जनकपुरधाम,मंसिर १०,
– धनुषाको सबैला नगरपालिकाले कार्तिक पूर्णिमाको अवसरमा भोलि साेमबार बिदा दिएको छ । नगरप्रमुख कारीराम यादवले पूर्णिमा मेलाको अवसरमा सोमबार बिदा दिएको सूचना जारी गरेका हुन् ।
सोमबार नगरपालिका र अन्तर्गतका सम्पूर्ण कार्यालयहरूमा एक दिनका लागि स्थानीय बिदा रहने सूचनामा उल्लेख छ ।
धनुषा र सिरहा जोड्ने कमला नदीमा पूर्णिमा अवसरमा विशाल मेला लाग्ने गर्छ ।
सप्तरी मंसिर १०,
: राजविराजको एक होटलमा महिलाहरूलाई वेश्यावृतिमा लगाउने गरेको आरोपमा सप्तरी प्रहरीले होटल सञ्चालक र मेनेजरलाई आइतबार पक्राउ गरेको छ।
जिल्ला प्रहरी कार्यालय सप्तरीले दुवै जनालाई पक्राउ गरी मानव बेचबिखन तथा ओसारपसार नियन्त्रण ऐन, २०६४ अन्तर्गतको कसुरमा अनुसन्धान अघि बढाएको छ।
जिल्ला प्रहरी कार्यालय सप्तरीका सूचना अधिकारी एवम डिएसपी ढुण्डीराज नेउपानेका अनुसार पक्राउ पर्नेहरूमा राजविराज नगरपालिका–३ स्थित लक्ष्मी गेष्ट हाउसका सञ्चालक राजविराज नगरपालिका–६ का ५७ वर्षीय अरुणचन्द्र मिश्र र गेष्ट हाउसका मेनेजर सप्तरीको महादेवा गाउँपालिका–२ बस्ने ४१ वर्षीय रामप्रकाश मण्डल छन्।
उनीहरूले गेष्ट हाउस सञ्चालन गरी फोन सम्पर्कको आधारमा महिलाहरूलाई जबरजस्ती वेश्यावृत्ति कार्यमा लगाउने गरेको प्रहरीले जनाएको छ। प्रहरी टोलीले गेष्ट हाउसमा छापा मार्दा सञ्चालक मिश्र र मेनेजर मण्डलले जबरजस्ती वेश्यावृती गराउने कार्यमा राखिएका पाँच जना महिलाहरू फेला पारेको थियो।
फेला परेका महिलामा २५ देखि ३५ वर्ष उमेरका एक जना सुनसरीका र चार जना सप्तरीका महिला छन्। पक्राउ परेका दुबै जनाविरुद्ध मानव बेचबिखन तथा ओसारपसारको कसूरमा सप्तरी जिल्ला अदालतबाट ३ दिनको म्याद लिई थप अनुसन्धान प्रक्रिया अगाडि बढाइएको प्रहरीले जानकारी दिएको छ।
मानव बेचबिखन तथा ओसारपसार (नियन्त्रण) ऐन, २०६४, दफा ४ (१) ले परिभाषा गरे अनुसार मानव बेचबिखन भन्नाले कुनै पनि उद्देश्यले मानिस बेच्ने वा किन्ने वा कुनै प्रकारको फाइदा लिई वा नलिई वेश्यावृत्तिमा लगाउने वा प्रचलित कानुन बमोजिम बाहेक मानिसको अंग झिक्ने वा वेश्यागमन गर्ने कार्य हो।
ऐनको दफा ३ मानव बेचबिखन तथा ओसारपसार कसैले पनि गर्न गराउन नहुने र कसैले गरेमा अपराध गरेको मानिने व्यवस्था गरेको छ। मानव बेचबिखन तथा ओसारपसार अपराधको मात्रा र प्रकार तथा पीडितको उमेरका आधारमा २० वर्षसम्म कैद र ५ लाखसम्म जरिवाना हुने ऐनको दफा १५ मा उल्लेख छ। दुरुत्साहन, षडयन्त्र उद्योग वा मतियारलाई सम्बन्धित सजायको आधा सजाय हुने व्यवस्था छ।
रुपन्देही ।
आफ्नै पार्टी नेतृत्वको लुम्बिनी प्रदेश सरकारलाई मन्त्रालय थपेर भागवण्डा मिलाउन नहुने भन्दै नेपाली कांग्रेस लुम्बिनी प्रदेश सभापति अमरसिंह पुनले पार्टीको पुरानो अडान दोहोर्याएका छन् ।
