आरके श्रीवास्तव,राैतहट,२१ गते फाल्गुन । 

रौतहट जिल्लामा सम्पन्न निर्वाचनमा कुल ६३ प्रतिशत मतदान भएको छ । उपलब्ध तथ्यांक अनुसार जिल्लाभरि २ लाख ७४ हजार ८० मत खसेका छन् । मतदानमा पुरुषको संख्या महिलाभन्दा केही बढी देखिएको छ।

तथ्यांक अनुसार जिल्लामा १ लाख ३० हजार ४०५ महिला र १ लाख ४३ हजार ६७५ पुरुषले मतदान गरेका छन् । अन्य लिङ्गका मतदाता भने मतदानमा देखिएका छैनन् ।

क्षेत्रगत रूपमा हेर्दा क्षेत्र नं. १ मा सबैभन्दा बढी ६५ प्रतिशत मतदान भएको छ । यहाँ ३३ हजार ५३ महिला र ३७ हजार ६०७ पुरुष गरी कुल ७० हजार ६६० मत खसेको छ ।

क्षेत्र नं. २ मा ५९ प्रतिशत मतदान भएको छ, जुन जिल्लामा सबैभन्दा कम हो । यस क्षेत्रमा २९ हजार ८८२ महिला र ३४ हजार ३५७ पुरुष गरी कुल ६४ हजार २३९ मत खसेको छ ।

त्यसैगरी क्षेत्र नं. ३ मा ६४ प्रतिशत मतदान भएको छ । यहाँ ३२ हजार ७३३ महिला र ३६ हजार ४९५ पुरुष गरी कुल ६९ हजार २२८ मत खसेको छ ।

क्षेत्र नं. ४ मा ६३ प्रतिशत मतदान भएको छ । यस क्षेत्रमा ३४ हजार ७३७ महिला र ३५ हजार २१६ पुरुष गरी कुल ६९ हजार ९५३ मत खसेको तथ्यांकले देखाएको छ ।

समग्रमा रौतहट जिल्लामा मतदाताहरूको उत्साहजनक सहभागिता देखिएको छ । अधिकांश क्षेत्रमा ६० प्रतिशतभन्दा बढी मतदान भएकोले लोकतान्त्रिक प्रक्रियाप्रति मतदाताको चासो र सक्रियता प्रस्ट देखिएको छ ।

बज्जिकाञ्चल संवाददाता,रौतहट,फागुन २१ गते । 

आसन्न प्रतिनिधि सभा सदस्यको लागि फागुन २१ गते भएको निर्वाचनमा रौतहट जिल्लाको चारवटै निर्वाचन क्षेत्रमा शान्तिपूर्ण रूपमा मतदान कार्य सम्पन्न भएको छ।
निर्धारित समय बिहान ७ बजेदेखि सुरू भएको मतदान साँझ ५ बजेसम्म कुनै अप्रिय घटना नभई शान्तिपुर्ण रूपले सम्पन्न भएको जिल्ला प्रशासन कार्यालय रौतहटले जनाएको छ।
स्वच्छ, निष्पक्ष र शान्त वातावरणमा निर्वाचन सुरक्षित र व्यवस्थित बनाउनको लागि नेपाली सेना, नेपाल प्रहरी र सशस्त्र प्रहरी बलको व्यापक सुरक्षा व्यवस्था मिलाइएको थियो। सुरक्षा निगरानी कडा पारिएकाले मतदान शान्तिपूर्ण रूपमा सम्पन्न गर्न सहयोग पुगेको प्रमुख जिल्ला अधिकारी दिनेश सागर भुसालले बताउनुभएको छ । चारवटा निर्वाचन क्षेत्र रहेको रौतहटमा सबै क्षेत्रको मतपेटिकाहरू संकलन गरि सम्बन्धित मतगणना स्थलमा ल्याउने काम भइरहेको र मतगणना गर्ने तयारी समेत भइरहेको निर्वाचन अधिकृत छोटेलाल दासले बताउनु भएको छ ।
रौतहट क्षेत्र नम्बर १ को मतगणना गौरमा रहेको जुद्ध माध्यमिक विद्यालयमा, क्षेत्र नम्बर २ को ब्रम्हज्योति मा वि लौकाहा, ३ को जनता मावि कटहरिया र ४ को जनज्योति उच्च मा वि चन्द्रपुरमा मतगणना हुने निर्वाचन अधिकृत दासले जानकारी गराउनु भएको छ।
उहाँका अनुसार बिहीबार रातिदेखि नै मतगणना सुरू गर्ने तयारी भइरहेको छ। मतपेटिका संकलन तथा आवश्यक व्यवस्थापन कार्य सम्पन्न भएपछि रातिबाटै मतगणना प्रक्रिया अघि बढाइने उहाँले बताउनु भएको छ ।

