आरके श्रीवास्तव,राैतहट,०८ गते साउन ।

रौतहट जिल्लाको गुजरा नगरपालिका–३, बलुवा स्थित श्री अन्जुमन सामुदायिक वन उपभोक्ता समूहको वन क्षेत्र अतिक्रमण गरी करिब एक महिनाअघि खनजोत गरेर धान रोपिएको क्षेत्रमा डिभिजन वन कार्यालय रौतहटका डिभिजनल वन अधिकृत मनोज ठाकुरको नेतृत्व र अग्रसरतामा संयुक्त टोलीले अतिक्रमण हटाई पुनः वृक्षारोपण गरेको छ ।

वन क्षेत्र संरक्षणलाई उच्च प्राथमिकतामा राख्दै डिभिजनल वन अधिकृत ठाकुरको पहलमा प्रमुख जिल्ला अधिकारी, जिल्ला प्रहरी प्रमुख तथा सशस्त्र प्रहरी प्रमुखसँग आवश्यक समन्वय गरी मिति २०८३ साउन ८ गते वन कर्मचारी, जङ्गलसहिया तथा सशस्त्र प्रहरीका विभिन्न बेसहरूको संयुक्त टोली परिचालन गरिएको थियो ।

संयुक्त टोलीले अनुमानित २ बिघा वन क्षेत्र अतिक्रमण गरी रोपिएको धान हटाई उक्त क्षेत्रमा टिक (सागवान) जातका बिरुवा रोपण गरेको डिभिजन वन कार्यालयले जनाएको छ ।

डिभिजनल वन अधिकृत मनोज ठाकुरले वन अतिक्रमण कुनै पनि हालतमा स्वीकार्य नहुने भन्दै वन क्षेत्रको संरक्षणका लागि कानुनअनुसार कडा रूपमा अघि बढिने बताए । उनले सामुदायिक वनको संरक्षण सरकार, सुरक्षा निकाय र स्थानीय समुदायको साझा दायित्व भएकाले वन अतिक्रमण गर्ने कार्यविरुद्ध निरन्तर अभियान सञ्चालन गरिने उल्लेख गरे ।

डिभिजन वन कार्यालयका अनुसार यसअघि पनि उक्त अतिक्रमित क्षेत्रमा वृक्षारोपण गरिएको थियो। तर पुनः वन क्षेत्र जोतेर खेती गरिएको पाइएपछि तत्काल संयुक्त टोली परिचालन गरी अतिक्रमण हटाइएको हो ।

वन संरक्षण अभियानलाई प्रभावकारी बनाउन डिभिजनल वन अधिकृत ठाकुरले सुरक्षा निकाय र स्थानीय सरोकारवालासँगको समन्वयलाई अझ सुदृढ बनाउने तथा अतिक्रमित वन क्षेत्रको पुनःस्थापना अभियानलाई निरन्तरता दिने प्रतिबद्धता व्यक्त गरेका छन् ।

रौतहट, साउन ०९ गते । रौतहट जिल्ला अदालत बार एसोसिएसन, गौरको नयाँ कार्यसमिति चयनका लागि आज निर्वाचन भइरहेको छ। ६६ जना मतदाता रहेको उक्त संस्थामा ९ सदस्यीय कार्यसमितिका पदाधिकारी चयन गर्न १६ जना उम्मेदवार चुनावी प्रतिस्पर्धामा उत्रिएका छन्।

निर्वाचनमा अध्यक्ष पदका लागि अधिवक्ता लालबाबु राय यादव र अधिवक्ता हेमचन्द्र लाल कर्ण नेतृत्वका दुई समूहबीच मुख्य प्रतिस्पर्धा भइरहेको छ। दुवै पक्षले आफ्नो समूहको जित सुनिश्चित गर्न मतदातासँग अन्तिम चरणको भेटघाट र समन्वयलाई तीव्र बनाएका छन्।

कानुन व्यवसायीहरूको साझा संस्था बार एसोसिएसनको नयाँ नेतृत्वले संस्थागत विकास, पेशागत हकहितको संरक्षण तथा न्यायिक क्षेत्रको प्रभावकारी समन्वयमा महत्वपूर्ण भूमिका निर्वाह गर्ने अपेक्षा गरिएको छ। निर्वाचन शान्तिपूर्ण र मर्यादित वातावरणमा सम्पन्न हुने विश्वास गरिएको छ।

