इटहरी । युवालाई व्यावहारिक सीप प्रदान गरी रोजगारका अवसरसँग जोड्ने उद्देश्यले सुनसरीको इटहरीमा आजदेखि ‘सीप तथा रोजगार मेला, २०८३’ आयोजना हुँदैछ ।

युवा, श्रम तथा रोजगार मन्त्रालयको आयोजनामा हुने मेला असोज २० गतेसम्म सञ्चालन हुनेछ । मेलाको उद्घाटन प्रतिनिधिसभाका सभामुख डोलप्रसाद अर्यालले गर्ने कार्यक्रम छ ।

युवा, श्रम तथा रोजगारमन्त्री रामजी यादवको अध्यक्षतामा हुने उद्घाटन समारोहमा सांस्कृतिक झाँकीअन्तर्गत थारू नृत्य तथा नौमती बाजाको प्रस्तुति रहनेछ । उद्घाटनपछि युवालाई उद्यमशीलतातर्फ आकर्षित गर्ने उद्देश्यले ‘आजको युवा, भोलिको उद्यमी : सार्क संवाद’ शीर्षकमा विशेष छलफल आयोजना गरिनेछ । मेलाको मुख्य उद्देश्य युवाको सीप पहिचान गरी रोजगारदाता तथा तालिम प्रदायक संस्थासँग प्रत्यक्ष सम्पर्क स्थापित गराउनु रहेको मन्त्रालयले जनाएको छ ।

आज दिउँसो १२ बजेदेखि साँझ ५ बजेसम्म तालिमका सहभागी छनोट, प्रशिक्षार्थीको समूह विभाजन, रोजगार मिलानका लागि सीप परिचय तयार गर्ने, रोजगारदाता तथा तालिम प्रदायक संस्थाको परिचय र सूचना तथा परामर्श सेवा सञ्चालन गरिनेछ ।

भोलिदेखि असोज १९ गतेसम्म १० वटा विभिन्न विषयगत क्षेत्रमा पाँचदिने व्यावहारिक तालिम सञ्चालन हुनेछन् ।

मेला अवधिभर प्रदर्शनी कक्ष, सूचना तथा परामर्श सेवा, सम्बन्धित निकायमा सिफारिस, रोजगार मिलान तथा उद्यमशीलतासम्बन्धी छलफललगायत कार्यक्रम निरन्तर सञ्चालन हुनेछन् । एभरेष्ट न्यूज एजेन्सी,

काठमाडौँ । जल तथा मौसम विज्ञान विभागले अन्तर्गत मौसम पूर्वानुमान महाशाखाले हाल मनसुनको न्यून चापीय रेखा सरदर स्थानको आसपास रहेको र देशभर मनसुनी वायु र पश्चिमी वायुको आंशिक प्रभाव रहेको जानकारी दिएको छ ।

हाल देशका हिमाली भू-भागमा आंशिक बादल तथा पहाडी र तराईका भू-भागमा मौसम मुख्यतया सफा देखि आंशिक बादल लागेको छ ।

आज दिउँसो देशभर आंशिक बादल लाग्नेछ। कोशी र बागमती प्रदेशको हिमाली र पहाडी भू-भागका थोरै स्थानमा तथा गण्डकी, लुम्बिनी, कर्णाली र सुदुरपश्चिम प्रदेशको हिमाली र पहाडी भू-भागका एक-दुई स्थानमा हल्का वर्षा/हिमपातको सम्भावना छ ।

त्यस्तै, आज राति कोशी र बागमती प्रदेशको हिमाली र पहाडी भू-भागमा साधारणतया बादल लाग्ने तथा गण्डकी, लुम्बिनी, कर्णाली र सुदूरपश्चिम प्रदेशको हिमाली र  पहाडी भू-भागमा आंशिक बादल लाग्नेछ। देशका तराई भू-भागमा मौसम मुख्यतया सफा रहने छ भने कोशी र बागमती प्रदेशको पहाडी भू-भागका एक-दुई स्थानमा हल्का वर्षाको सम्भावना छ । एभरेष्ट न्यूज एजेन्सी

