जनकपुरधाम, साउन १४ गते। मधेश प्रदेशमा पछिल्लो समय देखिएको तनाव, द्वन्द्व तथा विभिन्न अप्रिय घटनालाई मध्यनजर गर्दै मधेश प्रदेश सरकारका स्वास्थ्य तथा जनसंख्या मन्त्री नागेन्द्र साहले प्रदेशभरका सबै सरकारी तथा निजी स्वास्थ्य संस्थालाई उच्च सतर्कता अपनाई ‘स्ट्यान्डबाइ’ अवस्थामा रहन निर्देशन दिएका छन्। आफ्नो आधिकारिक फेसबुक पेजमार्फत सार्वजनिक सन्देश जारी गर्दै मन्त्री साहले वर्तमान संवेदनशील परिस्थितिलाई ध्यानमा राखी प्रदेशअन्तर्गत सञ्चालित सबै सरकारी तथा निजी अस्पताल, स्वास्थ्य संस्था, चिकित्सक, नर्स तथा सम्पूर्ण स्वास्थ्यकर्मीलाई आवश्यक तयारी अवस्थामा रहन आग्रह गरेका हुन्।

उनले कुनै पनि सम्भावित स्वास्थ्य आपत्कालीन अवस्थालाई प्रभावकारी रूपमा सामना गर्न आकस्मिक (इमर्जेन्सी) सेवा, एम्बुलेन्स सेवा, विशेषज्ञसहित आवश्यक स्वास्थ्य जनशक्ति, अत्यावश्यक औषधि, रगत, स्वास्थ्य उपकरण तथा अन्य स्वास्थ्य सामग्रीको पर्याप्त उपलब्धता सुनिश्चित गर्न निर्देशन दिएका छन्। साथै, स्वास्थ्य सेवामा कुनै प्रकारको अवरोध आउन नदिन २४सै घण्टा तयारी अवस्थामा रहन सम्बन्धित निकायलाई आग्रह गरेका छन्।

मन्त्री साहले नागरिकको जीवन र सुरक्षासँग स्वास्थ्य सेवा प्रत्यक्ष रूपमा जोडिएको उल्लेख गर्दै सबै स्वास्थ्य संस्थाबीच आवश्यक समन्वय, सहकार्य र जिम्मेवारीपूर्ण भूमिका निर्वाह गर्नुपर्नेमा जोड दिएका छन्। उनले प्रदेश सरकारले नागरिकको स्वास्थ्य सुरक्षा, मानवीय संवेदना तथा गुणस्तरीय स्वास्थ्य सेवाको निरन्तरतालाई सर्वोच्च प्राथमिकतामा राखेको स्पष्ट पारेका छन्।

यसैबीच, मन्त्री साहले मधेश प्रदेशमा शान्ति, सामाजिक सद्भाव, धार्मिक सहिष्णुता, आपसी भाइचारा तथा राष्ट्रिय एकता कायम राख्न सबै राजनीतिक दल, सामाजिक संघसंस्था, नागरिक समाज, युवा तथा आमसर्वसाधारणलाई संयमता अपनाउन हार्दिक अपिल गरेका छन्। कुनै पनि अफवाह वा उत्तेजनात्मक गतिविधिबाट टाढा रही शान्तिपूर्ण वातावरण कायम राख्न उनले सबैसँग अनुरोध गरेका छन्। प्रदेश सरकार नागरिकको स्वास्थ्य सुरक्षाप्रति पूर्ण रूपमा संवेदनशील रहेको र आवश्यक परे जुनसुकै स्वास्थ्य आपत्कालीन अवस्थाको सामना गर्न सम्पूर्ण स्वास्थ्य संयन्त्र तयारी अवस्थामा राखिएको मन्त्री साहका प्रमुख स्वकीय सचिव सुमित सिंहले जानकारी दिएका छन्।

