बज्जिकाञ्चल संवाददाता,२१ गते पुस २०८१ ।
काठमाडौं – राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनको नेतृत्व क्षमतामाथि प्रश्न उठाउन सुरू गरिएको छ।
स्थानीय तहको उपनिर्वाचनमा सबै स्थानमा जमानत जफत भएको तथा समान विचारधारा भएका पार्टी र समूहसँग एकता र मोर्चाबन्दी गर्न अस्वीकार गरेपछि अध्यक्ष लिङ्देनमाथि प्रश्न उठाउन सुरू गरिएको हो।
लिङ्देन नेतृत्वमा आएपछि पार्टीलाई झन् क्षति पुगेकाे निष्कर्षसहित राप्रपाका केही केन्द्रीय नेताहरू केन्द्रीय समितिमा प्रस्तुत हुने भएका छन्।
राप्रपाको आगामी माघ ११-१२ गते बस्न गइरहेको केन्द्रीय समिति बैठकमा अध्यक्ष लिङ्देनको नेतृत्व क्षमतामा प्रश्न उठाउने गरी असन्तुष्ट पक्षले तयारी गरिरहेका छन्।
हालै सम्पन्न केन्द्रीय कार्य सम्पादन समितिको बैठकमा वरिष्ठ नेता पशुपति शमशेर राणाले स्थानीय तहको निर्वाचन परिणामले सिंगो राप्रपामा चिन्ता छाएको जनाएका थिए।
त्यसपछि पार्टीभित्र नयाँ शिराबाट बहस सुरू हुन थालेको छ। ‘स्थानीय तहको उपनिर्वाचनमा जुन मत राप्रपाले पाएको छ, त्यसले सिंगो राप्रपा पंक्तिलाई निराश बनाएको छ, व्यक्तिगत रूपमा म त निकै नै चिन्तित छु,’ राणाले बैठकमा भनेका थिए।
तर, अध्यक्ष लिङ्देन पक्षधर प्रवक्ता ज्ञानेन्द्रबहादुर शाहीले भने राप्रपाको मत नघटेको, बरू बढेको तर्क गरेपछि बैठकमा अन्य नेताले भने निकै आपत्ति जनाएका थिए। सो मत घटेको र बढेको बिषयमा केन्द्रीय कार्य सम्पादन समितिमा भने निकै बहस भएको जनाइएको छ।
‘ज्ञानेन्द्रजीले हालै सम्पन्न स्थानीय तहको निर्वाचनमा मत बढेको भनेर तर्क गरे पनि राप्रपाले सबै स्थानीय तहमा गरी जम्मा ३ हजार ७१ मत मात्रै प्राप्त गरेको
तथ्यांकले नै देखाएको छ, सबै स्थानिय तहमा पार्टीको लज्जास्पद रूपमा जमानत जफत भएको छ,’ असन्तुष्ट पदाधिकारीले बैठकमा भने, ‘अब यो विषय केन्द्रीय समिति बैठकमा उठने छ।’
लिङदेनको जिल्लाबाट जम्मा २६ मत
ती पदाधिकारीका अनुसार स्थानीय तहका निर्वाचनमा केन्द्रीय कमाण्डर अर्थात् अध्यक्ष लिङ्देन थिए। उनले आफ्नै गृहजिल्लामा भएको निर्वाचनमा जम्मा २६ मत मात्रै जोड्न सकेका छन्।
लिङ्देनको गृहजिल्ला झापास्थित जिल्ला कन्काई नगरपालिका-६ का वडाअध्यक्षका उम्मेद्वार केशवबहादुर ओझाले जम्मा २६ मत मात्रै ल्याएपछि लिङ्देनको नेतृत्वमाथि थप प्रश्न उठेको हो। त्यहाँ लिङ्देनले पार्टी प्रवक्ता तथा प्रदेश सांसद भक्ति सिटौलालाई चुनावी कमाण्डर बनाएका थिए।
‘कतिसम्म भने राप्रपाको वडा समिति ५१ सदस्यीय हुन्छ तर अध्यक्षको गृह जिल्लाको वडाध्यक्षले जम्मा २६ मत मात्रै पाउँछन्, उसो भए ४९ सदस्यको मत राप्रपाको खोई त?,’ एक पदाधिकारीले प्रश्न गरेका छन्, ‘जुलुसमा सहभागी मात्रैले भोट हालेको भए पाँच सय मत नाघ्थ्यो तर कसैले हालेनन्, किन? यो प्रश्नको जवाफ अध्यक्षले अब केन्द्रीय समितिमा दिनुपर्छ।’
