काठमाडौं । आम जनता पार्टी (आजपा)को सम्पन्न केन्द्रीय कमिटी बैठकले केन्द्रीय कमिटी पुर्नगठन गरेको छ । केन्द्रीय कमिटीको अध्यक्षमा प्रभु साह, वरिष्ठ उपाध्यक्षद्धयमा तिलक थापा मगर र उपेन्द्र साह रहेका छन् ।

कमिटीको उपाध्यक्षमा रितादेवी साह, समिना हुसेन, बिल्टु यादव, ज्ञानेन्द्रकुमार तामाङ, अशोककुमार लामा, महासचिवमा त्रिभुवन साह, उपमहासचिवमा चन्द्रभुषण साह, राजन यादव, सियाराम कुशवाहा, धनकुमारी मगर, सचिवमा बाबुराम कौशिक, श्रीचन्द मुखिया, उमेश कुशवाहा, देवी पण्डित रेग्मी, नारायण श्रेष्ठ, नारायण प्रसाद पाण्डे रहेका छन् ।

आजपामा महासचिव साहका अनुसार स्थायी कमिटी सदस्यहरुमा श्रीलाल महासेठ, कान्तिदेवी महतो, रमेश थपलिया, रबिन्द्रप्रसाद सिंह, गणेश गोतामे, जुरीलाल मोची, सुनिता साह, चन्देश्वर बैठा, बालकृष्ण सापकोटा, परमानन्द बर्मा, धर्मेन्द्र पटेल, भोजराज त्रिपाठी, कदम रसुल, लखिन्द्र साह, प्रदिप पटेल, राधेश्याम साह, उदयचन्द्र प्रसाद, प्रल्हाद पौडेल, श्रीभगवान पटेल, सागर पाण्डे, चन्दन साह, लालबाबु मन्सुरी, बिजय यादव, नरेश तुरहा, बिजय साह, ममता शर्मा, भोला पाण्डे, कुमारी बबिता, शर्मिला महरा, सिमल कुमारी, बबिता यादव, गीतादेवी साह रहेका छन् ।

यसैगरी सुभद्रा गुप्ता, रञ्जुकुमारी साह, उमाशंकर साह, रामनाथ माझी, पासाङ तामाङ, सरोज कुमार बछार, अञ्जित कुशवाहा, सञ्जय यादव, शिव थापा, ठागा दास, अनिल झा, राजेश साह, सुरेश चौधरी, मिन बहादुर खत्री, किशोर साह, प्रशान्त तिमिल्सिना, देवेन्द्र ठाकुर उपेन्द्र साह लगायतका रहेका छन् ।

वैठकले पार्टीद्धारा घोषित आन्दोलनका बिभिन्न कामलाई व्यवस्थित गर्नका लागि पार्टीको बिभिन्न संगठनको इन्चार्ज तथा अध्यक्ष हेफेर गरेको छ । आइटी आर्मीको इन्चार्जमा प्रभु साह र अध्यक्षमा चन्द्रभुषण साह, आम ट्रेड युनियन फेडेरेशनको इन्चार्जमा धनकुमार मगर र अध्यक्षमा शिव थापा, आम सम्पर्क मञ्चको इन्चार्जमा बिल्टु यादव र अध्यक्षमा श्रीनारायण साह, आम महिला मोर्चाको इन्चार्जमा देवी पण्डित रेग्मी र अध्यक्षमा कुमारी बबिता, आम विद्यार्थी मोर्चाको इन्चार्जमा उमेश कुशवाहा, सहइन्चार्जमा सरोज बछार र अध्यक्षमा विवेक साह रहेका छन् ।

