बज्जिकाञ्चल संवाददाता,रौतहट, १० गते असार ।
आम जनता पार्टी (आजपा) का अध्यक्ष एवं पूर्वमन्त्री प्रभु साहले देशले लोकतान्त्रिक बाटो बिराएकाले त्यसलाई करेक्सन गर्नुपर्ने बताएका छन् ।
रौतहटको मौलापुर नगरपालिकाको नगर सभा एवं ९औँ बजेट अधिवेशनको आज (मंगलबार) उदघाटन गर्दै उनले यस्तो बताएका हुन् । आजपा अध्यक्ष साहको गृहनगर समेत रहेका मौलापुरबाट मुलुकको विकास र समृद्धिका लागि दलहरु लोकतान्त्रिक मार्गमा हिड्नुपर्ने बताए ।
‘मुलुकले लोकतान्त्रिक बाटो बिराएको छ । त्यो करेक्सन हुनुपर्छ । कांग्रेस र एमालेको गठबन्धन अलोकतान्त्रि, अप्राकृतिक र अनैतिक रहेकोले जनतामा निरासा छाएको छ । त्यसका कारण कांग्रेस लोकतान्त्रिक बाटोमा हिड्नुपर्छ,’ आजपा अध्यक्ष साहले भने ।
मौलापुर नगरपालिकाको नगर सभा एवं ९औँ बजेट अधिवेशनमा मेयर रिनाकुमारी साह आ.ब.२०८२/०८३ को नीति तथा कार्यक्रम एवं बजेट प्रस्तुत गरेकी छन् । उनले मौलापुर नगरपालिकाको आ.ब. २०८२/०८३ मा ३९ करोड ५० लाखको नीति, बजेट तथा कार्यक्रम प्रस्तुत गरेकी छन् ।
मौलापुर नगरपालिकाले हरेक बर्षझै यस बर्ष पनि शिक्षा क्षेत्रमा अत्याधिक बजेट बिनियोजन गरेको छ । शिक्षा क्षेत्रमा मौलापुरले कुल बजेटको ४० प्रतिशत भन्दा बढी रकम छुट्याएको छ । मौलापुरमा नगर प्रहरीको साटो नगर शिक्षक र चिकित्सक रहेको छ । शिक्षा क्षेत्रमा मोडेल बन्दै गईरहेको मौलापुर नगरपालिका देशमै उत्कृष्ट काम गरेवापत पोखरामा एक महिना अघि आयोजित एक कार्यक्रममा सम्मानित समेत भएको छ । गुणस्तरीय शिक्षा, साक्षरता अभियान, उच्च शिक्षा र प्राविधिक शिक्षाको क्षेत्रमा मौलापुरले अत्याधिक बजेट खर्च गर्दै आएको छ ।
यस्तै मौलापुर नगरपालिकाले शुन्य कर नीतिलाई निरन्तरता दिएको छ । विगत ८ बर्षदेखी मौलापुरका मेयर रहेकी साहले यस बर्ष पनि शुन्य कर नीतिलाई निरन्तरता दिइएको फ्रि बिजुली, फ्रि पानी, यही आर्थिक बर्षमा नगरलाई कच्ची सडक मुक्त नगरको रुपमा घोषणा गरिने लक्ष्य समेत लिइएको जनाएकी छन् ।
‘हामी शासक होईन, सेवक हौँ, जनतासंग लिने होईन दिने हो । नगर प्रहरी होईन, नगर शिक्षक र नगर चिकित्सक राखेर हामी जनतालाई बढीभन्दा बढी सेवा दिन दिनरात जनताकै सेवामा खटने हो,’ मौलापुरका मेयर साहले भनेकी छन् ।
यस्तै मौलापुरका मेयर साहले छोरीसंग मेयर कार्यक्रमलाई समेत निरन्तरता दिएकी छन् । यो कार्यक्रम पनि उनी मेयर भएदेखी लागु भएको छ । यो कार्यक्रम अन्तरगत बिहेको समयमा हरेक छोरीलाई ३० हजार नगद सहयोग पालिकाले गर्दैआएको छ । यसैगरी मौलापुरले नमुना एकीकृत दलित बस्ती निर्माण, धुवा चुलो मुक्त अभियानलाई निरन्तरता दिएको छ ।
