काठमाडौं, २२ फागुन ।

राप्रपा नेपालको केन्द्रीय कार्य सम्पादन समितिको बैठक आज बस्ने भएको छ ।

आज दिउँसो १:०० बजे बस्ने तय भएको बैठकमा मुलुकमा विकसित पछिल्लो राजनीतिक घटनाक्रम र परिदृष्य, आन्दोलनको तयारी , बृहत् मोर्चा निर्माण ,संगठन सुदृढीकरण योजना ,प्रशिक्षण कार्यक्रम र सकृय सदस्यता बितरण अभियानका बारेमा छलफल हुने पार्टीका महामन्त्री राजाराम बर्तौलाले जानकारी दिए ।

बैठकमा पार्टी अध्यक्ष कमल थापाले विकसित पछिल्लो राजनीतिक घटनाक्रमको बारेमा धारणा राख्नुहुनेछ भने जिल्ला भ्रमण र प्रशिक्षण कार्यक्रमको कार्यतालिका पनि तय गरिने पार्टीले जनाएको छ ।न्युज करखाना

काठमाडौ, फागुन २२ ।

नेपाल राष्ट्र बैंकले मंगलबारका लागि विदेशी मुद्राको विनिमयदर सार्वजनिक गरेको छ ।

जसअनुसार भारतीय रूपैयाँ १०० को खरिद दर १६० रूपैयाँ हुदाँ बिक्री दर १६०.१५ पैसा कायम गरिएको छ । आज अमेरिकी डलरको भाउ सामान्य घट्यो युरो र बेलायती पाउण्डको भाउ भने बढेको छ ।

नेपाल राष्ट्र बैंकले सार्वजनिक गरेको विनिमय दर अनुसार मंगलबार अमेरिकी डलर एकको खरिददर १३२ रूपैयाँ ३३ पैसा र बिक्रीदर १३२ रूपैयाँ ९३ पैसा कायम गरिएको छ । सोमबार अमेरिकी डलरको खरिददर १३२ रूपैयाँ ३५ पैसा र बिक्रीदर १३२ रूपैयाँ ९५पैसामा कारोबार भएको थियो ।

मंगलबार युरोपियन युरोको एकको खरिददर १४३ रूपैयाँ ६२ पैसा र बिक्रीदर १४४ रूपैयाँ २८ पैसा तोकिएको छ। यो मूल्य अघिल्लो दिनको तुलनामा १७ पैसाले बढेको हो। सोमबार यसको खरिददर १४३ रूपैयाँ ४५ पैसा र बिक्रीदर १४४ रूपैयाँ १० पैसामा कारोबार भएको थियो ।

त्यस्तै, बेलायती पाउण्ड सटर्लिङको भाउ २२ पैसाले बढेर एकको खरिददर १६७ रूपैयाँ ७० पैसा र बिक्रीदर १६८ रूपैयाँ ४६ पैसा कायम गरिएको छ । सोमबार यसको खरिददर १६७ रूपैयाँ ४५ पैसा र बिक्रीदर १६८ रूपैयाँ २१ पैसामा कारोबार भएको थियो ।

यता, अष्ट्रेलियन डलर एकको खरिददर भने ८६ रूपैयाँ २९ र बिक्रीदर ८६ रूपैयाँ ६८ पैसा र क्यानेडियन डलर एकको खरिददर भने ९७ रूपैयाँ ५६ पैसा र बिक्रीमा ९८ रूपैयाँ कायम गरिएको छ ।

उता, जापानी येन १० को खरिददर ८ रूपैयाँ ८० पैसा कायम हुदाँ बिक्री दर भने ८ रूपैयाँ ८४ रहेको छ । चाइनिज युआन एकको खरिददर १८ रूपैयाँ ३८ पैसा तथा बिक्री दर १८ रूपैयाँ ४६ पैसा तथा दक्षिण कोरिया वन १०० को खरिददर ९ रूपैयाँ ९४ पैसा तथा बिक्री दर ९ रुपैयाँ ९८ पैसा कायम गरेको जनाइएको छ ।

