सागर संगम ठाकुर, रौतहट, असार २८ गते

रौतहटको गरुडा नगरपालिका–८ जिगडियामा एक दिने नि:शुल्क आँखा शिविर सम्पन भएको छ।

स्थित जमिया दरुल उलोम मदर्शामा शुक्रवार एक दिने निःशुल्क आँखा शिविरको आयोजना गरियो ।नेपाल नेत्र ज्योती संघ गौर आँखा अस्पताल पुरेनवा गौरको आयोजना तथा डाक फाउण्डेशनको आर्थिक सहयोगमा वडा नम्बर -८ जिगडिया स्थित जमिया दरुल उलोम मदर्शामा शुक्रबार शिविर सम्पन भएको हाे । विहान ९ बजे देखि सुरु भएको शिविरमा गौर आँखा अस्पतालका नेत्र चिकित्सकहरु द्वारा ३७५ जनालाई आँखाको परिक्षण गरिएकाे थियो ।
एकदिने शिविरमा गरिएको परिक्षणमा ४० जनामा मोतिया विन्दुको रोग फेला परेकाे शिविरमा सहभागी डाक्टर सतेन्द्र पाण्डेले जानकारी दिनु भयो । वहाँका अनुसार माेतियाबिन्दु भएका विरामीहरुलाई आईतवार नि:शुल्क रुपमा शैल्यक्रिया गरिने बताए । शिविरमा १५४ जना विरामीलाई चश्मा तथा २८७ जनालाई औषधी वितरण गरिएको शिविरका कार्यक्रम संयोजक समेत रहेका पाण्डेले भने । उनका अनुसार मोतिया विन्दु भएका विरामीहरुलाई बसबाट अस्पतालमा लगेर शैल्यक्रिया आईतवार देखि हुने बताए । लायन्स क्लव रौतहट, चन्द्रनिगाहपुर ९५२४५, लायन्स क्लव रौतहट, चन्द्रपुर १७२५११, लायन्सक्ल क्लव चन्द्रनिगाहपुर गे्रटर १५५७६९, लायन्स क्लव समनपुर ०६६९७८, लायन्स क्लव चनद्रपुर प्राइड, लायन्स क्लव चन्द्रपुर फेमिना १४८२७६, लायन्स क्लव चन्द्रपुर ग्रिण सिटी १५०७०४, लायन्स क्लव भिजन नेपाल १११६६६, लायन्स क्लव चन्द्रपुर मेडिकोजको स्थानीय आयोजना रहेको शिविर कार्यक्रम संयोजक पाण्डेले जानकारी दिए ।

आरके श्रीवास्तव,राैतहट,२८ गते असार ।
मधेस प्रदेश सरकारले आर्थिक वर्ष २०८१/८२ मा हालसम्मकै उच्च बजेट खर्च गरेर ऐतिहासिक सफलता हात पारेको छ । प्रदेश सरकारले उक्त वर्षमा चालु तथा पुँजीगत खर्च गरी कुल ७१.४८ प्रतिशत बजेट खर्च गर्न सफल भएको हो, जुन प्रदेश सरकार गठनपछिको सबैभन्दा उच्च खर्च प्रतिशत हो ।
यस उत्कृष्ट उपलब्धिको नेतृत्व गरेका अर्थमन्त्री सुनिलकुमार यादव (‘जितेन्द्र’) लाई सामाजिक सञ्जालदेखि जनस्तरसम्मबाट बधाई तथा शुभकामनाको ओइरो लागेको छ । रौतहटबासीहरूले उहाँको कार्यदक्षताको खुलेर प्रशंसा गरिरहेका छन् ।
रौतहट निवासी एक सामाजिक अभियन्ता एवम् पत्रकार संजय सहनी लेख्छन्: “हालसम्मको सफल अर्थमन्त्री हाम्रो रौतहटबासी आदरणीय जितेन्द्र दाईलाई बधाई तथा शुभकामना दिन चाहन्छु । मधेस प्रदेशको विकासका लागि तपाईं अझ शसक्त भएर लाग्नुस्, रौतहटबासीको साथ र आशीर्वाद तपाईंको साथमा रहिरहनेछ ।”
सात वर्षको तुलनात्मक विश्लेषण
मधेस प्रदेश सरकार गठनपछिका पछिल्ला सात वर्षको बजेट खर्च विवरण यसप्रकार रहेको छ ।
आर्थिक वर्ष र खर्च प्रतिशत यसप्रकार रहेको छ । २०७५/७६ मा ५१.७५%,२०७६/७७ मा ४०.६६%,२०७७/७८
मा ६५.४६%,२०७८/७९ मा ६३.८३%,२०७९/८० मा ५७.३२%,२०८०/८१ मा ५५.६४% रहेको छ । जबकि चालु आर्थिक वर्ष २०८१/८२ मा ७१.४८% रहेको छ ।
यसले देखाउँछ कि आर्थिक अनुशासन, कार्यान्वयन क्षमताको सुधार र दक्ष नेतृत्वका कारण बजेट खर्चमा सकारात्मक परिवर्तन आएको हो । साथै, खर्च दर बढेसँगै ‘फ्रिज’ हुने रकम उल्लेखनीय रूपमा घट्दै गएको छ । जसले नीति कार्यान्वयनमा सुधार आएको स्पष्ट संकेत गर्दछ।
यस ऐतिहासिक सफलताले मधेस प्रदेशमा विकास योजनाहरूले गति लिएको तथा जनताले सरकारप्रति विश्वास राख्न थालेको संकेत दिन्छ ।

