बज्जिकाञ्चल एफएम संमददाता, साउन २० गते

काठमाडौँ । हरेक वर्ष अगस्ट ५ का दिन अन्तर्राष्ट्रिय ट्राफिक बत्ती दिवस मनाइन्छ । सन् १९१४ अगस्ट ५ मा अमेरिकाको ओहायो राज्यस्थित क्लिभल्यान्ड सहरको युक्लिड एभेन्यु र पूर्व १०५औँ सडकको चोकमा विश्वकै पहिलो विद्युतीय ट्राफिक बत्ती जडान गरिएको सम्झनामा यो दिवस मनाउने गरिन्छ ।

विश्वको पहिलो विद्युतीय ट्राफिक बत्तीको डिजाइन जेम्स होजले गरेका थिए । प्रारम्भिक अवधारणाको विकासमा लेस्टर वायरको पनि योगदान रहेको मानिन्छ । उक्त प्रणालीमा रातो र हरियो बत्ती प्रयोग गरी सवारीसाधन र पैदल यात्रुको आवागमन व्यवस्थापन गरिन्थ्यो ।

यस दिवसको मुख्य उद्देश्य ट्राफिक बत्तीले सडक दुर्घटना न्यूनीकरण, सवारी चाप व्यवस्थापन तथा चालक, पैदलयात्री र साइकलयात्रीको सुरक्षामा पुर्‍याएको महत्त्वपूर्ण योगदानप्रति जनचेतना फैलाउनु हो ।

ट्राफिक बत्तीको विकासक्रम सन् १८६८ मा बेलायतको लन्डनमा ग्यासबाट चल्ने हातैले सञ्चालन गरिने संकेत प्रणालीबाट सुरु भएको मानिन्छ । त्यसयता प्रविधिमा निरन्तर सुधार हुँदै आज कृत्रिम बुद्धिमत्ता र स्वचालित प्रणालीमा आधारित आधुनिक ट्राफिक व्यवस्थापन प्रणालीसम्म यसको विकास भएको छ ।

विश्वभर सडक सुरक्षा प्रविधिमा भएका निरन्तर सुधार र सुरक्षित यातायात व्यवस्थाको महत्त्वलाई स्मरण गर्दै अन्तर्राष्ट्रिय ट्राफिक बत्ती दिवस विभिन्न कार्यक्रमका साथ मनाइने गरिन्छ । एभरेष्ट न्यूज एजेन्सी,

काठमाडौँ । सुनसरीको देवानगन्जमा भएको घटनामा गोली लागेर घाइते भएकामध्ये अर्का एक जना युवकको निधन भएको छ ।

काठमाडौंस्थित त्रिवि शिक्षण अस्पताल महाराजगन्जमा उपचारका क्रममा देवानगन्ज-३ का २१ वर्षीय रवीन्द्रकुमार मेहताको ज्यान गएको हो ।

बायाँ तिघ्रामा गोली लागेर गम्भीर घाइते रवीन्द्रकुमार मेहतालाई विराट नर्सिङ होमबाट थप उपचारका लागि शुक्रबार काठमाडौंको टिचिङ अस्पताल लगिएको थियो ।

मेहताको निधनसँगै सुनसरीमा मात्र प्रहरीको गोली लागेर ज्यान गुमाउनेको संख्या तीन पुगेको छ । घाइतेमध्ये देवानगञ्ज-४ का २५ वर्षीय ओमप्रकाश मेहताको सोही दिन मृत्यु भएको थियो । देवानगञ्ज-३ का २२ वर्षीय जयप्रकाश मेहताको उपचारका क्रममा बिहीबार दिउँसो न्युरो अस्पताल विराटनगरमा मृत्यु भएको थियो ।

सुनसरी घटनापछि फैलिएको तनावमा सिरहामा समेत एक जनाको गोली लागेर ज्यान गएको थियो । एभरेष्ट न्यूज एजेन्सी

