बज्जिकाञ्चल संवाददाता,०८ गते

काठमाडौँ । जल तथा मौसम विज्ञान विभाग अन्तर्गत मौसम पूर्वानुमान महाशाखाले हाल देशभर मनसुनी वायुको प्रभाव रहेको र हाल मनसुनको न्यून चापीय रेखा सरदर स्थानको आसपास रहेको जानकारी दिएको छ ।

हाल देशभर साधारणतया बादल लागेको छ । बागमती, गण्डकी र लुम्बिनी प्रदेशका कहि स्थानमा कोशी, कर्णाली र सुदूरपश्चिम प्रदेशका थोरै स्थानमा तथा मधेश प्रदेशका एक-दुई स्थानमा मध्यमसम्मको भइरहेको छ ।

आज दिउँसो देशभर साधारणतया बादल लाग्नेछ । देशका हिमाली  भू-भागका केही स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ । देशको पहाडी भू-भागका धेरै स्थानमा मेघगर्जन/चट्याङ्ग सहित मध्यमसम्म वर्षाको सम्भावना छ । बागमती, गण्डकी, लुम्बिनी र सुदुरपश्चिम प्रदेशका तराई भू-भागका केही स्थानमा तथा मधेश प्रदेश लगायत कोशी प्रदेशका तराई भू-भागका थोरै स्थानमा मेघगर्जन/चट्याङ्ग सहित मध्यमसम्म वर्षाको सम्भावना छ। कोशी, बागमती, गण्डकी र लुम्बिनी प्रदेशको पहाडी भू-भागका एक-दुई स्थानमा भारी वर्षाको सम्भावना छ ।

त्यस्तै, आज राति देशभर साधारणतया बादल लाग्नेछ । देशका हिमाली भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ।  कोशी, बागमती र गण्डकी प्रदेशको पहाडी भू-भागका केही तथा लुम्बिनी, कर्णाली र सुदूरपश्चिम प्रदेशका पहाडी भू-भागका थोरै स्थानमा मेघगर्जन/चट्याङ्ग सहित मध्यमसम्म वर्षाको सम्भावना छ ।कोशी, बागमती र गण्डकी प्रदेशका तराई भू-भागका केही स्थानमा,  मधेश प्रदेश तथा  लुम्बिनी र सुदूरपश्चिम प्रदेशको तराई भू-भागका थोरै स्थानमा मेघगर्जन/चट्याङ्ग सहित मध्यमसम्म वर्षाको सम्भावना छ। कोशी, बागमती र गण्डकी प्रदेशको पहाडी भू-भागका एक-दुई स्थानमा भारी वर्षाको सम्भावना छ । एभरेष्ट न्यूज एजेन्सी,

बज्जिकाञ्चल संवाददाता,०८ गते

काठमाडौँ । आज संघीय संसदका पाँच समितिको बैठक बस्दैछ । आज प्रतिनिधि सभा अन्तर्गतका तीन समितिको बैठक बस्दैछ ।

जसअनुसार, बिहान साढे ९ बजे कृषि तथा प्राकृतिक स्रोत समितिको बैठकमा कृषि, वन तथा पर्यावरण मन्त्रालयद्वारा गठित मानव–वन्यजन्तु द्वन्द्व व्यवस्थापन प्राविधिक कार्यदलद्वारा तयार पारिएको प्रतिवेदनमाथि छलफलको कार्यसूची रहेको छ ।

त्यस्तै, विहान १० बजेदेखि शुरु हुने पूर्वाधार विकास समितिको बैठकमा पूर्वाधार विकास र सार्वजनिक निजी साझेदारीको विषयमा लगानी बोर्ड र निजी क्षेत्रका प्रतिनिधिहरुसँग छलफलको कार्यसूची रहेको छ । त्यसैगरी, बिहान ११ बजेदेखि शुरु हुने अन्तर्राष्ट्रिय सम्बन्ध र पर्यटन समितिको बैठकमा ‘पर्यटन विधेयक, २०८१’ सम्बन्धमा नेपाल पर्वतारोहण संघ लगायत सरोकारवाला निकायहरूसँग छलफलको कार्यसूची रहेको छ ।