अर्थमन्त्री यादवले भने, “बजेट खर्च वृद्धि गर्नुको मुख्य उद्देश्य भनेको जनता प्रत्यक्ष लाभान्वित हुने खालका विकास कार्यक्रमहरू समयमै कार्यान्वयन गर्नु हो । हामीले बजेट निर्माणदेखि कार्यान्वयनसम्मको प्रक्रियालाई व्यवस्थित बनाएका छौं ।”

बज्जिकाञ्चल संवाददाता,मकवानपुर, २८ गते असार – लोहार समुदायको हकहित, पहिचान र अधिकार सुनिश्चित गर्न उद्देश्यसहित विश्वकर्मा लोहार सेवा समिति को मकवानपुर जिल्ला समिति गठन गरिएको छ । एक औपचारिक कार्यक्रमका बीच गठन गरिएको उक्त समितिको अध्यक्षमा रामपुकार ठाकुर चयन भएका छन् ।

समितिको गठन कार्यक्रममा विश्वकर्मा लोहार सेवा समितिका वरिष्ठ उपाध्यक्ष आशीर्वाद ठाकुर प्रमुख अतिथि तथा नेपाल विश्वकर्मा संघका अध्यक्ष विवेक शर्मा विशिष्ट अतिथि थिए । कार्यक्रमको सञ्चालन नेपाल विश्वकर्मा संघका सचिव रामलाल ठाकुर ले गरेका थिए ।

कार्यक्रमलाई सम्बोधन गर्दै अध्यक्ष शर्मा‌ले लोहार समुदायमाथि राज्यबाट हुँदै आएको विभेदको अन्त्यका लागि सबै लोहारहरू एकताबद्ध हुनुपर्नेमा जोड दिए । उनले जातीय एकताको माध्यमबाट मात्र राज्यबाट प्राप्त हुने सेवा-सुविधाहरू सुनिश्चित गर्न सकिने धारणा राखे। शर्मा‌ले आफ्ना सन्तानलाई शिक्षित बनाउन र हरेक घरबाट सामाजिक तथा आर्थिक विकासको थालनी गर्न आग्रह गरेका छन् । साथै, उनले मकवानपुरमा बसोबास गर्ने सम्पूर्ण लोहार समुदायलाई नवगठित समितिमा आबद्ध हुन आह्वान गरेका छन् ।

प्रमुख अतिथि ठाकुरले संघीय शासन प्रणालीको वर्तमान सन्दर्भमा राज्यको हरेक तहमा समावेशी सहभागिता सुनिश्चित गर्नुपर्ने आवश्यकता औंल्याए । उनले लोहार जातिलाई परम्परागत शिल्पकलामा निपूर्ण, समाज निर्माणमा योगदान दिने समुदायको रूपमा चिनाउँदै यस जातिलाई राज्यले विशेष प्राथमिकतामा राखेर सेवा-सुविधा दिनुपर्ने माग राखेका छन् ।

