इन्दीप कोइराला,बारा, २ साउन ।
सिम्रौनगढ नगर अस्पतालका स्वास्थ्यकर्मी र कर्मचारीहरू आन्दोलित हुँदा सोमबारदेखि स्वास्थ्य सेवा ठप्प भएको छ ।
अस्पतालमा कार्यरत करार र ज्यालादारीमा भर्ना गरिएका स्वास्थ्यकर्मी र कर्मचारीहरुले तलबसहित विभिन्न माग राखेर नगर अस्पतालको मुख्य गेटमा तालाबन्दी गरी धर्नामा बसेका छन् ।
सिम्रौनगढ नगर अस्पताल प्रमुख डा. जितेन्द्र यादव, श्यामसुन्दर कुशवाहा, रविन हुसेन, पवन पटेल, अयुब मिया अन्सारी, ललिता यादव, नितु गुप्ता, रन्जु कुशवाहा, सन्तोषकुमार कुशवाहा लगायतका २४ जना कर्मचारीहरुले सोमबार बिहान ११ः४५ बजे अस्पतालको मुल ढोकामा ताला लगाएका हुन् ।
तलब, भत्ता, अतिरिक्त काममा थप भत्ता, चाड पर्वभत्ता र सेवा अवधि थप लगायतका मागहरु यथाशीघ्र पूरा गर्नुपर्ने मागसहित कर्मचारीहरूले अस्पतालमा तालाबन्दी गरेका हुन् ।
आफ्ना माग पूरा नभए थप आन्दोलनको कार्यक्रम घोषणा गर्ने उनीहरुले चेतावनी दिएका छन् । यसअघि नगरपालिकाका वडा कार्यालयमा कार्यरत करार सेवाका कर्मचारीहरुले आइतबारबाट वडा कार्यालयमा तालाबन्दी गरेर सेवा ठप्प पार्दै आएका छन् ।
विशाल बस्नेत,महोत्तरी, २ साउन ।
बर्दिबास नगरपालिकाले नगरवासीलाई निःशुल्क रगत प्रदान गर्ने नीति तथा कार्यक्रम पारित गरेको छ । तर, यसको कार्यान्वयनको पक्षलाई लिएर आशंका उब्जिएको थियो । नगपालिकाको उक्त नीतिले कोही रगतको अभावमा मर्ने त कोही रगत भए पनि पैसाको अभावमा मर्नुपर्ने अवस्था अन्त्य हुने अपेक्षा बर्दिबास रेडक्रस सोसाईटीका पूर्वसभापति मुकुन्द पौडेलको छ । कार्यान्वयनको पक्षलाई लिएर भने उनी सशंकित थिए ।
गत सोमबार बेलुका नगरप्रमुख प्रल्हादकुमार क्षेत्रीले बर्दिबास–४ स्थित वरडाडा बस्ने बिरामी कृष्णबहादुर माझीलाई रेडक्रसमा पुगेर रगत हस्तान्तरण गरेपछि पौडेल ढुक्क भए कि अब पैसा नभएर कोही पनि नगरवासीहरु रगत नपाएर मर्नुपर्दैन ।
निःशुल्क रगत प्रदान गर्ने नगरको नीतिलाई औपचारिक रुपमा कार्यान्वयन गरेको नगरप्रमुख क्षेत्रीले बताए । रेडक्रस सोसाईटीका सभापति सुदिप कार्कीको अनुसार बर्दिबासमा मात्र अहिले मासिक दुई सयभन्दा बढी बिरामीहरुलाई रगतको अभाव हुने गरेको छ । ‘संस्थागत हो सहयोग गर्न पनि नसकिने रहेछ । व्यक्तिगत सहयोग त गर्छौं, तर त्यो पनि सधैभरि सम्भव नहुने रहेछ,’ उनले भने ।
रेडक्रस सोसाईटीका अर्का सदस्य गोपाल बरालले भन्छन्, ‘रगत सहज ढंगले पाए पनि पैसाको अभावमा रगत किन्न नसक्ने धेरै नगरवासीहरुको नगरप्रमुखले ज्यान बचाएका छन् ।’
