काठमाडौँ । नेपालले विश्वकप लिग- २ अन्तर्गतको सिरिजमा लगातार दोस्रो हार बेहोरेको छ । विहिबार सम्पन्न खेलमा नेपाल नेदरल्याण्डससँग ६ विकेटले पराजित भएको हो ।
नेपालले दिएको १५८ रनको लक्ष्य पछाएको नेदरल्याण्डसले ४४.१ ओभरमा ४ विकेट गुमाएर लक्ष्य पुरा गरेको थियो ।
नेदरल्याण्डसका लागि स्कट एडवार्डसले ६१ र नोआह कोरेजले ३४ रन बनाएका थिए । त्यस्तै नेपाली बलर सोमपाल कामी, दिपेन्द्र सिंह ऐरी र ललित राजबंशीले एक एक विकेट लिएका थिए ।
यसअघि नेपालले नेदरल्याण्डसविरुद्ध पहिला ब्याटिंग गर्दै ४४.४ ओभरमा अल आउट भएर १५७ रन बनाएको थियो ।
नेपालका लागि आरिफ सेखले सर्बाधिक ४१ रन बनाए भने गुलशन झाले २९ र दिपेन्द्र सिंह ऐरीले २१ रन बनाएका थिए । त्यस्तै आसिफ शेखले १४ र करण केसीले १३ रन बनाएका थिए । त्यसैगरी नेदरल्याण्डसका बलर एलेक्स रोय र रोएलोफ भान डेर मेर्वेले ३-३ विकेट लिए भने लोहान भन बीकले २ विकेट लिएका थिए ।
लिग-२ यो सिरिज ३१ जुलाईसम्म हुने छ । यस सिरिजमा जुलाई २५ मा नेदरल्याण्डस र नामिबियाबीच खेल हुने छ भने जुलाई २७ मा नेपाल र नामिबिया, जुलाई २९ मा नेपाल र नेदरल्याण्डस र जुलाई ३१ मा नेदरल्याण्डस र नामिबियाबीच खेल हुने तालिका छन् ।
लिग-२ को अहिलेसम्मको अंक तालिकामा नेदरल्याण्डस २९ खेलमा ३४ अंकसहित तेस्रो स्थानमा छ भने नेपाल ३० खेलमा २४ अंकसहित पाँचौं स्थानमा छ । त्यस्तै नामिबिया २९ खेलमा २४ कसहित छैटौं स्थानमा रहेको छ ।एभरेष्ट न्यूज एजेन्सी
काठमाडौँ । जल तथा मौसम विज्ञान विभाग अन्तर्गत मौसम पूर्वानुमान महाशाखाले हाल देशभर मनसुनी वायूको प्रभाव रहेको र हाल मनसुनको न्यून चापीय रेखा सरदर स्थानमा रहेको जनाएको छ ।
हाल देशको हिमाली र पहाडी भू-भागमा साधारणतया बादल लागेको छ भने तराई भू-भागमा आंशिक बादल लागेको छ । कोशी, बागमती, गण्डकी, कर्णाली र सुदूरपश्चिम प्रदेशका एक-दुई स्थानमा हल्का वर्षा भैरहेको छ।
हाल दिउँसो देशको हिमाली र पहाडी भूभागमा साधारणतया बादल लाग्ने र तराई भूभागमा आंशिक बादल लाग्नेछ। देशका हिमाली र पहाडी भू-भागका केही स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ। बागमती, गण्डकी र लुम्बिनी प्रदेशका तराईका थोरै स्थान तथा कोशी, मधेश र सुदूरपश्चिम प्रदेशका तराई भू-भागका एक-दुई स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ । लुम्बिनी प्रदेशका पहाडी भू-भाग तथा बागमती, गण्डकी र कर्णाली प्रदेशका हिमाली र पहाडी भू-भागको एक-दुई स्थानमा भारी वर्षाको सम्भावना रहेको छ ।
