काठमाडौँ । चीनमा विद्युतीय सवारीसाधनको प्रयोग तीव्र रूपमा बढ्दै जाँदा जीवाश्म इन्धनमा निर्भरता उल्लेखनीय रूपमा घटिरहेको एक नयाँ अध्ययनले देखाएको छ ।

वित्तीय सेवा कम्पनी जेफ्रिजले सार्वजनिक गरेको प्रतिवेदनअनुसार चीनले सन् २०२६ को पहिलो छ महिनामा विद्युतीय सवारीका कारण ३ करोड ३७ लाख टन तेल बराबरको इन्धन बचत गरेको छ । यो दैनिक करिब १४ लाख ब्यारेल तेलको खपत घटेको बराबर हो ।

प्रतिवेदनले ऊर्जा तथा स्वच्छ वायु अनुसन्धान संस्थाको अध्ययनलाई उद्धृत गर्दै विद्युतीय सवारीका कारण बचत भएको इन्धनको मात्रा अघिल्लो वर्षको तुलनामा ४२ प्रतिशतले वृद्धि भएको जनाएको छ ।

प्रतिवेदनअनुसार सन् २०२६ को पहिलो छ महिनामा बचत भएको इन्धनको मात्रा चीनले सन् २०२५ मा आयात गरेको कुल कच्चा तेलको करिब ६ प्रतिशत बराबर हो ।

सन् २०२३ को पहिलो छ महिनामा विद्युतीय सवारीका कारण १ करोड १६ लाख टन तेल बराबर इन्धन बचत भएको थियो । तीन वर्षमै यो मात्रा झण्डै तीन गुणाले बढेको प्रतिवेदनमा उल्लेख छ ।

जीवाश्म इन्धनको खपत घट्नुको मुख्य कारण चीनमा नयाँ ऊर्जा सवारीसाधनको बिक्री तीव्र रूपमा बढ्नु रहेको प्रतिवेदनले जनाएको छ । नयाँ ऊर्जा सवारीमा पूर्ण रूपमा ब्याट्रीबाट चल्ने सवारी र प्लग-इन हाइब्रिड सवारी समावेश छन् ।

जेफ्रिजका अनुसार सन् २०२६ को जुन महिनामा चीनमा बिक्री भएका कुल यात्रुवाहक सवारीमध्ये ६३ प्रतिशत नयाँ ऊर्जा सवारी थिए । सन् २०२४ को जनवरीमा यो हिस्सा ३३ प्रतिशत मात्र रहेको थियो ।

अन्तर्राष्ट्रिय ऊर्जा एजेन्सीको विश्वव्यापी विद्युतीय सवारी प्रतिवेदन-२०२६ ले पनि विद्युतीय सवारीको विस्तारले तेलको मागमा ठूलो प्रभाव पारिरहेको जनाएको छ ।

एजेन्सीका अनुसार सन् २०२५ मा चीनमा विद्युतीय सवारीका कारण दैनिक करिब १० लाख ब्यारेल तेलको माग घटेको थियो । यो संख्या सन् २०३० सम्म दैनिक २७ लाख ब्यारेल पुग्ने अनुमान गरिएको छ ।

जेफ्रिजले विद्युतीय सवारीको बढ्दो प्रयोगले चीनको ऊर्जा खपतको स्वरूप नै परिवर्तन गरिरहेको जनाएको छ । आगामी वर्षहरूमा नयाँ ऊर्जा सवारीको हिस्सा अझ बढ्दै जाँदा तेलको खपत निरन्तर घट्ने र देश क्रमशः स्वच्छ ऊर्जा स्रोततर्फ अघि बढ्ने अपेक्षा गरिएको छ ।