यसैगरी, मंगलबार कतारी रियाल एकको खरिदमूल्य ३६ रूपैयाँ २९ पैसा र बिक्रीमूल्य ३६ रूपैयाँ ४५ पैसा कायम गरेको राष्ट्र बैंकले साउदी अरेबियन रियाल एकको खरिददर ३५ रूपैयाँ २८ पैसा र बिक्रीमूल्य ३५ रूपैयाँ ४४ पैसा, युएई दिराम एकको खरिददर ३६ रूपैयाँ ०३ पैसा र बिक्रीदर ३६ रूपैयाँ १९ पैसा तथा मलेसियन रिंगिट एकको खरिददर मंगलबार २८ रूपैयाँ ०२ पैसा र बिक्रीदर २८ रूपैयाँ १४ पैसा कायम गरेको छ ।

साथै, कुवेती दिनार एकको खरिददर ४३० रूपैयाँ २० पैसा र बिक्रीदर ४३२ रूपैयाँ १५ पैसा र बहराइन दिनार एकको खरिददर ३५१ रूपैयाँ ०२ पैसा र बिक्रीदर ३५२ रूपैयाँ ६१ पैसा तोकिएको राष्ट्र बैंकले जनाएको छ ।न्युज करखाना

मुम्बइ, २२ फागुन ।

अजय देवगन र आर माधवन यतिबेला आफ्नो आगामी फिल्म ‘शैतान’लाई लिएर चर्चामा छन् । यो फिल्म छिट्टै हलमा रिलिज हुँदैछ ।

फिल्मको ट्रेलर निकै आकर्षक छ । तर के तपाईलाई थाहा छ यो फिल्मका लागि फिल्मका स्टार कास्टले कति पैसा पारिश्रमिक लिए ? त्यो हामी बताउने छौं ।

सबैभन्दा पहिले मुख्य अभिनेता अजय देवगनको कुरा गरौं, उनले फिल्मका लागि ठूलो रकम लिएका छन । भारतीय सञ्चारमाध्यका अनुसार अजयले यो फिल्मका लागि २५ करोड भारु लिएका छन् ।

फिल्मको ट्रेलरमा आर माधवन निकै डरलाग्दो देखिएका छन् । अभिनेता पनि मुख्य भूमिकामा छन् । माधवनले फिल्मका लागि १० करोड पारिश्रमिक लिएको बताइएको छ ।

फिल्ममा साउथ अभिनेत्री ज्योतिकाको पनि महत्वपूर्ण भूमिका छ । अभिनेत्री शैतानका लागि ५ करोड भारु पारिश्रमिक लिइएको छ । यो फिल्ममा जानकी बोडिवालाले अजय देवगनकी छोरीको भूमिका निभाएकी छिन् । जानकीमा मात्रै कालो जादू हुन्छ । जानकीले यो फिल्मका लागि २–३ करोड भारु लिएकी छिन् ।

शैतान फिल्म कालो जादूमा बनेको हो । फिल्ममा आर माधवन तान्त्रिकको भूमिकामा छन् । फिल्म थ्रिलर र हररले भरिपूर्ण छ । हालै फिल्मको ट्रेलर सार्वजनिक भएको छ, जसलाई निकै रुचाइएको छ । यो फिल्ममा अजय देवगन र आर माधवन पहिलो पटक स्क्रिन सेयर गर्दैछन् ।

अजय र माधवनको यो फिल्म मार्च ८ मा हलमा रिलिज हुँदैछ । फ्यानहरु पनि यसको प्रतिक्षामा छन् ।न्युज करखाना

मोरङ, २२ फागुन ।

मोरङ्गको पथरीशनिश्चरे नगरपालिका वडा नम्बर ७ लामाटोलस्थित एक बालिकाको अज्ञात व्यक्तिले रातको करिब १० बजे तिर घाँटीमा धारिलो हतियार प्रहार गरी विभत्स हत्या गरेको छ।

खोटाङ जिल्ला एसेलुखर्क गाउँपालिका वडा नम्बर ६ स्थायी घर भएकी १५ वर्षीया ज्ञानुमती राईको हत्या गरिएको हो। दुई वर्ष अगाडीदेखि फुपूको छोरा दाजु पर्नेको घरमा बसेर पञ्चायत माविमा कक्षा ७ मा अध्ययन गर्दै आएकी बालिकाको टाउको र शरीर छुट्टिने गरी हत्या भएको प्रहरीले जनाएको छ।