अहिलेको अवस्थामा प्रदेशमा मन्त्रालय थप्नुपर्ने कुनै कारण नभएको जनाउँदै उनले कसैलाई भागवण्डा पुर्याउन यो अवस्थामा मन्त्रालय थप्ने विषयमा पार्टीले सहमति नजनाउने स्पष्ट पारे । आइतबार नेपाल प्रेस युनियनले पाल्पामा गरेको पत्रकार भेटघाटमा सभापति पुनले मुख्यमन्त्रीसहित १० मन्त्रालय यथावत रहेकाले थप्न नहुने बताए ।
सभापति पुनले मन्त्रालय थप्ने कुनै कारण नरहेको बताउँदै अहिले भएका मन्त्रालयलाई पूर्णता दिएर काम गर्न सुझाव दिएको उनले बताए । अहिलेको अवस्था अर्थतन्त्र डामाडोल भएको र यस्तो अवस्थामा मन्त्रालय र मन्त्री थपेर जनताको इच्छा, आकांक्षा पूरा नहुने उनले बताए ।
‘आठ दलको सरकार छ, सबैलाई भागवण्डा पुर्याउनुपर्ने हुन्छ,सबैलाई धेरै चाहियो भनेर अझ दुई वटा मन्त्रालय थप्न प्रस्ताव आएको छ । पार्टीले नीतिगत रुपमा १० भन्दा बढी बनाउन हुंदै भन्नेछ’, उनले भने, ‘यसलाई पूर्णता दिनुस पहिला त्यसपछि अवस्था परिवर्तन भयो भने संघीय कानुन, ऐन बनेपछि जिम्मेवारी पूर्ण भएपछि मात्र थप्न राम्रो हुन्छ, जसलाई बनाउने हो बनाउने तर छिटो मन्त्रीपरिषद् पूर्णता दिनुपर्ने अवस्था छ ।’
मंसिर १६ र १७ गते रुपन्देहीको बुटवलमा हुने काग्रेसको लुम्बिनी प्रदेशको सम्मेलनपछि तत्कालै मन्त्रीपरिषद्ले पूर्णता पाउने विश्वास सभापति पुनको छ । उनले लुम्बिनी प्रदेशका १२ जिल्लालाई केन्द्रबिन्दुमा राखेर जनताको माग सम्बोधन गरेर सरकार अघि बढ्नुपर्ने उनले जोड दिए ।
उनले कतिपय अवस्थामा माओवादीले बराबरी भाग माग्दा मन्त्रीपरिषद् विस्तारमा समस्या भएको बताए । ‘मन्त्रीपरिषद बिस्तारका विषयमा केन्द्रीय नेतृत्वसंगसमेत कुराकानी भइरहेको छ’, उनले भने, ‘कांग्रेस र माओवादी पार्टीको नेतृत्वसंग यस विषयमा छलफल भएकाले सम्मेलनपछि नै मन्त्रीपरिषद् विस्तार हुनेमा पूर्ण विश्वस्त छु ।’
लुम्बिनी प्रदेशमा अहिले सात सदस्यीय मन्त्रिपरिषद् रहेको छ । सहमतिअनुसार माओवादीले थप दुई र कांग्रेसले थप ३ मन्त्रालय पाउनुपर्ने हुन्छ । तर बाँकी तीन मन्त्रालय मात्रै छ । जसले गर्दा भागबन्डा पु¥याउन दुई मन्त्रालय थप्नुपर्छ । हाल लुम्बिनी प्रदेश सरकारमा कांग्रेसबाट मुख्यमन्त्री चौधरीसमेत दुई, माओवादी, नागरिक उन्मुक्ति, जसपा, लोसपा, जनमतबाट एक÷एक जना मन्त्री रहेका छन् ।
कांग्रेस लुम्बिनी प्रदेशमा इतर समूहको वर्चश्व रहेको छ भने प्रदेश सभामा संस्थापन समूहको वर्चश्व रहेको छ । अहिले सरकारमा मुख्यमन्त्री र मन्त्री संस्थापन समूहबाटै रहेका छन् ।
१० मंसिर/
पोखरामा चलिरहेको केपी ओली कप टी-२० क्रिकेट प्रतियोगितामा नेपाल पुलिस क्लबले मधेस प्रदेशलाई हराएको छ। आज भएको खेलमा पुलिसले मधेसलाई ५७ रनले हराएको हो।
पुलिसले दिएको १ सय ७६ रनको लक्ष्य पछ्याएको मधेस १८ ओभर २ बलमा १ सय १८ रनमा अल आउट भयो । मधेसका रुपेश सिंहले सर्वाधिक ४० रन बनाए। यस्तै इमरान शेखले २२ रन जोडे। बलिङतर्फ पुलिसका करण केसी, सागर ढकाल, रशिद खान र ललित राजवंशीले समान २ विकेट लिए।