प्रतिवेदनका अनुसार चीनमा विद्युतीय सवारीको विस्तार केवल सवारी बजारमा सीमित नरही ऊर्जा सुरक्षा, इन्धन आयातमा निर्भरता र स्वच्छ ऊर्जातर्फको संक्रमणलाई समेत नयाँ दिशा दिने महत्वपूर्ण आधार बनेको छ ।एभरेष्ट न्यूज एजेन्सी

काठमाडौं । ऊर्जा, जलस्रोत तथा सिँचाइ मन्त्री विराज भक्त श्रेष्ठले ऊर्जा, जलस्रोत तथा सिँचाइ क्षेत्रको विकासमा सबैभन्दा ठूलो चुनौती आयोजना निर्माणभन्दा बाहिर रहेका नीतिगत तथा प्रक्रियागत अवरोध भएको बताएका छन् ।

जग्गा अधिग्रहण, मुआब्जा व्यवस्थापन, स्रोत सुनिश्चितता, अन्तरनिकाय समन्वय र ठेक्का व्यवस्थापनमा सुधार नगरी अपेक्षित विकास सम्भव नहुने उनको भनाइ छ ।

आर्थिक वर्ष २०८२/८३ को चौथो त्रैमासिक एवं वार्षिक प्रगति समीक्षा तथा मन्त्रालयस्तरीय विकास समस्या समाधान समितिको बैठकलाई सम्बोधन गर्दै मन्त्री श्रेष्ठले आफूले आर्थिक वर्षको अन्तिम चरणतिर मन्त्रालयको नेतृत्व गर्ने अवसर पाएको उल्लेख गर्दै छोटो अवधिमा मन्त्रालयका नीति, कार्यक्रम तथा आयोजनाको समीक्षा गर्दा गत वर्ष उपलब्धि र आत्मसमीक्षा दुवैका दृष्टिले महत्वपूर्ण रहेको बताए ।

उनले विभिन्न चुनौतीका बाबजुद मन्त्रालयले सन्तोषजनक भौतिक प्रगति हासिल गरेको बताए । मन्त्री श्रेष्ठले नेपाल–भारत ऊर्जा सहकार्य थप सुदृढ हुनु, प्रसारण पूर्वाधार विस्तारको प्रक्रिया अघि बढ्नु, नेपाल विद्युत प्राधिकरणलाई ऊर्जा बण्ड जारी गर्ने निर्णय हुनु तथा राष्ट्रिय प्राथमिकताका आयोजनाहरूलाई थप गति दिनु गत आर्थिक वर्षका महत्वपूर्ण उपलब्धि बताए ।

उनले चालु आर्थिक वर्ष २०८३/८४ लाई अवसर र परिणामको वर्षका रूपमा लिइएको उल्लेख गर्दै विद्युत उत्पादन, प्रसारण, वितरण तथा ऊर्जा व्यापार विस्तारसँगै हरित ऊर्जाको प्रवद्र्धन, निजी क्षेत्रको सक्रिय सहभागिता, क्षेत्रीय ऊर्जा बजारमा नेपालको उपस्थिति, भूमिगत जल व्यवस्थापन तथा बहुउद्देश्यीय आयोजनाको प्रभावकारी कार्यान्वयनमार्फत गुणात्मक परिवर्तन ल्याउने आधार तयार भएको बताए  ।

प्रगति समीक्षाअनुसार आर्थिक वर्ष २०८२/८३ मा मन्त्रालयको कुल बजेट ८४ अर्ब ३३ करोड मध्ये ५२ अर्ब २८ करोड रुपियाँ खर्च भएको छ। मन्त्रालयको वित्तीय प्रगति करिब ६२ प्रतिशत र भौतिक प्रगति ७१.३५ प्रतिशत पुगेको छ । ऊर्जा क्षेत्रको भौतिक प्रगति ६३.२७ प्रतिशत र जलस्रोत तथा सिँचाइ क्षेत्रको भौतिक प्रगति ७९.२७ प्रतिशत रहेको छ ।

