर्नगठन गर्दै सिस्टम सुधारका लागि जनदवाव अभियान सहित निर्वाचनमा सहभागी हुने निर्णय गरिएको छ,’ आजपाले निर्णय गरेको छ ।
‘देशको अवस्था बदल्न व्यवस्था बदलौं, राष्ट्रिय स्वाधिनता बचाउन संघर्ष गरौं’ भन्ने मुल नारासहित बैठकमा अध्यक्ष प्रभु साहले पेश गरेका समसामयिक एवं राजनीतिक प्रतिवेदन बैठकले सर्वसम्मतीले पारित गरेको छ ।
‘हाम्रो आजपाद्वारा झण्डै दुइ वर्ष अगाड़ी दलाल दलतन्त्र विरुद्ध जारी तेस्रो जनआन्दोलनको जगमा हालै भएको जेन जी युवा पुस्ताको अगुवाईमा भएको जनविद्रोहले देशको संसद, सरकार र संविधानलाई अस्वीकार गरिसकेको सन्दर्भमा फेरी उहीं तिरस्कृत नेताहरुको संयोजन एवं सहमतिमा केवल नेतृत्वको मुखौटा परिवर्तनमा सिमित गरिनु जेन जी आन्दोलनप्रतिको धोका एवं सडकमार्फत मुखारित ताजा जनादेश समेतको अपमान भएको ठहर सहित सिस्टम सुधारका लागि जनदबाब सहितको संघर्ष र बाँकी कार्यभार पुरा गर्न थप शशक्त रूपमा अघि बढ्ने निर्णय गरिएको छ,’ आजपाले गरेको निर्णयमा उल्लेख गरिएको छ ।
यस्तै, संविधानमा तत्काल सुधार गर्नुपर्ने महत्वपूर्ण विषयवस्तुलाई समेटेर आजपाद्वारा तयार पारिएको १६ बुँदे प्रस्ताव जनताका बीचमा लैजाने निर्णय समेत बैठकले गरेको छ । आम जनताद्धारा प्रत्यक्ष निर्वाचित प्रधानमन्त्री र मुख्यमन्त्रीको व्यवस्था संविधानमा तत्काल सुधार गर्नुपर्ने लगायतका १६ मुद्धा आजपाले सार्वजनिक गरेको छ ।
‘गलत व्यवस्थाका कारण राष्ट्रिय स्वाधिनता, अर्थतन्त्र एवं जनताको वास्तविक लोकतन्त्र संकटमा पर्दै गएको सन्दर्भमा पार्टीद्वारा जारी जनसंघर्ष एवं तेस्रो जनआन्दोलनको मुद्दाहरुलाई थप शशक्त, प्रभावकारी बनाउने निर्णय समेत गरिएको छ,’ बैठक पश्चात जारी बिज्ञप्तीमा उल्लेख गरिएको छ ।
यसैगरी बैठकले जेन–जी आन्दोलनको क्रममा भएको अबोध युवा विद्यार्थीको हत्या, ऐतिहासिक धरोहर, सम्पदा र सम्पतिहरूको तेडफोड, आगजनी एवं विध्वंशप्रति दुःख व्यक्त गर्दै यस अपराधमा संलग्न निवर्तमान सरकार, जिम्मेवार सुरक्षा निकाय र घटनामा प्रत्यक्ष संलग्न अपराधीहरुलाई तथ्य र प्रमाणका आधारमा दण्डित गर्नपर्ने माग गरेको छ ।
विचार र सिद्धान्त मिल्नेसंग एकताका लागि वार्ता समिति गठन
यसैगरी, आजपाले विचार र सिद्धान्त मिल्ने विभिन्न लोकप्रिय व्यक्ति, समुह, संगठन एवं पार्टीसंग एकता र सहकार्य गर्ने निर्णय गरेको छ । त्यसका लागि बैठकले सहअध्यक्ष एवं संविधानसभाका सदस्य तिलक थापामगरको नेतृत्वमा चन्द्रभुषण साह, सुभाष साह, बिजय यादव, राम विष्ट सदस्य रहने गरी वार्ता समिति गठन गरिएको छ ।
बज्जिकाञ्चल संवाददाता,राैतहट,असाेज ०५ गते ।
राैतहटकाे इलाका प्रहरी कार्यालय, गरुडामा एक वर्षे कार्यकाल सफलतापूर्वक सम्पन्न गरी सरुवा भई अन्यत्र जान लाग्नु भएका डिएसपी राजन कार्कीलाई बधाई तथा आगामी कार्यकालको लागि शुभकामना व्यक्त गरिएको छ ।
