आरके श्रीवास्तव,रौतहट,०८ गते चैत ।
रौतहट । मिटरब्याजविरुद्ध किसान मजदुर आन्दोलन, नेपाल (भोजपुरा कमाण्ड) ले नयाँ बन्न लागेको सरकारसँग आफ्ना मागहरू सम्बोधन हुने आशा व्यक्त गरेको छ । रौतहटको चन्द्रनिगाहपुरमा आयोजित पत्रकार सम्मेलनमार्फत आन्दोलनका प्रतिनिधिहरूले यस्तो अपेक्षा सार्वजनिक गरेका हुन् ।
आन्दोलनले विशेष गरी रवि लामिछाने गृहमन्त्री रहेको समयमा मिटरब्याज पीडितहरूको समस्या समाधान गर्ने प्रतिबद्धता जनाइएको स्मरण गर्दै अब उनको पार्टीका वरिष्ठ नेता बालेन शाह प्रधानमन्त्री बन्ने सम्भावनापछि आफूहरू थप आशावादी बनेको बताएका छन् ।
पत्रकार सम्मेलनमा आन्दोलनले मिटरब्याजसँग सम्बन्धित विभिन्न मागहरू अघि सारेको छ । जसअनुसार मिटरब्याजसँग जोडिएका सबै प्रकारका फर्जी कागजात खारेज गर्नुपर्ने, मिटरब्याजलाई अपराध घोषणा गर्दै कडा कानुन ल्याउनुपर्ने तथा विशेष न्यायाधिकरण गठन गरी छिटो न्याय सुनिश्चित गर्नुपर्ने उल्लेख गरिएको छ ।
त्यसैगरी, पीडितहरूको नाममा गैरकानुनी रूपमा हडपिएको सम्पत्ति फिर्ता गरिनुपर्ने, साहु–महाजनमाथि कडा कारबाही गर्नुपर्ने र पीडितलाई क्षतिपूर्ति तथा पुनस्र्थापना उपलब्ध गराउनुपर्ने माग पनि राखिएको छ ।
आन्दोलनका भोजपुरा इन्चार्ज शिवशंकर महतोले मिटरब्याज पीडितहरूको समस्या समाधान नभएसम्म आन्दोलन नरोकिने चेतावनी दिएका छन् । उनले राज्यले समयमै ठोस कदम नचाले देशव्यापी दबाबमूलक कार्यक्रम सञ्चालन गर्दै अझ सशक्त आन्दोलनमार्फत सरकारलाई दबाब दिने बताए ।
आन्दोलनले लामो समयदेखि मिटरब्याजका कारण किसान, मजदुर तथा साना व्यवसायीहरू गम्भीर आर्थिक तथा सामाजिक उत्पीडनमा परेको उल्लेख गर्दै राज्यले प्रभावकारी समाधान गर्न नसकेको आरोप लगाएको छ । विज्ञप्तिमा पीडितहरूले न्याय नपाउँदा निराशा बढ्दै गएको र अदालत तथा प्रशासनमा प्रभावका कारण निष्पक्ष निर्णय हुन नसकेको गुनासो गरिएको छ ।
पीडितहरू विस्थापित हुने, आत्मसम्मान गुमाउने तथा सामाजिक रूपमा अपमानित हुने अवस्थासम्म पुगेको आन्दोलनको दाबी छ । देशका विभिन्न जिल्लामा हजारौं पीडितले साहु–महाजनविरुद्ध उजुरी दिएका भए पनि ती उजुरीमाथि प्रभावकारी छानबिन र कारबाही हुन नसकेको भन्दै सरकारप्रति असन्तुष्टि व्यक्त गरिएको छ ।
सोनफी चौधरीको अध्यक्षतामा सम्पन्न पत्रकार सम्मेलनमा अर्जुन प्रसाद दहाल, नारायण प्रसाद घिमिरे, शेष अबुलैश लगायतका पीडितहरूले आफूमाथि भएको अन्यायबारे अनुभव सुनाएका थिए ।
