काठमाडौँ । राष्ट्रिय सभाको बैठक आज अपराह्न १स् १५ बजे बस्ने भएको छ । बैठकमा प्रश्नोत्तर, ध्यानाकर्षण प्रस्ताव तथा शोक प्रस्ताव प्रस्तुत हुने कार्यसूची रहेको छ ।
बैठकमा गृह मन्त्री सुधन गुरुङले गृह मन्त्रालयसँग सम्बन्धित मौखिक प्रश्नहरूको उत्तर दिने कार्यक्रम रहेको छ । त्यसैगरी शिक्षा तथा खेलकुद मन्त्री सस्मित पोखरेलले पनि मन्त्रालयसँग सम्बन्धित मौखिक प्रश्नहरूको जवाफ दिनेछन् ।
यस्तै, राष्ट्रिय सभा सदस्य कमला पन्तले ‘मनसुनजन्य विपद् व्यवस्थापनमा सरकारको पूर्वतयारी’ सम्बन्धमा गृह मन्त्रीको ध्यानाकर्षण गराउने प्रस्ताव प्रस्तुत गर्ने कार्यसूचीमा समावेश छ ।
यसैगरी बैठकमा संविधान सभा सदस्य, प्रतिनिधि सभाका पूर्व सदस्य तथा पूर्व उपप्रधानमन्त्री गोपालमान श्रेष्ठको निधनप्रति श्रद्धाञ्जलि व्यक्त गर्दै राष्ट्रिय सभा अध्यक्षले शोक प्रस्ताव प्रस्तुत गर्ने कार्यक्रम रहेको छ । एभरेष्ट न्यूज एजेन्सी
काठमाडौँ । जल तथा मौसम विज्ञान विभाग अन्तर्गत मौसम पूर्वानुमान महाशाखाले हाल देशभर मनसुनी वायुको प्रभाव रहेको र हाल मनसुनको न्यून चापीय रेखा सरदर स्थानको आसपासमा रहेको जानकारी दिएको छ ।
हाल कोशी, बागमती, गण्डकी, कर्णाली र सुदूरपश्चिम प्रदेशका सबै भूभाग तथा लुम्बिनी प्रदेशको पहाडी भूभागमा साधारणतया बादल लागेको छ भने मधेश प्रदेश र लुम्बिनी प्रदेशको तराई भूभागमा आंशिक बादल लागेको छ । कोशी, बागमती, कर्णाली र सुदूरपश्चिम प्रदेशको पहाडी भूभागको थोरै स्थान तथा गण्डकी प्रेदशको पहाडी भूभागको एक दुई स्थानमा हल्का देखि मध्यम वर्षा भइरहेको छ ।
आज दिउँसो देशभर साधारणतया बादल लाग्नेछ। देशका हिमाली र पहाडी भू-भागका केही स्थानमा मध्यमसम्मको वर्षा/हिमपातको सम्भावना छ। तराई भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। बागमती, गण्डकी र कर्णाली प्रदेशका पहाडी भू-भागका एक-दुई स्थानमा भारी वर्षाको सम्भावना छ ।
त्यस्तै आज राति देशभर साधारणतया बादल लाग्नेछ। देशको हिमाली भू-भागका थोरै स्थानमा मध्यमसम्मको वर्षा/हिमपातको सम्भावना छ। मधेश प्रदेश तथा कोशी, बागमती र गण्डकी प्रदेशका पहाडी र तराई भू-भागका केही स्थान तथा लुम्बिनी, कर्णाली र सुदूरपश्चिम प्रदेशका पहाडी र तराई भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। कोशी प्रदेशको पहाडी र तराई भू-भाग, बागमती र गण्डकी प्रदेशका पहाडी भू-भागका एक-दुई स्थानमा भारी वर्षाको सम्भावना छ ।एभरेष्ट न्यूज एजेन्सी