डिएसपी कार्कीले आफ्नो कार्यकालमा गरुडा क्षेत्रमा शान्ति सुरक्षा कायम राख्न, अपराध न्यूनीकरण गर्न तथा स्थानीय जनताको विश्वास जित्न उल्लेखनीय सफलता प्राप्त गरेका थिए । इमान्दारी, कुशलता र सक्रिय नेतृत्वका कारण उहाँको कार्यकाल व्यापक प्रशंसा योग्य रह्यो।
स्थानियबासी, जनप्रतिनिधिहरू तथा सामाजिक अभियन्ताहरूले डिएसपी कार्कीको योगदानलाई उच्च सम्मानका साथ स्मरण गर्दै आगामी ठाउँमा पनि यस्तै उत्कृष्ट कार्यप्रदर्शनको कामना गरेका छन् ।
उता, डिएसपी शंकर प्रसाद आचार्य इलाका प्रहरी कार्यालय, गरुडाका नयाँ प्रमुखको रूपमा जिम्मेवारी सम्हाल्न लाग्नुभएको छ । उहाँको आगमनसँगै स्थानीय स्तरमा अझै प्रभावकारी शान्ति सुरक्षाको अपेक्षा गरिएको छ ।
इलाका प्रहरी कार्यालय, गरुडा अब नयाँ नेतृत्व अन्तर्गत अघि बढ्दैछ ।
आरके श्रीवास्तव,राैतहट,असाेज ०५ गते ।
राैतहटकाे फतुवा बिजयपुर नगरपालिकामा आजदेखि महिलाहरूलाई निःशुल्क सेनेटरी प्याड वितरण सुरु गरिएको छ । कार्यवाहक नगरप्रमुख अम्बेया खातुनले आज एक कार्यक्रमका बीच स्वास्थ्य चौकी सन्तपुरबाट औपचारिक रूपमा वितरण कार्यको शुभारम्भ गरेकी हुन् ।
यसअघि नगरपालिकाले सामुदायिक विद्यालयहरूमा मात्र सेनेटरी प्याड वितरण गर्दै आएको थियो । अबदेखि भने नगर क्षेत्रका सबै स्वास्थ्य संस्थामार्फत पनि नियमित रूपमा सेनेटरी प्याड उपलब्ध हुने व्यवस्था गरिएको छ ।
कार्यक्रममा बोल्दै कार्यवाहक नगरप्रमुख खातुनले भनिन्, “महिलाको स्वास्थ्य र मर्यादित मासिक धर्मका लागि सेनेटरी प्याडको पहुँच सुनिश्चित गर्नु हाम्रो दायित्व हो । विद्यालयपछि अब स्वास्थ्य संस्थामार्फत पनि सहज रूपमा उपलब्ध गराइनेछ।”
प्रदेश सांसद पदका प्रत्यासी मोहमद सेराजले यस्तो पहलले महिलाहरूको जीवनस्तरमा सकारात्मक प्रभाव पार्ने बताए । “महिला स्वास्थ्यको संवेदनशीलता बुझेर नगरपालिकाले चालेको यो कदम सराहनीय छ,” उनले भने, “अब यो अभियानलाई अझ फराकिलो बनाउँदै लैजान जरुरी छ।”
स्वास्थ्य संयोजक रमेश प्रसाद यादवले सेनेटरी प्याडको सहज उपलब्धताले महिलाहरूको मासिक धर्म सम्बन्धी स्वच्छता र आत्मसम्मानमा वृद्धि हुने बताए । “स्वास्थ्य संस्थामार्फत नियमित आपूर्ति सुनिश्चित गर्दै हामी जनचेतनामूलक कार्यक्रम पनि सञ्चालन गर्नेछौं,” उनले भने।
कार्यक्रममा स्वास्थ्य चौकी सन्तपुरका ईन्चार्ज रघुनाथ साह, स्थानीय अगुवाहरू, स्वास्थ्यकर्मीहरू र महिलाहरूको उल्लेख्य उपस्थिति रहेको थियो ।
आरके श्रीवास्तव,राैतहट,असोज ५ गते ।
मधेस प्रदेश सांसद पदका प्रत्यासी मोहमद सेराजले स्थानीय तहमा विद्यमान दलिय व्यवस्थालाई हटाउनुपर्ने आवश्यकता औंल्याएका छन् ।
