१० मंसिर, जनकपुरधाम ।

सत्ता भागवण्डाका क्रममा चार महिनाअघि थपिएको मधेशको श्रम तथा यातायात मन्त्रालयका कर्मचारीले तीन साताअघि मात्र तलब खान पाए । नयाँ खडा गरिएको मन्त्रालयमा लेखापाल नहुँदा आर्थिक कारोबार हुन सकेको थिएन ।

तीन हप्ताअघि मुख्यमन्त्री तथा मन्त्रिपरिषद कार्यालयका सहलेखापाल अनिल श्रीवास्तवलाई श्रम तथा यातायात मन्त्रालय पनि हेर्ने जिम्मेवारी दिएपछि बल्ल कर्मचारीले तलब खान पाएका हुन् ।

यातायातमन्त्री चन्दन सिंहले मन्त्रालयको कार्यप्रगतिबारे सोध्दा कर्मचारीले तलब खान पाएकै विषय उठाए । ‘केही दिनअघि कर्मचारीहरुले तलब खाइसकेका छन् । अब बजेट सञ्चालन कार्यविधि बनाएर बजेट खर्च र विकासे काम अघि बढ्छ’, उनले भने ।

चार महिनाको अवधिमा यो मन्त्रालयले अरु केही काम गरेको छैन । एक कर्मचारीका अनुसार नयाँ मन्त्रालय भएकाले बजेट खर्च गर्नका लागि बल्ल कार्यविधि तयार गरिएको छ । त्यस्तै सर्लाहीमा यातायात व्यवस्था कार्यालय खोल्ने तयारी पनि भइरहेको छ ।

मधेशकै भूमि व्यवस्था कृषि तथा सहकारी मन्त्रालयले बजेटमा उल्लिखित कार्यक्रम कार्यान्वयनका लागि केही सूचना जारी भएका छन् । मन्त्रालयका सचिव डा. शम्भुकुमार पाण्डेका अनुसार जिल्लाहरुमा प्रांगारिक प्रवद्र्धनका कार्यक्रम, बाली प्रवद्र्धन कार्यक्रम सञ्चालनका लागि सूचना प्रकाशन गरिएको छ ।

सूचना प्रकाशन गरेपछि किसान तथा समूहहरुबाट प्रस्ताव आह्वान गरेको र प्रस्ताव परेपछि मूल्यांकन गरेर सम्झौता गरिने उनको भनाइ छ ।

मन्त्री गोविन्द न्यौपाने अर्थ मन्त्रालयाट बजेट खर्च मार्गदर्शन ढिलो आएकाले अहिलेसम्म काम हुन नसकेको बताउँछन् । ‘मन्त्रालयसहित मातहत निकायले विकासे काम अघि बढाउन सूचना निकाल्न थालेका छन् । अर्थ मन्त्रालयले ढिलो गरी बजेट संचालन स्वीकृति दिँदा पहिलो चौमासिकमा खासै काम हुन सकेन ।’ उनले भने, ‘

उद्योग वाणिज्य तथा पर्यटन मन्त्रालयले पनि तलब, भत्तालगायत चालु प्रकृतिको कार्यक्रममा मात्र खर्च गरेको छ, पुँजीगत खर्च भएको छैन । ‘प्राविधिक छैन । इस्टिमेट बनाउने काम भर्खर सुरु भएको छ । मानव संशाधन बिना काम सम्भव छैन । त्यसैले अहिलेसम्म हाम्रोमा पुँजीगत तर्फ बजेट खर्च भएको छैन’ मन्त्रालयका सचिव जयकुमार राउत भन्छन् ‘सम्बन्धित निकायबाट प्राविधिक माग गरेका छौं ।’

यो मन्त्रालय अन्तर्गत मधेशका आठ जिल्ला हेर्ने तीनवटा पर्यटन विकास कार्यालय छन् । प्रत्येक पर्यटन कार्यालयमा तीन–तीनजना पाँचौ र छैठौं तहका सबइन्जिनियरको दरबन्दी छ । तर ती कुनै पनि कार्यालयमा अहिले प्राविधिक कर्मचारी छैनन् ।

