आरके श्रीवास्तव,रौतहट,०३ गते वैशाख ।
रौतहट जिल्लाको फतुवा विजयपुर नगरपालिकामा बिजुलीको बिल भुक्तानी र सुशासनको माग गर्दै स्थानीयवासीहरूले विरोध प्रदर्शन गरेका छन् । आज नगर क्षेत्रमा स्थानीयहरू सडकमा उत्रिएर नाराबाजी गर्दै नगरपालिकालाई दबाब दिएका थिए । प्रदर्शनका क्रममा “बिजुलीको बिल भुक्तानी गर”, “जिरो फाइलको सिद्धान्त लागू गर” लगायतका नारा लगाइएको थियो । आक्रोशित स्थानीयहरू नगरपालिकामा पुगेपछि प्रमुख प्रशासकीय अधिकृत कमल प्रसाद दहालले समस्याको समाधानका लागि दुई हप्ताको समय माग गरेका छन् । साथै उनले नदीको ठेक्का प्रक्रिया आगामी आर्थिक वर्षमा अघि बढाउने प्रतिबद्धता जनाउँदै विकास निर्माणका काम गुणस्तरीय बनाइने बताएका छन् ।
यता कार्यवाहक नगरप्रमुख अम्बेया खातुनले यस विषयमा कार्यपालिका बैठक बस्ने जानकारी दिँदै बजेट सञ्चालन नभएको अवस्थामा पनि नियमअनुसार जहाँ सम्भव हुन्छ त्यहाँबाट बिजुली बिल भुक्तानी गराउन निर्देशन दिएकी थिइन् । प्रदर्शनकारीहरूको तर्फबाट स्थानीय नेता शिवपूजन यादवले नगरपालिकाको आश्वासनकै कारण सर्वसाधारणको बिजुली बिल बढेको आरोप लगाएका छन् । उनले समयमै बिल तिर्ने व्यवस्था नगरिँदा यस्तो अवस्था सिर्जना भएको बताए । साथै उनले नगरप्रमुखको नीतिका कारण नागरिकहरूलाई “भिख माग्नुपर्ने अवस्था” आएको टिप्पणी गर्दै छिटो कार्यपालिका बैठक बसेर निर्णय गर्न माग गरेका छन् ।
उनले माग सम्बोधन नभए राजीनामा दिन बाध्य पारिने चेतावनी समेत दिएका छन् । यसैबीच, उक्त विषयमा कार्यपालिका बैठकमा साँझ अबेरसम्म छलफल जारी रहेको बैठकको निर्ण सार्वजनिक भो नगरिएको सहकर्मी रुपेश यादवले जानकारी दिएका छन् ।
आजको राशिफल बिस २०८३ बैशाख ४ गते शुक्रबार ईस २०२६ अप्रिल १७ नेपाल सम्बत ११४६ चौलागा आमै, सिद्धार्थि नाम संवत्सर सूर्य उत्तरायण, वसन्त ऋतु, बैशाख कृष्ण पक्ष औंसी, चन्द्रमा मीन राशिमा, रेवती नक्षत्र, वैधृति योग, चतुष्पाद करण । आज नेपालमा सुर्योदय बिहान ५ बजेर ३९ मिनेटमा र सूर्यास्त साँझ ६ बजेर २९ मिनेटमा हुनेछ ।
आज जन्म लिने बच्चा मीन राशीको हुनेछ । आज मातातीर्थ औंसी (आमाको मुख हेर्ने दिन) परेको छ ।
मेष (चु, चे, चो, ला, लि, लु, ले, लो, अ)
लामो समयपछि एकान्तमा बस्न पाउने र रमाउने समय छ, आफ्ना कुरा सुनाउनुभन्दा पनि पार्टनरका भावना बुझ्ने प्रयास गर्नुहोला । सहकर्मी साथी वा सहयोगीसित झैझगडा हुने दिन हो, बल प्रदर्शन गर्नु हुँदैन, नत्र सानोतिनो चोटपटक नै लाग्नसक्ने परिस्थिति छ । आयातनिर्यातको काम, वैदेशिक प्रयोजनको व्यवसाय, ट्राभेल एजेन्सी आदिका व्यवसायी खुशी हुने दिन हो, तर घरपरिवारको चाहनाअनुसार खर्चमा बृद्धि हुनसक्छ ।