उनले सेवा, विकास र जनउत्तरदायित्वमा आधारित शासन प्रणाली स्थापना गर्न स्थानीय सरकारलाई दलिय प्रभावमुक्त बनाउनु पर्ने धारणा व्यक्त गरेका छन् । “अब पार्टीको होइन, व्यक्तिको सोच, इमान्दारी र क्षमताले नेतृत्व चयन हुने वातावरण निर्माण गर्नुपर्छ,” सेराजले सामाजिक सञ्जालमार्फत जनसमुदायलाई सम्बोधन गर्दै भने, “स्थानीय तहमा नेतृत्व जनताकै घरबाट उठ्ने भएकाले राजनीतिक पार्टीको भागबण्डा होइन, जनताको सेवा गर्ने सोचको कदर हुनुपर्छ।
” उनको भनाइ अनुसार दलियकरणले स्थानीय शासनमा व्यक्तिगत र समुदायको आवश्यकता भन्दा माथि पार्टीको स्वार्थलाई प्राथमिकता दिइएको छ, जसले सेवा प्रवाहमा बाधा पुर्याइरहेको छ ।
राजनीतिमा छुट्टै पहिचान बनाइरहेका सेराजले अहिलेकाे वर्तमान परिस्थितिलाई मध्यनजर गरि यस्तो किसिमको धारणा सार्वजनिक गरेका छन् ।
काठमाडौं, ४ असोज
आम जनता पार्टी (आजपा)का अध्यक्ष एवं पूर्वमन्त्री प्रभु साहले भ्रष्ट प्रदेश सरकार र स्थानीय सरकार पनि खारेज हुनुपर्ने बताएका छन् । भ्रष्ट प्रदेश सरकारहरु विघटन गरेर संघीयतालाई बलियो बनाउनुपर्ने उनले बताए ।
आजपाको आज (शनिबार) काठमाडौंमा सुरु भएको केन्द्रीय कमिटी बैठकलाई सम्बोधन गर्दै अध्यक्ष साहले संघीयता खारेज होइन अझै बलियो बनाउनुपर्ने बताए ।
आजपाले मुलुकमा भ्रष्टाचार, कुशासन, अनियमितता, लुट एवं भ्रष्टाचार अन्त्य गर्न दलाल दलतन्त्रको सट्टा आम जनताको शासनका जरुरी छ भन्ने निष्कर्ष निकाल्दै दुई बर्ष अघि तेस्रो जनआन्दोलनको घोषणा गरेको थियो । सोही तेस्रो जनआन्दोलनको जगमा अहिले जेनजीको जनविद्रोह भएको साहले बताए ।
‘मुलुकमा भ्रष्टाचार, कुशासन, अनियमितता, दलहरुको लुटकारी दलतन्त्रका कारण मुलुकको राष्ट्रियता, लोकतन्त्र र अर्थतन्त्र नै धरासायी बन्दै गएको निष्कर्ष हाम्रो थियो । त्यसैले हामीले तेस्रो जनआन्दोलनको घोषणा पनि गर्यौ र त्यही जगमा आज जेनजीको जनविद्रोह भयो,’ आजपा अध्यक्ष साहले भने ।
संविधान र व्यवस्था गलत भएकै कारण नेपाली जनताको अवस्था खराब भएको बताउदै उनले यो संविधान खारेज गरेर जेनजीहरुको माग सम्बोधन गर्नुपर्ने उनले बताए । ‘संविधान गलत थियो, व्यवस्था गलत थियो, त्यही भएर नेपाली जनताको अवस्था खराब भएको कुरा स्वीकार गरौं । यही व्यवस्था कायम राखेर जेनजीहरुको माग सम्बोधन नहुने भएकाले यो संविधान खारेज गरेर भए पनि उनीहरुको माग सम्बोधन गर्नुपर्छ,’ साहले भने ।
संसद्, अदालत, सिंहदरबारजस्ता हाम्रा मुटमा षड्यन्त्रपूर्णक ढंगले प्रहार भएको भएको भन्दै उनले यसको उच्चस्तरीय छानविन हुनुपर्ने बताए । साहले जेनजी आन्दोलन अपहरण गरिएको र युवा पुस्ताको भावनामाथि नै कुठाराघात भएको बताए ।
जसले देशलाई भड्खालोमा हाले आज उनीहरु नै अहिले टाउको उठाउन खोजिरहेको बताउदै उनले युवाहरुको हत्या गर्ने केपी ओलीहरु अहिले युवालाई झुठो मुद्धामा फसाउने षडयन्त्रमा लागेको बताए ।