करारमा प्राविधिक भर्नाका लागि डेढ महिनाअघि मुख्यमन्त्री तथा मन्त्रिपरिषद कार्यालयमा निवेदन दिइएको छ । त्यसअघि मौखिक रुपमा पटक पटक माग गरिए पनि सुनुवाइ नभएको सचिव राउत बताउँछन् । दरबन्दी अनुसारको प्राविधिक नदिए, डोर हाजिरीमै प्राविधिक राख्न मुख्यमन्त्री कार्यालयसंग स्वीकृति लिने उनको भनाइ छ ।

मधेश प्रदेशको सबैजसो मन्त्रालयको स्थिति यस्तै छ । चालू आर्थिक वर्ष २०८०/०८१ यता अर्थात् गत साउनदेखि मंसिर ७ गतेसम्म मधेश सरकार र मातहत निकायले कुल बजेटको ४ प्रतिशत समेत बजेट खर्च गर्न सकेको छैन । पुँजीगत खर्च त २ प्रतिशत पनि हुन सकेको छैन ।

मधेश प्रदेश लेखा नियन्त्रक कार्यालयको तथ्यांक अनुसार चालु आर्थिक वर्षको कुल बजेट ४४ अर्ब ११ करोड ४६ लाख ३२ हजार रहेकामा हालसम्म १ अर्ब ५० करोड ७३ लाख २३ हजार २२ रुपैयाँ ३६ पैसा मात्र खर्च गरेको हो । जुन कुल बजेटको ३.४१ प्रतिशत खर्च भएको लेखा नियन्त्रका कार्यालयले जनाएको छ ।

जसमा पुँजीगत तर्फ ४९ करोड ७८ लाख ९१ हजार ५६४ रुपैयाँ ६ पैसा खर्च गरेको छ । यो कुल पुँजीगत बजेट २५ अर्ब ५३ करोड ९६ लाख ९४ हजारको करिब २ प्रतिशत हो ।

चालुतर्फ रहेको १८ अर्ब ५७ करोड ४९ लाख ३८ हजार बजेट विनियोजन भएकोमा गत साउन १ देखि ७ मंसिरसम्म १ अर्ब ९४ लाख ३१ हजार ४५८ रुपैयाँ ३० पैसा खर्च भएको तथ्यांकमा उल्लेख छ ।

मन्त्रालयका कर्मचारीहरु अर्थ मन्त्रालयले भदौ अन्तिम साता मात्र बजेट खर्चको अख्तियारी दिएकाले खर्च गर्न नसकेको बताउँछन् । ‘अर्थ मन्त्रालयले साउन पहिलो साता दिनुपर्ने बजेट खर्चको अख्तियारी (पीएलएमबीएस) र बजेट खर्च मार्गदर्शन भदौको अन्तिम साता दियो । यसकारणले पनि खासै काम हुन सकेन र बजेट खर्च भएन’, एक सचिवले भने ।

अर्थ मन्त्रालयका सचिव प्रेमप्रसाद भट्टराई भने विनियोजन ऐन अनुसार साउन १ गतेदेखि मन्त्रालयहरुले आफैं काम गर्न सक्ने बताउँछन् । ‘तर परम्परा के छ भने अर्थ मन्त्रालयले बजेट खर्च मार्गदर्शन पठाउने र त्यसैलाई मन्त्रालयहरुले अख्तियारी बुझ्ने गरेका छन्’, उनले भने ।

राजनीतिक कारणले मन्त्रायहरुमा अख्तियारी पठाउन ढिलाइ भएको उनको भनाइ छ । सचिव भट्टराई भन्छन्, ‘ढिलो हुनु नितान्त पोलिटिकल कारण हो । पटक पटक मन्त्रिमण्डल विस्तार, राजनीतिक समीकरणको कारण मन्त्रिपरिषदबाट बजेट मार्गदर्शनबारे छलफल हुन ढिलो भयो । त्यसै कारण मार्गदर्शन बनाउन र पठाउन ढिलाइ भयो ।’

मुख्यमन्त्री सरोजकुमार यादवले २१ माघ २०७९ मा प्रदेश सभाको पाँचौ वार्षिकोत्सवमा प्रदेश सरकारले बुलेट रेलले भन्दा पनि तिब्र गतिमा काम गर्ने बताएका थिए ।

‘भोलि बिहान…सबै मन्त्री र सचिवहरूको बैठक आह्वान गरेको छु । बैठकबाट एउटा ठोस निष्कर्ष निकालेर प्रदेश सरकारका काम बुलेट ट्रेनभन्दा पनि बढी स्पिडमा गरिनेछ ।’