यसैबीच, रौतहटको चन्द्रपुर नगरपालिका–४ निवासी रामबाबु प्रसाद कलवारमाथि मिटरब्याज प्रकरणमा गम्भीर आरोप लागेको छ । आन्दोलनका अनुसार उनले किसान, मजदुर तथा साना व्यवसायीलाई उच्च ब्याजदरमा ऋण दिँदै चक्रवृद्धि ब्याजमार्फत ऋणीहरूलाई फसाउने, घरजग्गा कब्जा गर्ने र फर्जी कागजातमार्फत सम्पत्ति आफ्नो नाममा सार्ने गरेको आरोप छ ।
पीडितहरूले जिल्ला प्रशासन कार्यालय र प्रहरीमा उजुरी दर्ता गराए पनि प्रभाव र पहुँचका कारण अहिलेसम्म ठोस कारबाही हुन नसकेको बताएका छन् । आन्दोलनले यस विषयमा निष्पक्ष छानबिन गरी दोषीमाथि कडा कारबाही गर्न सरकारसँग माग गरेको छ ।
आजको राशिफल बिस २०८२ चैत ५ गते बिहिवार ईस २०२६ मार्च १९ नेपाल सम्बत ११४६ चिल्लागा आमै , सिद्धार्थि नाम संवत्सर सूर्य दक्षिणायनं, वसन्त ऋतु, चैत कृष्ण औँसी , चन्द्रमा मीन राशिमा, उत्तरभाद्र नक्षत्र, शुक्ल योग, नाग करण । आज नेपालमा सुर्योदय बिहान ०६ बजेर ११ मिनेटमा र सूर्यास्त साँझ ६ बजेर १५ मिनेटमा हुनेछ । आज जन्म लिने बच्चा मीन राशीको हुनेछ ।
मेष (चु, चे, चो, ला, लि, लु, ले, लो, अ)जुनसुकै काम सम्हाल्दा विशेष सावधानी अपनाउनुपर्ने हुन्छ, अझ आर्थिक पक्ष हो भने सानातिना खर्चको पनि हेक्का राख्नु होला । महत्त्वहीन र बेकारका काममा समय नबिताउनु होला, बरु मन स्थिर छैन भने एकछिन आराम गरेर फेरि पठनपाठनमा जुट्नु ठीक हुनेछ । एकाग्रतामा कमी हुने भएकाले कुनै एउटा विषयमा मात्र ध्यान केन्द्रित गर्न सकिंदैन, हेर्दा बाहिरबाट सामान्य झैं देखिनु हुन्छ, तर भित्रबाट मँडारिएको भावनाको बेगलाई कसैले पनि बुझ्न सक्दैनन् ।
बृष (इ, उ, ए, ओ, बा, बि, बु, बे, बो)विगतमा गरिएको मिहिनेत र लगनशीलताको पुरस्कार प्राप्त हुने सुन्दर दिन हो, बोनस वा अतिरिक्त आम्दानीको सम्भावना पनि रहेको छ । भावना साटासाट गर्न पाइने र एकान्तमा रमाउन पाउँदा प्रेमसम्बन्ध अझ प्रगाढ बन्दै जाने समय देखिन्छ, प्रेमीबाट कुनै उपहार प्राप्त हुनेछ । नयाँ ठाउँको यात्रा वा नयाँ मित्रको सङ्गतबाट आनन्द लिने समय हो । प्रतिष्ठित व्यक्तिलाई मित्र बनाउन पाउँदा दङ्ग पर्न सक्नुहुन्छ ।
मिथुन (का, कि, कु, घ, ङ, छ, के, को, ह)आत्मविश्वास र दृढतामा बृद्धि हुनुका साथै मज्जाले परिश्रम गर्ने दिन हो । कारोबारमा बेफाइदा हुँदैन, तर पारिवारिक सम्बन्धमा निरसता देखिने छ । दौडधूप र धपेडी गर्ने समय छ । काममा कसैको साथसहयोग मिल्दैन, तर व्यक्तित्व विकास र प्रतिष्ठा प्राप्तिको प्रयासमा उपलब्धि लिन सकिने छ । करियर र भविष्यको सोच सलबलाउनेछ, कोसिस गरेमा कला, वाणिज्य, व्यवस्थापन र शिक्षाशास्त्रका उच्च तहका विद्यार्थीले कुनै अवसरसमेत पाउन सक्नुहुन्छ ।