धनुषा, १४ साउन । मधेश प्रदेशमा पछिल्ला दिनहरूमा देखिएको तनावपूर्ण अवस्थाप्रति चासो व्यक्त गर्दै गृह, सञ्चार तथा कानून मन्त्री फकिरा महतोले शान्ति, सामाजिक सद्भाव र सहिष्णुता कायम राख्न प्रदेशवासीलाई संयम अपनाउन आग्रह गर्नुभएको छ । मन्त्री महतोले जारी गर्नुभएको सार्वजनिक अपिलमा मधेश प्रदेशको पहिचान विविध धर्म, भाषा, संस्कृति र समुदायबीचको सहअस्तित्व रहेको उल्लेख गर्दै कुनै पनि घटनालाई साम्प्रदायिक वा धार्मिक रंग दिएर समाजमा विभाजन ल्याउने प्रयास स्वीकार्य नहुने स्पष्ट पार्नुभएको छ ।

उहाँले सामाजिक सञ्जाल वा अन्य माध्यमबाट अपुष्ट तथा भ्रामक सूचना फैलाउने कार्यबाट टाढा रहन पनि सबैसँग अनुरोध गर्नुभएको छ । प्रदेश सरकारले शान्ति सुरक्षा र कानूनको शासन कायम राख्न आवश्यक सबै संयन्त्र परिचालन गरिरहेको जनाउँदै मन्त्री महतोले हिंसा, तोडफोड, आगजनी, घृणा फैलाउने गतिविधि तथा सार्वजनिक शान्ति भंग गर्ने जो–कोहीमाथि प्रचलित कानूनअनुसार कडा कारबाही गरिने चेतावनी दिनुभएको छ ।

उहाँले धार्मिक अगुवा, जनप्रतिनिधि, नागरिक समाज, सञ्चारमाध्यम, राजनीतिक दल, शिक्षक, विद्यार्थी तथा सम्पूर्ण नागरिकलाई सामाजिक सद्भाव जोगाउन आ–आफ्नो क्षेत्रबाट जिम्मेवार भूमिका निर्वाह गर्न आह्वान गर्नुभएको छ। समाजमा तनाव बढाउने अभिव्यक्ति, अफवाह र उक्साहटबाट टाढा रहँदै आपसी विश्वास र सहिष्णुतालाई बलियो बनाउनुपर्नेमा पनि उहाँले जोड दिनुभएको छ ।

विराटनगर । सुनसरीको देवानगन्ज गाउँपालिका–३ कप्तानगन्जमा कर्फ्यु आदेश उल्लंघन भएपछि सेना परिचालन गरिएको छ ।

प्रशासनले सेना सडकमा गस्तीमा निस्किएपछि अवस्था नियन्त्रणमा आइरहेको बताएको छ । सुनसरी जिल्ला प्रशासन कार्यालयले बिहान ७ बजेदेखि जारी गरेको कर्फ्यु आदेश अवज्ञा गर्दै प्रदर्शन शुरु भएपचिउ सेनालाई सडकमा उतारिएको छ ।

कर्फ्युकै बीचमा ठुलो संख्यामा प्रदर्शनकारी सडकमा उत्रिएका थिए । कप्तानगन्ज चोकमा टायर बाल्दै नाराबाजी गरेका प्रदर्शनकारी केहीबेरमै तोडफोड र आगजनीमा उत्रिएपछि अवस्था असहज बनेको थियो ।

कप्तानगन्जमा आइतबार राति दुई समुदायबीच भएको हिंसात्मक झडप नियन्त्रण गर्ने क्रममा सुरक्षाकर्मीले गोली चलाउँदा देवानगन्ज गाउँपालिका–३ का २४ वर्षीय ओमप्रकाश मेहताको मृत्यु भएको थियो । गोली लागेर ९ सर्वसाधारण घाइते भएका छन्, जसमध्ये एक जनाको अवस्था गम्भीर रहेको बताइएको छ । घटनामा सर्वसाधारण र सुरक्षाकर्मीसहित २२ जनाभन्दा बढी घाइते भएका छन् र उनीहरुको विराटनगरका विभिन्न अस्पतालमा उपचार भइरहेको प्रहरीले जानकारी दिएको छ ।एभरेष्ट न्यूज एजेन्सी

काठमाडौं । दाइजो प्रथा अन्त्यका लागि राष्ट्रिय अभियान सञ्चालन गर्ने विषयमा महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सिता बादी र प्रतिनिधिसभाकी उपसभामुख रुबी कुमारीबीच आज मन्त्रालयमा विस्तृत छलफल भएको छ ।

