आरके श्रीवास्तव,राैतहट,१४ गते कार्तिक ।
रौतहटको गाैर दुर्गा भगवती गाउँपालिका–पिपराबाट काठमाडौं जाँदै गरेको डल्फिन रात्री बस दुर्घटनामा परेपछि मधेस प्रदेश सरकार सक्रिय भएको छ । दुर्घटनामा घाइते भएका यात्रुहरूको उपचार भईरहेको छ भने मधेश प्रदेशका मुख्यमन्त्री जितेन्द्र सोनलले घाइतेहरूको उपचारमा कुनै पनि प्रकारको असुविधा नहोस् भनेर चितवनका प्रमुख जिल्ला अधिकारी गणेश आर्याल (सीडीओ) सँग सीधा समन्वय गरेका छन् ।
मुख्यमन्त्री सोनलले भने, “घाइते यात्रुहरूको उपचारमा कुनै कमी हुन दिनु हुँदैन् । प्रदेश सरकार पूर्ण रूपमा तयार छ र आवश्यक सहयोग तुरुन्त उपलब्ध गराइनेछ।”
हाल उपलब्ध विवरण अनुसार, दुर्घटनामा घाइते भएका मध्ये १५ जना चितवन मेडिकल कलेजमा,१३ जना नेसनल सिटी अस्पतालमा, र ५ जना भरतपुर अस्पतालमा गरि ३३ जना घाइते उपचाररत छन् ।
दुर्घटनाको खबरले सम्पूर्ण समुदायलाई दुःखी बनाएको छ । मुख्यमन्त्री साेनलले घाइतेहरूको शीघ्र स्वास्थ्य लाभको कामना गरेका छन् ।
हनुमत यादव,गाैर,कार्तिक १४ गते ।
रौतहटसहित देशका विभिन्न क्षेत्रमा परिरहेको लगातार वर्षाले किसानहरू चिन्तित बनेका छन् । काटेर सुकाउन राखिएको पाकेको धान निरन्तर झरीले भिजेपछि खेतमै उम्रिन थालेको छ, जसले धान उत्पादनमा ठूलो क्षति पुर्याउने आशंका बढाएको छ ।
बिहीबार देखि सुरु भएको वर्षा रोकिएन,शुक्रबार बिहानदेखि पुनः लगातार झरी परेपछि किसानहरू धान जोगाउने उपाय खोज्दै खेतमै दौडिरहेका छन् । समयमै सुकाउन नपाएको धान भिजेपछि खराब हुन थालेको किसानहरूको गुनासो छ ।
गत बाढीले नै अघिल्लो बालीमा ठूलो नोक्सानी पुर्याइसकेको अवस्थामा हालको लगातार वर्षाले बाँकी उत्पादन पनि जोखिममा पारेको छ । किसानहरू भन्छन्, “बचेको धान पनि पानीले भिजेपछि अन्न पाइन्छ कि पाइँदैन भन्ने डर छ। गहुँ, तेलहन र दलहन बाली रोप्ने समय पनि ढिलो हुँदै गएको छ।”
रौतहटमा प्रत्येक वर्ष बाढी, सुख्खा र असिनाजस्ता प्राकृतिक विपत्तिका कारण किसानहरू ठूलो क्षतिवाट गुज्रिन बाध्य हुने गरेका छन् । तर सम्बन्धित निकाय र स्थानीय तहबाट प्रभावकारी पहल नहुँदा किसानको समस्या वर्षेनि दोहोरिँदै आएको उनीहरूको आरोप छ।
किसानहरूले आगामी केही दिनभित्र मौसम सुधार नभए यस वर्षको धान उत्पादनमा ठूलो गिरावट आउने चेतावनी दिएका छन् ।
बज्जिकाञ्चल संवाददाता,राैतहट,कार्तिक १३ गते ।
