आरके श्रीवास्तव,राैतहट,कार्तिक १७ गते ।

राैतहटमा भन्सार छलिकाे सामान,पिकअप गाडी सहित मानिस पक्राउ परेका छन् । भन्सार छली पैठारी गरी गहुँको बिउ पिकअप गाडीमा लोड गरी नेपाल तर्फ ल्याउदै गरेको सुचना प्राप्त हुनसाथ खटिएको प्रहरी टोलीले पक्रेको हाे । जिल्ला प्रहरी कार्यालय राैतहटका प्रहरी प्रवक्ता डिएसपि दामोदर केसीले दिएको जानकारी अनुसार शुक्रबार बिहान अन्दाजी करिब साढे १० बजेकाे समयमा गौर नगरपालिका वडा नम्बर ७ स्थित प्रदेश २-०३-००१ च.२१३८ नम्बरको पिकअप गाडी रोकी चेकजाँच गर्ने क्रममा पक्राउ परेको हाे ।

उनका अनुसार प्रहरी लाई प्राप्त सूचना अनुरुप नै भन्सार छली गरी ल्याइएकाे गहुँको बिउ १३९ बोरा १ बोरामा २० के.जी.को दरले जम्मा २,७८० के.जी. र पिकअप गाडी सहित चालक जिल्ला रौतहट गौर न.पा.वडा नं.७ बस्ने बर्ष ४४ को विरेन्द्र राय यादवलाई नियन्त्रणमा लिई रु.चौबिस लाख सत्तर हजार बराबरको मूल्याङ्कन गरी आवश्यक कारवाहीको लागि गौर भन्सार कार्यालय रौतहटमा बुझाइएको हाे ।

राैतहट,कार्तिक १७ गते ।

राैतहटमा करेन्ट लागेर महिलाकाे मृत्युु भएको छ । कटहरिया नगरपालिका–५ बहादुरपुर टाेल बस्ने बिजय साहकाे श्रीमती अन्दाजी ४० वर्षीया अनिता देवीको करेन्ट लागेर शुक्रबार अपरान्ह मृत्यु भएको छ । ईलाका प्रहरी कार्यालय गरूडाका प्रहरी प्रमुख ओमप्रकाश खनालले दिएको जानकारी अनुसार उक्त महिलाले आफ्नै घरको चापाकलमा जाेडिएकाे पानी तान्ने माेटरमा अचानक करेन्ट लाग्दा उनको मृत्यु भएको प्रहरीले जनाएको छ। मृतककाे शवलाई पोस्मार्टमका लागी प्रदेशिक अस्पताल गौर पठाईएको प्रहरीले जनाएको छ । यस सम्बन्धमा प्रहरीले आवश्यक अनुसन्धान गरिरहेको छ।

कार्तिक १८ गतेके ,रौतहट ।

रौतहटको कटहरीया नगरपालिका ४ बलरामपुरमा धान कुट्ने मिल भएको एक घरमा आगलागी हुँदा १० लाख भन्दा बढीको क्षति भएको छ । आगलागीका कारण ६ चौपायाको जलेर मृत्यु भएको छ।स्थानीय गनिलाल साह तेलीको घरमा गए राति १२ बजे आगलागी भएको थियो। आगलागी बाट घर, ३ वटा भैँसी, ३ वटा खसी बाख्रा जलेर मरेका छन् भने एउटा मोटरसाइकल, विद्युतीय मोटर, मिलको पार्टपुर्जा जल्दा १० लाख बढीको क्षति भएको अनुमान गरिएको छ । आगो निभाउने क्रममा घरधनी गनिलाल साह घाइते भएका छन्। आगलागीको कारण भन्ने खुल्न सकेको छैन। राताेपाटी

आरके श्रीवास्तव,राैतहट,कार्तिक १७ गते । 

राैतहट जिल्लाकाे गरूडा नगरपालिकाकाे एक स्वास्थ्य संस्थाका लागि ल्याब,उपकरण र कर्मचारी उपलब्ध गराउन माग गरिएको छ । साे नगरपालिकाकाे वडा नम्बर ५ स्थित रहेको स्वास्थ्य चाैकी शिवनगरमा बिरामी जाँचकाे लागि ल्याब जाँच उपकरण तथा कर्मचारी उपलब्ध गराउन मांग गरिएको हाे ।