कतिपय बिरामीलाइ महिनामा चारपटकसम्म रगत लिन रेडक्रस आउनुपर्ने हुन्छ । एक युनिट रगतको १४ सय रुपैयाँ तिर्नुपर्ने हुँदा विपन्न र गरिब समुदायको लागि मासिक ५ हजार रगतमा नै खर्च गर्नुपर्ने बाध्यात्मक अवस्था छ ।
यस्तै कठिन अवस्थाको अनुभव गरेकी छन बर्दिबास–८ खजुरियाकी अर्पणा लुङगेलीले । बर्दिबासस्थित डिएनवी अस्पतालका डा. प्रविन मिश्रसँग उपचार गराउँदा उनको आन्द्रा फुटेको र मुखवाट अत्याधिक रगत बगेको हुनाले पटक–पटक रगत चाहिराख्ने चिकित्सकले सुझाएका थिए ।
आर्थिक स्थिति कमजोर भएकी लुङ्गेलीले जेनतेन उपचार गराइरहे पनि रगत कसरी ल्याउने होला भन्ने पिरलो थियो । लुङ्गेलीले रेडक्रसवाट विपन्न राहत कोषका माध्यमबाट रगत दिइरहेको त थाहा पाइँन, तर प्रक्रियाको झन्झटिलोले उनलाई थप तनाव सृजना भयो ।
सम्बन्धित् वडावाट आर्थिक स्थिती कमजोर भएको प्रमाणित गराउनुदेखि रेडक्रसलाई रगत प्रदान गर्न दिने सिफारिस लिन नै उनले दिनहुँ समस्या झेलिन् । तर, नगरपालिकाले पास गरेको नीति तथा कार्यक्रमले भने अब त्यो झन्झटबाट मुक्त भएको महसुस गराएको छ ।
नगरवासी भएको प्रमाण मात्र पेस गरेपछि रगत पाउने नगरले नीति बनाएको सुनेपछी लुङ्गेली निकै खुसी भएकी छन्। ‘अब मजस्ता गरिब कागज बनाउन अल्मल्लिनुनपर्ने रहेछ खुसी लाग्यो,’ उनले भनिन् ।
रन्धिर साह, रौतहट, साउन १ गते ।
रौतहटको कटहरिया नगरपालिका वडा नम्बर ४ स्थित रहेको हर्षाहामा विपद जोखिम न्यूनीकरण, परिक्षण तथा बाढि सम्बन्धि कृतिम घटना अभ्यास कार्यक्रम सम्पन्न भएको छ । आज एक विशेष कार्यक्रमका बीच कटहरिया नगरपालिकाकी उप प्रमुख रिता देवि यादवको प्रमुख आतिथ्यता तथा जिल्ला समन्वय समिती रौतहटका अध्यक्ष रामअयोध्या राय यादवको विशिष्ट अतिथिमा सो कार्यक्रम सम्पन्न भएको हो ।
सो कार्यक्रमा बाढी आएको समयमा तथा बाढीमा फसेका लागि कसरी बचाउने, आफु बचने लगायतको विषयमा भन्दै सो कार्यक्रममा क्रियाकलाप गरि समापन्न गरेको थियो । कार्यक्रममा कटहरिया नगरपालिकाका प्रमुख प्रशासकीय अधिकृत राम प्रकाश साह, वडा नम्बर ४ का वडाध्यक्ष चन्दन कुशवाहा तथा नगरपालिकाका सम्पुर्ण सहयोगी कर्मचारीहरु लगायतको उपस्थितिमा कार्यक्रम भएको थियो ।
रौतहट, १ साउन। गौर हत्याकाण्ड पीडित संघर्ष समितिले दोषीलाई कारबाहीको माग गर्दै अनिश्चितकालीन रौतहट बन्दसहितको आन्दोलनका कार्यक्रम गर्ने चेतावनी दिएको छ ।