कर्कट (हि, हु, हे, हो, डा, डि, डु, डे, डो)हातमा सह भएको दिन छ, नयाँ काममा हात हाल्दै हुनुहुन्छ भने यसले सकारात्मक गति समात्नेछ । सही समय र स्थान छनौट गर्न सके हरेक कदम सफल हुनेछन् । दैवले साथ दिने समय हो, जस्तोसुकै समस्या आइलागे पनि बुद्धि खियाएर काम गर्नुहोस्, सफल बन्न सक्नुहुन्छ । रोमान्टिक जीवनभन्दा पनि यतिवेला घरपरिवार र अभिभावक महत्त्वपूर्ण बन्नसक्छन्, भावनालाई नियन्त्रण गरी कुराकानी गर्ने र पार्टनरलाई फकाउने प्रयास गर्नुहोला ।
सिंह (मा, मि, मु, मे, मो, टा, टि, टु, टे)लेनदेनको कारोबारमा सतर्कता अपनाएको राम्रो हुन्छ । गिन्ती बिग्रिएर घाटा पर्नसक्छ । साथीभाइ र सहयोगीहरूले पनि फरक व्यवहार देखाउने दिन हो । अस्वस्थ हुनुहुन्छ भने समय निकालेर आराम गर्नु ठीक हुन्छ । खनिज पदार्थ र पुरातात्त्विक चिजबीजको व्यवसायमा फाइदा देखिन्छ । मनोबल र आँतमा कमजोरी देखा पर्नसक्छ, कामधाम र जिम्मेबारीमा मात्र होइन, आफ्नो तन्दुरुस्ती र स्वास्थ्यपक्षको पनि ख्याल राख्नुपर्छ ।
कन्या (टो, प, पि, पु, ष, ण, ठ, पे, पो)कलात्मक कार्य जस्ता काम अथवा उपहार वा मनोरञ्जनका सामाग्रीमा राम्रो देखिन्छ । मनोरञ्जनात्मक क्रियाकलापमा संलग्न हुने तथा भोजन र परिकारको स्वादमा रमाउने दिन छ, तर पनि जीवनसाथीको इच्छा र रुचिलाई ध्यान दिनु ठीक हुन्छ । तपाईंलाई गुरुवर्ग र अभिभावकले निकै भरोसा र विश्वास राखेको देखिन्छ, अतः लक्ष्यप्रति सचेत भई टुप्पी कसेर मिहिनेत गर्ने समय छ ।
तुला (र, रि, रु, रे, रो, ता, ति, तु, ते)शत्रु र प्रतिद्वन्द्वी वरिपरि छन् भन्ने हेक्का राखी काम गर्नुहोला, कुनै विशेष काम गर्नुछ भने तौरतरिका र योजनालाई गोप्य राख्ने प्रयास गर्नुपर्छ । प्रेमीको स्वास्थ्यस्थिति वा कार्यक्षेत्रमा समस्या उत्पन्न हुनाले मन निराश बन्नसक्छ, तर पनि मौका मिलाएर भावना साटासाट गर्न पाउँदा शान्तिको अनुभूति हुनेछ । नियमित कामधन्दा र दैनिकी सञ्चालनका क्रममा फुर्तिको अनुभूति हुनेछ । प्रयास गरेमा चलिरहेको आर्थिक समस्याको हल हुनसक्ने समय छ ।
बृश्चिक (तो, ना, नि, नु, ने, नो, या, यि, यु)छोराछोरीको क्रियाकलाप र उन्नतिरप्रगति देखेर दंग पर्ने तथा सुखानुभूति हुने दिन हो । परिवारजनको सहमति जुट्नाले नचिताएको काम सम्पन्न गर्न सकिने छ । बौद्धिकतामा निखार आउने दिन हो, अतः विषयवस्तुप्रति गम्भीर बन्न प्रयास गर्नुहोला, पढाइमा लगाव बढाउनुपर्छ, सोचेजस्तै रिजल्ट पाउन सकिने छ । शिक्षादीक्षाका क्षेत्रमा लागेका व्यक्तिले क्षमता प्रदर्शन गरी स्याबासी पाउन सक्ने दिन हो । सामान्य जनले समेत ज्ञानगुन, अध्यात्म र दार्शनिक विषयमा आकर्षण देखाउनेछन् । बौद्धिक र लेखनकार्यमा सफलता मिल्नेछ ।