रौतहटको कटहरिया नगरपालिकामा करार र ज्यालादारीका कर्मचारीहरूले बुधबारदेखि सुरू गरेको तालाबन्दी शुक्रबार दोश्रो दिन पनि जारी राखेका छन् । तलबभत्ता बक्यौता भुक्तानी नहुँदा असन्तुष्ट कर्मचारीहरूले नगरपालिका मातहतका वडा नं. १ देखि वडा नं. ९ सम्मका सबै वडा कार्यालयहरूमा तालाबन्दी गर्दै नगरपालिका कार्यालयसमेत बन्द गरेका हुन् ।
कर्मचारीहरूले विगतमा गरेको आन्दोलनका क्रममा नगरपालिकाले दिपावली र छठ पर्व अगावै बाँकी तलबभत्ता भुक्तानी गर्ने लिखित आश्वासन दिएको भए पनि त्यो कार्यान्वयन नहुँदा पुनः आन्दोलनमा उत्रिनुपरेको बताएका छन् ।
२०८२ कार्तिक १२ गते बसेको कर्मचारीहरूको बैठकले शान्तिपूर्ण रूपमा तालाबन्दी र “धारणा कार्यक्रम” अगाडि बढाउने निर्णय गरेको थियो । सो निर्णयअनुसार उनीहरूले औपचारिक रूपमा कटहरिया नगरपालिकाका कार्यालय प्रमुखलाई ज्ञापनपत्र बुझाएका छन् । साथै, बोधार्थका लागि जिल्ला प्रशासन कार्यालय रौतहट, जिल्ला समन्वय समिति रौतहट, तथा वडा नं. १ देखि ९ का वडा कार्यालयहरूमा पनि ज्ञापनपत्र पठाइएको छ ।
कर्मचारीहरूको भनाइमा, “हामीले लामो समयदेखि नगरपालिकाको सेवा सुम्पिँदै आएका छौं, तर तलबभत्ता नपाउँदा दैनिक जीवन प्रभावित भएको छ। जबसम्म बक्यौता रकम भुक्तानी हुँदैन, हामी शान्तिपूर्ण आन्दोलन जारी राख्नेछौं।”
यस विषयमा बुझ्न कटहरिया नगरपालिकाका कार्यालय प्रमुख गणेश नेपालीलाई सम्पर्क गर्न खोज्दा फोन उठाइएको छैन।
राैतहट,कार्तिक १२ गते ।
रौतहटको कटहरिया नगरपालिकामा आजदेखि करार र ज्यालादारीका कर्मचारीहरूले तालाबन्दी गरेका छन् । नगरपालिका मातहतका वडा नं. १ देखि वडा नं. ९ सम्मका वडा कार्यालयहरूमा कार्यरत कर्मचारीहरूले आफ्नो तलबभत्ता बक्यौता भुक्तानी नहुँदा असन्तुष्टि जनाउँदै सबै वडा कार्यालयमा तालाबन्दी गर्दै नगरपालिका कार्यालय समेत बन्द गरेका हुन् ।
कर्मचारीहरूले नगरप्रमुख र प्रमुख प्रशासकीय अधिकृतले विगत असोज २१ गतेदेखि २७ गतेसम्मको आन्दोलनका क्रममा दिपावली र छठ पर्व अगावै बाँकी तलबभत्ता भुक्तानी गर्ने लिखित आश्वासन दिएको भए पनि त्यो कार्यान्वयन नहुँदा पुनः आन्दोलनमा उत्रिनुपरेको बताएका छन् ।
कर्मचारीहरूले २०८२ कार्तिक १२ गते बसेको बैठकले शान्तिपूर्ण रूपमा तालाबन्दी गर्दै “धारणा कार्यक्रम” अगाडि बढाउने निर्णय गरेको हो । उनीहरूले ज्ञापनपत्र मार्फत कटहरिया नगरपालिकाका कार्यालय प्रमुखलाई यो बारे औपचारिक जानकारी दिएका छन् ।
उनीहरूले बोधार्थका लागि जिल्ला प्रशासन कार्यालय रौतहट, जिल्ला समन्वय समिति रौतहट, र वडा नं. १ देखि ९ का वडा कार्यालयहरूमा पनि ज्ञापनपत्र पठाएका छन् ।
