आरके श्रीवास्तव,रौतहट,२१ गते माघ ।
रौतहट निर्वाचन क्षेत्र नम्बर ३ बाट जनता समाजवादी पार्टी (जसपा) नेपालका तर्फबाट प्रतिनिधि सभा सदस्य पदका उम्मेदवार गोविन्द चौधरी (चुनाव चिन्ह: छाता छाप) ले आज फतुवा विजयपुर नगरपालिका वडा नम्बर ४ टेंग्राहा क्षेत्रमा मतदाताहरूसँग भेटघाट गरेका छन् ।

स्थानीय तहमा आयोजित उक्त भेटघाट कार्यक्रममा उम्मेदवार चौधरीसँगै जसपाका पूर्व प्रदेश सांसद रामकिशोर यादव लगायत पार्टीका अन्य नेताहरूको पनि सहभागिता रहेको थियो । भेटघाटका क्रममा स्थानीय मतदाताहरूले आफ्ना गुनासा, समस्या तथा अपेक्षाहरू राखेका थिए भने उम्मेदवार पक्षले ती विषयमा ध्यानाकर्षण भएको प्रतिक्रिया व्यक्त गरेको जनाइएको छ ।

उम्मेदवार चौधरीले स्थानीय तहमा पुगेर नागरिकसँग प्रत्यक्ष संवाद गर्नु लोकतान्त्रिक अभ्यासको हिस्सा भएको बताउँदै आगामी दिनमा पनि विभिन्न स्थानमा यस्ता भेटघाटलाई निरन्तरता दिने जानकारी दिएका छन् ।

प्रेमचन्द्र झा,राैतहट,माघ २१ गते । 

रौतहट। जिल्ला प्रहरी कार्यालय रौतहटका प्रहरी उपरीक्षक (एसपी) सिताराम रिमालले तस्करी, अपराध र अवैध गतिविधि कुनै पनि हालतमा सह्य नहुने स्पष्ट पारेका छन्। बुधबार जिल्ला प्रहरी कार्यालय रौतहटले आयोजना गरेको परिचयात्मक तथा भेटघाट कार्यक्रममा बोल्दै एसपी रिमालले प्रहरी इमान्दार र व्यवसायिक भएर काम गरे दाग नलाग्ने दाबी गर्दै आफ्नो विगतको ट्र्याक रेकर्ड राम्रो रहेको बताए।

उनले जनताको अपेक्षाअनुसार काम गरिरहेको उल्लेख गर्दै अश्लील गीत–संगीत बजाइने डिजे नियन्त्रण, बाकस बोकेर भागेको स्थानमा विशेष निगरानी तथा निर्वाचन सुरक्षाप्रति उच्च सतर्कता अपनाइने बताए। जेन्जि आन्दोलनका क्रममा लुटिएका हतियार प्रयोग हुन सक्ने आशंका रहेकाले आगामी निर्वाचन चुनौतीपूर्ण रहेको उनको भनाइ थियो।
एसपी रिमालले मोटरसाइकल दुर्घटना तथा सवारीसाधन प्रयोगमा देखिएको लापरबाही नियन्त्रण गर्न प्रहरी निगरानी, सचेतना र कारबाहीलाई थप प्रभावकारी बनाइने जानकारी दिए। “प्रहरी सुते अपराध बढ्छ, प्रहरी जागे अपराध घट्छ,” भन्दै उनले अपराध नियन्त्रणका लागि जाहेरीका आधारमा जघन्य अपराधीलाई कस्टडीमा राखेर कारबाही गरिएको दाबी गरे। गैर–व्यवसायिक काम नगरेको र प्रहरीबाट पत्रकारलाई आवश्यक सबै सूचना प्रदान गरिने पनि उनले स्पष्ट पारे।
चुनावविरोधी गतिविधि रोक्न जुनसुकै सुरक्षाका उपाय अपनाइने बताउँदै उनले सामाजिक सञ्जालको दुरुपयोग पनि ठूलो चुनौतीको रूपमा रहेको उल्लेख गरे। होली पर्वलाई समेत निर्वाचन सुरक्षाको दृष्टिकोणबाट संवेदनशील रूपमा हेरिएको उनको भनाइ थियो।