आजको राशिफल बिस २०८३ असोज १४ गते बुधबार ईस २०२६ सेप्टेम्बर ३० नेपाल सम्बत ११४६ ञलागा चतुर्थी, रौद्र नाम संवत्सर सूर्य दक्षिणायन, शरद ऋतु, असोज शुक्ल कृष्ण पक्ष चतुर्थी, चन्द्रमा मेष राशिमा, भरणी नक्षत्र, वज्र योग, बालव करण । आज नेपालमा सुर्योदय बिहान ५ बजेर ५६ मिनेटमा र सूर्यास्त साँझ ५ बजेर ५३ बजे हुनेछ । आज जन्म लिने बच्चा मेष राशीको हुनेछ ।

मेष (चु, चे, चो, ला, लि, लु, ले, लो, अ)

आज काममा गति बढ्नेछ र आफूले चाहेको परिणामका लागि सक्रिय भएर लाग्न सकिनेछ। बुधको प्रभावले सहकर्मीसँगको संवाद सहज बनाउनेछ। नयाँ जिम्मेवारी आए पनि त्यसलाई व्यवस्थित रूपमा सम्हाल्न सकिनेछ। व्यापारमा ग्राहकसँगको सम्पर्कबाट नयाँ अवसर खुल्न सक्छ। आर्थिक रूपमा आम्दानी राम्रो भए पनि तत्काल ठूलो खर्च नगर्नुहोस्। परिवारमा महत्वपूर्ण निर्णयका विषयमा तपाईंको भूमिका रहनेछ। प्रेममा छोटो कुराकानीले पनि नजिकपन बढाउन सक्छ। शरीरमा ऊर्जा कायम राख्न पर्याप्त पानी पिउनुहोस् ।

वृष (इ, उ, ए, ओ, वा, वि, वु, वे, वो)

आज स्थिर ढंगले अघि बढ्दा लाभ मिल्नेछ। कार्यक्षेत्रमा पुरानो अनुभवले नयाँ समस्या समाधान गर्न सहयोग गर्नेछ। व्यापारमा ग्राहकको आवश्यकता बुझेर निर्णय गर्दा राम्रो प्रतिक्रिया प्राप्त हुनेछ। आर्थिक रूपमा बचतको योजना बनाउन वा पुरानो दायित्व व्यवस्थापन गर्न उपयुक्त दिन हो। परिवारमा घरायसी विषयमा छलफल हुनेछ। प्रेममा मनमा रहेको असन्तुष्टि खुलेर राख्दा समाधानको बाटो भेटिन सक्छ। खानपानमा सन्तुलन कायम राख्नुहोस् ।

मिथुन (का, कि, कु, घ, ङ, छ, के, को, ह)

बुध तपाईंको राशिको स्वामी भएकाले आज मानसिक सक्रियता उच्च रहनेछ। लेखन, अध्ययन, सञ्चार, व्यापारिक छलफल वा नयाँ योजना बनाउन दिन निकै उपयोगी हुनेछ। काममा छोटो समयमा धेरै विषय सम्हाल्नुपर्ने हुन सक्छ, त्यसैले प्राथमिकता छुट्याउनुहोस्। व्यापारमा नयाँ सम्पर्क भविष्यका लागि महत्वपूर्ण बन्न सक्छ। आर्थिक कारोबारमा लाभको सम्भावना भए पनि कागजी विवरण बेवास्ता नगर्नुहोस्। साथीभाइबाट उपयोगी सूचना प्राप्त हुन सक्छ। प्रेममा रमाइलो संवादले सम्बन्धमा ताजगी ल्याउनेछ ।

कर्कट (हि, हु, हे, हो, डा, डि, डु, डे, डो)

चन्द्रमाको प्रभावले आज मनमा परिवार र व्यक्तिगत सुरक्षासँग सम्बन्धित विचार बढी आउनेछन्। काममा भावनात्मक दबाब भए पनि जिम्मेवारी पूरा गर्न सकिनेछ। घर वा सम्पत्तिसम्बन्धी कुनै योजना अघि बढाउने अवसर मिल्न सक्छ। आर्थिक रूपमा घरायसी आवश्यकतामा खर्च बढ्नेछ। परिवारका सदस्यसँग सहकार्य गर्दा समस्या सहज बन्नेछ। प्रेममा संवेदनशील विषय उठ्न सक्छ, त्यसैले प्रतिक्रिया दिनुअघि अर्को पक्षको कुरा सुन्नुहोस्। पर्याप्त आरामले मानसिक सन्तुलन कायम राख्न मद्दत गर्नेछ ।