राज्यविहीनको अवस्थामा मुलुकलाई पुर्याउनेहरुमाथि कारबाही हुनुपर्ने माग समेत उनले गरे । जेनजी आन्दोलन मध्यावधि वा अर्ली इलेक्सनको नाममा भीडबाट लिडर सेलेक्सन गर्न नभएको उनले बताए ।
‘अन्तरिम सरकार युवाको माग थिएन । यही संविधान उनीहरुको चाहना होईन । नयाँ सरकार र नयाँ संविधान नै आजको निकास हो । यसतर्फ अघि बढ्नुपर्छ । यही संविधानको कारण मुलुक एकपछि अर्को गरेर अँध्यारो सुरूङमा पसेको छ । अब मरेको लाश बोकेर गाउँ–शहर परिक्रमा गरेर हुँदैन,’ आजपा अध्यक्ष साहले भने ।
साथै,हाम्रा सुरक्षा निकाय र यसको नेतृत्वहरुको पनि भूमिकाको समिक्षा हुनुपर्ने उनले बताए । ‘अगाडिको बाटो क्लियर छैन, बिग्रिएको व्यवस्था नभत्काएसम्म र यी चोर नेतालाई विस्थापित नगरेसम्म देश बन्दैन,’ उनले भने ।
देश अत्यन्तै जटिल मोडमा रहेको बताउदै उनले गृह, अर्थलगायतका मन्त्रालयमा नेतृत्व आएको तर अति नै संवदेनशील मानिएको रक्षा मन्त्रालय र परराष्ट्र मन्त्रालय किन नेतृत्वविहीन ? यो पनि सोचनीय प्रश्न रहेको उनले बताए ।
शक्ति राष्ट्रहरुको चलखेल बढेको आभाष भईरहेको बताउदै उनले एकै दिन शक्ति राष्ट्रका राजदूतले प्रधानमन्त्रीको कार्यालयमा घरदैलो गरिरहेकाले नेपाली नागरिक सचेत हुनुपर्ने समेत उनले बताए ।
राैतहट,असाेज ०३ गते ।
नेपाल कम्युनिस्ट पार्टी (एकीकृत समाजवादी) जिल्ला कमिटी रौतहटको आयोजनामा,वर्तमान परिस्थिति र हाम्रो संविधान विषय विचार गोष्ठी सम्पन्न भएको छ। जिल्लाको मध्य भागमा रहेको गरुडा बजार स्थित संविधान दिवसको अवसरमा जिल्ला कमिटी अध्यक्ष कमल यादवको अध्यक्षतामा सो कार्यक्रमको आयोजना गरिएको थियो।
उक्त कार्यक्रममा उपस्थित नेताहरुले, नेपाली जनताको लामो सङ्घर्ष, त्याग र बलिदानको फलस्वरुप जननिर्वाचित संविधानसभाले २०७२ असोज ३ गते नेपालको संविधान जारी गरेको र संविधान जारी भएको एक दशक बितिसक्दा पनि मुलुकमा देखा परेको भ्रष्ट्राचार र कुशासनका विरुद्धमा भएको युवा विद्रोहको विशिष्ट परिस्थितिमा आफुहरु संविधान दिवस मनाइरहेको बताए ।
कार्यक्रममा सहभागीहरु एघारौं संविधान दिवस तथा राष्ट्रिय दिवसको उपलक्ष्यमा हार्दिक शुभकामना व्यक्त गर्दै संघीय लोकतान्त्रिक गणतन्त्रको स्थापनाको आन्दोलन, अन्य न्यायप्रेमी आन्दोलनहरु साथै भर्खरै मात्र भएको Gen- Z पुस्ताको आन्दोलन समेतमा आफ्नो अमूल्य जीवन बलिदान गर्नुहुने सम्पूर्ण सहिदहरूप्रति भावपूर्ण श्रद्धाञ्जली अर्पण गरेका थिए।