निर्वाचनबाट विजयी हुने सम्पूर्ण पदाधिकारीहरूलाई सफल कार्यकालका लागि हार्दिक बधाई तथा शुभकामना व्यक्त गर्दै, संस्थाको गरिमा अभिवृद्धि, कानुन व्यवसायीहरूको हकहित संरक्षण तथा न्यायिक सेवाको सुदृढीकरणमा उल्लेखनीय योगदान पुर्‍याउन सफल रहून् भन्ने कामना गरिएको छ।

काठमाडौँ । जल तथा मौसम विज्ञान विभाग अन्तर्गत मौसम पूर्वानुमान महाशाखाले हाल देशभर मनसुनी वायूको प्रभाव रहेको र हाल मनसुनको न्यून चापीय रेखा सरदर स्थानमा रहेको जनाएको छ ।

हाल देशको हिमाली र पहाडी भू-भागमा साधारणतया बादल लागेको छ भने तराई भू-भागमा आंशिक बादल लागेको छ । कोशी, बागमती, गण्डकी, कर्णाली र सुदूरपश्चिम प्रदेशका एक-दुई स्थानमा हल्का वर्षा भैरहेको छ।

हाल दिउँसो देशको हिमाली र पहाडी भूभागमा  साधारणतया बादल लाग्ने र तराई भूभागमा आंशिक बादल लाग्नेछ।  देशका हिमाली र पहाडी भू-भागका केही स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ । बागमती, गण्डकी र लुम्बिनी प्रदेशका तराईका थोरै स्थान तथा  कोशी, मधेश र सुदूरपश्चिम प्रदेशका तराई भू-भागका एक-दुई  स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ ।

त्यस्तै आज राति देशभर साधारणतया बादल लाग्नेछ। देशका हिमाली र पहाडी भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ। कोशी, बागमती, गण्डकी, लुम्बिनी र सुदूरपश्चिम प्रदेशका तराईका थोरै स्थान तथा मधेश प्रदेशको तराई भू-भागका एक दुई स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ ।एभरेष्ट न्यूज एजेन्सी

आजको राशिफल बिस २०८३ साउन ९ गते शनिबार ईस २०२६ जुलाई २५ नेपाल सम्बत ११४६ दिल्लाथ्व एकादशी, रौद्र नाम संवत्सर सूर्य दक्षिणायन, वर्षा ऋतु, असार शुक्ल एकादशी, चन्द्रमा वृश्चिक राशिमा, ज्येष्ठा नक्षत्र, ब्रह्मा योग, विष्टि करण । आज नेपालमा सुर्योदय बिहान ५ बजेर २३ मिनेटमा र सूर्यास्त साँझ ६ बजेर ५९ मिनेटमा बजे हुनेछ ।

आज जन्म लिने बच्चा वृश्चिक राशीको हुनेछ । आज आज हरिशयनी एकादशी, घर घरमा तुलसी रोपेर मनाईदै छ भने आज विश्व आईभीएफ दिवस परेको छ ।

मेष (चु, चे, चो, ला, लि, लु, ले, लो, अ) –

आजको दिन नयाँ सम्भावनाको ढोका खोल्ने दिनका रूपमा देखिएको छ। बिहानदेखि नै मनमा नयाँ उत्साह जाग्नेछ र विगतदेखि अधुरा रहेका काम पूरा गर्ने प्रेरणा मिल्नेछ। कार्यक्षेत्रमा तपाईंको मेहनत, समयको सही व्यवस्थापन र निर्णय क्षमताको प्रशंसा हुनेछ। जिम्मेवारी बढे पनि त्यसलाई सफलतापूर्वक पूरा गर्न सक्नुहुनेछ। व्यापार–व्यवसायमा नयाँ ग्राहक वा साझेदारसँग सहकार्यको अवसर प्राप्त हुन सक्छ। आर्थिक पक्षमा सुधार आउने संकेत छ र रोकिएको रकम प्राप्त हुने सम्भावना पनि देखिन्छ। परिवारमा हाँसो, खुसी र आपसी विश्वासको वातावरण रहनेछ। साथीभाइसँगको भेटघाटले नयाँ योजना बनाउन प्रेरणा दिनेछ। स्वास्थ्य राम्रो रहनेछ। नियमित व्यायाम र पर्याप्त विश्रामले थप स्फूर्ति प्रदान गर्नेछ।