बैठकमा बुढीगण्डकी र अपर अरुण जलविद्युत आयोजनाको लगानी मोडालिटी स्वीकृत हुनु, ट्यारिफ बेस्ड कम्पेटिटिभ बिडिङ मार्फत प्रसारण लाइन निर्माण प्रक्रिया अघि बढ्नु, ऊर्जा, जलविद्युत र सिँचाइका महत्वपूर्ण आयोजनालाई राष्ट्रिय प्राथमिकता प्राप्त आयोजना घोषणा गर्नु, नेपाल–भारत ऊर्जा सचिवस्तरीय संयन्त्रको १३औँ बैठक सम्पन्न हुनु, ऊर्जा तथा जलस्रोतसम्बन्धी नयाँ विधेयकहरू अगाडि बढ्नु र नेपाल विद्युत प्राधिकरणलाई २० अर्ब बराबरको ऊर्जा बण्ड जारी गर्न स्वीकृति दिनु मन्त्रालयका प्रमुख उपलब्धिका रूपमा प्रस्तुत गरिएको थियो ।

यसैगरी वैकल्पिक ऊर्जा प्रवद्र्धन केन्द्र, जलस्रोत तथा सिँचाइ विभाग र नेपाल विद्युत प्राधिकरणको प्रगति सन्तोषजनक रहेको तथा विद्युत विकास विभाग र जल तथा ऊर्जा आयोगको कार्यसम्पादन अपेक्षाकृत कमजोर रहेको जानकारी बैठकमा दिइयो । स्रोत सहमति ढिलाइ, स्थानीय अवरोध, जनशक्ति अभाव तथा वातावरणीय स्वीकृतिमा हुने ढिलाइलाई कमजोर प्रगतिका मुख्य कारणका रूपमा औँल्याइएको छ।

राष्ट्रिय गौरवका आयोजनामध्ये रानी–जमरा–कुलरिया, बबई र सिक्टा सिँचाइ आयोजनाले उल्लेखनीय प्रगति हासिल गरेका छन् भने भेरी–बबई डाइभर्सन, सुनकोशी–मरिन र बुढीगण्डकी आयोजनामा जग्गा अधिग्रहण, ठेक्का व्यवस्थापन तथा स्रोत परिचालनका चुनौती अझै कायम रहेको समीक्षा प्रस्तुत गरिएको छ । बैठकले आगामी वर्षको सफलता जग्गा अधिग्रहण, वन तथा वातावरणीय स्वीकृति, प्रसारण लाइनको ‘राइट अफ वे’ समस्या समाधान, निर्माण व्यवसायीको कार्यसम्पादन सुधार, स्रोत सुनिश्चितता तथा अन्तरनिकाय समन्वयलाई प्रभावकारी बनाउन सकिएमा मात्र सम्भव हुने निष्कर्ष निकालेको छ ।एभरेष्ट न्यूज एजेन्सी

‎शिवनाथ कुशवाहा, श्रावण १६ गते ।

‎रौतहट जिल्लाको कटहरिया नगरपालिका अन्तर्गत कहरिया क्षेत्रमा खाना पकाउने एलपी ग्यासको अभाव देखिएको भन्दै स्थानीय उपभोक्ताले गुनासो गरेका छन्।
‎
‎स्थानीयका अनुसार ग्यास समयमै उपलब्ध नहुँदा दैनिक खाना पकाउन समस्या भएको छ। ग्यास खोज्दै विभिन्न डिलर र पसल धाउनुपरेको तथा कतिपय उपभोक्ता खाली सिलिन्डर बोकेर फर्किन बाध्य भएका छन्। सर्वसाधारणले सम्बन्धित निकायलाई आपूर्ति व्यवस्था सहज बनाउन आग्रह गरेका छन्।
‎
‎नेपाल आयल निगमले भने हाल देशभर ग्यास आपूर्ति सामान्य अवस्थामा ल्याइएको र पूर्ण १४.२ केजीका सिलिन्डर वितरण भइरहेको जनाएको छ।
‎
‎स्थानीय बासिन्दाले कटहरिया क्षेत्रमा देखिएको ग्यास अभाव तत्काल समाधान गरी नियमित आपूर्ति सुनिश्चित गर्न सम्बन्धित निकायसँग माग गरेका छन्।