उक्त विचार गोष्ठीको प्रमुख अथितिको रुपमा रहेकी नेकपा एसकी स्थायी कमिटी सदस्य कल्याणी खडकाले प्रतिस्पर्धात्मक बहुदलीय लोकतान्त्रिक शासनप्रणाली, नागरिक स्वतन्त्रता, मौलिक अधिकार, मानव अधिकार, बालिग मताधिकार, आवधिक निर्वाचन, पूर्ण प्रेस स्वतन्त्रता, स्वतन्त्र, निष्पक्ष र सक्षम न्यायपालिका तथा कानुनी राज्यको अवधारणा लगायत लोकतान्त्रिक मूल्य र मान्यतालाई आत्मसात् गर्नु संविधानको विशेषता रहेको,,
र संविधान जारी भएपछि मुलुकको राज्य संरचना र शासन सत्तामा ठूलो परिवर्तन तथा सुधार त भएको छ तर अहिले पनि संविधान निर्माण गर्दा परिकल्पना गरिएको सुशासन र आर्थिक समृद्धि सहितको समुन्नत राष्ट्र निर्माणतर्फको यात्राले अपेक्षित गति लिन न सकेको कारण जनतामा उत्पन्न निराशा तथा आक्रोशको जगमा यदाकदा हाम्रो संविधानमाथि नै प्रहार हुने गरेको बताइन् ।
त्यस्तै कार्यक्रमको विशिष्ट अथितिको रुपमा बोल्दै,जिल्ला ईन्चार्ज महेन्द्र चौलागाईंले संविधानको कार्यान्वयनमा देखिएका कमजोरीहरुको विना कुनै आग्रह वस्तुनिष्ट समीक्षा गर्दै शान्ति, स्थीरता र विकास सहित भ्रष्टाचारको अन्त्य, सुशासनको सुनिश्चितता र व्यापक रोजगारीको सिर्जना गरेर मुलुकलाई आर्थिक सामाजिक रुपान्तरण गर्ने एवम् युवा पुस्ता सहित सबै उमेर समूहका जनतालाई सम्मानपूर्ण रुपमा मुलुकमै रहने वातावरण तथा अवसरहरु सिर्जना गर्न सकेमा मात्र संविधानप्रति साँचो इमान्दारिता र पछिल्लो Gen- Z आन्दोलनको समेत सम्मान हुने बताए ।
उनले जेनजीहरुको जायज मागलाई समयमै सम्बोधन गर्नुको सट्टा तत्कालीन सत्ताधारीहरूले देखाएको दम्भका कारण अहिलेको परिस्थिति आएको बताएका छन् । सहभागी वक्ताहरुले कार्यक्रमलाई सम्बोधन गर्दै जेनजी आन्दोलनका मागहरूप्रति पार्टीको तर्फबाट आन्दोलनपूर्व नै समर्थन तथा ऐक्यबद्धता प्रकट गरेको स्मरण पनि गराएका छन् ।
त्यस्तै केन्द्रीय सदस्य कनिष पटेलले ‘जेनजीको जायज मागहरूलाई समयमा सम्बोधन गर्नुको सट्टा तत्कालीन सत्ताधारीहरूले देखाएको दम्भ र अहंकारको कारण दर्जनौँ होनहार युवाहरूले शहादत प्राप्त गर्नुपर्यो भने हाम्रो मुलुकले अकल्पनीय तथा अपूरणीय क्षति व्यहोर्नुपर्यो । युवा पुस्ताको अगुवाइमा भएको उक्त आन्दोलन लोकतान्त्रिक गणतन्त्र प्राप्तिपछि पनि जनताको चाहना र भावना अनुरूप पारदर्शी तथा जनउत्तरदायी शासन प्रणाली कायम गर्न नसक्दा जनतामा उत्पन्न निराशा र आक्रोशको परिणाम हो भन्ने कुरालाई स्वीकार गर्नुपर्ने बताए ।’
त्यसैगरी नेकपा एसका जिल्ला कमिटी अध्यक्ष कमल यादवले
‘अहिले युवा पुस्ताको आन्दोलनले उठाएका एजेन्डाहरूको सम्बोधन गर्दै मुलुकलाई अग्रगामी बाटोमा अगाडि बढाउन अन्तरिम सरकार गठन भएको छ र निर्वाचनको मिति समेत घोषणा भएको छ । अतः विना कुनै पूर्वाग्रह इतिहासका कमजोरीहरूको वस्तुनिष्ठ समीक्षा गर्दै शान्ति, स्थिरता र विकास सहित भ्रष्टाचारको अन्त्य, सुशासन कायम र व्यापक रोजगारीको सिर्जना गरेर मुलुकलाई आर्थिक सामाजिक रूपान्तरण गर्ने एवम् युवा पुस्तालाई मुलुकमै बस्न लायक अवसर तथा वातावरण निर्माण गर्न सकेमा मात्र पछिल्लो जेनजी आन्दोलनमा शहादत प्राप्त गर्नेहरूप्रति साँचो श्रद्धाञ्जली हुने बताए ।