वृष (इ, उ, ए, ओ, वा, वि, वु, वे, वो) –

आज धैर्य र विवेकले तपाईंलाई सही दिशामा अघि बढाउनेछ। कार्यक्षेत्रमा पुराना अनुभव उपयोगी सावित हुनेछन् र वरिष्ठ व्यक्तिको विश्वास प्राप्त हुनेछ। सहकर्मीहरूसँगको समन्वय उत्कृष्ट रहनेछ। व्यापार–व्यवसायमा नियमित लाभ मिल्नेछ र नयाँ सम्झौताले भविष्यका लागि राम्रो आधार तयार गर्न सक्छ। आर्थिक रूपमा सन्तुलन कायम रहनेछ। खर्चमा नियन्त्रण गर्न सके बचत बढ्ने सम्भावना छ। परिवारका सदस्यहरूसँग आत्मीय सम्बन्ध अझ बलियो बन्नेछ। प्रियजनसँगको संवादले मनलाई शान्ति दिनेछ। स्वास्थ्य राम्रो रहनेछ र मानसिक रूपमा पनि सन्तुष्टि महसुस हुनेछ।

मिथुन (का, कि, कु, घ, ङ, छ, के, को, ह) –

आज तपाईंको चतुर व्यवहार, सिर्जनशील सोच र प्रभावकारी अभिव्यक्तिले धेरैको ध्यान आकर्षित गर्नेछ। अध्ययन, लेखन, सञ्चार, शिक्षण तथा सिर्जनात्मक क्षेत्रमा विशेष उपलब्धि हासिल गर्न सक्नुहुनेछ। कार्यक्षेत्रमा नयाँ अवसर प्राप्त हुनेछ र आफ्नो क्षमता प्रदर्शन गर्ने मौका पनि मिल्नेछ। आर्थिक रूपमा आम्दानी बढ्ने सम्भावना देखिन्छ। साथीभाइ तथा सहकर्मीको सहयोगले कठिन काम पनि सहज रूपमा सम्पन्न हुनेछ। परिवारसँग रमाइलो समय बित्नेछ। सामाजिक क्षेत्रमा नयाँ सम्बन्ध विस्तार हुनेछ। स्वास्थ्य राम्रो रहनेछ र दिनभर सकारात्मक ऊर्जा कायम रहनेछ।

कर्कट (हि, हु, हे, हो, डा, डि, डु, डे, डो) –

आज परिवारसँग बिताएको समयले मनमा विशेष आनन्द ल्याउनेछ। घरमा सुखद वातावरण रहनेछ र परिवारका सदस्यहरूको सहयोगले आत्मविश्वास बढ्नेछ। कार्यक्षेत्रमा तपाईंको जिम्मेवारीबोध, इमानदारी र लगनशीलताको प्रशंसा हुनेछ। रोकिएका काम पूरा हुनेछन् र नयाँ योजना अघि बढाउन अनुकूल समय रहनेछ। आर्थिक अवस्थामा सामान्य सुधार आउने संकेत देखिन्छ। घरपरिवारसँग सम्बन्धित कुनै शुभ कार्यको चर्चा हुन सक्छ। स्वास्थ्य राम्रो रहनेछ र मानसिक रूपमा पनि शान्ति तथा सन्तुलन कायम रहनेछ।

सिंह (मा, मि, मु, मे, मो, टा, टि, टु, टे) –

आज आत्मविश्वास, साहस र नेतृत्व क्षमताले तपाईंलाई उल्लेखनीय सफलता दिलाउनेछ। कार्यक्षेत्रमा वरिष्ठ व्यक्तिको विश्वास जित्न सफल हुनुहुनेछ। नयाँ जिम्मेवारी वा अवसर प्राप्त हुने सम्भावना छ। व्यापार–व्यवसायमा राम्रो लाभ हुने संकेत देखिन्छ। आर्थिक अवस्था बलियो बन्दै जानेछ। सामाजिक क्षेत्रमा प्रतिष्ठा र सम्मान बढ्नेछ। परिवारको साथ र प्रोत्साहनले मनोबल उच्च रहनेछ। नयाँ चिनजान भविष्यमा लाभदायक बन्न सक्छ। स्वास्थ्य राम्रो रहनेछ र शरीरमा दिनभर स्फूर्ति कायम रहनेछ।