आजको राशिफल बिस २०८३ साउन १५ गते शुक्रबार ईस २०२६ जुलाई ३१ नेपाल सम्बत ११४६ दिल्लाथ्व द्वितीया, रौद्र नाम संवत्सर सूर्य दक्षिणायन, वर्षा ऋतु, असार शुक्ल द्वितीया, चन्द्रमा मकर राशिमा, घनिष्ठ नक्षत्र, सौभाग्य योग, तैतिल करण । आज नेपालमा सुर्योदय बिहान ५ बजेर २६ मिनेटमा र सूर्यास्त साँझ ६ बजेर ५५ मिनेटमा बजे हुनेछ ।
आज जन्म लिने बच्चा मकर राशीको हुनेछ । आज साउन १५, खीर खाने दिन परेको छ ।
मेष (चु, चे, चो, ला, लि, लु, ले, लो, अ) –
आजको दिन नयाँ अवसर र सकारात्मक परिवर्तनको संकेत बोकेको छ। बिहानदेखि नै मनमा उत्साह बढ्नेछ र अधुरा रहेका काम पूरा गर्ने प्रेरणा मिल्नेछ। कार्यक्षेत्रमा तपाईंको सक्रियता, नेतृत्व क्षमता र समयमै निर्णय गर्ने बानीले राम्रो सफलता दिलाउनेछ। वरिष्ठ व्यक्तिको विश्वास जित्न सफल हुनुहुनेछ। व्यापार–व्यवसायमा नयाँ ग्राहक वा साझेदारीको सम्भावना देखिन्छ। आर्थिक रूपमा आम्दानी बढ्ने संकेत छ र पुरानो लगानीबाट पनि लाभ प्राप्त हुन सक्छ। परिवारमा सुख, शान्ति र आत्मीयता कायम रहनेछ। प्रियजनसँगको भेटघाटले मनलाई आनन्दित बनाउनेछ। स्वास्थ्य राम्रो रहनेछ। नियमित व्यायाम र सन्तुलित भोजनले थप स्फूर्ति प्रदान गर्नेछ।
वृष (इ, उ, ए, ओ, वा, वि, वु, वे, वो) –
आज धैर्य, संयम र व्यवहारिक सोचले तपाईंलाई सही निर्णय लिन सहयोग गर्नेछ। कार्यक्षेत्रमा सहकर्मी र वरिष्ठ व्यक्तिको साथले महत्त्वपूर्ण काम समयमै सम्पन्न हुनेछ। विगतदेखि रोकिएका योजनाले गति लिन सक्छन्। व्यापार–व्यवसायमा नियमित लाभ कायम रहनेछ। आर्थिक रूपमा खर्च र आम्दानीबीच राम्रो सन्तुलन रहनेछ। बचत गर्ने योजनाले भविष्यलाई थप सुरक्षित बनाउनेछ। परिवारका सदस्यहरूसँग आत्मीय सम्बन्ध अझ बलियो बन्नेछ। सामाजिक भेटघाटले नयाँ अवसरको ढोका खोल्न सक्छ। स्वास्थ्य राम्रो रहनेछ र मानसिक रूपमा शान्ति अनुभव हुनेछ।
मिथुन (का, कि, कु, घ, ङ, छ, के, को, ह) –
आज तपाईंको सिर्जनशीलता, चतुर व्यवहार र स्पष्ट अभिव्यक्तिले धेरैको मन जित्नेछ। अध्ययन, लेखन, सञ्चार, शिक्षण तथा सिर्जनात्मक क्षेत्रमा लागेकाहरूका लागि दिन उपलब्धिमूलक रहनेछ। कार्यक्षेत्रमा आफ्नो प्रतिभा देखाउने अवसर प्राप्त हुनेछ। आर्थिक रूपमा अतिरिक्त आम्दानीको सम्भावना देखिन्छ। नयाँ सम्पर्क र चिनजान भविष्यमा लाभदायक बन्न सक्छ। साथीभाइको सहयोगले महत्त्वपूर्ण योजना सफल हुनेछ। परिवारसँग रमाइलो समय बित्नेछ। स्वास्थ्य राम्रो रहनेछ। मानसिक रूपमा आत्मविश्वास र उत्साह दुवै बढ्नेछ।
