धनगढी । गणेश नेपालीको गजलसंग्रह एकलव्यभित्र रहेको शीर्ष गजलमा कैलालीको अत्तरियाका युवा व्यवसायीसमेत रहेका गायक जोस अनुजले स्वर दिएका छन्।
मान्छेका असन्तुस्टि, स्वार्थ, देखासिकी, आत्ममुग्धता, अहंकारी, स्वभाव र प्रवृतिमाथी गरिएको शब्द सिर्जनामा स्वर दिएका गायक जोसले गीतको म्युजिक भिडियो पनि तयार गरेका छन्। जसमा गायक स्वयंमले अभिनय गरेका छन्।
म्युजिक भिडियोमा धनगढी, डडेल्धुरा भीमदत पन्त लोकमार्गको मध्येबिन्दु, सुन्दर प्राकृतिक छटाले सुशोभित बुडर झरना, सुन्दर मनमोहक हरियाली र ग्रामीण जनजीवनलाई कैद गरिएको छ।
गीतमा संगीत स्वयम् जोस, एरेन्जर मनिष घर्तीमगर, रेकर्डिङ र मिक्सिङ एसएम भिडियो, क्यामेरा पिआर जोशी, पोस्ट प्रोडक्सन बीएसजी पिक्चर्स, एफटी जोस र जहित बुढाको रहेको छ। गीत निर्माण टिमले सहयोगी रबर्टसिंह बडैलाप्रति कृतज्ञता ज्ञापन गरेको छ।न्युज कारखाना
हेटौंडा | धार्मिक पर्यटनका हिसाबले मकवानपुरको भीमफेदी गाउँपालिका एक अनौठो गन्तव्य बनेको छ। यहाँको लटारम्मेश्वर महादेवको मन्दिरले धेरैलाई आकर्षित गरिरहेको छ।
यस क्षेत्रको विशिष्ट भौगोलिक अवस्थिति र धार्मिक महत्वका कारण मकवानपुर लटारम्मेश्वरलाई पर्यटकहरूले नयाँ गन्तव्य बनाउन थालेका छन् । समुद्री सतहबाट १८५६ मिटर उचाइमा रहेको यो मन्दिरबाट देखिने हिमशृङ्खलाको दृश्यले पर्यटकलाई मुग्ध पारेको छ।
यहाँको धार्मिक महत्वबारे एउटा रोचक किंवदन्ती छ। माथिल्लो यज्ञकुण्डमा महादेव त्रिलोक भ्रमण गरिरहँदा उनकी पत्नी सतीदेवीको लट्टा खसेको थियो। त्यही कारणले यो क्षेत्र ‘लटारम’ नामले चिनिन्छ। हरेक वर्ष माघे सङ्क्रान्ति र वैशाख १ गतेका दिन यहाँ विशेष मेला लाग्ने गर्छ। भीमफेदी गाउँपालिकाको इपाबाट २ घण्टाको पैदल हिँडाइपछि डब्लु डाँडाको थुम्कोमा महादेवको मन्दिर पुग्न सकिन्छ। त्यहाँबाट आकर्षक गणेश हिमाल र प्राकृतिक सुन्दरताको दिव्य दृश्य अवलोकन गर्न सकिन्छ।
डब्लु डाँडालाई बादलले ढाकिरहन्छ र छिनैमा बादल फाटेर नयाँ दृश्यहरू देखापर्छन्। सिरसिरे हावाले लहरिंदा बोटविरुवाका पातहरू नाच्ने गर्छन्। यी अनौठा प्राकृतिक दृश्यहरूले पर्यटकलाई अलौकिक अनुभूति प्रदान गर्छन्। काठमाडौंबाट मात्र २ घण्टा र हेटौँडाबाट १ घण्टामा पुग्न सकिने भीमफेदी इपाबाट २ घण्टा पैदल चढ्दा लटारम्मेश्वरको दर्शन गर्न सकिन्छ। व्यस्त शहरी जीवनबाट अलग्गिएर प्राकृतिक सौन्दर्य र धार्मिक शान्तिको अनुभव लिन चाहनेहरूका लागि यो स्थान उपयुक्त छ।न्युज कारखाना