तर सरकार बुलेट रेलको गतिमा होइन कछुवा गतिमा रहेको राजनीतिक वृत्तमा चर्चा छ । मधेशमा जनसंख्याको अनुपातमा कम बजेट दिएको भनेर मुख्यमन्त्री र मन्त्रीहरुले संघीय सरकारको आलोचना गर्छन् । तर मधेशले आफैंले बनाएको बजेटको आधा पनि खर्च गर्न सकेको छैन ।

आर्थिक वर्ष २०७९/०८० मा  ४७ अर्ब २ करोड ५० लाख ५२ हजार ११७ रुपैयाँ कुल बजेट रहेकामा २७ अर्ब ३३ लाख १२ हजार ८८८ रुपैयाँ ५२ पैसा मात्र खर्च भएको थियो । अर्थात् ४२.५८ प्रतिशत रकम खर्च हुन सकेको थिए ।

आर्थिक वर्ष २०७८/७९ मा आधा बजेट नै फ्रिज भएको थियो । त्यस आर्थिक वर्षमा ३४ अर्ब ८८ करोड ९८ लाख १० हजार बजेटमध्ये १७ अर्ब ७६ करोड ३६ लाख ७५ हजार ७४९ रुपैया बजेट मात्र खर्च भएको थियो ।

जनकपुरधाम,मंसिर १०,

– धनुषाको सबैला नगरपालिकाले कार्तिक पूर्णिमाको अवसरमा भोलि साेमबार बिदा दिएको छ‌ । नगरप्रमुख कारीराम यादवले पूर्णिमा मेलाको अवसरमा सोमबार बिदा दिएको सूचना जारी गरेका हुन् ।

सोमबार नगरपालिका र अन्तर्गतका सम्पूर्ण कार्यालयहरूमा एक दिनका लागि स्थानीय बिदा रहने सूचनामा उल्लेख छ ।

१० मंसिर/

पोखरामा चलिरहेको केपी ओली कप टी-२० क्रिकेट प्रतियोगितामा नेपाल पुलिस क्लबले मधेस प्रदेशलाई हराएको छ। आज  भएको खेलमा पुलिसले मधेसलाई ५७ रनले हराएको हो।

पुलिसले दिएको १ सय ७६ रनको लक्ष्य पछ्याएको मधेस १८ ओभर २ बलमा १ सय १८ रनमा अल आउट भयो । मधेसका रुपेश सिंहले सर्वाधिक ४० रन बनाए। यस्तै इमरान शेखले २२ रन जोडे। बलिङतर्फ पुलिसका करण केसी, सागर ढकाल, रशिद खान र ललित राजवंशीले समान २ विकेट लिए।

यसअघि पोखरा रङ्गशालामा टस जितेर ब्याटिङ रोजेको पुलिसले निर्धारित २० ओभरमा ५ विकेट गुमाएर १ सय ७५ रन बनायो। पुलिसका कुशल भुर्तेलले शतक बनाए। उनी ५७ बलमा ७ छक्का र ८ चौकाको मद्दतमा १ सय २ रन बनाएर आउट भए।

कुशल यो प्रतियोगितामा शतक बनाउने पहिलो खेलाडी बनेका छन्। बलिङतर्फ मधेसका विशाल पटेल र विशाल शुस्लिङले समान २ विकेट लिए।

बारा ।

मधेस प्रदेश ट्राफिक प्रहरी कार्यालय पथलैयाले जरिमानाका नाममा ‘कमाउने धन्दा’ गरेको रहस्य खुलेको छ ।

मधेस प्रदेशअन्तर्गत आठवटै जिल्लामा यातायात व्यवसायीदेखि सर्वसाधारण ट्राफिक प्रहरीद्वारा जरिमानाको नाममा ठगिँदै आएको पाइएको हो ।

भारत बिहार राज्य सिक्टाबाट विश्वप्रसिद्ध गढीमाई मन्दिर दर्शन गर्न आउने यात्रुसमेत ठगिएको पाइएको छ ।

करिब ५० किलोमिटर भारत बिहार सिक्टाका सुनिललाल साह तेली परिवारसँगै वीरगन्ज बस्ने आफन्तको ना६२प ९०८५ नम्बरको टीभीएस मोटरसाइकल लिएर गढीमाई दर्शन गर्न बिहानै ५ बजे आएको सुनाए ।