काठमाडौं । भूमि व्यवस्था, सहकारी, संघीय मामिला तथा सामान्य प्रशासन मन्त्रालयअन्तर्गतको भूमि समस्या समाधान समितिले भूमिहीन दलित, भूमिहीन सुकुम्बासी तथा अव्यवस्थित बसोबासीको व्यवस्थापनका नाममा रकम असुल्ने वा अनुचित लाभ लिने व्यक्तिमाथि कानुनी कारबाही गरिने चेतावनी दिएको छ।

समितिले विज्ञप्ति जारी गर्दै देशभरबाट संकलित निवेदनका आधारमा उपलब्ध जग्गाको विवरण सूचना प्रणालीमा प्रविष्ट गरी निशुल्क रुपमा निस्सा वितरणको कार्य सम्बन्धित स्थानीय तहबाट भइरहेको जनाएको छ। निस्सा प्राप्त गरेका निवेदकको पहिचान तथा प्रमाणीकरण र उपलब्ध गराइने जग्गाको पहिचान गर्ने जिम्मेवारी पनि स्थानीय तहकै रहेको समितिले स्पष्ट पारेको छ।

समितिका अनुसार उक्त कार्यलाई प्रभावकारी बनाउन प्रमुख जिल्ला अधिकारीको अध्यक्षतामा गठित जिल्ला भूमि समस्या समाधान समितिमार्फत आवश्यक कर्मचारीलाई प्रशिक्षण दिइएको छ। साथै जिल्ला समितिका पदाधिकारीसँग जुम तथा भौतिक उपस्थितिमा अन्तरक्रिया, स्थानीय तहका जनप्रतिनिधिसँग छलफल तथा विभिन्न जिल्लामा स्थलगत भ्रमणसमेत गरिएको उल्लेख गरिएको छ ।

तर, पछिल्लो समय केही व्यक्तिले निवेदन दर्ता गरिदिने वा निस्सा दिलाइदिने बहानामा सेवाग्राहीबाट रकम असुलेको गुनासो समितिमा प्राप्त भएको जनाएको छ। यस्ता गतिविधि गैरकानुनी भएको उल्लेख गर्दै समितिले कसैलाई पनि कुनै व्यक्तिलाई रकम नदिन आग्रह गरेको छ ।

समितिले यस्ता अनुचित कार्यमा संलग्न व्यक्तिलाई प्रचलित कानुनबमोजिम अनुसन्धान गरी कारबाही तथा सजाय गरिने चेतावनी दिएको छ। भूमिहीन तथा अव्यवस्थित बसोबासीको दीर्घकालीन समस्या समाधानका लागि सबै सरोकारवालाको सहयोग आवश्यक रहेको उल्लेख गर्दै समितिले सेवाग्राहीलाई कुनै पनि प्रलोभनमा नपर्न र आधिकारिक प्रक्रियामार्फत मात्र सेवा लिन आग्रह गरेको छ ।एभरेष्ट न्यूज एजेन्सी

काठमाडौँ । आज प्रतिनिधि सभाको बैठक बस्दैछ । संघीय संसद सचिवालयका अनुसार आज बैठक दिउसो १ बजेदेखि बस्दैछ ।

आजको बैठकमा प्रधानमन्त्री वालेन्द्र शाहको तर्फबाट कानुन, न्याय तथा संसदीय मामिला मन्त्री सोबिता गौतमले ‘आदिवासी जनजाति आयोगको छैटौं वार्षिक प्रतिवेदन आ.व. २०८१/०८२’ पेस गर्ने कार्यसूची रहेको छ ।