काठमाडौँ । फ्रान्सको संसदीय निर्वाचनको प्रारम्भिक परिणामले आश्चर्यजनक नतिजा दिने सम्भावना देखिएको छ । पहिलो चरणमा अगाडि रहेको अति दक्षिणपन्थी नेशनल र्याली पार्टी पछिल्लो अनुमानमा आश्चर्यजनक रूपमा तेस्रो स्थानमा झरेको छ ।
वामपन्थी र केन्द्रवादी पार्टीहरूबीच भएको रणनीतिक सहमतिका कारण यो सम्भव भएको हो ।
एक साताअघि पहिलो चरणमा चरम दक्षिणपन्थी नेशनल र्याली (आरएन) पार्टीले अग्रता लिए पनि अहिले दोस्रो चरणमा न्यू पपुलर फ्रन्ट (एनएफपी) सबैभन्दा बढी मत ल्याउदै अगाडी रहेको छ ।
राष्ट्रपति इमानुएल म्याक्रोनको केन्द्रवादी पार्टी एन्सेम्बल एलायन्स दोस्रो स्थानमा आउने अनुमान गरिएको छ । तर, कुनै पनि गठबन्धनले आफ्नै बलमा बहुमत ल्याउन सक्ने अवस्था छैन ।
अबको प्रधानमन्त्री को हुन् भन्ने स्पष्ट भइसकेको छैन तर म्याक्रोनको पार्टीका वर्तमान प्रधानमन्त्री गेर्बियल अट्टलले राजीनामा दिने बताएका छन् ।
अहिलेसम्मको परिणाम अनुसार ५७७ सदस्यीय फ्रान्सको तल्लो सदनमा बामपन्थी गठबन्धनले १८२ सिट जितेको छ भने राष्ट्रपति म्याक्रोनको गठबन्धन एन्सेम्बल एलायन्सले १६८ सिट जितेको छ । त्यस्तै नेशनल र्यालीले १४३ सिट जितेको फ्रान्सका मिडियाले उल्लेख गरेका छन् ।
यस सम्भावित ठूलो अप्ठ्यारोको कारण धेरै वामपन्थी र केन्द्रवादी उम्मेदवारहरूले अति दक्षिणपन्थी राष्ट्रिय र्यालीको विरुद्धमा मतदाताहरूबीच विभाजन हुन नदिन चुनावी दौडबाट पछि हटेका थिए ।
फ्रान्स अनबाउड पार्टीका नेता जीन-लुक मेलेनचोनले एनएफपीको सम्भावित विजयलाई अति दक्षिणपन्थीहरू विरुद्धको जीत र म्याक्रोनको एजेन्डाको हार भनेका छन् ।
मध्य पेरिसको प्यालेस डे ला रिपब्लिकमा वामपन्थी समर्थकहरूले विजय र्याली गरिरहेका छन्।
नेशनल र्यालीका नेता जोर्डन बर्डेलाले ‘बेइमानहरूको गठबन्धन’ ले आफ्नो पार्टीलाई सत्ताबाट धकेलेको र फ्रान्सलाई कट्टरपन्थी वामपन्थीको हातमा राखेको बताएका छन् ।
न्युज कारखाना
काठमाडौँ । युक्रेनी नागरिक टेटियानाको छोराको लागी, बिजुली आपूर्तिको विषय जीवन र मृत्युको विषय बन्यो । टेटियानाको बच्चा जन्मजात शारीरिक रूपमा असक्षम थियो । सास फेर्न, खान र औषधि लिन समेत विद्युतीय उपकरणको भर पर्नु परेको छ । टेटियानाले भनिन्- ‘हामी बिजुलीमा धेरै निर्भर छौं । यो रक्तरंजित युद्ध नभइसकेको भए पनि हाम्रो जीवन कष्टकर हुने थियो तर हामीले यसको सामना गर्ने थियौं ।’