घटनापछि जाहेरी दर्ता गरेको १७ वर्षसम्म दोषीउपर कानुनी कारबाही नभएको भन्दै समितिले सोमबार प्रमुख जिल्ला अधिकारीलाई ज्ञापनपत्र बुझाउँदै संघर्षका कार्यक्रमबारे पनि जानकारी दिएको छ ।
७ चैत २०६३ मा रौतहटको गौरस्थित राइसमिल चौरमा तत्कालीन नेकप माओवादी र तत्कालीन मधेशी जनअधिकार फोरमले कार्यक्रम गर्न लाग्दा भएको घटनामा २८ जनाको मृत्यु भएको थियो । सो घटनापछि २८ चैत २०६४ मा रौतहट जिल्ला प्रहरी कार्यालयमा जाहेरी दर्ता भएको सोमबार १७ वर्ष वितिसक्दा पनि कारबाही प्रक्रिया नथालेको भन्दै समितिले आन्दोलित भएको हो ।
सोमबार समितिले प्रदर्शनसमेत गरेको छ । ‘अमानवीय र विभत्य हत्या गर्ने गौर हत्याकाण्डका हत्यारा अपराधीहरुलाई वर्षों वर्षसम्म पनि अनुसन्धानको दायरामा ल्याई कारवाही नगर्नाले हामी पीडितहरुको आँखा अगाडि नै अपराधिहरु खुलेआम घुमी रहेको देख्नु पर्दा हामीलाई अझ बढी पीडा बोध हुन गएको छ । घटना घटेको अमानवीय र विभत्स हत्याकाण्डका दोषीलाई कानुन बमोजीम अविलम्ब कारबाही गरी हामी पीडितहरुलाई अपराध पीडितको हक प्रचलन गराई न्यायको प्रत्याभूति दिलाउन विनम्र अनुरोध गर्दछौं,’ समिति संयोजक रुपसागर देवीले हस्ताक्षर गरेर प्रमुख जिल्ला अधिकारीलाई बुझाएको ज्ञापनपत्रमा उल्लेख छ ।
कारबाही नगरेमा आन्दोलनमा उत्रिने घोषणा गर्दै संघर्षका कार्यक्रमबारे पनि प्रजिअलाई जानकारी गराएका छन् ।
जसअनुसार साउन२–१२ गतेसम्म पलिकाहरूमा गौर हत्याकाण्डको जानकारी एवं अन्तरक्रिया गर्ने, साउन १३ गते शहीद परिवार एवं पीड़तिहरूद्वारा धर्ना दिने, साउन १४ गते मोटरसाइकल ¥याली गर्ने र साउन १५ देखि अनिश्चितकालीन रौतहट बन्द गर्नेछ ।
मितिः २०८०/०४/०१
श्रीमान् प्रमुख जिल्ला अधिकारी ज्यू, जिल्ला प्रसाशन कार्यालय गौर, रौतहट
विषयः ज्ञापन पत्र
२०६३ साल चैत्र ७ गते रौतहटको गौर स्थित राइसमिल चौरमा दिउसो १ः४५ बजे तत्कालिन नेकपा माओवादीको मञ्च बनाई सभा गर्न लाग्दा सो कार्यक्रममा उपस्थित नेकपा माओवादी समर्थकहरु निर्दोष एवं निहता नागरिकहरु उपर उपेन्द्र यादवको नेतृत्वमा रहेको तत्कालीन मधेशी जनअधिकार फोरमले ठूलो संख्यामा अफ्नो कार्यकतालाई मानव ढाल बनाइ केही पेशेवर आपराधिक समूहको जत्थाले सुनियोजित रुपमा भिषण एंव अमानवीक अमानुषिक एंव नरसंहारकारी, पाशविक रुपमा गरेको कुरुर आक्रमणवाट २७ जना सर्वसधारणको घटना स्थलमै र एक जनाको उपचारका क्रममा मृत्यु र सयौँको संख्यामा निर्दोष नागरिकहरु घाइते भएका थिए ।