गढीमाई मन्दिर धेरै आशा गरेर दर्शन गर्न आएको उनकी पत्नी सीता देवीले बताइन् । दर्शन गरेर फर्कने क्रममा बिहान ७ बजे एक्कासि ट्राफिक प्रहरीले गाडी रोकेको उनी बताउँछिन् । ‘मोटरसाइकलको ब्लुबुक दियौं, लाइसेन्स नभएकाले नगद १ हजार माग गरे,’ उनले भनिन्, ‘घर जान ट्रेन छुट्ने हतार भएकाले पैसा दियौं तर रसिद दिन मानेनन् ।’ कुनै पनि हालतमा रसिद चाहिन्छ भनेपछि ती ट्राफिक प्रहरीले गाली गलौजसमेत गरे । केही नलाग्ने देखेपछि ५ सयको रसिद काटेर पैसा फिर्ता दिएर बैंकमा जम्मा गरेर रसिद लिएर आउन भनिएको उनले बताए ।

ट्राफिक प्रहरीले मागेको हजारको रसिद मागेकै कारण जरिमानाका नाममा करिब ३ घण्टाभन्दा बढी दौडाएको तेली दम्पतीको दुखेसो छ । ‘घुस रकम नदिँदा रसिद काट्ने र इन्ट्रीबिनै पैसा तिर्न पठाउने विभिन्न बहानामा दुःख दिने गरेको’ उनीहरूले सुनाए ।

ट्राफिक प्रहरीले गुडिरहेको सवारीसाधन चेकजाँच गर्नु सुरक्षा दृष्टिकोणले सराहनीय रहेको नागरिक समाज बारा अध्यक्ष उमेशलाल दास बताउँछन् । ब्लुबुक, लाइसेन्स, बिनाहेल्मटलगायतमा जरिमाना गर्नु राज्यको हितमा रहेको दासले बताए ।

‘इन्टरनेटको जमानामा अनलाइनबाट ठाउँको ठाउँ जे पनि हेर्न, अनलाइन सपिङ पेमेन्ट गर्न सकिने भएकाले नै सरकारले जरिमाना पनि अनलाइन गरेको मेरो बुझाइ छ,’ अध्यक्ष दास भन्छन् ।

ट्राफिक प्रहरीले बंैक खुल्ने समयबाहेक जरिमाना काट्यो भने सवारीधनीको एक मात्र विकल्प हुन्छ, अनलाइन पेमेन्ट । जरिमाना काट्नेबित्तिकै अनलाइन ‘इन्ट्री’ गरिदिँदा सवारीसाधनलाई बैंक कुद्ने झन्झटमुक्त हुने नागरिक समाज अध्यक्ष दास बताउँछन् ।

कलैया ट्राफिक इन्चार्ज छेम पंगेनी ‘प्राविधिक कारणवस त्यस्तो भुलचुक भएको’ स्विकार्छन् । आफूमातहतको प्रहरीले ‘कुनै किसिमको आर्थिक लेनदेन गरेको देखिए तुरुन्त कारबही प्रक्रिया अगाडि बढाउने’ प्रतिबद्धतासमेत उनले जनाए ।

त्यस्तै, वीरगन्ज भन्सार कार्यालय आईसीपी र सुक्खा बन्दरगाहबाट विभिन्न कलकरखानाका लागि कच्चा पदार्थ ढुवानी गर्ने सवारीसाधनबाट जरिमानाका नाममा असुली गरी प्रहरी उपरीक्षकसम्म पुग्ने गरेको बताइएको छ ।

वीरगन्ज पथलैया सडकखण्डमा चल्ने अधिकांश सवारीसाधन ओभरलोड, सडक पेटीमै पार्किङ गरेकाले नै दुर्घटना बढ्दै गरेको सिमराका मनोज साह बताउँछन् ।

मधेस प्रदेश ट्राफिक प्रहरी कार्यालय पथलैयाले आर्थिक वर्ष २०७९÷८० मा २६ करोडभन्दा बढी राजस्व संकलन गरेको मधेस प्रदेश ट्राफिक प्रहरी नायब उपरीक्षक माधव काफ्लेले जानकारी गराए । मधेस प्रदेशमै ५ हजार ९ सय ८८ सवारी दुर्घटना भएको पनि उनले जानकारी दिए । जसमा ८ हजार ३ सय ७६ सवारीसाधन क्षतिग्रस्त भएका छन् ।

आव २०७९–८० मा ५ सय ५६ जनाले सवारी दुर्घटनामा ज्यान गुमाए भने ९ हजार ६ सर ७० घाइते भएको काफ्लेले जानकारी दिए ।

बारा,मंसिर ०९ गते ।

१६ लाख बराबरको समान सहित ट्रकलाई बारा प्रहरीले नियन्त्रणमा लिएकाे छ ।

शुक्रबार बिहान जिल्ला प्रहरी कार्यालय तथा मातहत ईलाका प्रहरी अमलेखगंज बाराबाट खटिएको विशेष प्रहरी टोलीले जिल्ला बारा जितपुर सिमरा उपमहानगरपालिका वडा नं.२१ स्थित अमलेखगंजबाट नियन्त्रणमा लिएको जिल्ला प्रहरी कार्यालय बाराले जनाएको छ ।

ना ७ ख ८१४५ नम्बरको ट्राकलाई रोकी चेक जाँच गर्दा अन्दाजी मुल्य १६ लाख ३७ हजार ७ सय ३ रूपैया ९० पैसा बराबरको लोड गरेको टिएमटि रड तथा अन्य बिल विजक समेत फरक परेकोले उक्त समान सहित ट्रक नियन्त्रणमा लिई आवश्यक कानूनी प्रकृया अगाडी बढाईएको प्रहरीले जनाएको छ ।

 आरके श्रीवास्तव,राैतहट,मंसिर ०९ गते ।

बिधालयलाई नयाँ शिराबाट अगाडि बढाउने फतुवा बिजयपुर नगरपालिका वडा नम्बर ३ मेवाटाेलमा रहेको श्री यमुना काैशल्या स्मृति आधारभूत बिधालयका नव नियुक्त प्रधानाध्यापक रामप्रवेश साहले बताउनु भएको छ । पदभार सम्हालेपछि प्रतिक्रिया दिदै उनले यस्तो बताउनु भएको हाे ।

साहले भने,’शिक्षा आफ्ना सन्ततिहरुको अमुल्य सम्पत्ति भएकाले बालबालिकालाई राम्रो शिक्षा दिन आ-अफ्नो क्षेत्रबाट सवै लाग्नु पर्ने बताउनु भयो । अभिभावकहरूलाई आफू कार्यरत रहेको बिधालयमा बिद्यार्थीहरूलाई पठाउन आग्रह समेत गर्नु भयाे । यस बिधालयकाे भौतिक सुविधा देखि लिएर शैक्षिक वातावरणमा आफूले राम्रोसँग ध्यानदिने प्रतिबद्धता जनाए ।

याे बिधालय बनाउने र बिधालयकाे शिक्षाकाे गुणस्तर सुधार गर्ने आफ्नो पहिलो प्राथमिकता रहेकाे बताए । याे काम एक्लैले सकिन्न यसमा शिक्षक,अभिभावक र समुदायका सदस्यहरूले आफनाे अग्रसरता देखाउन सके बिधालयलाई सुधार गर्न सकिने ठाेकुवा समेत गरे । आफू जिम्मेवारी सम्हालेसँगै यस सामुदायिक बिधालय प्रति अभिभावककाे आकर्षण जसरी पनि बढ्नेमा विश्वास व्यक्त गर्नु भयाे ।

एक महिना भित्र आफूले बिधालयकाे अवस्था परिवर्तन गर्ने प्रतिबद्धता समेत जनाएका छन् । गत महिनाकाे कार्तिक २० गते साहलाई नयाँ प्रधानाध्यापककाे रूपमा जिम्मेवारी दिइएको थियो । बिधालय व्यवस्थापन समितिकाे गत असाेज ०६ गतेकाे निर्णय तथा शिक्षा नियमावलीकाे दफा ९३ अनुसार कार्यरत सम्पूर्ण शिक्षकहरू मध्ये बरिष्टतम् रह्नु भएकोमा साहलाई निम्ति प्रधानाध्यापककाे जिम्मेवारी ताेकिएकाे प्रमुख प्रशासकीय अधिकृत सुरेन्द्र प्रधान द्वारा हस्ताक्षरित पत्रमा उल्लेख छ ।

