काठमाडौं, ८ फागुन ।
साउदी अरेबियामा जारी पश्चिम एशिया फुटबल एसोसिएसन (वाफ) च्याम्पियनसिपमा नेपालले विजयी शुरुवात गरेको छ ।
समुह बी अन्तर्गत मंगलबार सम्पन्न पहिलो खेलमा नेपालले सिरियालाई ४-१ गोल अन्तरले पराजित गर्दै प्रतियोगितामा विजयी शुरुवात गरेको हो ।
नेपाली महिला फुटबल टिमले सिरियाविरुद्ध पहिलो हाफमा ३-१ को अग्रता लिएको थियो भने दोस्रो हाफमा एक गोल गरेको थियो ।
जेहादस्थित किंग अब्दुल्लाह स्पोर्ट्स सिटी स्टेडियममा जारी खेलमा नेपालका लागि अमिष कार्की, अनिता बस्नेत र सावित्रा भण्डारीले पहिलो हाफमा एक एक गोल गरेका थिए भने दोस्रो हाफको ६९औं मिनेटमा रेखा पौडेलले एक गोल थापेकी थिइन् । त्यस्तै नेपालले पहिलो हाफको अन्त्य तिर एक गोल खाएको थियो ।
यस प्रतियोगितामा नेपाल र गुआम आमन्त्रित टिमको रुपमा सहभागिता जनाइरहेका छन् । नेपाल रहेको समूह बि मा प्यालेस्टाइन, सिरिया र इराक रहेका छन् भने समुह ए मा आयोजक साउदी अरेबियासहित, गुआम, लेबनान र जोर्डन रहेका छन् ।
नेपालले अब दोस्रो खेलइराकविरुद्ध विहिबार खेल्ने तालिका रहेको छ । त्यस्तै समुह चरणको अन्तिम खेल आगामी शनिबार प्यालेस्टाइनसँग खेल्ने छ ।न्युज कारखाना
मस्को, ९ फागुन ।
सामाजिक सञ्जाल टविटर (एक्स) ले युलिया नवलनायाको खातालाई ब्लक गरिदिएको छ ।
उनका श्रीमान् अर्थात रुसी विपक्षी नेता एलेक्सी नाभाल्नीको मृत्यु पछि टविटर खाता खोलेकी थिइन, त्यसको एक दिनपछि नै उनको टविटरको खाता ब्लक गरिएको हो ।
युलिया नवलनाया, जसले वर्षौंसम्म आफूलाई राजनीतिक व्यक्तित्वको रूपमा प्रस्तुत नगरेको बताएकी थिइन तर सोमबार भने आफ्ना पतिले गर्दै आएको काम (राजनीति गर्ने) जारी राख्ने प्रतिबद्दता गर्दै रुसी राष्ट्रपति भ्लादिमिर पुटिनले आफ्नो श्रीमानको हत्या गरेको आरोप लगाएकी थिइन । जुन आरोप उनले टविटर खाताबाट पनि साझा गरेकी थिइन ।
उनको खाता सबैका लागि पहुँचयोग्य थियो, लगभग ५० मिनेट लामो सो भिडियो अपलोड गरे पछि स्पष्टीकरण बिना उनको खाता निलम्बन गरिएको जनाइएको छ । टविटरले सो साइटको प्रयोगको नियमहरूको लिङ्क समावेश गरेको थियो तर खाता निलम्बित भएको कारण निर्दिष्ट अझै गरेको छैन।
टविटरका नियम अनुसार सुरक्षा र गोपनीयता सरोकारहरू जस्तै घृणायुक्त भाषण वा निजी जानकारी साझा गर्ने, प्रामाणिकता र अप्रमाणीकरण जस्ता मुद्दाहरूको लागि निलम्बन गर्न सकिने र व्यक्तिहरूको नक्कल गर्ने खातालाइ निलम्बन गर्दै आएको छ ।