कर्मचारीहरूले भनेका छन्, “हामीले लामो समयदेखि नगरपालिकाको सेवा सुम्पिँदै आएका छौं, तर तलबभत्ता नपाउँदा दैनिक जीवन प्रभावित भएको छ। जबसम्म बक्यौता रकम भुक्तानी हुँदैन, हामी शान्तिपूर्ण आन्दोलन जारी राख्नेछौं।”
यसबारे नगरपालिकाका जिम्मेवार अधिकारीहरूले भने औपचारिक प्रतिक्रिया दिएका छैनन् ।
आरके श्रीवास्तव,राैतहट,असाेज २१ गते ।
अबिरल वर्षाका कारण रौतहट जिल्लाका विभिन्न स्थानहरूमा नदी, खोला र नालाहरूमा पानीको प्रवाह कायमै छ । डुबानका कारण जनधनको क्षति समेत भएको पुष्टि गर्दै जिल्ला प्रहरी कार्यालय, रौतहटले सर्वसाधारणलाई सतर्क रहन आग्रह गरेको छ ।
गृह मन्त्रालयअन्तर्गत जिल्ला प्रहरी कार्यालयको सूचना सम्प्रेषण शाखाले असोज २० गते एक सार्वजनिक अनुरोध जारी गर्दै आम जनसमुदायलाई नदि, खोला तथा डुबान सम्भावित स्थानहरूमा जानबाट रोक्न आग्रह गरेको छ । बालबालिका, वृद्धवृद्धा लगायत जोकोही व्यक्तिलाई माछा मार्ने, पौडी खेल्ने, काठ दाउरा संकलन गर्ने जस्ता कार्यका लागि पानीको छेउमा जान दिनु घातक हुनसक्ने भन्दै विशेष सतर्कता अपनाउन भनिएको छ ।
प्रहरीको सूचनामा भनिएको छ, “अबिरल वर्षाको कारणले खानेपानीको मुहान समेत दुषित हुनसक्ने देखिन्छ। सरसफाइको उचित ध्यान नदिए हैजा, झाडापखाला लगायतका रोगहरू फैलिन सक्ने सम्भावना उच्च छ।”
प्रहरी कार्यालयले देवाही गोनाही, राजपुर लगायतका क्षेत्रमा दुर्घटना भइसकेको समेत जनाउँदै जनस्वास्थ्य र सुरक्षाका लागि सजग रहन आह्वान गरेको छ । साथै, यस संकटको बेला धैर्यता र संयमता अपनाउन सम्पूर्ण जनसमुदायमा अपिल गरिएको छ ।
यसबाहेक, जिल्लाबासीलाई यथासक्य घरमै बस्न र सुरक्षाको मापदण्ड पालना गर्न आग्रह गरिएको छ। संचारकर्मीहरूलाई यस जानकारीलाई विभिन्न माध्यमबाट प्रचार-प्रसार गरी आमजनसमुदायमा सूचना पुर्याउन समेत विशेष अनुरोध गरिएको छ ।
आरके श्रीवास्तव,राैतहट,असाेज २१ गते ।
रौतहट जिल्लाको कटहरिया नगरपालिकामा करार तथा ज्यालादारीमा कार्यरत कर्मचारीहरूले लामो समयदेखि तलब भत्ता नपाएको भन्दै आन्दोलनको चेतावनी दिएका छन् ।
नगरपालिकाको वडा नं. १ देखि ९ सम्म कार्यरत करार र ज्यालादारी कर्मचारीहरूले कार्यालयमा ज्ञापनपत्र बुझाउँदै बक्यौता तलब तथा सेवा सुविधा तुरुन्त भुक्तानी गर्न माग गरेका छन् ।
ज्ञापनपत्रमा उल्लेख भएअनुसार कर्मचारीहरूले पटक–पटक मौखिक रूपमा तलब भुक्तानीको माग गरे तापनि नगरपालिकाले आश्वासन मात्र दिँदै आएको र समस्याको समाधान नभएको गुनासो गरेका छन् ।