त्यस्तै, आज राष्ट्रिय सभा अन्तर्गतको विधायन व्यवस्थापन समितिको बैठक दिउसो १ बजेदेखि शुरु हुदैछ । विधायन व्यवस्थापन समितिको बैठकमा संक्रामक पशु रोग (नियन्त्रण) विधेयक, २०८३ माथि सैद्धान्तिक छलफलको कार्यसूची रहेको छ ।

त्यसैगरी, दिउसो २ बजेदेखि बस्ने राष्ट्रिय सभा अन्तर्गतको सार्वजनिक नीति तथा प्रत्यायोजित विधायन समितिको बैठकमा विषय विज्ञ धन प्रसाद लामिछानेसँग खर्क नीति सम्बन्धमा छलफलको कार्यसूची रहेको छ । एभरेष्ट न्यूज एजेन्सी

बज्जिकाञ्चल संवाददाता,०८ गते

आजको राशिफल बिस २०८३ भाद्र ८ गते सोमबार ईस २०२६ अगस्त २४ नेपाल सम्बत ११४६ गुलाथ्व द्वादशी, रौद्र नाम संवत्सर सूर्य दक्षिणायन, वर्षा ऋतु, श्रावण शुक्ल पक्ष द्वादशी, चन्द्रमा धनु राशिमा, पुर्वाषाढा नक्षत्र, प्रीति योग, बव करण । आज नेपालमा सुर्योदय बिहान ५ बजेर ३९ मिनेटमा र सूर्यास्त साँझ ६ बजेर ३५ मिनेटमा बजे हुनेछ । आज जन्म लिने बच्चा धनु राशीको हुनेछ ।

मेष (चु, चे, चो, ला, लि, लु, ले, लो, अ) –

आज नयाँ जिम्मेवारी सम्हाल्ने र आफ्नो क्षमता देखाउने अवसर मिल्न सक्छ। कार्यक्षेत्रमा तपाईंको सक्रियता र मेहनतले राम्रो परिणाम दिनेछ। लामो समयदेखि रोकिएको काम अघि बढ्ने सम्भावना छ। व्यापार–व्यवसायमा नयाँ कारोबारको बाटो खुल्न सक्छ। आर्थिक रूपमा आम्दानी राम्रो रहनेछ, तर अनावश्यक खर्चमा नियन्त्रण गर्नु उचित हुनेछ। परिवारका सदस्यबाट साथ र सहयोग प्राप्त हुनेछ। प्रियजनसँगको सम्बन्धमा मिठास बढ्नेछ। स्वास्थ्य राम्रो रहनेछ। आत्मविश्वासका साथ अघि बढ्दा आजको दिन उपलब्धिमूलक बन्नेछ ।

वृष (इ, उ, ए, ओ, वा, वि, वु, वे, वो) –

आज शान्त भएर सोचेर चालिएका कदमले राम्रो परिणाम दिनेछन्। कार्यक्षेत्रमा अधुरा काम पूरा गर्ने अवसर मिल्नेछ। वरिष्ठ तथा अनुभवी व्यक्तिको सुझाव तपाईंका लागि उपयोगी बन्न सक्छ। व्यापारमा पुराना ग्राहक तथा सम्पर्कबाट लाभ मिल्ने सम्भावना छ। आर्थिक अवस्था सन्तुलित रहनेछ र बचत बढाउने मौका मिल्नेछ। परिवारमा आपसी समझदारी कायम रहनेछ। आफन्तसँगको भेटघाटले मन प्रसन्न बनाउनेछ। स्वास्थ्य सामान्यतया राम्रो रहनेछ। महत्त्वपूर्ण निर्णयमा हतार नगर्नुहोस् ।

मिथुन (का, कि, कु, घ, ङ, छ, के, को, ह) –

आज तपाईंको बोली, विचार र सिर्जनशीलताले विशेष प्रभाव पार्नेछ। अध्ययन तथा ज्ञानसँग सम्बन्धित काममा राम्रो प्रगति हुनेछ। कार्यक्षेत्रमा आफ्नो क्षमता प्रस्तुत गर्ने मौका मिल्नेछ। नयाँ योजना अघि बढाउन सहकर्मीको सहयोग प्राप्त हुनेछ। व्यापार–व्यवसायमा नयाँ ग्राहक वा कारोबार थपिन सक्छ। आर्थिक रूपमा अतिरिक्त आम्दानीको सम्भावना छ। साथीभाइसँगको भेटघाट उपयोगी र रमाइलो दुवै बन्न सक्छ। परिवारमा खुसीको वातावरण रहनेछ। स्वास्थ्य राम्रो रहनेछ। नयाँ अवसरलाई बेवास्ता नगर्नुहोस्।