आरके श्रीवास्तव,राैतहट,०६ गते मंसिर 

रौतहटकाे फतुवा बिजयपुरमा द्वन्द्व हुन बाट जाेगिएकाे छ । विवादकै बिच फतुवा विजयपुर नगरपालिकाको कार्यालय प्रमुखकाे रूपमा आज प्रमुख प्रशासकीय अधिकृत सुरेन्द्र प्रधान हाजिर भएका छन् ।

वडा अध्यक्षहरुले एक कदम पछाडि हटेपछी उपसचिव समेत रह्नु भएका प्रधान बुधबार कार्यालयमा हाजिर हुन सफल भएका छन् । वडा अध्यक्षहरू पछाडि हट्दा द्वन्द्व हुन बाट जाेगिएकाे हाे । उनलाई कार्यवाहक नगर प्रमुख अम्बेया खातुनले कार्यालयमा फुलमाला लगाई स्वागत गरेकी थिईन् ।

हाकिम हाजिर गराउने विषयलाई लिएर साे नगरपालिकामा धेरै दिनदेखि विवाद थियाे । वडाअध्यक्षहरूले कुनै पनि हालतमा प्रधानलाई हाकिमकाे रूपमा स्विकार नगर्ने अडान लिदै आएका थिए । विवादकै कारण उनले कार्यभार सम्हाल्न सकेका थिएनन् ।

यता आफूहरू सँग समन्वय नगरी कार्यालयमा हाजिर भएकाे भन्दै प्रधानलाई भने नगरपालिकामा सहज नहुने वडा नम्बर ९ का वडा अध्यक्ष राकेश यादवकाे भनाइ छ । उनले भने विवाद सल्टेकाे छैन् । विवाद अहिले पनि जारी छ । बस् हामीले त्यहाँ द्वन्द्व हुन दिएनाै । दुर्घटना हुन बाट जाेगियाे । बाहिरकाे मान्छे आएर नगरपालिकामा हाकिम हाजिर गराउने विषय हामीलाई कदापि स्विकार हुने छैन् । वडा अध्यक्षहरू सँग समन्वय नगरेसम्म नगरपालिका चलाउन गाह्रो हुने प्रतिक्रिया दिए ।

स्मरणीय हाेस् साे नगरपालिकामा अहिलेसम्म नगरसभा हुन नसकेको हाे । हाकिम हाजिर गराउने विषयमा नै अल्झि रहँदा असार १० गते हुनु पर्ने नगरसभा हुन नकेकाे हाे  । नगरसभा हुन नसक्दा सामाजिक सुरक्षा भत्ता,बालपाेषण भत्ता,कर्मचारी हरूले दशैं तिहारमा पनि तलब भत्ता पाउन सकेका थिएनन् । सुविधाहरू पाउन नसकदा उनीहरूलाई निकै सास्ती खेप्नु परेको छ ।

आरके श्रीवास्तव,राैतहट,मंसिर ०६ गते । 

राैतहटकाे देवाहीगाेनाहीमा जनमत पार्टीको क्षेत्रीय सम्पर्क कार्यालय उदघाटन गरिएको छ । साे नगरपालिकाकाे वडा नम्बर ९ स्थित राैतहट क्षेत्र नम्बर ३ काे क्षेत्रीय सम्पर्क कार्यालय खाेलिएकाे पार्टीका केन्द्रीय सदस्य रामेश्वर रायले जानकारी गराउनु भयाे ।

एक कार्यक्रमका बिच जिल्ला इन्चार्ज शेख जमसैदले गर्नु भएको हाे । पार्टी विस्तार गर्ने र कार्यकर्ताहरूलाई सहजहाेस् भन्ने उदेश्यले पार्टीकाे क्षेत्रीय सम्पर्क कार्यालय खाेलिएकाे हाे ।

साे अवसरमा जनमत पार्टीका नेता बिनय कुमार वर्मा,बिरेन्द्र साह,रमेश झा, महिला नेतृ पुनम झा, डा.रामशंकर ठाकुर,बाबुसाहेब,धर्मेन्द्र गुप्ता,जिल्ला परिवेक्षक इ.कृष्ण साह,राम बिस्वास पासवान र बिरेन्द्र साह नेता कार्यकर्ताहरूकाे उपस्थितिमा कार्यक्रम सम्पन्न भएको छ ।

