आरके श्रीवास्तव,राैतहट,२९ गते वैशाख ।
गरुडा – सहयोगी मनका धनी तथा दयालु स्वभावका स्वर्गीय मनोज कुमार चौधरीको चौथो पुण्यतिथिको अवसरमा गरुडा नगरपालिकाकी नगर उप प्रमुख पूनम कुमारी चौधरी र स्व. चौधरीका सुपुत्र आरुष चौधरीले वंशीराम जयसवाल अनाथालयमा खाद्यान्न, स्टेशनरी सामग्री तथा विभिन्न खानेकुरा हस्तान्तरण गरेका छन् ।
भावनात्मक वातावरणमा सम्पन्न उक्त कार्यक्रममा स्व. चौधरीको स्मृतिमा अनाथालयमा रहेका बालबालिकालाई माया र स्नेहसहित सामग्री वितरण गरिएको थियो ।
त्यसै अवसरमा नगर उप प्रमुख पूनम कुमारी चौधरीले स्वास्थ्य समस्याका कारण अस्पतालमा उपचाररत अनाथालयका सञ्चालक वंशीराम जयसवालको स्वास्थ्य अवस्था बुझेकी थिइन् । अस्पताल पुगेर उनले जयसवाललाई दोसल्ला ओढाएर सम्मान गर्दै शीघ्र स्वास्थ्यलाभको कामना पनि गरेकी थिइन् ।
स्व. मनोज कुमार चौधरीप्रति श्रद्धाञ्जली अर्पण गर्दै परिवारले सामाजिक सेवामा लागिरहने प्रतिबद्धता व्यक्त गरेकाे छ ।
वीरगंज, २९ गते बैशाख ।
चाइना फाउन्डेसन फर रुरल डेभलपमेन्टको आर्थिक सहयोग र ग्लोबल कोओपरेशन फर डेभलपमेन्ट, ललितपुरको आयोजनामा बारा र पर्सा जिल्लाका विभिन्न विद्यालयमा शैक्षिक सामग्री, हाइजेन किट, स्टेशनरी तथा खेलकुद सामग्री वितरण गरिएको छ।
यस कार्यक्रम अन्तर्गत बाराका ४ र पर्साका १ गरी कुल ६ विद्यालयका ९०४ बालबालिकाहरुको लागि शैक्षिक सामग्री,हाइजेन कीट तथा स्टेशनरी सामग्री बितरण गरिएको छ। साथै बाराका ६ र पर्साका १ गरी कुल ७ विद्यालयमा ३५ सेट खेलकुद सामग्री वितरण गरिएको हो । नेपाल राष्ट्रिय सेकेन्डरी स्कुल, बलरामपुर (विश्रामपुर गा.पा–३) मा १८१ बालबालिकाहरुलाइ शैक्षिक सामाग्री र ५ सेट खेलकुदका सामाग्रीहरु, नेपाल राष्ट्रिय सेकेन्डरी स्कुल, मुसहर्वा (विश्रामपुर गा.पा–४) मा १३८ जना बालबालिकाहरुलाई शैक्षिक सामाग्री र ५ सेट खेलकुद सामग्रीहरु,नेपाल राष्ट्रिय सेकेन्डरी स्कुल, बेलहिया (प्रसौनी गा.पा–६) २२९ जना बालबालिकाहरुको लागि शैशिक सामग्रीहरु र बिद्यालयमा ५ सेट खेलकुद सामग्रीहरु,श्री सरस्वती माध्यमिक बिद्यालय (प्रसौनी) २१५ जना बालबालिकाहरुको लागि शैक्षिक सामग्री र ५ सेट खेलकुदका सामाग्रीहरु,श्री सुन्दर मल रामकुमारी कन्या सेकेन्डरी स्कुल, वीरगंज १४१ जना छात्रालाई शैक्षिक सामाग्री र बिद्यालयमा ५ सेट खेलकुद सामग्रीहरु,नेपाल राष्ट्रिय सेकेन्डरी स्कुल, खजानी (सिम्रौनगढ न.पा–७) बिद्यालयलाइ ६ सेट खेलकुद सामग्रीहरु र नेपाल राष्ट्रिय सेकेन्डरी स्कुल, फेटा गा.पा–१ बिद्यालयको लागि ३ सेट खेलकुदका सामाग्रीहरु बितरण गरिएको थियो।