कन्या (टो, प, पि, पु, ष, ण, ठ, पे, पो) –

आज अध्ययन, अनुसन्धान, तालिम तथा नयाँ ज्ञान प्राप्त गर्ने कार्यमा राम्रो सफलता हासिल हुनेछ। कार्यक्षेत्रमा अनुशासन, लगनशीलता र निरन्तर प्रयासका कारण उत्कृष्ट परिणाम प्राप्त हुनेछ। आर्थिक अवस्था सन्तुलित रहनेछ। खर्च गर्दा आवश्यकताअनुसार योजना बनाएर अघि बढ्नु राम्रो हुनेछ। परिवारमा आपसी समझदारी बढ्नेछ। छोटो दूरीको यात्रा वा आवश्यक भेटघाट लाभदायक बन्न सक्छ। नयाँ सीपले भविष्यमा प्रगतिको ढोका खोल्नेछ। स्वास्थ्य राम्रो रहनेछ र नियमित जीवनशैलीले शरीरलाई स्फूर्त बनाइराख्नेछ।

तुला (रा, रि, रु, रे, रो, ता, ति, तु, ते) –

आज आर्थिक क्षेत्रमा सकारात्मक परिवर्तन आउने सम्भावना बलियो देखिन्छ। रोकिएको रकम प्राप्त हुन सक्छ वा आम्दानीको नयाँ स्रोत फेला पर्न सक्छ। व्यापार–व्यवसायमा लाभ बढ्नेछ। कार्यक्षेत्रमा सहकार्य र समन्वय उत्कृष्ट रहनेछ। नयाँ योजना सफल हुने सम्भावना देखिन्छ। परिवारसँग रमाइलो समय बित्नेछ। सामाजिक क्षेत्रमा नयाँ सम्बन्ध स्थापित हुनेछ, जसले भविष्यमा राम्रो अवसर सिर्जना गर्न सक्छ। स्वास्थ्य राम्रो रहनेछ र मानसिक रूपमा पनि उत्साह कायम रहनेछ।

वृश्चिक (तो, ना, नि, नु, ने, नो, या, यि, यु) –

आज मेहनत, धैर्य र अनुभवले तपाईंलाई राम्रो उपलब्धि दिलाउनेछ। कार्यक्षेत्रमा तपाईंको कामको प्रशंसा हुनेछ र नयाँ जिम्मेवारी प्राप्त हुने सम्भावना पनि छ। प्रतिस्पर्धात्मक क्षेत्रमा सफलता हात लाग्न सक्छ। व्यापार–व्यवसायमा लाभ हुने संकेत देखिन्छ। आर्थिक रूपमा सुधार आउने सम्भावना छ। परिवारमा विश्वास, प्रेम र आत्मीयता बढ्नेछ। प्रियजनसँगको सम्बन्ध अझ प्रगाढ बन्नेछ। स्वास्थ्य राम्रो रहनेछ र मानसिक रूपमा पनि आत्मविश्वास तथा ऊर्जा बढ्नेछ।

धनु (ये, यो, भ, भि, भु, ध, फा, ढ, भे) –

आज सकारात्मक सोच र उत्साहले तपाईंलाई नयाँ उपलब्धितर्फ डोर्‍याउनेछ। व्यापार, अध्ययन, वैदेशिक क्षेत्र वा यात्रासँग सम्बन्धित काममा शुभ संकेत देखिन्छ। कार्यक्षेत्रमा तपाईंको मेहनतको उचित मूल्यांकन हुनेछ। आर्थिक अवस्थामा सुधार आउने सम्भावना बलियो छ। परिवारका सदस्यहरूसँगको सम्बन्ध थप आत्मीय बन्नेछ। सामाजिक क्षेत्रमा प्रतिष्ठा र सम्मान बढ्नेछ। नयाँ योजना सुरु गर्न तथा भविष्यका लक्ष्य निर्धारण गर्न दिन अत्यन्त शुभ रहनेछ। स्वास्थ्य राम्रो रहनेछ र मन प्रसन्न रहनेछ।