रुसले युक्रेनको ऊर्जा क्षमता र प्लान्टमा लगातार आक्रमण गरेपाची अब त्यसको असर जनजीवनदेखि स्वास्थ्य क्षेत्रमा पर्न थालेको छ । युक्रेनका जनता अब लामो समयसम्म बिजुलीविना बाँच्न सिक्न बाध्य हुनुपर्ने अवस्था आएको छ । बारम्बार रुसी हवाई आक्रमणको अर्थ युक्रेनको पहिले अप्रभावित भागहरू पनि लगभग हरेक दिन घण्टासम्म बिजुलीविहीन रहने भएका छन् ।
ओडेसाको दक्षिणी बन्दरगाह सहरमा बस्ने टेटियाना भन्छिन्, ‘अन्तहीन बिजुली कटौतीले जीवनलाई अत्यन्तै कठिन बनाएको छ किनभने तिनीहरूले बिजुली आपूर्ति निर्बाध रहन्छ भनेर सुनिश्चित गर्न आवश्यक छ ।’ टेटियानासँग पेट्रोलमा चल्ने जेनेरेटर छ । यो सधैं चल्नु पर्छ, तर चिसो हुन हरेक छ घण्टा बन्द गर्नुपर्छ ।
पावर कटले मोबाइल फोन कभरेजलाई पनि असर गर्छ, त्यसैले टेटियानाले आफ्नो छोराको लागि एम्बुलेन्सलाई सम्पर्क गर्न पनि कठिनाइहरूको सामना गर्ने गरेकी छन् । टेटियानाले भनिन्, ‘कहिलेकाहीँ एम्बुलेन्स आउन आधा घण्टा लाग्छ । कहिलेकाहीँ एक घण्टा पनि लाग्छ । यस अवधिमा मेरो बच्चालाई धेरै समस्या हुन्छ र उसको शरीर नीलो हुन थाल्छ ।’
उनी भन्छिन्, ‘यदि मेरो छोरोले अक्सिजन पाएन भने उसको ज्यान जान सक्छ । मसँग बोल्ने शब्द छैन ।’ भर्खरै, टेटियानाको छिमेक १२ घण्टा बिजुलीविहीन थियो । नौ गिगावाट विद्युत उत्पादन क्षमता तीन महिनामै गुमायो, बिजुलीको अभावका कारण लाखौं युक्रेनीहरूले वातानुकूलित, लिफ्ट वा जीवन बचाउने उपकरणहरू ठीकसँग प्रयोग गर्न असमर्थ छन् ।
राष्ट्रिय ऊर्जा कम्पनी युक्रेनर्गोले पछिल्लो तीन महिनामा मात्रै युक्रेनले ९ गिगावाट विद्युत उत्पादन क्षमता गुमाएको बताएको छ । यो फेब्रुअरी २०२२ मा पूर्ण मात्रामा आक्रमण हुनु अघि युक्रेनको क्षमताको एक तिहाइ भन्दा बढी हो ।
युक्रेनर्गोको यो क्षमता नेदरल्यान्ड्स, स्लोभाकिया, लाटभिया, लिथुआनिया र इस्टोनियालाई चरम खपतको समयमा पनि उर्जा दिन पर्याप्त हुन्छ । ‘राज्यको स्वामित्वमा रहेका सबै थर्मल पावर प्लान्टहरू ध्वस्त भएका छन् । हाम्रो देशका सबै जलविद्युत केन्द्रहरूलाई रुसी क्षेप्यास्त्र वा ड्रोन आक्रमणबाट क्षति पुगेको छ,’ युक्रेनर्गोका प्रवक्ता मारिया त्स्तुरियनले बताइन्, “जसको कारणले गर्दा लाखौं युक्रेनीहरू पेट्रोल र डिजेल वा ठूला पावर बैंकहरूमा चल्ने जेनेरेटरहरूमा बढी निर्भर हुँदैछन् ।’
युक्रेनको राजधानी किभमा पनि लामो समयदेखि विद्युत् कटौती भइरहेको छ । रोकसोलाना २४ तले अपार्टमेन्टमा बस्छिन् । जनता एकजुट भएर अपार्टमेन्टको सुविधा सञ्चालन गर्न रोक्सोलानालाई चुनेका छन् ।’ टावर ब्लकमा बस्न सजिलो छैन किनभने बिजुली कटौतीको मतलब पानी माथिल्लो तलामा पुग्न नसक्नु पनि हो,’ रोकसोलाना भन्छिन्, ‘लिफ्ट पनि चल्दैन, त्यसैले बालबालिका, वृद्ध महिला र अपाङ्गता भएकाले कुर्नुपरेको छ। बिजुली आएपछि मात्र बाहिर जाने योजना छ,’ उनी भन्छिन् ।