कर्कट (हि, हु, हे, हो, डा, डि, डु, डे, डो) –
आज पारिवारिक जीवनमा सुखद वातावरण कायम रहनेछ। परिवारका सदस्यहरूसँगको सम्बन्ध अझ सुमधुर बन्नेछ। घरमा कुनै शुभ कार्यको चर्चा हुन सक्छ। कार्यक्षेत्रमा तपाईंको इमानदारी, लगनशीलता र जिम्मेवारीबोधको प्रशंसा हुनेछ। रोकिएका काम पूरा हुने सम्भावना बलियो छ। आर्थिक रूपमा सुधार आउने संकेत देखिन्छ। घर वा सम्पत्तिसँग सम्बन्धित विषयमा सकारात्मक निर्णय हुन सक्छ। स्वास्थ्य राम्रो रहनेछ। मानसिक रूपमा शान्ति र सन्तुष्टि कायम रहनेछ।
सिंह (मा, मि, मु, मे, मो, टा, टि, टु, टे) –
आज आत्मविश्वास र नेतृत्व क्षमताले तपाईंलाई विशेष सफलता दिलाउनेछ। कार्यक्षेत्रमा नयाँ अवसर प्राप्त हुनेछ र वरिष्ठ व्यक्तिको विश्वास अझ मजबुत बन्नेछ। व्यापार–व्यवसायमा विस्तारको सम्भावना देखिएको छ। आर्थिक रूपमा लाभदायक दिन रहनेछ। सामाजिक क्षेत्रमा मान–सम्मान र प्रतिष्ठा बढ्नेछ। परिवारको साथ र सहयोगले मनोबल उच्च रहनेछ। प्रियजनसँग बिताएको समय सुखद रहनेछ। स्वास्थ्य राम्रो रहनेछ र शरीरमा दिनभर ऊर्जा तथा स्फूर्ति कायम रहनेछ।
कन्या (टो, प, पि, पु, ष, ण, ठ, पे, पो) –
आज अध्ययन, अनुसन्धान, तालिम तथा नयाँ ज्ञान हासिल गर्ने अवसर प्राप्त हुनेछ। कार्यक्षेत्रमा अनुशासन र निरन्तर मेहनतले राम्रो परिणाम दिलाउनेछ। वरिष्ठ व्यक्तिको विश्वास प्राप्त हुनेछ। आर्थिक अवस्था स्थिर रहनेछ। आवश्यक खर्च भए पनि बचत गर्ने अवसर मिल्नेछ। परिवारमा आपसी समझदारी र सहयोग बढ्नेछ। छोटो दूरीको यात्रा वा आवश्यक भेटघाट फलदायी बन्न सक्छ। स्वास्थ्य राम्रो रहनेछ। नियमित जीवनशैलीले थप ऊर्जा प्रदान गर्नेछ।
तुला (रा, रि, रु, रे, रो, ता, ति, तु, ते) –
आज आर्थिक क्षेत्रमा उल्लेखनीय सुधार आउने सम्भावना देखिन्छ। रोकिएको रकम प्राप्त हुन सक्छ वा आम्दानीको नयाँ स्रोत खुल्न सक्छ। व्यापार–व्यवसायमा लाभ बढ्नेछ। कार्यक्षेत्रमा सहकार्य र समन्वय उत्कृष्ट रहनेछ। नयाँ योजना सफल हुने सम्भावना बलियो छ। परिवारसँग खुसीका क्षण बिताउने अवसर प्राप्त हुनेछ। सामाजिक क्षेत्रमा नयाँ सम्बन्ध विस्तार हुनेछ। स्वास्थ्य राम्रो रहनेछ। मानसिक रूपमा सकारात्मक सोच र आत्मविश्वास बढ्नेछ।
वृश्चिक (तो, ना, नि, नु, ने, नो, या, यि, यु) –