मकर (भो, ज, जि, खि, खु, खे, खो, गा, गि) –

आज जिम्मेवारी केही बढे पनि योजनाबद्ध रूपमा अघि बढ्दा सबै काम सफलतापूर्वक सम्पन्न हुनेछन्। कार्यक्षेत्रमा वरिष्ठ व्यक्तिको सहयोग र मार्गदर्शन प्राप्त हुनेछ। आर्थिक रूपमा खर्च नियन्त्रण गर्न सके बचत बढ्नेछ। परिवारका सदस्यहरूको सुझावले महत्त्वपूर्ण निर्णय लिन सहयोग पुर्‍याउनेछ। घरमा सुखद वातावरण कायम रहनेछ। स्वास्थ्यमा सामान्य थकान महसुस हुन सक्ने भएकाले पर्याप्त विश्राम गर्नु आवश्यक हुनेछ। दिनको अन्त्यमा प्राप्त उपलब्धिले आत्मविश्वास र सन्तुष्टि दुवै बढाउनेछ।

कुम्भ (गु, गे, गो, सा, सि, सु, से, सो, द) –

आज सिर्जनशील सोच, नवीन योजना र सकारात्मक दृष्टिकोणले तपाईंलाई नयाँ सफलतातर्फ अघि बढाउनेछ। कार्यक्षेत्रमा रोकिएका काम सम्पन्न हुनेछन्। नयाँ अवसर प्राप्त हुने सम्भावना बलियो छ। साथीभाइ तथा सहकर्मीको सहयोगले महत्त्वपूर्ण काम सहज रूपमा पूरा हुनेछ। आर्थिक पक्षमा सुधार आउने संकेत देखिन्छ। परिवारमा प्रेम, मेलमिलाप र समझदारी बढ्नेछ। सामाजिक क्षेत्रमा नयाँ सम्बन्ध विस्तार हुनेछ, जसले भविष्यमा लाभ पुर्‍याउन सक्छ। स्वास्थ्य राम्रो रहनेछ र दिनभर उत्साह तथा स्फूर्ति कायम रहनेछ।

मीन (दि, दु, थ, झ, ञ, दे, दो, च, ची) –

आज धैर्य, संयम र सकारात्मक सोचले तपाईंलाई राम्रो उपलब्धितर्फ अघि बढाउनेछ। सुरुवातमा केही काममा ढिलाइ भए पनि अन्ततः सफलता प्राप्त हुनेछ। कार्यक्षेत्रमा आफ्नो अनुभव, सीप र मेहनतको उचित उपयोग गर्न सक्नुहुनेछ। आर्थिक रूपमा सोचविचार गरेर खर्च गर्नु उपयुक्त हुनेछ। बचत गर्ने अवसर पनि प्राप्त हुनेछ। परिवारको साथ र सहयोगले मनोबल बढ्नेछ। पुराना अधुरा काम पूरा हुने सम्भावना बलियो छ। साँझतिर प्राप्त हुने शुभ समाचारले भविष्यप्रति नयाँ आशा, उत्साह र आत्मविश्वास थप्नेछ। स्वास्थ्य राम्रो रहनेछ र मानसिक रूपमा पनि शान्ति, सन्तुलन तथा सकारात्मक ऊर्जा कायम रहनेछ ।एभरेष्ट न्यूज एजेन्सी

आरके श्रीवास्तव,रा‌ैतहट,०७ गते साउन ।
रौतहटकाे फतुवा विजयपुर नगरपालिका–११ अन्तर्गत पर्ने राङगी, बुटवा, भैसहीलगायतका गाउँहरूमा केही अनधिकृत व्यक्तिहरूले एलानी तथा वन क्षेत्रको जग्गा खनजोत तथा उपभोगको अनुमति दिलाइदिने भन्दै प्रत्येक घरधुरीबाट रु. १,००० का दरले रकम असुलेको भन्ने आरोप सार्वजनिक भएपछि उक्त विषयले स्थानीय स्तरमा चासोको विषय बनेको छ ।

उक्त घटनाप्रति गम्भीर ध्यानाकर्षण जनाउँदै रौतहट क्षेत्र नं. ३ का संघीय सांसद माननीय रविन्द्र पटेल (धिरज) ले प्रमुख जिल्ला अधिकारी दिनेश सागर भुसालसमक्ष तत्काल घटनाको निष्पक्ष छानबिन गरी संलग्न दोषी व्यक्तिहरूमाथि प्रचलित कानुनबमोजिम कडा कारबाही गर्न आग्रह गर्नुभएको छ ।