प्रेमचन्द्र झा,फाल्गुन १७ । 

राैतहट । राैतहट क्षेत्र नम्बर १ का सांसद उमेदवार तथा पुर्व प्रधानमन्त्री माधव कुमार नेपालले नेपाली नागरिकको सुरक्षालाई सर्वोपरि राख्दै विदेशमा जोखिममा परेका नेपालीको उद्धारका लागि सरकारसँग विशेष पहल गर्न आह्वान गरेका छन्। रौतहटको गौर नगरपालिका वडा नम्बर ५ स्थित कोईरी टोलमा आयोजित कोण सभालाई प्रमुख अतिथिको आसनबाट सम्बोधन गर्दै उनले अमेरिका र इरानबीच बढ्दो तनावका कारण खाडी मुलुकसहित विभिन्न देशमा कार्यरत लाखौं नेपालीको जीवन जोखिममा पर्न सक्ने उल्लेख गरे। यस्तो जटिल परिस्थितिमा नेपाल सरकारले गम्भीरतापूर्वक पहल गर्दै आवश्यक परे विशेष जहाजमार्फत नेपालीको सुरक्षित उद्धार गर्नुपर्नेमा उनले जोड दिए।

वरिष्ठ नेता नेपालले राष्ट्रिय स्वाभिमान र नागरिकको जीवनरक्षालाई सरकारको पहिलो कर्तव्य भएको बताउँदै संकटको घडीमा राज्य मौन बस्न नहुने धारणा राखे। उनले विदेशमा रहेका नेपाली श्रमिकले रेमिट्यान्समार्फत देशको अर्थतन्त्र मजबुत बनाउन महत्वपूर्ण योगदान दिएको स्मरण गराउँदै उनीहरूको सुरक्षामा कुनै कमी हुन नदिन आग्रह गरे। “विदेशमा रहेका प्रत्येक नेपाली हाम्रो परिवारका सदस्य सरह हुन्, उनीहरूको सुरक्षाका लागि राज्य जिम्मेवार हुनुपर्छ,” उनले भने।
रौतहट क्षेत्र नम्बर १ का उम्मेदवार समेत रहेका नेता नेपालले आफ्नो राजनीतिक यात्राभर जनताको हितलाई केन्द्रमा राखेर काम गर्दै आएको उल्लेख गर्दै अहिलेको अस्थिर अन्तर्राष्ट्रिय परिस्थितिमा राष्ट्रिय एकता आवश्यक रहेको बताए। उनले सबै राजनीतिक दल र सरोकारवालालाई मानवताका आधारमा एकजुट भएर विदेशमा रहेका नेपालीको उद्धार र सुरक्षाका लागि साझा पहल गर्न आह्वान गरे।
सोही कोण सभामा तराई स्वतन्त्र न्याय मञ्चका अध्यक्ष भाग्य नारायण बैठाले पनि इरानलगायत खाडी मुलुकमा रहेका नेपाली नागरिकको सुरक्षाका विषयमा गम्भीर ध्यान दिन सरकारसँग आग्रह गरे। उनले संकटको अवस्थामा दलभन्दा माथि उठेर नेपालीको ज्यान जोगाउन पहल गर्नुपर्ने धारणा व्यक्त गरे।
कार्यक्रममा नेकपाका केन्द्रीय सदस्य रेवन्त झा, गौर नगरपालिका वडा नम्बर ५ का वडा अध्यक्ष शिवशंकर यादवलगायतका वक्ताहरूले माधव कुमार नेपाल राष्ट्रिय स्तरका अनुभवी र जिम्मेवार नेता भएको उल्लेख गर्दै रौतहट क्षेत्र नम्बर १ बाट विजयी गराउन जनतासँग अपिल गरे। उनीहरूले नेपालको नेतृत्वमा जनताको आवाज सशक्त रूपमा संसदमा पुग्ने विश्वास व्यक्त गरे।
सभामा स्थानीय बासिन्दाको उल्लेख्य उपस्थिति रहेको थियो। सहभागीहरूले नेता नेपालको स्पष्ट धारणा, राष्ट्रियता र नागरिक सुरक्षाप्रतिको प्रतिबद्धताको प्रशंसा गरेका थिए। विदेशमा रहेका नेपालीको सुरक्षाबारे उठाइएको आवाजले जनतामा आशा र भरोसा जगाएको स्थानीयको प्रतिक्रिया थियो।
यसरी माधव कुमार नेपालले अन्तर्राष्ट्रिय संकटका बेला नेपाली नागरिकको जीवनरक्षालाई प्राथमिकतामा राख्दै सरकारलाई जिम्मेवार बन्न आग्रह गरेका छन्। उनको यो पहललाई मानवतामुखी र राष्ट्रिय जिम्मेवारीबोधबाट प्रेरित कदमका रूपमा हेरिएको छ।