कार्यक्रममा नेपाल पत्रकार महासंघ रौतहटका अध्यक्ष सञ्जय कार्कीले प्रहरी “प्रहरीकै हैसियतले” काम गर्नुपर्ने धारणा राखे। वरिष्ठ पत्रकार प्रभात कुमार झाले नेपाल लजदेखि जिल्ला प्रहरी कार्यालयसम्म टेम्पु पार्किङ गरिएको, भारतीय गाडी राजनीतिक दलले झण्डासहित प्रयोग गर्नु दुखद रहेको तथा अवैध मदिरा उत्पादन गर्ने कारखाना ठाउँ–ठाउँमा रहेकोतर्फ प्रहरीको ध्यानाकर्षण गराए।
त्यस्तै पत्रकार चञ्चल झाले प्रहरी व्यापारीका साथै सर्वसाधारण जनताको सुरक्षामा निष्पक्ष रूपमा काम गर्नुपर्ने बताए। प्रविणकुमार शर्मा, विना श्रीवास्तव, यादव राज पुरी, आलोक पाण्डेय, राकेश यादव, ओमप्रकाश यादव, प्रविण टिबडेवाल र रविन्द्र साहलगायत पत्रकारहरूले बाकस बोकेर भागेको स्थानमा प्रहरी अझ सजग हुनुपर्ने सुझाव दिएका थिए।
कार्यक्रममा पत्रकार र प्रहरीबीच जिल्लाको शान्ति सुरक्षा, अपराध नियन्त्रण र निर्वाचन सुरक्षाका विषयमा खुला छलफल भएको थियो।

आरके श्रीवास्तव,राैतहट,२१ गते माघ । 

रौतहट क्षेत्र नम्बर ३ बाट जनता समाजवादी पार्टी (जसपा) का तर्फबाट उम्मेदवार गोविन्द चौधरीले आज फतुवा विजयपुर नगरपालिका वडा नम्बर ३ अन्तर्गत मेवा गाउँमा मतदातासँग भेटघाट गरेका छन् ।

भेटघाट कार्यक्रममा जसपा नगर कमिटी अध्यक्ष जयमंगल यादव, गुजरा नगरपालिकाका नगरप्रमुख सन्तलाल चौधरी, जननिर्वाचन परिचालन समितिका अध्यक्ष रामप्रवेश दास,हरदेव यादव लगायत पार्टीका नेताहरूको उपस्थिति रहेको थियो । उनीहरूले आगामी निर्वाचनमा जसपाको चुनाव चिन्ह छाता छापमा मतदान गर्न मतदातालाई आग्रह गरेका थिए ।

सो अवसरमा उम्मेदवार चौधरीले आफ्ना पुराना मित्रहरू पुरुषोत्तम मिश्र, पूर्व वडा अध्यक्ष दिपनारायण साह लगायत स्थानीय व्यक्तित्वहरूसँग आत्मीय भेटघाट गरेका थिए ।

भेटघाटका क्रममा एक जना मतदातासँग कुराकानी गर्दै उम्मेदवार चौधरीले आफू “मंगनी राम भोट माग्न आइसकेको” उल्लेख गर्दै समर्थन र मत दिन आग्रह गरेका थिए ।

जसपा उम्मेदवार चौधरीले क्षेत्रको विकास, समावेशी राजनीति र जनताको अधिकारका विषयलाई प्राथमिकतामा राखेर चुनावी अभियान अगाडि बढाइरहेको बताइएको छ ।