यसैगरी आम मुस्लिम मोर्चाको इन्चार्जमा समिना हुसेन र अध्यक्षमा लालबाबु मन्सुरी, आम सांस्कृतिक मोर्चाको इन्चार्जमा बिजय यादव, सहइन्चार्जमा रचना सिवाकोटी र अध्यक्षमा सरिता साह, आम दलित मोर्चाको इन्चार्जमा चन्देश्वर बैठा र अध्यक्षमा ठागा दास, आम बुद्धिजिवि मोर्चाको इन्चार्जमा उदयचन्द्र प्रसाद र अध्यक्षमा नविन महतो, आम उधोग बाणिज्य संघको इन्चार्जमा नारायण श्रेष्ठ र अध्यक्षमा साजन जयसवाल, आम इन्जिनियर्स एण्ड टेक्निकल एशोसियशनको इन्चार्जमा उपेन्द्र साह र अध्यक्षमा गोपाल साह, आम जनजाती महासंघको इन्चार्जमा ज्ञानेन्द्रकुमार तामाङ र इन्चार्जमा पासाङ तामाङ, आम भूमिहिन तथा सुकुम्बासी मोर्चाको इन्चार्जमा श्रीचन्द्र मुखिया र अध्यक्षमा रामनाथ माझी, आम किसान मोर्चाको इन्चार्जमा मनोज यादव र अध्यक्षमा अनिल झा, आम शिक्षक संघको इन्चार्जमा बाबुराम कौसिक र अध्यक्षमा सुरेश महतो, आम खेलकुद संघको इन्चार्जमा सियाराम कुशवाहा र अध्यक्षमा राजु साह, आम शहिद तथा बेपता परिवारको इन्चार्जमा श्रीभगवान पटेल र अध्यक्षमा रुपसागर उपाध्याय रहेका छन् ।

आजपाको ११ र १२ गते काठमाडौंको कमलादी स्थित नेपाल प्रज्ञा प्रतिष्ठानमा बसेको केन्द्रीय कमिटीको बैठकले आन्दोलनका बिभिन्न कार्यक्रम घोषणा गरेको छ ।

आजपाले ३ असोजमा सातै प्रदेशमा संविधानको अन्त्येष्टि यात्रा निकाल्ने, धोखेबाज दलहरुसंग भोट फिर्ता माग्ने कार्यलाई अभियानको रुपमा अगाडि बढाउने, भ्रष्ट शासकहरुलाई कर बहिष्कार गर्ने, भगौडा दलालहरुको सम्पति कब्जा गरेर राज्यलाई बुझाउने, भ्रष्टाचारीलाई जनकरवाही गर्ने तथा काठमाडौंमा जारी वैदेशिक रोजगार पीडीतलाई न्याय दिलाउने संघर्ष र कबाड आन्दोलनलाई थप व्यवस्थित गर्दै तेस्रो जनान्दोलनको मजबूत आधार खडा गरी सफलताको दिशमा अगाडि बढाउने निर्णय बैठकले गरेको छ ।

बैठकले पार्टीको बिभिन्न विभाग, प्रवास गठन गर्नुका साथै आन्दोलन केन्द्रित नेताहरुको जिम्मेवारी समेत हेरफेर गरेको छ ।न्युज कारखाना

काठमाडौं । अमेरिकी सरकारको अनुदान सहयोगमा बन्ने १८ किमि सीमापार प्रसारण लाइन निर्माण सम्झौतामा एमसिए–नेपालले हस्ताक्षर गरेको छ ।

नेपाल सरकारको लगानी र अमेरिकी सरकारको अनुदानमा कार्यान्वयन भइरहेको एमसीसी नेपाल कम्प्याक्ट कार्यक्रमअन्तर्गतको विद्युत् प्रसारण आयोजनाको एक महत्वपूर्ण अंशको रुपमा यसलाई हेरिएको छ ।

अर्थ मन्त्रालय,नेपाल विद्युत् प्राधिकरण,एमसिसी तथा एमसिए–नेपालका उपस्थितिमा एमसिए–नेपालका कार्यकारी निर्देशक खड्गबहादुर विष्ट र ट्रान्सरेल लाइटिङ लिमिटेडका प्रतिनिधि अमोल वाङ्खेदेले सम्झौतामा हस्ताक्षर गरेका हुन् ।