उनीहरूले मिति २०८२ असोज २० गते बसेको बैठकको निर्णय पनि पेश गर्दै अब आफूहरू बाध्य भएर आन्दोलनमा जानु परेको बताएका छन् । आन्दोलनका कार्यक्रम अन्तर्गत शान्तिपूर्ण धारणा र वडा तथा नगरपालिका कार्यालय बन्द गरिने उल्लेख गरिएको छ ।
यसैबीच, कटहरिया नगरपालिकाका निमित्त प्रमुख प्रशासकीय अधिकृत रामनरेश यादवले कार्यालय प्रमुख गणेश नेपाली विदामा रहेकोले आगामी आइतबार कार्यालय खुलेपछि यस विषयमा निर्णय लिने प्रतिक्रिया दिएका छन् । यादवले आफू तलब भुक्तानीको पक्षमा रहेको स्पष्ट पार्दै, करार तथा ज्यालादारी कर्मचारीहरूको समस्या समाधान हुनुपर्नेमा जोड दिएका छन् ।
ज्ञापनपत्र बुझाउनेहरूमा करार कर्मचारी मुकेश कुशवाहा,मुकुन्द यादव सहित तीन दर्जनभन्दा बढी कर्मचारीहरू सहभागी थिए ।
तलब भत्ता बक्यौताको विषयले स्थानीय प्रशासन र जनप्रतिनिधिहरूको ध्यान खिच्ने अपेक्षा गरिएको छ । यदि शीघ्र समाधान नभए थप आन्दोलन चर्किने संकेत कर्मचारीहरूले दिएका छन् ।
आरके श्रीवास्तव,राैतहट,असाेज २० गते ।
अविरल वर्षाका कारण मौलापुर, सोनारनिया हुँदै हरनहिया–कलैया जोड्ने प्रमुख सडक खण्ड बगिएको छ । भारी वर्षासँगै आएको बाढीले कालोपत्रे सडक पूर्ण रूपमा बगाएपछि सो सडकखण्डमा सवारी आवागमन पूर्ण रूपमा बन्द भएको छ ।
स्थानीय बासिन्दा रूपेश श्रीवास्तवका अनुसार, जयनगरदेखि मौलापुर हुँदै कलैयासम्मको यात्रा गर्ने यो सडक खण्ड अत्यधिक व्यस्त मानिन्छ । तर सडक बगिएपछि यात्रु र सवारी चालकहरू विचलित भएका छन् । सडक बग्ने क्रममा कालोपत्रे भाग च्यातिएर बगिरहेको दृश्य स्थानीयहरूले सामाजिक सञ्जालमार्फत सार्वजनिक गरिरहेका छन् ।
सडक अवरुद्ध भएपछि यात्रुहरूलाई वैकल्पिक मार्गको खोजीमा पर्नु परेको छ । यसै सन्दर्भमा, बानका मधेस प्रदेश संयोजक तथा स्थानीय पत्रकार आर.सी. यादवले जनतालाई सोनारनिया हुँदै सागैया–पिपरिया मार्ग भएर हुलाकी सडक प्रयोग गर्न सुझाव दिएका छन् ।
प्राकृतिक विपत्तिका कारण यातायात प्रभावित हुँदा स्थानीय जनजीवन प्रभावित भएको छ । सम्बन्धित निकायले यथाशीघ्र सडक मर्मत तथा वैकल्पिक व्यवस्थाको पहल गर्नुपर्ने आवश्यकता देखिएको छ ।
ओम प्रकाश यादव,राैतहट,असाेज १९ गते ।
सधै जनताको बीचमा रहने पूर्व राज्य मन्त्री एवं जनता समाजवादी पार्टी नेपालका केन्द्रिय सदस्य योगेन्द्र राय यादवले आज दिनभरी बाढीको चपेटामा परेका जनताको उद्धार कार्यदेखी लिएर अन्य सहयोग गरेका छन् ।