यसअघि पोखरा रङ्गशालामा टस जितेर ब्याटिङ रोजेको पुलिसले निर्धारित २० ओभरमा ५ विकेट गुमाएर १ सय ७५ रन बनायो। पुलिसका कुशल भुर्तेलले शतक बनाए। उनी ५७ बलमा ७ छक्का र ८ चौकाको मद्दतमा १ सय २ रन बनाएर आउट भए।
कुशल यो प्रतियोगितामा शतक बनाउने पहिलो खेलाडी बनेका छन्। बलिङतर्फ मधेसका विशाल पटेल र विशाल शुस्लिङले समान २ विकेट लिए।
ताप्लेजुङ
– ताप्लेजुङमा एमाले सचिव एवम् प्रतिनिधिसभा सदस्य योगेश भट्टराई सवार गाडीमा पहिचान पक्षधरहरूले ताेडफाेड गरेका छन् ।
आज आइतवार गृहजिल्ला ताप्लेजुङबाट काठमाण्डाै फर्कने क्रममा सदरमुकाम फुङलिङकाे ताेक्मे डाँडामा भट्टराई सवार गाडीमा पहिचान पक्षधरहरूले ताेडफाेड गरेका हुन् । ताेडफाेडबाट गाडीकाे सिसा फुटेकाे छ ।
सात/आठ जनाको समूहमा रहेकाहरूले भट्टराई सवार गाडीमा ढुङ्गा र लाठीले हानेका एमाले ताप्लेजुङका कार्यवाहक अध्यक्ष सन्तोष खतिवडाले बताउनुभयाे । गाडीकाे सिसा फुटे पनि मान्छेलाई केही नभएकाे खतिवडाले जानकारी दिनुभयाे । यसअघि आजै दिउँसाे सचिव भट्टराईलाई पहिचान पक्षधरहरूले कालाे झण्डा देखाएका थिए ।
राजविराज/
– सप्तरीको राजविराजमा महिलालाई जबरजस्ती वेश्यावृत्तिमा संलग्न गराएको आरोपमा दुई जना पक्राउ परेका छन् ।
आइतबार प्रहरीले राजविराज नगरपालिका ३ स्थित लक्ष्मी गेष्ट हाउसका संचालक ५७ वर्षीय अरुणचन्द्र मिश्र र म्यानेजर महादेवा गाउँपालिका–२ बस्ने ४१ वर्षीय रामप्रकाश मण्डललाई पक्राउ गरेको हो ।
बारा ।
मधेस प्रदेश ट्राफिक प्रहरी कार्यालय पथलैयाले जरिमानाका नाममा ‘कमाउने धन्दा’ गरेको रहस्य खुलेको छ ।
मधेस प्रदेशअन्तर्गत आठवटै जिल्लामा यातायात व्यवसायीदेखि सर्वसाधारण ट्राफिक प्रहरीद्वारा जरिमानाको नाममा ठगिँदै आएको पाइएको हो ।
भारत बिहार राज्य सिक्टाबाट विश्वप्रसिद्ध गढीमाई मन्दिर दर्शन गर्न आउने यात्रुसमेत ठगिएको पाइएको छ ।
करिब ५० किलोमिटर भारत बिहार सिक्टाका सुनिललाल साह तेली परिवारसँगै वीरगन्ज बस्ने आफन्तको ना६२प ९०८५ नम्बरको टीभीएस मोटरसाइकल लिएर गढीमाई दर्शन गर्न बिहानै ५ बजे आएको सुनाए ।
गढीमाई मन्दिर धेरै आशा गरेर दर्शन गर्न आएको उनकी पत्नी सीता देवीले बताइन् । दर्शन गरेर फर्कने क्रममा बिहान ७ बजे एक्कासि ट्राफिक प्रहरीले गाडी रोकेको उनी बताउँछिन् । ‘मोटरसाइकलको ब्लुबुक दियौं, लाइसेन्स नभएकाले नगद १ हजार माग गरे,’ उनले भनिन्, ‘घर जान ट्रेन छुट्ने हतार भएकाले पैसा दियौं तर रसिद दिन मानेनन् ।’ कुनै पनि हालतमा रसिद चाहिन्छ भनेपछि ती ट्राफिक प्रहरीले गाली गलौजसमेत गरे । केही नलाग्ने देखेपछि ५ सयको रसिद काटेर पैसा फिर्ता दिएर बैंकमा जम्मा गरेर रसिद लिएर आउन भनिएको उनले बताए ।
ट्राफिक प्रहरीले मागेको हजारको रसिद मागेकै कारण जरिमानाका नाममा करिब ३ घण्टाभन्दा बढी दौडाएको तेली दम्पतीको दुखेसो छ । ‘घुस रकम नदिँदा रसिद काट्ने र इन्ट्रीबिनै पैसा तिर्न पठाउने विभिन्न बहानामा दुःख दिने गरेको’ उनीहरूले सुनाए ।