आफ्नै गृह जिल्लामा ५० मत कटाउने नसक्ने अध्यक्षले सिंगो पार्टीको नेतृत्व गरेकाले पनि पार्टीमा समस्या देखा परिरहेको उनीहरूको तर्क छ।
६ स्थानीय तहमा दोहोरो अंकमा आएन भोट
त्यसो त स्थानीय तहका ६ जना उम्मेदवारले त दोहोरो अंकमा पनि मत ल्याउन सकेनन्। जस्तो कि, तेरहथुमको लालिगुराँस-८ का वडाध्यक्षका उम्मेदवारले जम्मा ४ मत, ओखलढुंगा मोलुङ-५ का वडाध्यक्षले ३ मत, उदयपुर त्रियुगा-१२ का वडाध्यक्षले ७ मत, सुनसरी डाक्नेश्वरी-४ का वडाध्यक्षले ६ मत, महोत्तरी रामगोपालपुर-२ का वडाध्यक्षले २ मत, गुल्मी मुसिकोट-१ का वडाध्यक्षले ५ मत, जाजरकोट, कुसेँ गाउँपालाका-७ का वडाध्यक्षले ८ मत मात्रै पाएका थिए।
सहरिया मतदाताको बिकर्षण
उसो त, राप्रपाको सहरिया मतदाताको पनि आर्कषण कम भएको छ। कमल थापाको नेतृत्वको राप्रपा नेपालले काठमाडौं उपत्यकामा उल्लेखनीय मत प्राप्त गरेको थियो।
तर, लिङदेन नेतृत्व हुँदा कीर्तिपुरमा पार्टीका उम्मेदवारले जम्मा ९९५ मत मात्रै प्राप्त गरे भने वडा अध्यक्षका उम्मेदवार ६४ मतमा सीमित हुन परेपछि राप्रपामा भाँडभैलो मच्चिएको छ।
उता, राजावादीका लागि सबैभन्दा राम्रो वडा मानिएको काठमाडौं-१६ मा वडाध्यक्षका उम्मेद्वारले जम्मा ७७४ मत ल्याएपछि सहरिया मत राप्रपाप्रति क्रमशः बिकर्षण देखिएको ठम्याई असन्तुष्ट नेताहरूको छ।
प्रधानमन्त्री तथा नेकपा एमालेका अध्यक्ष केपी शर्मा ओलीले पनि राजावादीको शक्ति कमजोर हुँदै गएको आजबाट सुरू भएको केन्द्रीय समिति बैठकमा उल्लेख गरेका छन्।
‘२०७९ को तुलनामा सम्बन्धित ठाउँमा मतदाताहरुको बदलिँदो रुझान, जनप्रतिनिधिप्रतिको असन्तुष्टि र नयाँ भनिने दल र राजावादी शक्तिहरुको खस्किँदो अवस्थालाई बुझ्न भने यसले केही आधार दिन्छ,’ ओलीले आफ्नो राजनीतिक प्रतिबेदनमा उल्लेख गरेका छन्।
पार्टी एकता र मोर्चाप्रति अनुदार
अध्यक्ष लिङ्देनले कमल थापा नेतृत्वका राप्रपा नेपालसहित साना राजाबादी दलहरूसँग एकीकरण गरेर जानुपर्ने पार्टीभित्रको मतलाई दबाउने गरेको जनाइएको छ।
प्रकाशचन्द्र लोहनी, धवलशमशेर राणा मात्रै होइन, पशुपति शमशेर राणाले समेत बृहत् पार्टी बनाउन एकीकरण प्रकिया सुरू गर्नुपर्ने धारणा राखे तापनि अध्यक्ष लिङ्देनले नमानेपछि कुनै प्रकिया अघि बढन नसकेको पदाधिकारीहरू नै बताउँछन्।
लोकेन्द्रबहादुर चन्दको पहलमा मुख्यतयाः राप्रपा नेपाललाई एकीकरण प्रक्रियामा ल्याउनु पर्ने भनेर पहल गरे पनि लिङ्देन त्यसमा बाधक देखिएको उनीहरूको बुझाइरहेको छ।
‘दिनदिनै जनमत खस्केर गएको अवस्था छ, जसका कारण उनको नेतृत्व पूर्णतयाः असफल भइसकेको छ,’ एक असन्तुष्ट पदाधिकारीले भने, ‘एकीकरण र मोर्चा गरेर भए पनि आन्दोलन अगाडि बढाऔं भन्दा उहाँ तयार हुनुहुन्न, पार्टी साँच्चै अनिर्णयका बन्दीको अवस्थामा पुगेको छ।’
उनका अनुसार माघ ११ गते देखी सुरू हुने केन्द्रीय समिति बैठकमा लिङदेनको नेतृत्व क्षमताका बारेमा बहस हुने भने लगभग पक्का भएको छ। खासमा उपनिर्वाचनमा उम्मेदवारलाइ जिताउन देश दौडाहामा निस्केको भए तापनि २ मतसमेतमा सीमित हुनु परेपछि लिङ्देनमाथी प्रश्न बर्साउन खोजिएको एक नेताले बताए।
