काठमाडौँ । जल तथा मौसम विज्ञान विभागले हाल नेपालमा पश्चिमी न्यून चापीय प्रणाली र स्थानीय वायुको प्रभाव रहेको जानकारी दिएको छ ।हाल देशभर साधारणतया बादल लागेको छ । बागमती, गण्डकी र लुम्बिनी प्रदेशका केही स्थानहरूमा, कोशी प्रदेशका पहाडी भू-भाग सहित कर्णाली र सुदूरपश्चिम प्रदेशका थोरै स्थानहरूमा मेघगर्जन/चट्याङ्ग सहित हल्का देखि मध्यम वर्षा भईरहेको छ ।
आज दिउँसो कोशी प्रदेश लगायत देशको पहाडी र हिमाली भू-भागमा साधारणतया बादल लाग्ने तथा बाँकी भू-भागमा आंशिक बादल लाग्नेछ। कोशी प्रदेश लगायत देशका पहाडी तथा हिमाली भू-भागका केही स्थानहरूमा तथा मधेश प्रदेशका थोरै स्थानहरूमा मेघगर्जन/चट्याङ्ग सहित मध्यम वर्षा/हिमपातको सम्भावना रहेको छ ।
त्यस्तै आज राती कोशी प्रदेश लगायत देशको हिमाली भू-भागमा साधारणतया बादल लाग्ने, बाँकी पहाडी भू-भागमा आंशिक बादल लाग्ने तथा तराई भू-भागमा मौसम मूख्यतया सफा रहनेछ । कोशी प्रदेश र गण्डकी प्रदेशको पहाडी र हिमाली भू-भागका थोरै स्थानहरुमा तथा बाँकी हिमाली भू-भागका एक-दुई स्थानमा मेघगर्जन/चट्याङ्ग सहित हल्का वर्षा/हिमपातको सम्भावना रहेको छ। एभरेष्ट न्यूज एजेन्सी
२०८२ चैत २६ गते विहिबार: आजको राशिफल
आजको राशिफल बिस २०८२ चैत २६ गते विहिबार ईस २०२६ अप्रिल ९ नेपाल सम्बत ११४६ चौलाथ्व सप्तमी, सिद्धार्थि नाम संवत्सर सूर्य उत्तरायण, वसन्त ऋतु, चैत शुक्ल सप्तमी, चन्द्रमा धनु राशिमा, मूल नक्षत्र, परिघ योग, विष्टि करण । आज नेपालमा सुर्योदय बिहान ५ बजेर ४८ मिनेटमा र सूर्यास्त साँझ ६ बजेर २६ मिनेटमा हुनेछ । आज जन्म लिने बच्चा धनु राशीको हुनेछ ।
मेष (चु, चे, चो, ला, लि, लु, ले, लो, अ)आफ्नो इच्छानुरूप कार्य गर्न पाउँदा मन प्रसन्न रहनेछ । घरायसी र व्यवहारिक काममा खट्दासमेत फुर्ती जाग्न गई तन पनि स्वस्थ रहनेछ । स्वनिणर्यमा गरेका काममा सफलता मिल्ने दिन भए पनि कुनै महत्त्वकाङ्क्षी काम गर्दै हुनुहुन्छ भने जानकार व्यक्तिको सुझाव ग्रहण गर्नुहोला । नयाँ अनुभवका साथ कसरी अघि बढ्ने भन्ने चिन्तामा केन्द्रित भइने छ, हिसाबकिताबको लेखाजोखा र व्यवस्थापकीय जिम्मेबारीका लागि समय छुट्याउनु पर्ने हुन्छ ।
बृष (इ, उ, ए, ओ, बा, बि, बु, बे, बो) खर्चमा बृद्धि हुनाले बजेट डगमगाउने समय हो, आर्थिक तनावले पतिपत्नीका बीचमा सुलह नहुने गरी विवाद चुलिन सक्छ, सचेत भएर व्यवहार गर्नुहोला । महत्त्वहीन र बेकारका काममा समय नबिताउनु होला, बरु मन स्थिर छैन भने एकछिन आराम गरेर फेरि पठनपाठनमा जुट्नु ठीक हुनेछ । अवसर प्राप्तिका निमित्त दौडधूप र परिश्रम गर्नुपर्ने समय हो, तर आफ्ना भावनालाई नियन्त्रणमा राखी व्यवहार गर्नु समुचित हुन्छ, नत्र यसबाट अरुलाई मात्र होइन, आफू स्वयंलाई समेत हानी पुग्नसक्छ ।