आज बलरामपुरस्थित नेपाल राष्ट्रिय सेकेन्डरी स्कुलमा सम्पन्न कार्यक्रम का.बा.वडा अध्यक्ष लाल झरी देवीको अध्यक्षतामा सम्पन्न भएको थियो। कार्यक्रममा विद्यालय व्यवस्थापन समितिका अध्यक्ष पतिलाल प्रसाद कलवार, वडा सचिब,प्रधानाध्यापक आनन्द कुमार गुप्ता, शिक्षक राजु कुमार कर्ण, वडा सदस्य हरिचन्द्र साह, मक्सुद अन्सारी, शिक्षिका श्वेता सिंह, माया कुमारी उप्रेती लगायत शिक्षक शिक्षिका तथा अभिभावकहरूको उल्लेखनीय उपस्थिति रहेको थियो त्यस्तै बिश्रामपुर ३ को बिद्यालयमा वडा अध्यक्ष श्री शिव चन्द्र प्रसाद यादब, बिब्यस अध्यक्ष शम्भु चौरासिया साथै समाजसेवी छोटेलाल प्रसाद पाल समेतको उपस्थितीमा सम्पन्न भयो। कार्यक्रमको ब्यबस्थापन युबा समाजसेवी लोकेश सिह र डा. धनन्जय यादबले गर्नुभएको थियो। साथै चाइना फाउन्डेसन फर रुरल डेभलपमेन्ट ललितपुर कार्यालयका प्रतिनिधि कबित नेपाली र ग्लोबल कोओपरेशन फर डेभलपमेन्ट, ललितपुरका प्रतिनिधि उत्तम कार्की समेतको उपस्थिती रहेको थियो ।चाइना फाउन्डेसन फर रुरल डेभलपमेन्ट ललितपुर कार्यालयका प्रतिनिधि कबित नेपाली जनकारी दिनुभयो।
प्रेमचन्द्र झा, रौतहट,२९ गते वैशाख ।
तराई–मधेसको सांस्कृतिक पहिचान बोकेको परम्परागत वस्तु ‘डाला’ अहिले अस्तित्व संकटमा परेको छ । बाँसबाट बनाइने यो कलात्मक सामग्री विवाह, बर्तबन्ध, पूजापाठ जस्ता शुभ कार्यहरूमा अपरिहार्य भए पनि यसको निर्माण गर्ने समुदाय—डोम—अझै सामाजिक विभेदको शिकार छ ।
‘डाला’ केवल एक घरेलु सामग्री होइन, यो मधेसी सभ्यता, संस्कार र जातीय इतिहासको प्रतीक हो। पौराणिक कालदेखि पवित्र मानिएको बाँसबाट बनाइने डाला आज पनि विवाह समारोहमा सम्मान र सम्पन्नताको प्रतीकको रूपमा प्रयोग हुन्छ। दुलहापक्षबाट डुलहीको घरमा डाला पुर्याउनु सामाजिक संस्कारको एक महत्वपूर्ण भाग हो ।
डाला निर्माणमा उच्च सीप आवश्यक पर्छ। बाँसलाई काट्ने, सुकाउने, चोइट्याउने र बुन्ने क्रम अत्यन्त समय लाग्ने प्रक्रिया हो । डोम समुदायका हातबाट बनाइने यी डाला आज पनि ग्रामीण क्षेत्रका घर–घरमा प्रयोग हुन्छन्। तर उनीहरूलाई समाजले सधैं ‘तल्लो जात’को दृष्टिले हेर्दै आएको छ । एक वृद्ध डोम कलाकारको भनाइमा, “हम डाला बनाबई छी, लोगके पूजा होअलई, मुदा हम्मर पानि तक नहि पिअलई,” भन्ने कथनले मधेसको जातीय विभाजन झल्काउँछ ।
हाल वर्षेनी डालाको प्रयोग घट्दै गएको देखिन्छ । प्लास्टिकका ट्रे, कागजका प्याकेज र एलुमिनियमका डब्बाले यसको स्थान लिन थालेका छन् । यसले डाला निर्माणको परम्परालाई संकटमा पार्दैछ । यद्यपि, केही युवा मधेसीहरू र स्थानीय संस्था डोम समुदायको सीप र योगदानलाई सम्मान गर्ने अभियानमा लागेका छन् ।
गौर नगरपालिकाका पूर्व नगर उपप्रमुख किरण कुमारी ठाकुर भन्छिन्, “हाम्रो परम्परा डोम समुदायको सीपसँग गाँसिएको छ । डोमहरूले बनाउने डाला बिनाको विवाह सम्भव छैन् । अब तिनीहरूको सम्मान र पारिश्रमिक दुबै सुनिश्चित गर्नुपर्छ।”