आज निरन्तर मेहनत र धैर्यले तपाईंलाई उल्लेखनीय उपलब्धि दिलाउनेछ। कार्यक्षेत्रमा तपाईंको क्षमता र अनुभवको उचित मूल्यांकन हुनेछ। प्रतिस्पर्धात्मक क्षेत्रमा सफलता हात लाग्ने सम्भावना बलियो छ। व्यापार–व्यवसायमा राम्रो लाभ हुनेछ। आर्थिक अवस्था मजबुत बन्दै जाने संकेत देखिन्छ। परिवारमा प्रेम, विश्वास र आत्मीयता बढ्नेछ। प्रियजनसँग भविष्यका योजनाबारे छलफल हुन सक्छ। स्वास्थ्य राम्रो रहनेछ र मानसिक रूपमा पनि उत्साह तथा आत्मबल कायम रहनेछ।
धनु (ये, यो, भ, भि, भु, ध, फा, ढ, भे) –
आज आशावादी सोच र दृढ इच्छाशक्तिले नयाँ उपलब्धिको मार्ग खोल्नेछ। अध्ययन, व्यापार, वैदेशिक क्षेत्र वा यात्रासँग सम्बन्धित काममा सकारात्मक परिणाम प्राप्त हुनेछ। कार्यक्षेत्रमा नयाँ जिम्मेवारी आउन सक्छ, जसलाई सफलतापूर्वक पूरा गर्न सक्नुहुनेछ। आर्थिक अवस्थामा सुधार आउने सम्भावना बलियो छ। परिवारका सदस्यहरूसँगको सम्बन्ध थप आत्मीय बन्नेछ। सामाजिक क्षेत्रमा प्रतिष्ठा र सम्मान बढ्नेछ। स्वास्थ्य राम्रो रहनेछ। दिनभर मन प्रसन्न र ऊर्जावान रहनेछ।
मकर (भो, ज, जि, खि, खु, खे, खो, गा, गि) –
आज जिम्मेवारी बढे पनि योजनाबद्ध रूपमा अघि बढ्दा सबै काम सफलतापूर्वक सम्पन्न हुनेछन्। कार्यक्षेत्रमा वरिष्ठ व्यक्तिको सहयोग र मार्गदर्शन प्राप्त हुनेछ। आर्थिक रूपमा खर्च नियन्त्रण गर्न सके बचत बढ्नेछ। भविष्यका लागि दीर्घकालीन योजना बनाउने उपयुक्त समय रहनेछ। परिवारका सदस्यहरूको सुझाव लाभदायक सावित हुनेछ। घरमा शान्त र सुखद वातावरण कायम रहनेछ। स्वास्थ्यमा सामान्य थकान महसुस हुन सक्ने भएकाले पर्याप्त आराम गर्नु आवश्यक हुनेछ ।एभरेष्ट न्यूज एजेन्सी
काठमाडौँ । प्रधानमन्त्री बालेन्द्र शाहले सुनसरीको देवानगञ्ज, सिरहालगायत विभिन्न स्थानमा हालै भएका घटनाप्रति सरकार गम्भीर र संवेदनशील रहेको बताएका छन्। राष्ट्रका नाममा सम्बोधन गर्दै उनले घटनामा ज्यान गुमाएका जयप्रकाश मेहता, ओमप्रकाश मेहता र गणेश यादवप्रति श्रद्धाञ्जली अर्पण गर्दै शोकसन्तप्त परिवारप्रति गहिरो समवेदना व्यक्त गरेका हुन् ।
प्रधानमन्त्री शाहले घटनामा घाइते भएका सबैको शीघ्र स्वास्थ्यलाभको कामना गर्दै उपचारमा कुनै कमी हुन नदिन सम्बन्धित निकायलाई निर्देशन दिइसकिएको जानकारी दिए। घटनालगत्तै सुरक्षा निकाय परिचालन गरी अवस्था नियन्त्रणमा ल्याउने, थप अप्रिय घटना हुन नदिने र शान्ति–सुरक्षा कायम गर्ने काम भइरहेको उनले बताए।