कार्यक्रममा सहभागिता जनाएका मकवानपुरका लोहार समुदायका सदस्यहरूले नवगठित समितिले समुदायको आवाज बुलन्द बनाउने र भविष्यमा सामाजिक तथा सांस्कृतिक रूपमा ‘पिलर’ को रूपमा काम गर्ने विश्वास व्यक्त गरेका छन् ।

यस समितिको गठनसँगै मकवानपुरमा लोहार समुदायको संगठित अभियान औपचारिक रूपमा सुरू भएको छ ।

वीरगञ्ज (पर्सा), २५ असार : खानेपानीमन्त्री प्रदीप यादवले जलवायु परिवर्तनका कारण परेको खडेरीले खानेपानीको गम्भीर अभाव सिर्जना भएको वीरगञ्ज महानगरपालिका सहित तराई–मधेसमा देखिएको खानेपानीको सङ्कट चाडै समाधान गरिने बिश्वास व्यक्त गर्नु भएको छ ।

आज मन्त्री यादवले वीरगञ्ज महानगरपालिकाका विभिन्न वडा, टोल तथा घर घरमा पुगेर निरीक्षण तथा अनुगमन गरि तत्कालै खानेपानीको समस्या समाधान गर्न आफु लागि परेको बताउनुभयो ।

उहाँले भन्नुभयो, “वीरगन्जसहित तराई–मधेसमा देखिएको खानेपानीको समस्या समाधान गर्न म पहल गरिरहेको छु । सयौँ ठाउँमा डिप बोरिङ जडान भइ खानेपानी आपूर्ति भइरहेका छन् । अन्य समस्या ग्रस्थ क्षेत्रमा पनि डिप बोरिङ जडानको कार्य सुरु भएकाले यहाँको समस्या चाडै समाधान हुनेछ ।”

खानेपानीको समस्या ग्रस्थ भएका यहाँका विभिन्न वडा, गाउँ तथा टोलहरुमा निरीक्षण गर्नु हुँदै मन्त्री यादवले पछिल्लो समय जनताले भोगिरहेको खानेपानीको अभावले आफू निकै चिन्तित भएको बताउनुभयो ।

उहाँले भन्नुभयो, “वीरगञ्जसहित तराई–मधेसमा देखिएको खानेपानीको समस्या समाधान गर्न म स्थलगत रुपमा अनुगमनमा निस्किएको छु । जनताको अत्यावश्यक आवश्यकताको रूपमा रहेको खानेपानीको समस्या समाधानमा कुनै कसर बाँकी राखिने छैन । सरकारको तर्फबाट तीव्र पहल भइरहेको छ ।”

आज मन्त्री यादव सहितको टोलीले वीरगञ्ज महानगरपालिकाका–११ का श्रीपुर, नयाँ बस्ती, रानीघाट, ओमआश्रम, वडा नं १२ का मुर्ली नएका टोला, ब्रह्मचोक,  वडा नं १२ का राधेमाई, पण्डितटोल, तीजार्थटोल, मुरली गाउँ, नएको टोल, वडा नं १४ का बहुँअरी राधेमाई, पिपरा, वडा नं १५ का भिष्वा नयाँ बस्ति, लक्ष्मनुवा, वडा नं २१ का तत्वाटोल, ताजपुर, कोईरिया टोल ,परवानापूर वडा नं २४ का रामगढवा, रानीघाट, नयाँ बस्ती, बहुँवरी, वडा नं २६ को सुगौली, अटराहा, वडा नं २५ को डाईपोर्ट, सिरसिया वडा नं १७ को अलौँ, वडा नं १० को घडिहरवा, रानीघाट, वडानं ९ लगायत विभिन्न टोल र घरघरमा अनुगमन तथा निरीक्षण गर्नु भएको थियो ।

जलवायु परिर्वतनका कारण यहाँका पानीका चापाकल सुक्दै गएका र खानेपानीको चरम अभाव भएपछि मन्त्री यादव सहित नेपाल खानेपानी संस्थानका कर्मचारीको टोलीले समस्या समाधानका उपाय सहित अनुगमन तथा निरीक्षण गरेको थियो ।