आरके श्रीवास्तव,राैतहट,१७ गते फाल्गुन । 

राैतहट । जिल्ला प्रशासन कार्यालय राैतहटले आगामी फागुन २१ गते सम्पन्न हुने प्रतिनिधि सभा सदस्य निर्वाचनलाई स्वच्छ, निष्पक्ष र शान्तिपूर्ण रूपमा सम्पन्न गर्न जिल्लाभर विदेशी नम्बर प्लेटका सवारी साधन सञ्चालनमा अस्थायी निषेध लगाएको छ ।

कार्यालयद्वारा  शनिबार प्रकाशित सूचनाअनुसार जिल्ला सुरक्षा समितिको निर्णय बमोजिम मिति २०८२ फागुन १७ गतेदेखि २०८२ फागुन २१ गतेसम्म रौतहट जिल्लाभर विदेशी नम्बर प्लेटका सवारी साधन सञ्चालन गर्न नपाइने जनाइएको छ ।

सूचनामा निर्वाचन अवधिमा सुरक्षा व्यवस्थालाई थप सुदृढ बनाउँदै सम्भावित अवाञ्छित गतिविधि नियन्त्रण गर्न उक्त निर्णय गरिएको उल्लेख गरिएको छ । आदेश उल्लंघन गर्ने सवारी साधनमाथि प्रचलित कानुन बमोजिम कारबाही गरिने समेत चेतावनी दिइएको छ ।

उक्त सूचना सहायक प्रमुख जिल्ला अधिकारी जितेन्द्र कुमार यादवद्वारा जारी गरिएको हो । जिल्ला प्रशासन कार्यालयले सम्बन्धित सबै पक्षलाई निर्णयको पालना गर्न अनुरोध गरेको छ ।

रौतहट, १६ फागुन ।
अगामी फागुन २१ गते हुने प्रतिनिधिसभा सदस्य निर्वाचन नजिकिँदै जाँदा रौतहट निर्वाचन क्षेत्र नम्बर ३ मा नेकपा एमालेका उम्मेदवार कुन्दन कुशवाहा घरदैलो तथा मतदाता भेटघाट अभियानमा तीव्र रूपमा सक्रिय देखिएका छन्।
निर्वाचन आउन अब मात्र ६ दिन बाँकी रहँदा एमालेप्रति मतदाताको आकर्षण उल्लेखनीय रूपमा बढ्दै गएको स्थानीय विश्लेषकहरू बताउँछन्। विशेषतः विकास, शिक्षा, स्वास्थ्य र रोजगारीलाई केन्द्रीय एजेन्डा बनाउँदै कुशवाहाले थालेको प्रत्यक्ष संवाद अभियानले जनतामा भरोसा जगाएको देखिन्छ।
सनिवार नेकपा एमालेका उम्मेदवार कुन्दन कुशवाहाले बिहान कटहरिया नगरपालिका–४ र ५ का बलरामपुर क्षेत्रमा भेटघाट तथा कोणसभा गरे भने दिउँसो गुजरा नगरपालिका अन्तर्गत कनकपुर,जंगलसहिया तथा पोखरभिण्डाभेटघाट संगै
घरदैलो कार्यक्रम सञ्चालन गरेका थिए।