छलफलका क्रममा दाइजो प्रथाविरुद्धको राष्ट्रिय जनचेतना अभियान मधेश प्रदेशबाट प्रारम्भ गरी चरणबद्ध रूपमा देशभर विस्तार गर्ने विषयमा विस्तृत विचारविमर्श भएको थियो। अभियानलाई प्रभावकारी बनाउन स्थानीय तह, विद्यालय, समुदाय, धार्मिक तथा सामाजिक अगुवा, युवा, महिला समूह तथा नागरिक समाजको सक्रिय सहभागितामा देशव्यापी जनचेतनामूलक कार्यक्रम सञ्चालन गर्ने विषयमा समेत छलफल भएको थियो ।

दुवै पक्षले दाइजो प्रथा महिला हिंसा, लैङ्गिक विभेद तथा सामाजिक अन्यायको प्रमुख कारणमध्ये एक भएको उल्लेख गर्दै यसको अन्त्यका लागि कडा कानुनी कार्यान्वयन, प्रभावकारी अनुगमन र व्यापक सामाजिक सचेतना अभियानलाई एकसाथ अघि बढाउनुपर्नेमा जोड दिएका थिए ।

मन्त्री सिता बादीले दाइजो प्रथा केवल कानुनी नभई सामाजिक चुनौती भएकाले यसको अन्त्यका लागि राज्य, स्थानीय तह, शैक्षिक संस्था, नागरिक समाज, सञ्चारमाध्यम तथा समुदायको साझा प्रतिबद्धता आवश्यक रहेको बताएकी थिइन् ।

त्यस्तै उपसभामुख रुबी कुमारीले मधेश प्रदेशबाट सुरु हुने अभियानले दाइजो प्रथाविरुद्ध राष्ट्रिय स्तरमा सकारात्मक सन्देश प्रवाह गर्ने विश्वास व्यक्त गर्दै दाइजोमुक्त समाज निर्माणका लागि संघ, प्रदेश र स्थानीय तहबीच प्रभावकारी समन्वय तथा सबै सरोकारवालाको सक्रिय सहकार्य अपरिहार्य रहेको बताएकी थिइन् ।

भेटका क्रममा दाइजो प्रथा अन्त्यका लागि कानुनी व्यवस्था थप प्रभावकारी बनाउने, जनचेतनामूलक अभियानलाई संस्थागत रूपमा अघि बढाउने तथा सम्बन्धित निकायबीच समन्वय र सहकार्यलाई थप सुदृढ बनाउने विषयमा समेत छलफल भएको थियो ।एभरेष्ट न्यूज एजेन्सी

जनकपुरधाम । जनकपुर उपमहानगरपालिकाभित्र रहेका राजगुठीअन्तर्गतका विभिन्न पोखरी तथा पोखरीका डिल क्षेत्रमा भएको अतिक्रमण हटाउन सरकारले सात दिन भित्र हटाउन निर्देशन दिएको छ।

गुठीको जग्गा संरक्षण र व्यवस्थापनका लागि गठित उच्चस्तरीय कार्यदलको प्रतिवेदन–२०६२ कार्यान्वयन समितिले सार्वजनिक सूचना जारी गर्दै विशहरा पोखरी, दशरथ तालाउ, अर्गजा सर, रत्न सागर पोखरी, मुरली सर, दीर्घिका सर, गोडधोई पोखरीलगायतका जलाशय तथा तिनका डिल क्षेत्रमा भएका अनधिकृत संरचना र अतिक्रमण हटाउन निर्देशन दिएको हो।

समितिका अनुसार विभिन्न व्यक्ति तथा संस्थाले गुठीअन्तर्गतका पोखरी र तिनका डिल क्षेत्रमा अनधिकृत रूपमा संरचना निर्माण गरी भोगचलन गर्दै आएको पाइएको छ। सार्वजनिक सम्पत्ति तथा गुठीको जग्गा संरक्षण गर्ने उद्देश्यले अतिक्रमण हटाउन सूचना जारी गरिएको समितिले जनाएको छ।

सूचनामा तोकिएको समयभित्र अतिक्रमण हटाइएको नपाइए प्रचलित कानुनबमोजिम कारबाही प्रक्रिया अघि बढाइने छ ।