सांसद पटेलले जनतालाई झुक्याएर वा कानुनविपरीत कुनै पनि प्रकारको रकम असुल गर्ने कार्य अस्वीकार्य भएको उल्लेख गर्दै सत्यतथ्य अनुसन्धान गरी दोषी जोसुकै भए पनि कानुनी दायरामा ल्याउन प्रशासनलाई अनुरोध गर्नुभएको छ ।

स्थानीय बासिन्दाले पनि घटनाको निष्पक्ष छानबिन गरी अवैध रूपमा रकम असुल गर्ने प्रवृत्तिको अन्त्य गर्न तथा पीडितलाई न्याय दिलाउन सम्बन्धित निकायसँग माग गरेका छन् ।

बर्दिबास, महोत्तरी

नेपाल राहत शिक्षक मधेश प्रदेश समितिको एक महत्त्वपूर्ण आकस्मिक बैठक महोत्तरीको बर्दिबासस्थित श्री देउराली माध्यमिक विद्यालयको प्राङ्गणमा सम्पन्न भएको छ। मधेश प्रदेश समितिका अध्यक्ष गंगा प्रसाद यादवको अध्यक्षतामा बसेको उक्त बैठकले देशैभरिका राहत शिक्षकहरूको आन्दोलन, साङ्गठनिक सुदृढीकरण र भावी रणनीतिका सम्बन्धमा निकै दूरगामी र रणनीतिक निर्णयहरू पारित गरेको छ।

विद्यालय शिक्षा विधेयक र राहत शिक्षकहरूका समसामयिक मुद्दाहरूमाथि केन्द्रित रहँदै डाकिएको यस आकस्मिक बैठकले शिक्षकहरूबीचको आन्तरिक एकता र सङ्गठन विस्तारलाई मुख्य प्राथमिकतामा राखेको छ।

कोशी प्रदेशको एकता बैठकप्रति ऐक्यबद्धता र मधेशको वैकल्पिक रणनीति

बैठकले आगामी साउन ९ गते आयोजना हुन गइरहेको कोशी प्रदेशको एकता बैठकको पूर्ण सफलताको कामना गर्दै ऐक्यबद्धता जनाएको छ। राहत शिक्षकहरूलाई एउटै छातामुनि ल्याउनका लागि कोशी प्रदेशमा हुन लागेको यो बैठक निकै अर्थपूर्ण रहने विश्वास समितिले व्यक्त गरेको छ।

तर, कोशी प्रदेशको एकता बैठक कुनै प्राविधिक वा आन्तरिक कारणवश सफल हुन नसकेको खण्डमा मधेश प्रदेश समिति मूकदर्शक बनेर नबस्ने निर्णय बैठकले गरेको छ। यदि कोशीको बैठक सफल भएन भने मधेश प्रदेश समिति आफैँले अग्रसरता लिँदै देशैभरिका राहत शिक्षकहरूलाई गोलबद्ध गर्नका लागि भव्य ‘एकता बैठक’ को आयोजना गर्ने र आन्दोलनको नेतृत्व आफ्नो काँधमा लिने वैकल्पिक दृढता समेत बैठकले पारित गरेको छ।

साउन ९ गते मधेशका आठै जिल्लामा एकैसाथ जिल्ला भेलाको आह्वान

साङ्गठनिक जगलाई गाउँ र नगर स्तरसम्म सक्रिय र मजबुत बनाउने उद्देश्यका साथ बैठकले आगामी साउन ९ गते नै मधेश प्रदेशका अन्तर्गत पर्ने आठवटै जिल्लाहरूमा बृहत् जिल्ला भेलाहरू सम्पन्न गराउने निर्णय गरेको छ। सो तोकिएको मितिमा जिल्ला भेलाहरू भव्य, व्यवस्थित र जनसहभागितामूलक रूपमा सम्पन्न गराउनका लागि मधेश प्रदेशका सबै जिल्ला अध्यक्षहरूलाई विशेष जिम्मेवारी सुम्पिँदै आवश्यक तयारी तीव्र पार्न अनुरोध गरिएको छ। यस भेलाले जिल्ला तहमा रहेका राहत शिक्षकहरूलाई आउँदो केन्द्रिकृत आन्दोलनका लागि तयार पार्ने लक्ष्य लिएको छ।