डाला संरक्षणका लागि विज्ञहरूले विभिन्न उपायहरू सुझाएका छन्—डोम समुदायका युवालाई सीप तालिम दिने, हस्तकला मेलामा डाला प्रदर्शनी गराउने, शैक्षिक पाठ्यक्रममा यसको महत्व समावेश गर्ने र कला–साहित्यमा डाला पात्रहरूलाई उजागर गर्ने।
डाला केवल बाँसको सामग्री होइन, यो मधेसको आत्मा हो । यदि आज संरक्षणको पहल भएन भने, भोलिको पुस्ताले डाला केवल पुस्तकमा पढ्ने वस्तु बन्नेछ ।
आरके श्रीवास्तव,राैतहट,२९ गते वैशाख ।
लोकतान्त्रिक पत्रकार संघ केन्द्रीय अध्यक्ष कामरेन्द्र वर्माको नेतृत्वमा संघ दिनप्रतिदिन सक्रिय बन्दै गएको छ । पत्रकारहरूकाे हक, अधिकार र पेशागत पहिचानलाई सशक्त बनाउने उद्देश्यसहित संघले हालै धमाधम जिल्ला संयोजकको मनोनयन प्रक्रिया अघि बढाएको छ ।
अहिलेसम्म संघले मधेस प्रदेशका चार जिल्लामा संयोजक तोकिसकेको छ । बारा जिल्लामा विनोद प्रजापति, रौतहटमा राजु कुमार श्रीवास्तव, सर्लाहीमा राजिव कुमार साह तथा महोत्तरीमा राजिव राय कुर्मी जिल्ला संयोजकको रूपमा चयन भएका छन् ।
संघका अनुसार यी सबै संयोजकहरू सक्रिय रूपमा संगठन विस्तार र पत्रकारहितका गतिविधिमा जुटिरहेका छन् ।
अध्यक्ष वर्माले बाँकी जिल्लाहरूमा समेत चाँडै संयोजक मनोनयन गरिने जानकारी दिएका छन् । यसकाे लागि कुरा भईसकेकाे उनी बताउँछन् ।
उनका अनुसार संघमा पत्रकारहरूको आकर्षण तीव्र रूपमा बढ्दै गएको छ, जसले आफूलाई थप उत्साहित बनाएको बताए ।
“अन्य पत्रकार संगठनहरू भन्दा फरक ढंगले हाम्रो संघले पत्रकारहरूको सशक्त पहिचान निर्माण गर्ने लक्ष्य लिएको छ,” अध्यक्ष वर्माले भने, “हामी लोकतान्त्रिक मूल्य, प्रेस स्वतन्त्रता र पेशागत मर्यादा कायम गर्न कटिबद्ध छौं ।”
संघले आगामी दिनमा पत्रकारहरूको क्षमता अभिवृद्धि, पेशागत सुरक्षा र सामाजिक उत्तरदायित्वका सवालमा विविध कार्यक्रम सञ्चालन गर्ने जनाएको छ । संघले आगामी दिनहरूमा केन्द्रदेखि जिल्ला तहसम्म अझ प्रभावकारी रूपमा काम गर्ने योजना बनाएको छ ।
काठमाडौं, वैशाख २९ गते – लोसपा नेपालका महासचिव मनिष मिश्रले आतंकवादविरुद्ध सम्पूर्ण विश्व एकजुट भएर अघि बढ्नुपर्ने आवश्यकता रहेको बताएका छन् । सामाजिक संजालमा उनले आफनाे आधिकारिक धारणा राख्दै यस्ताे बताएका हुन् ।
भारतीय राजदूत नवीन श्रीवास्तवद्वारा पहलगाम आतंकवादी हमलामा मारिएका नेपाली नागरिक सुदीप न्यौपानेको परिवारलाई भेट गरेको घटनाप्रति मिश्रले प्रशंसा गर्दै भने, “भारतको यो कदम अत्यन्त सराहनीय तथा मानव सभ्यताको उच्चतम बिन्दु हो।”
उनले नेपालका नागरिकप्रतिको सम्मान र सहानुभूतिलाई कूटनीतिक मर्यादाको उत्कृष्ट उदाहरणका रूपमा ब्याख्या गरेका छन् ।