वीरगंज, माघ २१ गते । 
महिला कर्मचारीलाइ मधेश प्रदेश सरकारले मनोबल बढाउनुको सट्टा झन् उपेक्षा गर्नु दुखद रहेको र यसले महिला कर्मचारीलाई मानसिक चिन्ता निम्त्याउने पर्यटन विकास कार्यालय पर्साका कार्यालय प्रमुख बबिता जयसवालले बताउनु भएको छ ।
रौतहट,बारा र पर्सा गरि तीन जिल्लाको पर्यटकिय क्षेत्रको निर्माण, मरम्मत सम्भार तथा सौन्दर्यिकरणको लागि २०७९ सालमा स्थापना भएको यस कार्यालयका प्रमुख जयसवालले राजनीतिक पूर्वाग्रहमा महिला कर्मचारीको सरुवा नभएर मधेश प्रदेश निजामति सेवा नियमावली २०७९ अनुसार हुनु पर्नेमा जोड दिनु भयो । नियमावलीको बुँदा नं. १३७ को ख अनुसार गर्भवती वा दुइ बर्ष मुनिको बच्चा भएको महिला कर्मचारीलाइ निजले माग गरेको अबस्थामा बाहेक सरुवा गरिने छैन भन्ने कुरा उल्लेख हुँदा हुँदै मुख्यमन्त्री तथा मन्त्रीपरिषदको कार्यालय मधेश प्रदेशले निर्वाचन आचारसहिंता लागु हुने बेलामा गरेको मेरो सरुवा बदनियतपूर्ण रहेको भन्दै कार्यान्वयन हुनु नपर्ने कार्यालय प्रमुख जयसवालले मांग गर्नु भएको छ । मधेश प्रदेश सरकार आफैले बनाएको नियमावली बिपरित गए पछि न्यायको लागि अदालत गुहारेको उहाँले बताउनु भयो ।उच्च अदालत जनकपुर अस्थायी इजलाश बीरगंजका न्यायाधीश कृष्ण राम कोइरालाको इजलाशले माघ ९ गते अन्तरिम आदेश जारी गरे पछि जयसवाल कार्यालय प्रमुखमा यथावत रहनु भएको छ । मुख्यमन्त्री तथा मन्त्री परिषदको कार्यालय मधेश प्रदेशले उपसचिव जयसवाललाइ भुमि ब्यवस्था, कृषि तथा सहकारी मन्त्रालय मधेश प्रदेशमा सरुवा गर्दै घरेलु तथा साना उद्योगको कार्यालय बारामा कार्यालय प्रमुख रहनु भएका शाखा अधिकृत अरविन्द यादवलाई पर्यटन कार्यालयमा सरुवा गरेको थियो ।उद्योग बाणिज्य तथा पर्यटन मन्त्रालयका सचिव जय कुमार घिमिरेका अनुसार मुख्यमन्त्री कार्यालयले उपसचिवको सरुवा गरि दिए पछि शाखा अधिकृतलाई नै जिम्मेवारी दिनु परेको बताउनु हुँदै प्रदेश निजामति सेवा नियमावलीको पालना प्रति मुख्यमन्त्री कार्यालय संबेदनशील हुनु पर्ने बताउनु भयो ।
कार्यालय प्रमुख जयसवालका अनुसार महिलालाई सुरक्षित मातृत्वको अधिकार संविधानले नै ग्यारेन्टी गरेको अबस्थामा मेरो ४ महिनाको छोरा रहेको जानकारी हुँदा हुँदै दुख दिने नियतले गरिएको सरुवाले सुरक्षित मातृत्व तथा प्रजनन स्वास्थ्य अधिकार हनन भएको बताउनु भयो ।
राज्यले समाबेशी सकारात्मक विभेद आरक्षण गरे पनि विशेषाधिकार प्राप्त मधेशी महिलालाई भेदभाव गर्ने गरिएको कार्यको बिरोधमा आफु न्यायालय गएको बताउनु हुँदैे प्रमुख जयसवालले मैले आफ्नो लागि मात्र अदालतको सहारा लिएको नभइ सम्पूर्ण महिलाको लागि मेरो लडाइ रहेको बताउनु भएको छ ।
आफुले पर्यटन कार्यालयको कार्यभार सम्हाले पछि विषम परिस्थितिमा उत्कृष्ट कार्य सम्पादन गरेको बताउनु हुँदै प्रमुख जयसवालले आर्थिक बर्ष २०८०/०८१ मा कुल पुजीगत बजेटको पचहत्तर दशमलव एकतीस प्रतिशत खर्च भएको उहाँले बताउनु भयो ।
रौतहटमा ६९ वटा योजना रहेकोमा ६७ वटा, बारामा ९० वटा योजनामा ७१ वटा योजना र पर्सामा ४० वटा योजनामा ३५ वटा योजना सम्पन्न भएको प्रमुख जयसवालले बताउनु भयो । त्यस्तै आर्थिक बर्ष २०८१/०८२ मा कुल २५ करोड ८० लाख १२ हजार ३३८ रुपैया ४८ पैसा खर्च भएकोमा २७ वटा ठेक्कामा १३ करोड ६६ लाख ७५ हजार ९९३ रुपैया र अन्य उपभोक्ताबाट काम सम्पन्न भएको उहाँले बताउनु भयो । आर्थिक बर्ष २०८१/०८२ मा बारा र पर्सामा मात्र योजना संचालन गरिएको उहाँले बताउनु भयो । रौतहटको लागि २०८१ कार्तिक ३० गतेका दिन छुट्टै कार्यालय स्थापना भएको थियो ।
सिमित जनशक्ति र थोरै समयमा परिणाममुखी कार्य गरेको बताउनु हुँदै प्रमुख जयसवालले कार्यभार सम्हाले देखि आर्थिक पारदर्शिता,मितव्ययिता , सुशाशानको पूर्ण पालनामा आफ्नो ध्यान केन्द्रित रहेको बताउनु भयो ।