सिंह (मा, मि, मु, मे, मो, टा, टि, टु, टे)

सूर्यको प्रभावले नेतृत्व गर्ने क्षमता बलियो रहनेछ। कार्यक्षेत्रमा आफ्नो विचार स्पष्ट रूपमा राख्दा वरिष्ठको ध्यान आकर्षित गर्न सकिनेछ। नयाँ जिम्मेवारी वा अवसरका लागि आफूलाई तयार राख्नुहोस्। व्यापारमा प्रचार, सम्पर्क वा नयाँ ग्राहक जोड्ने काम अघि बढाउन सकिनेछ। आर्थिक रूपमा लाभको सम्भावना रहे पनि विलासिताका वस्तुमा खर्च बढ्न सक्छ। परिवारमा सम्मान र सहयोग मिल्नेछ। प्रेममा आफ्नो व्यस्तताबीच प्रिय व्यक्तिका लागि समय निकाल्नु राम्रो हुनेछ ।

कन्या (टो, प, पि, पु, ष, ण, ठ, पे, पो)

बुधको प्रभावले आज सूक्ष्म विषयमा ध्यान दिने क्षमता बढाउनेछ। हिसाबकिताब, कागजी काम, अध्ययन वा योजनाको समीक्षा गर्न राम्रो दिन हो। कार्यक्षेत्रमा तपाईंले देखेको सानो कमजोरी सुधार्दा ठूलो फाइदा पुग्न सक्छ। व्यापारमा खर्च र आम्दानीको सन्तुलन मिलाउन सकिनेछ। आर्थिक रूपमा रोकिएको काम अघि बढ्ने सम्भावना छ। परिवारमा तपाईंको व्यवहारिक सल्लाहको आवश्यकता पर्न सक्छ। प्रेममा धेरै अपेक्षा नराखी सहज रूपमा समय बिताउनुहोस्। आँखामा थकान भए विश्राम लिनुहोस् ।

तुला (रा, रि, रु, रे, रो, ता, ति, तु, ते)

शुक्र र बुधको प्रभावले आज सामाजिक सम्पर्क र संवादलाई बलियो बनाउनेछ। सहकार्यमा आधारित कामबाट राम्रो परिणाम प्राप्त गर्न सकिनेछ। व्यापारमा साझेदारी वा नयाँ ग्राहकसँग कुराकानी अघि बढ्न सक्छ। आर्थिक रूपमा सानो लाभ वा रोकिएको रकम प्राप्त हुने सम्भावना छ। परिवारमा कुनै सदस्यसँग महत्वपूर्ण समझदारी बन्न सक्छ। प्रेममा भेटघाट वा लामो संवादको अवसर मिल्नेछ। मनलाई सन्तुलित राख्न अनावश्यक विवादबाट टाढा रहनु राम्रो हुनेछ ।

वृश्चिक (तो, ना, नि, नु, ने, नो, या, यि, यु)

मंगलको प्रभावले निर्णय लिन साहस दिनेछ, तर आजको ग्रहस्थिति हेर्दा धैर्य पनि उत्तिकै आवश्यक छ। काममा प्रतिस्पर्धा बढे पनि आफ्नो रणनीति स्पष्ट राख्दा अघि बढ्न सकिनेछ। व्यापारमा नयाँ प्रस्ताव आए त्यसका सबै पक्ष बुझेर मात्र अघि बढ्नुहोस्। आर्थिक कारोबारमा जोखिम कम गर्नु राम्रो हुनेछ। परिवारमा कडा शब्द प्रयोग गर्दा सामान्य विषय पनि ठूलो बन्न सक्छ। प्रेममा शंका उत्पन्न गर्नेभन्दा विश्वास बढाउने व्यवहार गर्नुहोस्। सवारी चलाउँदा सावधानी अपनाउनुहोस् ।