रोकसोलानाले आफू लगातार ६ घण्टा घरभित्रै बस्नुपर्ने बताइन् । हाम्रा वृद्ध महिलाहरू रोटी किन्न पसलमा जान पनि सक्दैनन् ।’
युक्रेनमा अग्लो भवनहरूमा बस्ने बासिन्दाहरू तिनीहरूको भित्तामा रहेको अपार्टमेन्टमा फसेका छन् किनभने बिजुली बिना, एयर कन्डिसनरहरू पनि चल्दैनन् । अग्ला भवनहरूमा बस्ने मानिसहरू पनि रुसी हवाई आक्रमणबाट बढी जोखिममा छन् । बम आक्रमणबाट जोगाउन बनाइएका ठाउँहरूमा समेत उनीहरू सजिलै पुग्न नसक्ने भएकाले यस्तो भएको हो । बम आक्रमणबाट जोगाउन निर्माण गरिएका अधिकांश ठाउँहरू भूमिगत छन् ।
जापोरिझियाका दन्तचिकित्सक भोलोडिमिर स्टेपानिभ भन्छन्- कहिलेकाहीँ अपोइन्टमेन्टहरू स्थगित गर्नुपर्नेछ । धेरै पटक यस्तो हुन्छ कि जटिल शल्यक्रिया गर्दा पनि बिजुली जान्छ ।
स्टेफानिभ भन्छन्- यदि शल्यक्रियाको क्रममा पावर फेल भयो भने, हामीले हाम्रो जेनेरेटर चलाउनु पर्छ ताकि हामीले शल्यक्रिया पूरा गर्न सकौं । यस बाहेक हामीसँग अर्को विकल्प छैन, किनकि हामी बिरामीलाई भोलि फेरि आउन भन्न पनि सक्दैनौं । वास्तवमा, त्यहाँ बारम्बार पावर कटौतीहरू छन् जुन केही हप्तासम्म रहन्छ, जुन धेरै समस्यापूर्ण छ ।
टर्चले उपचार
डाक्टर स्टेफानिभले बिजुली बन्द हुँदा तुरुन्त वा कम जटिल कार्यहरूको लागि हेड टर्च प्रयोग गर्छन् । डा. स्टेफानिभले फ्रन्ट लाइनमा रहँदा सिपाहीहरूको उपचार गर्दा यो विधि सिकेका थिए र अहिले त्यसमा निपुण भएका छन् । उनको फर्मले अझै पनि युक्रेनी सेनाका सदस्यहरूलाई नि:शुल्क वा गहिरो छुट उपचार प्रदान गर्दछ ।
डा. स्टेफानिभ बताउँछन्- म दाँत दुख्ने वा सुन्निने बिजुली बिना पनि उपचार गर्न सक्छु । हामीले बिजुली बिना शल्यक्रिया गर्न सिकेका छौं ।
युनिग्रोकी प्रवक्ता भन्छिन्- ‘हामीसँग अर्को विकल्प छैन, हामी युद्धमा छौं,’ उनी भन्छिन, ‘उर्जा क्षेत्र रूसी आतंकवादीहरूको लक्ष्य हो र यो किन स्पष्ट छ । किनभने हाम्रो सम्पूर्ण जीवन, हाम्रो सम्पूर्ण सभ्यता बिजुलीमा आधारित छ । तपाईले आफ्नो शत्रुको पावर ग्रिडलाई नष्ट गर्नु पर्छ जसपछि तिनीहरूको अर्थतन्त्र र जीवन हुनेछैन । यो स्वतन्त्रताको लागि हामीले तिर्ने मूल्य हो ।’ न्युज कारखाना