त्यस्तै आज राति देशभर साधारणतया बादल लाग्नेछ। देशका हिमाली र पहाडी भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ। कोशी, बागमती, गण्डकी, लुम्बिनी र सुदूरपश्चिम प्रदेशका तराईका थोरै स्थान तथा मधेश प्रदेशको तराई भू-भागका एक दुई स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ ।एभरेष्ट न्यूज एजेन्सी
आजको राशिफल बिस २०८३ साउन ८ गते शुक्रबार ईस २०२६ जुलाई २४ नेपाल सम्बत ११४६ दिल्लाथ्व दशमी, रौद्र नाम संवत्सर सूर्य दक्षिणायन, वर्षा ऋतु, असार शुक्ल दशमी, चन्द्रमा वृश्चिक राशिमा, अनुराधा नक्षत्र, शुक्ल योग, गर करण । आज नेपालमा सुर्योदय बिहान ५ बजेर २२ मिनेटमा र सूर्यास्त साँझ ६ बजेर ५९ मिनेटमा बजे हुनेछ । आज जन्म लिने बच्चा वृश्चिक राशीको हुनेछ ।
मेष (चु, चे, चो, ला, लि, लु, ले, लो, अ) –
आज बिहानदेखि नै कामप्रति उत्साह र आत्मविश्वास बढ्नेछ। नयाँ योजना बनाउने र त्यसलाई व्यवहारमा उतार्ने अवसर प्राप्त हुन सक्छ। कार्यक्षेत्रमा तपाईंको नेतृत्व क्षमता, निर्णय गर्ने शैली र निरन्तर मेहनतको उचित मूल्यांकन हुनेछ। लामो समयदेखि रोकिएका काम पूरा हुने सम्भावना पनि बलियो देखिन्छ। व्यापार–व्यवसायमा नयाँ साझेदारी वा लगानीका अवसर देखा पर्न सक्छन्। आर्थिक रूपमा आम्दानी बढ्ने संकेत रहेकाले भविष्यका लागि बचत गर्ने सोच पनि सफल हुनेछ। परिवारमा आपसी विश्वास र आत्मीयता बढ्नेछ। साथीभाइसँगको भेटघाटले मन प्रसन्न बनाउनेछ। स्वास्थ्य राम्रो रहनेछ, तर अत्यधिक कामको चापका बीच आरामका लागि पनि समय छुट्याउनु उचित हुनेछ।
वृष (इ, उ, ए, ओ, वा, वि, वु, वे, वो) –
आज धैर्य, संयम र व्यवहारिक सोचले तपाईंलाई सफलता दिलाउनेछ। कार्यक्षेत्रमा वरिष्ठ व्यक्तिको विश्वास प्राप्त हुनेछ भने सहकर्मीबाट पनि राम्रो सहयोग मिल्नेछ। पुराना अनुभवले नयाँ निर्णय लिन सहयोग गर्नेछ। व्यापार–व्यवसायमा नियमित लाभ प्राप्त हुनेछ र ग्राहकको विश्वास बढ्नेछ। आर्थिक अवस्था सन्तुलित रहनेछ। आवश्यक खर्च भए पनि आम्दानीले त्यसलाई सहज रूपमा धान्नेछ। परिवारका सदस्यहरूसँग आत्मीय संवाद हुनेछ। घरमा सुखद वातावरण कायम रहनेछ। स्वास्थ्य राम्रो रहनेछ र मानसिक रूपमा पनि शान्ति तथा सन्तुष्टि महसुस हुनेछ।
मिथुन (का, कि, कु, घ, ङ, छ, के, को, ह) –
आज तपाईंको बोली, व्यवहार र सिर्जनशील सोचले धेरैको मन जित्नेछ। अध्ययन, लेखन, सञ्चार, शिक्षण तथा सिर्जनात्मक क्षेत्रमा लागेकाहरूले विशेष उपलब्धि हासिल गर्न सक्नेछन्। कार्यक्षेत्रमा नयाँ जिम्मेवारी प्राप्त हुन सक्छ, जसलाई सफलतापूर्वक पूरा गर्न सक्नुहुनेछ। आर्थिक रूपमा सुधार आउने सम्भावना बलियो छ। नयाँ सम्पर्क र चिनजानले भविष्यमा लाभदायक अवसर प्रदान गर्न सक्छ। परिवारसँग रमाइलो समय बित्नेछ। स्वास्थ्य राम्रो रहनेछ र आत्मविश्वास पनि उल्लेखनीय रूपमा बढ्नेछ।