मिश्रका अनुसार आतंकवाद मानव सभ्यताको साझा दुश्मन हो र यसविरुद्ध सबै देशहरू मिलेर कठोर कदम चाल्नुपर्ने समय आएको बताएका छन् ।
आरके श्रीवास्तव,गरूडा,२९ गते वैशाख ।
राैतहटकाे गरुडा नगरपालिका वडा नम्बर ४ मा अवस्थित जीवन विज्ञान योग केन्द्रको वार्षिकोत्सव कार्यक्रम भव्यताका साथ सम्पन्न भएको छ । “गरौँ योग, बनौँ निरोग” भन्ने मूल नारासहित आयोजित कार्यक्रममा नगर प्रमुख कन्थमनी जयसवनल लगायत विभिन्न व्यक्तित्वहरूको उपस्थिति रहेको थियो ।
कार्यक्रम मार्फत केन्द्रले आफ्नो पहिलो वर्ष सफलतापूर्वक सम्पन्न गरी दोस्रो वर्षमा प्रवेश गरेको खुशी सँगै स्थानीय समुदायमा स्वास्थ्य, मानसिक सन्तुलन तथा सकारात्मक जीवनशैलीप्रति जागरूकता फैलाउने कार्यमा केन्द्रले पुर्याएको योगदानप्रति सराहना व्यक्त गरिएकाे छ ।
बुद्ध जयन्तीको पावन अवसरमा सोही कार्यक्रममा “माँ दुर्गा ऊर्जा ध्यान योग प्रयोगशाला” नामकरण गरि औपचारिक रूपमा उद्घाटन पनि गरिएको छ । उद्घाटन समारोहमा बोल्दै नगर प्रमुख जयसवालले यस्तो सकारात्मक प्रयासले नगरवासीको शारीरिक, मानसिक र आत्मिक शुद्धिकरणमा सघाउ पुर्याउने विश्वास व्यक्त गर्दै नगरपालिकाबाट निरन्तर साथ र समर्थन रहने प्रतिवद्धता जनाएका छन् ।
स्थानीय बासिन्दाहरूले समेत यस्तो पहललाई स्वागत गर्दै आगामी दिनहरूमा अझ व्यापक सहभागिता हुने अपेक्षा व्यक्त गरेका छन् ।
आरके श्रीवास्तव,राैतहट,२९ गते वैशाख ।
रौतहट । मधेस प्रदेशको खेलकुद तथा समाज कल्याण मन्त्रालय अन्तर्गत विनियोजित २५ लाख रुपैयाँको बजेटबाट गुजरा नगरपालिका वडा नम्बर ८ जोगौलिया देवीपुरस्थित ऐतिहासिक ईदगाहको स्तरोन्नति तथा घेराबेराको कार्यका लागि शिलान्यास सम्पन्न भएको छ ।
पूर्व राज्यमन्त्री तथा प्रदेश सांसद केशव राय चौधरीको प्रमुख आतिथ्यतामा सम्पन्न शिलान्यास समारोहमा वडाका स्थानीय नेता, समाजसेवी, उपभोक्ता समिति सदस्य, कार्यकर्ता तथा जनसमुदायको उल्लेखनीय उपस्थिति रहेको थियो । कार्यक्रममा सहभागिता जनाएका अधिकांश व्यक्तिहरूले चौधरीको दीर्घ प्रयास र निरन्तर पैरवीकै परिणामस्वरूप यो योजना कार्यान्वयनमा आएको बताएका छन् ।
स्थानीय धार्मिक तथा सांस्कृतिक महत्व बोकेको ईदगाह क्षेत्रको संरक्षण र व्यवस्थापनका लागि लामो समयदेखि उठ्दै आएको मागलाई सम्बोधन गर्दै मधेस प्रदेश सरकारसँग समन्वय गरी चौधरीले यस योजनालाई मूर्तरूप दिएका हुन् ।
शिलान्यास कार्यक्रममा बोल्दै प्रमुख अतिथि चौधरीले धार्मिक सद्भाव, सामाजिक विकास तथा सामुदायिक संरचनाको समुन्नतिमा यस्ता आयोजनाहरू महत्वपूर्ण भूमिका खेल्ने बताए । उनले आगामी दिनमा पनि विकासका थप योजनाहरू गाउँसम्म पुर्याउन आफू प्रतिबद्ध रहेको स्पष्ट पारेका हुन् ।