बृष (इ, उ, ए, ओ, बा, बि, बु, बे, बो)
झैझगडा वा विवादबाट टाढा बसेको जाति हुन्छ, अर्काको काम वा विषयवस्तुमा ध्यान दिएमा अवगाल वा अपजस खेप्नुपर्ने समय छ । विवाद, प्रतियोगिता वा प्रतिस्पद्र्धामा सरिक हुँदा चुनौती झेलेर अघि बढ्ने समय हो, योजनाबद्ध तैयारी गरे विजय तपाईंको पोल्टामा हुनेछ । अनावश्यक काममा समय खेर फाल्नु हुँदैन, कुनै महत्त्वपूर्ण घरायसी काममा सँगीसाथीको सहयोग लिन सकिने छ । क्षमता प्रदर्शन गरी प्रतिष्ठा आर्जन गर्न सकिने दिन हो ।
मिथुन (का, कि, कु, घ, ङ, छ, के, को, ह)
कल्पना र भावनामा रुमल्लिन सकिन्छ, तर आज कामबाट फुर्सद निकालेर कुनै नजानेको विषयवस्तु र नयाँ ज्ञान सिक्न कोसिस गर्ने समय हो । सँगीसाथी र प्रियजनहरू जीवनका महत्त्वपूर्ण पक्ष हुन्, त्यसैले व्यक्तिगत जिम्मेवारी र हार्दिकताका बीचमा सन्तुलन राख्न प्रयास गर्नुपर्ने दिन हो । प्राविधिक विषय वा गणितीय कुरामा ध्यान केन्द्रित हुनेछ । कुनै आकस्मिक निणर्य लिनुपर्ने बाध्यता पनि आइलाग्नेछ, जुन तपाईंको आत्मसम्मान र गरिमा विपरीत हुनसक्छ ।
कर्कट (हि, हु, हे, हो, डा, डि, डु, डे, डो)
सहकार्य वा साझेदारीको काममा दौडधूप गर्नुपर्ने समय हो, कारोबारमा ध्यानकेन्द्रित हुनसक्दैन, तर पनि आर्थिक सन्तुलन कायम रहने दिन हो । घरभित्रका झिनामसिना काममा व्यस्त रहँदा समय बितेको पत्तो पाइँदैन, तर सानातिना र बेकामे कुरामा मन अल्झियो भने निराशा व्यहोर्नुपर्छ । सोच्ने शक्ति र निणर्यात्मक क्षमतामा कमी आउने दिन हो । आज हरेक कुरामा यो गरौं कि त्यो गरौं भन्ने अलमल हुनसक्छ ।
सिंह (मा, मि, मु, मे, मो, टा, टि, टु, टे)
पेसा वा कार्यक्षेत्रप्रतिको व्यवहारिक दृष्टिकोणले तपाईलाई आर्थिक रूपमा समृद्ध बन्न मद्दत गर्नेछ, धार्मिक वा सामाजिक गतिविधिमा सक्रिय हुँदा वा दुःखमा परेका व्यक्तिको सहयोग गर्न पाउँदा भाग्यबृद्धि हुनेछ । कुनै पुरानो समस्या वा कारबाहीमा ध्यान केन्द्रित हुनसक्छ, त्यसैले नबुझेको विषय छ भने सहकर्मीको मद्दत लिएमा समस्या हल गर्न सजिलो हुनेछ । इष्टमित्र र नातेदारसँग भेटघाट हुनेछ, पार्टनरले आफूलाई कति ब्याकअप गर्छ भन्ने थाहा पाउँदा एउटा नौलो अनुभूति र रोमाञ्चकता देखापर्ने दिन हो ।
कन्या (टो, प, पि, पु, ष, ण, ठ, पे, पो)