धनु (ये, यो, भ, भि, भु, ध, फा, ढ, भे)पारिवारिक समस्याले खिन्न बनाउनेछ, तर आज लापरबाही गर्ने वा भुलिने दिन होइन किनभने आज गरेको मिहिनेतले राम्रो रिजल्ट दिनसक्छ । मानसिक अस्थिरताको समय हो, मेसो नमिल्नाले पनि काममा ढिलासुस्ती हुनसक्छ, असाध्यै दौडधूप गर्नुपर्ने समय छ, सानो लापरवाहीले पनि ठूलो नोक्सानी हुनसक्छ, अतः महँगा चिजबीजको प्रयोग गर्दा सावधान रहनुहोला । आत्मविश्वासमा बृद्धि हुनेछ तर कामको चाप बढ्ने समय हो, तथापि साथीभाइको सहयोग लिएर काम गरेमा सबै काम पूरा गर्न सकिने छ ।
मकर (भो, ज, जि, खि, खु, खे, खो, गा, गि)भावना र मनको कुरो सेयर गर्ने कुनै साथी छ भने ऊ तपाईंप्रति आकर्षित भएको हुनुपर्छ, अतः उसको निकटतालाई नगुमाउनु राम्रो हुन्छ । कार्यक्षेत्रमा उत्साहवर्द्धक परिणाम प्राप्त हुनेछ । नवीन रोजगारी वा नयाँ कारोबारप्रति आकर्षण देखिन्छ, नचिताएको काम पूरा हुने दिन हो । कामप्रतिको समर्पण भावका माध्यमबाट ठूलो लाभ मिल्ने समय छ, साथै बोली र व्यवहारका बलमा सेवाग्राहीलाई आकर्षित तुल्याउन सकिने छ ।
कुम्भ (गु, गे, गो, सा, सि, सु, से, सो, द)एक्लै हुनुहुन्छ भने अब निराश हुनुपर्दैन, आज त्यस्तो व्यक्तिसँग चिनजान हुनेछ, जसले तपाईंको मनभित्रको उजाड फूलबारीलाई रङ्गीन बनाउन सक्छ । नौलो विषयमा चासो देखाउनु तथा नयाँ ठाउँमा धन लगानी गर्नु उचित समय छैन, दैनिकी सञ्चालनमा समेत बाधा झेल्नुपर्ने समय छ । नाफाका दृष्टिले राम्रै समय देखिन्छ, तर वाचा पूरा गर्न नसक्नाले सेवाग्राहीको आलोचना खेप्नुपर्ने हुन्छ, बोली र व्यवहारमा नम्रता अपनाउनु होला ।
मीन (दि, दु, थ, झ, ञ, दे, दो, च, चि)लगनशील भई परिश्रम गरेमा उत्कृष्ट परिणाम प्राप्त हुनेछ, आजको सानो प्रयासमा भाग्यको समेत साथ पाउनाले राम्रो रिजल्ट आउने छ । आत्मबल बढ्ने छ, नयाँ ज्ञान प्राप्त गर्ने वा विगतको सिकाइ अनुभवको प्रयोग गरी अघि बढ्ने समय हो । धन वा प्रतिष्ठाको बृद्धिका लागि चालेका हरेक प्रयास सफल हुनेछन् । लामो समयदेखि सुल्झाउन नसकेको मुद्दालाई किनारा लगाउन सकिने छ, मुल्तवी र तामेलीमा परेका फाइलमा घोत्लिंदा धन र मान दुबै पक्षमा बढोत्तरी हुनेछ । एभरेष्ट न्यूज एजेन्सी
काठमाडौँ । जल तथा मौसम विज्ञान विभागले हाल नेपालमा पश्चिमी न्यून चापीय प्रणाली र स्थानीय वायूको आंशिक प्रभाव रहेको जानकारी दिएको छ ।हाल देशको हिमाली भू-भागमा साधारणतया बादल लागेको छ, कोशी प्रदेशको पहाडी भू-भाग र मधेशमा आंशिक बादल लागेको छ तथा बाँकी भू-भागमा मौसम मुख्यतया सफा रहेको छ ।