स्थानीय बासिन्दाहरूले ईदगाहको स्तरोन्नति कार्यलाई ऐतिहासिक उपलब्धिका रूपमा लिँदै पूर्व राज्यमन्त्री चौधरीप्रति आभार व्यक्त गरेका छन् ।
उक्त कार्यले न केवल धार्मिक स्थलको सौन्दर्य र सुरक्षालाई बढावा दिनेछ, तर समुदायबीचको एकता र सहकार्यलाई समेत सुदृढ बनाउनेछ भन्ने अपेक्षा गरिएको छ ।
काठमाडौं, २८ बैशाख । आम जनता पार्टीका अध्यक्ष तथा पूर्वमन्त्री प्रभु साहले सरकारले ल्याएको नीति तथा कार्यक्रमलाई ‘डायबिटिजको बिरामीलाई मिठाई खुवाएको’ संज्ञा दिएका छन् । प्रतिनिधिसभाको आजको बैठकमा नीति तथा कार्यक्रममाथिको छलफलमा भाग लिने क्रममा सांसद साहले यस्तो टिप्पणी गरेका हुन् ।
उनले भने,‘यो नीति तथा कार्यक्रमलाई मैले एक शब्दमा भन्नुपर्दा डायबिटिजको बिरामीलाई मिठाई खुवाएजस्तै हो, राज्यको उच्च ओहोदामा बस्नेहरुले खुलेआम लुट्ने अनि भ्रष्टाचार गरेको पैसा विदेशमा थुपार्ने, अहिलेको मूल प्रवृत्ति भएको छ । लुटको पैसा, भ्रष्टाचारको कालो धन रोक्छौं र फिर्ता ल्याउँछौं भनेर प्रतिबद्धता हुनुपर्दथ्यो । त्यसरी नीति आउनुपर्दथ्यो । तर, यहाँ त ठीक उल्टो भएको छ, खुलेआम लैजानुहोस भन्नेखालको नीति तथा कार्यक्रम देखिन्छ ।’
विदेशमा श्रममा रहेका लाखौं युावहरुले आफ्नो खुन–पसिना चुहाएर कमाएको पैसा नेपाली जनताको लागि हो कि भ्रष्टाचारीहरुको लागि हो ? भन्दै पूर्वमन्त्री साहले प्रश्न गरे । उनले भने,‘आज जो युवाले वैधानिक तवरले पैसा पठाउँछ, त्यसको पैसा घट्ने, अनि कालो धनसँग साट्दा त्यो पैसा बढेर गाउँमा पुग्ने, के सरकारलाई थाहा छैन ? नेपाली श्रमिक युवाहरु जतिको संख्यामा विदेशमा हुनुहुन्छ, त्यही अनुपातमा विदेशबाट रेमिट्यान्स आएको छैन भन्ने कुरा त सरकारलाई राम्रोसँग थाहा छ त। यहाँ त नेताज्यूहरुको छोराछोरीको लागि पैसा विदेशमा पठाउनुपर्ने छ, यहाँ लुटेको पैसा विदेशमा थुपार्नुपर्ने छ, त्यो मिलान गर्नको लागि जानी बुझिकन यसरी प्रावधान ल्याउने ?’ उनले नेपाल सरकारले वैधानिक तवरले पैसा पठाउनेहरुलाई कर हटाइदिने र थप सुविधा दिनुपर्ने सुझाव दिए ।
उनले नेपाल प्राकृतिक रुपमा धनी र स्वर्ग भएको बताए । उनले भने,‘प्रकृतिले नेपाललाई स्वर्ग दियो, तर नेताहरुको कुकर्मले आज यो नर्क बन्यो । प्राकृतिक स्रोत तथा साधनहरुको आम्दानी आज नेताहरुको स्वार्थमा प्रयोग भैरहेको छ । नेपालको झण्डै आधा भूभागमा जंगल छ । जंगलको रक्षा गर्न, संरक्षण गर्न, विकास गर्न नेपाल सरकारले झण्डै ३० अर्ब खर्च गर्छ, त्यो ३० अर्ब पैसा नेपाली जनताको खुन, पसिनाको पैसा हो । अनि आफ्नै जंगलको काठ किन्नुपर्दा सात समुन्द्रपारीको देशभन्दापनि महँगो तिर्नुपर्ने, जंगलको पैसा के भयो भनेर सोध्ने कि नसोध्ने ? जुन जंगलको लागि हामीले ३० अर्ब लगानी लगाउँछौं, त्यो जंगलबाट कति आम्दानी आउँछ ?’