कर्कट (हि, हु, हे, हो, डा, डि, डु, डे, डो) –
आज परिवारसँग बिताएको समयले मनलाई विशेष सन्तुष्टि दिनेछ। घरमा खुसीको वातावरण रहनेछ र कुनै शुभ समाचार प्राप्त हुने सम्भावना पनि छ। कार्यक्षेत्रमा तपाईंको मेहनत, इमानदारी र जिम्मेवारीको प्रशंसा हुनेछ। रोकिएका काम पूरा हुनेछन् र नयाँ अवसर प्राप्त हुन सक्छ। आर्थिक रूपमा सामान्य सुधार आउने संकेत देखिन्छ। भविष्यका लागि योजना बनाउन र महत्त्वपूर्ण निर्णय लिन दिन अनुकूल रहनेछ। स्वास्थ्य राम्रो रहनेछ। मानसिक रूपमा पनि सकारात्मक ऊर्जा र शान्ति कायम रहनेछ।
सिंह (मा, मि, मु, मे, मो, टा, टि, टु, टे) –
आज तपाईंको आत्मविश्वास, साहस र नेतृत्व क्षमताले उल्लेखनीय सफलता दिलाउनेछ। कार्यक्षेत्रमा वरिष्ठ व्यक्तिको विश्वास जित्न सफल हुनुहुनेछ। नयाँ जिम्मेवारी वा पदसँग सम्बन्धित अवसर प्राप्त हुन सक्छ। व्यापार–व्यवसायमा राम्रो लाभ हुने सम्भावना छ। आर्थिक पक्ष बलियो रहनेछ र नयाँ लगानीका सम्भावना पनि देखिनेछन्। सामाजिक क्षेत्रमा प्रतिष्ठा र सम्मान बढ्नेछ। परिवारको साथले मनोबल उच्च रहनेछ। स्वास्थ्य राम्रो रहनेछ र शरीरमा स्फूर्ति कायम रहनेछ।
कन्या (टो, प, पि, पु, ष, ण, ठ, पे, पो) –
आज अध्ययन, अनुसन्धान, तालिम तथा नयाँ सीप सिक्ने कार्यमा राम्रो सफलता प्राप्त हुनेछ। कार्यक्षेत्रमा अनुशासन र निरन्तर मेहनतले वरिष्ठ व्यक्तिको प्रशंसा प्राप्त हुनेछ। आर्थिक अवस्था सन्तुलित रहनेछ। अनावश्यक खर्च घटाउन सके भविष्यका लागि राम्रो बचत गर्न सकिनेछ। परिवारमा समझदारी र आत्मीयता बढ्नेछ। छोटो दूरीको यात्रा वा आवश्यक भेटघाट लाभदायक बन्न सक्छ। स्वास्थ्य राम्रो रहनेछ र नियमित दिनचर्याले थप ऊर्जा प्रदान गर्नेछ।
तुला (रा, रि, रु, रे, रो, ता, ति, तु, ते) –
आज आर्थिक क्षेत्रमा सकारात्मक परिवर्तन आउने सम्भावना बलियो छ। रोकिएको रकम प्राप्त हुन सक्छ वा आम्दानीको नयाँ स्रोत खुल्न सक्छ। व्यापार–व्यवसायमा लाभ बढ्नेछ। कार्यक्षेत्रमा सहकार्य र समन्वय राम्रो रहनेछ। नयाँ योजना सफल हुने संकेत देखिन्छ। परिवारसँग रमाइलो समय बिताउने अवसर प्राप्त हुनेछ। सामाजिक क्षेत्रमा नयाँ सम्बन्ध विस्तार हुनेछ, जसले भविष्यमा लाभ पुर्याउन सक्छ। स्वास्थ्य राम्रो रहनेछ र मानसिक रूपमा पनि उत्साह कायम रहनेछ।
वृश्चिक (तो, ना, नि, नु, ने, नो, या, यि, यु) –