काठमाडौँ । जल तथा मौसम विज्ञान विभाग अन्तर्गत मौसम पूर्वानुमान महाशाखाले हाल देशभर मनसुनी वायुको प्रभाव रहेको र मनसुनको न्यून चापीय रेखा पश्चिममा सरदर स्थानको आसपास तथा पूर्वमा सरदर स्थानभन्दा केेही उत्तरतर्फ रहेको जानकारी दिएको छ ।

हाल सुदूरपश्चिम प्रदेशको तराई भू-भागमा आंशिक बादल लागेको छ, बाँकी भू-भागमा साधारणतया बादल लागेको छ। कोशी, बागमती र कर्णाली प्रदेशका केहि स्थानमा तथा गण्डकी र लुम्बिनी प्रदेशका थोरै स्थानमा हल्का देखि मध्यमसम्मको वर्षा भइरहेको छ ।

आज दिउँसो देशभर साधारणतया बादल लाग्नेछ। देशका हिमाली भू-भागका केही स्थानमा मध्यमसम्मको वर्षा/हिमपातको सम्भावना छ। देशका पहाडी भू-भागका धेरै स्थानमा मध्यमसम्मको वर्षाको सम्भावना छ। साथै तराई भू-भागका केही स्थानमा मध्यमसम्मको वर्षाको सम्भावना छ। कोशी, बागमती, गण्डकी, लुम्बिनी र कर्णाली प्रदेशका पहाडी भू-भागका एक-दुई स्थानमा भारी वर्षाको सम्भावना छ ।

त्यस्तै आज राति देशभर साधारणतया बादल लाग्नेछ। कोशी, बागमती, गण्डकी प्रदेशको हिमाली भू-भागका केही स्थानमा तथा लुम्बिनी, कर्णाली र सुदुरपश्चिम प्रदेशको हिमाली भू-भागको थोरै स्थान मध्यमसम्मको वर्षा/हिमपातको सम्भावना छ। कोशी, बागमती, गण्डकी र लुम्बिनी प्रदेशका पहाडी भू-भागका धेरै स्थान तथा कर्णाली र सुदुरपश्चिम प्रदेशका पहाडी भू-भागका केही स्थानमा  मध्यमसम्मको वर्षाको सम्भावना छ। मधेश तथा कोशी, बागमती, गण्डकी र लुम्बिनी प्रदेशका तराई भू-भागका धेरै स्थानमा तथा सुदुरपश्चिम प्रदेशको  तराई भू-भागका  केही स्थानमा मध्यमसम्मको वर्षाको सम्भावना छ। कोशी, बागमती र गण्डकी प्रदेशका हिमाली, पहाडी र तराई भू-भाग,  मधेश प्रदेश  लगायत  लुम्बिनी प्रदेशका तराई भू-भागका थोरै  स्थानमा भारी तथा एक-दुई स्थानमा धेरै भारी वर्षाको सम्भावना छ । एभरेष्ट न्यूज एजेन्सी

आजको राशिफल बिस २०८३ साउन १७ गते आइतबार ईस २०२६ अगस्ट २ नेपाल सम्बत ११४६ दिल्लाथ्व चतुर्थी, रौद्र नाम संवत्सर सूर्य दक्षिणायन, वर्षा ऋतु, असार शुक्ल चतुर्थी, चन्द्रमा कुम्भ राशिमा, पूर्व भाद्रपदा नक्षत्र, अतिगण्ड योग, बव करण । आज नेपालमा सुर्योदय बिहान ५ बजेर २७ मिनेटमा र सूर्यास्त साँझ ६ बजेर ५४ मिनेटमा बजे हुनेछ । आज जन्म लिने बच्चा कुम्भ राशीको हुनेछ ।