उनले गाउँघरमा आजपनि दुई बिघामा बगैंचा लगाउँदा एउटा परिवार चल्ने आम्दानी हुने गरेको भन्दै जंगलको रक्षाको लागि अरबौंमा लगानी गर्दापनि एक अर्बपनि आम्दानी गर्न नसकेकोमा भने आलोचना गरे । आक्रोश पोख्दै उनले भने,‘के हाम्रो प्राकृतिक सम्पदा, साधन नेताहरु र उनीहरुको आसेपासेको लागि हो ? हाम्रो खुन अनि पसिना ? हामीले सोध्ने कि नसोध्ने ?’
नेपाल जलस्रोतमा पनि विश्वकै दोस्रो धनी देश भएको उल्लेख गर्दै नदीबाट कति आम्दानी आएको छ ? भनेर प्रश्न तेर्साए । उनले भने,‘आज पानी किनेर खानुपरेको छ, बालुवा, गिट्टी, ढुंगा किन्नुपरेको छ, नदी हाम्रो होईन ?’
उनले देशको जम्मा भूभागको २५ प्रतिशत जग्गा नेपाली जनताले उपयोग गरेको तथ्यांक पेश गर्दै साहले त्यो २५ प्रतिशतको उपयोगबाट झण्डै ६० प्रतिशतको जीवन निर्वाह भएको बताए । उनले भने,‘नेपालमा जति भूभाग छ, त्यसको २५ प्रतिशत नेपाली जनताले जोतिरहेका छन्, नेपाली जनताले जोत्दा झण्डै ६० प्रतिशतको जीवन चल्ने, जिडिपीमा एक तिहाई योगदान पनि हुने, तर नेपाल सरकारको मातहातमा रहेको ३० प्रतिशत जग्गा छ, त्यसको आम्दानी कति आयो ? हामीले सोध्ने कि नसोध्ने ? यो जग्गाबाट यति आम्दानी गर्छु वा उपयोग यसरी गर्छु भनेर प्रतिबद्धता आउनुपर्ने होईन र ?’
राज्यको लुटकारी चरित्रलाई नै बढावा दिनेगरि अहिलेको नीति तथा कार्यक्रम आएको उनको आरोप छ । उनले नेपालमा कर आतंकपनि उस्तै रहेको चित्रण गरे । उनले भने,‘करको कारणले हाम्रो उद्योग धराशयी हुँदैछ । व्यापार तथा व्यवसाय चौपट हुँदैछ । अरु देशको तुलनामा हाम्रो देशमा करका शीर्ष धेरै छन् । करको दर बढि छ, करको दायरा बढि छ । कर लिने निकाय र सरकार पनि बढि छन् । छिमेकी देशहरु भारत र चीन हेरौं, चीन र भारतमा सामान सस्तो किन हुन्छ ? भारत, चीन र नेपालबीच करको बारेमा तुलनात्मक अध्ययन गर्न भन्छु । त्यत्रो ठूलो देश भारत तर कर लिने सरकार जम्मा ३७ वटा छन् । अर्को ठूलो देश चीनमा पनि जम्मा ३४ वटा सरकार छन्, जसले कर लिन्छ । नेपालमा ७६१ वटा सरकार छन्, जसले कर लिन्छन् । भारतमा जम्मा १४ शीर्षकमा कर लिन्छन्, जबकी नेपालमा ४६ वटा शीर्षकमा कर लिन्छन् । केन्द्र सरकारले आयकर, भन्सारकरलगायत झण्डै २१ वटा कर लगाउँछ, प्रदेश सरकारले सवारी, मनोरञ्जनजस्ता कर झण्डै ८, ९ वटा कर लगाउँछ । स्थानीय तहले सम्पत्ति कर, मालपोत करजस्ता झण्डै १४ वटा कर छन् ।’
उनले खुला सिमानालाई वरदान बनाउन सकिनेपनि उपाय सुझाए । उनले सरकारले अघि सारेको अहिलेको नीति तथा कार्यक्रमले देशलाई बर्वाद बनाउने आरोप लगाए । उनले अहिलेको नीति तथा कार्यक्रमले जनतालाई निराशा बनाउने काम गरेको बताए । उनले नीति तथा कार्यक्रमलाई सिधै अस्विकार गर्न पनि सांसदहरुलाई आग्रह गरे ।