भिषण आक्रमणवाट मारिएकाहरु मध्ये अधिकांस स्वचालित बन्दुक हतियारले गोली हानी मारिएको र साथै बाँसको फट्टा, ढुङ्ग÷इट्टाले टाउको र मुखमा थिचेर धारीलो हतियार प्रहार गरेर मारेका थिए । महिलाहरुलाई बाँसको भाटाले सम्वेदनशील अंगहरुमा घोचेर, बलात्कार गरी स्तन काटेर छटपटीरहेको अवस्थामा जिउदै आगो लगाएर हत्या गरिएको थियो । घटना स्थलवाट ज्यान बचाउन भाग्दै गरेका निराष नागरिकहरुलाई अपराधिहरुले गौरभन्दा सात आठ किलोमिटर टाढासम्म गौंडा कुरेर तथा लखेटी लखेटी हत्या गरेका थिए । यसलाई गौर हत्याकाण्डको नामले समेत चिनिन्छ ।
उपरोक्त माहोल र पृष्ठभुमिमा तत्कालिन अवस्थामा नेपालमा मात्र नभइ विश्वमानै चर्चामा र शान्ति प्रक्रियामा रहेको नेकपा माओवादीको हत्या गरेमा आफुलाई अझ बढी उत्कृष्ट एंव शाक्तिशाली बन्ने अभिष्ट लालसाको साथ उपेन्द्र यादव नेतृत्वको जत्थाले यस्तो जघन्य अपराध गरेको हो । यो घटना प्रचालित नेपाल कानुन बमोजिम मात्र अपराध नभइ नेपाल पक्ष रहेको टरचर कन्भेन्सन लगायतका अन्य अन्तराष्ट्रिय महासंधी समेतले यस्ता प्रकारको जघन्य अपराधलाई अन्तर्राष्ट्रिय अपराधको रुपमा स्वीकार गरेको अवस्था छ । घटनाको भोलीपल्ट तत्कालिन गृहमन्त्री कृष्णप्रसाद सिटौला, सञ्चार मन्त्रि कृष्णबहादुर महरा र राष्ट्रसंघीय मिसन अनमिनका प्रतिनिधि पनि घटना स्थल पुगी घटनाको निरिक्षण गर्नुभएको थियो । घटनाको वास्तविक तथ्य पतालगाउनको लागी नेपाल सरकारले तत्कालिन पुनरावेदन अदालतका मा. न्यायधिश श्री हरि प्रसाद शर्माको संयोजकत्वमा गठन गरेको छानविन आयोगले नेपाल सरकारलाई बुझाएको प्रतिवेदनमा राष्ट्रिय मानव अधिकार आयोग समेतको प्रतिवेदनले यस घटनालाई राजनैतिक झडप नभइ जघन्य एंव अमानुषिक र अमानवीय अपराध गरेको भनी तथ्यगत बुंदा पुष्टिहुने गरी निष्कर्ष सहितको प्रतिवेदन पेश गर्दा पनि नेपाल सरकारले यस्ता जघन्य अपराधमा संलग्न अपराधिहरुलाई कानुनी दायरामा ल्याई कार्वाही नगरेकोले रौतहट जिल्ला प्रहरी कार्यालयमा मिति २०६४ चैत्र २८ गते जाहेरी दर्ता भएको आज १७ वर्ष वितिसक्दा पनि कार्वाहीको प्रारम्भिक चरणको काम पनि भएको छैन ।
नेपालको संविधानको धारा २१ बमोजिम अपराध पिडितको हक मौलिक हक हो उपधाग (१) अनुसार अपराध पिडितलाई आफु पिडित भएको मुद्धाको अनुसन्धान तथा कार्वाही सम्बन्धी जानकारी पाउने हक हुनेछ र उपधारा (२) अनुसार अपराध पिडितलाई कानुन बमोजीम समाजिक पुनःस्थापना र क्षतिपुर्ति सहितको न्याय पाउने हक समेतको अनुसन्धान उल्लङ्घन भएको छ । न्याय इन्साफ पाउनलाई सम्मानित सर्वोच अदालत प्रक्रियालाई अगाडि बढाउन मात्र परमादेशको माग सहितको निवेदन दर्ता भएको अवस्था रहेको छ ।