घटनाको निष्पक्ष छानबिनका लागि गृह मन्त्रालयले समिति गठन गरिसकेको उल्लेख गर्दै प्रधानमन्त्रीले दोषी जोसुकै भए पनि कानुनी दायरामा ल्याइने स्पष्ट पारे। छानबिन प्रक्रिया पूर्ण रूपमा निष्पक्ष र पारदर्शी हुने विश्वाससमेत उनले दिलाए।
प्रधानमन्त्रीका अनुसार अवस्था थप बिग्रिन नदिन केन्द्रमा सर्वदलीय बैठक बसेको छ भने स्थानीय तहमा जनप्रतिनिधि, नागरिक समाज, धार्मिक अगुवा तथा समुदायका प्रतिनिधिसँग निरन्तर संवाद भइरहेको छ। घटनास्थलको प्रत्यक्ष अनुगमन तथा पीडितसँग भेटघाटका लागि गृहमन्त्रीसहित सुरक्षा निकायका उच्च अधिकारी प्रभावित क्षेत्रमा पुगिसकेको र राष्ट्रिय सुरक्षा परिषद्ले पनि समग्र अवस्थाबारे समीक्षा गरी आवश्यक निर्णय गरिसकेको उनले बताए।
सम्बोधनमा प्रधानमन्त्री शाहले सामाजिक सञ्जाल वा अन्य माध्यमबाट अफवाह, अपुष्ट सूचना, घृणा फैलाउने सामग्री तथा समुदायबीच वैमनस्य बढाउने गतिविधि नगर्न सबैलाई आग्रह गरे। आधिकारिक सरकारी सूचना र तथ्यमा मात्र विश्वास गर्न उनले अनुरोध गरे।
उनले प्रत्येक नागरिकको जीउधनको सुरक्षा, सामाजिक सद्भावको संरक्षण र शान्ति कायम गर्नु राज्यको पहिलो दायित्व भएको उल्लेख गर्दै शान्ति–सुरक्षा भङ्ग गर्ने, अराजकता फैलाउने र सामाजिक सद्भाव खलबल्याउने गतिविधिमाथि कडा कारबाही गरिने चेतावनी दिए।
प्रधानमन्त्री शाहले नेपालको संविधानले सबै नागरिकलाई आफ्नो धर्म, संस्कृति र परम्परा मान्ने मौलिक अधिकार दिएको उल्लेख गर्दै त्यसको संरक्षणमा सरकार पूर्ण रूपमा प्रतिबद्ध रहेको बताए। कुनै पनि धर्मले हिंसा, घृणा वा विभाजनलाई समर्थन नगर्ने र सबै धर्मको मूल भावना करुणा, प्रेम, दया र शान्ति भएको उनको भनाइ थियो।
देशको कुनै एक स्थानमा भएको दुःखद घटनाका आधारमा कुनै एक समुदायलाई दोषारोपण गर्नु वा त्यसको प्रतिशोधका रूपमा अन्यत्र अशान्ति फैलाउनु कुनै पनि दृष्टिले उचित नहुने प्रधानमन्त्रीले बताए। उनले इतिहासले कठिन परिस्थितिमा नेपाली समाजलाई एकता, सहिष्णुता र विवेकले नै जोगाएको स्मरण गराउँदै अहिले पनि सबैले संयमता अपनाएर राष्ट्रिय एकता, सामाजिक सद्भाव र शान्ति कायम राख्न सहयोग गर्न आग्रह गरे।
सम्बोधनको अन्त्यमा प्रधानमन्त्री शाहले आम नागरिक, नागरिक समाज, धार्मिक समुदाय, राजनीतिक दल तथा सञ्चार माध्यमलाई धैर्य, संयम र जिम्मेवारीका साथ प्रस्तुत भई मुलुकमा शान्ति, सद्भाव, भाइचारा र राष्ट्रिय एकता कायम राख्न सहयोग गर्न हार्दिक अपिल गरेका छन्।एभरेष्ट न्यूज एजेन्सी
विराटनगर । गृहमन्त्री सुदन गुरुङ विराटनगर पुगेका छन् ।
गृहमन्त्री गुरुङ सिधै सुनसरी देवानगञ्ज घटनाका घाइतेहरूको स्वास्थ्य अवस्थाबारे जानकारी लिन अस्पताल पुग्ने छन् भने घटनामा ज्यान गुमाएकाका परिवारजनसँग भेटेर समवेदना व्यक्त गर्ने तथा घटनाबारे जानकारी लिने कार्यक्रम रहेको छ ।एभरेष्ट न्यूज एजेन्सी
जनकपुरधाम, साउन १४ गते। मधेश प्रदेशमा पछिल्लो समय देखिएको तनाव, द्वन्द्व तथा विभिन्न अप्रिय घटनालाई मध्यनजर गर्दै मधेश प्रदेश सरकारका स्वास्थ्य तथा जनसंख्या मन्त्री नागेन्द्र साहले प्रदेशभरका सबै सरकारी तथा निजी स्वास्थ्य संस्थालाई उच्च सतर्कता अपनाई ‘स्ट्यान्डबाइ’ अवस्थामा रहन निर्देशन दिएका छन्। आफ्नो आधिकारिक फेसबुक पेजमार्फत सार्वजनिक सन्देश जारी गर्दै मन्त्री साहले वर्तमान संवेदनशील परिस्थितिलाई ध्यानमा राखी प्रदेशअन्तर्गत सञ्चालित सबै सरकारी तथा निजी अस्पताल, स्वास्थ्य संस्था, चिकित्सक, नर्स तथा सम्पूर्ण स्वास्थ्यकर्मीलाई आवश्यक तयारी अवस्थामा रहन आग्रह गरेका हुन्।
उनले कुनै पनि सम्भावित स्वास्थ्य आपत्कालीन अवस्थालाई प्रभावकारी रूपमा सामना गर्न आकस्मिक (इमर्जेन्सी) सेवा, एम्बुलेन्स सेवा, विशेषज्ञसहित आवश्यक स्वास्थ्य जनशक्ति, अत्यावश्यक औषधि, रगत, स्वास्थ्य उपकरण तथा अन्य स्वास्थ्य सामग्रीको पर्याप्त उपलब्धता सुनिश्चित गर्न निर्देशन दिएका छन्। साथै, स्वास्थ्य सेवामा कुनै प्रकारको अवरोध आउन नदिन २४सै घण्टा तयारी अवस्थामा रहन सम्बन्धित निकायलाई आग्रह गरेका छन्।
मन्त्री साहले नागरिकको जीवन र सुरक्षासँग स्वास्थ्य सेवा प्रत्यक्ष रूपमा जोडिएको उल्लेख गर्दै सबै स्वास्थ्य संस्थाबीच आवश्यक समन्वय, सहकार्य र जिम्मेवारीपूर्ण भूमिका निर्वाह गर्नुपर्नेमा जोड दिएका छन्। उनले प्रदेश सरकारले नागरिकको स्वास्थ्य सुरक्षा, मानवीय संवेदना तथा गुणस्तरीय स्वास्थ्य सेवाको निरन्तरतालाई सर्वोच्च प्राथमिकतामा राखेको स्पष्ट पारेका छन्।
यसैबीच, मन्त्री साहले मधेश प्रदेशमा शान्ति, सामाजिक सद्भाव, धार्मिक सहिष्णुता, आपसी भाइचारा तथा राष्ट्रिय एकता कायम राख्न सबै राजनीतिक दल, सामाजिक संघसंस्था, नागरिक समाज, युवा तथा आमसर्वसाधारणलाई संयमता अपनाउन हार्दिक अपिल गरेका छन्। कुनै पनि अफवाह वा उत्तेजनात्मक गतिविधिबाट टाढा रही शान्तिपूर्ण वातावरण कायम राख्न उनले सबैसँग अनुरोध गरेका छन्। प्रदेश सरकार नागरिकको स्वास्थ्य सुरक्षाप्रति पूर्ण रूपमा संवेदनशील रहेको र आवश्यक परे जुनसुकै स्वास्थ्य आपत्कालीन अवस्थाको सामना गर्न सम्पूर्ण स्वास्थ्य संयन्त्र तयारी अवस्थामा राखिएको मन्त्री साहका प्रमुख स्वकीय सचिव सुमित सिंहले जानकारी दिएका छन्।
धनुषा, १४ साउन । मधेश प्रदेशमा पछिल्ला दिनहरूमा देखिएको तनावपूर्ण अवस्थाप्रति चासो व्यक्त गर्दै गृह, सञ्चार तथा कानून मन्त्री फकिरा महतोले शान्ति, सामाजिक सद्भाव र सहिष्णुता कायम राख्न प्रदेशवासीलाई संयम अपनाउन आग्रह गर्नुभएको छ । मन्त्री महतोले जारी गर्नुभएको सार्वजनिक अपिलमा मधेश प्रदेशको पहिचान विविध धर्म, भाषा, संस्कृति र समुदायबीचको सहअस्तित्व रहेको उल्लेख गर्दै कुनै पनि घटनालाई साम्प्रदायिक वा धार्मिक रंग दिएर समाजमा विभाजन ल्याउने प्रयास स्वीकार्य नहुने स्पष्ट पार्नुभएको छ ।
उहाँले सामाजिक सञ्जाल वा अन्य माध्यमबाट अपुष्ट तथा भ्रामक सूचना फैलाउने कार्यबाट टाढा रहन पनि सबैसँग अनुरोध गर्नुभएको छ । प्रदेश सरकारले शान्ति सुरक्षा र कानूनको शासन कायम राख्न आवश्यक सबै संयन्त्र परिचालन गरिरहेको जनाउँदै मन्त्री महतोले हिंसा, तोडफोड, आगजनी, घृणा फैलाउने गतिविधि तथा सार्वजनिक शान्ति भंग गर्ने जो–कोहीमाथि प्रचलित कानूनअनुसार कडा कारबाही गरिने चेतावनी दिनुभएको छ ।
उहाँले धार्मिक अगुवा, जनप्रतिनिधि, नागरिक समाज, सञ्चारमाध्यम, राजनीतिक दल, शिक्षक, विद्यार्थी तथा सम्पूर्ण नागरिकलाई सामाजिक सद्भाव जोगाउन आ–आफ्नो क्षेत्रबाट जिम्मेवार भूमिका निर्वाह गर्न आह्वान गर्नुभएको छ। समाजमा तनाव बढाउने अभिव्यक्ति, अफवाह र उक्साहटबाट टाढा रहँदै आपसी विश्वास र सहिष्णुतालाई बलियो बनाउनुपर्नेमा पनि उहाँले जोड दिनुभएको छ ।
विराटनगर । गत आइतबार सुनसरीको देवानगन्ज गाउँपालिका-३ कप्तानगन्जमा प्रहरीको गोली लागेर घाइते भएका २७ वर्षीय जयप्रकाश मेहताको मृत्यु भएको छ ।
विराटनगर न्युरो अस्पतालमा उपचारका क्रममा मेहताको मृत्यु भएको हो । जयप्रकाशको पेटमा गोली लागेको थियो । गत सोमबार उनको शल्यक्रिया गरिए पनि अवस्था गम्भीर रहेकाले भेन्टिलेटरमा राखेर उपचार भइरहेको थियो । उनको शव हाल न्युरो अस्पतालमै राखिएको अस्पताल प्रशासनले जानकारी दिएको छ ।