भूमि व्यवस्था, सहकारी, संघिय मामिला तथा सामान्य प्रशासन  मन्त्रालयले विगतका आयोग तथा कार्यदलका प्रतिवेदन कार्यान्वयनलाई तीव्रता दिएको छ।यसै क्रममा  जनकपुर क्षेत्रका अतिक्रमित गुठी जग्गा, पोखरी तथा सार्वजनिक सम्पत्तिको संरक्षण अगाडि बढाएको मन्त्रालयले जनाएको छ ।एभरेष्ट न्यूज एजेन्सी

काठमाडौँ ।  मधेस प्रदेशका पूर्वप्रदेश प्रमुख राजेश झा (अहिराज) लाई जबर्जस्ती करणी मुद्दामा सात वर्ष कैद सजाय भएको छ ।

काठमाडौं जिल्ला अदालतका न्यायाधीश चन्द्रकान्त पौडेलको इजलासले अहिराजलाई सात वर्ष कैदका साथै तीन लाख जरिवानाको तोकेको हो । उनलाइ गत मंगलबार अदालतले दोषी ठहर गरेको थियो ।

एक युवतीलाई सहयोगको आवरणमा बर्षौंसम्म यौनशोषण गरेको अभियोगमा गत वर्ष उनीविरुद्ध मद्दा दायर भएको थियो । अहिराजविरुद्ध २०८१ चैत्र २५ मा पक्राउ पुर्जी जारी भएकोमा २०८२ को साउन ४ गते पक्राउ परेका थिए । त्यसपछि जिल्ला अदालत काठमाडौंले उनलाई २०८२ साउन १४ गते पुर्पक्षका लागि थुनामा पठाउने आदेश दिएपछि हाल उनी कारागारमै रहेका छन् ।

जिल्ला अदालतको यो फैसलाविरुद्ध अहिराज माथिल्ला अदालतमा पुनरावेदनमा जान सक्ने कानुनी व्यवस्था भने रहेको छ ।एभरेष्ट न्यूज एजेन्सी

काठमाडौँ । रौतहटको गढीमाई नगरपालिकाका तत्कालीन निमित्त प्रमुख प्रशासकीय अधिकृत शुभाषकुमार ठाकुरसहित तीन जना तथा भाग्यमणी कन्स्ट्रक्सन कम्पनी प्रालिविरुद्ध राजस्व चुहावट गरी भ्रष्टाचार गरेको आरोपमा विशेष अदालतमा मुद्दा दायर गरिएको छ ।

अनुसन्धानअनुसार आर्थिक वर्ष २०७६/७७ का लागि लक्ष्मीपुर–धर्मपुरघाट क्षेत्रको बालुवा, गिट्टी र ग्राभेल उत्खनन, सङ्कलन, बिक्री तथा निकासीको ठेक्का एक करोड पाँच लाख रुपैयाँमा भाग्यमणी कन्स्ट्रक्सन कम्पनीलाई स्वीकृत गरिएको थियो। तर कम्पनीले सम्झौताअनुसार पूरा रकम नबुझाई धरौटी मिलानसहित ४० लाख ५० हजार रुपैयाँ मात्र दाखिला गरेको थियो । बाँकी ६४ लाख ५० हजार रुपैयाँ दाखिला हुन बाँकी रहेकै अवस्थामा सम्पूर्ण रकम बुझाएको देखाउँदै कबोल रकमको १० प्रतिशत छुटसमेत दिई गलत टिप्पणी र प्रतिवेदनका आधारमा ठेक्का स्वीकृत गरी सम्झौता गरिएको अख्तियारको आरोप छ ।

यस्तै, मूल्य अभिवृद्धि करबापत तिर्नुपर्ने १३ लाख ६५ हजार रुपैयाँसमेत दाखिला नगरेको देखिएको छ। यसबीच ठेकेदारले २२ हजार ४३५ घनमिटर नदीजन्य पदार्थ उत्खनन तथा निकासी गरी एक करोड १० लाख ९१ हजार ३०३ रुपैयाँ १२ पैसा बराबरको लाभ लिएको अनुसन्धानबाट खुलेको छ ।