मिथुन (का, कि, कु, घ, ङ, छ, के, को, ह) कुनै पुरानो समस्यामा घोत्लिनुपर्ने तथा असमझदारी बढ्नाले कार्यक्षेत्र प्रभावित बन्नसक्ने दिन छ । तर पनि सहकर्मी र सिनियर्सको सहयोग पाउने दिन हो । भावना साटासाट गर्न पाइने र एकान्तमा रमाउन पाउँदा प्रेमसम्बन्ध अझ प्रगाढ बन्दै जाने समय देखिन्छ, प्रेमीबाट कुनै उपहार प्राप्त हुनेछ । दाजुभाइ अथवा घनिष्ठ मित्रका बारेमा कुनै शुभ समाचार प्राप्त हुनेछ । हरेक क्षेत्रबाट खुसियालीको वातावरण प्राप्त हुने सम्भावना छ ।
कर्कट (हि, हु, हे, हो, डा, डि, डु, डे, डो) कारोबारबाट राम्रै फाइदा हुने दिन छ, फलाम, कोइला, पेट्रोलियम पदार्थ आदि नै तपाईंको व्यापार हो भने अझ राम्रो प्रतिफल पाइने छ । निकै धपेडी गर्ने वेला छ, काम गर्दा अनेकानेक बाधा हुनसक्छन्, तथापि दोहोर्याएर प्रयास गरेमा सबै काम सम्पन्न हुने दिन हो । करियर र भविष्यको सोच सलबलाउनेछ, कोसिस गरेमा कला, वाणिज्य, व्यवस्थापन र शिक्षाशास्त्रका उच्च तहका विद्यार्थीले कुनै अवसरसमेत पाउन सक्नुहुन्छ ।
सिंह (मा, मि, मु, मे, मो, टा, टि, टु, टे) कार्यक्षेत्रबाट कुनै राम्रो समाचार आउनसक्छ । अभिभावक र बुजुर्ग व्यक्तिको सल्लाह मानेमा लक्ष्यप्राप्तिको मार्गमा सफल भइनेछ । याद गर्नुहोला, आजको दिन राम्रो बनाउन स्वयं आफ्ना लागि समय निकाल्न सक्नुपर्छ । मान्यजन वा उच्चपदस्थ अधिकारीहरूले हृदयदेखि नै प्रशंसा गर्नेछन्, त्यस्तै अर्काको सहयोग गर्न पाउँदा सन्तोषको अनुभूति हुने समय छ । रोमान्टिक जीवनभन्दा पनि यतिवेला घरपरिवार र अभिभावक महत्त्वपूर्ण बन्नसक्छन्, भावनालाई नियन्त्रण गरी कुराकानी गर्ने र पार्टनरलाई फकाउने प्रयास गर्नुहोला । आजका लागि शुभअङ्क ९, शुभ रङ गुलाबी र शुभ दिशा पूर्व हो । त्यस्तै कुनै नगरी नहुने काम छ वा
कन्या (टो, प, पि, पु, ष, ण, ठ, पे, पो) यन्त्र वा उपकरणको प्रयोगमा सावधान हुनुपर्छ, विवाद वा लफडामा पनि पछि हट्नुहोला, समस्या परेमा सिनियर कर्मचारीको सहयोग लिनु बेस हुनेछ । पार्टनरसँग कुनै नौलो र रमणीय ठाउँको यात्रा गर्ने तिर्सना जाग्नसक्छ, तर परिबन्दमा खुम्चनु पर्दा मन निराश बन्ने समय हो । दिमाग बोझिलो बन्ने भएकाले ससाना कुरामा समेत विवादको परिस्थिति बन्नसक्छ, त्यसैले महत्त्वहीन र बेकारका काममा शक्ति र समय खर्च गर्नुहुँदैन ।