शुक्रबार कटहरिया नगरपालिका अन्तर्गत बहादुरपुर गाउँमा आयोजित कार्यक्रममा विभिन्न दल परित्याग गरी १७५ जना नेता–कार्यकर्ता औपचारिक रूपमा एमालेमा समाहित हुनु चुनावी राजनीतिमा अर्थपूर्ण घटनाका रूपमा हेरिएको छ। वडा सदस्य, महिला नेतृत्वसँग जोडिएका अभियन्ता, युवा कार्यकर्ता तथा वडास्तरीय संरचना सम्हाल्दै आएका व्यक्तिहरूको सामूहिक प्रवेशले रौतहट–३ को राजनीतिक शक्ति सन्तुलन एमालेतर्फ ढल्किएको स्पष्ट संकेत दिएको छ।
राजनीतिक विश्लेषकहरूका अनुसार अन्य दलहरूमा देखिएको आन्तरिक असन्तुष्टि, उम्मेदवार चयनप्रतिको असहमति र कमजोर संगठनात्मक व्यवस्थापनका कारण कार्यकर्ता आधार खस्किँदै गएको छ। यही कमजोरीबीच कुशवाहाले अघि सारेको विकास निर्माण, शिक्षा सुधार, आधारभूत स्वास्थ्य सेवा विस्तार र स्थानीय रोजगारी सिर्जनाको स्पष्ट खाकाले मतदातालाई आकर्षित गरेको विश्लेषण गरिएको छ।
घरदैलो अभियानका क्रममा कुशवाहाले स्थानीय पूर्वाधार, सडक, खानेपानी, विद्यालय, स्वास्थ्य चौकी तथा युवालाई स्वरोजगारतर्फ जोड्ने योजनालाई प्राथमिकतामा राख्दै जनतासँग प्रत्यक्ष संवाद गरिरहेका छन्। “राजनीति भाषणका लागि होइन, परिणामका लागि हुनुपर्छ” भन्ने सन्देशसहित अघि बढेको उनको अभियानले अन्तिम चरणमा चुनावी प्रतिस्पर्धालाई निर्णायक मोडतर्फ लैजाने संकेत देखिएको छ।
यसरी निर्वाचनको संघारमै देखिएको व्यापक दल परिवर्तन र जनसमर्थनको उभारले रौतहट–३ मा एमालेको स्थितिलाई मात्र सुदृढ गरेको छैन, अन्तिम नतिजामा समेत प्रभाव पार्ने निश्चितजस्तै देखिन थालेको छ।

रामअधार प्रसाद यादव,रौतहट, १६ फागुन ।

रौतहट क्षेत्र नं. ३ बाट प्रतिनिधिसभा सदस्यका उम्मेदवार पुनम यादवले सन्तपुरलाई समग्र विकाससहितको नमुना बस्तीका रूपमा विकास गर्ने अठोट व्यक्त गर्नुभएको छ। फतुवा विजयपुर नगरपालिका–५ स्थित सन्तपुरमा आयोजित चुनावी सभालाई सम्बोधन गर्दै उहाँले युवाकेन्द्रित पूर्वाधार, दिगो विकास र रोजगारी सिर्जनालाई प्राथमिकतामा राखेर अघि बढ्ने स्पष्ट गर्नुभयो।

उहाँका अनुसार सन्तपुरमा आधुनिक सुविधासहितको क्रिकेट रंगशाला निर्माण गरिनेछ, जसले युवालाई खेलकुदतर्फ आकर्षित गर्दै सकारात्मक ऊर्जा सिर्जना गर्नेछ। साथै स्थानीय खेल प्रतिभा उत्पादनका लागि आवश्यक वातावरण निर्माण गरिने बताउनुभयो।