कर्कट (हि, हु, हे, हो, डा, डि, डु, डे, डो) –

घरपरिवारको वातावरण आज तपाईंका लागि विशेष महत्त्वपूर्ण रहनेछ। परिवारका सदस्यबीचको पुरानो असमझदारी हटेर आपसी विश्वास बढ्न सक्छ। कार्यक्षेत्रमा जिम्मेवारी पूरा गर्न केही बढी मेहनत गर्नुपर्नेछ, तर परिणाम सन्तोषजनक हुनेछ। आर्थिक रूपमा घरायसी खर्च व्यवस्थापन गर्न सकिनेछ। घर वा सम्पत्तिसँग सम्बन्धित काममा सकारात्मक प्रगति हुन सक्छ। आफन्तबाट सुखद समाचार प्राप्त हुने सम्भावना छ। स्वास्थ्य राम्रो रहनेछ। नजिकका व्यक्तिसँगको आत्मीय कुराकानीले मनमा शान्ति दिनेछ ।

सिंह (मा, मि, मु, मे, मो, टा, टि, टु, टे) –

आत्मविश्वास र नेतृत्व क्षमताका कारण आज तपाईंको प्रभाव बढ्नेछ। कार्यक्षेत्रमा महत्त्वपूर्ण जिम्मेवारी प्राप्त हुन सक्छ र त्यसमा सफलता हासिल गर्नुहुनेछ। तपाईंको निर्णय क्षमताको प्रशंसा हुनेछ। व्यापार–व्यवसायमा लाभदायक अवसर देखा पर्नेछन्। आर्थिक अवस्थामा सुधार आउनेछ। सामाजिक क्षेत्रमा मान–सम्मान बढ्ने सम्भावना छ। परिवारका सदस्यबाट आवश्यक सहयोग प्राप्त हुनेछ। स्वास्थ्य राम्रो रहनेछ। आफ्नो क्षमता सही दिशामा प्रयोग गर्दा उल्लेखनीय उपलब्धि हात पार्न सक्नुहुनेछ ।

कन्या (टो, प, पि, पु, ष, ण, ठ, पे, पो) –

आज व्यवस्थित योजना बनाएर अघि बढ्दा धेरै काम सहजै पूरा हुनेछन्। कार्यक्षेत्रमा तपाईंको सूक्ष्म ध्यान र मेहनतको प्रशंसा हुनेछ। पुरानो काम सम्पन्न गरेर नयाँ योजनामा लाग्ने अवसर मिल्नेछ। व्यापारमा सोचविचार गरेर गरिएको निर्णय लाभदायक बन्न सक्छ। आर्थिक रूपमा खर्च नियन्त्रणमा रहनेछ। परिवारमा आवश्यक विषयमा सकारात्मक छलफल हुनेछ। छोटो यात्रा वा भेटघाटबाट उपयोगी जानकारी प्राप्त हुन सक्छ। स्वास्थ्य राम्रो रहनेछ। कामको चापबीच पर्याप्त आराम गर्न नबिर्सनुहोस् ।

तुला (रा, रि, रु, रे, रो, ता, ति, तु, ते) –

आज सहकार्य र सम्बन्धका माध्यमबाट नयाँ अवसर प्राप्त हुन सक्छ। कार्यक्षेत्रमा सहकर्मी तथा साझेदारसँग राम्रो तालमेल कायम हुनेछ। नयाँ योजनामा अरूको सहयोग जुट्नेछ। व्यापार–व्यवसायमा कारोबार विस्तार हुने सम्भावना छ। आर्थिक रूपमा लाभदायक अवसर हात पर्न सक्छ। परिवारमा खुसी र आत्मीयता बढ्नेछ। सामाजिक भेटघाटबाट उपयोगी नयाँ परिचय बन्न सक्छ। स्वास्थ्य राम्रो रहनेछ। अरूको कुरा ध्यानपूर्वक सुनेर निर्णय गर्दा अझ राम्रो परिणाम प्राप्त हुनेछ ।