कलैया, २० माघ
आम जनता पार्टी (आजपा)का अध्यक्ष एवं पूर्वमन्त्री प्रभु साहले फागुन २१ गते हुने प्रतिनिधिसभाको निर्वाचन फेक र रियलबीचको लडाई भएकाले जनताले फेकुहरुलाई हराउनैपर्ने बताएका छन् ।

बाराको बारागढी गाउँपालिकाको खोपवा बजारमा आज निर्वाचन परिचलान कमिटीको विशेष प्रशिक्षक कार्यक्रमलाई सम्बोधन गर्दै आजपा अध्यक्ष साहले फेक र झुठा कुरा गर्ने नेतालाई जनताले आम निर्वाचनमा बहिष्कार गर्नुपर्ने बताए ।

‘अहिलेको चुनाव फेक र रियलको लडाईं हो, जनताले फेकुहरुलाई हराउनैपर्छ । अहिले फेक नेता र तीनका फेक एजेण्डाको चर्चा गरिँदैछ, यो देशको लागि सर्वाधिक घातक कुरा हो । सोसल मिडियामा स्टन्ट गर्ने, फेक आईडीबाट झुठो प्रचार गर्नेहरुको दबदबा छ, यसलाई चिर्नुपर्छ,’ आजपा अध्यक्ष साहले भने ।

फागुन २१ गतेको प्रतिनिधिसभा निर्वाचन सत्य र असत्यको लडाई भएकाले आम मतदाताले रियललाई मतदान गरेर बिजयी बनाउने र फेकुहरुलाई बहिष्कार गर्नुपर्ने उनले बताए ।

रास्वपा नेता समेत रहेका काठमाडौं महानगरपालिकाका पूर्वमेयर बालेन शाहलाई लक्षित गर्दै साहले भने, ‘देशकै ठूलो र धनी महानगरको नेतृत्व गर्दापनि विकासको मोडेल दिन नसक्ने बालेनजीले अहिले प्रधानमन्त्री बन्ने सपना देखेर नक्कली कुरा गर्दैछन् । यस्ता नक्कलीहरुलाई आम जनताले निर्वाचनबाटै बहिष्कार गर्नुपर्छ ।’