पूर्वराजा पनि असन्तुष्ट
कमल थापालाई साथ नदिएर लिङ्देनलाई साथ दिएकोमा पूर्वराा ज्ञानेन्द्र शाहले पनि पश्चताप गरिरहेको बुझिएको छ। पूर्वराजाले आफू निकटहरूसँग भन्ने गरेका छन्, ‘लिङ्देन नेतृत्वमा आएपछि पार्टीमा विभाजन भयो, अन्य दलसँग संवाद र सहकार्य गर्ने कार्य पनि गरिएन। न कुनै सरोकारवालाहरूसँग उनले सबन्ध नै बढाए, भएको जनमत पनि अहिले घटेको तथ्यांकमा देखिएको छ, मलाई लाग्दैन कि अब लिङ्देनको नेतृत्वमा मुद्दा स्थापित हुनेछ।’
अनौपचारिक संवादमा पूर्वराजाले लिङ्देनबाट मुद्दा स्थापित त परै जाओस्, झन कमजोर हुँदै गएको गुनासो गर्ने गरेका छन्।
गएको राप्रपा महाधिवेशनमा लिङ्देनसँग थापा पराजित भएका थिए। त्यसबेला थापाले खुलेरै निर्मल निवास (पूर्वराजा शाह)ले आफूलाई राप्रपा नेतृत्वमा पुग्न नदिन अभियान चलाएको बताएका थिए।
राप्रपा अध्यक्षमा पराजित भएपछि थापाले पार्टी छोडेर राप्रपा नेपाल पुनर्गठन गरेका थिए।
बज्जिकाञ्चल संवाददाता,२१ गते पुस २०८१ ।
काठमाडौं । दक्ष युवाहरु स्वदेशमै बसेर काम गर्न अवसर र संभावनाहरु प्रसस्त रहेको नेपाल इन्जिनियरिङ काउन्सिलका अध्यक्ष प्रा.डा. पदम बहादुर शाहीले बताउनु भएको छ । स्वदेशमा प्राविधिक जनशक्तिहरुको माग दिनप्रतिदिन बढिरहेको बताउँदै काउन्सिल अध्यक्ष शाहीले हरेक क्षेत्रमा मेहनत र संघर्ष गर्ने युवाहरुले सफलता प्राप्त गर्ने बताउनु भयो ।
मुनाफारहित सामाजिक शैक्षिक संस्थाका रुपमा सञ्चालित नेपाल इन्जिनियरिङ कलेज (नेक) बाट सिभिल तथा सिभिल एण्ड रुरल इन्जिनियरिङ उत्तिर्ण १९ औं ब्याचका विद्यार्थीहरुलाई विदाई गर्दै प्रा.डा. शाहीले प्राविधिक जनशक्ति खासगरी इन्जिनियरहरुले स्वदेशमै राम्रा अवसरहरु पाउने जिकीर गर्नुभयो । ‘विगतमा भन्दा अहिले इन्जिनियरिङ क्षेत्रमा स्कोप छ । तर, तपाईहरुले कलेजमा अध्ययन गरेको भन्दा बढ्ता मेहनत व्यवसायिक जीवनमा गर्नुपर्छ ।’ इन्जिनियरिङ अध्ययन गर्दैगर्दा असाइनमेन्ट सब्मीट गर्नु भयो, रिपोर्ट बनाउनु भयो भाइबा गर्नुभयो । हामीले पनि त्यही गरेर आएका हौं । तर, तपाईको अबको जीवन भनेको नम्बरमा मुल्यांकन हुँदैन अब तपाईको जीवन एस र नोट हो । कि तपाई पास हुनुहुन्छ कि फेल हुनुहुन्छ ।’ सफल हुनको लागि व्यवसायिक जीवनमा प्रत्येक पल परीक्षा दिइरहनु पर्ने भन्दै प्रा.डा. शाहीले भन्नुभयो ।
आफ्लाई सफल बनाउन समाज र समय अनुसार व्यवसायिक रुपमा ज्ञान अनुसार सीप हुनुपर्ने भन्दै प्रा.डा. शाहीले विश्वविद्यालयको अध्ययनले ज्ञान दिन सकेपनि सीप नदिएको बताउनु भयो । ‘विश्वको कुनैपनि विश्वविद्यालयले ज्ञान दिन्छ सीप दिँदैन, सीप सिक्नका लागि हरेक दिन आफ्नो फिल्डमा पढ्नु पर्छ । नयाँ कुरा जान्नैपर्छ ।’ व्यवसायिक जीवनमा इमान्दारिता, नैतिकता र लगनशीलता अपरिहार्य भएको भन्दै उहाँले देश र समाज बनाउन दक्ष युवा जनशक्तिको महत्वपूर्ण भूमिका रहने बताउनु भयो ।