अख्तियारका अनुसार प्रचलित कानुन, ठेक्का सूचना र सम्झौताका सर्तविपरीत ठेकेदार कम्पनीलाई गैरकानुनी लाभ पुर्‍याउने तथा नेपाल सरकार र गढीमाई नगरपालिकालाई ७८ लाख १५ हजार रुपैयाँ बराबरको राजस्व नोक्सानी पुर्‍याउने कार्य भएको पुष्टि भएपछि संलग्न प्रतिवादीविरुद्ध आज विशेष अदालत, काठमाडौंमा भ्रष्टाचार मुद्दा दायर गरिएको हो।

संलग्न प्रतिवादीहरुमा गढीमाई नगरपालिका, रौतहटका तत्कालीन निमित्त प्रमुख प्रशासकीय अधिकृत शुभाष कुमार ठाकुर, गढीमाई नगरपालिका, रौतहटका तत्कालीन लेखा प्रमुख कामेश्वर सहनी, भाग्यमणी कन्स्ट्रक्सन कम्पनी प्रा.लि., तथा उक्त कम्पनीका मुख्य भई काम गर्ने राधेश्याम साह रहेका छन् ।

काठमाडौँ । रौतहटको गढीमाई नगरपालिकाको समनपुरघाटको बालुवा, गिट्टी तथा ग्राभेल उत्खनन ठेक्कामा राजस्व चुहावट गरी भ्रष्टाचार गरेको आरोपमा नगर प्रमुख श्यामप्रसाद यादवसहित चार जना व्यक्ति र एक निर्माण कम्पनीविरुद्ध विशेष अदालतमा आरोपपत्र दायर गरिएको छ।

अनुसन्धानका क्रममा आर्थिक वर्ष २०७६/७७ का लागि समनपुर नाकाबाट बालुवा, गिट्टी तथा ग्राभेल उत्खनन, संकलन, बिक्री तथा निकासीको ठेक्का भाग्यमणी कन्स्ट्रक्सन कम्पनी प्रालिले ३ करोड २५ लाख रुपैयाँमा कबोल गरेको पाइएको अख्तियारले जनाएको छ।

बोलपत्रको सर्तअनुसार सम्झौताअघि सात दिनभित्र सम्पूर्ण रकम बुझाउनुपर्ने व्यवस्था भए पनि कम्पनीले तोकिएको समय नाघेर २४ दिनपछि ८४ लाख ६३ हजार रुपैयाँ मात्र दाखिला गरी सम्झौताका लागि निवेदन दिएको अनुसन्धानबाट खुलेको छ।

त्यसपछि कम्पनीले एक करोड रुपैयाँ पहिले नै दाखिला गरिसकेको भनी झुट्टा विवरण समावेश गरेर टिप्पणी पेश गरिएको र नगर प्रमुखले त्यसलाई स्वीकृत गर्दै बोलपत्रको सर्तविपरीत एक महिनाका लागि १० हजार घनमिटर नदीजन्य पदार्थ उत्खनन, संकलन, बिक्री तथा निकासी गर्न अस्थायी अनुमति दिएको आरोप लगाइएको छ।

तर उक्त अवधिमा ५४ हजार ३५५ घनमिटर नदीजन्य पदार्थ उत्खनन तथा निकासी गरी ३ करोड ३२ लाख ६९ हजार ७८९ रुपैयाँ ५८ पैसा बराबरको लाभ लिएको अनुसन्धानबाट देखिएको अख्तियारले जनाएको छ।

अनुसन्धानअनुसार कम्पनीले ठेक्का सम्झौताबापत १ करोड ९ लाख ६३ हजार रुपैयाँ मात्र दाखिला गरेको थियो। यसरी ठेक्काको बाँकी २ करोड १५ लाख ३७ हजार रुपैयाँ तथा मूल्य अभिवृद्धि करबापत ४२ लाख २५ हजार रुपैयाँ गरी कुल २ करोड ५७ लाख ६२ हजार रुपैयाँ राजस्व दाखिला नगरी नेपाल सरकार तथा गढीमाई नगरपालिकालाई हानि पुर्‍याएको आरोप छ।