त्यस्तै आज भिष्मराज आङ्देम्बेले ‘वास्तविक भूमिहीन, सुकुम्बासी तथा अव्यवस्थित बसोबासीको पहिचान गरी नागरिकको संरक्षण र पुनःस्थापनाका लागि सरकारले आवश्यक व्यवस्था गरी सुरक्षित आवास, आधारभूत सेवा, खाद्य, स्वास्थ्य, शिक्षा र जीविकोपार्जनको निरन्तरतालाई ध्यान दिइ उचित क्षतिपूर्ति, स्थायी पुनःस्थापनाको प्रत्याभूति दिलाउन र वास्तविक भूमिहीन एवम् सुकुम्बासीलाई यथाशीघ्र लालपुर्जा वितरण गराउन आवश्यक भएकोले” भन्ने विषयको जरुरी सार्वजनिक महत्वको प्रस्ताव प्रस्तुत गर्ने कार्यसूची रहेको छ भने प्रस्तावका समर्थक ऐन बहादुर महर, युवराज दुलाल र आरेन राईले समर्थन गर्ने कार्यसूची रहेको छ ।एभरेष्ट न्यूज एजेन्सी

काठमाडौँ । आज संघीय संसदका पाँच समितिको बैठक बस्दैछ ।

आज प्रतिनिधि सभाका अर्थ समिति, अन्तर्राष्ट्रिय सम्बन्ध र पर्यटन समिति, उद्योग तथा वाणिज्य र श्रम तथा उपभोक्ता हित समिति र राज्य व्यवस्था तथा सुशासन समितिको बैठक बस्दैछ भने राष्ट्रिय सभाको सार्वजनिक नीति तथा प्रत्यायोजित विधायन समितिको बैठक बस्दैछ ।

आज बिहान १० बजे बस्ने अर्थ समितिको बैठकमा नेपाल राष्ट्र बैंक ऐन, २०५८ लाई संशोधन गर्न बनेको विधेयकमाथि दफावार छलफल जारी रहने समितिले जनाएको छ ।

त्यस्तै बिहान १० बजे नै बस्ने अन्तर्राष्ट्रिय सम्बन्ध र पर्यटन समितिको बैठकमा पर्यटन  विधेयक, २०८१’ सम्बन्धमा मन्त्रालयसँग सैद्धान्तिक छलफलको कार्यसूची रहेको छ ।

त्यसैगरी बिहान १० बजेदेखि शुरु हुने उद्योग तथा वाणिज्य र श्रम तथा उपभोक्ता हित समितिको बैठकमा खाना पकाउने ग्यासको आपूर्ति व्यवस्थापन सम्बन्धमा छलफलको कार्यसूची रहेको छ ।

त्यस्तै बिहान ११ बजेदेखि शुरु हुने राज्य व्यवस्था तथा सुशासन समितिको बैठकमा नेपाल विशेष सेवा ऐन, २०४२ को साविकको व्यवस्था जगाउने सम्बन्धी विधेयक, २०८३ उपर सैद्धान्तिक र दफावार छलफल तथा कार्यविधि मस्यौदा तर्जुमा उपसमितिको प्रतिवेदन सम्बन्धमा छलफलको कार्यसूची रहेको छ ।

त्यस्तै दिउसो १ बजेदेखि बस्ने राष्ट्रिय सभा अन्तर्गतको सार्वजनिक नीति तथा प्रत्यायोजित विधायन समितिको बैठकमा समितिका पूर्व सभापति राम नारायण विडारीसँग सरकारी आश्‍वासन सम्बन्धमा छलफलको कार्यसूची रहेको समितिले जनाएको छ ।एभरेष्ट न्यूज एजेन्सी

काठमाडौँ । जल तथा मौसम विज्ञान विभाग अन्तर्गत मौसम पूर्वानुमान महाशाखाले  देशभर मनसुनी वायुको प्रभाव रहेको र हाल मनसुनको न्यून चापीय रेखा सरदर स्थानभन्दा केही उत्तरतर्फ नेपालको तराई भू-भाग नजिक रहेको जानकारी दिएको छ ।

हाल देशभर साधारणतया बादल लागेको छ। कोशी, लुम्बिनी, कर्णाली प्रदेशको केही स्थान तथा मधेश, बागमती, गण्डकी र सुदूरपश्चिम प्रदेशका थोरै स्थानमा मेघ गर्जन चट्याङ्ग सहित हल्का देखि मध्यम वर्षा भइरहेको छ ।