कार्यक्रमका विशिष्ट अतिथी नेपाल सरकारका पूर्वसचिब तथा नेकका पुर्वप्राध्यापक मनिराम गेलालले नेपालको विकासमा इन्जिनियरहरुको भुमिका रहेको भएपनि सरकारी सेवामा पर्याप्त इन्जिनियरहरु नरहेको बताउनु भयो । नयाँ जनशक्तिलाई अनुभवको अभाव भन्दै अवसर नदिँदा उनीहरु अवसरको खोजीमा बाहिरिँदै गएकोमा चिन्ता व्यक्त गर्दै उहाँले नयाँलाई पनि अवसर दिइनुपर्ने बताउनु भयो । ‘हाम्रो पोलिसीमा कमजोरी छ । कन्सल्टिङ सर्भिसेसका लागि जनशक्ति माग गर्दा पनि १५, २० वर्ष सम्बन्धीत विषयमा काम गरेको अनुभव चाहिने मापदण्ड राख्छौं । नयाँ गोल्डमेडलिस्ट र टपरहरु भने बजारमा काम खोज्दै बस्नुपरेको अवस्था छ । यसलाई चेञ्ज गर्न आवश्यक छ ।’ सुखी नेपाली समुन्नत नेपाल निर्माणका लागि दक्ष प्राविधिक जनशक्ति नै चाहिने भएकाले नयाँलाई अवसर दिइनुपर्ने उहाँको जोड छ ।
गेलालले कामको मुल्यांकन गर्नेहरुको संख्या बढि र काम गर्नेहरुको संख्या कम हुँदा देशलाई घाटा भइरहेको बताउनु भयो । पूर्वाधार निर्माणका क्षेत्रमा बढी आरोपहरु लाग्ने भएकाले पेशागत मर्यादा र इमान्दारिता कायम गर्दै करियर डेभलपमेन्टमा अगाडी बढ्न नव इन्जिनियरहरुलाई शुभकामना दिनुभयो । साथै, नेपालमै केही गर्ने वातावरण बन्दै गइरहेकोले आशावादी भएर मेहनत गर्न सुझाब दिनुभयो ।
कलेजका प्राचार्य दुर्गाप्रसाद भण्डारीले कलेजबाट उच्च शिक्षा हासिल गरेका विद्यार्थीहरुले व्यवसायिक क्षेत्रमा प्राप्त गर्ने सफलता नै कलेजको सफलता भएको बताउँदै व्यवसायिक क्षेत्रमा मर्यादा र अनुशासन कायम गरेर अगाडी बढ्न अनुरोध गर्नुभयो । ‘तपाईहरु कलेजको ब्राण्ड एम्बेष्डर हो । तपाईहरुले प्राप्त गर्ने सफलता नै हाम्रो सफलता हो । जुनसुकै पदमा रहेर काम गर्दा म नेपाल कलेजको विद्यार्थी हुँ भन्ने नविर्सनु होला ।’ समाज र राष्ट्रसँग जोडिएर काम गर्नुपर्ने भएकाले व्यवसायिक जीवनमा पेशागत इमान्दारिता, नैतिकता र मर्यादा महत्वपूर्ण रहेको भन्दै प्राचार्य भण्डारीले भन्नुभयो ।
कलेज सञ्चालक समिति सदस्य समेत रहनु भएकी प्राध्यापक सावित्री त्रिपाठीले ४ वर्षको अध्ययन समाप्त गरेर ब्यवसायिक जीवनमा प्रवेश गर्दा नैतिकवान भएर अगाडी बढ्नुपर्ने बताउनु भयो । व्यवसायिक जीवनमा नैतिकता र इमान्दारिता ठूलो कुरा भएको जिकीर गर्दै ४ वर्षको पढाईले मात्र अगाडी बढ्न नसकिने भएकोले त्यसपछिको उच्च शिक्षा हासिल गर्न तथा व्यवसायिक जीवनमा हरेक दिन केही न केही सिक्नुपर्ने बताउनु भयो ।
यस्तै कलेजका सहायक प्राचार्य मोहनध्वज केसीले व्यवसायिक जीवनमा प्रवेश गर्ने विद्यार्थीहरुलाई शुभकामना दिँदै कलेजले आउँदा दिनहरुमा पनि जस्तोसुकै सहयोग गर्न तयार रहेको बताउनु भयो । उहाँले इमान्दार र नैतिकवान भएर अगाडी बढ्दा सफलता हासिल गर्न सकिने जिकीर गर्नुभयो ।