‘आगामी आ.व. २०८२/०८३ मा नगरपालिकाबाट नगर गौरवको आयोजनाको रुपमा विगत देखी सञ्चालन हुँदै आएको पुरातात्विक महादेव मन्दिर, मौलापुर शहरीकरण, एकीकृत नमुना बस्ती विकास, मोडेल प्राविधिक शिक्षालयको थप व्यवस्थागर्ने आयोजनाहरु र यस नगरपालिकाले सञ्चालन गर्दै आएको कच्ची सडक मुक्त नगर, हर हातमे हुनर, साक्षरता अभियान, निशुल्क बिजुली पानी र बेटीके साथ मेयर लगायतका लोकप्रिय कार्यक्रमहरुलाई निरन्तरता दिदै नवीनतम प्रविधि र गुणस्तरयुक्त शिक्षाको लागि विद्यालयहरुमा स्मार्ट कक्षा सहितको भौतिक तथा मानवसंशाधान थप व्यवस्था गर्ने,’ मेयर साहले भनेकी छन्, ‘वर्तमान समयको माग अनुसार नगर कार्यपालिकाको कार्यालय तथा यस मातहतका शाखा, वडा कार्यालयबाट हुने सेवा प्रवाहलाई अझ छिटो छरितो र व्यवस्थित गर्ने, स्वास्थ्य संस्थाहरुलाई थप व्यवस्थि तगर्ने, वेरोजगारहरुलाई स्वरोजगार बनाउने र कृषि व्यवसायलाई प्रतिस्पर्धी बनाउने र नयाँ एकीकृत दलित बस्ती निर्माण गरी झोपडी मुक्त नगर निर्माणको अभियानमा थप कार्यक्रम सञ्चालन गर्नुका साथै सुशासनलाई विशेष प्राथमिकता दिने नीति अवलम्बन गरिएको छ ।’
आरके श्रीवास्तव,राैतहट,१० गते असार ।
रौतहटकाे परोहा नगरपालिकाले आगामी आर्थिक वर्ष २०८२/८३ का लागि नीति, कार्यक्रम र बजेट प्रस्तुत गर्दै आफ्नो ९ औं नगरसभा भव्यरूपमा सम्पन्न गरेको छ । मंगलबार नगरपालिकाको प्रशासकीय भवनमा आयोजित सभामा नगरप्रमुख शेख वकिलले ५३ करोड ६७ लाख ८२ हजार ६४ रुपैयाँको वार्षिक बजेट सार्वजनिक गरेका छन् ।
सभालाई सम्बोधन गर्दै नगरप्रमुख वकिलले परोहालाई राज्यमै एक उदाहरणीय नगरपालिका बनाउने लक्ष्यसहित शिक्षा, स्वास्थ्य, खानेपानी, कृषि, महिला, बालबालिका, जेष्ठ नागरिक तथा सामाजिक विकास जस्ता प्राथमिक क्षेत्रमा विशेष जोड दिइएको बताएका छन् । “नगरवासीको साथ र सक्रिय सहभागिताका कारण नै परोहा आज यो स्थानमा आइपुगेको हो,” उनले भने ।
उक्त बजेटमा संघीय, प्रदेश तथा आन्तरिक स्रोतबाट प्राप्त रकम समावेश गरिएको छ । नगरप्रमुखका अनुसार बजेटको ठुलो अंश पूर्वाधार सुधार, आधारभूत सेवा प्रवाह तथा समावेशी विकासमा केन्द्रित हुने छ ।
कार्यक्रममा प्रमुख अतिथिका रूपमा उपस्थित नेपाली काँग्रेस रौतहटका सचिव रामचन्द्र गिरीले परोहामा शिक्षा, स्वास्थ्य, कृषि र सिँचाइ क्षेत्रमा उल्लेखनीय प्रगति भएको बताउँदै स्थानीय सरकारको सेवा प्रवाहप्रति नागरिक सन्तुष्ट रहेको बताए ।
सभामा उपप्रमुख सुगान्धी गिरी, निमित्त प्रमुख प्रशासकीय अधिकृत महम्मद महफुज, इन्जिनियर दिपेन्द्र यादव, वडाध्यक्षहरू तथा वडा सचिवहरू समेत उपस्थित थिए । उनीहरूले नगरपालिकाले स्थापना कालदेखि नै विकास निर्माणका क्षेत्रमा देखाउँदै आएको अग्रणी भूमिका र सफलताहरूको प्रशंसा गरेका छन् ।
नगरसभाको समापनसँगै आगामी वर्षको योजनाहरू कार्यान्वयन चरणतर्फ उन्मुख हुने संकेत दिइएको छ । अब स्थानीय नागरिक र सरोकारवालाहरूको चासो, प्रस्तुत योजनाहरूको व्यवहारिक कार्यान्वयनमा केन्द्रित रहने देखिन्छ ।