वडावासी ,नगरवासीकाे स्वास्थ्यकाे मध्य नजर गरि साेही वडाका नेपाली काँग्रेस पार्टीकाे तर्फबाट वडा अध्यक्ष प्रत्यासी रमेश यादव नेतृत्वकाे टाेलीले मधेस प्रदेश सरकारका स्वास्थ्य तथा जनसंख्या मन्त्री विरेन्द्र सिंह समक्ष बिहीबार ज्ञापनपत्र बुझाएका छन् ।

स्वास्थ्य चौकी शिवनगरमा बिरामीहरूको चाप बढी रहेको मध्यनजर गरी बिरामी जाँच गर्ने ल्याब भिडीयो एक्सरे तथा विभिन्न उपकरणहरू उपलब्ध नरहेको हुँदा साे आसपासका बासिन्दा तथा नगरका सम्पूर्ण जनताहरूलाई धेरै कठिनाइ भइरहेको र समस्या उत्पन्न भई अन्त निजी अस्पतालहरुमा महगो शुल्क तिरी उपचार गराउन बाध्यता रहेको थियोे ।

साेकाे मध्य नजर गर्दै नेपाली कांग्रेस रौतहट जिल्ला सभापति तथा प्रदेस सांसद जितेन्द्र यादव,गरूडा नगरपालिकाका मेयर प्रत्यासी सुनील यादवकाे पहलमा वडा प्रत्यासी यादव नेतृत्वकाे टाेलीले मन्त्रालयमा पुगि साे ज्ञापनपत्र बुझाएका हुन् । उक्त माग पूरा भए पश्चात् साे भेगका मानिसहरूलाई उपचार गराउन सहज हुनेछ । ज्ञापनपत्र बुझाउने क्रममा सियाराम राउत, जितेन्द्र यादव, रामप्रवेश साह लगायतका व्यक्तिहरू सहभागी थिए ।

काठमाडौं, १६ कार्तिक ।

गृह मन्त्रालयले मातहतका ४० उपसचिवको सरुवा गरेको छ। सरुवा हुनेमा केही जिल्लाका प्रमुख जिल्ला अधिकारी र सहायक प्रमुख जिल्ला अधिकारी पनि रहेका छन्।

मापदण्डअनुसार अवधि पुगेका र सरुवा मागेकामध्ये ४० जनाको सरुवा गरेको गृह मन्त्रालयले जनाएको छ।

आरके श्रीवास्तव,रौतहट, १२ गते कार्तिक।

रौतहट जिल्लाको वृन्दावन नगरपालिका वडा नं ७ धमौरामा नगरस्तरीय मेयर कप २०८० क्रिकेट प्रतियोगिता आईतवार देखि सुरु भएको छ । वृन्दावन नगरपालिकाको आर्थिक सहयोग तथा वृन्दावन क्रिकेट समिति वृन्दावन ६ रौतहटको आयोजनामा आज देखि सुरु भएको सो क्रिकेट प्रतियोगिताको उदघाटन नगर प्रमुख विनोद प्रसाद कुर्मीले आज एक समारोहका विच गरेका हुन्। वृन्दावन नगरपालिका वडा नं.६ र ७ को रुपा नेपाली पाल मा.वि. धमौरा को संयुक्त खेल मैदान मा आयोजित उदघाटन कार्यक्रममा नगर प्रमुख कुर्मीले खिलाडीहरु सँग क्रिकेट खेलेर प्रतियोगिताको उदघाटन गरेका छन्। करिब एक महिना अर्थात मंसिर ७ गते सम्म चल्ने प्रतियोगिताका प्रथम विजेतालाई नगद रु ५५ हजारको साथै मेडल, ट्रफ र दोश्रो विजेता टोलीलाई नगद रु ३५ हजार