विदाई कार्यक्रममा नव इन्जिनियर विद्यार्थीहरुले ४ वर्षे स्नातक तहको अध्ययनका क्रममा विताएका पलहरुको स्मरण गर्दै प्राध्यापकहरु र कलेज परिवारलाई धन्यवाद दिएका थिए । कार्यक्रममा विद्यार्थीहरुलाई विभिन्न अवार्ड र पुरस्कारबाट सम्मानीत गरिएको थियो । चेयरमेयर गोल्ड अवार्ड राजेन्द्र पौडेल र शीतल पाण्डेले प्राप्त गर्दा प्रोग्राम टपर अवार्ड भने राजेन्द्र पौडेल र शीतल पाण्डेले संयुक्त रुपमा र बिबेक भण्डारीले प्राप्त गरेका थिए । कार्यक्रममा विषयगत अवार्डहरु पनि प्रदान गरिएको थियो ।
आरके श्रीवास्तव,राैतहट,२१ गते पुस २०८१ ।
राैतहटकाे ग्रामीण क्षेत्रमा चाेरीकाे संख्या ह्वात्तै बढेकाे छ । चाेरकाे बिगबिगी अत्यधिक छ । पछिल्लो समय चाेरीका घटनाहरू दिन दिनै बाहिर आईरहेका छन् । गएराति जिल्लाकाे माधवनारायण नगरपालिका वडा नम्बर ६ माधाेपुरमा चार घरमा चाेरी भएको स्थानीयहरूले जानकारी गराएका हुन् ।
चोरहरूले सुरुङ खनेर माधोपुर उत्तरवारी टोलमा चार जनाको घरमा चोरी गरेका छन् । स्थानीय जगरनाथ राय यादव , रामबाबु राय यादव ,नेमीलाल राय यादव लगायतको घरमा चोरी भएकाे छ । उनीहरूको घरबाट चोरहरूले लाखौंको सामान चोरी गरी लागेका छन् । पछि स्थानीयहरुले थाहा पाएर हो-हल्ला गर्दा चोरहरु भागेका थिए ।
चोरहरूले फेरि पुरानै विधि र शैली अपनाएर राती राती घरमा चोरी गर्न थालेका छन् । तराईमा लागिरहेको बाक्लो हुस्सुको मौका छोपेर उनीहरू चाेरी गर्न पल्केका हुन् ।
केही दिन अघि मात्र फतुवा विजयपुर नगरपालिकाकाे वडा नम्बर ६ पेटभर्वामा चाेरी भएको थियो । गाउँ गाउँमा भिख माग्दै हिडन् मानिसहरूकाे समूह नै चाेरीमा संलग्न थिए । प्रहरी समयमा नपुगेपनि त्यहाँका युवाहरूले लाेकेशनकाे आधारमा चाेरीहरूलाई पक्रेर प्रहरीकाे जिम्मा लगाएकाे थियो ।
जिल्लाकाे ग्रामीण भेगमा यस्ता घटनाहरू दिनदनै हुँदा पनि प्रहरीकाे ध्यान जानसकेकाे छैन् । यसतर्फ स्थानिय प्रहरी प्रशासनलाई गम्भीरतापूर्वक लिन स्थानीयहरूले अनुराेध समेत गरेका छन् ।
बज्जिकाञ्चल संवाददाता,रौतहट,२० गते पुस २०८१ ।
रौतहटको चर्चित बजार कटहरियाका ब्यवसायी रामचन्द्र साह कलवारले पूर्वाग्रही रुपमा आफू बिरुद्द समाचार आईरहेको गुनासो गरेका छन्।
नियमपूर्वक मलखाद विरतण गर्ने , कुनै किसिमको नक्कली मल खाद विक्री वितरण नगर्ने भएपनि एकजना पत्रकारले पूर्वाग्रही रुपमा आफुलाई बदनाम गराउन समाचार लेखिरहेको गुनासो गरेका हुन्।
जहरीमाई कृषि सहकारी संस्थाका सञ्चालक रामचन्द्र साह कलवारले शनिवार पत्रकार सम्मेलन आयोजन गरि दुःखेसो पोखेका थिए। सहकारीको नाउँमा आउने मलखाद नियम पूर्वक सम्बन्धित वडाका अध्यक्षको रोहबरमा मलखाद वितरण गर्दा पनि आफ्नो स्वार्थ पूर्तिका लागि आफूलाई बदनाम गर्न खोजिएको कलवारले बताएका छन्।
बारम्बार एउटै विषयलाइ लिएर आफूलाइ बदनाम गर्न थालेपछि बाध्य भएर आफूले प्रतिबाद गरेको बताएका छन्। बिरगंज बाट आधिकारिक विक्रेता संग भ्याट बिलमा चाइनिज मलखाद खरिद गरी ल्याएर बिक्री गर्दा दुुइ नम्बर बनाइ बिक्री वितरण गर्नें गरेको, जनता लाइ मलखाद नदिने गरेको र तस्करी गर्ने जस्ता आफूमाथि लागेको आरोपहरु निराधार रहेको प्रष्ट पारेका छन् । कटहरिया म्यूजिकल एफएमका प्रकाश श्रेष्ठले माग गरे अनुसार आर्थिक सहयोग गर्न अस्मर्थता जनाउँदा आफनो नाम जोडी बदनाम गरिएको कलवारले आरोप लगाएका छन् ।
कटहरिया स्थित ३ वटा वडाहरुमा आफूहरुले चलाउने तिन वटै सहकारी संस्थाबाट नियम अनुसार मलखाद वितरण गर्ने गरेको उनले दावी गरेका छन् । सम्बन्धित वडा संगै कृषि शाखा कटहरियाको सिफारिस गरि अनलाइन गरेर मात्र मलखाद विरतण गर्ने गरेको सहकारी सञ्चालक कलवारले स्पष्ट पारेका छन्। आफूले यदी गलत गरेको हो, नक्कली मलखाद बिक्री वितरण गरेको हो भने सम्बन्धित निकायले छानबिन गरी कारबाही गरोस्। पटक पटक बिभिन्न निकाय बाट अनुगमन आउँदा यहाँका अधिकांश पसल बन्द हुन्छन तर आफूले सदैव सेवा दिँदै आएको छु।
भ्याट देखि लिएर नेपाल सरकारको सबै प्रक्रिया पूरा गरेर पसल सञ्चालन गरेको हुँदा गलत हूँ भने तपाईंहरू नै अनुगमन गरी कार्वाही गर्नुस ब्यवसायी रामचन्द्र साह कलवारले पत्रकार सम्मेलनमा आग्रह गरेका थिए। उता म्यूजिकल एफएमका पत्रकार प्रकाश श्रेष्ठले व्यवसायीको आरोपको खण्डन गर्दै समाचार लेखेकै कारण ब्यवसायी रामचन्द्रले आफूलाई फोन मार्फत बिभिन्न धमकी दिएको बताएका छन्।
यसै विषयलाइ लिएर नेपाल पत्रकार महासंघ रौतहट शाखाले प्रेस विज्ञप्ती निकालेर घटनाको सत्य तथ्य छानबिन गर्न माग गरिएको छ। महासंघका सचिव गौतम श्रेष्ठ द्धारा हस्ताक्षरित विज्ञप्तीमा घटनाप्रति गम्भीर ध्यानाकर्षण भएको र समाचारका विषयमा चित नबुुझे कानुुनी उपचार विधि र प्रक्रिया हुँदाहुदै धमकी दिनु प्रेस स्वतन्त्रता र पत्रकारको पेशागत मर्यादा माथि गम्भिर आक्रमण भएको महासंघको ठहर भएको उल्लेख गरेका छन् । घटनाको छानबिन गरि दोषी उपर कानुुनी कार्यवाही गर्न तथा समाचारको विषयमा आउने यस्ता धाक धमकीपूर्ण कार्य बन्द गर्न र जनताको सूचनाको हक स्थापित गर्न महासंघ सबैमा अनुुरोध समेत गरेको छ ।
बज्जिकाञ्चल संवाददाता,बारा,२० गते पुस २०८१ ।
बारा । राष्ट्रिय मातृभूमि पार्टी नेपालका महासचिव गाेविन्द गिरीले आमा जस्तै देशलाई माया गर्ने पार्टीको नेपालमा खाँचाे रहेको कुरा औल्याएका छन् ।
राष्ट्रिय मातृभूमि पार्टी नेपाल बारा द्वारा गढिमाई नगरपालिका वडा नम्बर एक गायत्री चाैक स्थित पार्टी प्रवेस तथा वडा समिति गठन गर्न आयोजित सभालाई सम्बोधन गर्दै महासचिव गिरीले देशलाई माया गर्ने ईमान्दार नैतिकवान नेता र पार्टीको नेपालमा खाँचाे रहेको बताए।
देशलाई विकसित समृद्व वनाउने भिजन कुनै पनि पुराना पार्टीसँग नरहेको दाबी गर्दै आफुहरुलाई जनताले माैका दिए देशलाई परिवर्न तर्फ लैजाने महासचिव गिरीले दाबी गरेका छन् ।