युलिया नवलनायाले सोमबार मात्रै खाता खोलेकी थिइन । नाभाल्नीका धेरै शीर्ष सहयोगीहरू र आधिकारिक खाताहरूले प्रमाणित गरे कि यो उनको त्यो वास्तविक खाता थियाे, जुन एक दिनमा नै ब्लक हुन पुग्याे ।
सोमबार मात्रै उनले प्लेटफर्ममा एक भावनात्मक भिडियो अपील पोस्ट गरेकी थिइन, जसमा पुतिनले नाभाल्नीलाई मारेको आरोप मात्रै लगाएकी थिइनन्, रूसी नागरिकहरूलाई क्रेमलिनको बिरूद्ध लड्न उनीसँग सामेल हुन आह्वानसमेत गरेकी थिइन् ।
निलम्बन हुनु केही घण्टा अघि उनले क्रेमलिनका प्रवक्ता दिमित्री पेस्कोभले पनि आक्रोशित प्रतिक्रिया पोस्ट गरेकी थिइन्, जब उनले पत्रकारहरूलाई उनको पतिको मृत्युमा पुटिनको संलग्नताको आरोप अभद्र र निराधार भएको भन्दै खण्डन गरेका थिइन ।
पछिल्लो दशकका लागि पुटिनका सबैभन्दा मुखर आलोचक नाभाल्नीको शुक्रबार आर्कटिक जेलको उपनिवेशमा मृत्यु भएको सरकारी मिडियाले जनाएका थिए, जहाँ उनी क्रेमलिनको बिरूद्ध अभियानको लागि व्यापक रूपमा सजायको रूपमा १९ वर्षको जेल सजाय भोगिरहेका थिए।न्युज कारखाना
मुम्बइ, ९ फागुन ।
बलिउड अभिनेत्री अनुष्का शर्मा र क्रिकेटर विराट कोहलीले छोरालाई जन्म दिएका छन् ।
मंगलबार साँझ अनुष्काले आफ्नो सामाजिक सञ्जाल इन्स्टाग्राममार्फत छोरा अकायको जन्म भएको घोषणा गरेकी थिइन्। अनुष्काले इन्स्टाग्राममा एक नोट सेयर गरेकी छिन्, जसमा फेब्रुअरी १५ मा सो बच्चाको जन्म भएको खुलासा गरिएको छ ।
उनको नोटमा लेखिएको थियो, ‘प्रचुर खुशी र हाम्रो मायाले भरिएको हृदयका साथ, हामी सबैलाई यो जानकारी गराउन पाउँदा खुसी छौं कि फेब्रुअरी १५ मा हामीले हाम्रो बच्चा अकाय र वामिकाको सानो भाइलाई यस संसारमा स्वागत गर्यौं । हामी हाम्रो जीवनको यो सुन्दर समयमा तपाईंको आशीर्वाद र शुभकामना चाहन्छौं। हामी तपाईंलाई यस समयमा हाम्रो गोपनीयताको सम्मान गर्न अनुरोध गर्दछौं। प्रेम र कृतज्ञता, विराट र अनुष्का।’
वलिउडका हस्तीहरू रणवीर सिंह, वाणी कपूर र अन्य धेरै सेलिब्रेटीहरूले पोस्टको कमेन्ट सेक्सनमा नयाँ अभिभावकलाई बधाई दिएका छन ।
विराट कोहली र अनुष्का शर्माले आफ्नो गर्भावस्थाको खबर गोप्य राखेका छन् । पहिलो पटकको विपरीत दम्पतीले आफ्नो आनन्द घोषणा गर्न पर्खिरहेका थिए।
दम्पतीले जनवरी २०२१ मा छोरी वामिकालाई स्वागत गरेका थिए । विराट र अनुष्काले धेरै वर्ष एक अर्कालाई डेट गरेपछि २०१७ मा विवाह गरेका हुन ।
न्युज कारखाना
नयाँ दिल्ली, ९ फागुन ।
भारतीय कांग्रेसकी पुर्व अध्यक्ष सोनिया गान्धी राज्यसभामा निर्बिरोध निर्वाचित भएकी छिन् ।
मंगलबार अबेर राजस्थानबाट सोनिया गान्धी राज्यसभाको लागि निर्विरोध चुनाव जितेकी जानकारी दिइएको हो । यसबाहेक भाजपाका चुन्नीलाल गरासिया र मदन राठौर पनि निर्विरोध निर्वाचित भएका छन् ।