अहिले घटनास्थलमा इलाका प्रहरी कार्यालयको टोली तथा मोरङ जिल्ला प्रहरी प्रमुख प्रहरी वरिष्ठउपरीक्षक नवराज कार्की पनि आइपुगेका छन्। घट्नाको अवस्था जटिल रहेको र हत्यारा अहिलेसम्म पत्ता लाग्नु नसकेकोले तालिम प्राप्त कुकुर कोशी अञ्चल प्रहरी कार्यालय धरानबाट (के नाइन) कुकुर ल्याएर घटनास्थलको थप अनुसन्धान जारी रहेको प्रहरीले जनाएको छ।न्युज करखाना

मुम्बइ, २२ फागुन ।

अक्षय कुमार छिट्टै फिल्म ‘बडे मियाँ छोटे मियाँ’ मा देखिदैँ छन् ।

यस्तो अवस्थामा कोरियोग्राफर बोस्को मार्टिसले अक्षय कुमारले सेटमा ल्याएको अनुशासनको बारेमा कुरा गरेका छन् । उनले शारीरिक समस्याका बाबजुद पनि काम गर्ने र पूरा गर्ने क्षमता कलाकारको रूपमा अक्षयकुमार रहेको भन्दै तारिफ गरेका छन ।

कोरियोग्राफर बोस्को मार्टिसले फिल्म ‘बडे मियाँ छोटे मियाँ’का गीतको कोरियोग्राफी गरेका हुन् । सिद्धार्थ काननसँगको अन्तर्वार्तामा उनले भने– ‘उनीसँग काम गर्ने अनुभव गजबको छ । उहाँसँग काम गर्दा उहाँले ठूलो सुझाव दिनुहुन्छ। कहिलेकाहीँ म तिनीहरूको कुरा सुन्छु, कहिलेकाहीँ म गर्दैन। कहिलेकाहीँ म उहाँका सुझावहरू पछ्याउँछु, कहिलेकाहीँ म गर्दिनँ।’

बोस्को मार्टिसले अगाडी भने, ‘उनी ८ घण्टा कडाईका साथ काम गर्छन्। तर त्यो आठ घण्टामा उनी सेटमा नै रहन्छन् । शिफ्ट सकिएपछि उनले मलाई सोध्यो, के म घर जान सक्छु ? मेरा सन्तान तिम्रा सन्तान होइनन् ?’

तर अक्षय कुमारको सबैभन्दा राम्रो कुरा उनको कामप्रतिको लगाव हो। मलाई याद छ कि उनी जोर्डन शूटको लागि पूर्ण रूपमा फिट थिएनन्। अक्षय अस्वस्थ थिए, जसका कारण उनले अभ्यास पनि गरेनन् । अक्षयलाई १०१–१०२ ज्वरो आएको थियो । तर पनि उनले बिना विराम निरन्तर नाँचिरहेका थिए । हामीले ४ डिग्री तापक्रममा एकपछि अर्को गरी चारवटा गीत खिच्यौँ । चिसो हावा चलिरहेको थियो । त्यहाँ उपस्थित नर्तकहरूले पनि थप ख्याल गर्नुपर्थ्यो। तर अक्षय सरले नाच्न जारी राखे । उसलाई पनि चिसो लागेको देखेँ । तर उनी स्टील हुन् ।’

बोस्कोले अक्षयले सेटमा मनोरञ्जन गर्ने गरेको बताए । उनी प्रायः सह–अभिनेता टाइगर श्राफसँग १० रुपैयाँ पुरस्कारका लागि खेल खेल्थे। साँझ सुटिङ सके पछि अक्षय भलिबल खेल्न जान्थे । हामी सबै आफ्नो कोठामा थकित भएर बस्थ्यौं तर अक्षयले हामीलाई भलिबल खेल्न बोलाउने गर्दथे । जब सेटमा आउनुभयो, धेरै उर्जा ल्याउनुभयो ।’
न्युज करखाना

काठमाडौं, २२ फागुन ।

मौरिससमा शिवरात्री अघि धार्मिक कार्यक्रमका क्रममा आगलागी हुँदा ६ भक्तजनको मृत्यु भएको छ ।