स्थानीय तहसँग सहकार्य गर्दै यहाँको खानेपानीको समस्या समाधान गर्न आफु पूर्ण प्रतिबद्ध रहेको समेत मन्त्री यादवले विश्वास दिलाउनुभयो ।

उहाँले भन्नुभयो, “यो संकटको समाधानका लागि आवश्यक रणनीति, स्रोत परिचालन र दीर्घकालीन योजना निर्माणमा मेरो पहल जारी रहनेछ । विपतको समयमा सबैको साथ तथा सबैको हाथको आशा पनि राखेको छु ।”

सागर संगम ठाकुर, रौतहट,असार २५ गते

रौतहटको देवाही गोनाही नगरपालिका–९, धरहरीस्थित श्री जय किसान माध्यमिक विद्यालयमा कक्षा १० (एसईई) परीक्षामा सफल विद्यार्थीहरूलाई विशेष सम्मान तथा बिदाइ गरिएको छ । २०८१ सालको एसईई परीक्षामा सो विद्यालयबाट सहभागी भएका २१० जना विद्यार्थीमध्ये १२७ जना सफल भएका थिए ।

बुधबार आयोजित उक्त विशेष समारोह विद्यालय व्यवस्थापन समिति अध्यक्ष श्यामनन्द साहको अध्यक्षतामा सम्पन्न भयो । कार्यक्रममा प्रमुख अतिथिका रूपमा देवाही गाेनाही नगरपालिकाका नगर प्रमुख प्रेमलाल साह तथा विशिष्ट अतिथिका रूपमा वडा अध्यक्ष वीर बहादुर साह उपस्थित थिए ।

कार्यक्रममा सफल विद्यार्थीहरूलाई प्रमाणपत्र प्रदान गरी सम्मान गरिएकाे छ । प्रमुख अतिथि मेयर साह, विशिष्ट अतिथि वडा अध्यक्ष साह, विद्यालय व्यवस्थापन समिति अध्यक्ष श्यामनन्द साह तथा प्रधानाध्यापक संजय प्रसाद गुप्ताले संयुक्त रूपमा विद्यार्थीहरूलाई सम्मानपत्र वितरण गरेका थिए।

प्रधानाध्यापक गुप्ताले एसईई परीक्षामा ‘ए प्लस (A+)’ ल्याउने १० जना विद्यार्थीहरूलाई विशेष शुभकामना दिँदै उनीहरूको उज्ज्वल भविष्यको कामना गरेका थिए । साथै, सबै विद्यार्थीहरूलाई उच्च शिक्षा हासिल गर्न प्रेरणा दिँदै निरन्तर अध्ययनमा लाग्न आग्रह गरे ।

कार्यक्रममा विद्यालयका शिक्षक, शिक्षिका, अभिभावक तथा स्थानीयहरूको उल्लेखनीय उपस्थिति रहेको थियो । विद्यार्थीहरूको उत्साहपूर्ण सहभागिताका बीचमा कार्यक्रम सफलतापूर्वक सम्पन्न भएको हो ।

काठमाडौँ, २४ असार : खानेपानीमन्त्री प्रदीप यादवले विगत केही दिन यतादेखि पर्सा, बारासहित मधेसका जिल्लामा चापाकलहरु सुकेर खानेपानीको सङ्कट बढेका बेला सबैको सहयोग र समन्वयले मात्रै खानेपानीको समस्या समाधान निकाल्न सकिने बताउनु भएको छ ।

पर्सा क्षेत्र नम्बर १ बाट प्रतिनिधि सभा सदस्यसमेत रहनु भएका मन्त्री यादवले जलवायु परिवर्तनका कारण परेको खडेरीले पर्सा, बारा, रौतहट लगायतका मधेसका जिल्लामा चापाकलहरु सुकेर खानेपानीको सङ्कट सृजना भई जनजीवन नै निक्कै कठिन भएको उहाँले सामाजिक सञ्जाल मार्फत जानकारी दिनुभयो ।

“यो प्राकृतिक विपत्तिमा पीडित नागरिकसँग सहानुभूति राख्दै म वीरगन्जका विभिन्न प्रभावित क्षेत्रहरूको स्थलगत अनुगमनसमेत गरिरहेको छु,” उहाँले भन्नुभयो, “खानेपानीको समस्याको तत्कालीन समाधानका लागि बारा, पर्सा लगायतका जिल्लाहरुसहित वीरगन्ज महानगरपालिकाका विभिन्न वडारुमा हालसम्म २३७ भन्दा बढीको सङ्ख्यामा डिप बोरिङ गाडि सकिएको छ । पानीको समस्या समाधानका लागि थप पहल भइरहेको छ ।”

