काठमाडौं । नेपालले जारी एसीसी यू–१९ महिला प्रिमियर कपमा तेस्रो भएको छ ।
शनिबार सम्पन्न तेस्रो स्थानको खेलमा नेपालले इन्डोनेसियाले दिएको ६९ रनको लक्ष्य १४.२ ओभरमा एक विकेट गुमाउदै पुरा गरेर ९ विकेटले पराजित गरेको हो ।
समुह चरणमा शानदार प्रदर्शन गरेको नेपाल सेमिफाइनलमा युएईसँग सुपर ओभरमा पराजित भएको थियो ।
योसँगै नेपाल एसीसी महिला यू-१९ एशिया कपका लागि छनौट भएको छ।एभरेष्ट न्यूज एजेन्सी
काठमाडौँ । विश्व क्रिकेटका महान् अलराउन्डर तथा वेस्ट इन्डिजका दिग्गज खेलाडी सर ग्यारी सोबर्सको ८९ वर्षको उमेरमा बार्बाडोसस्थित निवासमा निधन भएको छ ।
क्रिकेट इतिहासकै सर्वश्रेष्ठ अलराउन्डरमध्ये एक मानिने सोबर्सले सन् १९५४ देखि १९७४ सम्म वेस्ट इन्डिजका लागि ९३ टेस्ट खेल्दै ८ हजार ३२ रन बनाएका थिए भने २३५ विकेट लिएका थिए। उनले ब्याटिङ, तीव्र तथा स्पिन बलिङ र उत्कृष्ट क्षेत्ररक्षणमा समान दक्षता प्रदर्शन गरेका कारण उनलाई क्रिकेटको सर्वकालीन महान् खेलाडी मानिन्छ।
सन् १९५८ मा पाकिस्तानविरुद्ध ३६५ रनको कीर्तिमानी इनिङ्स खेलेका सोबर्सले प्रथम श्रेणी क्रिकेटमा एक ओभरमा छ छक्का प्रहार गर्ने पहिलो खेलाडीको कीर्तिमान पनि बनाएका थिए। क्रिकेटमा पुर्याएको योगदानको सम्मानस्वरूप अन्तर्राष्ट्रिय क्रिकेट परिषद्को वर्षकै उत्कृष्ट पुरुष खेलाडीलाई प्रदान गरिने प्रतिष्ठित ‘सर ग्यारी सोबर्स पुरस्कार’ उनको नाममा राखिएको छ।एभरेष्ट न्यूज एजेन्सी
काठमाडौँ । अन्तर्राष्ट्रिय क्रिकेट परिषद् (आईसीसी) ले आगामी एकदिवसीय विश्वकपको प्रतियोगिता ढाँचामा गरेको परिवर्तनप्रति एसोसियट्स राष्ट्रका खेलाडीहरूले तीव्र असन्तुष्टि जनाएका छन् ।
नामिबिया, नेदरल्यान्ड्स र स्कटल्यान्डका कप्तानहरूले नयाँ व्यवस्था क्रिकेट विस्तारको लक्ष्य विपरीत रहेको भन्दै सार्वजनिक रूपमा आलोचना गरेका छन् ।
आगामी विश्वकप दक्षिण अफ्रिका, जिम्बाब्वे र नामिबियामा १४ टोलीको सहभागितामा आयोजना हुनेछ । तर नयाँ ढाँचाअनुसार सबैभन्दा तल्लो वरीयतामा रहेका तीन टोलीबीच प्रारम्भिक चरणमा प्रतिस्पर्धा हुनेछ र त्यसमध्ये दुई टोली केवल दुई खेल खेलेपछि नै प्रतियोगिताबाट बाहिरिनेछन् । यसअघि प्रस्ताव गरिएको सात-सात टोलीका दुई समूह र त्यसपछि दोस्रो चरणको प्रतिस्पर्धा हुने व्यवस्था हटाइएको हो ।