काठमाडौँ । प्रतिनिधि सभाको बैठक आज पनि बस्दै छ । बिहान ११ बजे बस्ने बैठकमा वार्षिक प्रतिवेदन पेश गर्ने र व्यवस्थापन कार्य सम्बन्धि कार्यसूची रहेको संघीय संसद सचिवालयले जानकारी दिएको छ ।
जस अनुसार प्रधानमन्त्री पुष्पकमल दाहाल प्रचण्डले ‘राष्ट्रिय समावेशी आयोगको वार्षिक प्रतिवेदन आ.व. २०७९ / ०८०’ पेश गर्ने कार्यसूची रहेको छ ।
त्यस्तै व्यवस्थापन कार्य अन्तर्गत शिक्षा, विज्ञान तथा प्रविधिमन्त्री सुमना श्रेष्ठले राष्ट्रिय सभामा उत्पत्ति भएको ‘शहीद दशरथ चन्द स्वास्थ्य विज्ञान विश्वविद्यालय विधेयक, २०८० माथि विचार गरियोस्’ भन्ने प्रस्ताव प्रस्तुत गर्ने छिन ।
त्यस्तै प्रधानमन्त्री एवं उद्योग वाणिज्य तथा आपूर्ति मन्त्री पुष्पकमल दाहाल प्रचण्डले ‘लगानी सहजीकरण सम्बन्धी केही नेपाल ऐनलाई संशोधन गर्ने विधेयक, २०८१ का सम्बन्धमा राष्ट्रिय सभाबाट भएको संशोधनमाथी सदनमा पुनर्विचार गरियोस्’ भन्ने प्रस्ताव प्रस्तुत गर्ने कार्यसूची रहेको छ ।न्युज कारखाना
धनगढी । नेपाली कांग्रेस र नेकपा एमालेले सुदूरपश्चिम प्रदेशका मुख्यमन्त्री दीर्घ सोडारीलाई तत्काल राजीनामा दिन माग गरेका छन् ।
आइतवार कांग्रेस र एमालेले संयुक्त विज्ञप्ति जारी गर्दै मुख्यमन्त्री सोडारीको राजीनामा माग गरेको हो । केन्द्रमा समीकरण परिवर्तन भएसँगै एमालेले सोडारी नेतृत्वको सरकारबाट समर्थन फिर्ता लिएको छ ।
कांग्रेस-एमालेको विज्ञप्तिमा भनिएको छ- ‘मुख्यमन्त्री पदबाट राजीनामा दिई अर्को सरकार गठनका लागि मार्ग प्रशस्त गर्न यसै प्रेस विज्ञप्ति मार्फत मुख्यमन्त्री सोडारीलाई अनुरोध गर्दछौँ । बहुमत गुमाइसकेको अल्पमतको सरकारले दैनिक कामकाज बाहेक अन्य कुनै पनि कार्यहरु सम्पादन नगर्न र नगराउन समेत आग्रह गर्दछौं ।’
एमाले माओवादी नेकपा एकीकृत समाजवादी नाउपा रञ्जिता पक्षको समर्थनमा मुख्यमन्त्री बनेका सोडारी असार २० गते एमालेले समर्थन फिर्ता लिएसँगै अल्पमतमा परेका छ ।न्युज कारखाना
राैतहट,२३ गते असार । असारको तेस्रो हप्ता बितेर चौथो हप्ता चलिरहेको भए पनि मधेश प्रदेशमा खासै रोपाईँ हुन सकेको छैन । गत दुई दिन राम्रोसित पानी परेकोले किसानहरु दिनभर रोपाईँमा ब्यस्त हुन पुग्दा रोपाईँको प्रतिशतमा केही वृद्धि भएको हो । मधेश प्रदेशमा भदैया र मंसिरा गरी दुई किसिमको धानको रोपाईँ धमाधम हुन थालेको छ । ढिलो गरी पानी परेको हुनाले भदैया धान पनि ढिलो हुन पुगेको हो । सामान्यतया असारको तेस्रो हप्तासम्म भदैया धान सिध्याइसक्नु पर्नेमा ढिलो नै भए पनि धमाधम रोपाईँ भइरहेको छ । मधेश प्रदेशको रौतहटमा करिब छ प्रतिशत, सर्लाहीमा करिब पाँच प्रतिशत, धनुषामा करिब बिस प्रतिशत, महोतरीमा करिब बिस प्रतिशत, सिराहामा करिब एघार प्रतिशत, सप्तरीमा करिब पच्चीस प्रतिशत र बारामा करिब सात प्रतिशत धानको रोपाइँ भएको छ । समग्रमा मधेश प्रदेशमा अहिलेसम्म करिब पन्ध्र प्रतिशत धानको रोपाईँ भएको विकास निर्देशनालायका प्राविधिक सहायक प्रतिमा यादवको भनाइ छ । ढिलो गरी पानी पर्दा धानको बेर्ना तयार नभएको कारण अहिले पानी परे पनि रोपाइँमा ढिलो भएको हो । सिंचाइको सुविधा भएको ठाउँमा भने धानको रोपाइँ धमाधम भइरहेको छ । यस वर्ष विगतका वर्षहरुमा भन्दा पानी बढी पर्ने सम्भावना रहेकोले किसानहरुलाई धानको उत्पादन राम्रो हुने विश्वास रहेको छ । ब्याडमा धानको बेर्ना तयार भइरहँदा पानी परेकोले किसानहरु धेरै खुसी भएका छन् । यसै गरी पानी पर्ने हो भने किसानहरुले साउनको पहिलो हप्तासम्म रोपाइँ सिध्याउने विश्वास गरिएको छ । गत वर्ष साउनको दोस्रो हप्तादेखि खेतमा रोपाईँ गर्ने किसिमले पानी परेको थियो । गत केही दिनदेखि पानी परिरहेको भए पनि सर्लाही, रौतहट र बाराको खेतमा भने वर्षाको पानी लागेको छैन । केही गैरी खेत, कुलो लाग्ने तथा बाढी पसेको खेतमा मात्र रोपाईँ भएको र अधिकांश किसानले बोरिङ तथा पम्पसेटको सहायताले रोपाईँ गरिरहेका छन् । किसानहरुले धमाधम रोपाईँ गरिरहेको र वर्षाले बेर्ना तयार भइरहेको हुनाले केही दिन किसानलाई अत्यन्तै बेफुर्सदी हुने कटहरियाका किसान रुपेश महतोले बताएका छन् । धानको रोपाईँ भइरहँदा किसानहरुमा उत्साह बढिरहेको महतोको भनाइ छ । रोपिसकेको धानमा पनि वर्षाको पानीले राम्रो गरिरहेको र बेर्नालाई पनि राम्रो गरिरहेकोले किसानहरुमा उत्साह बढेको महतो बताउँछन् ।
गाैर, २३ गते असार । आफ्नै आमाको हत्या गरी फरार भएका छोरा १ महिना पछि प्रहरी समक्ष जिल्ला प्रहरी कार्यालयमा हाजिर भएका छन्। रौतहट जिल्लाको राजदेवी नगरपालिका वडा नम्बर १ पथरा टोल निवासी फरार प्रतिबादी मनोज कुमार साह प्रहरी समक्ष आफै हाजिर भएका हुन। दाजु भाई बीच अंश बन्डाको बिषयलाइ लिएर विवाद हुदा आमा ६९ बार्षिय राधा देवी साहलाइ २०८१ साल जेष्ठ ५ गते बिहान साढे तिन बजेको समयमा घरकोठा भित्र टाउकोमा सिलौटोको लोहोरोले प्रहार गरी हत्या गरी फरार भएको जिल्ला प्रहरी कार्यालय रौतहटले जनाएको छ। आमाको हत्या गरी फरार भएका साहलाइ खोज तलाश गर्ने क्रममा निजको श्रीमति, आफन्त, परिवारको सदस्य मार्फत सम्पर्क गरी फरार रहेको अवस्थाको जोखिम तथा हाजिर भई अनुसन्धानमा