रुपैयाका साथै मेडल, ट्रफी र प्रमाणपत्र प्रदान गरिने प्रतियोगिताका संयोजक आशिषराज पटेल ले जानकारी दिए । कार्यक्रममा बोल्दै वृन्दावन नगरपालिकाका नगर प्रमुख कुर्मीले क्रिकेट खेलको माध्यमले मात्र आफ्नो पालिकालाई न भई सिंगै हाम्रो देश लाई नै चिउने माध्यम रहेकोले आफुले आफ्नो पालिका का स्थानीय खेलाडीहरुलाई प्रोत्साहन गरेर अगाडि बढाउने सोच ले सो मेयर कप क्रिकेट प्रतियोगिता सञ्चालन गरेको बताए। नगर प्रमुख कुर्मीले प्रतियोगितामा भाग लिएर खेल्न आउने वडा नम्बर १ देखि ९ सम्मकै सम्पूर्ण खेलाडीहरुलाई शान्त र शभ्य तरिकाले खेल्न निर्देशन दिदै निर्णायक टोलीलाई पनि काखा पाखा नगरी खेल्न सञ्चालन गर्न आग्रह गरे।उहाँले अबको २०८१ मा हुने मेयर कप सो नगरपालिका वडा नं.९ भुषहामा सञ्चालन गर्ने घोषणा समेत गर्नुभयो। त्यसैगरी सो नगरपालिकाका निमीत प्रमुख प्रशासकिय अधिकृत रासनरायण पटेलले नरमा भईरहेको ऐतिहासिक मेयरकप क्रिकेट प्रतियोगिताले स्थानीय खेलाडीलाई प्रोत्साहन गर्दै उनीहरुको क्षमता अभिवृद्धि गरिरहेको बताउनुभयो।

पटेलले सो प्रतियोगिता मा खेल्न आएका सम्पूर्ण टिमलाई अग्रिम बधाई दिदै उनीहरूलाई खेलमा निरन्तरता दिएर अगाडि बढ्न र अन्तर्राष्ट्रिय खेलाडी समेत बनेर देश र पालिकाको नाम रौशन गर्न आग्रह गरे। त्यति मात्र न भइ अधिकृत पटेलले आफ्नो कार्यकालमन सो नगरपालिका एउटा राम्रो स्टेडियम बनाउन पहल तथा प्रयास गर्ने आस्वासन समेत दिनुभयो। उक्त प्रतियोगितामा वडा नं.१ का वडा अध्यक्ष रामनाथ सहनी,वडा नं.६ का वडाअध्यक्ष मजहर मन्सुर,वडा नं.७ का वडाअध्यक्ष मदन पाल,वडा नं.८ का वडा अध्यक्ष रविन्द्र प्रसाद साह र वडा नं. ९ का वडा अध्यक्ष प्रवेज आलम,कार्यपालिका सदस्य राजेश पासवान,र कार्यपालिका सदस्य रामबाबु साह लगायत विभिन्न वडा बाट आए का विभिन्न पार्टी प्रतिनिधि तथा खेलाडी र दर्शकहरुको उपस्थिति समेत रहेको थियो। प्रतियोगितामा आज वडा नम्बर ६ र ९ विच भिडन्त भएको छ भने सो मेयर कप क्रिकेट प्रतियोगितामा सो नगरका वडा नं १ देखी ९ वटै वडाका टोलीहरुबीच प्रतिष्पर्धा हुने जनाइएको छ ।

सागर ठाकुर,राैतहट, १२ गते कार्तिक

रौतहटको फतुवा बिजयपुर नगरपालिकामा हाकिमको बिषयलाई लियर अवस्था तनावग्रस्त भएको छ । यसै विषयलाई लिएर त्यहाँ विवाद भएको छ । आईतवार नगरपालिकाका कार्यवाहक नगर प्रमुख अम्बेया खातुनले कार्यालय प्रमुखको रुपमा सुरेन्द्र प्रधानलाई हाजिर गराउन खोज्दा वडा अध्यक्षहरु त्यसको विरुद्धमा उत्रिएका छन् । कार्यवाहक नगर प्रमुख खातुनले जसरी भए पनि प्रधानलाई नै हाजिर गराउन खोजे पछि सबै वडाका वडाध्यक्षहरु त्यसका बिरुद्धमा उत्रिएका हुन् । वडा अध्यक्षहरूले प्रधानकाे सट्टा अर्काे हाकिम ल्याउने अडानमा छन् । नगरपालिकामा हाकिमकै बिषयलाई लिएर पलतुवा बिजयपुरमा लामो समय देखि बिवाद चल्दै आएको छ ।