तसर्थ अमानवीय र विभत्य हत्या गर्ने गौर हत्याकाण्डका हत्यारा अपराधीहरुलाई वर्षों वर्षसम्म पनि अनुसन्धानको दायरामा ल्याई कारवाही नगर्नाले हामी पिडितहरुको आँखा अगाडि नै अपराधीहरु खुल्याम घुमी रहेको देख्नु पर्दा हामीलाई अझ बढी पिडा बोध हुन गएको छ । घटना घटेको अमानवीय र विभत्प हतयाकाण्डका दोषीलाई कानुन बमोजीम अविलम्ब कार्वाही गरी हामी पिडितहरुलाई अपराध पिडितको हक प्रचलन गराई न्यायको प्रत्याभुति दिलाउन विनम्र अनुरोध गर्दछौ ।
अन्तः गौर हत्याकाण्डका अपराधीहरुलई कवांही नगरेमा हामी पिडितहरु विभिन्न संघर्षका कार्यक्रमहरु अगाडी बढाउने छौ ।
संघर्षका कार्यक्रमहरू :
श्रावण १ गते : सीडीओलाई ज्ञापन पत्र
श्रावण २–१२ गते सम्म पलिकाहरूमा गौर हत्याकाण्डको जानकारी एवं अन्तरक्रिया श्रावण १३ गते ः शहीदपरिवार एवं पीड़तिहरूद्वारा धर्ना
श्रावण १४ गते : मोटरसाइकल ¥याली
श्रावण १५ गतेदेखि अनिश्चितकालीन रौतहट बन्द
बोधार्थ :
प्रधानमन्त्री तथा मन्त्रिपरिषदको कार्यालय
मानव अधिकार आयोग
सर्वोच्च अदालत
रुपसागर देवी
संयोजक, गौर हत्याकाण्ड पीडित संघर्ष समिति
आरके श्रीवास्तव,रौतहट,साउन १ गते ।
रौतहट–रौतहटको गढिमाइमा राष्ट्रिय सेवादलले जिल्लाका ३६ जना विद्यार्थीलाई एनसिसि तालिम दिन सुरु गरेको छ । श्री माध्यमिक औपचारीक रुपमा तालिमको उद्धघाटन गरेर सोमबार देखि १ सय दिने तालिम दिन सुरु गरेको हो ।
श्री माबी समनपुरका ३६ जना छात्र र छात्रालाई १ सय दिने तालिममा सहभागी गराएको जानकारी गराइएको छ । तालिमको पहिलो दिनमा प्रथम प्रवचन र पोशाकहरु वितरण गरी तालिमको सुरु गरेको श्री बिरदल गणका प्रमुख सेनानी गंगा बहादुर विष्टले बताए ।
युवामा ब्यक्तित्व विकास तथा क्षमता अभिबृद्धी गरि विभिन्न समयमा आउने विपद्का बेला सहयोग गर्ने उदेश्यले जिल्ला भरीमा १०८ जना विद्यार्थीहरुलाई तालिममा सहभागी गराईएको बिरदल गणका सेनानी विष्टले बताए । बिधालयमा अध्ययनरत विद्यार्थीहरुलाई एनसिसि जुनियर सिनियर तालिम दिन सुरु गरे पछि विद्यार्थीका अबिभावकहरु समेत खुसी भएका छन् ।
तालिममा विद्यार्थीहरुलाई अनुशासन,शारिरिक तालिम , सैनिक ज्ञान , विपद ब्याबस्थापन, लगायत विभिन्न विषयवस्तु सम्बन्धी ज्ञान दिईने छ । एनसिसि तालिम जिल्लाको तीन वटा बिधालयमा सञ्चालन भैरहेको छ । प्रहरी स्कूल जिंगडिया,श्री शंकर गुदर मावि समनपुर,श्री मावि टिकुलियामा चलिरहेको बुझिएको छ ।