मुकेश कुमार साह, चपुर,०९ गते असार ।
चन्द्रपुर नगरपालिकाले आगामी आर्थिक वर्ष २०८२/८३ का लागि कुल १ अर्ब २१ करोड ५९ लाख ५१ हजार ६४० रुपैयाँको बजेट सार्वजनिक गरेको छ । नगरसभाको १५ औँ अधिवेशनमार्फत सार्वजनिक गरिएको उक्त बजेटमा अधुरा योजना सम्पन्न गर्ने र सामाजिक रूपान्तरणमा जोड दिइएको छ ।
उपप्रमुख जयमाला चौधरीले बजेट प्रस्तुत गर्दै नगरभित्र अलपत्र रहेका योजनाहरूलाई प्राथमिकता दिने स्पष्ट पारिन् । उनले करिब ६ करोड रुपैयाँ लागतमा निर्माणाधीन रहेको शीतभण्डारको काम आगामी वर्षभित्रै सम्पन्न गरिने बताइन् । साथै, बालश्रम र बालविवाहमुक्त वडा घोषणालाई पनि नगरको प्राथमिक एजेन्डा बनाइने जनाइन् ।
नगरप्रमुख संजय कुमार काफ्लेले चालू बजेटलाई नागरिकको आवश्यकता, माग र समग्र विकासका क्षेत्रमा सन्तुलितरूपमा विनियोजन गरिएको उल्लेख गरे। “यो बजेट जनताको आवाजलाई प्रतिनिधित्व गर्छ,” उनले भने, “हामी समावेशी र दिगो विकासप्रति प्रतिबद्ध छौं ।”
अघिल्लो आर्थिक वर्षको तुलनामा यसपटकको बजेटमा झण्डै २५ करोड ७७ लाख रुपैयाँको कटौती गरिएको छ। विगत वर्ष चन्द्रपुरले १ अर्ब ४७ करोड ३६ लाख रुपैयाँभन्दा बढीको बजेट प्रस्तुत गरेको थियो।
प्रदेशसभा सदस्य युवराज भट्टराईले नगरको समृद्धिका लागि सबै जनप्रतिनिधिहरू एकताबद्ध भएर अघि बढ्नुपर्नेमा जोड दिँदै प्रदेश सरकारको सहयोग निरन्तर रहने आश्वासन दिए ।
यसैबीच, रौतहट जिल्लाका १८ स्थानीय तहमध्ये १० नगरपालिकाले आगामी वर्षका लागि बजेट सार्वजनिक गरिसकेका छन्। चन्द्रपुरसँगै गौर, राजदेबी, इशनाथ, गढीमाइ, माधवनारायण, बौधीमाइ, राजपुर, कटहरिया र गरुडा नगरपालिकाले नगरसभा सम्पन्न गरेका छन् । गुजरा नगरपालिकाले असार १० गते बजेट प्रस्तुत गर्ने तयारी गरिरहेको छ भने बाँकी पालिकाले अझै बजेट सार्वजनिक गरेका छैनन् । आज पराेहा र माैलापुर नगरपालिकाले बजेट सार्वजनिक गर्दैछन् ।
चन्द्रपुर नगरपालिकाको यसपटकको बजेटले अधुरा योजना पूरा गर्दै सामाजिक परिवर्तन र जनउत्तरदायी विकासतर्फ दृढ पाइला चाल्ने संकेत दिएको छ ।
आरके श्रीवास्तव,राैतहट,०९ गते असार ।
रौतहटको गुजरा नगरपालिकामा नयाँ प्रमुख प्रशासकीय अधिकृतका रूपमा उप सचिव उदय प्रसाद देवकोटाले पदभार ग्रहण गर्नुभएको छ । उहाँको आगमनप्रति नगरपालिकाले हार्दिक स्वागत गर्दै सफल कार्यकालको शुभकामना व्यक्त गरेको छ ।
नगरप्रमुख सन्तलाल चौधरी र उपप्रमुख रत्न लामाले नगरपालिकाको तर्फबाट देवकोटा ज्यूलाई स्वागत गर्नुभएको हो । स्वागत कार्यक्रममा बोल्दै नगरप्रमुख चौधरीले भने, “नयाँ प्रमुख प्रशासकीय अधिकृतको आगमनले नगरको विकास तथा सेवा प्रवाहमा गति आउने विश्वास लिएको छु ।”