आज धैर्य, लगनशीलता र अनुभवका कारण उल्लेखनीय उपलब्धि हासिल गर्न सक्नुहुनेछ। कार्यक्षेत्रमा तपाईंको कार्यदक्षताको प्रशंसा हुनेछ। प्रतिस्पर्धात्मक क्षेत्रमा सफलता प्राप्त हुने सम्भावना बलियो छ। आर्थिक रूपमा लाभ हुने संकेत देखिए पनि ठूलो निर्णय गर्दा सावधानी अपनाउनु राम्रो हुनेछ। परिवारमा सुखद वातावरण कायम रहनेछ। प्रियजनसँगको सम्बन्ध अझ प्रगाढ बन्नेछ। स्वास्थ्य राम्रो रहनेछ र मानसिक रूपमा पनि आत्मविश्वास तथा उत्साह बढ्नेछ।
धनु (ये, यो, भ, भि, भु, ध, फा, ढ, भे) –
आज सकारात्मक सोच र आत्मविश्वासले तपाईंलाई नयाँ उपलब्धितर्फ डोर्याउनेछ। व्यापार, अध्ययन, वैदेशिक क्षेत्र वा यात्रासँग सम्बन्धित काममा शुभ संकेत देखिन्छ। कार्यक्षेत्रमा तपाईंको मेहनतको उचित मूल्यांकन हुनेछ। आर्थिक अवस्थामा सुधार आउने सम्भावना बलियो छ। परिवारका सदस्यहरूसँगको सम्बन्ध थप आत्मीय बन्नेछ। सामाजिक क्षेत्रमा प्रतिष्ठा र सम्मान बढ्नेछ। नयाँ योजना सुरु गर्न तथा भविष्यका लक्ष्य निर्धारण गर्न दिन अत्यन्त शुभ रहनेछ। स्वास्थ्य राम्रो रहनेछ र मन उत्साहित रहनेछ।
मकर (भो, ज, जि, खि, खु, खे, खो, गा, गि) –
आज जिम्मेवारी केही बढे पनि योजनाबद्ध रूपमा अघि बढ्दा सबै काम सहज रूपमा सम्पन्न हुनेछन्। कार्यक्षेत्रमा वरिष्ठ व्यक्तिको सहयोग र मार्गदर्शन प्राप्त हुनेछ। आर्थिक रूपमा खर्चमा नियन्त्रण राख्न सके राम्रो बचत गर्न सकिनेछ। परिवारका सदस्यहरूको सुझाव उपयोगी सावित हुनेछ। घरमा शान्त र सुखद वातावरण कायम रहनेछ। स्वास्थ्यमा सामान्य थकान महसुस हुन सक्ने भएकाले पर्याप्त आराम र पौष्टिक आहारमा ध्यान दिनु आवश्यक हुनेछ। दिनको अन्त्यमा प्राप्त उपलब्धिले आत्मविश्वास बढाउनेछ।
कुम्भ (गु, गे, गो, सा, सि, सु, से, सो, द) –
आज सिर्जनशील सोच, नवीन योजना र सकारात्मक दृष्टिकोणले तपाईंलाई नयाँ सफलतातर्फ अघि बढाउनेछ। कार्यक्षेत्रमा रोकिएका काम सम्पन्न हुनेछन्। नयाँ अवसर प्राप्त हुने सम्भावना पनि बलियो छ। साथीभाइ तथा सहकर्मीको सहयोगले महत्त्वपूर्ण काम सहज रूपमा पूरा हुनेछ। आर्थिक पक्षमा सुधार आउनेछ। परिवारमा मेलमिलाप, प्रेम र समझदारी बढ्नेछ। सामाजिक क्षेत्रमा नयाँ परिचय स्थापित हुनेछ, जसले भविष्यमा लाभ दिनेछ। स्वास्थ्य राम्रो रहनेछ र दिनभर स्फूर्ति कायम रहनेछ।
मीन (दि, दु, थ, झ, ञ, दे, दो, च, ची) –
आज धैर्य, संयम र सकारात्मक सोचले दिनलाई उपलब्धिमूलक बनाउनेछ। केही काममा सुरुवाती ढिलाइ भए पनि अन्ततः परिणाम तपाईंको पक्षमा आउनेछ। कार्यक्षेत्रमा आफ्नो अनुभव, सीप र मेहनतको उचित उपयोग गर्न सक्नुहुनेछ। आर्थिक रूपमा सोचविचार गरेर खर्च गर्नु उपयुक्त हुनेछ, साथै बचत गर्ने अवसर पनि प्राप्त हुनेछ। परिवारको साथ र सहयोगले मनोबल बढ्नेछ। पुराना अधुरा काम पूरा हुने सम्भावना बलियो छ। साँझतिर प्राप्त हुने कुनै शुभ समाचारले भविष्यप्रति नयाँ आशा र उत्साह थप्नेछ। स्वास्थ्य राम्रो रहनेछ र मानसिक रूपमा पनि शान्ति, सन्तुलन तथा सकारात्मक ऊर्जा कायम रहनेछ ।एभरेष्ट न्यूज एजेन्सी
काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने चीन भ्रमणमा जाने तयारीमा रहेका छन् ।
सभापति लामिछानेको चीन भ्रमणको तयारी भइरहेको र छिट्टै मिति सार्बजनिक गर्ने रास्वपा उच्च स्रोतले जानकारी दिएको छ । भ्रमणका लागि परराष्ट्र मन्त्रालयले चिनियाँ पक्षसँग संवाद गरिरहेको बताइएको छ ।
लामिछाने चिनियाँ कम्युनिस्ट पार्टीको निमन्त्रणा चीन भ्रमणमा जान लागेको र सम्भवत भ्रमण अगस्त महिनामा हुने दाबि गरिएको छ ।
यसअघि लामिछानेले भारतीय जनता पार्टीको निमन्त्रणमा गरेको भ्रमण भ्रमणको निकै चर्चा भएको थियो भने उनले भारतमा उच्च सम्मान समेत पाएका थिए ।एभरेष्ट न्यूज एजेन्सी
काठमाडौँ । महानायक राजेश हमालले देशको शासन प्रणाली ‘हिट एन्ड मिस’ अर्थात् अन्दाज र परीक्षणको भरमा सञ्चालन गर्नु बुद्धिमानी नहुने टिप्पणी गरेका छन् ।
सामाजिक सञ्जालमार्फत आफ्नो धारणा सार्वजनिक गर्दै उनले कुनै पनि राष्ट्रको भविष्य संयोगका आधारमा नभई दूरदृष्टि, तथ्यमा आधारित निर्णय र दीर्घकालीन रणनीतिबाट निर्माण हुनुपर्ने बताएका छन् ।
हमालले भविष्यप्रतिको स्पष्ट दृष्टिकोण र आगामी पाँच, १० वा २० वर्षमा देश कहाँ पुग्नेछ भन्ने यथार्थपरक पूर्वानुमानबिना शासन सञ्चालन गरिनु चिन्ताको विषय भएको उल्लेख गरेका छन् ।
उनका अनुसार शासन केवल दैनिक व्यवस्थापनका समस्यामै सीमित रहिरहने हो भने तीव्र रूपमा परिवर्तन भइरहेको वर्तमान विश्वमा देश प्रगतितर्फ नभई ठप्प अवस्थातर्फ उन्मुख हुन सक्ने जोखिम रहन्छ ।
उनले राष्ट्रको दीर्घकालीन विकासका लागि स्पष्ट योजना, दूरदृष्टि र तथ्यमा आधारित नीतिगत निर्णय आवश्यक रहेकोमा जोड दिएका छन् ।एभरेष्ट न्यूज एजेन्सी
सप्तरी । सप्तरीमा ठूलो परिमाणमा प्रतिबन्धित लागुऔषध गाँजा बरामद गरिएको छ ।
जिल्लाको तिलाठी कोइलाडी गाउँपालिका–५ स्थित ओसारपसार भइरहेको ३ हजार ३३२.४६० किलोग्राम गाँजा बरामद गरिएको हो।
हनुमाननगरबाट रामपुर मल्हनियातर्फ जाँदै गरेका तीनवटा सवारीसाधनबाट उक्त परिमाणको गाँजा बरामद गरिएको हो। घटनामा प्रयोग भएका तीनवटै सवारीसाधन नियन्त्रणमा लिइएको छ भने चालकहरू फरार रहेका छन्।
बा.प्र.०१–०२५ च ०४३६ नम्बरको स्कर्पियोबाट १९ बोरामा रहेको ५२३.६४० किलोग्राम, प्र १–०४–००१ च १५०७ नम्बरको पिकअपबाट ४८ बोरामा रहेको १ हजार ६६८.११० किलोग्राम तथा बा.प्र.०१–०२९ च ९५८६ नम्बरको अर्को पिकअपबाट ३३ बोरामा रहेको १ हजार १७०.७१० किलोग्राम गाँजा बरामद गरिएको हो।
फरार चालकहरूको खोजी जारी रहेको छ भने घटनाबारे थप अनुसन्धान भइरहेको प्रहरीले जनाएको छ।एभरेष्ट न्यूज एजेन्सी