आज दिउँसो देशभर साधारणतया बादल लाग्नेछ। देशको हिमाली भू-भागका केही स्थानमा मध्यमसम्मको वर्षा/हिमपातको सम्भावना छ। देशका पहाडी भू-भागका धेरै स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। देशका तराई भू-भाग केही स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। कोशी, बागमती र गण्डकी प्रदेशका हिमाली र पहाडी भू-भाग तथा लुम्बिनी र सुदूरपश्चिम प्रदेशको पहाडी र तराई भू-भागका एक-दुई स्थानमा भारी वर्षाको सम्भावना छ ।

त्यस्तै आज राति देशभर साधारणतया बादल लाग्नेछ।  कोशी, बागमती, गण्डकी प्रदेशको हिमाली  भू-भागका केही स्थान तथा लुम्बिनी,  कर्णाली र सुदूरपश्चिम प्रदेशको हिमाली भू-भागको थोरै स्थानमा मध्यमसम्मको वर्षा/हिमपातको सम्भावना छ। कोशी, बागमती, गण्डकी  र लुम्बिनी प्रदेशका पहाडी र तराई भू-भाग साथै मधेश प्रदेशका धेरै स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। कर्णाली प्रदेशका पहाडी भू-भाग र सुदूरपश्चिम प्रदेशका पहाडी र तराई भू-भागका केही स्थानमा  मेघगर्जन/चट्याङ्ग सहित मध्यमसम्मको वर्षाको सम्भावना छ। कोशी, बागमती र गण्डकी प्रदेशका हिमाली र पहाडी भू-भाग तथा मधेश प्रदेशको एक-दुई स्थानमा भारी  वर्षाको सम्भावना छ ।एभरेष्ट न्यूज एजेन्सी

आजको राशिफल बिस २०८३ साउन १९ गते मंगलबार ईस २०२६ अगस्ट ४ नेपाल सम्बत ११४६ दिल्लागा षष्ठी, रौद्र नाम संवत्सर सूर्य दक्षिणायन, वर्षा ऋतु, असार शुक्ल षष्ठी, चन्द्रमा मीन राशिमा, रेवती नक्षत्र, धृति योग, गर करण । आज नेपालमा सुर्योदय बिहान ५ बजेर २८ मिनेटमा र सूर्यास्त साँझ ६ बजेर ५३ मिनेटमा बजे हुनेछ । आज जन्म लिने बच्चा मीन राशीको हुनेछ ।

मेष (चु, चे, चो, ला, लि, लु, ले, लो, अ) –

आज तपाईंले हिम्मतका साथ अघि बढाएको प्रयासले राम्रो परिणाम दिन सक्छ। लामो समयदेखि सोचिरहेको योजना कार्यान्वयन गर्ने अवसर प्राप्त हुनेछ। कार्यालय वा व्यवसायमा तपाईंको सक्रियता र जिम्मेवारीबोधको प्रशंसा हुनेछ। सहकर्मी तथा वरिष्ठ व्यक्तिको साथले महत्त्वपूर्ण काम सहज रूपमा सम्पन्न हुनेछ। आर्थिक रूपमा नयाँ आम्दानीको स्रोत फेला पर्न सक्छ। परिवारमा खुसीको वातावरण रहनेछ र प्रियजनसँगको सम्बन्ध थप आत्मीय बन्नेछ। स्वास्थ्य राम्रो रहनेछ। अनावश्यक तनावभन्दा टाढा रहन सके दिन अझ सुखद बन्नेछ।

वृष (इ, उ, ए, ओ, वा, वि, वु, वे, वो) –

आज शान्त स्वभाव र परिपक्व निर्णयले तपाईंलाई धेरै क्षेत्रमा फाइदा दिलाउनेछ। कार्यक्षेत्रमा मेहनतको उचित मूल्यांकन हुनेछ। व्यापार–व्यवसायमा नियमित लाभका साथै नयाँ सम्भावनाको खोजी सफल हुन सक्छ। आर्थिक पक्ष मजबुत बन्दै जाने संकेत देखिएको छ। परिवारका सदस्यसँग कुनै महत्त्वपूर्ण विषयमा सकारात्मक छलफल हुनेछ। सामाजिक सम्बन्ध विस्तार हुने सम्भावना पनि छ। स्वास्थ्यमा सुधार आउनेछ। पर्याप्त आराम र सन्तुलित भोजनले शरीरलाई तन्दुरुस्त राख्नेछ।

मिथुन (का, कि, कु, घ, ङ, छ, के, को, ह) –

आज तपाईंको बोल्ने कला र सिर्जनशील सोचले धेरैको विश्वास जित्नेछ। अध्ययन, सञ्चार, लेखन, शिक्षण वा सिर्जनात्मक क्षेत्रमा उल्लेखनीय उपलब्धि हासिल गर्न सक्नुहुनेछ। नयाँ अवसरले भविष्यको बाटो फराकिलो बनाउन सक्छ। आर्थिक रूपमा अतिरिक्त लाभ प्राप्त हुने सम्भावना छ। साथीभाइसँगको सहकार्य फलदायी बन्नेछ। परिवारसँग रमाइलो समय बित्नेछ। नयाँ परिचयले भविष्यमा उपयोगी सम्बन्धको रूप लिन सक्छ। स्वास्थ्य राम्रो रहनेछ। मानसिक रूपमा उत्साह र ऊर्जा बढ्नेछ।

कर्कट (हि, हु, हे, हो, डा, डि, डु, डे, डो) –

आज घरपरिवारसँग बिताएको समय विशेष सुखद रहनेछ। परिवारका सदस्यहरूको साथ र सहयोगले मनोबल बढ्नेछ। कार्यक्षेत्रमा इमानदारी र जिम्मेवारीका कारण राम्रो अवसर प्राप्त हुन सक्छ। अधुरा काम पूरा हुँदै जानेछन्। आर्थिक पक्षमा सन्तोषजनक सुधार आउने संकेत देखिन्छ। घर वा सम्पत्तिसँग सम्बन्धित विषयमा सकारात्मक निर्णय हुन सक्छ। स्वास्थ्य राम्रो रहनेछ। मानसिक शान्ति र सन्तुलन कायम रहनेछ।

सिंह (मा, मि, मु, मे, मो, टा, टि, टु, टे) –

आज आफ्नो क्षमता प्रमाणित गर्ने अवसर प्राप्त हुनेछ। नेतृत्वदायी भूमिकामा सफलता मिल्ने सम्भावना बलियो छ। कार्यक्षेत्रमा वरिष्ठ व्यक्तिबाट विश्वास र प्रशंसा प्राप्त हुनेछ। व्यापार–व्यवसायमा विस्तारको नयाँ योजना बन्न सक्छ। आर्थिक रूपमा लाभदायक दिन रहनेछ। सामाजिक क्षेत्रमा मान–सम्मान बढ्नेछ। परिवारको साथले आत्मविश्वास थप मजबुत हुनेछ। स्वास्थ्य राम्रो रहनेछ। दिनभर शरीरमा फुर्तिलोपन कायम रहनेछ।

कन्या (टो, प, पि, पु, ष, ण, ठ, पे, पो) –

आज सिक्ने र सिकाउने दुवै अवसर प्राप्त हुन सक्छ। अध्ययन, अनुसन्धान तथा बौद्धिक कार्यमा राम्रो प्रगति हुनेछ। कार्यक्षेत्रमा अनुशासन र मेहनतले उल्लेखनीय उपलब्धि दिलाउनेछ। आर्थिक रूपमा खर्च नियन्त्रणमा रहनेछ र बचत बढ्ने सम्भावना छ। परिवारसँग आत्मीय सम्बन्ध कायम रहनेछ। छोटो दूरीको यात्रा लाभदायक बन्न सक्छ। स्वास्थ्य सामान्यभन्दा राम्रो रहनेछ। नियमित दिनचर्याले थप ऊर्जा प्रदान गर्नेछ।

तुला (रा, रि, रु, रे, रो, ता, ति, तु, ते) –

आज आर्थिक गतिविधि सकारात्मक दिशामा अघि बढ्ने देखिन्छ। व्यापार–व्यवसायमा लाभ बढ्नेछ भने रोकिएको रकम प्राप्त हुने सम्भावना पनि छ। कार्यक्षेत्रमा सहकार्यको वातावरण राम्रो रहनेछ। नयाँ योजना सफल हुने संकेत देखिएको छ। परिवारसँग खुसीका क्षण बित्नेछन्। सामाजिक क्षेत्रमा प्रभाव र लोकप्रियता बढ्न सक्छ। स्वास्थ्य राम्रो रहनेछ। सकारात्मक सोचले दिनभर आत्मविश्वास बढाइराख्नेछ।

वृश्चिक (तो, ना, नि, नु, ने, नो, या, यि, यु) –

आज मेहनतको फल प्राप्त हुने दिन रहेको छ। कार्यक्षेत्रमा तपाईंको अनुभव र कार्यशैलीको उच्च मूल्यांकन हुनेछ। प्रतिस्पर्धात्मक काममा सफलता मिल्ने सम्भावना बलियो छ। व्यापार–व्यवसायमा उल्लेखनीय लाभ हुनेछ। आर्थिक अवस्था क्रमशः बलियो बन्दै जानेछ। परिवारमा विश्वास र प्रेमको वातावरण कायम रहनेछ। प्रियजनसँग भविष्यका योजनाबारे उपयोगी छलफल हुन सक्छ। स्वास्थ्य राम्रो रहनेछ। मानसिक रूपमा आत्मविश्वास बढ्नेछ।

धनु (ये, यो, भ, भि, भु, ध, फा, ढ, भे) –

आज नयाँ सम्भावनाले तपाईंलाई उत्साहित बनाउनेछ। वैदेशिक क्षेत्र, अध्ययन, व्यापार वा यात्रासँग सम्बन्धित कार्यमा सकारात्मक परिणाम प्राप्त हुन सक्छ। कार्यक्षेत्रमा तपाईंको लगनशीलताको प्रशंसा हुनेछ। आर्थिक अवस्थामा सुधार आउने संकेत देखिन्छ। परिवारका सदस्यसँगको सम्बन्ध अझ घनिष्ठ बन्नेछ। सामाजिक प्रतिष्ठा बढ्ने सम्भावना छ। स्वास्थ्य राम्रो रहनेछ। नयाँ योजना सुरु गर्न दिन उपयुक्त रहनेछ।

मकर (भो, ज, जि, खि, खु, खे, खो, गा, गि) –

आज धैर्य र योजनाबद्ध कार्यशैलीले तपाईंलाई सफलता दिलाउनेछ। कार्यालयमा जिम्मेवारी बढे पनि त्यसलाई सहज रूपमा पूरा गर्न सक्नुहुनेछ। आर्थिक रूपमा खर्च व्यवस्थापन गर्न सफल हुनुहुनेछ। दीर्घकालीन लगानीका विषयमा सोच्ने अवसर मिल्नेछ। परिवारका सदस्यबाट राम्रो सुझाव प्राप्त हुनेछ। घरमा शान्त र सौहार्दपूर्ण वातावरण रहनेछ। स्वास्थ्यमा सामान्य थकान देखिन सक्छ, त्यसैले विश्रामलाई महत्त्व दिनुहोस्।

कुम्भ (गु, गे, गो, सा, सि, सु, से, सो, द) –

आज परिवर्तनलाई सकारात्मक रूपमा स्वीकार गर्दा राम्रो उपलब्धि प्राप्त हुनेछ। सिर्जनशील सोच र नवीन योजनाले कार्यक्षेत्रमा राम्रो परिणाम दिलाउनेछ। व्यापार–व्यवसायमा नयाँ सहकार्यको सम्भावना देखिन्छ। आर्थिक रूपमा सुधार आउनेछ। परिवारमा मेलमिलाप र समझदारी बढ्नेछ। साथीभाइसँगको भेटघाटले मन प्रसन्न बनाउनेछ। स्वास्थ्य राम्रो रहनेछ। दिनभर उत्साह र स्फूर्ति कायम रहनेछ।

मीन (दि, दु, थ, झ, ञ, दे, दो, च, ची) –

आज संयम र सकारात्मक दृष्टिकोणले चुनौतीलाई अवसरमा बदल्न सहयोग गर्नेछ। कार्यक्षेत्रमा तपाईंको मेहनतको उचित प्रतिफल प्राप्त हुनेछ। अधुरा रहेका काम पूरा हुने सम्भावना बलियो छ। आर्थिक पक्ष सन्तुलित रहनेछ र बचत गर्ने अवसर पनि प्राप्त हुनेछ। परिवारको साथ र सहयोगले आत्मबल बढ्नेछ। साँझतिर कुनै खुसीको समाचार प्राप्त हुन सक्छ, जसले मनमा नयाँ आशा र उत्साह थप्नेछ। स्वास्थ्य राम्रो रहनेछ। मानसिक रूपमा सन्तुष्टि, स्थिरता र सकारात्मक ऊर्जा कायम रहनेछ ।एभरेष्ट न्यूज एजेन्सी

काठमाडौं । दुर्गा प्रसाईं रिहा भएका छन् । प्रसाईंलाई जिल्ला अदालत भक्तपुरका न्यायाधीश नवराज दाहालले म्याद थप गर्न अस्वीकार गरेपछि प्रसाई रिहा भएका हुन् ।

प्रहरीले आइतबार राति प्रसाईंलाई सार्वजनिक शान्तिविरुद्धको कसुर अन्तर्गत अनुसन्धानका लागि नियन्त्रणमा लिएको थियो ।एभरेष्ट न्यूज एजेन्सी

काठमाडौँ । भारतको सत्तारुढ दल भारतीय जनता पार्टी (भाजपा) लाई बिहार राज्यमा झट्का लागेको छ ।

बिहारको बाँकीपुर विधानसभा क्षेत्रमा भाजपाको परम्परागत सिटमा भएको उपनिर्वाचनमा जन सुराज पार्टीका संस्थापक प्रशान्त किशोर विजयी भएका छन् । यस क्षेत्रबाट भारतीय जनता पार्टीका नीरज कुमार उम्मेदवार रहेका थिए ।

बाँकीपुर क्षेत्र भारतीय जनता पार्टीका राष्ट्रिय अध्यक्ष नितिन नवीनको परम्परागत क्षेत्र मानिन्छ । उनी यहाँबाट लगातार पाँच पटक विधायक निर्वाचित भएका थिए । नितिन नवीन राज्यसभामा गएपछि उक्त क्षेत्रमा उपनिर्वाचन गरिएको हो ।

भाजपाको यस हारलाई ठुलो झट्काको रुपमा भारतीय मिडियामा विश्लेषण गरिएको छ । कतिले यसलाई भाजपाको पतनको शुरुवात समेत भनेका छन् । अर्कोतर्फ २०२५ को विधान सभा निर्वाचनमा खाता खोल्न नसकेका प्रशान्त किशोरले भाजपालाई झट्का दिदै विधान सभामा पुगेका छन् ।

त्यस्तै मध्य प्रदेशको दतिया विधानसभा क्षेत्रमा कांग्रेसका उम्मेदवार घनश्याम सिंह विजयी भएका छन् भने गुजरातको मांजलपुर विधानसभा क्षेत्रमा भारतीय जनता पार्टीका सत्येन्द्रभाई (सतीश) पटेल विजयी भएका छन् । तीनै विधानसभा क्षेत्रमा गत जुलाई ३० मा मतदान भएको थियो ।एभरेष्ट न्यूज एजेन्सी