केन्द्रीय नेतृत्व र शिक्षकहरूको व्यापक सहभागिता

आकस्मिक रूपमा डाकिए तापनि बैठकमा केन्द्रीय नेतृत्वको बाक्लो उपस्थिति रहेको थियो। बैठकमा नेपाल राहत शिक्षक केन्द्रीय समितिका उपाध्यक्ष शिव शंकर कामती, केन्द्रीय सदस्यद्वय जितेन्द्र झा र युवराज लगायतका शीर्ष नेताहरूको विशेष उपस्थिति रहेको थियो। त्यसैगरी, मधेश प्रदेश समितिका प्रदेश पदाधिकारीहरू, मधेशका आठवटै जिल्लाका जिल्ला अध्यक्षहरू तथा बर्दिबास नगरपालिका भित्रका विभिन्न विद्यालयहरूमा कार्यरत राहत शिक्षकहरूको उल्लेखनीय सहभागिता रहेको थियो। बैठकमा सहभागी शिक्षकहरूले राहत शिक्षकहरूलाई स्थायी गरिनुपर्ने, विगतका सहमतिहरू अक्षरशः पालना हुनुपर्ने र राज्यले शिक्षकहरूमाथि गरिरहेको विभेद अन्त्य हुनुपर्ने जस्ता समसामयिक मुद्दाहरूमा आफ्ना धारणाहरू राखेका थिए।

काठमाडौँ । भारतका सामाजिक अभियन्ता सोनम वाङचुकले २६ दिन लामो अनशन अन्त्य गरेका छन् । भारतका केन्द्रीय मन्त्री जगतप्रकाश नड्डा र डा. जितेन्द्र सिंहसँग भएको छलफलपछि उनले गएराती अनशन तोडेको जनाएका छन् ।

वाङचुकले सामाजिक सञ्जालमार्फत दिएको जानकारीअनुसार लेह-लद्दाखको शीर्ष नेतृत्वको उपस्थितिमा विभिन्न चरणको लामो वार्तापछि उनले देशमा सम्भावित हिंसात्मक अवस्था टार्ने उद्देश्यले अनशन अन्त्य गर्ने निर्णय गरेका हुन् ।

उनका अनुसार अनशनका क्रममा विभिन्न राजनीतिक दलका ६५ सांसदले प्रत्यक्ष भेटघाट वा पत्रमार्फत अनशन अन्त्य गर्न आग्रह गरेका थिए । ती आग्रह र सरकारसँग भएका सहमतिका आधारमा उनले २६ दिनपछि अनशन तोडेको बताएका छन् ।

यसअघि विपक्षी दलका सांसदहरूको प्रतिनिधिमण्डल पनि वाङचुकलाई भेट्न पुगेको थियो । उनीहरूले समेत स्वास्थ्य अवस्थालाई ध्यानमा राख्दै अनशन अन्त्य गर्न आग्रह गरेका थिए ।

यसैबीच, ‘ककरोच जनता पार्टी’का संस्थापक अध्यक्ष अभिजित दिपकेले वाङचुकले अनशन अन्त्य गरेको खबरले राहत महसुस भएको बताएका छन् । उनले २६ दिनसम्मको कठिन अनशनपछि वाङचुकले आन्दोलनको यो चरण समाप्त गरेकोमा आभार व्यक्त गरेका छन् ।

दिपकेले आफ्नो सामाजिक सञ्जाल सन्देशमा जन्तरमन्तरमा जारी पार्टीको शान्तिपूर्ण प्रदर्शन भने धर्मेन्द्र प्रधानले राजीनामा नदिएसम्म निरन्तर जारी रहने बताएका छन् ।

पार्टीका मुख्य प्रवक्ता सौरभ दासले सरकारसँगको सहमतिअनुसार शुक्रबार तटस्थ स्थानमा छलफल आयोजना गरिएको जानकारी दिएका छन् । उनका अनुसार उक्त छलफलका लागि भारतको संविधान क्लबलाई स्थलका रूपमा चयन गरिएको छ ।एभरेष्ट न्यूज एजेन्सी

काठमाडौँ । आज राष्ट्रिय सभा अन्तर्गतका तीन समितिको बैठक बस्दैछ ।

आज संघीयता सबलीकरण तथा राष्ट्रिय सरोकार समिति, विकास, आर्थिक मामिला तथा सुशासन समिति र विधायन व्यवस्थापन समितिको बैठक बस्दैछ ।