वर्षायाममा हुने जलजमाव, दुर्गन्ध तथा त्यसबाट उत्पन्न स्वास्थ्य जोखिम समाधानका लागि आधुनिक नाला तथा ढल व्यवस्थापन प्रणाली लागू गर्ने प्रतिबद्धता पनि उहाँले व्यक्त गर्नुभयो।

त्यसैगरी गुणस्तरीय शिक्षा, स्वच्छ खानेपानी, सरसफाइ, स्वास्थ्य सेवामा सहज पहुँच तथा स्थानीय स्तरमै रोजगारीका अवसर विस्तार गर्ने दीर्घकालीन योजना कार्यान्वयन गरिने उहाँको भनाइ छ।

“विकास कागजमा सीमित हुनुहुँदैन, जनताको जीवनमा प्रत्यक्ष अनुभूति हुनुपर्छ,” भन्दै यादवले जनताको आवश्यकता र स्थानीय सम्भावनालाई केन्द्रमा राखी पारदर्शी तथा योजनाबद्ध रूपमा विकासका कार्यक्रम सञ्चालन गर्ने विश्वास दिलाउनुभयो।

सन्तपुरसहित समग्र क्षेत्रलाई पूर्वाधार, खेलकुद, शिक्षा र रोजगारीको केन्द्रका रूपमा स्थापित गर्ने लक्ष्यका साथ आफू चुनावी मैदानमा उत्रिएको उहाँले उल्लेख गर्नुभयो।

आरके श्रीवास्तव,रौतहट,१६ गते फाल्गुन ।
रौतहट । रौतहट निर्वाचन क्षेत्र नम्बर ३ मा गोविन्द चौधरीको चुनावी अभियान दिनप्रतिदिन सशक्त बन्दै गएको छ । जनता समाजवादी पार्टी नेपाल (जसपा नेपाल) का उम्मेदवार चौधरीले मौलापुर नगरपालिकाको सोनरनिया कोण सभालाई सम्बोधन गर्दै मधेशीको अधिकारको अधुरो संघर्षलाई पूर्णता दिन आफ्नो पार्टीलाई विजयी गराउन मतदातासँग आग्रह गर्नुभयो ।

सभामा बोल्दै चौधरीले आफू कसैसँग व्यक्तिगत दुश्मनी नरहेको र कसैलाई ठगेको इतिहास नभएको स्पष्ट पार्नुभयो । “नेता राम्रो भयो भने मात्र विकास र समृद्धि सम्भव छ,” उनले भने, “म जितेपछि जिम्मेवारी तपाईंकै हातमा रहनेछ। यदि मेरो प्रतिनिधिले गलत गरिरहेको छ भने नडराई सोध्नुस्, खबरदारी गर्नुस् ।”

उनले मतदातालाई सचेत रहन आग्रह गर्दै व्यक्तिगत स्वार्थभन्दा माथि उठेर सामूहिक भविष्यका लागि मतदान गर्न अपिल गर्नुभयो । “थोरै लोभले तपाईंका बालबच्चाको भविष्यमा डकैती हुन सक्छ,” भन्दै उनले भावुक शैलीमा मतदातालाई एकपटक अवसर दिन हात जोडेर अनुरोध गर्नुभयो ।

यसअघि चौधरीले मौलापुर नगरपालिका अन्तर्गत मर्यादपुर, चिरचिरिया, पतौरा, मौलापुर र सोनरनियामा भव्य शक्ति प्रदर्शन ¥याली गर्नुभएको थियो । ¥यालीमा हजारौं समर्थकहरूको उत्साहजनक सहभागिता देखिएको थियो, जसले क्षेत्र नम्बर ३ मा जसपा नेपालको बढ्दो प्रभावलाई संकेत गरेको स्थानीयहरूको भनाइ छ । भव्य मोटरसाइकिल ¥याली पनि निकालिएको थियो ।

कार्यक्रममा मौलापुर नगरपालिकाका मेयर प्रत्याशी रामप्रवेश यादव, शिवपर्सन यादव र विरेन्द्र यादवलगायतका नेताहरूले खुलेर समर्थन जनाएपछि रौतहट–३ मा चौधरीको उम्मेदवारी झनै बलियो बन्दै गएको विश्लेषण गरिएको छ ।

राजनीतिक विश्लेषकहरूका अनुसार मधेशी मुद्दा, विकासको प्रतिबद्धता र पारदर्शिताको नाराले चौधरीको अभियानलाई थप ऊर्जा दिएको छ । अबको चुनावी परिणामले रौतहट–३ को राजनीतिक दिशालाई नयाँ मोड दिन सक्ने आकलन गरिएको छ ।

आरके श्रीवास्तव,राैतहट,१४ गते फाल्गुन ।
रौतहट । मधेस प्रदेश सरकारका भौतिक पूर्वाधार मन्त्री राजकुमार गुप्ताले रौतहट क्षेत्र नम्बर ३ बाट जनता समाजवादी पार्टी नेपालका प्रतिनिधि सभा सदस्य पदका उम्मेदवार पूर्व मन्त्री गोविन्द चौधरी आफ्नो मार्गदर्शक रहेको बताएका छन् ।

रौतहटको देवाही गोनाही नगरपालिका–९ धरहरीमा बिहीबार आयोजित चुनावी कोणसभालाई सम्बोधन गर्दै मन्त्री गुप्ताले चौधरी विकास र समृद्धिप्रति सदैव चिन्तित रहने नेतृत्व भएको उल्लेख गरे । उनले चौधरी अत्यधिक मतका साथ विजयी हुने विश्वास व्यक्त गर्दै स्थानीय जनताले उनलाई अपार समर्थन गर्ने वातावरण बनेको बताए ।

मन्त्री गुप्ताले रौतहटमा आफूले इन्चार्जको रूपमा काम गरेको स्मरण गर्दै यहाँका जनता आफ्ना लागि आदरणीय रहेको बताए । उनले जसपा नेपालको विचार, नीति र दूरदर्शितालाई कार्यान्वयन गर्न पार्टी अध्यक्ष उपेन्द्र यादव लाई प्रधानमन्त्री तथा चौधरीलाई मन्त्री बनाउन मतदाताले सहयोग गर्नुपर्ने धारणा राखे ।

अघिल्लो सरकार हरेक क्षेत्रमा असफल भएको आरोप लगाउँदै उनले भ्रष्टाचार बढेको, विकास र समृद्धि प्रभावित भएको तथा देश आर्थिक-राजनीतिक संकटबाट गुज्रिएको बताए । संघीयता, समानुपातिक समावेशी प्रणाली र अधिकार संरक्षणका लागि जसपा नेपाल चुनावी मैदानमा रहेको उल्लेख गर्दै उनले छाताछापमा मतदान गर्न अपिल गरे ।
उनले विगत ४० दिनदेखि उम्मेदवार चौधरी घरदैलोमा सक्रिय रहेको उल्लेख गर्दै मतदातालाई उनको काँध मजबुत बनाउन आग्रह गरे । चौधरी विजयी भए केन्द्रमा उनले काम गर्ने र प्रदेशमा आफूले जिम्मेवारी सम्हाल्ने मन्त्री गुप्ताको भनाइ थियो ।

कार्यक्रम उम्मेदवार चौधरीको प्रमुख आतिथ्यतामा सम्पन्न भएको थियो । सभामा पूर्व प्रदेश सांसद रामकिशोर यादव, प्रदेश सांसद शोभा साह तथा महिला नेतृ किरण ठाकुरलगायतले पनि मन्तव्य व्यक्त गरेका थिए । पूर्व वडा अध्यक्ष राजेश साहले स्वागत मन्तव्य राखेका थिए भने कार्यक्रम सञ्चालन जसपा नेपालका युवा नेता पुनित रामले गरेका थिए ।

(विज्ञापन)

आरएन पटेल, रौतहट, फागुन १३ गते।
रौतहट निर्वाचन क्षेत्र नं. २ अन्तर्गत बौधीमाई नगरपालिका वडा नं. ६ पिपरियामा बुधवार जसपा नेपालको उम्मेदवार रामअशिष राय यादवले स्थानीय बासिन्दासँग भेटघाट तथा घरदैलो कार्यक्रम सम्पन्न गरेका छन। प्रतिनिधि सभा सदस्य पदका उम्मेदवार यादवले घरदैलो अभियान अन्तर्गत टोल-टोलमा पुगेर जनताको गुनासो सुन्नुका साथै सुझाव संकलन गरेका हुन।
कार्यक्रममा पूर्व मेयर राजीव रंजन यादव समेत सहभागी भई स्थानीयसँग प्रत्यक्ष संवाद गरेका छन। सो अवसरमा शिक्षा, स्वास्थ्य, खानेपानी, सडक पूर्वाधार, अधुरा विकास निर्माणका योजना तथा युवाको रोजगारी जस्ता विषयमा छलफल गरिएको हो।
स्थानीय बासिन्दाहरूले क्षेत्रको समग्र विकास, पारदर्शी शासन व्यवस्था र युवामैत्री कार्यक्रम सञ्चालन गर्नुपर्ने आवश्यकता औंल्याउँदै मधेश र मधेशी समुदायको हक-हितको सुनिश्चितताका लागि जनता समाजवादी पार्टी नेपाल नै सक्षम विकल्प भएको बताएका थिए। उनीहरूले आगामी निर्वाचनमा अत्यधिक मतले विजयी गराउने प्रतिबद्धता समेत व्यक्त गरेका छन।
उम्मेदवार यादवले जनताको विश्वास र साथले मात्रै समृद्ध क्षेत्र निर्माण सम्भव हुने उल्लेख गर्दै आफ्नो चुनाव चिन्ह ‘छाता’ मा मतदान गरी विजयी गराउन सम्पूर्ण मतदातासँग अनुरोध गरेका छन। उनले जनताका समस्या समाधान र विकासका अधुरा योजना पूरा गर्ने प्रतिबद्धता गरेका छन।
भेटघाट कार्यक्रममा स्थानीय नेता-कार्यकर्ता तथा सर्वसाधारणको भव्य उपस्थिति रहेको थियो।

आरके श्रीवास्तव,राैतहट,१३ गते फाल्गुन । 

रौतहट । रौतहट निर्वाचन क्षेत्र नम्बर ३ बाट प्रतिनिधि सभाका उम्मेदवार तथा पूर्व मन्त्री गोविन्द चौधरीले स्वच्छ र ईमानदार राजनीतिक अभ्यासमार्फत मात्र चुनाव जित्न सकिने बताएका छन् ।

आज कटहरिया ३ बिर्ति प्रष्टाेकामा घरदैलो कार्यक्रमपछि आयोजित कोण सभालाई सम्बोधन गर्दै उनले छलछाम, भ्रमपूर्ण प्रचार तथा अरूलाई बदनाम गरेर राजनीतिक सफलता हासिल गर्न नसकिने धारणा राखेका छन् ।

उनले मतदातालाई गलत र भ्रामक प्रचारको पछि नलाग्न आग्रह गर्दै यसपटकको निर्वाचनलाई “आरपारको लडाइँ” को संज्ञा दिए । चौधरीले आफू कुनै दबाब वा प्रलोभनमा नपर्ने उल्लेख गर्दै सिद्धान्त र विचारमा अडिग रहेको बताए ।

“राजनीति मेरो लागि पद प्राप्तिको माध्यम मात्र होइन, सामाजिक परिवर्तनको अभियान हो,” उनले भने, “यदि म ईमानदार छैन भन्ने लाग्छ भने मलाई मत नदिनुहोस्, तर भ्रममा परेर निर्णय नगर्नुहोस्।”

उनले मधेसी समुदायका अधिकार सुनिश्चित गर्न अझै धेरै काम बाँकी रहेको उल्लेख गर्दै लाई विजयी गराउन आग्रह गरेका छन् ।

चौधरीले मतदातालाई स्वच्छ छवि भएका उम्मेदवार चयन गर्न आग्रह गर्दै तडकभडक र भ्रम फैलाउने भाषणबाट सतर्क रहन सुझाव दिए ।

कार्यक्रममा स्थानीय नेता तथा कार्यकर्ताको उपस्थिति रहेको थियो ।