कार्यवाहक नगर प्रमुख खातुन र वडा अध्यक्षहरु बिचको विवाद कायमै रहदा त्यसमा कार्यरत शिक्षक,स्वास्थ्यकर्मी,करारका कर्मचारीहरु तलब भत्ता खान्नबाट बञ्चित भएका छन् । त्यस्तै वृद्धवृद्धा जेष्ट नागरिक र बालबालिकाहरु पनि बालपोषण भत्ता खानबाट बन्चित भएका छन् । जनप्रतिनिधिहरु बिचको आन्तरिक विवादका कारणले असारमा गर्नु पर्ने नगर सभा समयमा नहुँदा विकास निर्माणका कार्यहरु अगाडि बढन सकेका छैन् । तलबभत्ता खान्नबाट बन्चित भएका कर्मचारीहरु तलब पाउनु पर्ने माग गर्दै गएको असोज १९ गते नगरपालिकामा ताल्चा लगाएका थिए । नगरपालिकाकी कार्यवाहक नगर प्रमुख खातुनले कर्मचारीहररूलाई समयमै तलब भता खुवाउन नसके पछि आक्रोशित कर्मचारीहरुले नगरपालिकामा लगाइएको ताल्चा वडा अध्यक्ष राकेश यादवको नेतृत्वमा गएका वडा अध्यक्षहरुको टोलीले शुक्रबार खुलाएका थिए । आफुहरू छठ भन्दा अघिनै तलबभत्ता खुवाउने प्रतिबद्धता जनाए पछि कर्मचारीहरुले लगाएको ताल्चा खोलिएकाे थियोे ।

हिन्दुहरुको महान चाड शुभ दिपावली र छठ पर्व नजिकिए पनि तलब भत्ता खुवाउन कार्यवाह नगर प्रमुखलाई पटक पटक आग्रह गरे पनि केही वास्ता न गरे पछि सो ताल्चा स्थानिय प्रहरी ,संचारकर्मि,कर्मचारी,जनप्रतिनिधि र स्थानीयहरूको रोहबरमा कार्तिक ११ गते ताल्चा खुलाईएको हो । बिगत लामो समय देखि बन्द रहेको नगरपालिका ताल्चा खुले पछि अब पुर्ण रुपमा संचालनमा आएको वडा अध्यक्ष राकेश यादव( पप्पु) जानकारी दिनु भयो । यस बिषयमा वडा अध्यक्षहरुको तर्फबाट वडाध्यक्ष राकेश यादव संग बुझदा आफुहरु यो पालिकामा यस भन्दा पहिला पनि हाकिमको रुपमा सुरेन्द्र प्रधान हुदाँ ठुलो भ्रष्टचार गरेको भन्दै त्यसलाई कुनै हालतमा हाजिर हुन नदिने अडान लिएको बताउदै आएका छन् । वडा अध्यक्ष यादवले प्रधानको सट्टामा अर्को हाकिम मन्त्रालयबाट ल्याउन माग राखेका छन । तर कार्यवाहक नगर प्रमुखले भने प्रधानलाई नै हाजिर गराउन खोजेका छन् । सोही बिषयलाई लियर कार्यवाहक प्रमुख खातुन संग बुझदा वहाँले अहिले छठ पर्व नजिकै आएका कारण सुरेन्द्र प्रधानलाई नै हाजिर गराएर कर्मचारहरु,बालबालिका वृद्धवृद्धा र जेष्ट नागररिकहरुको समाजिक सुरक्षा भत्ता खुवाउन आफनो चाहना रहेको बताउनु भयो । ताला खुले पछि नगरपालिकामा आईतबार हाकिम हाजिर गराउन खोज्दा वडाध्यक्षहरु त्यसको बिरुद्धमा उत्रिदा अवस्था तनाव ग्रस्त भएको थियो । नगरपालिकामा जनप्रतिनिधीहरुको बिवादले गर्दा अवस्था तनावग्रस्त भएपछि ठुलो संख्यमा प्रहरी र शस्त्र प्रहरी परिचालन गरिएको थियो । प्रहरीको बाक्लो उपस्थितीले गर्दा पालिकामा ठुलो घटनाबाट जोगिएकाे हाे ।