अतिरिक्त धन प्राप्त हुनाले सोख पूरा गर्न सकिने छ । नयाँ जिम्मेबारी प्राप्त हुनुका साथै प्रतीक्षित नतिजाले उत्साह बढाउने समय हो । एकआपसमा भेटघाट हुने र रमाउने वेला छ, तर बोल्दा निकै विचार पुर्याउनु होला, नत्र ससाना कुरामा पनि नोकझोक बढ्न सक्छ । घरमा सम्पर्क राखी व्यवहारिक जानकारी प्राप्त गर्ने समय हो । परिवारभित्रका सानातिना समस्या सुन्दा दिक्क लाग्ने र एक आपसमा मनोमालिन्य बढ्ने समय देखिन्छ ।
तुला (र, रि, रु, रे, रो, ता, ति, तु, ते)
प्रायः सबै काममा तपाईंकै संयोजकत्व र भूमिका रहने देखिन्छ, तर पनि केही समय व्यक्तिगत खुसी र आन्तरिक आवश्यकताका लागि छुट्याउनु पर्ने हुन्छ । आत्मविश्वास जाग्नेछ, नयाँ कुरो जान्ने उत्सुकता बढ्नेछ, आलस्य नगरी लक्षप्रति उन्मुख भएमा उच्च सफलता हासिल गर्ने दिन हो । मिहिनेत र लगनशीलता नै तपाईंको पहिचान हो भन्ने बुझी यसलाई जारी राख्नु ठीक हुन्छ । आफ्नो करियरसँग सम्बन्धित विषयहरू खास गरी महत्वाकाङ्क्षी प्रयासहरूमा थप जोड दिने समय हो ।
बृश्चिक (तो, ना, नि, नु, ने, नो, या, यि, यु)
रोमान्स र प्रेम विश्वासको जगमा मात्र विकसित हुने गर्दछ, आज त्यस्तो व्यक्तिसँग भेट हुनसक्छ, जससँग बाँकी जीवन बिताउन सजिलो हुनेछ । रिस र घमण्डको कुचक्रमा फँस्ने दिन हो । आत्मसंयम बन्ने प्रयास गर्नुहोला, नत्र परिस्थिति अझ जटिल बन्नसक्छ । सानोतिनो यात्रामा जानुपर्दा व्यापारमा ध्यानकेन्द्रित हुनसक्दैन । दण्ड वा जरिवानामा पर्न सकिने वा कुनै कानूनी बाधाअड्चन व्यहोर्नुपर्ने हुन्छ ।
धनु (ये, यो, भ, भि, भु, ध, फा, ढ, भे)
इच्छा र आकाङ्क्षाले पूणर्ता पाउने तथा आयआर्जनका मार्गमा बढोत्तरी हुने राम्रो दिन छ, कुनै यात्रामूलक काम छ भने अझ धेरै लाभ पाउन सकिने छ । कारोबारमा राम्रै फड्को मार्ने समय छ, लागी परेमा रोकिएको काम बन्नेछ तर दायित्व र जिम्मेवारी भने बढिरहने समय हो । कामधन्दामा सहजताको अनुभूति हुनेछ, घरपरिवारमा पनि समझदारी रहने छ । अझ साथीसंगी र बाल्यावस्थाका मित्रसँग भेटघाट हुनाले दिन रमाइलो बन्नसक्छ ।
मकर (भो, ज, जि, खि, खु, खे, खो, गा, गि)
मिहिनेतले भविष्य सुध्रनेछ, करियर र व्यवसायप्रतिको चासो बढ्नेछ, उच्च शिक्षाका छात्रछात्राले भावी कार्यक्षेत्रका बारेमा जानकारी बटुल्ने दिन हो । प्रतियोगिता वा प्रतिस्पद्र्धामा सफल भइने दिन हो, कुनै कामलाई टुङ्गोमा पुर्याउन प्रयास गरिने छ, परिश्रमको विकल्प छैन, त्यसैले सर्टकट वा छोटो बाटो छोडेर मिहिनेत गरेर अगाडि बढ्नु ठीक हुन्छ । सिनियर स्टाफलाई रिझाउन सकिने छ । व्यक्तित्व विकासको योजना बनाउने र पदोन्नति वा थप अध्ययनका लागि प्रयास गर्ने दिन हो ।