नवलपरासी (वर्दघाट सुस्ता पश्चिम) जिल्लामा निर्माणाधीन ४०० केभी क्षमताको नयाँ बुटवल सबस्टेसनदेखि नेपाल–भारत सीमासम्म यो प्रसारणलाइन निर्माण हुनेछ । २१ महिनाको करार अवधिमा निर्माण गरिने यो आयोजना १२३.६० लाख अमेरिकी डलरको सम्झौता ट्रान्सरेल लाइटिङ लिमिटेडसँग गरिएको छ ।न्युज कारखाना

धुलिखेल । प्रधानमन्त्री केपी शर्मा ओलीले काभ्रेको  धुलिखेलस्थित काठमाडौँ विश्वविद्यालयले नेपालमा पहिलो पटक ल्याइएको  ‘हाइड्रोजन कार’ र रिफ्युलिङ प्रणालीको आज शुभारम्भ गरेका छन् ।

विश्वविद्यालयको २९औं दीक्षान्तअघि  सो `हाइड्रोजन कार’ र रिफ्युलिङ प्रणालीको शुभारम्भ भएको हो ।

कोरियामा बनेको हुण्डाइ कम्पनीको हाइड्रोजन कार विश्वविद्यालयले नेपाल आयल निगमको सहयोगमा ३३ हजार अमेरिकी डलरमा खरिद गरी  नेपाल ल्याइएको हो ।

प्रधानमन्त्री ओलीले संक्षिप्त प्रतिक्रिया दिँदै  हाइड्रोजनको प्रयोगबाट कार्बन उत्सर्जन कमी भइ प्रदूषण कम गर्न सहयोग हुने बताए ।न्युज कारखाना

काठमाडौँ । २०८० को मदन मदन पुरस्कार  मोहन मैनालीले पाएका छन् । मदन पुरस्कार गुठीले मोहन मैनालीको मुकाम रणमैदानलाई २०८० को मदन पुरस्कार दिने निर्णय गरेको अध्यक्ष कुन्द दिक्षितले जानकारी दिएका छन् ।

२०८० को मदन पुरस्कारका यस अघि पाँच किताब अन्तिम छनौट गरिएको थियो । जसमा भक्त स्याङतानको ‘डम्फुको आत्मालाप’, जीवन क्षेत्रीको नुन-तेल,  भावेश भुमरी र प्रणिता चामलिङको भावलिपि, मोहन मैनालीको मुकाम रणमैदान र  रोशन थापा ‘नीरव’ को सन्त्रासका साठी दिन रहेका थिए ।

गुठिले मदन पुरस्कार छनौटका लागि ३०४ पुस्तकहरू प्राप्त भएकोमा पाँच कृतिलाई अन्तिम छनौट गरेको थियो । त्यस्तै दिक्षितले प्रा.डा. योगेन्द्रप्रसाद यादवलाई २०८० सालको जगदम्बा-श्री पुरस्कार दिएको जानकारी दिएका छन् ।न्युज कारखाना

काठमाडौँ । आईफोन निर्माता एप्पलको लागि वर्षको सबैभन्दा ठूलो लन्च कार्यक्रम सेप्टेम्बर ९ मा आयोजना हुनेछ । कम्पनीले यसका लागि आधिकारिक निमन्त्रणा पठाउन थालेको छ, जसको ट्यागलाइन ‘इट्स ग्लोटाइम’ रहेको छ ।

एप्पलले यस इभेन्टमा आईफोन १६ सिरिजका चार मोडलहरू प्रस्तुत गर्ने तयारी गरेको छ । आइफोन १६, आइफोन १६ प्लस, आइफोन १६ प्रो र आइफोन १६ प्रो म्याक्स । तर, कम्पनीले उक्त कार्यक्रममा लन्च हुने उत्पादनका बारेमा जानकारी दिएको छैन ।