आज दिउँसो कर्णाली र सुदुरपश्चिम प्रदेश लगायत बाँकी प्रदेशको पहाडी र हिमाली भू-भागमा साधारणतया बादल लाग्ने तथा बाँकी भू-भागमा आंशिक बादल लाग्नेछ। कर्णाली र सुदुरपश्चिम प्रदेशको पहाडी र हिमाली भू-भागका केही स्थानहरू, लुम्बिनी र गण्डकी प्रदेशको पहाडी र हिमाली भू-भागका थोरै स्थानहरू तथा कोशी र बागमती प्रदेशको पहाडी र हिमाली भू-भाग लगायत सुदुरपश्चिम प्रदेशको तराईका एक-दुई स्थानमा मेघगर्जन/चट्याङ्ग/असिना सहित मध्यम वर्षा/हिमपातको सम्भावना रहेको छ।त्यस्तै आज राती लुम्बिनी, कर्णाली र सुदुरपश्चिम प्रदेश लगायत गण्डकी, बागमती र कोशी प्रदेशको पहाडी र हिमाली भू-भागमा साधारणतया बादल लाग्ने तथा बाँकी तराई भू-भागमा आंशिक बादल रहनेछ। कर्णाली र सुदुरपश्चिम प्रदेशका केही स्थानहरू, लुम्बिनी र गण्डकी प्रदेशको पहाडी र हिमाली भू-भागका थोरै स्थानहरू तथा बागमती र कोशी प्रदेशको हिमाली भू-भागका एक-दुई स्थानमा मेघगर्जन/चट्याङ्ग/असिना सहित मध्यम वर्षा/हिमपातको सम्भावना रहेको छ । एभरेष्ट न्यूज एजेन्सी
काठमाडौँ । आज चैते दशैको घटस्थापना परेको छ । नेपाल पञ्चाङ्ग निर्णायक विकास समितिले आज चैते दशैको घटस्थापनाको शुभ साइत विहान ७ बजेर ५१ मिनेटमा रहेको जानकारी दिएको छ ।चैते दशैको घटस्थापनामा उत्तर फर्केर घटस्थापना गर्न समितिले आग्रह गरेको छ ।चैते दशैँकै दिन मर्यादा पुरुष श्री राम आफ्नो १४ वर्षे वनबास सकाएर अयोध्या फर्किएको अवसरमा मनाइएको भन्ने मान्यता पनि छ । बनबासबाट सकुशल आगमन भएकोमा अयोध्यावासीलगायत सबैले असत्यमाथि सत्यको जितको रूपमा चैते दशै मनाएका हुन् भन्ने सामाजिक कथन एवं विश्वास रहेको छ । एभरेष्ट न्यूज एजेन्सी,
आरके श्रीवास्तव, रौतहट, चैत ०४ गते ।
रौतहटको गढीमाई नगरपालिका–६ धरमपुरस्थित घोडी देवी समाज कल्याण केन्द्रले आफ्नो पहिलो सामाजिक परीक्षण कार्यक्रम सफलतापूर्वक सम्पन्न गरेको छ। पारदर्शिता र जवाफदेहितालाई सुदृढ बनाउने उद्देश्यसहित आयोजित उक्त कार्यक्रम आर्थिक वर्ष २०८१÷०८२ मा सञ्चालन गरिएका विभिन्न गतिविधिहरूको समीक्षा केन्द्रित रहेको थियो ।
कार्यक्रममा संस्थाका सचिव उग्रनारायण यादवले संस्थाले गरेको कार्यप्रगति, कार्यक्रम सञ्चालन अवस्था तथा आर्थिक व्यवस्थापन सम्बन्धी विस्तृत प्रस्तुति राख्नुभएको थियो। प्रस्तुतिपछि सहभागीहरू तथा सरोकारवालाबीच खुला छलफल भएको थियो, जसले संस्थाको कार्यसम्पादनलाई थप प्रभावकारी बनाउने अपेक्षा गरिएको छ ।
गढीमाई नगरपालिकाकी उपप्रमुख स्मिता यादवको प्रमुख आतिथ्यमा सम्पन्न कार्यक्रमको अध्यक्षता संस्थाका अध्यक्ष उमाकान्त राय यादवले गर्नुभएको थियो। कार्यक्रममा असमान नेपालका एक्टिभ परियोजना संयोजक रामप्रवेश यादवले परियोजनाको उद्देश्य र उपलब्धिबारे जानकारी गराउँदै युवा सदस्यहरूको क्षमता विकास, पारदर्शिता अभिवृद्धि तथा संस्थागत सुदृढीकरणमा सहयोग पुगेको बताउनु भयो ।