सागर संगम ठाकुर, रौतहट, कार्तिक ९ गते

रौतहटको धरहरीमा भुमिहिन दलित सुकुम्बासी र अब्यवस्थित बसाेबास गर्नेहरुकाे लागि जग्गा उलब्ध गराउनकाे लागि विभिन्न समितिहरु गठन गरिएको छ । विहिबार जिल्लाको देवाही गाेनाही नगरपालिका-९ धरहरीका वडा अध्यक्ष वीर बहादुर साहकाे अध्यक्षतामा बसेको बैठकबाट विभिन्न राजनीतिक दलबाट एकएक जना प्रतिनिधि र दलितबाट सदस्य रहने गरि समिति चयन गरिएको हाे । राष्ट्रिय भुमि आयाेग गठन २०७८ दफा ६ काे खण्ड (ख) ले दिएको अधिकार प्रयोग गरि राष्ट्रिय भुमी आयाेगले बनाएको कार्य बिधि अनुसार समिति गठन गरिएको छ । नव गठित समितिको सदस्यहरुमा नेकपा एमालेबाट रामअज्ञा ठाकुर,माओवादीबाट शंकर साह,नेपाली कांग्रेसका,बच्चु साह,आम जनता पार्टीका रंजन साह,एकीकृत समाजबादीका,जयशंकर दास,राष्ट्रिय स्वतन्त्र पार्टीका बिपत राय,जनमतका,नरेन्द्र साह(नबिलाल) दलितबाट राम सेवक दास,अलपसंख्यकबाट रमनवा देवी र नागेन्द्र ठाकुरलाई चयन गरिएको वडा अध्यक्ष वीर बहादुर साहले जानकारी दिनु भयो ।

गठित समितिले वडामा रहेका बास्तबिक भुमिहिन दलित सुकुम्बासी र अव्यवस्थित बसाेबास गर्ने नागरिकहरूलाई सहि पहिचान गरि नाम छनाैट गर्नुपर्ने प्रवधान रहेको अध्यक्ष साहले बताए । आयाेगले भूमि सम्बन्धी ऐन, २०२१ को दफा ५२क. को उपदफा (३) र दफा ५२ख. को उपदफा (६) बमोजिमको अधिकार प्रयोग गरी नेपाल सरकारले भूमिहीन दलित, भूमिहीन सुकुम्बासीलाई जग्गा उपलब्ध गराउने तथा अव्यवस्थित बसोबासीलाई व्यवस्थापन गर्ने प्रयोजनको लागि राष्ट्रिय भूमि आयोग गठन गरेको छ । यस आयाेगका मुख्य काम कर्तव्य अधिकार भूमिहीन दलित, भूमिहीन सुकुम्वासी र अव्यवस्थित बसोबासीको पहिचान र प्रमाणीकरणको लागि आधार र मापदण्ड तोक्ने, ।भूमिहीन दलित, भूमिहीन सुकुम्वासी र अव्यवस्थित बसोबासीको स्थानीय तहबाट लगत सङ्कलनको लागि आवश्यक कार्यविधि र ढाँचा तयार गरी स्वीकृत गर्ने ।भूमिहीन दलित, भूमिहीन सुकुम्वासी र अव्यवस्थित बसोबासीको पहिचान, लगत सङ्कलन र प्रमाणीकरणको काम स्थानीय तह मार्फत गर्ने ।सम्बन्धित मालपोत. कार्यालयसँग समन्वय गरी सम्बन्धित नापी कार्यालयबाट जग्गा नाप जाँच गरी नक्सा स्रेस्ता तयार गर्ने वा गराउने ।स्थानीय तहबाट प्राप्त तथ्याङ्कको विश्लेषण गर्न आवश्यक प्रणालीको विकास गरी सोही प्रणालीको आधारमा अव्यवस्थित बसोबासीको जग्गाको वर्गीकरण गर्ने ।