उक्त कार्यक्रममा केन्द्रीय सदस्य बिजपता बख्रेल,निर्वाचन अधिकृत भुपेन्द्र खडका,केन्द्रीय परिषद सदस्य तथा वृन्दावन नगरपालिकाका नगर प्रमुख विनोद प्रसाद कुर्मी,केन्द्रीय सल्लाहकार परिषद सदस्य हरिनारायण यादव,उपाध्यक्ष मदन सापकोटा वृजकिशोर यादव,जयरानी सहनी,इन्द्रमाला जैसवाल र राम नरेश यादव लगायत नेकपा एसका सयौं नेता तथा कार्कर्ताहरुको समेत सहभागीता रहेको थियोे भने कार्यक्रम सञ्चालन प्रविन्द्र प्रसाद पटलले गर्नुभएको थियो र अन्तमा सबैले पार्टी भित्रको विभिन्न कमि कम्जोरीहरुलाई आत्मसात गरि सुधार गरेर अगाडि बढ्न सबैमा आग्रह गरेका थिए।
काठमाडौं, असोज ३ – संविधान दिवसका अवसरमा लोकतान्त्रिक समाजवादी पार्टी, नेपाल (लोसपा) ले आज असोज ३ गतेलाई ‘कालो दिन’ तथा ‘शोक दिवस’का रूपमा मनाएको छ । पार्टीको केन्द्रीय कार्यालय बबरमहल, काठमाडौंमा आयोजित कार्यक्रममा अध्यक्ष महन्थ ठाकुर, वरिष्ठ सह–अध्यक्ष सर्वेन्द्रनाथ शुक्लालगायतका नेताहरूले संविधानप्रति गम्भीर असन्तुष्टि जनाउँदै आफ्नो धारणा राखेका थिए ।
पार्टी अध्यक्ष महन्थ ठाकुरले कार्यक्रममा सम्बोधन गर्दै भने, “असोज ३ को संविधानले सबै जाति, वर्ग, समुदायलाई न्याय र समावेशी अधिकार दिन सकेन । यो संविधान हाम्रा सपना र आन्दोलनको अपमान हो।” उनले संविधान निर्माणको प्रक्रियामै मधेस र थरूहट आन्दोलनका आवाजहरू उपेक्षा भएको उल्लेख गर्दै, जेनजी आन्दोलनमा सहादत भएका वीर युवाहरूकाे समझनामा यो दिनलाई ‘शोक’ र मधेसी विराेधी संविधानकाे विरूद्वमा ‘कालो दिन’का रूपमा मनाउनु बाध्यता भएको बताए ।
वरिष्ठ सह–अध्यक्ष सर्वेन्द्रनाथ शुक्लाले पनि संविधानले मधेस, जनजाति, मुस्लिम, थारू लगायतको पहिचान र अधिकार सुनिश्चित गर्न नसकेको आरोप लगाए । उनले भने, “हामीले लडेका थियौं समान अधिकारका लागि, तर संविधानले त झन् विभाजन बढायो । यसैले आजको दिन हाम्रो लागि खुसी होइन, पीडाको दिन हो।”
कार्यक्रममा उपस्थित अन्य नेताहरूले बरिष्ठ उपाध्यक्ष जितेन्द्र सोनल,महासचिव मनीष मिश्रले पनि संविधान संशोधनको आवश्यकता तत्काल रहेकोमा जोड दिएका थिए । कार्यक्रममा कालो झण्डा देखाएर विरोध प्रकट गरिएको थियो भने सहभागीहरूले कालोपट्टी बाँधेर संविधानप्रति असन्तुष्टि जनाएका थिए ।
कार्यक्रममा संविधान दिवसलाई ‘शोक दिवस’को रूपमा मनाउनुको राजनीतिक सन्देश मात्र नभई मधेस केन्द्रित आन्दोलनको निरन्तरताको संकेतसमेत गरिएको नेताहरूले जनाएका छन् ।
कार्यक्रम सञ्चालन पार्टीका उपाध्यक्ष तथा प्रवक्ता डा. आभास लाभले गर्नु भएको थियो ।