उक्त एक्टिभ परियोजना भिएसओको प्राविधिक सहयोगमा आसमान नेपालद्वारा कार्यान्वयन भइरहेको जनाइएको हो। परियोजनाले स्थानीय तहमा सुशासन प्रवद्र्धन गर्दै युवाहरूलाई नेतृत्व विकासतर्फ अग्रसर गराउने लक्ष्य राखेको आसमान नेपालका कर्मचारी जितेन्द्र पासवानले जानकारी गराउनु भयो ।
स्थानीय सरकार सञ्चालन ऐन, २०७४ लगायतका कानुनी व्यवस्थाअनुसार सार्वजनिक निकायहरूले नियमित रूपमा सामाजिक परीक्षण गर्नुपर्ने प्रावधान भए पनि व्यवहारमा यसको कार्यान्वयन कमजोर देखिँदै आएको छ । यस्ता अवस्थामा घोडी देवी समाज कल्याण केन्द्रले पहिलोपटक सामाजिक परीक्षण सम्पन्न गर्नु सकारात्मक कदमका रूपमा हेरिएको छ ।
कार्यक्रमले स्थानीय स्तरमा पारदर्शिता, उत्तरदायित्व र सहभागितामूलक विकासलाई प्रवद्र्धन गर्ने विश्वास लिइएको छ ।
बज्जिकाञ्चल संवाददाता,काठमाडौं,०१ गते चैत ।
काठमाडौँ । पश्चिम एसियामा जारी द्वन्द्वले ऊर्जा आपूर्तिमा असर गरिरहेको छ । धेरै देशहरूमा एलपीजी ग्यासको उपलब्धता प्रभावित भएको छ र मूल्यहरू बढ्दै गइरहेका छन् । अहिले धेरै देशमा ग्यास आपूर्तिमा दबाब छ । यसले गर्दा मानिसहरूले खाना पकाउन इन्डक्सन प्रयोग गर्न थालेका छन् । यद्यपि, इन्डक्सनको बारेमा धेरै चिन्ताहरू पनि छन् ।प्रायः यो विश्वास गरिन्छ कि इन्डक्सन प्रयोग गर्दा बिजुलीको लागत उल्लेखनीय रूपमा बढ्छ । यद्यपि, प्राविधिक रूपमा, इन्डक्सनले भाँडोको तल्लो भागलाई सिधै तताउँछन् । यसले ऊर्जा खपत कम गर्छ, जसले गर्दा परम्परागत ग्यास चुल्हो भन्दा धेरै अवस्थामा तिनीहरूलाई किफायती बनाउछ ।यो विश्वास आंशिक रूपमा सत्य हो । फलाम वा स्टेनलेस स्टील जस्ता चुम्बकीय तल्लो भएका भाँडाहरू मात्र इन्डक्सनमा काम गर्छन् । आज बजारमा पाइने धेरैजसो भाँडा इन्डक्सनअनुकूल नै हुने गर्दछ छन् ।खाना पकाउदा इन्डक्सनमा थोरै पानी वा तरकारी पोखियो भने, सामान्यतया बिजुली झट्का लाग्ने जोखिम हुँदैन । यद्यपि, यदि धेरै पानी भित्र पस्यो भने, यसले सर्किटलाई क्षति पुर्याउन सक्छ र उपकरणलाई क्षति पुर्याउन सक्छ । त्यसैले, इन्डक्सनलाई सधैं सफा र सुख्खा राख्नु राम्रो हुन्छ ।धेरै मानिसहरू सोच्छन्, इन्डक्सन प्रयोग गर्दा बिजुलीको झट्का लाग्न सक्छ । वास्तवमा, धेरैजसो इन्डक्सनहरूको सतह टेम्पर्ड ग्लास वा सिरेमिकबाट बनेको हुन्छ, जसमा बिजुली सञ्चार हुदैन । खाना पकाउँदा भाँडो मात्र तातिन्छ, जबकि इन्डक्सनको सतह तुलनात्मक रूपमा सुरक्षित रहन्छ । त्यसैले, सामान्य परिस्थितिमा, बिजुलीको झट्का लाग्ने जोखिम धेरै कम हुन्छ ।एभरेष्ट न्यूज एजेन्सी