रनिधर साह, रौतहट, असार ३१ गते ।
रौतहटको गुजरा नगरपाकिला स्थित रहेको लामहा नदिमा पानीको सतह बढि भएका कारण बाटो अवरुद्ध भएका छन् । सो नदिमा धरै दिनदेखि लमहा पुल निमार्ण कार्य भइरहेको छ । तर, सो पुल निमार्णको ठेका लिएको ठेकेदारका कारण बाटो अवरुद्ध भएकाे तथा स्थानीयलाई सास्ती भएकाे छ ।
सो पुल निमार्ण गर्नु अघि विना कमचलाउ बाटो (डाइर्भजन) को निमार्ण पुलको काम सुरु भएको समयदेखि नै स्थानीय तथा आवत जावत गर्ने सवारी साधनहरुलाई कठिनाई भएको देखिन्छ । केहीदिन पहिला पनि वर्षाका कारण सो बाटो अवरुद्ध भएपश्चात गुजरा नगरपालिकाको निदेर्शनमा ह्युम पाईप राखेर बाटो खुल्याइएको थियो । यो घटना पटक पटक भएका कारण स्थानीयहरुलाई समस्या परेको सो पालिकाको अम्तवा निवासी निरज साहले बताएका छन् । उनका अनुसार वर्षा भएको दिनदेखिर्नै सो बाटो उवरुद्ध भएका कारण आवत जावतमा समस्या भएको हो ।
सो बाटो भएर दैनिक रुपमा जाने एभर ग्रिन विधालय बालचनपुरका शिक्षक नेवालाल चौधरी भन्छन् हाम्रो लागि यो बाटो न भएका कारण धेरै नै समस्या भएको हो । स्थानीय सरकारले चासो नदेखाएका कारण सो समस्याको समाधान हुन नसकेको गुनासो गरेका छन् । उनी भन्छन् लमहा नदिका ठेकेदार सहित स्थानीय सरकारको पनि हुलो लपरवाहीका कारण स्थानीयहरुले सो समस्या भोगनु परेको हो ।
सोही विषयमा गुजरा नगरपालिकाका प्रमुख प्रशासकिय अधिकृत राजकुमार अधिकारी भन्छन् , हामी तत्कालका लागि सो बाटो आज विहान देखि संचालन गरेका छौँ । तर, ठेकेदारले लपरवारी गरेसी यास्तो समस्या नहुने कुरानै हुँदैन उनले भने । यो नदिमा पानीको बहाव बढने तथा घटने क्रम जारी नै रहेका कारण हामीले बाटो संचालनमा ल्याएता पनि धेरै समस्यसम्म टिकन सकेको छैन् । अहिले सो समस्याको समाधान भएको उनले बताए ।
हनुमत कुमार यादव,गाैर, ३१ गते असार ।
रौतहट जिल्लाको यमुनामाई गाउँपालिका वडा नं. ४ बमनहर स्थित रहेको पशुसेवा शाखाको भवनमा अस्थायी प्रहरी पोष्ट स्थापना भएको छ । यमुनामाइ गाउँपालिका स्तिथ रहेको बमनहरमा आस पासमा गाउँ बस्ती नभएको कारण रातीको समयमा आवत जावत बन्द भए पश्चात अपराधिक घटना हुने सम्भावना लाई ध्यानमा राखी आम जनता लाई सुरक्षामा टेवा पुग्ने उद्देश्यले आज स्थाई प्रहरी पोस्ट स्थापना गरिएको छ।