यसैगरी उहाँले आगामी आर्थिक वर्षको सुरुवातसँगै यसकार्यलाई अझ द्रुत गतिमा अगाडि बढाइने बताउनु हुँदै यसले खानेपानीका लागि शीघ्र राहत दिने विश्वास लिएको बताउनुभयो ।

बज्जिकाञ्चल संवाददाता,सर्लाही,२३ गते असार । 

एकीकृत अखिल नेपाल शिक्षक संगठन, हरिवन नगर समिति सर्लाहीको अगुवाइमा शिक्षकहरूले आफ्नो पेशागत तथा आर्थिक माग सम्बोधनको लागि हरिवन नगरपालिकामा ज्ञापनपत्र बुझाएका छन् ।

नगर समितिका अध्यक्ष राम विश्वास कुशवाहाले ज्ञापनपत्र वाचन गरी नगर प्रमुख कमल बुढाथोकी (रमेश), शिक्षा उपसचिव हरिप्रसाद दाहाल र शिक्षा अधिकृत रुपेश चाैलागाईलाई संयुक्त रूपमा उक्त ज्ञापनपत्र हस्तान्तरण गरेका हुन् ।

ज्ञापनपत्र बुझाउने कार्यक्रममा मधेस प्रदेश समितिका सचिव कुमार स्याङतन, वरिष्ठ शिक्षक नेता हरिप्रसाद सापकोटा, शिक्षक नेता कामेश्वर राय, बाल विकास नेत्री डिना श्रेष्ठ तथा पीडित शिक्षकहरू र बाल विकास सहजकर्ताहरूको उल्लेख्य उपस्थिति रहेको थियो ।

संगठनको असार २१ गते शनिबार बसेको बैठकको प्रस्ताव नं. ३ अनुसार कार्यालय सहयोगी, बाल विकास सहजकर्ता र विद्यालय कर्मचारीको तलबमानमा संघीय सरकारले दिएको न्यूनतम तलबमा थप गरी नगरपालिकाको कोषबाट मासिक जम्मा रु २८,००० (अठाइस हजार) तोकिने मागसहित ज्ञापनपत्र बुझाइएको अध्यक्ष कुशवाहाले जानकारी दिए ।

शिक्षकहरूले लामो समयदेखि न्यून तलबमानका कारण भोग्दै आएको आर्थिक समस्याको तत्काल समाधान होस् भन्ने उद्देश्यले यो पहल गरिएको जनाइएको छ ।

नगर प्रमुख बुढाथोकीले शिक्षकहरूको मागप्रति सकारात्मक दृष्टिकोण राख्दै यथासक्य चाँडो समाधानका लागि पहल गरिने आश्वासन दिएका छन् ।

आरके श्रीवास्तव,राैतहट,२४ गते असार । 

लोकतान्त्रिक समाजवादी पार्टी, मधेस प्रदेशले जारी गरेको प्रेस विज्ञप्तिमार्फत हाल बारा, पर्सा लगायत सम्पूर्ण मधेश क्षेत्रहरूमा गम्भीर रूपमा देखिएको पानी संकटप्रति गहिरो चिन्ता व्यक्त गरेको छ ।

पार्टीका अध्यक्ष जितेन्द्र सोनलद्वारा हस्ताक्षरित विज्ञप्तिमा भनिएको छ कि अनावृष्टि लगायतको कारणले गर्दा भूगर्भीय पानीको सतह दिनानुदिन तल झर्दै गएको छ, जसको प्रत्यक्ष असर कृषि तथा खानेपानीमा परेको छ ।

“खानेपानीका अधिकांश चापाकल, इनार, कुवा सुकेका छन् । आम जनमानसमा खानेपानीको अभावका कारण आपतकालीन अवस्था सिर्जना भएको छ,” विज्ञप्तिमा उल्लेख गरिएको छ ।