मेष (चु, चे, चो, ला, लि, लु, ले, लो, अ) –

आज आफ्नो क्षमता र अनुभवलाई सही रूपमा प्रयोग गर्न सकिने दिन रहेको छ। विगतदेखि सोचिरहेका योजनालाई व्यवहारमा उतार्ने अवसर प्राप्त हुनेछ। कार्यक्षेत्रमा नयाँ जिम्मेवारी आउन सक्छ, जसलाई आत्मविश्वासका साथ पूरा गर्न सक्नुहुनेछ। वरिष्ठ व्यक्तिको विश्वास र सहकर्मीको सहयोग प्राप्त हुनेछ। व्यापार–व्यवसायमा विस्तारको सम्भावना देखिन्छ भने नयाँ ग्राहक वा साझेदारीबाट लाभ मिल्न सक्छ। आर्थिक पक्षमा सुधार आउने संकेत छ। परिवारमा सुखद वातावरण रहनेछ र प्रियजनसँग बिताएको समयले मनलाई सन्तुष्टि दिनेछ। स्वास्थ्य राम्रो रहनेछ। नियमित दिनचर्या अपनाउँदा थप स्फूर्ति महसुस हुनेछ।

वृष (इ, उ, ए, ओ, वा, वि, वु, वे, वो) –

आज धैर्य र व्यवहारिक सोचले सफलता दिलाउनेछ। कुनै महत्त्वपूर्ण निर्णय गर्दा हतार नगरी सोचविचार गरेर अघि बढ्नु लाभदायक हुनेछ। कार्यक्षेत्रमा रोकिएका काम पूरा हुने सम्भावना छ। व्यापार–व्यवसायमा नियमित आम्दानी कायम रहनेछ र नयाँ लगानीका विषयमा सकारात्मक संकेत प्राप्त हुन सक्छ। आर्थिक रूपमा सन्तुलित दिन रहनेछ। परिवारका सदस्यहरूसँग आत्मीय संवाद हुनेछ। आफन्तसँगको भेटघाटले मन प्रसन्न बनाउनेछ। स्वास्थ्यमा सुधार आउनेछ। मानसिक रूपमा पनि शान्ति र सन्तुलन कायम रहनेछ।

मिथुन (का, कि, कु, घ, ङ, छ, के, को, ह) –

आज सिर्जनशील सोच र प्रभावकारी बोलीका कारण धेरैको ध्यान आकर्षित गर्न सक्नुहुनेछ। अध्ययन, सञ्चार, लेखन, शिक्षण तथा सिर्जनात्मक क्षेत्रमा राम्रो उपलब्धि हासिल हुनेछ। कार्यक्षेत्रमा नयाँ अवसर प्राप्त हुनेछ र आफ्नो प्रतिभा देखाउने मौका पनि मिल्नेछ। आर्थिक रूपमा अतिरिक्त आम्दानीको सम्भावना देखिन्छ। साथीभाइसँगको सहकार्य फलदायी बन्नेछ। परिवारमा रमाइलो वातावरण रहनेछ। नयाँ सम्बन्धले भविष्यमा राम्रो अवसर दिलाउन सक्छ। स्वास्थ्य राम्रो रहनेछ र आत्मविश्वास उल्लेखनीय रूपमा बढ्नेछ।