धनु (ये, यो, भ, भि, भु, ध, फा, ढ, भे)

बृहस्पतिको प्रभावले आज ज्ञान र अनुभवबाट लाभ उठाउने अवसर दिनेछ। अध्ययन, प्रशिक्षण वा भविष्यको योजनामा ध्यान केन्द्रित गर्न सकिनेछ। काममा अनुभवी व्यक्तिको सल्लाहले महत्वपूर्ण निर्णय सहज बनाउनेछ। व्यापारमा बाहिरी सम्पर्क वा नयाँ बजारसँग सम्बन्ध जोडिन सक्छ। आर्थिक रूपमा दीर्घकालीन बचत योजनातर्फ ध्यान दिनु राम्रो हुनेछ। परिवारमा खुसीको वातावरण बन्नेछ। प्रेम सम्बन्धमा पुरानो असमझदारी हटाउन उपयुक्त समय मिल्न सक्छ ।

मकर (भो, ज, जि, खि, खु, खे, खो, गा, गि)

शनिको प्रभावले आज काममा अनुशासन र निरन्तरताको आवश्यकता देखाउनेछ। केही काम तत्काल पूरा नहुन सक्छन्, तर धैर्य राख्दा परिणाम प्राप्त हुनेछ। कार्यालयमा जिम्मेवारी थपिन सक्छ। व्यापारमा स्थिर कारोबारलाई प्राथमिकता दिँदा लाभ हुनेछ। आर्थिक रूपमा ऋण वा ठूलो लगानीको निर्णय केही समय रोक्नु उचित हुन सक्छ। परिवारका सदस्यसँग भविष्यको योजना बनाउन सकिनेछ। प्रेममा व्यस्तताका कारण दूरी नबढोस् भन्नेमा ध्यान दिनुहोस्। शरीरमा भारीपन भए आराम लिनुहोस् ।

कुम्भ (गु, गे, गो, सा, सि, सु, से, सो, द)

आज नयाँ विचारलाई व्यवहारमा प्रयोग गर्ने अवसर मिल्नेछ। काममा तपाईंको फरक दृष्टिकोणले सकारात्मक प्रतिक्रिया पाउन सक्छ। बुधको प्रभावले प्रविधि, सञ्चार वा सिर्जनात्मक काममा लाभ दिनेछ। व्यापारमा नयाँ माध्यमबाट ग्राहकसँग जोडिने सम्भावना छ। आर्थिक रूपमा अतिरिक्त आम्दानीको बाटो देखिए पनि खर्चभन्दा बचतलाई प्राथमिकता दिनुहोस्। परिवारमा साथीभाइ वा आफन्तसँग भेटघाट हुन सक्छ। प्रेममा अचानक भएको संवादले मनमा उत्साह ल्याउनेछ। मानसिक थकान कम गर्न पर्याप्त विश्राम आवश्यक छ ।

मीन (दि, दु, थ, झ, ञ, दे, दो, च, ची)

चन्द्रमा र बृहस्पतिको प्रभावले आज कल्पनाशक्ति र भावनात्मक समझ बलियो बनाउनेछ। सिर्जनात्मक काममा नयाँ विचार आउन सक्छ। कार्यक्षेत्रमा आफूले चाहेको परिणामका लागि निरन्तर प्रयास गर्नुपर्नेछ। व्यापारमा पुरानो सम्पर्कबाट उपयोगी सूचना वा प्रस्ताव आउन सक्छ। आर्थिक रूपमा परिवारसँग सम्बन्धित खर्च बढ्न सक्ने भएकाले बजेटमा ध्यान दिनुहोस्। परिवारबाट भावनात्मक साथ प्राप्त हुनेछ। प्रेममा मनका कुरा लुकाएर राख्नुभन्दा सही समयमा व्यक्त गर्नु राम्रो हुनेछ। नियमित आराम र सकारात्मक सोचले दिन सहज बनाउनेछ । एभरेष्ट न्यूज एजेन्सी

रौतहट । उपेन्द्र यादव नेतृत्वको जनता समाजवादी पार्टी (जसपा) नेपालका पूर्व रौतहट जिल्ला अध्यक्ष श्याम बिहारी यादवले पार्टी परित्याग गरेका छन्।