भारतीय सञ्चारमाध्यमका अनुसार राज्यसभाका प्रमुख सचिव तथा राज्यसभाका निर्वाचन अधिकृत महावीर प्रसाद शर्माले राजस्थान–२०२४ को राज्यसभाको द्विवार्षिक निर्वाचनका लागि तीनै सिटमा तीनै उम्मेदवार निर्विरोध निर्वाचित भएको घोषणा गरेका हुन ।
वास्तवमा सो राज्यसभा चुनाव २०२४ को लागि राजस्थानमा तीन सिटका लागि चुनाव हुन लागेको थियो र तीन जना उम्मेदवारले मात्र उम्मेदवारी दर्ता गरेका थिए। मंगलबार निर्वाचनका लागि उम्मेदवारी फिर्ता लिने अन्तिम दिन थियो । कुनै पनि उम्मेदवारको नाम फिर्ता नआएपछि तीनै उम्मेदवार निर्वाचित भएका हुन ।
आवश्यक परेमा २७ फेब्रुअरीमा मतदान हुनेवाला थियो ।न्युज कारखाना
काठमाडौं, ९ फागुन ।
राष्ट्रिय प्रजातन्त्र पार्टीले आज सरकारलाइ ज्ञापन पत्र बुझाउँदैछ ।
संबैधानिक राजतन्त्र, हिन्दु राष्ट्र र संङघीयता खारेजीको माग गर्दै राप्रपाले आज सरकारलाइ ज्ञापन पत्र बुझाउन लागेको हो ।
राप्रपा प्रचार बिभाग प्रमुख मोहनकुमार श्रेष्ठका अनुसार प्रधानमन्त्री पुष्पकमल दाहालसहित देशका सबै जिल्लामा प्रमुख जिल्ला अधिकारीमार्फत सरकारलाई विभिन्न माग सहितको ज्ञापनपत्र बुझाउॅन लागेको हो ।
राप्रपाले सरकारलाइ आफना माग राख्दै चरणबद्द आन्दोलनको तयारीमा रहेको छ । न्युज कारखाना
काठमाडौं, ९ फागुन ।
नेकपा एमालेको केन्द्रीय कमिटी बैठक जारी रहेको छ ।
हिजो देखी सुरू भएको केन्द्रिय समितिको सातौं बैठकमा ६ वटा अजेन्डामाथी छलफल जारी राखिएको छ ।
अध्यक्ष केपी शर्मा ओलीले उदघाटन मन्तब्य दिएको सो केन्द्रिय समिति बैठकमा समसामयिक राजनीतिक अवस्थाको बारेमा सम्बोधन गरेका हुन ।
यसैगरी जारी बैठकमा सांगठनिक कामको समीक्षा, शुद्धीकरण तथा सुदृढीकरण कार्यक्रमको अवधारणा, जनआधारित कार्यकर्ता पार्टी निर्माणमा देखिएको समस्या र समाधानको उपाय, जनपरिचालनसहित समसमायिक राजनीतिक प्रस्तावबारे छलफल हुदैँछ ।
गत फागुन ३ गते बसेको सचिवालय बैठकले केन्द्रीय कमिटी बैठक आह्वान गरे अनुसार हिजोबाट केन्द्रिय समिति बैठक सुरू भएको हो ।न्युज कारखाना
काठमाडौं, ९ फागुन ।
नेपाली कांग्रेसको महासमिति बैठक आज पनि जारी रहने छ ।
गत सोमवार देखी सुरू भएको महासमिति बैठकमा हिजो पाँचवटा प्रतिवेदन पेश गरिएको थियो । बैठक गोदावरीमा जारी रहने छ ।