कर्कट (हि, हु, हे, हो, डा, डि, डु, डे, डो) –

आज पारिवारिक सम्बन्ध अझ सुदृढ बन्नेछ। घरमा खुसीको वातावरण रहनेछ र परिवारका सदस्यसँग मिलेर महत्त्वपूर्ण योजना बनाउन सकिनेछ। कार्यक्षेत्रमा तपाईंको जिम्मेवारीबोध र इमानदारीको प्रशंसा हुनेछ। रोकिएका काम पूरा हुने सम्भावना बलियो देखिन्छ। आर्थिक रूपमा सुधार आउने संकेत छ। घर वा सम्पत्तिसँग सम्बन्धित विषयमा सकारात्मक निर्णय हुन सक्छ। स्वास्थ्य राम्रो रहनेछ। मानसिक रूपमा सन्तुष्टि र शान्ति कायम रहनेछ।

सिंह (मा, मि, मु, मे, मो, टा, टि, टु, टे) –

आज आत्मविश्वास र नेतृत्व क्षमताले नयाँ सफलता दिलाउनेछ। कार्यक्षेत्रमा महत्त्वपूर्ण जिम्मेवारी प्राप्त हुन सक्छ। वरिष्ठ व्यक्तिको विश्वास जित्न सफल हुनुहुनेछ। व्यापार–व्यवसायमा विस्तार हुने सम्भावना छ र आर्थिक रूपमा राम्रो लाभ मिल्ने संकेत देखिएको छ। सामाजिक क्षेत्रमा प्रतिष्ठा र सम्मान बढ्नेछ। परिवारको साथ र सहयोगले मनोबल थप उच्च हुनेछ। प्रियजनसँगको सम्बन्ध अझ आत्मीय बन्नेछ। स्वास्थ्य राम्रो रहनेछ। दिनभर ऊर्जा र उत्साह कायम रहनेछ।

कन्या (टो, प, पि, पु, ष, ण, ठ, पे, पो) –

आज नयाँ ज्ञान, सीप र अनुभव प्राप्त गर्ने अवसर मिल्नेछ। अध्ययन, अनुसन्धान तथा तालिमसँग सम्बन्धित कार्यमा राम्रो सफलता प्राप्त हुनेछ। कार्यक्षेत्रमा अनुशासन र मेहनतको उचित मूल्यांकन हुनेछ। आर्थिक अवस्था स्थिर रहनेछ। खर्चमा नियन्त्रण राख्न सके बचत बढ्नेछ। परिवारमा समझदारी र सहयोग कायम रहनेछ। छोटो यात्रा वा आवश्यक भेटघाट लाभदायक बन्न सक्छ। स्वास्थ्य राम्रो रहनेछ। नियमित व्यायाम र पर्याप्त आरामले शरीरलाई तन्दुरुस्त राख्नेछ।

तुला (रा, रि, रु, रे, रो, ता, ति, तु, ते) –

आज आर्थिक क्षेत्रमा उत्साहजनक उपलब्धि प्राप्त हुने सम्भावना छ। रोकिएको रकम प्राप्त हुन सक्छ वा नयाँ आम्दानीको स्रोत खुल्न सक्छ। व्यापार–व्यवसायमा लाभ बढ्नेछ। कार्यक्षेत्रमा सहकर्मी र साझेदारसँगको समन्वय उत्कृष्ट रहनेछ। नयाँ योजना सफल हुने संकेत देखिन्छ। परिवारसँग रमाइलो समय बिताउने अवसर प्राप्त हुनेछ। सामाजिक सम्बन्ध विस्तार हुनेछ। स्वास्थ्य राम्रो रहनेछ। मानसिक रूपमा सकारात्मक सोच र आत्मविश्वास बढ्नेछ।

वृश्चिक (तो, ना, नि, नु, ने, नो, या, यि, यु) –

आज निरन्तर प्रयासको राम्रो प्रतिफल प्राप्त हुने दिन रहेको छ। कार्यक्षेत्रमा तपाईंको अनुभव र कार्यदक्षताको प्रशंसा हुनेछ। प्रतिस्पर्धात्मक क्षेत्रमा सफलता हात लाग्ने सम्भावना बलियो छ। व्यापार–व्यवसायमा उल्लेखनीय लाभ हुनेछ। आर्थिक अवस्था थप मजबुत बन्ने संकेत देखिन्छ। परिवारमा प्रेम, विश्वास र आत्मीयता बढ्नेछ। प्रियजनसँग भविष्यका योजना साझा गर्ने अवसर मिल्नेछ। स्वास्थ्य राम्रो रहनेछ। मानसिक रूपमा आत्मबल र उत्साह कायम रहनेछ।