जिल्ला प्रशासन कार्यालय रौतहटका प्रमुख जिल्ला अधिकारी धर्मेन्द्र कुमार मिश्रको प्रमुख आथित्यतामा नेपाली सेनाका प्रमुख सेनानी गंगा बहादुर बिष्ट जिल्ला प्रहरी कार्यालय रौतहट का प्रमुख प्र.उ. बिर बहादुर बुढा मगर, सशस्त्र प्रहरी उपरीक्षक माधव रेग्मि ,
उप-अनुसन्धान निर्देशक चन्दन कुमार झा यमुनामाई गा.पा. का प्रमुख प्रशासकीय अधिकृत ओमप्रकाश यादव , ४ र ५ नं. बडाका बडा अध्यक्ष ज्युहरु, राजपुर न.पा. १ का वडा अध्यक्ष शेख अमिरुल्लाह र पत्रकार , स्थानिय बुध्दजिवी युवा लगायतको सयौं जनाको उपस्थितिमा अस्थाई प्रहरी पोष्ट बमनहरको उद्घाटन कार्यक्रम भव्यता साथ सम्पन्न भएको हो ।
मञ्जय राम,कटहरिया, असार ३१ ।
रौतहट जिल्लाको कटहरिया नगरपालिका वडा नम्बर ५ स्थित रहेको लाल बकैया नदिमा डुवेर एक विधार्थीको मृत्यु भएको छ ।
मृत्यु हुँनेमा जिल्लाको कटहरिया नगरपालिका वडा नम्बर ४ स्थित बलिरामपुर घर रहेका अशोक साह कानुका छोरा सोनु साह कानुको मृत्यु भएको जिल्ला प्रहरी कार्यालय रौतहटका प्रहरी प्रवक्ता नायव उपरिक्षक प्रहरी उमासंकर यादवले बताएका छन् ।
प्रहरीका अनुसार सोनुको उमेर करिब १५ वर्षका हुन । र उनी परीक्षा दिएर घर फर्कदै बेलामा नदीमा नुहाउन गएको करिब १ बजेको समयमा नुहाउने क्रममा मृत्यु भएको बताएका छ ।
प्रहरीका अनुसार उनको लाल बकैया नदिमा नुहाउने क्रममा डुवेर मृत्यु भएको बताएका छन् । र उनी ९ कक्षाको विधार्थी हुन । कटहरिया देखि १ किलाे. मिटर पश्चिममा रहेकाे लालबकैया नदिमा पाच जन्ना साथीहरू संग स्नान गर्न गएका थिए ।साहकाे डुबे पक्षि साथीहरू गाउँमा आएर जनकारी दिए कटहरियाकाे ईलाका प्रहरी र गाैर टाेली शवकाे उद्धार गरे ।
सो घटनाको बारेमा थप अनुसन्धान भइरहेको प्रहरीले जनाएको छ ।
मञ्जय राम,परोहा,असार ३० गते
रौतहट । रौतहटमा करेन्ट लागेर एक जनाको ज्यान गएको छ । जिल्लाको परोहा नगरपालिका वडा नम्वर ४ लौकाहा घर भएका ७५ बर्षिय शेख तैयब धान खेतमा विद्युतिय मोटरबाट पानी सिंचाई गर्ने क्रममा मृत्यु भएको हो ।
शनिवार दिउँसो १२ः४० बजेको समयमा करेन्ट लागेर उनको मृत्यु भएको हो ।
मृतक तैयब परोहा नगरपालिकाको नगरप्रमुख शेख वकिलको ठूलो दाजु रहेको पारिवारिक श्रोतबाट बुझिएको छ । करेन्ट लागेर छटपटाइरहेका उनलाइ उपचारका लागि प्रादेशिक अस्पताल गौरमा लैजादाँ चिकित्सकले मृत घोष्णा गरेका थिए ।
जिल्ला प्रहरी कार्यालय रौतहटका प्रवक्ता एवंम् डिएसपी उमाशंकर प्रसाद यादवले करेन्ट लागेर मृत्यु भएको पुष्टि समेत गरेका छन् । पोष्टमार्टम पछि शवलाइ आफन्तको जिम्मा लगाइएको उनले जनाए ।