अविरल वर्षापछि बागमति नदीमा आएको बाढीको पानी गाउँबस्तीमा पसेर क्षति पुरयाउन थालेपछि नेता यादव तत्काल आफना दर्जनौ कार्यकर्ता लिएर रौतहटको बाढी प्रभावित विभिन्न गाउँबस्तीहरुमा पुगेका थिए ।
वर्षापछि आएको बाढीमा स्थानीयहरु फसेको, बाढीले स्थानीहरुलाई बिजोग बनाएको र बागमति बाँध कटानको उच्च जोखिखमा परेको खबर पाउनासाथ नेता योगेन्द्र यादवले रौतहटका सुरक्षा निकायका प्रमुखहरुको टोली लिएर आज विहानै बाढी प्रभावित क्षेत्रमा पुगेका थिए ।
पूर्व मन्त्री योगेन्द्र यादव सहित रौतहटका प्रमुख जिल्ला अधिकारी सिडिओ विनोद कुमार खड्का, नेपाल प्रहरी उपरीक्षक एसपी नेत्रमणी गिरी, सशस्त्र प्रहरी उपरीक्षक रामहरी अधिकारी सहितका सुरक्षा निकायका टोली बाढी प्रभावित जिल्लाको दुर्गाभगवती गाउँपालिकाको बडहर्वा, राजदेवी नगरपालिकाको चण्डिया, बसतपुर लगाएतका गाउँमा स्थलगत निरीक्षण गरेका थिए ।
नेता यादव र सुरक्षा निकायका टोलीहरु पुग्दा तत्काल भत्किने अवस्थामा पुगेको बागमति नदीको बाँध मर्मत सम्भारदेखी लिएर बाढीमा फसेर उद्धारको पर्खाइमा रहेका नागरिकको उद्धार कार्य भएको थियो ।
बाँध नियन्त्रणको काम भएपछि तत्काल बाँध कटानको समस्या टरेको बुझिएको छ । समयमै बाँध मर्मत कार्य नहुँदा बाँध भत्केर बागमतिको बाढी गाउँबस्तीमा पसेर ठुलो जनधनको क्षति पुरयाउन सक्थ्यो तर जसपा नेपालका नेता योगेन्द्र यादवको पहलमा समयमै सुरक्षा निकायका प्रमुखहरु घटनास्थल पुगेर निरीक्षण गर्दा ठुलो मानवीय र भौतिक क्षति हुनबाट जोगिएको छ ।
पूर्व मन्त्री समेत रहेका नेता यादवले बागमति नदीको छेउमा रहेको बडहर्वा, चण्डिया, बसतपुर लगाएतका गाउँमा बाढीको चपेटामा फसेका नागरिकलाई उद्धार गरी सुरक्षित स्थानमा सार्ने काम गरेका थिए । त्यस्तै उक्त ठाउँहरुमा हुँदै गरेको बाँध कटानलाई रोक्ने प्रयास समेत उनले गरे जसका कारण जनधनको क्षति हुन पाएन ।
विपद्का बेला समस्यामा परेका नागरिकलाई सहयोग गर्नु नै ठुलो मानवता र धर्म रहेको भन्दै उनले आफुले जहिले पनि जनतालाई कुनै किसिमको आपद विपद् परेका बेला तृरुन्त पुग्ने गरेको तथा सहयोग गर्ने गरेको बताए ।
योगेन्द्र राय यादव जनताको बीचमा सबभन्दा बढी रहने र जनतालाई हरेक प्रकारको सहयोग गर्नेदेखी लिएर जनताको काम लगनशील भएर गर्ने नेताको रुपमा चिनिन्छ । त्यस कारण जनतामा उनी निकै लोकप्रिय र चर्चित छन ।
अरु नेताहरु बाढीको रमिता हेर्न आज दिनभरी व्यस्त रहेका थिए तर योगेन्द्र राय यादव बाढीको चपेटामा परेका नागरिकको उद्धारमा आफै खटेको देखिएको थियो ।
आरके श्रीवास्तव,राैतहट,असाेज १८ गते ।