कुम्भ (गु, गे, गो, सा, सि, सु, से, सो, द)
ज्ञानको भण्डार पूर्ण हुने तथा दार्शनिक भावना जाग्ने समय हो, साथीहरू र गुरुसँग छलफल गरेमा दिमागलाई अझ तिखार्न पाइने छ । अप्ठ्यारा परिस्थितिलाई पनि सहज बनाउन सकिने तथा चुनौतीका माझमा प्रतिष्ठा कायम राख्न सकिने सुन्दर दिन छ, कार्यपद्धतिमा सुधार गरी अघि बढेमा भाग्यबल बढ्नुका साथै ठूलाबडालाई खुसी तुल्याउन सकिने छ । कार्यक्षेत्रमा गज्जबले समय व्यतीत हुनेछ, अझ राम्रो होस् भन्ने उद्देश्यले कुनै दुःखीलाई सहयोग गर्नु वा कुनै धार्मिक क्षेत्रमा दान गर्नु राम्रो हुन्छ ।
मीन (दि, दु, थ, झ, ञ, दे, दो, च, चि)
आफ्नै वा आत्मीय जनको स्वास्थ्यस्थिति कमजोर बन्नाले तनाव उत्पन्न हुनसक्ने समय छ । धेरै टाढाको यात्रामा ननिस्कनु राम्रो हुन्छ । लेनदेनका क्रममा दबाबमा हुनुहुन्छ भने पनि समझौता गर्नुहुँदैन, बरु परिस्थिति विपक्षमा छ भने पुनर्विचार गर्नुहोस्, समय बित्दै जाँदा दैनिकीमा सुधार आउने छ । मनोबल र आँतमा कमजोरी देखा पर्नसक्छ, कामधाम र जिम्मेबारीमा मात्र होइन, आफ्नो तन्दुरुस्ती र स्वास्थ्यपक्षको पनि ख्याल राख्नुपर्छ ।
बज्जिकाञ्चल संवाददाता,रौतहट, २९ चैत ।
रौतहटको देवाहीगोनाही नगरपालिकामा नेकपा (एमाले) बाट निर्वाचित मेयर प्रेमलाल साह आम जनता पार्टी (आजपा) मा प्रवेश गरेका छन्। मेयर साहको प्रवेशसँगै स्थानीय राजनीतिमा नयाँ तरंग उत्पन्न भएको छ।
देवाहीगोनाहीमा आयोजित भव्य कार्यक्रमबीच मेयर साहसहित वडा नं. ४ का अध्यक्ष रामप्रवेश पटेल, वडा नं. ९ का अध्यक्ष बिरबहादुर साह लगायतका जनप्रतिनिधिहरू सामूहिक रूपमा आजपामा प्रवेश गरेका हुन्। आम जनता पार्टीका सचिवालय सदस्य रामशरण यादवका अनुसार अझै अन्य जनप्रतिनिधि र कार्यकर्ताहरू पनि पार्टी प्रवेशको तयारीमा रहेका छन्।
कार्यक्रममा आजपा अध्यक्ष तथा पूर्वमन्त्री प्रभु साहले नवप्रवेशी नेता तथा जनप्रतिनिधिहरूलाई खादा तथा अबिर लगाएर स्वागत गर्दै पार्टीलाई अझ सशक्त बनाउने विश्वास व्यक्त गरे। उनले जनताको अपेक्षा अनुसार काम गर्न र वैकल्पिक राजनीतिक शक्तिको रूपमा आजपालाई स्थापित गर्ने प्रतिबद्धता जनाए।
पछिल्लो समय अध्यक्ष साह विभिन्न नगर तथा गाउँस्तरमा सक्रिय रूपमा जनभेटघाट गर्दै आएका छन्। फतुवा विजयपुर, कटहरिया, मौलापुर लगायतका स्थानहरूमा नेता–कार्यकर्तासँग छलफल गर्दै जनताको समस्या र सुझाव संकलन गरिरहेका उनी आज देवाहीगोनाहीमा पनि व्यापक भेटघाट तथा अन्तरक्रियामा सहभागी भएका थिए।
स्थानीय स्तरमा प्रभावशाली जनप्रतिनिधिहरूको आजपामा प्रवेशसँगै रौतहटको राजनीतिक समीकरणमा महत्वपूर्ण परिवर्तन आउने आकलन गरिएको छ।
आरके श्रीवास्तव,रौतहट,२९ गते चैत ।
रौतहट क्षेत्र नं. ३ रास्वपाबाट नव निर्वाचित सांसद रविन्द्र पटेल धिरजले आज कटहरिया स्थित विवाह भवनमा स्थानीय जनतासँग आत्मीय भेटघाट कार्यक्रम सम्पन्न गर्नुभएको छ ।
कार्यक्रममा उहाँले ठूलो संख्यामा उपस्थित जन्ताजनार्धनसँग प्रत्यक्ष संवाद गर्दै उनीहरूको समस्या, गुनासा, सुझाव तथा अपेक्षाहरू ध्यानपूर्वक सुन्नुभएको थियो । सहभागीहरूले शिक्षा, स्वास्थ्य, सडक पूर्वाधार तथा रोजगारीका विषयमा आफ्ना धारणा राखेका थिए ।
सांसद पटेलले जनताका हरेक आवाजलाई नीति तथा योजनामा समेट्ने प्रतिबद्धता व्यक्त गर्दै विकास निर्माणका कार्यलाई तीव्रता दिने बताउनुभयो । उहाँले स्थानीय तहसँग सहकार्य गर्दै दिगो विकासका कार्यक्रमहरू अघि बढाउने स्पष्ट पार्नुभयो ।
भेटघाट कार्यक्रमले जनप्रतिनिधि र जनताबीचको सम्बन्ध अझ सुदृढ बनाउनुका साथै विकासप्रति साझा सहकार्यको वातावरण सिर्जना गरेको सहभागीहरूले बताएका छन् ।
आरके श्रीवास्तव, रौतहट, २९ गते चैत ।
रौतहटको सन्तपुर क्षेत्रमा खानेपानी संकट गम्भीर बन्दै गएको छ । नेपाल विद्युत प्राधिकरण मौलापुर वितरण केन्द्रले विद्युत महसुल समयमै भुक्तानी नभएको कारण सन्तपुर खानेपानी सरसफाइ आयोजनाको विद्युत लाइन काटेपछि शुद्ध खानेपानीको हाहाकार सिर्जना भएको हो ।
फतुवा विजयपुर–५, सन्तपुर दोस्तियामा सञ्चालित उक्त खानेपानी आयोजनाको विद्युत लाइन काटिएको करिब पाँच दिन बितिसक्दा पनि समस्या समाधान हुन सकेको छैन । विद्युत आपूर्ति बन्द भएसँगै पानी आपूर्ति पूर्ण रूपमा अवरुद्ध भएको छ, जसका कारण वडा भरिका स्थानीय बासिन्दा गम्भीर समस्यामा परेका छन् ।
स्थानीयका अनुसार दैनिक उपभोगका लागि आवश्यक शुद्ध खानेपानी नपाउँदा जीवनयापन कष्टकर बनेको छ । “पाँच दिनदेखि पानीको निकै समस्या भइरहेको छ, तर अहिलेसम्म कसैले चासो देखाएको छैन,” स्थानीय मदन राय यादवले गुनासो व्यक्त गर्नुभयो ।
यस्तै, स्थानीय शेष मोमताज आलमले खानेपानी जस्तो आधारभूत सेवामा अवरोध हुनु अत्यन्तै गम्भीर विषय भएको बताउँदै तत्काल समाधानको माग गर्नुभयो । अर्का स्थानीय मुकेश कुमार पटेलले सम्बन्धित निकायको लापरबाहीका कारण सर्वसाधारणले दुःख पाएको भन्दै आक्रोश व्यक्त गर्नुभयो ।
त्यस्तै, संजय यादवले पानीको अभावले दैनिक जीवन नै अस्तव्यस्त भएको उल्लेख गर्दै विद्युत लाइन तुरुन्त पुनः सञ्चालन गर्न आग्रह गर्नुभयो ।
यता, सम्बन्धित निकाय तथा राजनीतिककर्मीहरूले समस्या समाधानमा आवश्यक पहल नगरेको भन्दै स्थानीयले चर्को असन्तुष्टि जनाएका छन् । उनीहरूले तत्काल विद्युत लाइन पुनः सञ्चालन गरी खानेपानी सेवा सुचारु गर्न माग गरेका छन् ।
स्थानीयवासीले यस समस्यालाई गम्भीर रूपमा लिएर सम्बन्धित निकायले शीघ्र ध्यान दिनुपर्ने आवश्यकता औंल्याएका छन् ।
आरके श्रीवास्तव,रौतहट,२९ गते चैत ।
रौतहट जिल्लाको गुजरा नगरपालिका–३ बलुआ टोलमा लामो समयदेखि अपेक्षित नाला निर्माण कार्य अन्ततः सुरु भएको छ । वर्षौंदेखि विकास निर्माणमा उपेक्षित हुँदै आएको भन्दै स्थानीय बासिन्दाले गुनासो गर्दै आएका थिए, तर यसपटक स्थानीय पहल र नगरपालिकाको सहकार्यले सकारात्मक सुरुवात भएको छ ।
स्थानीय युवा समाजसेवी शेष सेराज लगायत स्थानीय युवाहरूको टिमकाे सक्रिय पहलमा नगरप्रमुख सन्तलाल चौधरीले १८ लाख रुपैयाँ बजेट विनियोजन गरी गाउँका दुई स्थानमा नाला निर्माण कार्य अघि बढाइएको हो ।
सेराजका अनुसार, “पहिला पनि स्थानीय सरकारले प्रयास नगरेको होइन, तर विभिन्न कारणले काम अघि बढ्न सकेन । यसपटक भने स्थानीय बासिन्दा आफैं सक्रिय भएर सडक खाली गरेपछि नाला निर्माण सम्भव भएको हो । ” उनले नगरप्रमुख चौधरीप्रति आभार व्यक्त गर्दै आगामी दिनमा थप विकासको अपेक्षा पनि गरेका छन् ।
यसैबीच, प्रदेश सरकारबाट सडक ढलानको काम समेत यसै वर्ष सुरु हुने विश्वास स्थानीयहरूले व्यक्त गरेका छन् । स्थानीय नैमुदिन मियाँले नाला निर्माण सुरु हुनु सकारात्मक भए पनि समयमै काम सम्पन्न हुनुपर्नेमा जोड दिए । अर्का स्थानीय जहुर मियाँले नाला निर्माणले गाउँको स्वरूप नै बदल्ने विश्वास व्यक्त गरे भने जाहिर हुसेनले ढिलै भए पनि स्थानीय सरकारले गाउँमा ध्यान दिएको भन्दै खुशी व्यक्त गरे ।
यता, जेन–जी उमेर समूहका युवाहरूले नाला निर्माणसँगै सडक ढलानको कामलाई पनि प्राथमिकतामा राख्न माग गरेका छन् । उनीहरूले समग्र पूर्वाधार विकासले मात्रै गाउँको दिगो सुधार सम्भव हुने बताएका छन् ।
स्थानीयको सक्रियता र सरकारको सहयोग मिल्दा बलुआ टोलमा सुरु भएको यो नाला निर्माण कार्यले अब समग्र विकासको नयाँ अध्याय सुरु गर्ने अपेक्षा गरिएको छ ।
आरके श्रीवास्तव,मधेस,२७ गते चैत ।
सप्तरी । मधेश प्रदेश सरकारकी शिक्षा तथा संस्कृति मन्त्री रानी शर्मा तिवारीले कृषि शिक्षालाई समयअनुकूल, व्यवहारिक र गुणस्तरीय बनाउनुपर्नेमा विशेष जोड दिनुभएको छ ।
आज मधेश प्रदेशका मुख्यमन्त्री कृष्ण प्रसाद यादवसहित मन्त्री तिवारीले सप्तरीको राजविराजस्थित कृषि विश्वविद्यालयको अनुगमन गर्नुभएको हो । अनुगमनका क्रममा विश्वविद्यालयको शैक्षिक गतिविधि, भौतिक पूर्वाधार तथा समग्र व्यवस्थापन अवस्थाबारे विस्तृत जानकारी लिइएको थियो ।
अनुगमनपछि मन्त्री तिवारीले कृषि क्षेत्रको दिगो विकासका लागि दक्ष जनशक्ति उत्पादन अपरिहार्य रहेको उल्लेख गर्दै शिक्षा प्रणालीलाई अझ व्यवहारिक बनाउनुपर्ने बताउनुभयो । “कृषि शिक्षालाई आधुनिक प्रविधिसँग जोड्दै गुणस्तरीय बनाउनु आजको आवश्यकता हो,” उहाँले भन्नुभयो ।
उहाँले विश्वविद्यालय प्रशासन, शिक्षक तथा सम्बन्धित सरोकारवालाहरूलाई विद्यार्थीहरूलाई उत्कृष्ट र प्रतिस्पर्धात्मक शिक्षा प्रदान गर्न सक्रिय र जिम्मेवार ढंगले काम गर्न आग्रह गर्नुभयो । साथै, मधेश प्रदेश सरकार कृषि तथा शिक्षाको समग्र विकासप्रति पूर्ण रूपमा प्रतिबद्ध रहेको पनि स्पष्ट पार्नुभयो ।
यस अवसरमा मुख्यमन्त्री यादवले प्रदेश सरकार शिक्षा र कृषि क्षेत्रको सुदृढीकरणमा प्राथमिकताका साथ काम गरिरहेको उल्लेख गर्दै आवश्यक नीति तथा स्रोत व्यवस्थापनमा सरकार सधैं तत्पर रहने धारणा व्यक्त गर्नुभयो ।
अनुगमन टोलीले विश्वविद्यालयको सुधारका लागि आवश्यक सुझाव तथा निर्देशनसमेत दिएको थियो ।
आरके श्रीवास्तव,राैतहट,२७ गते चैत ।
रौतहटकाे फतुवा विजयपुर नगरपालिका वडा नम्बर ५ स्थित स्वास्थ्य चौकीमा कर्मचारीहरूको लापरवाही पुनः देखिएको छ । सरकारले तोकेको कार्यालय समय बिहान ९ बजेदेखि लागू भइसके पनि शुक्रबार बिहान १० बजेसम्म स्वास्थ्य चौकीको मूल गेटमै ताल्चा लागेको अवस्थामा भेटिएको हो ।
कार्यवाहक नगरप्रमुख अम्बेया खातुन नेतृत्वको अनुगमन टोली स्वास्थ्य चौकी पुग्दा ल्याबमा कार्यरत एक कर्मचारी रामईश्वर साह बाहेक अन्य कोही पनि उपस्थित थिएनन् । उक्त स्वास्थ्य संस्थामा कुल ८ जना कर्मचारी कार्यरत रहेकामा ६ जना अनुपस्थित रहेको पाइएपछि उनीहरूको हाजिरी काटिएको नगरपालिकाले जनाएको छ ।
नेपाल सरकारले चैत २३ गतेदेखि लागू हुने गरी बिहान ९ बजेदेखि साँझ ५ बजेसम्म कार्यालय समय निर्धारण गरेको छ भने हप्तामा दुई दिन सार्वजनिक बिदा दिने व्यवस्था गरिएको छ । तर, सो व्यवस्था कार्यान्वयनमा भने उक्त स्वास्थ्य चौकीमा लापरवाही देखिएको छ ।
यसअघि पनि कार्यवाहक नगरप्रमुख खातुनको टोलीले अनुगमन गर्दा कर्मचारीहरू समयमा उपस्थित नभएपछि चेतावनी दिइएको थियो । पटक–पटक निर्देशन दिँदा पनि सुधार नआएपछि यसपटक कडा कदमस्वरूप हाजिरी काटिएको जनाइएको छ ।
अनुगमनका क्रममा प्रदेश सांसद प्रत्याशी मोहम्मद सेराज समेत सहभागी थिए ।
यता स्वास्थ्य चौकीका इन्चार्ज रघुनाथ साहले भने कर्मचारीहरूको ढिलाइलाई सामान्य ठहर गर्दै “गाउँघरको अवस्था भएकाले खाना खाएर आउँदा अलि ढिलो हुन सक्छ” भन्ने प्रतिक्रिया दिएका छन् । तर स्थानीय तहका जनप्रतिनिधिहरूले भने यस्तो गैरजिम्मेवारीपूर्ण व्यवहार अस्वीकार्य रहेको बताएका छन् ।
स्थानीयवासीहरूले स्वास्थ्यजस्तो संवेदनशील क्षेत्रमा कार्यरत कर्मचारीहरूको लापरवाहीले सेवाग्राही मारमा परेको गुनासो गरेका छन् । उनीहरूले नियमित र जिम्मेवार सेवा सुनिश्चित गर्न कडा अनुगमन र कारबाही आवश्यक रहेको बताएका छन् ।
बज्जिकाञ्चल संवाददाता,रौतहट,चैत २५ गते ।
रौतहट जिल्लाको माधव नारायण नगरपालिका–५ मिठुअवास्थित श्री राधा कृष्ण माध्यमिक विद्यालयमा ६ कोठे नयाँ भवन निर्माण कार्य सम्पन्न भएको छ । उक्त भवन च्वाईस नेपालको आर्थिक सहयोगमा निर्माण गरिएको हो । निर्माण सम्पन्न भवनको नगर प्रमुख बैजनाथ प्रसाद यादव, प्रमुख प्रशासकीय अधिकृत नगेन्द्र प्रसाद यादव तथा संस्थाका प्रमुख प्रदिक शर्मा लगायतको उपस्थितिमा एक कार्यक्रमबीच औपचारिक रूपमा उद्घाटन तथा विद्यालयलाई हस्तान्तरण गरिएको छ ।
यसैबीच, सोही वडामा अत्याधुनिक सुविधा सम्पन्न ८ कोठे दुई तले बर्थिङ सेन्टर भवन निर्माणका लागि पनि आजै शिलान्यास गरिएको छ। स्थानीय स्वास्थ्य सेवामा सुधार ल्याउने उद्देश्यसहित उक्त भवन निर्माण गर्न लागिएको जनाइएको छ । स्थानीय तह र सहकार्य संस्थाहरूको संयुक्त पहलमा भइरहेको यस्ता पूर्वाधार विकासका कामले शिक्षा तथा स्वास्थ्य क्षेत्रमा सकारात्मक प्रभाव पार्ने विश्वास लिइएको छ । साथै, समुदायको समग्र विकासका लागि यस्ता कार्यक्रमहरू आगामी दिनमा पनि निरन्तर अघि बढाइने जनाइएको छ ।
बज्जिकाञ्चल संवाददाता,रौतहट,चैत २५ गते ।
रौतहट मौलापुर नगरपालिकाकी नगरप्रमुख रीना कुमारी साह ‘नेपालका ५० प्रभावशाली महिला २०८२’ को सूचीमा पहिलो स्थान हासिल गरेपछि उनलाई आज बिरगंजमा विशेष समारोहबीच सम्मान गरिएको छ । ओम पार्टी प्यालेसमा आयोजित उक्त कार्यक्रममा विभिन्न क्षेत्रका व्यक्तित्वहरूको उल्लेखनीय उपस्थिति रहेको थियो ।
कार्यक्रममा वक्ताहरूले मेयर साहले महिला सशक्तिकरण, पारदर्शिता र सुशासन प्रवद्र्धनमा पु¥याएको योगदानको उच्च प्रशंसा गर्दै मौलापुरलाई विकासको नमुना नगरका रूपमा स्थापित गर्न खेलेको भूमिकालाई सराहना गरे । सम्मान कार्यक्रममा सहभागीहरूले उनको नेतृत्व, दूरदर्शिता र समर्पणले स्थानीय तहमा सकारात्मक परिवर्तन सम्भव भएको उल्लेख गर्दै आगामी दिनमा पनि यस्तै उदाहरणीय कार्यको अपेक्षा व्यक्त गरेका छन् ।