काठमाडौँ । जिल्ला सिरहाको लहान नगरपालिका–६ स्थित आन्तरिक राजस्व कार्यालय, लहानका कर अधिकृत युवराज एम एस पाल पाँच लाख रुपैयाँ घुस लिएको आरोपमा पक्राउ परेका छन् ।
अख्तियार दुरुपयोग अनुसन्धान आयोगका अनुसार आर्थिक वर्ष २०७८/०७९ को पूर्ण कर लेखापरीक्षणका लागि सेवाग्राहीले पेस गरेका कागजात नमिलेको भन्दै दुःख हैरानी दिएर कर अधिकृत पालले घुस मागेको भन्ने सूचना तथा उजुरीका आधारमा अनुसन्धान अघि बढाइएको थियो ।
उक्त सूचनापछि अख्तियार दुरुपयोग अनुसन्धान आयोगको बर्दिबास कार्यालयबाट खटिएको टोलीले पाललाई सेवाग्राहीबाट पाँच लाख रुपैयाँ घुस लिइसकेको अवस्थामा बिहीबार आफ्नै कार्यकक्षबाट नियन्त्रणमा लिएको हो ।
पक्राउका क्रममा घुसस्वरूप लिइएको पाँच लाख रुपैयाँ नगद र एउटा मोबाइल फोन समेत बरामद गरिएको आयोगले जनाएको छ । घटनाबारे थप अनुसन्धान भइरहेको अख्तियारले जनाएको छ।एभरेष्ट न्यूज एजेन्सी
काठमाडौँ । नेपाल राष्ट्र बैंकले विदेशी मुद्रा कारोबार तथा ओसारपसारसम्बन्धी व्यवस्था परिमार्जन गर्दै नेपालमा २०० र ५०० दरका भारतीय रुपैयाँ (भारु) नोट प्रयोग गर्न सकिने व्यवस्था गरेको छ ।
नेपाल राष्ट्र बैंकले विदेशी विनिमय (नियमित गर्ने) ऐन, २०१९ र सम्पत्ति शुद्धीकरण (मनी लाउन्डरिङ) निवारण ऐन, २०६४ का व्यवस्थाअनुसार यसअघि जारी गरिएका व्यवस्थामा परिमार्जन गर्दै सन् २०१६ नोभेम्बर ९ भन्दा यता प्रचलनमा आएका प्रतिव्यक्ति २५ हजार भारतीय रुपैयाँसम्मका प्रचलनमा रहेका २०० र ५०० दरका नोट नेपालमा ल्याउन, लैजान तथा सटही गर्न सकिने व्यवस्था गरेको हो ।
साथै सन् २०१६ नोभेम्बर ९ भन्दा अघि प्रचलनमा रहेका भारतीय पाँच सय र एक हजार दरका नोटको कारोबार गर्न नपाइने व्यवस्था यथावत रहेको जनाएको छ।
त्यस्तै राष्ट्र बैंकका अनुसार नेपाली वा विदेशी नागरिकले अमेरिकी डलर पाँच हजारसम्म (भारतीय रुपैयाँ वा अन्य विदेशी मुद्राको हकमा पनि सोही बराबर) नगद विदेशी मुद्रा भन्सार घोषणा नगरी नेपालमा भित्र्याउन सक्नेछन्। तर, अमेरिकी डलर पाँच हजारभन्दा बढी नगद विदेशी मुद्रा ल्याउँदा भने अनिवार्य रूपमा भन्सारमा घोषणा गरी प्रमाणित गराउनुपर्ने व्यवस्था रहेको छ ।
यस्तै, नेपाली नागरिकले भारतबाहेक अन्य कुनै मुलुकमा भारतीय रुपैयाँ लैजान वा त्यहाँबाट भारतीय रुपैयाँ नेपाल ल्याउन नपाउने व्यवस्था पनि कायम रहेको राष्ट्र बैंकले पुनः जानकारी गराएको छ ।
नयाँ व्यवस्थाले विदेशी मुद्रा कारोबारसम्बन्धी अन्योल हट्नुका साथै नेपाल आउने भारतीय पर्यटकलाई सहजता पुग्ने र विदेशी विनिमय नियमन र सम्पत्ति शुद्धीकरणसम्बन्धी कानुनको प्रभावकारी कार्यान्वयनमा समेत यसले सहयोग पुग्ने राष्ट्र बैंकको अपेक्षा लिएको जनाएको छ ।एभरेष्ट न्यूज एजेन्सी