आज दिउसो साढे २ बजे बस्ने संघीयता सबलीकरण तथा राष्ट्रिय सरोकार समितिको बैठकमा दक्षिणी सीमा क्षेत्रका नागरिकको शान्ति सुरक्षा सम्बन्धमा छलफलको कार्यसूची रहेको छ ।

त्यस्तै बिहान ११ बजेदेखि बस्ने विकास, आर्थिक मामिला तथा सुशासन समितिको बैठकमा समितिको आर्थिक बर्ष २०८३/०८४ को बार्षिक कार्ययोजना तयारीका सम्बन्धमा छलफलको कार्यसूची रहेको छ ।

त्यस्तै बिहान ११ बजेदेखि बस्ने विधायन व्यवस्थापन समितिको बैठकमा अभिमुखीकरण कार्यक्रम बारे छलफलको कार्यसूची रहेको समितिले जानकारी दिएको छ ।एभरेष्ट न्यूज एजेन्सी

काठमाडौँ । नेपाली कांग्रेसले भारतीय जेलमा रहेका सर्लाहीका दुई नेपाली किसानको तत्काल रिहाइका लागि आवश्यक कूटनीतिक पहल गर्न सरकारसँग माग गरेको छ । साथै, देशभर देखिएको रासायनिक मलको अभाव तत्काल समाधान गर्न पनि सरकारको गम्भीर ध्यानाकर्षण गराएको छ ।

कांग्रेसले विज्ञप्ति जारी गर्दै सर्लाहीको बलरा नगरपालिकाका कृषक सुरेशप्रसाद सिंह र नागेन्द्रप्रसाद सिंह भारतीय सीमावर्ती बजार सोनवरसाबाट आफ्नो खेतीका लागि रासायनिक मल खरिद गरी फर्किने क्रममा भारतीय सुरक्षा निकायबाट पक्राउ परेको विभिन्न सञ्चारमाध्यममा आएको समाचारप्रति गम्भीर चासो व्यक्त गरेको हो ।

विज्ञप्तिअनुसार दुवै किसानलाई विगत २० दिनदेखि भारतको बिहार राज्यस्थित सीतामढीको डुमरा कारागारमा राखिएको छ । घटनाबारे वास्तविकता बुझ्न कांग्रेसले पीडित परिवार तथा स्थानीय समुदायसँग पनि जानकारी लिएको जनाएको छ ।

कांग्रेसका अनुसार ती किसान आफ्नै खेतमा प्रयोग गर्ने उद्देश्यले दुई बोरा युरिया र डिएपी मल खरिद गर्न भारत गएका थिए । नेपालमा समयमै रासायनिक मल उपलब्ध नभएका कारण उनीहरू सीमापारबाट मल ल्याउन बाध्य भएको पार्टीको भनाइ छ ।

कांग्रेसले सरकारले किसानलाई समयमै मल उपलब्ध गराउन नसक्दा उनीहरू यस्तो अवस्थाको सामना गर्न बाध्य भएको उल्लेख गर्दै, “मल गोदाममा, किसान जेलमा” भन्ने अवस्था अत्यन्त विडम्बनापूर्ण भएको टिप्पणी गरेको छ ।

पार्टीले किसानहरूको रिहाइका लागि व्यवहारिक, कूटनीतिक र कानुनी माध्यमबाट तत्काल पहल गर्न सरकारसँग आग्रह गरेको छ। साथै, भारत सरकारसँग पनि नेपाल–भारतबीचको ऐतिहासिक मित्रता, खुला सीमा, पारस्परिक विश्वास र दुई देशका नागरिकबीचको आत्मीय सम्बन्धलाई ध्यानमा राखी खेतीका लागि मल खरिद गर्ने क्रममा पक्राउ परेका नेपाली किसानलाई अविलम्ब रिहा गर्न अनुरोध गरेको छ ।

कांग्रेसले नेपाल–भारत सम्बन्ध केवल दुई सरकारबीच सीमित नरही दुई देशका जनताबीचको ऐतिहासिक, सांस्कृतिक र सामाजिक सम्बन्धमा आधारित रहेको उल्लेख गर्दै यस्ता संवेदनशील विषयलाई सोही भावना अनुरूप समाधान गर्न दुवै सरकारसँग आग्रह गरेको छ।एभरेष्ट न्यूज एजेन्सी