सो घटनमा परी अन्य धेरै मानिस घाइते भएका भारतीय सञ्चारमाध्यमले लेखेका छन ।

मौरिससका प्रहरी आयुक्त अनिलकुमार दीपले भने– ‘शिवरात्रि अघि  भक्तजनहरु पैदल हिँड्दै ग्राण्ड बेसिन तालमा पुगेका थिए । यी मानिसहरू काठ र बाँसले बनेको गाडामा देवताका मूर्तिहरू बोकेर तालतिर जाँदै थिए। उक्त गाडी खुला विद्युतीय तारसँग सम्पर्कमा आएर आगलागी भएको हो ।’

ग्रान्ड बेसिन ताललाई पूर्वी अफ्रिकी देश मौरिससका हिन्दू समुदायले पवित्र स्थल मान्दछन् ।

हिन्दू धर्म अफ्रिकी देश मौरिससको सबैभन्दा ठूलो धर्म हो। सन २०२१ को जनगणना अनुसार, यहाँ लगभग ४५ प्रतिशत जनसंख्या हिन्दूको छ । यो अफ्रिकाको एक मात्र देश हो, जहाँ यति ठूलो संख्यामा हिन्दुहरू बस्छन्। विश्व स्तरमा हेर्दा हिन्दुहरुको जनसंख्याको हिसाबले भारत र नेपाल पछि मरिससको नाम आउँछ ।न्युज करखाना

काठमाडौं, २२ फागुन ।

इङलिश प्रिमियर लिग अन्तर्गत आर्सनलले शेफिल्ड युनाइटेडलाई फराकिलो अन्तरले पराजित गरेको छ । गएराती सम्पन्न खेलमा आर्सनलले शेफिल्डलाई ६-० गोल अन्तरले पराजित गरेको हो ।

आर्सनलको जितमा मार्टिन ओडेगार्ड, गाब्रियल मार्टिनेली, काइ हाभेर्ट, डेकन राइस र बेन ह्वाइटले एक एक गोल गरेका थिए । त्यस्तै एक गोल शेफिल्डका जयडेन बोगीले आत्मघाती गोल गरेका थिए ।

यो जितपछि आर्सनलको २७ खेलमा ६१ अंक भएको छ र लिगमा तेस्रो स्थानमा रहेको छ । आर्सनल दोस्रो स्थानमा रहेको म्यानचेस्टर सिटी भन्दा एक अंकले र शिर्ष स्थानमा रहेको लिभरपुल भन्दा २ अंकले पछाडी रहेको छ ।

त्यसैगरी शेफिल्ड युनाइटेडको भने यस सिजनमा यो २०औं हार हो । २७ खेलमा १३ अंक मात्र रहेको शेफिल्ड लिगको पुछारमा रहेको छ ।न्युज करखाना

मस्काे, २१ फागुन ।

हालै सार्बजनिक भएकाे जर्मन सैन्य अधिकारीहरूको एक ‘वायरट्याप रेकर्डिङ’ले पश्चिमी देशहरू युक्रेनको द्वन्द्वमा भाग लिइरहेकाे खुलेकाे छ ।

त्यसपछि मस्कोले जर्मन राजदूतलाई मन्त्रालयमा बोलाएर साेधपुछ गरेकाे छ ।  अघिल्लो दिन भने जर्मनीले सोशल मिडियामार्फत साे रेकर्डिङ जारी गर्नु जर्मनीलाई ‘अस्थिर गर्ने प्रयास’को एक हिस्सा भन्दै अस्विकार गरेकाे थियाे ।

तर, क्रेमलिनका प्रवक्ता दिमित्री पेस्कोभले भने कि युक्रेनले रूसी लक्ष्यहरूमा प्रहार गर्न जर्मन निर्मित टोरस मिसाइलहरूको सम्भावित प्रयोग बारे सैन्य अधिकारीहरू बीचको छलफल गरेकाे सुनिएकाे छ । युक्रेनको द्वन्द्वमा पश्चिमा राष्ट्रकाे प्रत्यक्ष संलग्नतालाई पुनः प्रमाणित भएकाे भन्दै मस्काेले जर्मन राजदुतलाइ मन्त्रालयमा बाेलाएकाे हाे ।