मंगलबार यादवले साधारण सदस्यसहित पार्टीमा आफूले सम्हाल्दै आएका सम्पूर्ण जिम्मेवारीबाट अलग भएको घोषणा गरेका हुन्।

यादवले पार्टी परित्याग गरेपनि अब कसरी अघि बढ्ने भन्नेबारे भने केही खुलाएका छैनन् । पार्टी नेतृत्वको कार्यशैलीप्रति असन्तुष्टि जनाउँदै उनले पछिल्लो समय पार्टीमा कार्यकर्तालाई ‘दास र नोकर’को जस्तो व्यवहार गर्ने प्रवृत्ति बढ्दै गएको आरोप लगाएका छन्।

पार्टीको नीति, नियम, विधान र सिद्धान्तविपरीत गतिविधि हुँदै गएको भन्दै आफू बाध्य भएर पार्टीबाट अलग हुने निर्णयमा पुगेको यादवले बताएका छन्।

बारा, जीतपुरसिमरा उपमहानगरपालिका उपप्रमुख भोला प्रसाद अधिकारीको नेतृत्वमा अमलेखगञ्ज पुगेको टोलीले सडक र वन क्षेत्र अतिक्रमण गरे बनाइएका घर, टहरा हटाउन अवरोध गरेको हो ।

वन अधिकृत ललन राउत कुर्मीको नेतृत्वमा सोमबार एस्काभेटरसहित फिल्डमा पुगेको वनरक्षक र कर्मचारीको टोली जनप्रतिनिधिको अवरोधपछि खाली फर्केको थियो ।अमलेखगञ्ज ३ नम्बर पुल क्षेत्रमा ४ महिनाअघि (जेठ १ गते) डिभिजन वन कार्यालय, पर्सा राष्ट्रिय निकुञ्ज र सडक डिभिजन कार्यालय हेटौँडाले सडक र वनक्षेत्र अतिक्रमण गरी बनेका ७२ वटा घर, टहरा तथा होटल हटाएको थियो ।

तर, पछिल्लो समय स्थानीय जनप्रतिनिधिहरूकै बलमा सो क्षेत्रमा फेरि ६ वटा होटल तथा घर टहरा बनेका छन् । अतिक्रमण हटाउँदैछ भन्ने सूचना पाएर बिहानै अमलेखगञ्ज पुगेका जनप्रतिनिधिहरूले संघीय सरकारको निर्देशन नमान्ने अडान लिएपछि वन कार्यालय पछि हट्न बाध्य भएको थियो ।

उपप्रमुख भोलाप्रसाद अधिकारीले स्थानीय तहको अनुमती बिना संघीय सरकारले केही गर्न नसक्ने दाबी गरे । ‘संघीय सरकारको नेतृत्वमा रहेको जुनसुकै निकाय भए पनि स्थानीय निकायसँग सरोकार नराखी गरिने कुनै पनि काम वैध हुँदैन,’ उपप्रमुख अधिकारीले भने, ‘पहिला वन कार्यालयले आफ्नो अधिकार सुनिश्चित गरेर आउनुस् ।’

करिब ३ घन्टा लामो छलफलपछि चाडपर्वसम्म अतिक्रमण हटाउन कदम नचाल्ने सहमति भएको छ । जनप्रतिनिधि र वन कर्मचारीबिच चाडपर्वपछि जिल्ला प्रशासन कार्यालयमा सर्वपक्षीय छलफल गरेर निर्णय लिने सहमति भएको छ ।

वन अधिकृत ललन राउत कुर्मीले जनप्रतिनिधिको आग्रहपछि तत्काललाई स्थगित गरिए पनि स्थानीय तह आफैँले अतिक्रमित संरचना नहटाएको खण्डमा पछि वन कार्यालयले भत्काउने बताए ।

‘यो नकारात्मक सूचीमा परेको अतिक्रमित क्षेत्र हो । यहाँ घरटहरा बनाएर बसोबास वा व्यापार गर्न पाइँदैन । आज नभए भोलि हट्छ,’ उनले भने, ‘स्थानीय आफैँले समयमै खाली गर्दा उपयुक्त हुन्छ ।’