बज्जिकाञ्चल संवाददाता,काठमाडौं,०१ गते चैत ।
काठमाडौँ । नेपाली काँग्रेसले केन्द्रीय कार्यसम्पादन समितिको बैठक बोलाएको छ ।काँग्रेसले आज दिउँसो १ बजे केन्द्रीय कार्यालय, सानेपामा बस्ने गरी बैठक बोलाएको कावा मुख्य सचिव कृष्णप्रसाद दुलालले जानकारी दिएका छन् । बैठकमा केन्द्रीय कार्यसम्पादन समितिका पदाधिकारी एवं सदस्यहरूको उपस्थिति हुने छन् । बैठकले समानुपातिक बन्दसूचीमा रहेका उम्मेदवारहरूमध्ये दलले प्राप्त गरेको सिट संख्याको आधारमा प्रतिनिधि सभा सदस्य छनौट गरी निर्वाचन आयोगमा पठाउने निर्णय गर्ने एजेण्डा रहेको छ । एभरेष्ट न्यूज एजेन्सी,
बज्जिकाञ्चल संवाददाता,राैतहट,०१ गते चैत ।
काठमाडौँ । राष्ट्रिय स्वतन्त्र पार्टी (रास्वपा) ले सचिवालय बैठक आज बस्ने भएको छ ।प्रवक्ता मनिष झाका अनुसार रास्वपाको शनिबार बस्ने भनिएको सचिवालय बैठक आज पार्टी कार्यालय बनस्थलीमा बिहान १० बजे बस्ने भएको छ बैठकले समानुपातिक उम्मेदवार सिफारिस गर्ने निर्णय गर्ने बताइएको छ । एभरेष्ट न्यूज एजेन्सी,
बज्जिकाञ्चल संवाददाता,काठमाडौं,०१ गते चैत ।
काठमाडौँ । आज विश्व उपभोक्ता अधिकार दिवस मनाइदैंछ । हरेक वर्ष मार्च १५ लाई विश्व उपभोक्ता अधिकार दिवको रूपमा मनाउने गरिन्छ । यस बर्षको विश्व उपभोक्ता अधिकार दिवस २०२६ को विषयवस्तु ‘सुरक्षित उत्पादन, आत्मविश्वासी उपभोक्ता’ भन्ने रहेको छ, जसले उत्पादन सुरक्षाको लागि महत्वपूर्ण आवश्यकता, खतरनाक वस्तुहरू विरुद्ध बलियो नियमनहरू र भौतिक र डिजिटल बजार दुवैमा विश्वास निर्माणमा केन्द्रित छ । यस विषयवस्तुले सुरक्षित उत्पादनहरूले आत्मविश्वासी उपभोक्ताहरूलाई डोऱ्याउने कुरालाई प्रकाश पार्छ ।
सन् १९६२ मार्च १५ का दिन अमेरिकी राष्ट्रपति जोन एफ केनेडीले प्रस्तुत गरेको सुरक्षा, सूचना, छनोट र सुनुवाइलाई उपभोक्ताका चार अधिकारका रूपमा घोषणा गरिएको सम्झनामा विश्वभर यो दिवस मनाइन्छ । चार अधिकारका आधारमा संयुक्त राष्ट्रसंघको साधारण सभाबाट सन् १९८५ मा थप आठ अधिकारसहितको अनुवन्ध पारित भएको थियो । सोही आधारमा प्रत्येक राष्ट्रले उपभोक्ता कानुन जारी गरेका छन् । संयुक्त राष्ट्रसंघबाट पारित उपभोक्ता संरक्षण अनुबन्ध १९८५ र उपभोक्ता संरक्षण ऐन २०५४ को दफा ६ बमोजिम वस्तु वा सेवा खरिद तथा उपभोग गर्ने प्रत्येक उपभोक्तालाई विभिन्न अधिकार प्रत्याभूति गरिएको छ ।
उपभोक्ताका आठ अधिकारमा सुरक्षा, सूचित, छनोट, सुनुवाइ, उपभोक्ता शिक्षा, क्षतिपूर्ति, आधारभूत आवश्यकतामा पहुँच र स्वच्छ तथा स्वस्थ वातावरणको अधिकार छन् । नेपालमा पनि विभिन्न उपभोक्ता हितसँग सम्बन्धित विभिन्न कार्यक्रम गरेर मनाइँदैछ । एभरेष्ट न्यूज एजेन्सी