रुसी राज्य सञ्चालित एजेन्सी आरआईए नोवोस्तीले जर्मनीका राजदूत अलेक्ज्याण्डर ग्राफ ल्याम्ब्सडोर्फ मस्कोको विदेश मन्त्रालयमा आइपुगेको भिडियो प्रकाशित गरेकाे छ । तर, रूसी पत्रकारहरूको प्रश्नको जवाफ दिन जर्मन राजदुतले अस्वीकार गरेका छन ।

त्यसपछि ‘जर्मन राजदूतलाई क्राइमियाबारे जर्मन अधिकारीहरूको सार्वजनिक कुराकानीको सम्बन्धमा बुझ्न बोलाइएको थियो,’ आरआईएले भन्यो।

साे अडियाे रेकर्डिङ ३८ मिनेट लामाे थियाे, जुन  रेकर्डिङ रुसी सामाजिक सञ्जालमा शुक्रबार ढिलो पोस्ट गरिएको थियो। त्यसपछि विदेश मन्त्रालयका प्रवक्ताले सामाजिक सञ्जालबाट जर्मनीसँग स्पष्टीकरण मागेका थिए ।

साे रेकर्डिङमा जर्मन अधिकारीहरूले टोरस मिसाइलको प्रयोगको सम्भावित प्रभावबारे छलफल गरिरहेका थिए। वार्तालापमा क्षेप्यास्त्रहरू लक्ष्यमा राखिएको केर्च ब्रिजका बारेमा कुराकानी गरिरहेकाे खुलेकाे थियाे । जुन बिन्दुले रुसी मुख्य भूमिलाई क्रिमियासँग जोड्दछ । जाे सन २०१४ मा रूसले कब्जा गरेको थियो।

क्षेप्यास्त्र निर्यात गर्ने कि नगर्ने भन्ने विषयमा जर्मनीमा बहस चलिरहेको बेला याे अडियो लीक भएको हो। युक्रेनले आफ्नो हतियारलाई बढावा दिन खोजिरहेको छ किनकि गोलाबारुद स्टकहरू कम भएका छन् । युक्रेनले दुई वर्षको युद्ध पछि रणभूमिमा असफलताहरू देखिरहेको छ, जसका कारणा संयुक्त राज्य अमेरिकाबाट सैन्य सहायता माग्ने देखी युराेपियन युनियन पर्याप्त हतियार पठाउनका लागि पहलकदमी लिइरहेकाे छ ।

‘हाम्रा राजदूत रुसी विदेश मन्त्रालयमा योजनाबद्ध बैठकमा गएका थिए, जर्मनकाे विदेश मन्त्रालयका प्रवक्ताले भने। तर, थप कुरा उसले दिन भने अस्विकार गरेकाे छ ।

तर, रूसकाे बिदेश मन्त्रालयमा स्पष्टीकरण दिएर जर्मन राजदुत बाहिरएकाे तस्विर मस्काेले सार्बजनिक गरेकाे छ । न्युज करखाना

काठमाडौं, २२ फागुन ।

जारी त्रिकोणात्मक टी-२० सिरिजको फाइनलमा आज नेपाल र नेदरल्याण्डसबीच प्रतिस्पर्धा हुदै छ। टियु मैदानमा हुने यो खेल बिहान ११: ३० बजेदेखि शुरु हुदै छ।

जारी सिरिजमा नेदरल्याण्डस ४ खेलमा २ जित र एक खेलको नतिजा नआएपछि ५ अंकसहित शिर्ष स्थानमा रहेर फाइनलमा पुगेको छ भने नेपाल ४ खेलमा २ जित हासिल गर्दै ४ अंकसहित दोस्रो स्थानमा रहेर फाइनलमा पुगेको हो।

त्यसैगरी नेपाल ४ खेलमा एक जित र एक खेलको नतिजा ननिस्किएपछि ३ अंक हासिल गरेको थियो। नेपाल क्रिकेट संघ (क्यान) ले यस सिरिजका लागि रोहित पौडेलको कप्तानीमा १८ सदस्यीय टिम बनाएको छ।