महासमिति बैठक दोस्रो दिन पाँच वटा प्रतिवेदन पेश गरिएको प्रचार बिभाग प्रमुख मीनबहादुर विश्वकर्माले जानकारी दिएका छन । हिजोका बैठकको सुरुमा उपसभापति तथा उपप्रधान तथा रक्षमन्त्री पूर्णबहादुर खड्काले नीति प्रस्ताव पेश गरेका थिए भने महामन्त्री गगन थापाले सांगठनिक प्रस्ताव र अर्का महामन्त्री विश्वप्रकाश शर्माले समसामयीक राजनीतिक प्रतिवेदन पेश गरेका छन ।
पार्टी प्रवक्ता तथा अर्थमन्त्री डा. प्रकाशरण महतले नेपालको वर्तमान आर्थिक अवस्था, संभावना र भावी दिशासम्बन्धी प्रतिवेदन र लेखा समिति संयोजक श्यामकुमार घिमिरेले पेश गरेको लेखा परीक्षण प्रतिवेदन माथी आजबाट छलफल सुरू हुनेछ ।
समुहगत रूपमा पाँच प्रतिवेदन माथी आजबाट छलफल हुने कांग्रेसले जनाएको छ । महासमिति बैठक फागुन १० सम्म जारी रहने छ ।
न्युज कारखाना
काठमाडौं, ९ फागुन ।
हाल नेपालमा पश्चिमी निम्न चापीय प्रणालीको प्रभाव रहेको छ।
जल तथा मौसम विज्ञान विभाग, मौसम पूर्वानुमान महाशाखाका अनुसार गण्डकी, कर्णाली र सुदूरपश्चिम प्रदेश लगायत देशका पहाडी भू-भागमा आंशिक देखि साधारणतया बदली रही बाँकी भू-भागमा मौसम मुख्यतया सफा रहेको छ। गण्डकी प्रदेश र कर्णाली प्रदेशको थोरै स्थानहरुमा हल्का वर्षा भैरहेको अवस्था छ ।
दिउँसो देशभर आंशिक देखि साधारणतया बदली रहने छ। मधेश प्रदेश लगायत देशका पहाडी भू-भागका थोरै स्थानहरूमा मेघ गर्जन र चटयाङसहित हल्का वर्षाको सम्भावना रहेको छ। सुदूरपश्चिम प्रदेश ,कर्णाली प्रदेश र गण्डकी प्रदेशका उच्च पहाडी तथा हिमाली भू-भागका केही स्थानहरूमा हल्का देखि मध्यम हिमपातको साथै बाँकी उच्च पहाडी तथा हिमाली भू-भागका थोरै स्थानहरूमा हल्का हिमपातको सम्भावना रहेको छ।
राती भने देशभर आंशिक देखि साधारणतया बदली रहने छ। सुदूरपश्चिम प्रदेश, कर्णाली प्रदेश र मधेश प्रदेशका थोरै स्थानहरूमा तथा देशका बाँकी पहाडी भू-भागका एक वा दुई स्थानमा मेघ गर्जन र चटयाङसहित हल्का वर्षाको सम्भावना रहेको छ। सुदूरपश्चिम प्रदेश र कर्णाली प्रदेशका उच्च पहाडी तथा हिमाली भू-भागका केही स्थानहरूमा र बाँकी उच्च पहाडी तथा हिमाली भू-भागका थोरै स्थानहरुमा हल्का हिमपातको सम्भावना रहेको छ।
मधेश प्रदेश लगायत देशका पहाडी भू-भागका थोरै स्थानहरूमा मेघ गर्जन र चटयाङसहित हल्का देखि मध्यम वर्षाको सम्भावना र देशका उच्च पहाडी तथा हिमाली भू-भागका केही स्थानहरूमा हल्का देखि मध्यम हिमपातको सम्भावना रहेकोले यस प्रणालीका कारण हुने वर्षा, हिमपात तथा चिसोका कारण दैनिक जनजीवन लगायत कृषि, स्वास्थ्य, पर्यटन, पर्वतारोहण, सडक तथा हवाई यातायात असर पर्न सक्ने देखिएकोले आवश्यक सतर्कता अपनाउन महाशाखाले अनुरोध गरेको छ ।न्युज कारखाना