पुराना पार्टी र रिटायर नेताका कारण देश दिनप्रतिदिन पछि पर्दै गएका कारणले परिवर्तनका लागि पनि नयाँ शक्तिको हातमा देश जानु पर्ने उनले बताए । राष्ट्रिय मातृभूमि पार्टी नेपाल गढिमाइ नगरपालिका वडा नम्वर एकका अध्यक्ष मुना कुमार लहेराकाे अध्यक्षतामा भएको कार्यक्रममा केन्द्रीय काेषाध्यक्ष केशव राज भट्टाराई ,समाजसेवी सुरेन्द्र ढकाल,
राैतहट जिल्ला अध्यक्ष रन्जित पटेल सहितले बाेलेका थिए।
ओमप्रकाश यादव,माधवनारायण,२० गते पुस २०८१ ।
विकासमा एक कदम अगाडि माधवनारायण नगर प्रमुख बैजनाथ प्रसाद यादवले केही वर्षदेखि रोकिएको नगर अस्पताल भवनको निर्माण कार्य पुनः सुचारु गराएका छन्।
माधवनारायण नगरपालिका -२ खेसरहियामा यस नगरपालिकाको १५ शैयाको नगर अस्पताल निर्माण कार्य सुरु भएको छ।
डीपीआर तयार भएर बन्द भएको नगर अस्पतालको बाँकी काम मेयर बैजनाथ प्रसाद यादवले आजदेखि पुनः सुचारु गराएका हुन्।
मेयर यादवले उक्त नगर अस्पतालको आज अनुगमन निरीक्षण गर्दै गुणस्तरीय काम गर्न निर्माण कम्पनीलाई निर्देशन दिएका छन्।
मेयर बैजनाथ प्रसाद यादवको दूरदर्शी सोच, मास्टरप्लान भिजन र विकासका काममा देखाउने गरेको ताद्रुक्ताका कारण माधवनारायण नगरवासीले चाडै नगर अस्पतालको सेवा पाउने भएका छन्।
त्यस्तै मेयर यादवले आजै सखुअवामा निर्माण हुँदै गरेको विद्यालय भवनको छत ढलान कार्यको पनि अनुगमन निरीक्षण गरेका थिए।
प्रेमचन्द्र झा,राैतहट,पुस २० गते २०८१ ।
रौतहट क्षेत्र नम्बर १ का सांसद एवम पूर्व प्रधानमन्त्री माधव कुमार नेपाल गढिमाई नगरपालिका वडा नम्बर ८ का नवनिर्वाचित वडा अध्यक्ष बजरंगी यादवको घरमा शनिवार पुगि शोक सभा तथा शान्ति भाेजमा सहभागी भएका छन् । नेकपा एस पार्टीका नेता हरिनारायण यादवको भाई मेघु राय यादवको तेरहाै पुन्यतिथिको अवसरमा आयोजित शोक सभा तथा शान्तिभोजमा सहभागी भएका थिए।
नेकपा एसका केन्द्रीय सदस्य कल्याणी खडका, मधेस प्रदेस सभा सदस्य कनिस पटेल जिल्ला अध्यक्ष कमल यादव, राजदेवी नगर प्रमुख भिखारी यादव र बाैधिमाई नगरप्रमुख प्रदिप यादव ,देवाही गोनाही नगरप्रमुख प्रेमलाल साह माधव कुमार नेपालको राैतहट स्थित सहयोगी रेवन्त झा सहितका उपस्थिति रहेको थियो ।
संजय सहनी,राैतहट,पुस २० गते शनिबार २०८१ ।
जिल्ला प्रहरी कार्यालय रौतहटले अबैध घरेलु मदिरा तथा मदिरा बनाउन प्रयोग गरिने कच्चापदार्थ बरामद गरि शनिबार नष्ट गरेको छ ।
रौतहटको गौर नगरपालिका वडा नम्बर ५ स्थित विभिन्न स्थानमा लुकाई छिपाई संचालन गरेको ३ ओटा अबैध दारु भट्टीहरुमा प्रहरी टोलीले विशेष सुचनाको आधारमा छापा हानी ठुलो परिणाममा घरेलु मदिरा ,कच्चा पदार्थ र विभिन्न सामाग्री नियन्त्रणमा लिएर पत्रकारहरुको रोहवरमा नष्ट गरिएको प्रहरी निरीक्षक उमाशंकर प्रसादले जानकारी दिनु भएका छन् ।
जसअन्तर्गत बेच्न तथा तयारी अवस्थामा रहेको ७ सय लिटर घरेलु रक्सी र २८ सय लिटर कच्चा पदार्थ , रक्सी बनाउन प्रयोग गरिएको भाँडा हण्डा ४ थान ,डेक्चि ८ थान ,स्टिल बाल्टिन ३ थान ,ग्यास सिलिन्डर ४ थान ,ग्यास चुल्हो ४ थान ,प्लास्टिक ग्यालन १४० ,प्लास्टिक बाल्टिन १० थान सामान सहित बारामद सबै समान नस्ट गरिएको निरीक्षक गुप्ताले प्रष्ट पारेका छन् ।