काठमाडौँ । नेपाली कांग्रेसले ‘नेपाली कांग्रेस फर नेसनल कज’ अभियानको शुभारम्भ गरेको छ ।
नेपाली काँग्रेसका सभापति गगन थापाले विहिबार राष्ट्रिय सभामा आयोजित कार्यक्रममा ‘नेपाली कांग्रेस फर नेसनल कज’ अभियानको सुरु गर्दै नागरिकको कल्याण र अधिकारका पक्षमा केन्द्रित भएर काम गर्ने बताएका हुन ।
सभापति थापाले भने- ‘हामीले पार्टीको महासमिति बैठकबाट प्रत्येक समितिले ५० प्रतिशत राजनीतिक काम र ५० प्रतिशत काम बृहत्तर समुदायका लागि गर्नुपर्ने निर्णय गरेका छौं। विशेष महाधिवेशनबाट राष्ट्रिय पुनर्जागरण अभियान पारित गरेका छौं । यही पृष्ठभूमिमा बीपीलाई स्मरण गर्दै जरा अभियान सम्पन्न गरी आजदेखि ‘नेपाली कांग्रेस फर नेसनल कज’ अभियान प्रारम्भ गरेका छौं। यसको साझा उद्देश्य नागरिकको कल्याणमा काम गर्नु र नागरिकको हकको पक्षमा उभिनु हो ।’
उनले नेपाली कांग्रेसका संस्थापक नेता बीपी कोइरालाले नागरिकको पीडा सुन्नु र त्यसमा साथ दिनुलाई राजनीतिको मूल जिम्मेवारीका रूपमा लिएको स्मरण गर्दै भने-‘बीपीको लागि नागरिकको कुरा सुन्ने कुरा कुनै अतिरिक्त काम थिएन, यो त राजनीतिको मूल काम थियो। बीपी कोइरालाका निम्ति जहाँ जनताको दुःख छ, त्यो दुःखमा नपुग्ने कांग्रेस, कांग्रेस नै होइन। भोट मात्र माग्ने कांग्रेस कसरी कांग्रेस हुन्छ? दुःखको बेला देखिने कांग्रेस, कांग्रेस हुनुपर्छ। पीडाको बेला देखिने कांग्रेस, कांग्रेस हुनुपर्छ। बीपी कोइरालाका निम्ति यही सबैभन्दा ठूलो कुरा थियो।’
थापाले कांग्रेसले महासमिति बैठक र विशेष महाधिवेशनबाट राजनीतिक गतिविधिसँगै समाजसेवालाई पनि प्राथमिकता दिने नीति पारित गरिसकेको समेत उल्लेख गरेका थिए ।एभरेष्ट न्यूज एजेन्सी
काठमाडौं । शिक्षामन्त्री सस्मित पोखरेलबिरुद्ध युवाहरुले ‘नेपो बेबी’ भन्दै प्रदर्शन गरेका छन् ।
त्रिभुवन बिश्वविद्यालयको ६७औं वार्षिक दिवस समारोहमा सहभागी हुन कीर्तिपुर पुगेका मन्त्री पोरखेलबिरुद्ध युवाहरुले नेपो बेबी भन्दै नाराबाजी गर्दै प्रदर्शन गरेका हुन् ।
उनीहरुले ‘नेपो बेबी मुर्दावाद’, ‘मेरिटोक्रेसी लागू गर’ लगायतका नारा लगाउँदै प्रदर्शनमा उत्रिएका विद्यार्थीहरुलाई प्रहरीले नियन्त्रणमा लिएको छ । उनीहरुले विश्वविद्यालयमा राजनीतिक हस्तक्षेप बन्द गर्नमा माग गरका छन् भने मेरिटोक्रेसी लागू गर्न समेत माग गरेका छन् । विश्व विद्यालयहरुको कुलपतिमा प्रधानमन्त्री र सहकुलपतिमा शिक्षामन्त्री हुने व्यवस्था समेत खारेज गर्नुपर्ने उनीहरुको माग छ । एभरेष्ट न्यूज एजेन्सी,