पार्टीले नेपाल सरकार, मधेस प्रदेश सरकार तथा स्थानिय तहहरूलाई अविलम्ब प्रभावकारी कदम चाल्न आग्रह गर्दै आम नागरिकलाई तुरुन्त राहत उपलब्ध गराउन जोडदार माग गरेको छ ।

सोनलले सम्पूर्ण सरकारी संयन्त्रलाई यस संकटलाई गम्भीरतापूर्वक लिँदै आपतकालीन राहत र दीर्घकालीन समाधानका लागि कार्य योजना ल्याउन आह्वान गरेका छन् ।

आरके श्रीवास्तव,राैतहट,२३ गते असार । 

रौतहटकाे गरुडा नगरपालिकाले स्वास्थ्य सेवा सुदृढीकरणको अभियानलाई तिव्रता दिँदै महम्मदपुर स्वास्थ्य चौकीमा १० वेडको अस्पताल निर्माणका लागि आवश्यक १ कठ्ठा जग्गा खरिद गरेको छ ।

यस प्रयोजनका लागि नगरपालिकाले आज रु. २२,५६,२५० (बाइस लाख छपन्न हजार दुई सय पचास) को चेक हस्तान्तरण गरेको छ । स्वास्थ्य पूर्वाधार विस्तारका लागि गरिएको यो लगानी गरुडा नगरपालिकाको जनस्वास्थ्यप्रति बढ्दो प्रतिबद्धताको प्रतिविम्ब हो ।

नगर प्रमुख कन्थमनी जयसवालले भने, “जनताको स्वास्थ्य सुरक्षामा नगरपालिकाको प्रतिबद्धता अझ मजबुत बनाउँदैछौं । आधारभूत सेवा–सुविधाबाट कसैलाई वञ्चित हुन दिन्नौं।”

महम्मदपुरमा अस्पतालको निर्माण भएपछि आसपासका बासिन्दाहरूले प्राथमिक स्वास्थ्य उपचार सहजै प्राप्त गर्न सक्ने अपेक्षा गरिएको छ । नगरपालिकाले भविष्यमा थप स्वास्थ्य सेवा विस्तारका योजनाहरू पनि अघि बढाइरहेको जनाएको छ ।

आरके श्रीवास्तव,राैतहट,२३ गते असार । 

लोकतान्त्रिक समाजवादी पार्टी (लोसपा) नेपालको बागमती प्रदेशस्तरीय बैठक आज काठमाडौंमा सम्पन्न भएको छ । बागमती प्रदेश अध्यक्ष करण श्रेष्ठको अध्यक्षतामा बसेको बैठकमा प्रदेश अन्तर्गतका मकवानपुर, नुवाकोट, चितवन, ललितपुर र काठमाडौं जिल्लाका नेता तथा कार्यकर्ताहरूको उपस्थिति रहेको थियो ।

बैठकमा बाँकी जिल्लाहरूमा पार्टी अधिवेशन सञ्चालन गर्ने र संगठन सुदृढीकरणलाई तीव्रता दिने विषयमा विशेष छलफल भएको प्रदेश अध्यक्ष श्रेष्ठले जानकारी दिए ।

बैठकले संगठन विस्तार, स्थानीय संरचना पुनर्गठन, कार्यकर्ताको भूमिका सुदृढ पार्ने र आगामी राजनीतिक कार्यक्रमको कार्ययोजना निर्माण गर्ने विषयमा पनि महत्वपूर्ण निर्णयहरू लिएको छ ।

प्रदेश अध्यक्ष श्रेष्ठले पार्टीको सांगठनिक संरचना बलियो बनाएर जनस्तरमा राजनीतिक हैसियत कायम राख्नुपर्ने आवश्यकता औंल्याउँदै कार्यकर्ताहरूलाई सक्रिय र जिम्मेवार बन्न आह्वान गरेका थिए ।

बैठकले आगामी दिनमा बाँकी जिल्लाहरूमा अधिवेशन सम्पन्न गर्न प्रदेश कमिटीलाई आवश्यक निर्देशन पनि दिएको छ ।

कार्यक्रममा सहभागी नेताहरूले लोसपा नेपाललाई बागमती प्रदेशमा सशक्त राजनीतिक शक्तिका रूपमा स्थापित गर्न एकजुट भएर लाग्नुपर्नेमा जोड दिएका थिए ।