नेपाली समय अनुसार सेप्टेम्बर ९ सोमबार राति १०: ४५ बजेदेखि कार्यक्रम सुरु हुनेछ । कम्पनीले २०२० बाट प्रि-रेकर्ड गरिएको भिडियो स्ट्रिम गर्दछ, जसमा यसले आईफोन र अन्य उत्पादनहरूको नयाँ श्रृंखला लन्च गर्दछ । अहिलेसम्म लीक भएका सूचना अनुसार, एप्पलले आईफोन १६ प्रो र आईफोन १६ प्रो म्याक्सको डिस्प्ले साइज परिवर्तन गर्न सक्छ । आईफोन १६ प्रो म्याक्समा ६.९ इन्चको डिस्प्ले हुने बताइएको छ । त्यस्तै आईफोन १६ प्रोमा ६.३ इन्चको डिस्प्ले हुने उल्लेख गरिएको छ ।

एप्पलले गत वर्ष ‘वान्डरलस्ट’ कार्यक्रममा आईफोन १५ सिरिज, एप्पल वाच सिरिज ९ र एप्पल वाच अल्ट्रा २ पनि लन्च गरेको थियो । कम्पनीले पहिलो पटक चार्जिङका लागि टाइप–सी पोर्ट उपलब्ध गराएको थियो ।न्युज कारखाना

काठमाडौँ । इजरायल र हमास गाजाका केही क्षेत्रमा तीन दिनका लागि युद्धविराम गर्न सहमत भएका छन्। गाजामा २५ वर्षपछि अगस्ट २३ मा पोलियोको पहिलो केस फेला परेपछि ६ लाख ४० हजार बालबालिकालाई पोलियो विरुद्धको खोप लगाउन इजरायल र हमास युद्ध विराम गर्न सहमत भएका हुन् ।

विश्व स्वास्थ्य संगठन (डब्ल्यूएचओ) का अधिकारी रिक पेपरकर्नले प्यालेस्टिनी क्षेत्रमा खोप अभियान आइतबार (सेप्टेम्बर १) देखि सुरु हुने बताएका छन् । उनले स्थानीय समय अनुसार बिहान ६ बजेदेखि दिउँसो ३ बजेसम्म युद्धविराम हुने बताए ।

डब्ल्यूएचओ अधिकारीले खोप अभियान मध्य गाजामा सुरु हुनेछ, जहाँ तीन दिनको युद्धविराम हुनेछ । त्यसपछि यो दक्षिणी गाजा तर्फ सर्नेछ, जहाँ थप तीन दिनको लागि युद्धविराम हुनेछ । त्यसपछि उत्तरी गाजामा खोप अभियान सञ्चालन गरिनेछ । पेपरकर्नले आवश्यक परे सबै क्षेत्रमा युद्धविराम चौथो दिनसम्म लम्ब्याउन सकिने बताए ।

पोलियो भाइरस मुख र नाकबाट शरीरमा प्रवेश गर्छ, त्यसपछि घाँटी र आन्द्रामा बस्छ । त्यहाँ यसले आफ्नो संख्या द्रुत रूपमा बढाउन थाल्छ । करिब एक हप्तामा यो टन्सिल र प्रतिरक्षा प्रणालीमा फैलिन थाल्छ । भाइरसले त्यसपछि शरीरमा बग्ने रगतलाई लक्षित गर्छ, जसबाट यो सम्पूर्ण शरीरमा फैलिन्छ।

भाइरसले केन्द्रीय स्नायु प्रणालीलाई आक्रमण गरेर पक्षाघात गर्छ । धेरैजसो अवस्थामा, शरीरको प्रतिरक्षा प्रणालीले आन्द्राबाट रगतमा यात्रा गर्दा भाइरसलाई मार्छ । तर, यदि शरीरले त्यसो गर्न सकेन भने पोलियो भाइरस केन्द्रीय स्नायु प्रणालीमा प्रवेश गर्न सफल हुन्छ । सीडीसीका अनुसार पोलियो भाइरसबाट संक्रमित केही व्यक्तिमा रोगका गम्भीर लक्षण देखिन्छन् । भाइरसले यी व्यक्तिहरूको मस्तिष्क, मेरुदण्ड र स्नायु प्रणालीमा आक्रमण गर्छ । २०० संक्रमित मध्ये एक जना पक्षाघात हुन्छ ।न्युज कारखाना