आरके श्रीवास्तव,राैतहट,२८ गते वैशाख ।
गौर । ‘रामा यादव स्मृति प्रतिष्ठान’द्वारा प्रदान गरिने पत्रकारिता पुरस्कार २०८२ सालका लागि शारदा पोखरेल (बारा, रातोपाटी अनलाइन) र चाँदनी झा (महोत्तरी, टिभी टुडे) लाई प्रदान गरिने भएको प्रतिष्ठानका संरक्षक जयप्रकाश यादवले जानकारी दिनुभएको छ ।
स्वर्गीय रामा यादवको चौंथो पुण्यतिथिको अवसरमा गौरमा आयोजित कार्यक्रममा नेपाल पत्रकार महासंघ रौतहट अध्यक्ष सञ्जय कार्कीले दुबै महिला पत्रकारको नाम घोषणा गर्दै स्वास्थ्य पत्रकारितामा योगदान पुर्याएकोमा सम्मान गरिएको जानकारी दिए ।
स्व. रामा यादवको चौथो स्मृतिमा प्रदान गरिने यस पुरस्कारको राशी २६ हजार एक रुपैयाँ रहेको छ । कोरोना महामारीका बेला २०७८ मा दिवंगत यादव सफल सञ्चार उद्यमी थिए । कार्यक्रममा विभिन्न सञ्चारकर्मीहरूले रेड टेलिभिजन र यादवको योगदानको चर्चा गर्दै संस्थाको प्रगतिको कामना गरेका छन् ।
साे अवसरमा नेपाल पत्रकार महासंघका पूर्व अध्यक्षद्वय शैलेन्द्रकुमार गुप्ता,प्रेमचन्द्र झा,कान्तिपुरका उपसम्पादक शिवपुरी,प्रभाकुमार झा,नेपाल पत्रकार महासंघ रौतहट शाखाका उपाध्यक्ष डिल्लीबहादुर कार्की,श्रमजीवि पत्रकार महासंघका अध्यक्ष सन्तोष पौडेल सहितका सञ्चारकर्मीहरूकाे उपस्थिति रहेको थियो ।
महोत्तरी,२७ गते वैशाख ।
बलवा । महोत्तरी जिल्लाको बलबा नगरपालिकामा आज शनिबार सम्पन्न झण्डा मेला पूजाको विसर्जन कार्यक्रममा नेपाल सरकारका श्रम, रोजगार तथा सामाजिक सुरक्षा मन्त्री शरत सिंह भण्डारीको विशेष उपस्थिति रहेको थियो ।
धार्मिक तथा सांस्कृतिक महत्व बोकेको झण्डा मेला बलबा नगरपालिकाको परम्परागत चाड हो, जसमा प्रत्येक वर्ष हजारौं भक्तजन सहभागी हुन्छन् । पूजाको विसर्जन समारोहमा स्थानीयबासी, विभिन्न जातीय तथा धार्मिक समूहका अगुवाहरू, जनप्रतिनिधि, समाजसेवी तथा सुरक्षा निकायका प्रतिनिधिहरूको समेत उल्लेखनीय सहभागिता रहेकाे थियोे ।
मन्त्री भण्डारीले समारोहलाई सम्बोधन गर्दै धार्मिक तथा सांस्कृतिक पर्वहरूले समुदायमा एकता र सद्भाव कायम गर्न सहयोग गर्ने बताउनु भएकाे छ । उहाँले धार्मिक सम्पदाको संरक्षण तथा प्रवर्द्धनमा सरकार प्रतिबद्ध रहेको र यस्ता कार्यक्रमले पर्यटन प्रवर्द्धनमा समेत सहयोग पुर्याउने उल्लेख गर्नुभयो ।
कार्यक्रममा सांस्कृतिक झाँकी, भजन कीर्तन, तथा पारम्परिक वाद्ययन्त्रसहितको शोभा यात्रा पनि प्रदर्शन गरिएको थियो ।
झण्डा मेला विसर्जन समारोह शान्तिपूर्ण र उल्लासपूर्ण वातावरणमा सम्पन्न भएको जानकारी गराइएको हाे ।