काठमाडौं महानगर मेयर हुँदा काठमाडौको मुहार फेर्न नसक्नेले देश बदल्छौं भनेर धाक नलगाउन चेतावनी दिदै आजपा अध्यक्ष साहले यिनीहरु नयाँ नभई टेस्टेड असफल फिगर भएको टिप्पणी गरे ।

काठमाडौं महानगरले जनतासंग करमाथि कर लिएको तर सेवा सुविधा दिने काम नगरेको बालेनको विगत सम्झिदै आजपा अध्यक्ष साहले भने, ‘काठमाडौं महानगरले जनतासँग लिने काम गर्यो, करमाथि कर थुपार्ने काम गर्यो, बदलामा केही पनि सुविधा दिएन । संघीय राजधानी भएको महानगरमा शिक्षा, स्वास्थ्य र रोजगारीको अवस्था बेहाल र दयनीय अवस्थामा छ । गरिव उपचार नपाएर मर्ने अवस्था छ, त्यो विभेद हटाउन सकेन ।’

उनले बालेनलाई रौतहटको मौलापुर नगरपालिकामा भएको विकासको मोडेल हेर्न अनुरोध समेत गरे । ‘बालेनलाई म मौलापूरको विकासको मोडेल हेर्न अनुरोध गर्दछु । मौलापुरले लिँदैन, खाली दिने काम गर्छ । यहाँ शिक्षा, स्वास्थ्य, पानी, विजुली सबै फ्रि छ । यहाँ नगरप्रहरी होईन, नगर शिक्षक, नगर डाक्टर राखिएको छ । मौलापुरमा दलित, सुकुम्बासीलाई पक्कीघर बनाएर दिएकोछ । तर काठमाडौंमा भगाउने काम भएको छ,’ आजपा अध्यक्ष साहले भने ।

यसैगरी, एमाले अध्यक्ष केपी शर्मा ओलीले चुनावमा पराजित हुने मानसिकताका कारण चुनावको मुखमा संसद् पुनःस्थापनााको भ्रम फैलाइरहेको आरोप उनले लगाए । चुनावको विकल्प नभएको बताउदै उनले चुनावबाट कोही भाग्न नहुने बताए ।

‘चुनावको मुखैमा आईपुग्दा पनि संसद् पूनःस्थापनाको भ्रम फैलाईनु पराजित मानसिकता हो, निर्वाचनमा श्रेष्ठता देखाउन चूनौति दिन्छु । एमालेको पराजित मानसिकताको कारण चुनावको मुखमा यस्तो हल्ला फैलाईएको छ,’ साहले भने ।

कार्यक्रममा बारा क्षेत्र नं. १ का उम्मेदवार बिजय यादवलगायतको विशेष सहभागिता रहेको थियो ।

आरके श्रीवास्तव,रौतहट,२० गते माघ ।
रौतहट निर्वाचन क्षेत्र नम्बर ३ बाट जनता समाजवादी पार्टी (जसपा) नेपालका तर्फबाट प्रतिनिधि सभा सदस्य पदका उम्मेदवार गोविन्द चौधरीले मतदाता भेटघाट कार्यक्रमलाई तीव्रता दिएका छन् ।

सोही क्रममा उम्मेदवार चौधरीले गुजरा नगरपालिका वडा नम्बर १ अन्तर्गतका मनहर्वा, रंगपुर र कोठियार गाउँ तथा देवाही गोनाही नगरपालिका वडा नम्बर ९ धरहरीमा पुगेर स्थानीय मतदातासँग प्रत्यक्ष भेटघाट गरेका हुन् । भेटघाटका क्रममा उनले मतदाताका समस्या, गुनासा र अपेक्षाहरू ध्यानपूर्वक सुनेका थिए ।
मतदातासँगको संवादमा चौधरीले- “जनताले अनुभूति गर्ने खालको विकास र सुशासन मेरो मुख्य एजेन्डा हो,” उनले भने, “रौतहट–३ का जनताको भरोसामा खरा उत्रिने प्रतिबद्धता व्यक्त गर्दछु।”