यसका साथै रकम दाखिला नभइसकेको अवस्थामा दाखिला भइसकेको भन्दै गलत प्रतिवेदन तयार गरी राजस्व चुहावट गराइएको निष्कर्षसहित नगर प्रमुखयादवसहित तत्कालीन निमित्त प्रमुख प्रशासकीय अधिकृत शुभाष कुमार ठाकुर, तत्कालीन राजस्व शाखाका प्रमुख बालकिशोर राय, भाग्यमणी कन्स्ट्रक्सन कम्पनी प्रा.लि., बत्तीसपुतली, काठमाडौँ तथा उक्त कम्पनीका मुख्य भई कार्य गर्ने राधेश्याम साहविरुद्ध आज विशेष अदालत, काठमाडौँमा भ्रष्टाचारसम्बन्धी आरोपपत्र दायर गरिएको छ । एभरेष्ट न्यूज एजेन्सी

ओम प्रकाश यादव लहान, ५ असार।

सिरहाको भगवानपुर गाउँपालिका–५ लालपुरमा एक महिलामाथि उनकै जेठाजुले निर्घात कुटपिट गरेको आरोप लागेको छ। उक्त घटनामा महिला र उनका दुई नाबालक छोरासमेत घाइते भएका छन्। घाइतेहरू विगत पाँच दिनदेखि लहानस्थित एक निजी अस्पतालमा उपचाररत छन्।
घटनापछि पीडित बबिता देवी यादवले अस्पतालको शैय्याबाटै पत्रकार सम्मेलन गरी आफू र आफ्ना छोरामाथि भएको कुटपिटबारे सार्वजनिक गरेकी हुन्। शरीरका विभिन्न भागमा चोटपटक र निलडाम देखाउँदै उनले आफूलाई न्याय दिलाउन तथा परिवारको सुरक्षा सुनिश्चित गर्न सम्बन्धित निकायसँग आग्रह गरिन्।
पीडितका अनुसार उनका श्रीमान रोजगारीका लागि भारतमा रहेका बेला जेठाजु रामलोचन यादवले उनीमाथि आक्रमण गरेका हुन्। बबिताले रामलोचनले विगतदेखि नै आफू र आफ्नी सासूमाथि दुव्र्यवहार तथा कुटपिट गर्दै आएको आरोप लगाएकी छन्।
“यसअघि पनि पटक–पटक कुटपिट भएको थियो। तर यसपटक त मेरा दुई साना छोरालाई समेत छाडिएन। हामीलाई निर्घात कुटपिट गरेर अस्पताल पुर्याइयो,” उनले पत्रकार सम्मेलनमा भनिन्।

बबिताका अनुसार घटना गाउँबाहिर चौरीको खेतमा बाख्रा चराउने क्रममा भएको थियो। सामान्य विवादबाट सुरु भएको झगडा अचानक हिंसात्मक बनेपछि जेठाजुले आफूमाथि आक्रमण गरेको उनको दाबी छ। उनले आफूलाई लामो समयदेखि ‘बोक्सी’ को आरोप लगाएर मानसिक यातना दिने, सामाजिक रूपमा अपमानित गर्ने र शारीरिक दुव्र्यवहार गर्ने गरिएको पनि बताइन्।
पीडितले आफ्नो परिवारमाथि यो तेस्रो पटकको सांघातिक आक्रमण भएको दाबी गर्दै भनिन्, “हामीमाथि बारम्बार हमला भइरहेको छ। प्रहरीमा उजुरी दिँदा पनि उचित सुनुवाइ र कारबाही नहुँदा झन् असुरक्षित महसुस गरेका छौं।”

उनका अनुसार घटनाबारे इलाका प्रहरी कार्यालय लहानमा लिखित उजुरी दर्ता गराइसकिएको छ। तर घटना भएको पाँच दिन बितिसक्दा समेत आरोपितमाथि प्रभावकारी कारबाही नभएको भन्दै उनले गम्भीर चिन्ता व्यक्त गरिन्।
आर्थिक अवस्था कमजोर भएका कारण उपचार खर्च जुटाउनसमेत कठिनाइ भइरहेको बबिताले बताइन्। हाल उनी आफ्ना आमाबुवाको सहयोगमा उपचार गराइरहेकी छन्। “उपचार खर्च तिर्न नै समस्या भइरहेको छ। राज्यले पीडितको रूपमा सहयोग गरोस्,” उनले आग्रह गरिन्।
यता घटनाबारे आरोपित रामलोचन यादवको प्रतिक्रिया लिन सञ्चारकर्मीहरूले पटक–पटक सम्पर्क गर्ने प्रयास गरे पनि समाचार तयार पार्दासम्म उनको भनाइ प्राप्त हुन सकेको छैन। त्यसैले घटनाको अर्को पक्ष सार्वजनिक हुन बाँकी रहेको छ।
स्थानीयवासीहरूका अनुसार आफ्नै परिवारभित्र हुने हिंसाका घटनाले समाजमा नकारात्मक सन्देश प्रवाह गरिरहेको छ। मिथिला समाजमा जेठाजु र भाइबुहारीबीच सम्मान र मर्यादाको सम्बन्ध रहने मान्यता भए पनि यस्तो घटनाले सामाजिक मूल्य र पारिवारिक सम्बन्धमाथि गम्भीर प्रश्न उठाएको उनीहरूको भनाइ छ।