नेपाली टीममा रोहित पौडेल (कप्तान), आसिफ सेख, कुशल भुर्तेल, कुशल मल्ल, दिपेन्द्र सिंह ऐरी, ललित राजबंशी, करण केसी, गुलशन झा, सोमपाल कामी, प्रतिश जिसी, सन्दीप जोरा, बिनोद भण्डारी, बिबेक यादव, अनिल शाह, रशिद खान, सगर ढकाल, आरिफ सेख र अविनाश बोहोरा रहेका छन्।न्युज करखाना

वासिङटन डिसी, २१ फागुन ।

संयुक्त राज्य अमेरिकाको सर्वोच्च अदालतले राज्यको रिपब्लिकन प्राइमरी मतपत्रबाट डोनाल्ड ट्रम्पको नाम हटाउन कोलोराडोको प्रयासलाई अस्वीकार गरेको छ ।

अमेरिकन पूर्व राष्ट्रपति ट्रम्पलाई उनको पार्टीको उम्मेदवारी खोस्ने प्रयासलाइ सर्वोच्च अदालतले खारेज गरे पछि ट्रम्पले ठुलो राहात पाएका छन ।

न्यायाधीशहरूले  सर्वसम्मतिले डिसेम्बर १० मा कोलोराडोको उच्च अदालतले ट्रम्पलाई संविधानको १४ औं संशोधन अन्तर्गत मतपत्र नामावलीबाट निकाल्ने निर्णयलाई उल्टाएका हुन । जसमा व्यक्तिहरूले विद्रोहमा भाग लिएको खण्डमा सार्वजनिक पद धारण गर्न निषेध गर्ने खण्ड समावेश गरिएको  छ ।

ट्रम्पका आलोचकहरूले उनलाई २०२० को राष्ट्रपतिको चुनावलाई बिथोल्ने प्रयासमा जनवरी ६, २०२१ मा अमेरिकी क्यापिटलमा भएको आक्रमणलाई उक्साएको र समर्थन गरेको आरोप लगाएका थिए ।

‘अमेरिकाको लागि ठूलो जीत’ सर्वोच्च अदालतको फैसलापछि पूर्वराष्ट्रपति ट्रम्ले आफ्नो ट्रुथ सामाजिक सञ्जालमा लेखेका छन् । यस निर्णयले कोलोराडो, इलिनोइस, माइन र अन्य ठाउँमा ट्रम्पलाई मतपत्रबाट हटाउने प्रयासहरू समाप्त भएको छ ।

संबिधानको १४ औं संशोधनले मानिसहरूलाई राष्ट्रपति पदसहित अमेरिकी पद धारण गर्नबाट रोक्छ । यदि तिनीहरूले त्यसको विरुद्ध विद्रोह वा विद्रोहमा संलग्न छन, वा त्यसका शत्रुहरूलाई सहयोग वा सान्त्वना दिएका छन् भन्ने उल्लेख गरिएको छ ।

तर ६–३ को कन्जरभेटिभ बहुमत भएको सर्वोच्च अदालतले आफनो फैसालमा भनिदियो कि कांग्रेसले मात्र संघीय पदाधिकारी र उम्मेदवारहरू विरुद्ध प्रावधान लागू गर्न सक्छ।

‘हामी निष्कर्षमा पुग्छौं कि राज्यहरूले राज्यको पद धारण गर्ने वा प्रयास गर्ने व्यक्तिहरूलाई अयोग्य ठहराउन सक्छ तर संघीय कार्यालयहरू विशेष गरी राष्ट्रपति पदको सन्दर्भमा धारा ३ लागू गर्ने संविधान अन्तर्गत राज्यहरूसँग कुनै शक्ति छैन,’ अदालतले भनेको छ ।

हाल भइरहेको प्राइमरी निर्वाचनमा ट्रम्प रिपब्लिकन राष्ट्रपति पदको उम्मेदवारीमा अग्रपंक्तिमा रहेका छन् र कतिपय स्थानमा उनले ९८ प्रतिशतसम्म मत प्राप्त गर्न सफल भएका छन । जुन नतिजाहरूले आगामी नोभेम्बरमा बाइडेनको बिरूद्ध राष्ट्रपति निर्वाचनमा उनले राम्रै प्रतिस्पर्धा गर्ने देखिएको छ ।न्युज करखाना