आजमिति २०८० साल फागुन ९ गते तदअनुसार फ्रेब्रुअरी २१, सन् २०२४ बुधवार, शुक्लपक्षको द्वादशी/त्रयोदशी तिथि, पुनर्वसु नक्षत्र, सौभाग्य योग, मिथुन राशिमा चन्द्रमा, यो योगमा गरिने कार्य शुभ हुनेछ।
अभिजित् मुहूर्त: बिहान ११:५६ देखि १२:४१ सम्म,
• काठमाण्डौमा सुर्योदय: बिहान ०६:३७
• सुर्यास्त: बेलुका ०५:५९ बजे
मेष: आफ्नो वरपर कसैसँग अप्रत्याशित साझा आधार फेला पार्न जाँदै हुनुहुन्छ। तपाईंले अरूलाई न्याय गर्ने दिन छ । तपाईं आफैंमा धेरै कठोर हुनुहुन्छ र आफ्नो थकानका बेवास्ता नगर्नूहोला । प्रेम तथा परिवारको विषयमा गम्भीरतापूर्वक निर्णय लिन गाह्रो हुनेछ र यो तपाईको वरपरका मानिसहरूले तपाईको प्रशंसा गर्नेछन्।
शूभ रङः पहेलाे
अंक: ३
वृषः • आज तपाईंको सम्बन्ध बिस्तारै विकास गर्ने क्षण हो। प्रगतिको लागि तपाईको भाग्यले साथ दिनेछ । आफ्नो प्रेम तथा परिवारमा मनहरू जोड्नुहोस्, तपाईं सही मार्गमा हुनुहुनेछ ।
शुभ रङः हरयाे
अंक : ६
मिथुनः तपाईको वरपरको सम्बन्धमा भएको विकासले तपाईलाई आन्तरिक कल्याणको अनुभूति दिनेछ। तपाईं मित्रबाट हृदयमा न्यानोपन पाउनुहुनेछ। कसरत लिन आवश्यक छ। यसका लागि केही समय छुट्याउनुहोस्। तपाईंसँग प्रेम तथा परिवार जटिलताहरूबाट बच्न निरन्तर सम्पर्कमा रहनूहोस।
शुभ रङः सेताे
अंक: ५
कर्कटः आज तपाईं आफैंमा पूर्ण रूपमा खुसी हुनुहुन्छ र तपाईंले जीवन सन्तुलन स्थापना गर्दै हुनुहुन्छ। आज गरिएका कामहरू संघर्षमा साथ सफल हुनेछन् । विशेष गरी लगनशीलताको हुन आवश्यक छ ।
शुभ रङः निलाे
अंकः २
सिंहः आज तपाइँ तपाइँको दिमागमा भएको कुरा व्यक्त गर्न पूर्ण रूपमा स्वतन्त्र हुनुहुनेछ, र यसले सकारात्मक परिणामहरू पाउनेछ। स्वास्थ्यमा सामान्समस्या आउनसक्छ । आफ्नो स्वास्थ्य आफैले जाँच गर्नुहोस्, र रातो फल खानुहोस्। प्रेम तथा परिवारको लागि तपाईं सामान्य भन्दा बढी लापरवाह हुनुहुनेछ। ध्यान दिनुहोला ।
शुभ रङः सुन
अंक: १
कन्याः तपाईंको स्पष्टताले तपाईंलाई धेरै उपयोगी बनाउनेछ, त्यसैले आफ्नो विचार व्यक्त गर्न नहिचकिचाउनुहोस्, तपाईंको यथार्थवाद असफल हुनेछैन। तपाईंले आफ्नो दिमाग प्रयोग गर्ने काममा आफूलाई डुबाउन सजिलो पाउनुहुनेछ। प्रेम तथा परिवारको भविष्यका लागि केही स्वस्थ निर्णयहरू लिनुहुन्छ।
शुभ रङः हरियाे
अंक: ५
तुलाः आज तपाईको उर्जाले तपाईलाई आन्तरिक संवाद र आदान प्रदानतर्फ धकेलिरहेको छ जसले तपाईको हृदयलाई न्यानो पार्छ र तपाईको मनोबल बढ्नेछ । प्रेम तथा परिवारको आलोचनाहरूलाई अनुमोदन गर्नुहोस । यी तपाइँको क्षमता को लागी एक हतियार हनेछ र तपाइँलाई अगाडि धकेल्नेछ।
शुभ रङः कालाे
अंक: ८
वृश्चिकः तपाईंले तपाईंको वरपरका मानिसहरूबाट प्रशंसा कमाउनुहुनेछ र तपाईंको बाटोमा केही पनि खडा हुनेछैन। आज विजय तपाईको पक्षमा हुनेछ । धेर्यता तथा हनुमान भक्त हुन आवश्यक छ । प्रेम तथा परिवारको लागि तपाईंको विश्वास र आत्मविश्वासले तपाईंलाई अगाडि बढाउँछ। आज तपाईंलाई आफ्नो विचारहरू र आदानप्रदानमा धकेल्न सक्षम बनाउँछ।
शुभ रङः राताे
अंक: ९
धनुः आज दिन राम्रो छ । कामहरू हतारमा निर्णय नलिनु होला । साथि परिवारसँग प्रेम प्रगाढ हुनेछ । प्रेमी वा जीवनसाथिको स्वास्थ्यमा सामान्य समस्या देखिन सक्छ ।
शुभ रङः पहेँलाे
अंकः ३
मकरः समग्रमा आज दिन मध्यम छ । रिस्कको काममा सफलता हुन सक्छ । तर स्वास्थ्यमा ध्यान दिनुहोला । सवारी चलाउँदा सावधानी अपनाउनुहोला। प्रेममा सामान्य मतभेद हुनसक्छ । अर्को दिन पुन मिल्न हुने भएकोले बोल्न निर्णय आज नगर्दा राम्रो हुनेछ ।
शुभ रङः कालाे
अंक: ८
कुम्भः धर्ममा मन जानेछ । भाग्यले आशा देखाउनेछ । परिवारको प्रेम मिल्नेछ । स्वास्थ्य मा सामान्य धन खर्च हुनेछ । आजको दिन राम्रो छ ।
शुभ रङः निलाे
अंक: ४
मीनः काममा लापरवाह नगर्नुहोला । स्वास्थ्यमा सुधार महसुस हुनेछ । साथिभाईको सहयोग मिल्नेछ । प्रेम तथा परिवारमा खर्च हुनेछ । समग्रमा दिन मध्यम छ ।
शुभ रङः सेताे
अंक: ७
राशिफलमा राम्रो नराम्रो जे लेखेको भएका पनि तपाई आफ्नो नियमित कार्यबाट विचलित नहुनुहोला । राशिफल भनेको तपाईँको जन्मकुण्डलीमा रहेको चन्द्रमाको राशिलाई लिएर हाल भएका ग्रहहरूको अबस्थालाई हेरेर तयार गरिएको हुन्छ । जन्म कुण्डलीको अन्य आठ ग्रहको अवस्था युती, दृष्टि, भाव, उच्च, नीच, आदि कुराहरूले फरक पर्न सक्छ । निर्णय गर्दा तपाईंको आफ्नै अन्तर्ज्ञान र निर्णय प्रयोग गर्न सधैं महत्त्वपूर्ण छ।
(राशिफल लेखक युवा ज्योतिष जनक खड्का, वैदिक ज्योतिषका विज्ञ मानिन्छन् उनि ज्योतिष परामर्श केन्द्रको सञ्चालक समेत हुन्, सल्लाह, सुझाव र परामर्शको लागि: ९७६६८९५२१३)
तपाईंको दिन राम्रो र सुखद होस् भन्ने आशाका साथ शुभकामना ।न्युज कारखाना
रौतहट ८ फागुन ।
पछिल्लो केही दिनदेखि रौतहटमा देखिएको दुई समुदायबीचको तनाव हटाएर सद्भाव कायम राख्न चौतर्फी पहल सुरु भएको छ । दुवै समुदायको भएको क्षतिको पूर्ति दिलाउन जनप्रतिनिधिदेखि स्थानीय प्रशासन पूर्ण रूपमा प्रयासरत देखिएका छन् ।
ईशनाथ नगरपालिकास्थित भएको क्षतिबारे बुझ्न स्थानीय प्रशासनले मंगलवार स्थलगत अनुगमन निरीक्षण गरेको छ । सरस्वती माताको मूर्ति विसर्जन गर्ने विषयमा ईशनाथ–७ घिउरा गाउँमा दुई समुदायबीच झडप भएको थियो । हिन्दू समुदायका मानिसले मूर्ति विसर्जनको लागि शनिबार लागिरहेको ट्याक्टर, डिजे बाजा मुस्लिम समुदायका मानिसले तोडफोड गर्नुका साथै घरको छतबाट प्रहार गरेको ढुंगाले कैयौंलाई चोटपटक लागेको थियो। सोही घटनाको बदला स्वरूप भोलिपल्ट गत आइतबार हिन्दु युवाहरुले ईशनाथ–२ औरैया गाउँस्थित रहेको मुस्लिमहरूको मस्जिदमाथि चढेर माइक सेट तोडफोड गरेको थियो । रौतहट क्षेत्र २ का संघीय सांसद किरण कुमार साहको सुझावअनुसार मंगलबार स्थानीय प्रशासनले उक्त क्षतिबारे वास्तविक बुझ्न स्थलगत अनुगमन निरीक्षण गरेको हो ।
अनुगमन टोलीमा सांसद किरण साह, प्रमुख जिल्ला अधिकारी (सिडिओ) हिरालाल रेग्मी, एसपी महेन्द्र श्रेष्ठको सहभागिता थियो । निरीक्षणको क्रममा उक्त घटनाहरुमा भएको क्षतिको ईशनाथ नगरपालिकाले तत्काल पूर्ति गर्ने सहमति भएको एसपी श्रेष्ठले बताए ।
निरीक्षणपश्चात सांसद साहसहित प्रशासन प्रमुखहरु दुवै समुदायका अगुवासँगै स्थानीयहरुलाई राखेर सद्भाव कायम राख्नेबारे बृहत छलफल भएको थियो । छलफलमा हिन्दू र मुस्लिम अगुवाका साथै सहभागी जनप्रतिनिधिले आआफ्नो समुदायका मानिसलाई सम्झाइबुझाइ अब सबै मानिस मिलेर सौहार्दपूर्ण बस्ने प्रतिवद्धता जनाएका थिए ।
हिन्दू मुस्लिमबीच पुरै भाइचारा निर्वाह गर्ने कुनै सामाजिक समस्या देखिएमा दुवै समुदायका मानिस बसेर छलफल गरी समाधान निकाल्नेसमेत सहमति भएको एसपी श्रेष्ठले जानकारी दिए ।
यसअघि गत शनिबार सरस्वतीको मूर्ति विसर्जनको विषयमा अवस्था तनावग्रस्त हुँदा सिडिओ रेग्मीले अनिश्चितकालीन कर्फ्यु आदेश जारी गरेका थिए । ईशनाथ नगरपालिका वडा २, ३, ४, ५, ६ र ७ मा समेत अनिश्चितकालीन कर्फ्यू आदेश जारी गरेका थिए । कर्फ्यू हालसम्म यथावत छ । एसपी श्रेष्ठले त्यहाँको अवस्थाअनुसार परिचालित प्रहरी घटाउँदै जाने र जिल्ला सुरक्षा समितिको निर्णयअनुसार कर्फ्यू पनि हटाइने जानकारी दिए ।
सो क्षेत्रमा थप अप्रिय हुन नदिन मधेश प्रदेश प्रहरी प्रमुख डिआईजी यज्ञविनोद पोखरेल, सशस्त्र प्रहरीका डीआईजी दीपेन्द्र साह, राष्ट्रिय अनुसन्धानका डिआईजी सञ्जय यादवसँगै २०० सशस्त्र र ५०० नेपाल प्रहरी गरी ७०० प्रहरी परिचालन गरिएको थियो ।
सांसद साहसँगै अन्य जनप्रतिनिधि, तीनैजना डिआईजीसहित दुवै समुदायका अगुवाहरू मिलेर सोमबार ईशनाथ–७ घिउरा गाउँ छेउको सार्वजनिक पोखरीमा मूर्ति विसर्जनको गरेका थिए । जिल्ला प्रहरी कार्यालय रौतहटले सामाजिक सद्भाव बिग्रिने किसिमको कुनै पनि सामग्री सामाजिक सञ्जालमा नराख्ने आग्रह गर्दै आएको छ ।
न्युज कारखाना