धनु (ये, यो, भ, भि, भु, ध, फा, ढ, भे) –

आज नयाँ अवसरको ढोका खुल्ने दिन रहेको छ। अध्ययन, व्यापार, वैदेशिक क्षेत्र वा यात्रासँग सम्बन्धित कार्यमा सकारात्मक परिणाम प्राप्त हुनेछ। कार्यक्षेत्रमा तपाईंको मेहनतको उचित मूल्यांकन हुनेछ। आर्थिक अवस्थामा सुधार आउने सम्भावना बलियो छ। परिवारका सदस्यसँगको सम्बन्ध थप आत्मीय बन्नेछ। सामाजिक क्षेत्रमा प्रतिष्ठा र सम्मान बढ्नेछ। भविष्यका योजना तय गर्न दिन उपयुक्त रहनेछ। स्वास्थ्य राम्रो रहनेछ। मन प्रसन्न र ऊर्जावान रहनेछ।

मकर (भो, ज, जि, खि, खु, खे, खो, गा, गि) –

आज जिम्मेवारी बढे पनि धैर्य र योजनाबद्ध कार्यशैलीले सबै काम सहज रूपमा सम्पन्न हुनेछन्। कार्यक्षेत्रमा वरिष्ठ व्यक्तिको सहयोग र मार्गदर्शन प्राप्त हुनेछ। आर्थिक रूपमा खर्च नियन्त्रण गर्न सके बचत बढ्नेछ। दीर्घकालीन योजना बनाउन समय अनुकूल रहनेछ। परिवारका सदस्यहरूको सुझाव उपयोगी सावित हुनेछ। घरमा शान्त र सुखद वातावरण कायम रहनेछ। स्वास्थ्यमा सामान्य थकान महसुस हुन सक्ने भएकाले पर्याप्त विश्राम गर्नु उचित हुनेछ।

कुम्भ (गु, गे, गो, सा, सि, सु, से, सो, द) –

आज नयाँ सोच, सिर्जनशीलता र आत्मविश्वासका कारण महत्त्वपूर्ण सफलता प्राप्त गर्न सक्नुहुनेछ। कार्यक्षेत्रमा रोकिएका काम पूरा हुनेछन्। नयाँ अवसरले भविष्यको बाटो अझ फराकिलो बनाउन सक्छ। आर्थिक रूपमा सुधार आउने सम्भावना बलियो छ। व्यापार–व्यवसायमा नयाँ सम्झौता हुन सक्छ। परिवारमा प्रेम, मेलमिलाप र आपसी समझदारी बढ्नेछ। सामाजिक क्षेत्रमा प्रभाव विस्तार हुनेछ। स्वास्थ्य राम्रो रहनेछ। दिनभर स्फूर्ति र सकारात्मक ऊर्जा कायम रहनेछ।

मीन (दि, दु, थ, झ, ञ, दे, दो, च, ची) –

आज धैर्य, विवेक र सकारात्मक सोचले हरेक कार्यमा सफलता दिलाउनेछ। सुरुमा केही चुनौती देखिए पनि तपाईंको अनुभव र आत्मविश्वासका कारण परिस्थिति अनुकूल बन्दै जानेछ। कार्यक्षेत्रमा मेहनतको राम्रो प्रतिफल प्राप्त हुनेछ। आर्थिक पक्ष सन्तुलित रहनेछ र बचत गर्ने अवसर पनि मिल्नेछ। परिवारको साथ र सहयोगले मनोबल बढ्नेछ। अधुरा रहेका योजना पूरा हुने सम्भावना बलियो छ। साँझतिर प्राप्त हुने शुभ समाचारले भविष्यप्रति नयाँ आशा र उत्साह जगाउनेछ। स्वास्थ्य राम्रो रहनेछ। मानसिक रूपमा शान्ति, सन्तुलन र सकारात्मक ऊर्जा दिनभर कायम रहनेछ ।एभरेष्ट न्यूज एजेन्सी