भट्टी संचालकहरु भागि गएको हुँदा निजहरुको खोजतलास भईरहेको निरीक्षक गुप्ताले बताएका छन् ।
उनले भने “बिना ईजाजत मदिरा बिक्रीबितरण गर्ने, मदिरा सेवन गरेर होहल्ला गर्ने जोकोही भए पनि कारवाहीको भागेदारी हुने छन् यस्तो कार्य रोक्नु हामी सबैको दायित्व हो । मदिरा बिक्रीबितरणका साथै ओसार पसारमा समेत रौतहट प्रहरीले कडाईका साथ चेकजाँज गरिरहेको बताए ।
प्रेमचन्द्र झा,राैतहट,पुस २० गते २०८१ ।
राैतहट क्षेत्र नम्बर एकका सांसद एवंम पुर्व प्रधानमन्त्री माधव कुमार नेपाल राजदेवी नगरपालिकाका अग्निपिडितलाई भेटी सहयोग हस्तान्तरण गरेका छन । पिडित सबै परिवारलाई खाद्वान,त्रिपाल कम्बल सहितका सामान हस्तान्तरण गरेको सांसद नेपालको राैतहट स्थित सहयोगी रेवन्त झाले बताए।
सांसद नेपालले अग्नि पिडित परिवारकाे सुरक्षित व्यवस्थित आवास निर्माणका लागि जग्गा व्यवस्थापन गरि तत्काल घर निर्माणका लागि पिडित परिवारलाई आवश्यक सहयोग गर्ने पुर्वप्रधानमन्त्रीबाट प्रतिवद्वता प्राप्त भएको सहयोगी झाले बताए।
सो अवसरमा ननेकपा एसका केन्द्रीय सदस्य कल्याणी खडका, मधेस प्रदेस सभा सदस्य कनिस पटेल जिल्ला अध्यक्ष कमल यादव, राजदेवी नगर प्रमुख भिखारी यादव र बाैधिमाई नगरप्रमुख प्रदिप यादव सहितका उपस्थिति रहेको थियो ।
रुपेन्द्र पटेल,रौतहट, २० पुस २०८१ ।
कर्तव्य ज्यान मुद्दाका एक जना फरार अभियुक्तले प्रहरीलाई आत्मसमर्पण गरेका छन् ।
जिल्लाको राजदेवी नगरपालिकाका वडा नं-१ निवासी रामनरेश राय यादवले जिल्ला प्रहरी कार्यालय रौतहटमा पुगेर आत्मसमर्पण गरेका हुन् ।
आफै प्रहरीमा गएर आत्मसमर्पण गरेपछि यादवलाई रौतहट जिल्ला अदालतमा पेश गर्दै थप अनुसन्धानका लागि प्रहरीले म्याद लिइएको हो ।
२०७९ साल फागुन २४ गते साँझ साढे पाँच बजेको समयमा सोही स्थानका २५ वर्षीय गजेन्द्र दासको कुटपिटका कारण मृत्यु भएको घटनामा यादव मुख्य अभियुक्तको रूपमा फरार रहेका थिए । यस घटनाको अनुसन्धानका क्रममा प्रहरीले यादवको परिवारलाई सहयोग गर्न कानूनी परामर्श प्रदान गरेको थियो । परामर्शले सजायमा छुटको व्यवस्था रहेको जानकारी गराएपछि यादव अभिप्रेरित भई बुधबार आत्मसमर्पण गरेको थियो ।
यादव प्रहरी प्रहरी समक्ष बुधबार नै हाजिर भएपनि शुक्रबार मात्र जिल्ला प्रहरी कार्यालय रौतहटले औपचारिक रूपमा सार्वजनिक गरेको छ । प्रेस विज्ञप्ति मार्फत जिल्ला प्रहरी कार्यालय रौतहटले घटनाको जानकारी दिँदै अनुसन्धानलाई तीव्रता दिएको जनाएको छ ।
यो घटनाले कानूनी प्रक्रियाको प्रभावकारिता र प्रहरीको अनुसन्धान क्षमताको झल्को दिनुका साथै फरार प्रतिवादीलाई आत्मसमर्पण गराउन कानूनी परामर्शको महत्त्व देखाएको छ । अनुसन्धान सम्पन्न भएपछि यादवविरुद्ध कस्तो कानूनी कारबाही हुने हो, त्यसमा सबैको ध्यान केन्द्रित छ ।