स्थानीय बासिन्दाहरूले लामो समयदेखि प्रतिनिधित्वको अभाव महसुस गरेको भन्दै यसपटक परिवर्तनको अपेक्षा गरेका छन् । भेटघाट कार्यक्रममा स्थानीय नेता–कार्यकर्ता तथा सर्वसाधारणको उल्लेख्य सहभागिता रहेको थियो ।
जसपा नेपालका उम्मेदवार चौधरीले आगामी दिनमा पनि क्षेत्रका विभिन्न गाउँ–बस्तीमा पुगेर मतदाता भेटघाट कार्यक्रमलाई निरन्तरता दिने जानकारी दिएका छन् ।

बज्जिकाञ्चल संवाददाता,राैतहट,२० गते माघ ।

रौतहट जिल्लाको यमुनामाई गाउँपालिका–सरूअठाका प्रथम गाउँपालिका अध्यक्ष तथा नेकपा नेता, प्रखर वक्ता श्रीप्रसाद मुखिया बिनको गएराति असामयिक निधन भएको छ । स्वास्थ्यमा एक्कासी समस्या आएपछि उपचारका लागि अस्पताल लैजाने क्रममा हृदयघातका कारण उहाँको निधन भएको पारिवारिक स्रोतले जनाएको छ ।

उहाँको निधनले यमुनामाई गाउँपालिका मात्र नभई सम्पूर्ण रौतहट जिल्ला र राजनीतिक क्षेत्रले एक अनुभवी, कर्मठ तथा जनउत्तरदायी नेतृत्व गुमाएको छ । जनप्रतिनिधिका रूपमा उहाँ सधैं जनताको आवाज बुलन्द रूपमा उठाउँदै स्थानीय विकास, सुशासन र सामाजिक न्यायका पक्षमा सक्रिय रहनुहुन्थ्यो । उहाँका योगदानहरू जनतामाझ सदैव स्मरणीय रहने स्थानीयवासीहरूले बताएका छन् ।

स्वर्गीय मुखिया बिनको निधनप्रति विभिन्न राजनीतिक दल, जनप्रतिनिधि, सामाजिक संघ–संस्था तथा शुभेच्छुकहरूले गहिरो दुःख व्यक्त गर्दै श्रद्धाञ्जली अर्पण गरेका छन् ।

यस दुःखद घडीमा शोकसन्तप्त परिवारजन, आफन्त, सहकर्मी तथा समर्थकहरूप्रति गहिरो समवेदना व्यक्त गरिएको छ। दिवंगत आत्माको चिरशान्तिको कामनासहित ईश्वरले परिवारलाई यो अपूरणीय क्षति सहन सक्ने धैर्य प्रदान गरून् भन्ने प्रार्थना गरिएको छ ।

हनुमत कुमार यादव,गाैर,१९ गते माघ । 

रौतहट जिल्लाको राजदेवी नगरपालिका–७ मुडवलवामा सञ्चालित नेमधारी बासुदेव नमुना माध्यमिक विद्यालयले विविध शैक्षिक, खेलकुद तथा सांस्कृतिक कार्यक्रम आयोजना गर्दै आफ्नो ६६औँ स्थापना दिवस तथा वार्षिकोत्सव भव्य र सभ्य रूपमा सम्पन्न गरेको छ।

वि.सं. २०१७ माघ १९ गते प्राथमिक विद्यालयको रूपमा स्थापना भएको यस विद्यालयले सप्ताहव्यापी कार्यक्रममार्फत वार्षिकोत्सव मनाएको हो। समारोहको अवसरमा खेलकुद प्रतियोगिता, कविता वाचन, कला तथा सांस्कृतिक प्रस्तुति लगायतका गतिविधि सञ्चालन गरिएका थिए ।