अव्यवस्थित बसोबासीलाई जग्गा उपलब्ध गराए बापत ऐन बमोजिमको दस्तुर लिने ।ऐनको दफा ५२ख. को उपदफा (४) बमोजिमको जग्गा हो वा होइन भज्ने सम्बन्धमा प्रदेश सरकार र स्थानीय तहको समन्वयमा यकिन गर्ने वा गराउने । स्थानीय तहबाट भूमिहीन दलित, भूमिहीन सुकुम्वासी र अव्यवस्थित बसोबासीको पहिचान र प्रमाणीकरण सम्बन्धी तथ्याङ्क प्राप्त भएपछि सोही बमोजिम भूमिहीन दलित, भूमिहीन सुकुम्वासीलाई जग्गा उपलब्ध गराउन . र अव्यवस्थित बसोबासीको व्यवस्थापन गर्न कार्य प्रक्रिया सुरु गर्ने ।स्थानीय विशिष्टता समेतको आधारमा सहरी क्षेत्रमा सामूहिक आवास वा जग्गा विकासको माध्यमबाट भूमिहीन दलित, भूमिहीन सुकुम्वासीलाई जग्गा उपलब्ध गराउने सम्बन्धमा आवश्यक निर्णय गर्ने ।भूमिहीन दलित, भूमिहीन सुकुम्वासीलाई जग्गा उपलब्ध गराउने तथा अव्यवस्थित बसोबासीलाई व्यवस्थापन गर्ने सम्बन्धमा यो आदेश र प्रचलित अन्य कानुनको अधीनमा रही आवश्यक निर्णय गर्ने ।कार्यक्षेत्रसँग सम्बन्धित विषयमा जुनसुकै निकायसँग कागजात माग गर्न, व्यक्तिलाई झिकाई बुझ्न , कागज गराउन, स्थलगत सर्जमिन गर्न वा गराउन सक्ने ।हदबन्दी भन्दा बढी भई रोक्का रहेका जग्गा भूमिहीन दलित, भूमिहीन सुकुम्वासीलाई उपलब्ध गराउने जस्ता कार्यहरू छन ।

आरके श्रीवास्तव,राैतहट,०८ गते कार्तिक राैतहट ।

राैतहटको कटहरिया नगरपालिकामा सञ्चालित प्रथम मेयरकप नकआउट टि २० क्रिकेट प्रतियोगिताको उपाधि सिम्राैनगढले जितेको छ। कटहरिया वडा नम्वर–४ मा रहेको क्रिकेट मैदानमा सञ्चालित फाइनल खेलमा सिम्राैनगढले बिरगंजलाई ७ रनले हराउँदै उपाधि कब्जा गरेको हो । उपाधि कब्जा गरेसंगै सिम्राैनगढले रु.एकहतर हजार सहित कप, मेडल र प्रमाण पत्र हात पारेको छ । त्यस्तै उपविजेता बनेको बिरगंजले रु. पैतिस हजारसहित मेडल,कप र प्रमाण पत्र हात पारेको छ ।

सिम्राैनगढले निर्धारित २० ओभरकाे खेलमा १ सय ३३ रन बनाएको थियोे । १३४ रन बिजयी लक्ष्य पाएकाे बिरगंजले १९ दशमलव ३ ओभर खेल्दै १ सय २६ रनमै सम्पूर्ण टिम समेटाएकाे थियोे । खेलकाे बिजेता र उप बिजेता टिमलाई क्रमशः नगर प्रमुख अजय प्रकाश जयसवाल र उप प्रमुख रिता देवी यादवले चेक, मेडल र प्रमाण पत्रले पुरस्कृत गर्नु भयाे । कटहरिया नगरपालिकाकाे आयाेजनामा भएको मेयर कप टि २० नक आउट क्रिकेट प्रतियोगितामा बिरगंज,सिम्राैनगढ, हेटौंडा,कटहरिया गरि ८ वटाकाे टिमकाे सहभागीता रहेको थियाे ।