उपप्रमुख लालमाले पनि शुभकामना व्यक्त गर्दै उहाँको अनुभव र दक्षताले गुजरा नगरलाई संस्थागत रूपमा सुदृढ बनाउन मद्दत पुग्ने विश्वास व्यक्त गर्नुभयो ।
गत असार ०१ गते डा. श्रवणकुमार साह गुजरा नगरपालिकामा प्रमुख प्रशासकीय अधिकृतका रूपमा हाजिर हुनुभएको थियो । तर, पदभार ग्रहण गरेको २४ घण्टा नबित्दै संघीय मामिला तथा सामान्य प्रशासन मन्त्रालयले उहाँलाई सरुवा गरेको थियो । त्यसपछि पालिकामा केही समयसम्म कार्यकारी नेतृत्वको अभाव रहँदा दैनिक कामकाज प्रभावित भएको थियो ।
गुजरा नगरपालिकाका यसअघिका प्रमुख प्रशासकीय अधिकृत मित्रलाल ढकाललाई मन्त्रालयले जनकपुरधाम उपमहानगरपालिकामा सरुवा गरेपछि महिनाैं दिन नगरपालिका प्रमुख प्रशासकीय अधिकृतविहीन भएको थियो ।
अब उदय प्रसाद देवकोटाको आगमनसँगै नगरपालिकाको प्रशासनिक काम पुनः नियमित हुने अपेक्षा गरिएको छ ।
आरके श्रीवास्तव,राैतहट,०९ गते असार ।
रौतहट जिल्लाको गौर नगरपालिकाले सोमबार एक भव्य समारोहका साथ १६ औं नगरसभा सम्पन्न गरेको छ । नगरपालिकाको प्रांगणमा आयोजित कार्यक्रममा नगर प्रमुख शम्भु साहले नीति तथा कार्यक्रम प्रस्तुत गर्दै आगामी आर्थिक वर्ष २०८२/८३ का लागि कुल रु. ६१ करोड १५ लाख ९७ हजार २ सय ६१ को बजेट सार्वजनिक गरेका छन् । सो बजेटलाई नगरसभाबाट सर्वसम्मत पारित गरिएको छ ।
नगर प्रमुख साहले “हाम्रो अभियान समृद्धि, विकास र गौर नगरपालिका श्रेष्ठ पहिचान” भन्ने मूल नारासहित नगरपालिकाको आगामी योजना र प्राथमिकता सार्वजनिक गरेका हुन् । उनले शिक्षा, स्वास्थ्य, रोजगार, कृषि तथा महिला र बाल विकासका क्षेत्रहरूमा विशेष प्राथमिकता दिँदै विकास योजना अघि बढाइने प्रतिबद्धता व्यक्त गरेका छन् ।
नगरपालिकाको बजेट संघीय सरकारबाट प्राप्त समानीकरण अनुदान, ससर्त चालू तथा पुँजीगत अनुदान, विशेष र समपूरक अनुदान, प्रदेश सरकारबाट प्राप्त वित्तीय समानीकरण अनुदान तथा राजस्व बाँडफाँटका रकमहरू समेटेर तयार गरिएको हो ।
नगरसभामा निमित्त प्रमुख प्रशासकीय अधिकृत सुभाष ठाकुर, उप–नगर प्रमुख शैलदेवी साह, सबै वडाका वडा अध्यक्ष, कार्यपालिका सदस्य, नगरसभा सदस्य, कर्मचारी, पत्रकार तथा सुरक्षाकर्मीहरूको उल्लेखनीय उपस्थिति रहेको थियो ।
गौर नगरपालिकाले आगामी वर्षमा जनतालाई केन्द्रमा राखेर समावेशी र दिगो विकासका कार्यहरू अघि बढाउने स्पष्ट संकेत दिएको छ ।
सागर ठाकुर,देवाहीगाेनाही,०९ गते असार ।
रौतहटकाे देवाही गोनाही नगरपालिका–९ धरहरीमा जनप्रतिनिधिहरूको सक्रियतामा स्थानीय पूर्वाधार विकासका कार्यहरू तीव्र गतिमा अघि बढिरहेका छन् ।
सोही क्रममा स्थानीय स्तरमा लोकप्रियता कमाएका वडा अध्यक्ष वीर बहादुर साहको पहलमा वडा नम्बर ९ का विभिन्न टोलहरूमा नाला निर्माण तथा सडक ढलानको काम सुरु गरिएको छ ।