यसअघि आइतबार राति भएको घटनामा गोली लागेर गम्भीर घाइते भएका देवानगन्ज-४ का २५ वर्षीय ओमप्रकाश मेहताको उपचारका लागि अस्पताल पुर्याइएलगत्तै राति १०:४० बजे मृत्यु भएको थियो । उनको शव पनि अझै अस्पतालमै रहेको प्रहरीले जनाएको छ ।
कप्तानगन्जमा दुई पक्षबीच भएको विवाद आइतबार राति हिंसात्मक झडपमा परिणत भएपछि स्थिति नियन्त्रणमा लिन प्रहरीले गोली चलाएको थियो । उक्त घटनामा गोली लागेर १० जना युवा घाइते भएका थिए । आठ जनाको विराटनगरका विभिन्न अस्पतालमा उपचार भइरहेको छ ।एभरेष्ट न्यूज एजेन्सी
झापा । २१ वर्षीय महिलालाई जबरजस्ती करणी गरेको अभियोगमा बुद्धशान्ती गाउँपालिका-३ बस्ने ५० वर्षीय ज्ञान बहादुर घिमिरेलाई प्रहरीले पक्राउ गरेको छ ।
ज्ञान बहादुरले ती महिलालाई जबरजस्ती करणी गरेको भन्ने उजुरीको आधारमा इलाका प्रहरी कार्यालय बुधबारेबाट खटिएको प्रहरीले उनलाई पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको जनाएको छ ।एभरेष्ट न्यूज एजेन्सी
जनकपुरधाम । जिल्ला प्रशासन कार्यालय धनुषाले जिल्लाको सुरक्षा अवस्थालाई मध्यनजर गर्दै विभिन्न क्षेत्रमा अनिश्चितकालीन कर्फ्यु आदेश जारी गरेको छ।
प्रमुख जिल्ला अधिकारी प्रेमप्रसाद लुइटेलद्वारा जारी सूचनाअनुसार बिहीबार बसेको जिल्ला सुरक्षा समितिको बैठकको निर्णयका आधारमा स्थानीय प्रशासन ऐन, २०२८ को दफा ६(क) बमोजिम साउन १४ गते दिउँसो ३:३० बजेदेखि अर्को आदेश जारी नभएसम्मका लागि कर्फ्यु लागू गरिएको हो ।
कर्फ्यु अवधिमा तोकिएको क्षेत्रभित्र कुनै पनि व्यक्तिलाई आवतजावत गर्न, भेला हुन, जुलुस निकाल्न, प्रदर्शन गर्न, सभा आयोजना गर्न वा घेराउ गर्न निषेध गरिएको प्रशासनले जनाएको छ।
प्रशासनका अनुसार कर्फ्युको क्षेत्र उत्तरतर्फ लक्ष्मीनिया गाउँपालिका–७ को लक्ष्मीनिया हाटबजार चोक हुँदै सिनुरजोडा चोकसम्म, पूर्वतर्फ बेलौनी सडकस्थित एमक्यू स्टिलबाट ५०० मिटर पूर्वको पेट्रोल पम्प, हुलाकी सडक हुँदै राष्ट्रिय प्राथमिक विद्यालयसम्म, दक्षिणतर्फ नगराइन नगरपालिका हुँदै नगराइन चोकसम्म तथा पश्चिमतर्फ सिनुरजोडा, सोहनी, मणिमण्डप, नेपाल नर्सरी, इस्कोन जनकपुर, दूधमती पुल, बेला र कादरी मस्जिदसम्म तोकिएको छ ।
जिल्ला प्रशासन कार्यालयले कर्फ्यु आदेशको पूर्ण पालना गर्न सबैसँग आग्रह गरेको छ। आदेश उल्लङ्घन गर्ने व्यक्ति वा समूहलाई प्रचलित कानुनबमोजिम कारबाही गरिने पनि प्रशासनले चेतावनी दिएको छ। एभरेष्ट न्यूज एजेन्सी