ट्राफिक प्रहरीले गुडिरहेको सवारीसाधन चेकजाँच गर्नु सुरक्षा दृष्टिकोणले सराहनीय रहेको नागरिक समाज बारा अध्यक्ष उमेशलाल दास बताउँछन् । ब्लुबुक, लाइसेन्स, बिनाहेल्मटलगायतमा जरिमाना गर्नु राज्यको हितमा रहेको दासले बताए ।
‘इन्टरनेटको जमानामा अनलाइनबाट ठाउँको ठाउँ जे पनि हेर्न, अनलाइन सपिङ पेमेन्ट गर्न सकिने भएकाले नै सरकारले जरिमाना पनि अनलाइन गरेको मेरो बुझाइ छ,’ अध्यक्ष दास भन्छन् ।
ट्राफिक प्रहरीले बंैक खुल्ने समयबाहेक जरिमाना काट्यो भने सवारीधनीको एक मात्र विकल्प हुन्छ, अनलाइन पेमेन्ट । जरिमाना काट्नेबित्तिकै अनलाइन ‘इन्ट्री’ गरिदिँदा सवारीसाधनलाई बैंक कुद्ने झन्झटमुक्त हुने नागरिक समाज अध्यक्ष दास बताउँछन् ।
कलैया ट्राफिक इन्चार्ज छेम पंगेनी ‘प्राविधिक कारणवस त्यस्तो भुलचुक भएको’ स्विकार्छन् । आफूमातहतको प्रहरीले ‘कुनै किसिमको आर्थिक लेनदेन गरेको देखिए तुरुन्त कारबही प्रक्रिया अगाडि बढाउने’ प्रतिबद्धतासमेत उनले जनाए ।
त्यस्तै, वीरगन्ज भन्सार कार्यालय आईसीपी र सुक्खा बन्दरगाहबाट विभिन्न कलकरखानाका लागि कच्चा पदार्थ ढुवानी गर्ने सवारीसाधनबाट जरिमानाका नाममा असुली गरी प्रहरी उपरीक्षकसम्म पुग्ने गरेको बताइएको छ ।
वीरगन्ज पथलैया सडकखण्डमा चल्ने अधिकांश सवारीसाधन ओभरलोड, सडक पेटीमै पार्किङ गरेकाले नै दुर्घटना बढ्दै गरेको सिमराका मनोज साह बताउँछन् ।
मधेस प्रदेश ट्राफिक प्रहरी कार्यालय पथलैयाले आर्थिक वर्ष २०७९÷८० मा २६ करोडभन्दा बढी राजस्व संकलन गरेको मधेस प्रदेश ट्राफिक प्रहरी नायब उपरीक्षक माधव काफ्लेले जानकारी गराए । मधेस प्रदेशमै ५ हजार ९ सय ८८ सवारी दुर्घटना भएको पनि उनले जानकारी दिए । जसमा ८ हजार ३ सय ७६ सवारीसाधन क्षतिग्रस्त भएका छन् ।
आव २०७९–८० मा ५ सय ५६ जनाले सवारी दुर्घटनामा ज्यान गुमाए भने ९ हजार ६ सर ७० घाइते भएको काफ्लेले जानकारी दिए ।
काठमाडौं
– नेपाल प्रहरीका २६ जना कर्मचारी सम्पर्कविहीन (गैरहाजिर) रहेका पाइएको छ। लामो समयदेखि गैरहाजिर रहेको भन्दै प्रहरी प्रधान कार्यालयले सार्वजनिक सूचना नै जारी गरेको छ।
गैरहाजिर हुनेमा प्रहरी हवल्दार, सहायक हवल्दार, प्रहरी जवान र प्रहरी कार्यालय सहयोगी छन्। प्रहरी हवल्दार २ जना, सहायक हवल्दार ४ जना, प्रहरी जवान १७ जना र प्रहरी कार्यालय सहयोगी ३ जना गैरहाजिर रहेको प्रहरी प्रधान कार्यालयले जनाएको छ।
खोजतलास गराउँदा तथा प्रहरी नियमावली २०७१ को नियम ११५ को देहाय (२) बमोजिम प्रक्रिया पूरा गरी सूचना टाँस भइसक्दा समेत उनीहरु कार्यालयको सम्पर्कमा नआएको प्रहरी प्रधान कार्यालयले जनाएको छ।
प्रहरी प्रधान कार्यालयले आइतबार सूचना जारी गर्दै अबको ७ दिनभित्र (बाटोको म्याद बाहेक) आफू गैरहाजरिर रहनुको कारण खोली जवाफसहित उपस्थित हुन भनेको छ। उपस्थित नभएमा उनीहरुलाई सेवाबाट बर्खास्त गरिने प्रहरी प्रधान कार्यालयले जनाएको छ।