आर्थिक वर्ष २०८१/८२ अन्तर्गत कुल २४ लाख रुपैयाँको लागतमा सम्पन्न हुने यी योजनाहरू हाल कार्यान्वयनको चरणमा छन् । वडा अध्यक्ष साहका अनुसार श्री जय किसान नमुना माध्यमिक विद्यालय धरहरीको उत्तर र पूर्व साइडमा रहेको सडकमा नाला निर्माण र ढलानको काम सुरु गरिएको छ ।
त्यसैगरी, जगरनाथ साहको घरदेखि मुख्य सडकसम्म जोडिएको सडकमा नाला निर्माण कार्य भइरहेको छ भने नन्दकिशोर दासको घरदेखि बिशुनदेव यादवको घरसम्म र रामनारायण ठाकुरको घरदेखि मुख्य सडकसम्म पनि नाला निर्माण कार्य जारी छ ।
वडा अध्यक्ष साहले स्थानीय पूर्वाधार सुदृढीकरणलाई आफ्नो प्राथमिकतामा राख्दै जनतासँग सिधा संवाद र सहभागिता सुनिश्चित गर्दै विकास निर्माणका कार्यहरूलाई पारदर्शी ढंगले अघि बढाउने प्रतिबद्धता व्यक्त गरेका छन् ।
स्थानीयवासीहरूले पनि यस्ता जनहितका कार्यहरूप्रति खुसी व्यक्त गर्दै वडा अध्यक्ष साहप्रति आभार प्रकट गरेका छन् ।
चन्दन यादव, रौतहट, १९ गते पुस ।
फतुवा बिजयपुरको मा वि टेंग्राहामा विद्यालय भवनको शिलान्यास सम्पन्न भएको छ । नगरपालिकाको वडा नम्बर ४ टेंग्राहा स्थित माध्यमिक विद्यालयमा आज एक कार्यक्रमका बिच विद्यालय भवनको शिलान्यास गरिएको हो ।
प्र.अ. अनिल कुमार यादवको विशेष पहलमा यो पनि चार कोठ्ठे भवनको आज शिलान्यास सम्पन्न भएको हो । फतुवा विजयपुर नगरपालिकाको कार्यवाहक नगर प्रमुख अम्बेया खातूनको प्रमुख आतिथ्यतामा नगर प्रमुख खातून र वडा अध्यक्ष यादवको संयुक्तामा उक्त विद्यालय भवनको शिलान्यास गरेका हुन ।
राष्ट्रपति शैक्षिक सुधार योजना अन्तर्गत स्थानीय सरकारको सहयोगमा निर्माण हुन लागेको उक्त चार कोठ्ठे विद्यालय भवन कुल ५५ लाखको लगानिमा निर्माण हुने विद्यालयका प्र. अ. अनिल कुमार यादवले बताएका छन ।
प्र.अ. भए देखी नै स्कुलको शैक्षिक अवस्थामा सुधार, चार कोठ्ठे भवन निर्माण र व्यवस्थित शौचालयको पनि निर्माण गराएका हुन् । ग्रामीण भेगमा भए पनि पढाईको गुणस्तर पनि पहिलाको तुलनामा अहिले राम्रो भएको त्यहाँको स्थानियहरुले बताउँ छन् ।
शिलान्यास कार्यक्रममा उक्त पालिकाको वडा नं ४ का स्थानियहरुको धेरै संख्यामा उपस्थिती रहेका थिए । साथै उक्त विधालयका शिक्षकहरुको, सुरक्षाकर्मी, भद्रभलादमी र पत्रकारहरुको विशेषउपस्थितिमा उक्त विधालयमा नयाँ चार कोठ्ठे भवनको शिलान्यास भएको थियो ।
सागर ठाकुर,देवाहीगाेनाही,०८ असार ।
रौतहटको देवाही गोनाही नगरपालिका–९, धरहरीमा अवस्थित श्री जय किसान नमुना माध्यमिक विद्यालयमा कक्षा ९ र १२ मा अध्ययनरत प्राविधिक धारका विद्यार्थीहरूलाई स्कुल पोसाक टी–सर्ट वितरण गरिएको छ ।
आईतवार विद्यालय परिसरमै आयोजित एक कार्यक्रमका बीच वडा नम्बर ९ का वडा अध्यक्ष वीर बहादुर साहको प्रमुख आतिथ्यतामा विद्यालयका १ सय २० जना विद्यार्थीलाई स्कुल पोसाक वितरण गरिएको हो । विद्यालयको आन्तरिक स्रोतबाट आर्थिक वर्ष २०८१/८२ काे बजेट अन्तर्गत टी–सर्ट वितरण गरिएको विद्यालयका प्रधानाध्यापक संजय प्रसाद गुप्ताले जानकारी दिए ।
उनका अनुसार प्राविधिक धारतर्फ अध्ययनरत विद्यार्थीलाई पठनपाठनमा सहज वातावरण सृजना गराउने उद्देश्यले पोसाक वितरण गरिएको हो । प्रधानाध्यापक गुप्ताले पोसाक शिक्षामा समानता र अनुशासनको माध्यम बन्ने विश्वास व्यक्त गरेका छन् ।
वडा अध्यक्ष साहले विद्यालयमा अध्ययनरत कक्षा ९ देखि १२ सम्मका सम्पूर्ण प्राविधिक धारतर्फका विद्यार्थीलाई पोसाक वितरण गर्नु विद्यालयको शैक्षिक सुधार प्रयासको एक महत्वपूर्ण पाटो भएको बताए । उनले शिक्षामा गुणस्तर अभिवृद्धिका लागि स्थानीय तह सदैव अग्रसर रहने प्रतिबद्धता पनि जनाएका छन् ।
कार्यक्रममा विद्यालय व्यवस्थापन समितिका अध्यक्ष श्यामनन्दन साह, विद्यालयका शिक्षक/शिक्षिकाहरू, अभिभावक तथा विद्यार्थीहरूको उपस्थिति रहेको थियो ।
विद्यालयले आगामी दिनमा पनि विद्यार्थीहरूको शैक्षिक विकास र आवश्यकताका लागि विविध कार्यक्रम सञ्चालन गर्दै जाने बताएको छ ।
आरके श्रीवास्तव,राैतहट,०७ गते असार
रौतहटकाे बौधीमाई नगरपालिका–४ ईनरवारीमा वडा अध्यक्ष तुरन्तनारायण यादवको सक्रिय नेतृत्वमा पछिल्लो समय उल्लेखनीय विकास कार्यहरू सम्पन्न भएका छन् । स्थानीय पूर्वाधारको स्तरोन्नति र जनजीविकासम्बन्धी योजनाहरूले वडालाई नयाँ गति दिइरहेका छन् ।
यादवको पहलमा हालै मात्रै करिब १५ लाख रुपैयाँको लागतमा ४ सय ३५ मिटर लम्बाइको माटो, ग्रेभल र सडक ढलान सम्पन्न भएको छ । साथै, करिब १७ लाख रुपैयाँको लागतमा ३ सय ६४ मिटर लम्बाइको अन्डरग्राउण्ड नाला निर्माण सम्पन्न गरिएको छ, जसमा हिलटेक पाईप प्रयोग गरिएको छ ।
सडक संरक्षण र दीर्घकालीन पूर्वाधार निर्माणतर्फ उन्मुख हुँदै करिब ११ लाखको लागतमा ५४ मिटर लामो रिटेनिङ्ग वाल निर्माण गरिएको छ । शिक्षाको पहुँच विस्तार गर्ने उद्देश्यले चार कोठे विद्यालय भवन निर्माण कार्य सम्पन्न गरिएको छ ।
त्यसैगरी, वडामा नयाँ सडक निर्माण, कृषि क्षेत्रको प्रवर्द्धनका लागि ट्रान्सफरमर जडान, र १३ वटा अधुरा पोलमा विद्युत् तार जडान लगायतका कार्यहरू पनि प्रगति क्रममा छन् । उज्यालो अभियान अन्तर्गत एकवटा नयाँ विद्युत टावर निर्माण गरिनुका साथै दुईवटा जीर्ण टावरहरू मर्मत गरी पुनः सञ्चालनमा ल्याइएको छ ।
यी सम्पूर्ण विकास कार्यहरूले ईनरवारीका बासिन्दाहरूमा सकारात्मक उत्साह सिर्जना गरेको छ । वडा अध्यक्ष तुरून्तनारायण यादवको नेतृत्व र प्रतिबद्धता नै यी उपलब्धिहरूको आधार भएको स्थानीयवासीहरूले बताएका छन् । उहाँले “विकास र समृद्धिको लागि जनप्रतिनिधि जिम्मेवार र उत्तरदायी हुनुपर्छ” भन्ने मूल मन्त्रलाई व्यवहारमा उतार्दै वडालाई अग्रगामी बनाउने दिशामा काम गरिरहनुभएको छ ।
फाेटाे फिचर:
