राकेश यादव, १९ गते साउन । 
रौतहट जिल्लाको इशनाथ नगरपालिकामा बिधुतको करेन्ट लागेर एक जनाको मृत्यु भएको छ।
धानको खेतमा पानी लगाउने क्रममा करेन्ट लागेर इशनाथ नगरपालिका वडा नम्बर ८ निवासी ५५ बर्षीय शेख जाफिरको मृत्यु भएको हो ।
जिल्ला प्रहरी कार्यालय रौतहटका अनुसार धान बालीमा बिधुतिय मोटर प्रयोग गरि पानी पटाउने क्रममा करेन्ट लागेर घाइते भएका जाफिरको मृत्यु भएको हो।
करेन्ट लागेर घाइते भएका किसान जाफिरलाइ उपचारको लागि प्रादेशिक अस्पताल गौरमा ल्याउदा उपचारको क्रममा निधन भएको प्रहरी नायव उपरिक्षक दिपक कुमार रायले जानकारी दिएका छन्।
खडेरी परेको कारण बिधुतिय मोटर द्वारा सिचाई गर्ने क्रममा रौतहटमा अहिले सम्म ८ जना किसानको मृत्यु भै सकेको छ।
सिचाईको क्रममा करेन्ट लागेर मृत्यु हुने घटना बढ्न लाग्दा जिल्ला प्रहरी कार्यालय र जिल्ला प्रसाशन कार्यालयले साबधानी पुर्वक बिधुतको प्रयोग गर्न सार्वजनिक रुपमा आग्रह गरेका छन्।

आरके श्रीवास्तव,राैतहट,१९ गते साउन ।
राैतहटकाे मौलापुर नगरपालिका–४ स्थित श्री जनता माध्यमिक विद्यालय सोनरनियामा ३ तले १२ कोठे नयाँ विद्यालय भवनको शिलान्यास एक विशेष समारोहबीच सम्पन्न भएको प्रधानाध्यापक दिनेश यादवले जानकारी गराएका हसा् । भवन निर्माणको शिलान्यास प्रतिनिधि सभा सदस्य तथा पूर्वमन्त्री प्रभु साहको प्रमुख आतिथ्यमा सम्पन्न भएको हो ।
समारोहमा बोल्दै पूर्व मन्त्री साहले विद्यालयको भौतिक पूर्वाधार विकाससँगै शैक्षिक गुणस्तर सुधार गर्नुपर्नेमा जोड दिनु भयो । साथै, उहाँले निकट भविष्यमा श्री जनता माविमा क्याम्पस स्थापनाका लागि आवश्यक पहल गरिने स्पष्ट प्रतिबद्धता समेत व्यक्त गर्नुभयो ।

शिलान्यास समारोहमा मौलापुर नगरपालिकाकी नगरप्रमुख रिना कुमारी साहले विद्यालयमा गुणस्तरीय शिक्षा सुनिश्चित गर्न नगरपालिकाको तर्फबाट आवश्यक सहयोग निरन्तर जारी रहने बताउनु भयो । प्रमुख प्रशासकीय अधिकृत रामबाबु साहले विद्यालय भवनको निर्माण कार्य स्वीकृत डिजाइनअनुसार गुणस्तरीय रूपमा सम्पन्न गर्नुपर्नेमा जोड दिनुभयो ।
हाकिम साहका अनुसार निर्माण कम्पनी सत्यश्वर-एएसीसी-एसआर जेभी, सर्लाहीले ३ कराेड ४५ लाख ५६ हजार ६ सय ८ रूपैयाँकाे लागतमा निर्माण गर्न लागेको हाे ।

कार्यक्रममा माैलापुर वडा नम्बर ८ का वडा अध्यक्ष शिवपर्सन यादव,वडा नम्बर ९ का वडा अध्यक्ष श्यामकिशाेर साह, विद्यालय व्यवस्थापन समिति, शिक्षक, अभिभावक तथा सर्वसाधारणको उल्लेखनीय उपस्थिति रहेको थियो ।

आरके श्रीवास्तव,राैतहट,१९ गते साउन ।
रौतहट जिल्लाकाे गरूडा नगरपालिका स्थित प्रसिद्ध शिवनगर महादेव मन्दिरमा तेस्रो सावन साेमवार महाेत्सव २०८२ भव्य रूपमा सम्पन्न भएकाे छ । गरूडा नगरपालिकाकाे आयाेजनामा भइरहने याे वार्षिक महाेत्सव सावन महिनाकाे प्रत्येक साेमबार विभिन्न धार्मिक तथा सांस्कृतिक कार्यक्रमका साथ सम्पन्न हुँदै आएको छ ।
यस वर्षकाे महाेत्सवकाे उद्घाटन सावन महिनाकाे पहिलाे साेमबार गरूडा नगरपालिकाका नगर प्रमुख कन्थमनी जयसवालले गर्नु भएकाे थियाे । प्रमुख जयसवालले शिवनगर महादेव मन्दिरलाई धार्मिक पर्यटकीय गन्तव्यकाे रूपमा विकास गर्न नगरपालिकाले दीर्घकालीन योजना अघि बढाएकाे उल्लेख गर्दै यस किसिमका महाेत्सवहरू धार्मिक पर्यटन प्रवर्द्धनका लागि महत्वपूर्ण हुने बताए ।

कार्यक्रमकाे समापन सावनकाे तेस्राे साेमबार विशेष समारोहका साथ सम्पन्न भएकाे हाे ।
महाेत्सवमा गरूडा नगरपालिका वडा नम्बर ५ का वडा अध्यक्ष रामबिनाेद जयसवाल प्रमुख अतिथिका रूपमा सहभागी हुनुहुँदै भने, “शिवनगर महादेव मन्दिर र सावन साेमार महाेत्सव हाम्रो क्षेत्रकाे पहिचान हाे । यसलाई विश्वसामु चिनाउन हामी प्रत्येक वर्ष याे कार्यक्रमलाई अझ भव्य र व्यवस्थित बनाउन प्रतिबद्ध छाैं ।”
कार्यक्रमकाे अध्यक्षता टिकटाक स्टार राजकुमार साहले गर्नु भएकाे थियाे भने संयाेजककाे रूपमा कलाकार तथा कमेडियन माेहरलाल पटेल (एमएल पटेल) ले भूमिका निर्वाह गर्नुभएकाे थियाे ।

महाेत्सवमा भारत, बिहारका चर्चित कलाकार अलवेला अशाेक तथा नेपालका लोकप्रिय मैथिली गायक जागेश ठाकुर, किरण साह लगायतका कलाकारहरूले आफ्नाे प्रस्तुति दिएका थिए । धार्मिक श्रद्धालुहरूका साथै हजारौं दर्शक तथा भक्तजनहरूकाे उल्लेख्य उपस्थिति रहेको याे महाेत्सवले रौतहटको सांस्कृतिक र धार्मिक पहिचानलाई अझ प्रगाढ बनाएकाे छ ।

महाेत्सवलाई सफल पार्न सहयोग गर्न हुने कलाकार,पत्रकार र विभिन्न व्यक्तित्वहरूलाई मायाकाे चिन्हाे सहित सम्मान गरिएको थियोे ।

आरके श्रीवास्तव,राैतहट,१९ गते साउन ।
रौतहट जिल्लाको गुजरा नगरपालिका वडा नं. ८ मा अवस्थित केवल राम सुरत क्याम्पसको समिति पुनः गठन गरिएको छ । आइतबार सम्पन्न विशेष कार्यक्रम मार्फत क्याम्पस समितिको अध्यक्षमा गुजरा नगरपालिकाका नगर प्रमुख सन्तलाल चौधरीलाई पुनः दोस्रो कार्यकालका लागि सर्वसम्मत चयन गरिएको छ ।

उक्त कार्यक्रम नेपाल सरकारका पूर्व संविधानसभा सदस्य तथा जनता समाजवादी पार्टी (जसपा) का राष्ट्रिय उपाध्यक्ष गोविन्द चौधरीको विशेष उपस्थिति तथा आतिथ्यतामा सम्पन्न भएको हो ।

नवनिर्वाचित क्याम्पस समितिमा सदस्यहरूमा राष्ट्रिय सभा सदस्य पुजा चौधरी,हविव मिया मंसुरी,रामाअश्रे चौधरी,खुबल चौधरी र पुनित राम रहेका छन् ।
क्याम्पस प्रमुखको जिम्मेवारी रामेश्वर चौधरीलाई दिइएको छ भने शिक्षक प्रतिनिधिका रूपमा उपेन्द्र मिश्राको सहभागिता रहेको छ । विद्यार्थी प्रतिनिधिको रूपमा सरिता कुमारी लगायत अन्य प्रतिनिधिहरू चयन गरिएको छ ।

नवगठित समितिलाई हार्दिक बधाई तथा सफल कार्यकालको शुभकामना व्यक्त गर्दै कार्यक्रममा बोल्ने वक्ताहरूले क्याम्पसको शैक्षिक गुणस्तर सुधारमा समिति अझ बढी सक्रिय भई काम गर्ने अपेक्षा राखेका थिए ।

आरके श्रीवास्तव,राैतहट,१९ गते साउन ।
राैतहटकाे फतुवा बिजयपुर नगरपालिकामा आजदेखि विश्व स्तनपान सप्ताह सुरु गरिएको छ । नगरपालिकाको स्वास्थ्य शाखाले आयोजना गरेकाे उक्त कार्यक्रम स्वास्थ्य शाखा प्रमुख प्रमोद गुप्ता र स्वास्थ्य सहसंयाेजक रमेश प्रसाद यादवले उद्घाटन गरेका हुन् । यादवका अनुसार स्तनपान सप्ताह साउन १६ गतेदेखि २२ गतेसम्म मनाइनेछ ।
नगरपालिकाका ८ वटै स्वास्थ्य संस्थाहरूमा एकैसाथ स्तनपान सप्ताह मनाइँदैछ । कार्यक्रम अन्तर्गत ‘सुनौलो हजार दिन’ अन्तर्गतका आमाहरूलाई स्तनपानको महत्वबारे जानकारी गराउने उद्देश्य राखिएको छ ।
कार्यक्रममा आमाहरूलाई बच्चा जन्मिएको १ घण्टाभित्रै आमाको पहिलाे बिगाैती दूध खुवाउनुपर्ने, ६ महिना सम्म बच्चालाई मात्र आमाको दूध खुवाउने, र ६ महिनापछि स्तनपानसँगै फलफूल, लिटाे, गेडागुडी, माछामासु जस्ता पौष्टिक खाना खुवाउनुपर्ने सन्देश दिइएको छ ।
फतुवा बिजयपुर नगरपालिकाका कार्यवाहक नगर प्रमुख अम्बेया खातुनले स्तनपान सप्ताह जस्ता कार्यक्रमहरूले मातृत्व स्वास्थ्य र शिशु विकासमा ठूलो टेवा पुग्ने बताउँदै भनिन्, “हामीले नगरपालिकास्तरबाट आमाहरूलाई स्तनपानको महत्व बुझाउने यस्ता जनचेतनामूलक कार्यक्रमलाई निरन्तरता दिनेछौं। स्वस्थ आमा र बच्चा नै स्वस्थ समाजको आधार हुन्।”
सप्ताहभर विभिन्न सूचना, परामर्श सेवा, समुदायस्तरीय अन्तरक्रिया कार्यक्रम लगायतका गतिविधिहरू सञ्चालन गरिने जनाइएको छ ।

राकेश यादव,राैतहट,१८ गते साउन । 

जनता समाजवादी पार्टी नेपाल (जसपा) जिल्ला कार्य समिति रौतहटले आज एक प्रतिनिधिमण्डल मार्फत प्रधानमन्त्री तथा मधेश प्रदेश सरकारका मुख्यमन्त्रीलाई सात बुँदे मागसहित ज्ञापनपत्र बुझाएको छ । सुख्खाग्रस्त क्षेत्र घोषणा गरिए पनि पीडित किसानहरूलाई राहत नपुगेको भन्दै तत्काल राहत प्याकेज उपलब्ध गराउन माग गरिएको छ ।

जिल्ला अध्यक्ष राजिव रंजन यादवको नेतृत्वमा गएको प्रतिनिधिमण्डलले जिल्ला प्रशासन कार्यालय रौतहटमार्फत सहायक प्रमुख जिल्ला अधिकारी किरणनिधि तिवारीलाई ज्ञापनपत्र बुझाएको हो ।

ज्ञापनपत्रमा किसानका लागि राहत प्याकेज सुनिश्चित गर्नु पर्ने, पानीका स्रोतको संरक्षण गर्न चुरे क्षेत्रको दोहन तत्काल रोक्नु पर्ने, अबैध उत्खनन नियन्त्रण तथा कानुन विपरित सञ्चालन भइरहेका क्रसर उद्योगहरूमाथि कडा कार्यवाही गर्नुपर्ने माग गरिएको छ ।

त्यसैगरी, बिरगंजदेखि बारा, रौतहट, सर्लाही, महोत्तरी र धनुषासम्मका जिल्लामा देखिएको पानीको समस्या समाधान गर्न तुरुन्त कदम चाल्न आग्रह गरिएको छ। साना किसानलाई मोटर, स्यालो, ट्युबेल जडान गर्न हालको २ बिघा जग्गा शर्त हटाई सहज पहुँच हुने व्यवस्था मिलाउन र उखु किसानका बाँकी भुक्तानी तुरुन्त दिनु पर्ने माग पनि उल्लेख छ।

ज्ञापनपत्र बुझाउने कार्यक्रममा गुजरा नगरपालिकाका मेयर सन्तलाल चौधरी, माधव नारायण नगरपालिकाका उपप्रमुख निर्मला रमण, पूर्व राज्य मन्त्री योगेन्द्र राय यादव, पूर्व गौर नगरपालिकाका उपप्रमुख किरण ठाकुर लगायत सयौं पार्टी कार्यकर्ताहरू सहभागी थिए ।

प्रेमचन्द्र झा,राैतहट,१८ गते साउन । 

रौतहट । राजदेवी नगरपालिका–१ निवासी प्रभु राय यादवले सूचना अधिकार ऐन २०६४ को दफा ३ अनुसार राजदेवी नगरपालिकासँग विभिन्न विकास योजनाहरू, खर्च विवरण, कर्मचारी नियुक्ति, स्वास्थ्य सेवा, कृषि कार्यक्रम, सञ्चारमाध्यमलाई वितरण गरिएको रकमलगायतका विषयमा विस्तृत १३ बुँदे सूचना माग गरेका छन्।

उहाँले मिति २०८२ साल साउन ४ गते नगरप्रमुख तथा प्रमुख प्रशासकीय अधिकृत समक्ष निवेदन दिँदै नगरपालिकाबाट विद्यालयहरूमा छात्रवृत्ति, खाजा, विज्ञान प्रयोगशाला जस्ता शीर्षकहरूमा कति रकम खर्च भएको, कुन विद्यालयमा कति रकम विनियोजन गरिएको हो भन्ने विवरण माग गरेका छन्। साथै, विद्यालयहरूमा हाल कति बालबालिका छन्, राहत तथा अनुदान कोटाको संख्या कति छ, त्यसको विवरण पनि उहाँले माग गर्नुभएको छ। २०७९ सालदेखि हालसम्म विद्यालयहरूमा कति बजेट विनियोजन गरिएको छ, कुन शीर्षकमा कति खर्च भएको छ भन्ने कार्यक्रमगत विवरण माग गरिएको छ।

त्यस्तै, वडा नं. १ देखि ९ सम्मका विद्यालय, स्वास्थ्य चौकी तथा वडा कार्यालयहरूमा करार तथा नयाँ रूपमा कति नियुक्ति भएका छन्, कुन पदमा को–को नियुक्त भएका छन् भन्ने नामावलीसहितको सूचना माग गरिएको छ। राजदेवी नगरपालिकाले नगरस्तरीय योजना अन्तर्गत कुन–कुन वडामा कति योजना सञ्चालन गरेको हो भन्ने विवरण पनि माग गरिएको छ।

स्वास्थ्य क्षेत्रमा २०७९ सालदेखि हालसम्म कति बजेट छुट्याइएको छ, आयुर्वेदमा कति रकम विनियोजन भएको छ, कुन किसिमको औषधिहरू उपलब्ध छन् भन्ने विवरण पनि सोधिएको छ। साथै, नगरपालिकाबाट कृषि क्षेत्र अन्तर्गत धान र गहुँको बीउ, मोटर, बोरिङ्ग, च्यास्फर्म, पोल–तार वितरण गरिएको कागजात मागिएको छ।

बेरुजुसम्बन्धी विवरणमा नगरपालिकामा हालसम्म कति बेरुजु छ, पहिलेको कति थियो, फछ्र्यौट भएको रकम कति हो र कुन कर्मचारी वा व्यक्तिको नाममा कति बेरुजु रकम छ भन्ने विस्तृत विवरणसहित नामावली माग गरिएको छ। नगरपालिकाले टिपर, डोजर, कल्टिभेटर, एम्बुलेन्सलगायतबाट २०७९ सालदेखि हालसम्म कति आम्दानी गरेको छ भन्ने विवरण पनि उक्त निवेदनमा समेटिएको छ।

वडा नं. १ मा २०७९ सालदेखि हालसम्म कुन शीर्षकमा कति रकम बजेट गरिएको हो, कार्यालयको महिनाको भाडा, रंगरोगनको खर्च, अफिस सञ्चालन खर्चजस्ता विवरण पनि समावेश छन्। श्री माध्यमिक विद्यालय पथरामा २०७९ सालदेखि हालसम्म कुन शीर्षकमा कति रकम खर्च भएको हो भन्ने विवरण र त्यसको नामावलीसमेत माग गरिएको छ। अन्त्यमा, नगरपालिकाबाट सञ्चारमाध्यमलाई दिइएको रकम कति हो, कुन मिडियालाई कति दिइएको हो भन्ने नामावलीसहितको विवरण पनि यादवले माग गरेका छन्।

निवेदक प्रभु राय यादवले नागरिकले सूचनाको हक प्रयोग गरेर सार्वजनिक निकायको पारदर्शिता र जवाफदेहितामा नागरिक निगरानीको अभ्यास गर्न सक्ने बताउँदै यस्तो माग गर्नु नागरिकको अधिकार मात्रै नभई कर्तव्य पनि भएको उल्लेख गर्नुभएको छ।

यादवले भने अनुसार, निवेदन दर्ताका लागि साउन ४ गतेदेखि पाँच दिनसम्म पटक–पटक कार्यालय गइसकेपछि बल्ल साउन १८गते आइतवार निवेदन दर्ता गरिएको हो। प्रमुख प्रशासकीय अधिकृत प्रलव कायस्थले नगरपालिकाका अधिकांश कर्मचारी भारतको देवघरलगायतका स्थानमा तिर्थ गर्न गएको हुँदा सूचना पाउन अझै महिना दिन लाग्न सक्ने प्रतिक्रिया दिएका छन्। यादवले नगरप्रमुख भिखारी यादवलाई समेत यस विषयमा जानकारी गराइसकेको बताउनु भएको छ।

सूचना अधिकार ऐन २०६४ अनुसार, निवेदन परेको मितिदेखि १५ कार्य दिनभित्र आवश्यक सूचना उपलब्ध गराउनुपर्ने कानूनी व्यवस्था रहेको छ। यदि सो समयमा पनि सूचना प्राप्त नभएमा राष्ट्रिय सूचना आयोगमा उजुरी दिन सकिने प्रावधान छ।

यस घटनाले जनताले सार्वजनिक कार्यालयमाथि निगरानी राख्न, बजेट पारदर्शिता माग गर्न र सुशासन सुनिश्चित गर्न सूचना हकलाई प्रभावकारी रूपमा प्रयोग गर्न थालेका छन् भन्ने स्पष्ट सङ्केत दिएको छ।

आरके श्रीवास्तव,राैतहट,१८ गते साउन ।
रौतहट । उखु उत्पादक संघ रौतहटले जिल्ला प्रशासन कार्यालय मार्फत प्रधानमन्त्री समक्ष ज्ञापनपत्र बुझाउँदै आर्थिक वर्ष २०८१/८२ को बाँकी रहेको उखु अनुदान रकम तत्काल भुक्तानी गर्न माग गरेको छ । संघले प्रति क्विन्टल ७० रुपैयाँका दरले हुने करिब १ अर्ब ६० करोड रुपैयाँ अनुदान सरकारले अझै नदिएको भन्दै चिनी उद्योगबाट भुक्तानी भए पनि सरकारी अनुदान रोकिएको जनाएको छ ।
सर्लाहीको हरिवनमा बसेको नेपाल उखु उत्पादक महासंघको बैठक निर्णयअनुसार संघले प्रधानमन्त्रीको ध्यानाकर्षण गराउँदै उखु अनुदान र आगामी मूल्य निर्धारणका लागि त्रिपक्षीय वार्ता गराउन पनि आग्रह गरेको छ ।
किसानहरुले विगतमा आन्दोलनबाट अनुदान व्यवस्था लागू गराएको स्मरण गराउँदै संघले यदि माग सम्बोधन नभए चरणबद्ध आन्दोलन गर्ने चेतावनी दिएको उखु उत्पादक संघ राैतहटका अध्यक्ष अशाेक प्रसादले जानकारी गराउनु भएको हाे ।
पहिलो चरणमा साउन १८ गते जिल्ला प्रशासन कार्यालयमार्फत ज्ञापन पत्र, साउन २० मा चिनी उद्योग अगाडि प्रदर्शन, र भदौ ८ देखि माईतीघर मण्डलामा धर्ना कार्यक्रम घोषणा गरिएको छ । ज्ञापनपत्र बुझाउने क्रममा नेता वृजकिशाेर यादव,रामभराेस यादव लगायतका व्यक्तिहरू सहभागी थिए ।

काठमाडौं,१९ गते साउन । 

संघीय लोकतान्त्रिक मोर्चाले देशको वर्तमान राजनीतिक परिस्थितिबारे जनतालाई जानकारी गराउने उद्देश्यसहित काठमाडौंबाट एक महिनाको जनजागरण अभियान सुरु गरेको छ ।

आइतबार राजधानीमा आयोजित कार्यक्रममार्फत अभियानको शुभारम्भ गरिएको हो । कार्यक्रममा सहभागी नेताहरुले राज्यले मधेशी, आदिवासी जनजाति लगायत पछाडि पारिएका समुदायप्रति विभेदी व्यवहार गरेको आरोप लगाए ।

संविधान संशोधन सहज छैन: महन्थ ठाकुर

लोकतान्त्रिक समाजवादी पार्टीका अध्यक्ष महन्थ ठाकुरले संविधान संशोधन दलहरूले भनेजस्तो सजिलो नभएको बताए । संविधान बनाउने शक्तिहरुबाट नै संविधानमाथि खतरा रहेको भन्दै उनले सबै समुदायले मिलेर राज्यलाई दवाव दिनुपर्ने धारणा राखे। उनले मधेशी समुदाय अझै पनि समान अधिकारबाट वञ्चित रहेको उल्लेख गरेका छन् ।

विभेद हटेन भने विद्रोह हुन्छ:उपेन्द्र यादव

जसपा नेपालका अध्यक्ष उपेन्द्र यादवले राज्यद्वारा नागरिकमाथि भइरहेको विभेद अन्त्य नभए विद्रोह हुनसक्ने चेतावनी दिए । उनले सुकुम्बासीका नाममा सरकारद्वारा चलाइएका काममा धाँधली भएको आरोप लगाए। यादवले सरकार जनपक्षीय बन्न नसकेको भन्दै समर्थन फिर्ता लिएको पनि बताए ।

देश सबैको साझा हुनुपर्छ:राजेन्द्र महत्तो

राष्ट्रिय मुक्ति मोर्चा नेपालका अध्यक्ष राजेन्द्र महत्तोले सबै समुदायले अपनत्व लिनसक्ने खालको संविधान चाहिएको बताए । देशलाई सबै जातजाति र समुदायको साझा बनाउँदै अघि बढाउनुको विकल्प नरहेको उनको भनाइ थियो ।

संघीय लोकतान्त्रिक मोर्चाले भैरहवा, नेपालगञ्ज, कैलाली, विराटनगर, राजविराज, जनकपुर हुँदै भदौ २२ गते वीरगञ्जमा अभियानको समापन गर्ने जनाएको छ ।

आरके श्रीवास्तव,राैतहट,१८ गते साउन । 

गरूडा नगरपालिका वडा नम्बर ५ का वडा अध्यक्ष पदका उम्मेदवार रमेश प्रसाद यादवसँगको विशेष अन्तर्वार्ता
प्रश्न: तपाईं जनताको सेवामा कसरी लागिरहनु भएको छ ?

👉️ म राजनीतिक पृष्ठभूमिबाट आएको व्यक्ति होइन, तर जनताले खाँचो परेको बेला सधैं सहयोग गर्दै आएको छु । जनताको विश्वास कामबाटै कमाइन्छ भन्ने मान्यता राख्दछु । शिक्षा, स्वास्थ्य वा अन्य कुनै पनि क्षेत्र जहाँ जनतालाई आवश्यकता देखिन्छ । त्यहाँ म आफूबाट सक्दो सहयोग पुर्याउने कोसिस गर्छु । किसानका लागि कृषि विद्युतिकरणको प्रयास गरिरहेको छु  र गरेको छु पनि । वडाका जनताले आएर कुनै आवश्यकताहरू राखेमा करिब ७५ प्रतिशतसम्म त सक्ने सहयोग गरिसकेको छु ।

प्रश्न: विकास निर्माणका क्षेत्रमा तपाईंको योगदान कस्तो रह्यो ?

👉️ म निर्वाचित प्रतिनिधि नभए पनि विगतका दुई जना निर्वाचित वडा अध्यक्षभन्दा बढी विकास निर्माणमा योगदान पुर्याएको छु । उदाहरणका लागि, शिवनगरमा विश्वकर्मा मन्दिर निर्माण, सडक ढलान, नाला निर्माण, लक्ष्मीपुरमा पनि ढलान गराएको छु । यो वर्ष पनि छठघाट निर्माण, शिवनगरमा दुर्गामन्दिर, र महम्मदपुरदेखि भीमडाबरसम्म सडक ढलान गराएको छु । वडाकाे बजेटभन्दा बढी काम गरेको छु, तर कमाइको धन्दा भने गरेको छैन् ।

प्रश्न: तपाईं निर्वाचित नभए पनि बढी काम गरेको दाबी गर्नुहुन्छ, जनतालाई कसरी विश्वस्त बनाउनुहुन्छ ?

👉️ जनताले आफैं मूल्यांकन गर्छन् । मेरो काममा कसैलाई शंका लागे प्रमाणित गरेर देखाउन तयार छु । म प्रदेश सरकार लगायत सम्बन्धित निकायहरूसँग समन्वय गरेर विकासमा लगानी गरिरहेको छु । यदि कसैलाई शंका छ भने, सिधा जनतामाझ जानुस् । उनीहरूले नै मेरो पक्षमा बोल्नेछन् ।

प्रश्न: गरिब तथा विपन्न वर्गका लागि के योगदान दिनुभएको छ ?

👉️ मैले प्रचारको लागि होइन, कामको लागि राजनीति गरेको हुँ । सामाजिक सञ्जालमा नदेखिएको भए पनि मैले प्रदेश सरकारसँग समन्वय गरी मदन भण्डारी आवास कार्यक्रम अन्तर्गत ८ वटा घर निर्माण गराएको छु । ती घरहरू खासगरी ती गरिब परिवारलाई प्रदान गरिएको छ, जो वर्षौं गाउँबाट बाहिर बस्दै आएका थिए । कोही धनी वा कार्यकर्तालाई होइन, लक्ष्यित वर्गलाई नै सहयोग पुर्याइएको छ । मलाई विश्वास छ । राम्रो काम गरे जनताले साथ दिन्छन् ।

प्रश्न: तपाईं आफैं युवा हुनुहुन्छ, युवालाई के सन्देश दिन चाहनुहुन्छ ?

👉️ राजनीति परिवर्तन गर्न युवा पुस्ताको मुख्य भूमिका हुन्छ । पुराना सोचले देश विकास हुन सक्दैन् । जहाँ-जहाँ युवालाई अवसर दिइएको छ, त्यहाँ परिवर्तन सम्भव भएको छ । म युवालाई प्रेरित गर्न चाहन्छु कि आफ्नो समाज आफैं सुधार्न अघि बढ्नुपर्छ । म आफैं पनि दिन-रात युवाको आवश्यकतामा साथ दिन तयार छु ।

प्रश्न: अन्त्यमा वडावासीप्रति तपाईंको सन्देश ?

👉️  म आफूलाई सेवक सम्झन्छु, र जनतालाई भगवान् मान्दछु । म वडाबासीहरूलाई यही भन्न चाहन्छु कि म सेवा गर्न सधैं तयार छु, प्रतिफल तपाईंहरूकै हातमा छ । राजनीतिक यात्रामा मैले धेरै संघर्ष गरेको छु । पहिलोचोटि उम्मेदवार बनेर २-३ सय भोट पाएँ, तर यही जनताको आशीर्वादले आज धेरै ठोस काम गर्न सकेको छु । मलाई पूर्ण विश्वास छ, आगामी दिनमा जनताले मलाई थप अवसर दिनेछन् ।

रमेश प्रसाद यादव नेपाली कांग्रेसका वडा सभापति हुन् यस अघिकाे स्थानीय तहकाे निर्वाचनमा  राैतहटकाे गरूडा नगरपालिका वडा नम्बर ५ बाट उम्मेदवारी दिएका थिए ।