बाराका प्रमुख जिल्ला अधिकारी खडानन्द अधिकारीले जनप्रतिनिधिहरू आफैँ पुगेर अनुरोध गरेका कारण मुठभेडको स्थिति सिर्जना नहोस् भनेर केही दिनको लागि स्थगित गरिएको बताए ।

‘जनप्रतिनिधि आफैँ उभिएपछि मुठभेड नहोस् भन्नका लागि हामीले स्थानीयलाई खाली गर्न समय दिएर फर्किएका छौँ । यसको मतलब घरटहरा नहटाउने भन्ने होइन,’ प्रजिअ अधिकारीले भने, ‘केही दिनलाई समय दिएका छौँ । त्यस अवधिमा पनि खाली नभए डोजर लगेर हटाइनेछ । यसको अरु विकल्प छैन ।’

डिभिजन वन कार्यालय बाराका प्रमुख सुजितकुमार झाले अमलेखगञ्ज क्षेत्रमा यसअघि हटाइएका ३६ घरधुरी तथा ७२ वटा संरचनामध्ये २ वटा परिवारमात्रै वास्तविक सुकुमबासी भएको बताए । उनले दुधौरा पुलमुनिको बस्तीको हकमा करिब ५० घरधुरीमध्ये ६ देखि ८ घरधुरी सुकुमबासी रहेको र तिनीहरूले राज्यले व्यवस्थापनमा सहयोग गर्ने बताए ।

प्रमुख झाले जनप्रतिनिधिहरूले संगठित रूपमै गएर वनको काम हस्तक्षेत्र गर्नु गलत भएको टिप्पणी गरे । घरटहरा भत्काउन पुगेको वन कार्यालयको टोलीलाई रोक्न उपमहानगरका वडाध्यक्षहरू हिराबहादुर गुरुङ, धनबहादुर श्रेष्ठ, भोजबहादुर खत्री, दीपेन्द्र चौधरी, श्यामबाबु खाँ, हेमनारायण चौधरी, हरिदेव खरेल, सुभाष श्रेष्ठ, शेखरकाजी रुम्बा लगायत उपस्थित थिए ।

घरटहरा भत्काउन भने वन अधिकृत कुर्मी, वन अधिकृत मधुकान्त सिंहसहित डिभिजन वन कार्यालयका वन रक्षक र कर्मचारी पुगेका थिए भने इलाका प्रहरी कार्यालय सिमराका प्रहरी नायब उपरीक्षक (डीएसपी) दयाकृष्ण भट्टको नेतृत्वमा ७० जनाभन्दा बढी प्रहरी तैनाथ थिए ।

जनप्रतिनिधि र स्थानीयले समय माग गरेपछि सशस्त्र प्रहरीको टोलीलाई भने प्रमुख जिल्ला अधिकारीले पथलैयाबाटै फर्कन आदेश दिएका थिए । रातोपाटी

बज्जिकाञ्चल संवाददाता असोज १३ गते

रौतहट । रौतहटको गौर नगरपालिका–९ सिरसियामा मोटरसाइकलको ठक्करबाट ७२ वर्षीय नारायण बैठाको मृत्यु भएको छ ।

मंगलबार साँझ करिब ७ः४५ बजे गौरबाट हजमिनियातर्फ जाँदै गरेको भारतीय नम्बर प्लेट बीआर २२ एच ६१५९ नम्बरको मोटरसाइकलले सडकमा उभिरहेका बैठालाई ठक्कर दिएको थियो ।दुर्घटनापछि चालक फरार भएका छन् । प्रहरीले चालकको पहिचान पर्साको वीरगन्ज घर भई हाल राजदेवी नगरपालिका–२ हजमिनियामा बस्दै आएका करिब २२ वर्षीय अमित भगतका रूपमा गरेको छ । फरार चालकको खोजी भइरहेको प्रहरीले जनाएको छ ।प्रहरीले दुर्घटनामा संलग्न मोटरसाइकल नियन्त्रणमा लिएर घटनाबारे थप अनुसन्धान गरिरहेको छ । रातोपाटी

बज्जिकाञ्चल संवाददाता असोज १३ गते

जनकपुरधाम । प्रसिद्ध ऐतिहासिक, पुरातात्विक एवं धार्मिक स्थल जनकपुरधामको राम चोकमा रहेको गोपाल धर्मशाला एक शताब्दी अघि निर्माण भएको थियो । देश–विदेशबाट आएका तीर्थयात्रीले यो धर्मशाला सहज रूपमा प्रयोग गर्दै आएका छन् ।

जानकी मन्दिर दर्शन गर्न आउने धार्मिक पर्यटकहरूलाई बासको व्यवस्था गर्न भन्दै १ सय वर्ष अघि यो धर्मशाला निर्माण गरिएको हो । अहिले पनि यो धर्मशालाले धार्मिक पर्यटकहरूलाई सेवा दिँदै आएको छ ।जनकपुरको जानकी मन्दिर १३० वर्ष अघि निर्माण भएको थियो । मन्दिर निर्माण पश्चात यहाँ आउने पर्यटक तथा भक्तालुहरूलाई रातको समयमा बस्न स्थानको अभाव देखेपछि भारतको कलकत्ता निवासी रामबहादुर, बलदेव दास र रामेश्वरजी नथानीले यो धर्मशाला विसं. १९८३ मा निर्माण गरेका थिए ।एक सय वर्ष पुरानो संरचना भएकाले यसको भौतिक पूर्वाधार केही जीर्ण देखिए पनि अहिलेसम्म सञ्चालन भइरहेको छ । एक शताब्दी यता यो धर्मशालाको भौतिक संरचनाले ९० सालको महाभूकम्प, त्यसपछिको अन्य सानातिना भूकम्पसँगै ०७२ सालमा गएको भूकम्प पनि यसले थेग्यो ।

२० वर्षदेखि यो धर्मशालाका प्रबन्धक भएर कार्य गर्दै आइरहेका राजकुमार झा भन्छन्, ‘ती भूकम्पहरूमा सामान्य कतै चिरा लागे पनि ठुलो क्षति भएको छैन । जानकी मन्दिरकै शैली र निर्माणमा प्रयोग भएको सामग्रीबाट पनि निर्माण भएकाले होला, त्यस्तो विनाशकारी भूकम्पमा खासै केही भएन ।’

प्रबन्धक झाका बुवा काशीनाथले पनि प्रबन्धक भएर यो धर्मशालाको व्यवस्थापनमा ४० वर्ष कार्य गरेका छन् । प्रबन्धक राजकुमारले भने, ‘बुवा कार्यरत रहँदा यहाँको एउटा कोठा ३० देखि ३५ रुपैँयामा पाइन्थ्यो । त्यतिबेला जनकपुरमा अहिलेको जस्तो सुविधा सम्पन्न होटल, लजहरू नहुँदा यहाँ आउने अधिकांश पर्यटकहरूको बासस्थान नै यही धर्मशाला बन्ने गर्दथ्यो ।’

अहिले नगरभित्रमात्र नभएर ग्रामीण क्षेत्रमा समेत होटल तथा लज सञ्चालनमा आएसँगै यहाँ खासै पर्यटक नआउने उनले बताए ।

करिब ३ बिघा क्षेत्रफलमा फैलिएको यो धर्मशालाको तल्लो तलामा ८ वटा ठुलो कोठा, एउटा हल गरी १० र माथिल्लो तलामा ठुलो र सानो गरी १३ वटा कोठा छन् । यी कोठा अहिले ३ सय देखि ८ सय रुपैयाँमा दैनिक भाडामा लगाइँदै आएको छ ।

निर्माणकर्ता रामबहादुर, बलदेवदास रामेश्वरजी नाथानी च्यारिटेबल ट्रस्टको नामबाट सञ्चालित यो धर्मशाला व्यवस्थापनका लागि ५ जना कर्मचारी खटिँदै आएका छन् । प्रबन्धक झाका अनुसार उच्च वर्गका पर्यटकहरू खासै नआए पनि भारतबाट आउने पर्यटकहरूका कारण अहिलेसम्म यो सञ्चालन भइरहेको छ । उनीहरू नआउने हो भने यसको वार्षिक मर्मत खर्च पनि नउठ्ने उनको भनाइ छ ।