विद्यालय प्रांगणमा आयोजित मुख्य समारोहमा प्रमुख अतिथि पूर्व संविधानसभा सदस्य रम्भा देवी यादवले नेमधारी चौधरी र बसुदेवी चौधरीले गाउँका छोरी–बुहारीलाई शिक्षित बनाउने उद्देश्यले आफ्नो सम्पत्ति दान गरी स्थापना गरेको विद्यालय आज जिल्लामै शिक्षाको क्षेत्रमा दोस्रो स्थान हासिल गरेकोमा खुशी व्यक्त गरिन्। उनले विद्यालयमा केटाभन्दा छोरीहरूको सहभागिता बढी देखिनु समाज शिक्षातर्फ उन्मुख हुँदै गएको सकारात्मक संकेत भएको उल्लेख गरिन्। विगतमा छोरी घरको काममा सीमित रहने र छोरा मात्रै विद्यालय जाने सोच अहिले परिवर्तन भएको बताउँदै यसलाई समाजको उपलब्धि भएको धारणा राखिन् ।

त्यस्तै, राजदेवी नगरपालिकाका प्रमुख प्रशासकीय अधिकृत विकाउ कुमार यादवले वर्तमान समयमा शिक्षा सबैका लागि अपरिहार्य रहेको बताउँदै अभिभावकलाई आफ्ना छोराछोरीलाई नियमित विद्यालय पठाउन आग्रह गरे। शिक्षा प्राप्त भए घरपरिवार र समाज दुवै शिक्षित र सचेत बन्ने उनको भनाइ थियो।

नेपाल रेडक्रस सोसाइटी, जिल्ला शाखा रौतहटका सभापति राजकिशोर प्रसाद यादवले आफ्ना पूर्वजले छाप्रोबाट सुरु गरेको विद्यालय आज नमुना विद्यालयको रूपमा विकसित भई भौतिक पूर्वाधार र शैक्षिक गुणस्तरमा फड्को मारेको देख्दा गर्व लागेको बताए।

कार्यक्रममा विद्यालयका प्रधानाध्यापक रविशंकर प्रसाद यादवले वार्षिक प्रगति प्रतिवेदन प्रस्तुत गर्दै शैक्षिक तथा भौतिक विकासका आधारमा विद्यालय जिल्लामा दोस्रो र देशभर चौथो स्थान हासिल गर्न सफल भएको जानकारी गराए। सो अवसरमा ३२ वर्षदेखि निरन्तर सेवा पुर्‍याउँदै आएका वरिष्ठ शिक्षक जितेन्द्र प्रसाद यादवलाई दीर्घ सेवा पदक प्रदान गरी सम्मान गरिएको थियो। साथै अन्य शिक्षक, शिक्षिका र कर्मचारीलाई समेत सम्मान गरिएको विद्यालय प्रशासनले जनाएको छ।

विद्यालय व्यवस्थापन समितिका अध्यक्ष रामेश्वर प्रसाद यादवको सभापतित्वमा सम्पन्न समारोहमा विभिन्न खेलकुद प्रतियोगितामा विजयी विद्यार्थीहरूलाई पुरस्कार वितरण गरिएको थियो। टेकनाथ खतिवडाले सञ्चालन गरेको कार्यक्रममा विद्यार्थीहरूले बाजागाजा तथा विभिन्न भेषभूषासहित मार्चपास प्रदर्शन गरी कार्यक्रमलाई थप आकर्षक बनाएका थिए।

समारोहमा विद्यालय व्यवस्थापन समितिका पदाधिकारी, पूर्व अध्यक्ष, सेवा निवृत्त प्रधानाध्यापक, शिक्षक–शिक्षिका, अभिभावक तथा स्थानीयवासीको उल्लेख्य उपस्थिति रहेको थियो।