वृश्चिक (तो, ना, नि, नु, ने, नो, या, यि, यु) –

आज दृढ इच्छाशक्ति र आत्मविश्वासका साथ अघि बढ्न सक्नुहुनेछ। कार्यक्षेत्रमा चुनौतीपूर्ण जिम्मेवारी पूरा गरेर प्रशंसा प्राप्त गर्ने अवसर मिल्नेछ। तपाईंको अनुभव र निर्णय क्षमताको सम्मान हुनेछ। व्यापार–व्यवसायमा लाभ बढ्ने सम्भावना छ। आर्थिक अवस्था बलियो बन्नेछ। परिवारमा प्रेम र विश्वासको वातावरण कायम रहनेछ। प्रियजनसँग भविष्यका योजनाबारे सकारात्मक कुराकानी हुन सक्छ। स्वास्थ्य राम्रो रहनेछ। आफ्नो लक्ष्यमा निरन्तर ध्यान दिन सके आजको दिन महत्त्वपूर्ण उपलब्धिको आधार बन्नेछ।

धनु (ये, यो, भ, भि, भु, ध, फा, ढ, भे) –

नयाँ अवसरको खोजीमा रहेका व्यक्तिका लागि आजको दिन उत्साहजनक रहनेछ। अध्ययन, यात्रा, व्यापार तथा नयाँ योजनासँग सम्बन्धित काममा सफलता प्राप्त हुन सक्छ। कार्यक्षेत्रमा तपाईंको सक्रियता र मेहनतको राम्रो मूल्यांकन हुनेछ। आर्थिक रूपमा आम्दानी बढ्ने सम्भावना छ। नयाँ स्रोतबाट लाभ मिल्न सक्छ। परिवारसँग रमाइलो समय बित्नेछ। साथीभाइबाट आवश्यक सहयोग प्राप्त हुनेछ। स्वास्थ्य राम्रो रहनेछ। भविष्यका योजनालाई व्यवहारमा उतार्ने आत्मविश्वास बढ्नेछ ।

मकर (भो, ज, जि, खि, खु, खे, खो, गा, गि) –

आज जिम्मेवारी र अनुशासनलाई प्राथमिकता दिनुपर्नेछ। कार्यक्षेत्रमा वरिष्ठ व्यक्तिको सुझावले महत्त्वपूर्ण काममा सहयोग पुर्‍याउनेछ। पुरानो काम पूरा गरेर नयाँ योजनातर्फ अघि बढ्ने अवसर मिल्न सक्छ। आर्थिक कारोबारमा सावधानी अपनाउनु राम्रो हुनेछ। अनावश्यक खर्च घटाउन सके बचत बढाउन सकिनेछ। परिवारमा तपाईंको सहयोग आवश्यक पर्न सक्छ। स्वास्थ्यमा सामान्य थकान महसुस हुन सक्छ। पर्याप्त आराम र सन्तुलित खानपानमा ध्यान दिनुहोस्। साँझतिर प्राप्त हुने सुखद समाचारले मन प्रसन्न बनाउनेछ ।

कुम्भ (गु, गे, गो, सा, सि, सु, से, सो, द) –

नयाँ सोच र नयाँ प्रयासका लागि आजको दिन अनुकूल रहनेछ। कार्यक्षेत्रमा फरक तरिकाले काम गर्दा राम्रो परिणाम प्राप्त हुन सक्छ। नयाँ जिम्मेवारी वा सहकार्यको अवसर आउन सक्छ। व्यापार–व्यवसाय विस्तार गर्ने योजना अघि बढाउन सकिनेछ। आर्थिक अवस्थामा क्रमशः सुधार आउनेछ। परिवारमा पुराना असमझदारी हट्दै जानेछन्। साथीभाइको सहयोगले महत्त्वपूर्ण काम पूरा हुनेछ। स्वास्थ्य राम्रो रहनेछ। नयाँ लक्ष्य तय गरेर निरन्तर मेहनत गर्दा आगामी दिनमा राम्रो सफलता प्राप्त गर्न सकिनेछ ।

मीन (दि, दु, थ, झ, ञ, दे, दो, च, ची) –

आज मनमा रहेको अन्योल कम हुँदै जानेछ र सही निर्णय लिन सहज हुनेछ। कार्यक्षेत्रमा अधुरा काम पूरा हुनेछन्। नयाँ जिम्मेवारी प्राप्त भए पनि त्यसलाई सफलतापूर्वक सम्हाल्न सक्नुहुनेछ। आर्थिक अवस्था सन्तुलित रहनेछ र रोकिएको रकम प्राप्त हुने सम्भावना छ। परिवारका सदस्यबाट सुखद समाचार सुन्न पाइनेछ। प्रियजनसँगको सम्बन्ध अझ आत्मीय बन्नेछ। महत्त्वपूर्ण व्यक्तिसँगको भेटघाट भविष्यका लागि उपयोगी हुन सक्छ। स्वास्थ्य राम्रो रहनेछ। दिनको अन्त्यमा आफूले गरेको कामको समीक्षा गर्दा आगामी योजनाका लागि नयाँ उत्साह प्राप्त हुनेछ ।

काठमाडौँ । काठमाडौँको ग्वलः दे नवाली टोलमा लिच्छविकालीन ‘नासः द्यः छेँ’ अर्थात् नित्यनाथ मन्दिरको पुनःनिर्माण सम्पन्न भएको छ। काठमाडौँ महानगरपालिकाकी कार्यवाहक प्रमुख सुनिता डंगोलले एक समारोहबीच मन्दिरको उद्घाटन गरेकी छन् ।

करिब २ करोड २७ लाख रुपैयाँ लागतमा पुनःनिर्माण गरिएको तीनतले मन्दिरको पहिलो तलामा सन्ध्या पुस्तकालय सञ्चालन हुनेछ भने दोस्रो तला सामाजिक कार्य तथा परम्परागत बाजागाजा प्रशिक्षणका लागि प्रयोग गरिनेछ। तेस्रो तलामा नित्यनाथको मन्दिर रहनेछ ।

कार्यवाहक प्रमुख डंगोलले महानगरपालिकाले मौलिक तथा सांस्कृतिक सम्पदा संरक्षणलाई प्राथमिकता दिएको बताउँदै पुनःनिर्माण भएका सम्पदाको संरक्षणको जिम्मेवारी समुदायले लिनुपर्ने बताइन् ।

वडाध्यक्ष एवं सम्पदा तथा पर्यटन समितिका संयोजक आशामान संगतले स्थानीयको सहयोग र प्रत्यक्ष निगरानीमा मन्दिर पुनःनिर्माण गरिएकाले यसको मौलिकता कायम गरिएको बताए । मन्दिर पुनःनिर्माणसँगै स्थानीय परम्परागत बाजागाजा प्रशिक्षणमा सहभागीलाई प्रमाणपत्रसमेत वितरण गरिएको थियो ।

२०८१ माघ ८ गते विहीबार मन्दिर पुनःनिर्माणको जग पूजा गरिएको थियो । ०८२ माघ १ गतेभित्र निर्माण सम्पन्न गर्ने लक्ष्य थियो । यसै बिच २०८२ मंसिर ५ गते नित्यनाथको निराकार प्रस्तर मूर्ति पुनःस्थापना गरियो । यसअघि मूर्तिको सट्टा प्रति आकृति मात्र पूजा गर्ने गरिएको थियो । त्यस प्रतिआकृति भित्र पारेर अहिले आसनमाथि करिब ३ फिट अग्लो निराकार प्रस्तर मूर्तिलाई पूजाआजा गरी आसनमा पुनःस्थापना गरिएको छ । नित्यनाथको पूजाआजा र आराधनाका लागि विहीबार विशेष दिन मानिन्छ । ९० सालको भूकम्प अघि नै जीर्ण अवस्थामा रहेको मन्दिर २०३९ सालमा तत्कालीन वडाध्यक्ष स्व. सुवर्ण वैद्यका पालामा ढलान गरेर पुनःनिर्माण गरिएको थियो । त्यसमा तला थप गरेर तल्लो तलामा सन्ध्या पुस्तकालय सञ्चालन गरिएको थियो । माथिल्लो तलामा पूजाआजा र परम्परागत बाजागाजा सिकाउने गरिन्थ्यो ।

नेवार समुदायमा परम्परागत बाजा, गायन तथा नृत्य विधाको शिक्षा आरम्भ गर्नुअघि नित्यनाथ (नासः द्यः) को पूजा गर्ने प्रचलन रहिआएको छ ।एभरेष्ट न्यूज एजेन्सी