काठमाडौँ । गत वर्ष, क्यानाडाको जंगलमा लागेको आगोले केही प्रमुख उत्सर्जन गर्ने देशहरूभन्दा पनि बढी हरितगृह ग्यास उत्सर्जन गरेको थियो । एक अध्ययनले राष्ट्रिय उत्सर्जन बजेटमा प्रश्न उठाएको छ ।

गत वर्ष क्यानाडामा लागेको डढेलोले ६४७ मेगाटन कार्बन उत्सर्जन गरेको थियो, जुन सन् २०२२ मा जर्मनी, जापान र रुस जस्ता सात ठूला उत्सर्जन गर्ने देशहरूभन्दा बढी थियो । यो अध्ययन ‘नेचर’ पत्रिकामा प्रकाशित छ ।

त्यो अवधिमा चीन, भारत र अमेरिकाले मात्रै योभन्दा बढी कार्बन उत्सर्जन गरेका थिए । यसको मतलब यो हो कि यदि क्यानाडाको जंगली आगोलाई देशहरूको बीचमा स्थान दिइयो भने, यो चौथो ठूलो उत्सर्जनकर्ताको रूपमा बाहिर आउनेछ ।

विगत एक दशकमा क्यानाडाको जंगलमा लागेको आगोबाट उत्सर्जन सामान्यतया २९ देखि १२१ मेगाटनको बीचमा रहेको छ । तर जीवाश्म ईन्धन जलाउँदा जलवायु परिवर्तनले सुख्खा र तातो अवस्था सिर्जना गरिरहेको छ, जसले अत्यधिक आगो निम्त्याउँछ । २०२३ को आगलागीले क्यानडाको १५ मिलियन हेक्टेयर (३७ मिलियन एकड) जङ्गल जलेको थियो, यो क्यानडाको कुल जंगलको लगभग ४ प्रतिशत हो ।

अध्ययनले विश्वका वनहरूमा औद्योगिक उत्सर्जनका लागि दीर्घकालीन कार्बन भण्डारहरूको रूपमा निर्भर रहनु कत्ति खतरनाक हुन सक्छ भन्दै चिन्ता व्यक्त गरेका छन् ।

चिन्ताको विषय यो छ कि विश्वव्यापी कार्बन बजेट, वा हरितगृह ग्यासहरूको अनुमानित मात्रा जुन विश्वव्यापी तापमान १.५ डिग्री सेल्सियस भन्दा बढि बिना उत्सर्जन गर्न सकिन्छ, जुन गलत गणनामा आधारित छ ।

यदि हाम्रो लक्ष्य वायुमण्डलमा कार्बन डाइअक्साइडको मात्रालाई सीमित गर्ने हो भने, हामीले कति कार्बन वनहरू अवशोषित गर्दैछ भन्ने बारे सोच्ने तरिका परिवर्तन गर्नुपर्छ, नासाको जेट प्रोपल्सन प्रयोगशालाका एक पर्यावरण वैज्ञानिक ब्रेन्डन बायर्नले भने । यस आधारमा हाम्रो अर्थतन्त्रबाट कति कार्बन उत्सर्जन गर्न सकिन्छ ।

सन् २०२३ मा क्यानाडामा देखिने असामान्य तातो तापक्रम सन् २०५० सम्ममा सामान्य हुने अध्ययनले जनाएको छ । यसले क्यानाडाको ३४७ मिलियन हेक्टर जङ्गलमा गम्भीर आगो लाग्ने सम्भावना बढाउँछ, जुन कार्बन भण्डारणमा निर्भर छ ।