रौतहटको कटहरिया र सन्तपुरलाई जोड्ने मुख्य सडक खण्ड पुनः एकपटक अवरुद्ध बनेको छ । लाल बकैया पुलभन्दा अगाडि बाँधको छेउमा निर्माण गरिएको कजवे भएर बाढीको पानी बग्न थालेपछि सवारी आवागमन पूर्ण रूपमा ठप्प भएको हो ।
सडक डिभिजन चन्द्रनिगाहपुरले पुलको सट्टा कजवे निर्माण गर्दै आएको छ । स्थानीयवासीका अनुसार हरेक वर्ष बर्खायाममा बाढी आउँदा यो कजवे भएर पानी बग्ने समस्या दोहोरिरहन्छ । गत वर्ष पनि सोही स्थानमा निर्माण कजवे निर्माण गरिएको थियो । यद्यपि सम्बन्धित निकायले स्थायी समाधानका लागि कुनै पहल नगरेको स्थानीयको गुनासो छ ।
“हामीले वर्षौंदेखि पुल निर्माणको माग गर्दै आएका छौं,” कटहरियाका एक स्थानीय बासिन्दाले भने, “तर सधैं कजवे बनाएर समय कटाइन्छ । हरेक बर्खामा बाटो अबरुद्ध हुँदा विद्यालय, अस्पताल र बजार जानै समस्या हुन्छ।”
बाढीका कारण सवारीसाधन आवतजावत ठप्प भएको छ भने सर्वसाधारणलाई हिडेर यात्रा गर्नसमेत मुस्किल परेको छ । विद्यालय जाने विद्यार्थी, बिरामी बोकेका एम्बुलेन्स तथा दैनिक उपभोग्य सामान बोकेका सवारी साधन बाटैमा रोकिएका छन् । लामाेदूरीकाे अर्काे बाटाे प्रयाेग गर्न बाध्य छन् ।
यस सडक खण्डको महत्वपूर्णताका बावजुद हरेक वर्ष यस्ताे संरचनामा मात्र भर पर्ने सरकारी नीति प्रति स्थानीय आक्रोशित छन् । उनीहरूले स्थायी पुल निर्माणको माग गर्दै चाँडै समाधान नभए विरोध कार्यक्रम गर्ने चेतावनीसमेत दिएका छन् ।
काठमाण्डाै, १८ असोज — देशभर विभिन्न स्थानहरूमा भइरहेको अविरल वर्षाका कारण बाढी, पहिरो र डुबानले जनजीवन प्रभावित बनिरहेका बेला लोकतान्त्रिक पत्रकार संघका केन्द्रीय अध्यक्ष कामरेन्द्र वर्माले संगठनका सबै सदस्यहरूलाई जहाँ भए पनि सक्दो सहयोग गर्न अपिल गर्नुभएको छ ।
अध्यक्ष वर्माले यो घडीलाई “आफतको समय” भन्दै सबै पत्रकार, सञ्चारकर्मी तथा सरोकारवालाहरूलाई मानवीय भावनाका साथ पीडितहरूलाई सहयोग गर्न अनुरोध गर्नुभएको हो । उहाँले भन्नुभयो, “यस्तो संकटमा सबैले जहाँबाट जसरी सकिन्छ, त्यहीँबाट सहयोग गर्नुपर्छ।”
देशका विभिन्न भागहरूमा पहिरो जाँदा घर, बाटो क्षतिग्रस्त भएका छन् भने केही स्थानमा बाढी पस्दा मानिसहरू विस्थापित भएका छन् । कतिपय क्षेत्र डुबानमा परेका छन् जसका कारण जनजीवन अस्तव्यस्त भएको छ । नेपाल सरकारले आईतवार र साेमवार सार्वजनिक विदा समेत दिएको छ ।
संघले आपतकालीन सूचना संकलन, सत्य तथ्यमा आधारित समाचार प्रकाशन, र पीडित क्षेत्रमा आवश्यक जानकारी प्रवाहमा पत्रकारहरूलाई सक्रिय रहन आग्रह गरेको छ ।