आरके श्रीवास्तव,राैतहट,२० गते माघ ।

कटहरिया । रौतहट जिल्लाको कटहरिया बजारमा अवस्थित माही मेमोरियल पब्लिक स्कुलले बालबालिकाको प्रारम्भिक शिक्षालाई लक्षित गर्दै पिजी कक्षा (प्ले ग्रुप) सञ्चालनमा ल्याएको छ । विद्यालयका फाउन्डर राजाबाबु साहका अनुसार सरस्वती पूजाको शुभ अवसर पारेर औपचारिक रूपमा उक्त कक्षाको शुभारम्भ गरिएको हो ।

नवसञ्चालित पिजी कक्षामा साना बालबालिकाको शारीरिक, मानसिक तथा बौद्धिक विकासलाई ध्यानमा राखी आधुनिक र बालमैत्री शिक्षण पद्धति अपनाइएको छ । कक्षामा टिभीमार्फत शैक्षिक गेम देखाइने, डिजिटल स्लेटको प्रयोग गरिने तथा विभिन्न खेलकुद सामग्रीको व्यवस्था गरिएको छ, जसले बालबालिकालाई खेल्दै सिक्ने वातावरण प्रदान गर्ने विश्वास विद्यालयले लिएको छ ।

विद्यालय व्यवस्थापनका अनुसार पिजी कक्षामा अनुभवी तथा मायालु शिक्षक–शिक्षिकामार्फत बालबालिकालाई सुरक्षित, रमाइलो र सिकाइमैत्री वातावरणमा राखिनेछ । अभिभावकको बढ्दो अपेक्षा र बालबालिकाको गुणस्तरीय प्रारम्भिक शिक्षाको आवश्यकतालाई मध्यनजर गर्दै यो कक्षा सञ्चालनमा ल्याइएको फाउन्डर साहले बताउनुभयो ।

स्थानीय अभिभावकहरूले पनि अत्याधुनिक सुविधा सहितको पिजी कक्षा सञ्चालनमा आएकोमा खुशी व्यक्त गरेका छन् । माही मेमोरियल पब्लिक स्कुलले यस पहलबाट बालबालिकाको उज्ज्वल भविष्य निर्माणमा महत्वपूर्ण योगदान पुर्‍याउने अपेक्षा गरिएकाे छ ।

आरके श्रीवास्तव,राैतहट,१९ गते माघ । 

रौतहट–२ का कांग्रेस उम्मेदवार डा. फिरदोस आलमद्वारा सामाजिक सञ्जालको अराजक गतिविधिप्रति खेद

रौतहट क्षेत्र नम्बर २ बाट नेपाली काँग्रेसका उम्मेदवार डा. फिरदोस आलमले सामाजिक सञ्जालमार्फत फैलाइँदै आएको अराजक, उत्तेजक तथा गालीगलौजपूर्ण गतिविधिप्रति गम्भीर ध्यानाकर्षण जनाएका छन् ।

डा. आलमले सामाजिक सञ्जाल फेसबुक तथा टिकटकजस्ता प्लेटफर्म प्रयोग गरी समाजमा द्वेष फैलाउने, जनतालाई उत्तेजित बनाउने, अश्लील तथा उच्छृंखल सामग्री पोस्ट गर्ने कार्यप्रति खेद प्रकट गर्दै यस्ता गतिविधिमा संलग्न व्यक्तिहरूलाई तत्काल पक्राउ गर्न सम्बन्धित निकायसँग जोडदार माग गरेका छन् ।

उनले दोषीलाई प्रचलित कानुन बमोजिम हदैसम्मको सजाय दिनुपर्नेमा जोड दिँदै सामाजिक सद्भाव, शान्ति र लोकतान्त्रिक मूल्य–मान्यताको रक्षा गर्न राज्य संयन्त्र जिम्मेवार ढंगले अगाडि बढ्नुपर्ने बताएका छन् ।

डा. आलमले सामाजिक सञ्जालको दुरुपयोगले समाजमा गलत सन्देश जाने भन्दै सबै नागरिकलाई जिम्मेवार र मर्यादित अभिव्यक्ति प्रयोग गर्नसमेत आग्रह गरेका छन् ।