हनुमत कुमार यादव,गाैर,३० गते फाल्गुन ।
प्रादेशिक अस्पताल गौर, रौतहटमा कर्मचारी आवास भवन निर्माणको शिलान्यास कार्यक्रम आज एक विशेष समारोहका बीच सम्पन्न भएको छ । अस्पताल व्यवस्थापन समितिका अध्यक्ष अवधेश यादवको अध्यक्षतामा आयोजित कार्यक्रममा मधेश प्रदेशका मुख्यमन्त्री माननीय कृष्ण प्रसाद यादव प्रमुख अतिथिको रूपमा सहभागी हुनु भएको थियो भने मधेसका स्वास्थ्य तथा जनसंख्या मन्त्री जङ्गीलाल राय विशिष्ट अतिथिका रूपमा उपस्थित हुनु भएको थियो ।
कार्यक्रममा मुख्यमन्त्री कृष्ण प्रसाद यादव र स्वास्थ्य तथा जनसंख्या मन्त्री जङ्गीलाल रायले संयुक्त रूपमा कर्मचारी आवास भवनको शिलान्यास गर्नु भएको हो । शिलान्यास कार्यक्रमका क्रममा उपस्थित अतिथिहरूले स्वास्थ्य सेवाको गुणस्तर अभिवृद्धि गर्न तथा अस्पतालका कर्मचारीलाई सहज वातावरण प्रदान गर्न कर्मचारी आवास भवन निर्माण अत्यन्त महत्वपूर्ण कदम रहेको धारणा व्यक्त गरे ।
प्रमुख अतिथि मुख्यमन्त्री यादवले आफ्नो मन्तव्यमा मधेश प्रदेश सरकारले स्वास्थ्य क्षेत्रको सुदृढीकरणलाई उच्च प्राथमिकतामा राखेको बताउँदै प्रादेशिक अस्पताल गौरलाई आधुनिक तथा सुविधासम्पन्न बनाउने दिशामा निरन्तर पहल भइरहेको उल्लेख गर्नुभयो । उहाँले कर्मचारीहरूको आवासीय सुविधा सुधार हुँदा सेवाग्राहीलाई पनि छिटो र प्रभावकारी सेवा उपलब्ध हुने विश्वास व्यक्त गर्नुभयो ।
त्यसैगरी विशिष्ट अतिथि स्वास्थ्य तथा जनसंख्या मन्त्री जङ्गीलाल रायले अस्पतालको भौतिक पूर्वाधार विस्तारले स्वास्थ्य सेवाको पहुँच र गुणस्तर दुवैमा सकारात्मक प्रभाव पर्ने बताउनुभयो । उहाँले प्रदेश सरकारले स्वास्थ्य संस्थाहरूको विकासका लागि आवश्यक बजेट र नीति निर्माणमा विशेष ध्यान दिइरहेको पनि जानकारी दिनुभयो ।
अस्पताल व्यवस्थापन समितिका अध्यक्ष अवधेश यादवले कार्यक्रममा बोल्दै कर्मचारी आवास भवन निर्माणले अस्पतालका चिकित्सक तथा कर्मचारीलाई स्थायी रूपमा सेवा दिन प्रोत्साहन मिल्ने विश्वास व्यक्त गर्नुभयो । उहाँले प्रदेश सरकार तथा सम्बन्धित निकायको सहयोगले अस्पतालको समग्र विकास सम्भव भएको उल्लेख गर्नुभयो ।
कार्यक्रममा मधेश प्रदेश सरकारका विधेयक नागेन्द्र साह जयसवाल, मेसु मुरारी ठाकुर लगायत विभिन्न राजनीतिक व्यक्तित्व, स्वास्थ्यकर्मी, स्थानीय प्रतिनिधि तथा सर्वसाधारणको उल्लेखनीय उपस्थिति रहेको थियो ।
निर्माण हुन लागेको कर्मचारी आवास भवनले भविष्यमा अस्पतालका कर्मचारीलाई बसोबासको सुविधा प्रदान गर्दै अस्पतालको सेवा प्रणालीलाई अझ व्यवस्थित र प्रभावकारी बनाउने अपेक्षा गरिएको छ ।