सहयोग गरे पछिको अवस्था बारेमा कानुनी परामर्श दिए पश्चात साह आफै हाजिर भएको प्रहरी उपरिक्षक दिलिप घिमिरेले जानकारी दिएका छन्। कर्तव्य गरी मारेको घटनामा प्रहरीको कानुनी राय सल्लाह सुझाब मानेर आफै अनुसन्धानको लागि हाजिर हुने व्यक्ति साह पहिलो रहेका छन्। प्रहरी समक्ष हाजिर भएका साहलाइ कर्तव्य ज्यान सम्बन्धि मुद्दामा अदालत बाट अनुमति लिई हिरासतमा राखी थप अनुसन्धानको कार्य अगाडी बढाइएको जिल्ला प्रहरी कार्यालयले जनाएको छ।
राैतहट,२३ गते असार । लाल बकैया नदिकाे बाँधकाे अवलोकन गरिएको छ । राैतहटकाे माैलापुर नगरपालिकाकि नगरप्रमुख रिना कुमारी साहले आज लाल बकैया नदिमा रहेकाे बाँधकाे अवलोकन गरेकी हुन् । नदि पानीको सतह बढन थालेपछि मेयर सहितकाे टाेली अवलोकन गर्न पुगेको थियोे । बकैया नदीको जोखिमपुर्ण बाँधको अवस्था बुझन आज अवलोकन गरेकी हुँ, नगर प्रमुख साहकाे भनाइ छ । नदीमा पानीको सतह बढ़दो रहेकोले सतर्कता अपनाउन सम्पूर्ण नदी किनारका वासीहरुलाई अनुरोध समेत गरेकी हुन् । साे अवसरमा माैलापुर नगरपालिकाका उपमेयर नागेन्द्र यादव,आम बिधार्थी माेर्चाका अध्यक्ष विवेक साह,स्थानीयहरू लगायतका व्यक्तिहरूकाे उपस्थिति रहेको थियोे ।
राैतहट,२३ गते । मौलापुर नगरपालिकाले “हमर नगर हरित शहर” भन्ने अभियान अन्तर्गत आज मर्यादपुरमा व्यापक बृक्षारोपण गरेको छ । साे नगरपालिकाकाे वडा नम्बर १ मा रहेको एकीकृत नमूना दलित बस्ती लगायतका ठाउँहरूमा नगर प्रमुख रिना कुमारी साहले वृक्षारोपण गरेकी हुन् । मौलापुरलाई हराभरा बनाउने अभियान अन्तर्गत अहिले विरूवाहरू राेपने काम भईरहेकाे मेयर साहकाे भनाइ छ । 
केही अघि संघिय सांसद एवम् आजपा अध्यक्ष प्रभु साहले वृक्षारोपण गरी सो अभियानलाई शुभारम्भ गरेका थिए । 
दलित बस्ती सहित मावि मर्यादपुर सहितका ठाउँहरूमा विभिन्न प्रजातिका बोटबिरुवा लगाइएको मौलापुर नगरपालिकाका प्रमुख प्रशासकीय अधिकृत रामबाबु साहले जानकारी दिएका हुन् । यो अभियानअन्तर्गत नगरभरी बिरुवा रोपिने उनले बताए ।
कार्यक्रमअन्तर्गत नगरका सम्पूर्ण विद्यालय, स्वास्थ्य संस्था लगायतका सरकारी निकायका साथै बजार र मुख्य सडकमा बृहत वृक्षारोपन गरिने बताइएको छ । यसले नगरपालिका छिटै नै ग्रीन सिटी बन्ने विश्वास लिइएको छ । 
वृक्षरोपण कार्यक्रमकाे अवसरमा माैलापुर नगरपालिकाका उपमेयर नागेन्द्र यादव,आम बिधार्थी माेर्चाका अध्यक्ष विवेक साह,स्थानीय यूवा नेता बालाशंकर कुशवाहा लगायतका व्यक्तिहरूकाे उपस्थिति रहेको थियोे ।