स्थानीय अधिकारकर्मी तथा सरोकारवालाहरूले घटनाको निष्पक्ष अनुसन्धान गरी दोषीमाथि कानुनी कारबाही गर्न, पीडित परिवारको सुरक्षा सुनिश्चित गर्न तथा आवश्यक उपचार र राहत उपलब्ध गराउन सम्बन्धित निकायसँग माग गरेका छन्। साथै, घटनाको सत्यतथ्य बाहिर ल्याउन दुवै पक्षको भनाइ र अनुसन्धान प्रतिवेदन सार्वजनिक गरिनुपर्ने उनीहरूको धारणा छ।

अशोक यादव,रौतहट, जेठ २५ ।

रौतहटको गढीमाई नगरपालिका–४ सुन्दरपुरस्थित समनपुर–गरुडा सडकखण्डमा सवारी साधनको ठक्करबाट ज्यान गुमाएका प्रमोद सहनीलाई न्यायको माग गर्दै सोमबार स्थानीयवासी तथा आफन्तहरूले प्रदर्शन गरेका छन् ।

गरुडा नगरपालिका–९ मलाहीटोल निवासी ४३ वर्षीय प्रमोद सहनीको आइतबार बिहान अज्ञात सवारी साधनको ठक्करबाट मृत्यु भएको थियो ।

घटनापछि दोषी सवारी चालकलाई पक्राउ गरी कारबाही गर्नुपर्ने तथा पीडित परिवारलाई उचित क्षतिपूर्ति उपलब्ध गराउनुपर्ने मागसहित स्थानीयवासी आन्दोलनमा उत्रिएका हुन्।

सोमबार दिउँसो प्रदर्शनकारीहरूले गौर–चन्द्रनिगाहपुर सडकखण्ड अन्तर्गत गरुडा मेथुर चोकमा शव राखेर सडक अवरुद्ध गरेका थिए । प्रदर्शनका कारण केही समय उक्त सडकखण्डमा यातायात सेवा प्रभावित बनेको थियो।

प्रदर्शनकारीहरूले घटनाको निष्पक्ष छानबिन गरी दोषीलाई कानुनी दायरामा ल्याउन माग गरेका थिए । जिल्ला प्रहरी कार्यालय रौतहटका प्रहरी नायब उपरीक्षक वसन्त गौतमका अनुसार मृतक सहनीको शव गढीमाई नगरपालिका–४ सुन्दरपुरस्थित सडकमा साइकलसहित फेला परेको थियो ।

उनको बाँया खुट्टा साइकलको ह्यान्डलमा अड्किएको अवस्थामा रहेको तथा टाउकोमा गम्भीर चोट देखिएको प्रहरीले जनाएको छ । प्रहरीले अज्ञात सवारी साधनले ठक्कर दिएको प्रारम्भिक अनुमान गर्दै घटनामा संलग्न सवारी साधन र चालकको खोजी कार्य जारी रहेको जनाएको छ ।

मृतकको शव परीक्षणका लागि प्रादेशिक अस्पताल गौरमा राखिएको थियो । स्थानीयवासीहरूले पीडित परिवारलाई न्याय नदिइए आन्दोलनलाई थप सशक्त बनाउने चेतावनी दिएका छन् ।

यता प्रहरीले घटनाबारे गम्भीरतापूर्वक अनुसन्धान भइरहेको र दोषीको पहिचान तथा पक्राउका लागि आवश्यक प्रक्रिया अघि बढाइएको जनाएको छ ।