तुला (र, रि, रु, रे, रो, ता, ति, तु, ते) गृहस्थी जीवन र पारिवारिक सुखको आत्मिक अनुभूति प्राप्त हुनेछ । पतिपत्नीले एकआपसमा एउटा सुखद अनुभूति साझा गर्ने दिन हो । तपाईंलाई गुरुवर्ग र अभिभावकले निकै भरोसा र विश्वास राखेको देखिन्छ, अतः लक्ष्यप्रति सचेत भई टुप्पी कसेर मिहिनेत गर्ने समय छ । व्यक्तित्वमा निखार आउने छ, धेरैको मन लोभ्याउन सकिने र प्रेमिल भावना विकसित हुने दिन हो । तर आत्मकेन्द्रित भइदिनु र आफ्ना बारेमा मात्र सोच्नुले नजिकका आफन्तहरू टाढिने परिस्थिति बन्नसक्छ ।
बृश्चिक (तो, ना, नि, नु, ने, नो, या, यि, यु) प्रेमीको स्वास्थ्यस्थिति वा कार्यक्षेत्रमा समस्या उत्पन्न हुनाले मन निराश बन्नसक्छ, तर पनि मौका मिलाएर भावना साटासाट गर्न पाउँदा शान्तिको अनुभूति हुनेछ । बढी खर्च हुने तथा व्यर्थका काममा अल्मलिएर दिन बित्ने परिस्थिति छ । झगडाको योगसमेत बनेको हुँदा मुखलाई कन्ट्रोलमा राखी काममा खटेको जाती हुन्छ । खेलकुद, उपहार सामाग्री, स्वास्थ्य र सरसफाइको व्यवसायमा राम्रै देखिन्छ, तर सँगीसाथी र साझेदारको क्रियाकलाप चित्तबुझ्दो नलाग्न सक्छ ।
धनु (ये, यो, भ, भि, भु, ध, फा, ढ, भे) मन प्रेमिल बन्ने समय हो । नयाँरनयाँ विषय र काम प्रति जागरुकता बढ्नुका साथै रचनात्मक र सीपमूलक काममा सफलता मिल्नेछ । सानो प्रयत्नले हैसियतमा बृद्धि हुनेछ, क्षमता र बुद्धिको उपयोग गर्दा कारोबारले गति समात्न थाल्नेछ, साथै अड्किएका काम पनि पुनः प्रारम्भ हुनेछन् । पारिवारिक वातावरण ठीकै छ, तर छोराछोरीको इच्छा बुझेर काम गर्ने हुँदा बजेट डगमगाउने तथा पारिवारिक जीवनमा मनोमालिन्य बढ्नसक्ने समय छ ।
मकर (भो, ज, जि, खि, खु, खे, खो, गा, गि) पारिवारिक समस्याले खिन्न बनाउनेछ, तर आज लापरबाही गर्ने वा भुलिने दिन होइन किनभने आज गरेको मिहिनेतले राम्रो रिजल्ट दिनसक्छ । निणर्यात्मक काममा ध्यान केन्द्रित हुँदैन, घरायसी समस्या र सुखका बारेमा चिन्तन गर्ने दिन हो । विशेष काम गर्नुछ भने अभिभावक, पत्नी वा छोराछोरीका इच्छा बुझेर अघि बढ्नु ठीक हुन्छ । पेसागत र व्यवसायिक परिस्थिति राम्रै देखिन्छ, तर आज घरपरिवारलाई पनि केही समय छुट्याउनु होला, नत्र आपसी विचाररविमर्शमा खाडल सिर्जना हुनेछ ।
कुम्भ (गु, गे, गो, सा, सि, सु, से, सो, द) नजानेको वा नसुल्झिएको विषयवस्तुमा सहपाठीको सहयोग लिनुहोला, किनकि जब तपाईंको उद्देश्य सुदृढ हुन्छ, कडा परिश्रम विकल्प होइन आवश्यकता बन्ने गर्दछ । बन्धुवान्धव र छरछिमेकका काममा सघाउनुपर्ने परिस्थिति छ, त्यस्तै खाँचो परेमा उनीहरूबाट सहयोग लिन पनि सकिने छ । आध्यात्मिक मनोभावको विकास हुनेछ, साथै मन्दिर वा स्मारकको भ्रमणबाट शान्तिको अनुभूति हुनेछ । कडा परिश्रमको उत्कृष्ट नतिजा प्राप्त हुनेछ, सहकर्मीहरूले तपाईंको क्षमतामाथि विश्वास गर्न थाल्नेछन्, जुनियर स्टाफ र सहयोगीका भावनालाई बुझ्ने प्रयास गर्नुहोला ।
मीन (दि, दु, थ, झ, ञ, दे, दो, च, चि) अभिव्यक्तिगत कलात्मकता एवं आन्तरिक प्रतिभा प्रस्फुटन हुने राम्रो समय छ, वौद्धिक क्षेत्र, प्रकाशन वा एजेन्सीसम्बद्ध काम गर्नेले फाइदा लिने र इज्जत कमाउने दिन हो । अठोट र निणर्यहरूमा सफलता मिल्नेछ । अचानक कुनै यात्राको योजना पनि बन्नसक्छ, तर त्यसबाट पनि लाभ उठाउन सकिने दिन हो । जीवनसाथी र परिवारका सदस्यहरूबाट अपेक्षित सहयोग एवं सद्भाव मिल्नेछ, कुनै आर्थिक समस्या छ भने प्रयास गरेमा हल हुने समय हो । एभरेष्ट न्यूज एजेन्सी
काठमाडौं — राष्ट्रिय सभा सदस्य पुजा चाैधरी सार्वजनिक नीति तथा प्रत्यायोजित विधायन समितिको सभापतिमा नियुक्त हुनुभएको छ । उहाँको नियुक्तिसँगै राजनीतिक तथा सामाजिक क्षेत्रमा खुसीको लहर छाएको छ ।
नव नियुक्त सभापति चौधरीलाई विभिन्न क्षेत्रबाट बधाई तथा शुभकामना व्यक्त गरिएको छ । शुभेच्छुकहरूले उहाँको कार्यकाल सफल र उपलब्धिमूलक रहने विश्वास व्यक्त गरेका छन् ।
सार्वजनिक नीति तथा प्रत्यायोजित विधायन समिति संघीय संसदको महत्वपूर्ण समितिमध्ये एक हो, जसले सरकारी नीतिहरूको अध्ययन, समीक्षा तथा प्रत्यायोजित विधायनसम्बन्धी कार्यहरूलाई प्रभावकारी बनाउने जिम्मेवारी वहन गर्दछ ।
यस समितिले राष्ट्रिय महत्वका दस्तावेज, अभिलेख व्यवस्थापन, ऐतिहासिक एवम् पुरातात्विक सम्पदा सम्बन्धि बिषय इत्यादि हेर्ने गर्दछ।
सभापति चौधरीले आफ्नो जिम्मेवारीलाई इमान्दारी, पारदर्शिता र जनउत्तरदायित्वका साथ निर्वाह गर्ने प्रतिबद्धता व्यक्त गर्नुभएको छ । उहाँको नेतृत्वमा समितिले देशको नीतिगत सुधार र सुशासन प्रवर्द्धनमा महत्वपूर्ण योगदान पुर्याउने अपेक्षा गरिएको छ ।
उहाँको सफल कार्यकालको कामना गर्दै देशभरबाट शुभकामना आउने क्रम जारी छ ।
आरके श्रीवास्तव,मधेस,२४ गते चैत ।
जनकपुरधाम । महोत्तरी जिल्लाको एकडारा गाउँपालिका वडा नं. ५ अन्तर्गत जलेश्वर–बर्दिवास हुलाकी सडक खण्डमा भएको मोटरसाइकल दुर्घटनामा परी ३ जना युवा विद्यार्थीको ज्यान गएको दुःखद घटना सार्वजनिक भएको छ। एसईई परीक्षा दिएर घर फर्किंदै गरेका ती विद्यार्थीहरूको असामयिक निधनले स्थानीय समुदाय मात्र होइन, समग्र समाजलाई नै स्तब्ध बनाएको छ ।
उक्त दुर्घटनामा अन्य ३ जना विद्यार्थी गम्भीर घाइते भएको बताइएको छ। घाइतेहरूको उपचार भइरहेको छ र उनीहरूको शीघ्र स्वास्थ्यलाभको कामना गरिएको छ ।
यस घटनाप्रति मधेश प्रदेश सरकारकी शिक्षा तथा संस्कृति मन्त्री तिवारीले गहिरो दुःख व्यक्त गर्दै दिवंगत आत्माहरूको चिरशान्तिको कामना गरेकी छन् । साथै उनले शोकसन्तप्त परिवारजनप्रति हार्दिक समवेदना प्रकट गर्दै यस पीडादायी क्षण सहन सक्ने शक्ति प्रदान गरियोस् भनी ईश्वरसँग प्रार्थना गरेकी छन् ।
मन्त्री तिवारीले सवारी साधन चलाउँदा अत्यधिक सावधानी अपनाउन, ट्राफिक नियमहरूको पूर्ण पालना गर्न तथा तीव्र गति नियन्त्रणमा राख्न सबै नागरिकलाई आग्रह गरेकी छन् । यस्ता दुर्घटना न्यूनीकरणका लागि सबै पक्ष जिम्मेवार र सचेत हुनुपर्नेमा उनले जोड दिएकी छन् ।
आरके श्रीवास्तव,रौतहट,२२ गते चैत ।
रौतहटको फतुवा विजयपुर नगरपालिकाकी कार्यवाहक नगरप्रमुख अम्बेया खातुनले नगरभित्र रहेका विभिन्न स्वास्थ्य चौकीहरूमा छड्के अनुगमन गरेकी छन् । अनुगमनका क्रममा स्वास्थ्य सेवा प्रवाहमा देखिएको ढिलासुस्ती र कर्मचारीको लापरवाहीप्रति उनले कडा असन्तुष्टि जनाएकी छन् ।
अनुगमन टोलीसहित खातुन स्वास्थ्य चौकी विजयपुर लक्ष्मीनिया र स्वास्थ्य चौकी सन्तपुर पुगेकी थिइन् । लक्ष्मीनिया स्वास्थ्य चौकीमा पुग्दा इन्चार्ज बिरेन्द्र झा निर्धारित समयभन्दा ढिलो, करिब १२ बजे मात्र कार्यालय पुगेका थिए । अनुगमन टोली पुग्दा उनी कार्यालयमा अनुपस्थित रहेको पाइएको थियो ।
स्थानीय सेवाग्राहीहरूले चिकित्सकको ढिलासुस्तीका कारण आफूहरू मर्कामा परेको गुनासो गरेका छन् । बर्थिङ सेन्टरसमेत रहेको उक्त स्वास्थ्य संस्थामा बिहान १० बजेदेखि लाइनमा बसेका सेवाग्राहीहरूले घण्टौंसम्म कुर्नुपरेको बताएका छन् ।
अनुगमनका क्रममा बिना जानकारी कार्यालयमा अनुपस्थित हुने तथा समयअगावै कार्यालय छाड्ने कर्मचारीहरूको हाजिरी पुस्तिकामा रातो मसी लगाइएको कार्यवाहक नगरप्रमुख खातुनले जानकारी दिइन् । उनले नियमित र प्रभावकारी सेवा प्रवाह सुनिश्चित गर्न यस्तो कदम चालिएको स्पष्ट पारिन् ।
त्यस्तै, स्वास्थ्य चौकी सन्तपुरमा गरिएको अनुगमनमा पनि कर्मचारीहरू ढिलो गरी उपस्थित भएको पाइएको थियो। कार्यवाहक नगरप्रमुख खातुनले सबै कर्मचारीलाई कार्यालय समयको कडाइका साथ पालना गर्न अन्तिम चेतावनी दिँदै केही कर्मचारीको हाजिरी समेत काटिएको बताइन् ।
नगरप्रमुख खातुनले स्वास्थ्य संस्थामा अनुशासन कायम गरी सेवाग्राहीलाई सहज र गुणस्तरीय सेवा उपलब्ध गराउन यस्ता अनुगमनलाई निरन्तरता दिने बताएकी छन् ।
आरके श्रीवास्तव,बारा, चैत २३ ।
बारा जिल्लाको बारागढी गाउँपालिकामा आर्थिक वर्ष २०८२/०८३ को हिउँदे गाउँ सभा सम्पन्न भएको छ। गाउँ कार्यपालिकाको कार्यालय खोपवाको आयोजनामा सोमबार गाउँ कार्यपालिकाको सभा हलमा कार्यक्रम आयोजना गरिएको हो।
गाउँपालिका अध्यक्ष अशोक कुमार जयसवाल र उपाध्यक्ष लक्ष्मी देवी रायले संयुक्त रूपमा सभाको उद्घाटन गरेका थिए। कार्यक्रममा प्रमुख प्रशासकीय अधिकृत मुकेश कुमार मिश्रले स्वागत मन्तव्य व्यक्त गर्दै आगामी आर्थिक वर्षमा प्रशासनिक कार्यदेखि विकास निर्माणका गतिविधिसम्म प्रभावकारी रूपमा अघि बढाउने विश्वास व्यक्त गरे।
सभालाई सम्बोधन गर्दै अध्यक्ष जयसवालले आफ्नो चार वर्षे कार्यकालमा पालिकावासीका अपेक्षाअनुसार अधिकांश योजनाहरू सफलतापूर्वक कार्यान्वयन गरिएको दाबी गरे। उनले बारा जिल्लाका १६ वटा पालिकामध्ये विकास निर्माण र सेवा प्रवाहका दृष्टिले बारागढी गाउँपालिका अग्रस्थानमा रहेको उल्लेख गरे।
अध्यक्ष जयसवालले आगामी आर्थिक वर्षमा नयाँ योजना ल्याउनेभन्दा पनि पुराना तथा अधुरा योजनाहरूलाई प्राथमिकतामा राखी सम्पन्न गर्ने प्रतिबद्धता व्यक्त गरे।
कार्यक्रममा जनप्रतिनिधि, कर्मचारी तथा सरोकारवालाहरूको उल्लेख्य सहभागिता रहेको थियो। गाउँ सभाबाट आगामी योजनाहरूको प्रभावकारी कार्यान्वयन र सेवा प्रवाहलाई अझ सुदृढ बनाउने अपेक्षा गरिएको छ ।
बज्जिकाञ्चल संवाददाता,२१ गते चैत ।
जनकपुरधाम । रौतहटको फतुवा विजयपुरमा कार्यरत कर्मचारी संजीव साह मधेस प्रदेश उद्यम विकास सहजकर्ता संघको अध्यक्ष पदमा सर्वसम्मत रूपमा चयन भएका छन् । जनकपुरधाममा आयोजित एक कार्यक्रममा उनलाई उक्त जिम्मेवारी प्रदान गरिएको हो ।
मधेस प्रदेशका १३६ पालिकामा कार्यरत उद्यम विकास सहजकर्ता तथा उद्यमशीलता विज्ञहरूको भेलाबाट साहलाई अध्यक्षमा चयन गरिएको हो । संघको उपाध्यक्षमा सरिता चौधरी, महासचिवमा शोभा केवट मण्डल, सचिवमा अजय कुमार साह र कोषाध्यक्षमा निर्मला चौधरी चयन भएका छन् । त्यसैगरी सदस्यहरूमा रामईश्वर रामलगायत रहेका छन् ।
भेलाबाट पाँच सदस्यीय सल्लाहकार समिति पनि गठन गरिएको छ । समितिमा श्याम कुमार विक, पंचा पण्डित, राजेश चौहान, निर्मला चौधरी र निलम यादव सदस्य रहेका छन् ।
कार्यक्रमका प्रमुख अतिथि मधेस प्रदेश सरकारका उद्योग, वाणिज्य तथा पर्यटन मन्त्री कनिष पटेल रहेका थिए । कार्यक्रममा सम्बोधन गर्दै मन्त्री पटेलले देशमा रोजगारी सिर्जनाको आवश्यकता औंल्याउँदै लघु उद्यमशीलता विकासलाई आगामी बजेट तर्जुमामा समावेश गर्न पहल गर्ने प्रतिबद्धता व्यक्त गरे ।
कार्यक्रममा सहभागीहरूले प्रदेशभर उद्यमशीलता प्रवर्द्धन तथा लघु उद्यम विकासमा सहकार्य गर्दै अघि बढ्ने प्रतिबद्धता समेत जनाएका थिए ।
चन्दन कुमार महताे,गाैर,२१ गते चैत ।
जिल्ला कुखुरा व्यवसायी किसान संघ, रौतहट को आयोजनामा पहिलो साधारण सभा सम्पन्न भएको छ । उक्त कार्यक्रम रौतहट अन्तर्गत दुर्गा भगवती गाउँपालिकाको सामुदायिक भवनमा शनिबार आयोजना गरिएको थियो ।
कार्यक्रममा प्रमुख अतिथिका रूपमा भेटनरी अस्पताल तथा पशु सेवा विभाग गौरका कार्यालय प्रमुख ईन्दु राय यादव, जिल्ला प्रशासन कार्यालयका अधिकृत प्रमेश शिवा, रामनरेश साह ,राष्ट्रिय स्वतन्त्र पार्टी (रास्वपा) जिल्ला अध्यक्ष प्रदिप साह लगायतको उपस्थिति रहेको थियो । साथै, संघका पदाधिकारीहरू, विभिन्न सरोकारवाला निकायका प्रतिनिधिहरू, किसान तथा व्यवसायीहरूको उल्लेखनीय सहभागिता रहेको थियो । कार्यक्रमको सञ्चालन राधेश्याम साहले गरेका थिए ।
सभामा कुखुरा व्यवसायसँग सम्बन्धित समस्या, बजार व्यवस्थापन, रोग नियन्त्रण तथा व्यवसाय प्रवर्द्धनका विषयमा व्यापक छलफल गरिएको थियो । सहभागीहरूले किसानको हकहित संरक्षण तथा उत्पादन वृद्धि गर्न समन्वयात्मक ढंगले अगाडि बढ्नुपर्नेमा जोड दिएका थिए ।
कार्यक्रमको अध्यक्षता संघका अध्यक्ष उमाशंकर साहले गरेका थिए भने अन्य वक्ताहरूले पनि कुखुरा व्यवसायलाई थप व्यवस्थित र सुदृढ बनाउन आवश्यक पहलका विषयमा आ-आफ्ना धारणा व्यक्त गरेका थिए ।
साधारण सभाले आगामी कार्ययोजना तय गर्नुका साथै किसानको हितमा विभिन्न महत्वपूर्ण निर्णयहरू समेत पारित गरेको आयोजकले जनाएको छ ।
आरके श्रीवास्तव,राैतहट,२१ गते चैत ।
रौतहट जिल्लाको उत्तरी–पश्चिम भेगमा अवस्थित गुजरा नगरपालिकाले आफ्नो क्षेत्रमा प्रहरी चौकी स्थापना गर्न माग गर्दै गृह मन्त्रालयलाई औपचारिक पत्राचार गरेको छ।
गुजरा नगरपालिका नगर कार्यपालिकाको कार्यालय, सिमराभवानीपुरले प्रहरी चौकी स्थापनाको आवश्यकता औंल्याउँदै नेपाल सरकार, गृह मन्त्रालय, सिंहदरबार, काठमाडौंलाई सिफारिससहित अनुरोध गरेको हो। नगर प्रमुख सन्तलाल प्रसाद चौधरीले हस्ताक्षर गरेको पत्रमा नगर क्षेत्रको शान्ति सुरक्षा सुदृढ गर्न प्रहरी चौकी अत्यावश्यक रहेको उल्लेख गरिएको छ।
नगरपालिकाका अनुसार गुजरा क्षेत्रको अधिकांश भूभाग सघन वन क्षेत्रले ढाकिएको छ। स्थानीय सरकार सञ्चालन ऐन, २०७४ अनुसार वन क्षेत्र तथा वन्यजन्तुको संरक्षण र सम्वर्द्धन गर्ने जिम्मेवारी स्थानीय तहमा रहेको छ। यस्ता भौगोलिक अवस्थाका कारण यहाँ बसोबास गर्ने नागरिकको जीउ–धनको सुरक्षामा चुनौती देखिएको जनाइएको छ।
विशेषगरी वडा नं. २ अन्तर्गत पर्ने सघन वन क्षेत्रदेखि करिब १ किलोमिटर दक्षिणतर्फ रहेको कटानी बजारमा प्रहरी चौकी स्थापना गर्न उपयुक्त स्थान रहेको नगरपालिकाले प्रस्ताव गरेको छ।
नगरपालिकाले उक्त क्षेत्रमा प्रहरी चौकी स्थापना भएमा अपराध नियन्त्रण, वन संरक्षण तथा आम नागरिकको सुरक्षा व्यवस्थामा उल्लेखनीय सुधार हुने विश्वास व्यक्त गरेको छ।
यस सम्बन्धमा आवश्यक प्रक्रिया पूरा गरी शीघ्र प्रहरी चौकी स्थापना गरिदिन गृह मन्त्रालयसँग आग्रह गरिएको नगरपालिकाले जनाएको छ।
जनकपुरधाम, चैत २१ गते ।
मधेश प्रदेशका उद्योग, वाणिज्य तथा पर्यटन मन्त्री माननीय कनिस पटेलको प्रमुख आतिथ्यतामा आर्थिक वर्ष २०८३/०८४ को नीति तथा कार्यक्रम तर्जुमा सम्बन्धमा सम्बन्धित कार्यालय प्रमुखहरूसँग महत्वपूर्ण छलफल सम्पन्न भएको छ।
उक्त छलफलमा प्रदेशको समग्र आर्थिक समृद्धि, उद्योग प्रवर्द्धन, पर्यटन विकास तथा रोजगारी सिर्जनालाई मुख्य प्राथमिकतामा राख्दै व्यवहारिक र प्रभावकारी नीति निर्माण गर्ने विषयमा गहन विचार – विमर्श गरिएको छ। मन्त्री पटेलले नीति निर्माणलाई केवल कागजी प्रक्रियामा सीमित नराखी कार्यान्वयनमुखी बनाउनेतर्फ विशेष जोड दिएका हुन।
कार्यक्रममा मन्त्री पटेलले विगतका सरकारले ल्याएका सफल तथा प्रभावकारी नीति र योजनाहरूलाई निरन्तरता दिने प्रतिवद्धता व्यक्त गर्दै नयाँ योजनाहरूलाई पनि समयसापेक्ष र परिणाममुखी बनाइने बताए। उनले “देखिने गरी विकासका काम अगाडि बढाउने” आफ्नो लक्ष्य रहेको स्पष्ट पारेका हुन।
छलफलमा सहभागी कार्यालय प्रमुखहरूले पनि आ-आफ्ना क्षेत्रका अनुभव, चुनौती तथा सुझावहरू प्रस्तुत गर्दै नीति निर्माणलाई अझ प्रभावकारी बनाउन सहयोग पुर्याएका हुन।
मधेश प्रदेश सरकार एवं उधोग वाणिज्य तथा पर्यटन मन्त्रालयले आर्थिक विकास, औद्योगिक विस्तार तथा पर्यटन प्रवर्द्धनमार्फत जनताको जीवनस्तर सुधार गर्ने दिशामा सक्रिय रहेको देखिएको छ।