क्यानाडाको वार्षिक हरितगृह ग्यास उत्सर्जन बजेटले वनमा लागेको आगो र त्यसबाट उत्सर्जित कार्बनलाई ध्यानमा राख्दैन । क्यानडाको २०२१ मा राष्ट्रिय रूपमा निर्धारित योगदान रणनीति अनुसार, औद्योगिक गतिविधिहरू जस्ता मानव स्रोतहरूबाट उत्सर्जन गणना गरिन्छ, तर कीटको प्रकोप वा जंगलको आगो जस्ता प्राकृतिक प्रकोपहरूबाट होइन ।

जसरी गणना गरेपनि वातावरणले यो कार्बन बढेको देखिएको बायर्न बताउछन् ।

गत वर्ष मे देखि सेप्टेम्बरसम्म जङ्गली आगोको धुवाँमा रहेको कार्बन मोनोअक्साइडको स्याटेलाइट डाटालाई हेर्दा, अनुसन्धानकर्ताहरूले २ हजार ३७१ मेगाटन कार्बन उत्सर्जन गर्ने विश्वको सबैभन्दा ठूलो देशहरूमा एघारौं बाट चौथो स्थानमा झरेको अनुमान गरेका छन् । आगामी दशकहरूमा थप बारम्बार र तीव्र आगोले क्यानाडाको जङ्गलको कार्बन शोषण गर्ने क्षमतालाई ओझेलमा पार्न सक्छ ।

क्यानाडाको बोरियल वन, जो प्रशान्तबाट एट्लान्टिक महासागरसम्म फैलिएको छ, ठूलो मात्रामा ‘भण्डारित’ सिओ२ राख्छ । सामान्यतया, जब दश वर्षसम्म जलेको जङ्गलहरू फेरि बढ्छन्, जङ्गलको आगोले निस्कने कार्बन डाइअक्साइडलाई पुनः अवशोषित गरिन्छ । तर वर्षभरि बढ्दो संख्या र आगोको आकार, साथै केही क्षेत्रहरूमा खडेरीले वनहरू पुन: बढ्नको लागि लामो समय लिन सक्छ । अध्ययनले भन्यो कि यसले ‘जंगलले कार्बन अवशोषण कम गर्न सक्छ ।’

अध्ययनले क्यानडाले आफ्नो जीवाश्म ईन्धन उत्सर्जन स्तर घटाउन वनले कार्बन शोषणको क्षतिको क्षतिपूर्ति गर्न सिफारिस गरेको छ । क्यानडाले पेरिस सम्झौता अन्तर्गत सन् २००५ को स्तरबाट सन् २०३० सम्ममा ४० देखि ४५ प्रतिशतसम्म कार्बन उत्सर्जन घटाउन सहमत भएको छ ।न्युज कारखाना

काठमाडौं । अमेरिकामा हत्या भएकी नेपाली युवती मुना पाण्डेमाथि चोरीको उद्धेश्यले अपार्टमेन्टमा पुगेका बोबिसिंह शाहले गोली हानेको खुलासा भएको छ ।

अदालतको विवरणमा लुटपाटको उद्धेश्यले बोबिसिंह मुनाको अपार्टमेन्टमा पुगेको र सोहि क्रममा गोली हानेर हत्या गरेको उल्लेख गरिएको छ ।

अब बोबीसिंहलाई सेप्टेम्बर ३ मा अदालतमा उपस्थित गराइने र उनीमाथि मुनाको हत्या बाहेक गैरकानुनी हतियार राखेको मुद्धा समेत चलाइने  भएको छ । गैर कानुनी हत्याको मुद्धामा उनलाई सेप्टेम्बर ५ मा अदालतमा उपस्थित गराइने भएको छ ।

५१ बर्षिय शाहलाई प्रहरीले तस्बीर सार्बजनिक भएपछि प्राप्त सूचनाका आधारमा ट्राफिकमा रोकिएको अवस्थामा पक्राउ गरेको थियो ।