वार्षिक २८ देखि ३० लाख रुपैयाँसम्मको कारोबार हुने यस धर्मशालाको आफ्नै ३ दर्जनभन्दा बढी सटर व्यावसायिक प्रतिष्ठानका लागि भाडामा लगाइएको छ । ती सटरको भाडा मासिक २ हजारदेखि २५ सय रुपैयाँसम्म हुने गरेको छ । त्यसैबाट उठ्ने र पर्यटक बसेबापत उठने रकमबाट कर्मचारीको तलब, भवन मर्मतमा खचिने गरेको छ ।

भारत, बिहारको मोतिहारीबाट यहाँ बास बस्न आएका रामशिष यादवले भने, ‘म त अहिलेसम्म १० पटकभन्दा बढी जनकपुर आइसकेँ । जतिपटक आए पनि यही धर्मशालामा बस्ने गर्छु ।’ उनका अनुसार बाहिरको होटलमा बास बस्न र खाना खान महँगो पर्ने भएकाले धर्मशाला हुँदा सहज हुने गरेको छ ।

यो धर्मशालामा विजया दशमी तथा विवाह पञ्चमीमा ठुलो मेला पनि लाग्ने गर्छ । वडा दसैँमा स्थानीय उद्योगव्यापारीहरूले यहीँ सस्तो बजार लगाउने गर्छन् । त्यतिबेला सस्तो बजार घुम्न तथा किनमेल गर्न आउनेहरूका कारण ठुलो चहलपहल हुने गर्छ ।

त्यस्तै विवाह पञ्चमीमा पनि मेलासँगै यहाँ रात बिताउने तीर्थालुहरूको ठुलो घुइँचो लाग्छ । धर्मशाला बाहिर रहेको एक चियापसलमा चिया पिउँदै गरेका स्थानीय अमोद कुशवाहाले भने, ‘यस्तो पवित्र सहरको बिचमा यो धर्मशाला छ, तर यसको संरक्षणमा कसैले ध्यान दिएजस्तो लाग्दैन । दिन प्रतिदिन जीर्ण हुँदै गएको देख्छु ।’

स्थानीय तहले जानकी मन्दिरजस्तै यस्तो ऐतिहासिक सम्पदाको संरक्षणमा ध्यान दिनुपर्ने उनको भनाइ छ । उनका अनुसार यस्तो सम्पदालाई मर्मत गरी समयसापेक्ष सुधार गर्न सके पर्यटकको ओइरो लाग्छ ।

बज्जिकाञ्चल संवाददाता असोज ११ गते

नकपुरधाम । धनुषाको मिथिला नगरपालिकामा पहिरोले घर पुरिँदा एक महिलाको मृत्यु भएको छ भने परिवारका अन्य चार जनाको सकुशल उद्धार गरिएको छ।

आइतबार बिहान सवा ९ बजे मिथिला नगरपालिका–११ आँपगाछीमा राजन श्रेष्ठको एकतले टालीको छानो भएको घर पहिरोले पुरिएको जिल्ला प्रहरी कार्यालय धनुषाले जनाएको छ।

घर पुरिएको सूचना पाएलगत्तै इलाका प्रहरी कार्यालय ढल्केवर र इलाका प्रहरी कार्यालय भिमान, सिन्धुलीको संयुक्त टोली घटनास्थलमा पुगेको थियो। घरमा रहेका पाँच जनामध्ये चार जनालाई सकुशल उद्धार गरिएको प्रहरी प्रवक्ता ओमप्रकाश खनालले जानकारी दिए।

खोज तथा उद्धारका क्रममा बिहान ११ बजे राजनकी श्रीमती ३५ वर्षीया कमला श्रेष्ठलाई मृत अवस्थामा फेला पारिएको थियो। उनको शव सरकारी अस्पताल बर्दिबास, महोत्तरी पठाइएको प्रहरीले जनाएको छ।

मधेश प्रदेशमा पछिल्लो दुई दिनदेखि लगातार वर्षा भइरहेको भए पनि आइतबार दिउँसो १२ बजेपछि मौसम सामान्य भएको प्रहरीले जनाएको छ।सभार रातोपाटी