कार्तिक २९ गते, रौतहट ।

रौतहटको गरुडा नगरपालिकाका मेयर कन्थमनी प्रसाद जयसवालले छठ पर्वको उपलक्ष्यमा गरुडा नगरपालिका-२ मा छठ ब्रतालुहरुलाई साडी एवं पुजाका लागि आवश्यक पर्ने सामाग्री वितरण गरेका छन् ।
सहयोगी मनका धनी, सधै गरिव असहायलाई सहयोग गरिरहने तथा समाजसेवा गर्नेमा विशाल हृदय भएका मेयर जयसवालले पालिकाका अति गरिव एवं विपन्न समुदायका छठ ब्रत गर्ने महिलाहरुलाई केही दिन देखि खोजी खोजी दउरा, सुपली र साडी सेट बितरण गरिरहेका छन् ।

तेस्रो दिन आज नगर प्रमुख जय स्वालले गेडहिगुठिका अति गरिब तथ बिपन्न १५१ जना छठ ब्रतालु महिलालाइ प्रती महिला एक एक सेट दउरा, सुपली र साडी सेट बितरण गरेका हुन ।

एस अघि उनले पोठियाही र जिङगडियामा गरि कुल ३ सय २ जना परिवारलाई छठ पुजा सामाग्री बितरण गरिसकेका छन ।

नगर प्रमुख जयसवालले नगरपालिकाका प्रत्येक वडाका गरिव, असहाय एवं अति विपन्न परिवारका छठ पर्व गर्ने ब्रतालु महिलाहरुलाई दउरा, सुपली र साडी सेट वितरण गर्ने उदेश्यले छठ सामाग्री बितरण गर्न थालेको बताएका छन ।

छठको ब्रत गर्ने आर्थिक रुपले पछाडि परेका अति गरिव, विपन्न, असहाय एवं दलित महिलाहरुलाई केही सहयोग हुने उद्देश्यले पालिकाको तर्फबाट प्रति महिला एक,एक थान दउरा, सुपली र साडी सेट वितरण गरेका छन् ।
आर्थिक रुपमा कमजोर भएका महिलाहरुले छठ पर्वको सामाग्री किन्न नसक्ने भएको हुँदा पर्वमा पैसाको अभावमा छठको सामाग्री जोहो गर्नबाट कसैले बञ्चित नहोस र आफुले पर्वमा केही न केही सहयोग गर्ने उद्देश्यले उक्त सामाग्रीहरु वितरण शुरु गरेको उनले बताए ।
हरेक वर्ष झै यस वर्ष पनि गरिब असहाय छठ व्रतालुहरुलाई साड़ी र दउरा सुपली वितरण गरिएको मेयर जयसवालले बताए ।
हिन्दु धर्म संस्कृतिमा छठपर्वका बेला ब्रतालुले सम्भव भए नयाँ चोखो पहिरण लगाएर ब्रत गर्नुपर्ने हो । सोही अभिलाशालाई पुर्ण गर्न हरेक वर्ष झै यसवर्षपनि आवश्यक्ता हेरेर दिन दुःखीलाई छठपुजाका लागी साडी सेट तथा दउरा, सुपली वितरण गरेको उनले बताए ।
सो क्रममा छठपर्वको शुभकामना दिदै उनले आफ्नो पालिकाको प्रत्येक जनताको सुख दुःखमा आफु सरिक हुन पाउँदा आफुलाई निकै गर्ववान्वित महशुस हुने गरेको बताए ।
निकै सुद्ध र आस्थाका साथ मनाईने यस पर्वको विशेष महत्व रहेकोले आफुले गरेको सहयोगबाट विपन्न र असहाय व्रतालुहरुलाई ठुलो राहत हुने र उनिहरु खÞुशीका साथ पर्व मनाउन सक्ने उनले विश्वास व्यक्त गरे ।
मेयर जयसवालले यस अघि पनि प्रत्येक वर्ष छठ पर्व गर्ने हजारौ ब्रतालुहरुलाई छठ पुजाका लागि आवश्यक पर्ने सामाग्री र साडी सेट एक अभियान नै सञ्चालन गरी वितरण गर्दै आएका छन् ।
मेयर जयसवाल मेयरमा निर्वाचित हुनुभन्दा अघि पनि आफनै व्यक्तिगत लगानीमा प्रत्येक वर्ष दिन दुखी गरिव ब्रतालुहरुलाई लाखौंको छठ पुजा सामाग्री वितरण गर्ने गरेका थिए ।