शाह मुना मृत भेटिएको स्थानमा अगस्ट २४ को बेलुका ९ बजेर ४८ मिनेटमा देखिएपछि प्रहरीले तस्वीर सार्बजनिक गरेको थियो । अमेरिकाको टेक्सास राज्यको ह्युस्टनस्थित अपार्टमेण्टमा नेपाली विद्यार्थी मुना पाण्डेको गोली हानेर हत्या गरिएको अवस्थामा सोमबार भेटिएकी थिइन् ।

नेपालमा भोजपुरकी २१ बर्षिय पाण्डे सन् २०२१ मा अध्ययनका लागि अमेरिका पुगेकी थिइन् । न्युज कारखाना

पाँचथर । पाँचथरको फालेलुङ गाउँपालिका–५ मा बिहीबार साँझ भएको विस्फोटमा परी १ जना बालिकाको मृत्यु भएको छ। विस्फोटक पदार्थ विस्फोट हुँदा घाइते भएका चार बालबालिका मध्ये २ वर्षीया प्रिन्सा साँवाको उपचारका क्रममा झापाको बि एण्ड सीअस्पताल लग्दै गर्दा बाटोमा मृत्यु भएको हो।

विस्फोटमा परी ११ वर्षीय दिपशन साँवा गम्भीर घाइते छन् । उनलाई पनि जिल्ला अस्पताल पाँचथरमा उपचार हुन नसकेर थप उपचारको लागि झापाको बि एण्ड सी अस्पतालमा रिफर गरिएको छ ।

त्यसैगरी ११ वर्षीय पबन राईको जिल्ला अस्पताल पाँचथरमा उपचार भइरहेको छ । ७ वर्षीय दिपशन राई सामान्य घाइते भएकाले स्थानीय स्वास्थ्य चौकी प्राङबुङमा उपचार भइरहेको जिल्ला प्रहरी कार्यालय पाँचथरले जनाएको छ ।

डाडागाउँ भन्ने स्थानमा आइतराज केरुङको घरमा विष्फोट भएको थियो। सुरक्षा निकायले यसलाई ‘होममेड ग्रिनेट’ को विस्फोट भएको अनुमान गरेको छ ।

माओवादीको द्वन्दकालमा यो घर सेल्टरको रुपमा प्रयोग भएकोले त्यति बेलाकै ग्रिनेड हुनसक्ने प्रहरीले अनुमान गरेको छ ।न्युज कारखाना

काठमाडौं । अमेरिकामा हत्या भएकी नेपाली युवती मुना पाण्डेमाथि गोली चलाउने व्यक्तिको विवरण प्रहरीले सार्बजनिक गरेको छ ।

प्रहरीले मुनाको हत्या बोबी सिंग शाहले गरेको उल्लेख गर्दै मुद्धा दायर गरेको हो । ५१ बर्षिय शाहलाई प्रहरीले तस्बीर सार्बजनिक भएपछि प्राप्त सूचनाका आधारमा ट्राफिकमा रोकिएको अवस्थामा पक्राउ गरेको थियो ।

शाह मुना मृत भेटिएको स्थानमा अगस्ट २४ को बेलुका ९ बजेर ४८ मिनेटमा देखिएपछि प्रहरीले तस्वीर सार्बजनिक गरेको थियो ।

अमेरिकाको टेक्सास राज्यको ह्युस्टनस्थित अपार्टमेण्टमा नेपाली विद्यार्थी मुना पाण्डेको गोली हानेर हत्या गरिएको अवस्थामा सोमबार भेटिएकी थिइन् ।

नेपालमा भोजपुरकी पाण्डे सन् २०२१ मा अध्ययनका लागि अमेरिका पुगेकी थिइन् । २१ वर्षीया मुनाको हत्या किन भयो भन्ने बारे प्रहरी अहिले पनि अनुसन्धानमै रहेको छ । न्युज कारखाना