काठमाडौँ । बागमती प्रदेश सरकारको नेतृत्व एमालेले गर्ने तय भएसँगै एमालेले मुख्यमन्त्रीको नाम टुंगो लगाएको छ ।

एमाले अध्यक्ष केपी शर्मा ओलीको उपस्थितिमा भएको छलफलमा संसदीय दलका नेता जगन्नाथ (जेएन) थपलियालाई बागमती प्रदेशको नयाँ मुख्यमन्त्री बनाउने सहमति भएको हो । मुख्यमन्त्री पदका लागि थपलियासहित निवर्तमान स्वास्थ्य मन्त्री किरण थापा  प्रतिस्पर्धामा थिए।

नेपाली कांग्रेस नेतृत्वको सरकार अल्पमतमा परेपछि प्रदेशमा नयाँ सरकार गठनको प्रक्रिया औपचारिक रूपमा अगाडि बढेको छ ।

नेकपासँग भएको भागबण्डाअनुसार कोशी, बागमती र लुम्बिनी प्रदेशमा एमालेले तथा कर्णाली र सुदूरपश्चिम प्रदेशमा नेकपाले सरकारको नेतृत्व गर्ने सहमति बनेको छ । जस अनुसार कर्णालीमा नेकपाका मंगलबहादुर शाही मुख्यमन्त्री बनिसकेका छन् ।एभरेष्ट न्यूज एजेन्सी

सिरहा । सिरहाको गोलबजारमा भएको प्रदर्शनका क्रममा गोली लागेर मृत्यु भएका गणेश यादवको शव परिवारलाई हस्तान्तरण गरिएको छ । सिरहाको औरही गाउँपालिका-२ तुलसीपुरस्थित परिवारलाई शनिबार साँझ शव हस्तान्तरण गरिएको हो ।

धरानमा पोस्टमार्टम गरिएका उनको शव शनिबार साँझ नेपाली सेनाको हेलिकप्टरमार्फत् ल्याएर परिवारलाई हस्तान्तरण गरिएको छ ।

गणेशको आजै गागन खोला किनारमा दाहसंस्कार गर्ने तयारी भएको परिवारजनले बताएका छन् ।

बिहीबार भएको प्रदर्शनमा गोली लागेर यादवको निधन भएको थियो ।एभरेष्ट न्यूज एजेन्सी

काठमाडौँ । पछिल्लो २४ घण्टामा देशका विभिन्न स्थानमा भएका सवारी दुर्घटनामा ३ जनाको मृत्यु भएको छ भने ७२  जना घाइते भएका छन् ।

नेपाल प्रहरीले दिएको जानकारी अनुसार दुर्घटनामा गण्डकीमा २ जना र काठमाडौँ उपत्यकामे एक जनाको मृत्यु भएको छ ।

त्यस्तै देशभर भएका दुर्घटनामा ७२ जना घाइते भएका छन् । जस अनुसार मधेश प्रदेशमा ११ जना घाइते भएका छन् भने काठमाडौँ उपत्यकामा ११ जना घाइते भएका छन् । त्यस्तै कोशीमा १५ जना, बागमतीमा ५ जना घाइते भएका छन् भने लुम्बिनीमा १६ जना, सुदूरपश्चिममा १० जना, गण्डकीमा एक जना र कर्णालीमा ३ घाइते भएका छन् ।एभरेष्ट न्यूज एजेन्सी