नेदरल्यान्ड्सका कप्तान स्कट एडवार्ड्सले विश्वकपमा छनोट हुनु कुनै पनि राष्ट्रका लागि ठूलो उपलब्धि भए पनि वर्षौंको तयारीपछि अवसर नै सीमित बनाइनु अत्यन्त निराशाजनक भएको बताएका छन् । उनका अनुसार आईसीसीले विश्वभर क्रिकेट विस्तारको कुरा गरे पनि यस्ता निर्णयले एशोसियटस राष्ट्रलाई उत्कृष्ट टोलीसँग प्रतिस्पर्धा गर्ने अवसर झन् घटाएको छ ।
सन् २०२३ को विश्वकपमा नेदरल्यान्ड्सले दक्षिण अफ्रिका र बंगलादेशलाई पराजित गर्दै उत्कृष्ट प्रदर्शन गरेको थियो । तर त्यसपछि उसले पूर्ण सदस्य राष्ट्रविरुद्ध एकदिवसीय खेल खेल्ने अवसर नै नपाएको भन्दै एडवार्ड्सले यस्ता निर्णयले नयाँ पुस्ताका खेलाडीको प्रेरणा पनि कमजोर बनाउने बताए ।
नामिबियाका कप्तान गेर्हार्ड इरास्मसले विश्वकप केवल अर्को प्रतियोगिता नभई धेरै खेलाडीको करिअरको लक्ष्य हुने बताए । उनका अनुसार विश्वकपमा पुग्न कठिन छनोट प्रक्रिया पार गरेपछि पनि वास्तविक प्रतिस्पर्धा गर्ने अवसर नपाउनु सहायक राष्ट्रप्रति लामो समयदेखि भइरहेको विभेदकै निरन्तरता हो ।
विश्व खेलाडी संघले पनि आईसीसीको निर्णय प्रक्रियामाथि प्रश्न उठाएको छ । संघका प्रमुख कार्यकारी अधिकृत टम मोफाटले पर्याप्त परामर्श, पारदर्शिता र स्पष्ट जानकारीबिनै प्रतियोगिताको आधारभूत ढाँचा परिवर्तन गर्नु उचित नभएको बताएका छन् । उनका अनुसार वर्षौंदेखि तय गरिएको छनोट प्रणालीअनुसार राष्ट्र र खेलाडीहरूले लगानी गरिसकेपछि अन्तिम समयमा गरिएको यस्तो परिवर्तनले उनीहरूको योजनामै असर पुर्याएको छ ।
स्कटल्यान्डका कप्तान रिची बेरिङ्टनले खेलाडीहरूले सबै निर्णय आफैं गर्न खोजेका होइनन्, तर उनीहरूको करिअर र खेलको भविष्यमा प्रत्यक्ष असर पार्ने विषयमा अर्थपूर्ण परामर्श हुनुपर्ने बताए । स्कटल्यान्डका जर्ज मन्सी, नेदरल्यान्ड्सका म्याक्स ओ’डाउड र लोगन भान बिकले पनि नयाँ ढाँचाको खुलेर विरोध गरेका छन् ।
आयरल्यान्डका कप्तान पल स्टर्लिङले ४८ टोली सहभागी फुटबल विश्वकपले नयाँ राष्ट्रलाई अवसर दिएर प्रतियोगिताको आकर्षण बढाएको उल्लेख गर्दै क्रिकेटले पनि त्यस्तै सोच अपनाउनुपर्ने धारणा राखेका छन्।
यता आईसीसीले भने नयाँ ढाँचाले प्रतियोगितालाई अझ प्रतिस्पर्धात्मक र दर्शकमैत्री बनाउने दाबी गरेको छ । आईसीसीका अनुसार यस व्यवस्थाले उदाउदा टोलीलाई पनि विश्व क्रिकेटको सबैभन्दा ठूलो मञ्चमा प्रतिस्पर्धा गर्ने अवसर उपलब्ध गराउनेछ । साथै आईसीसीले पछिल्ला वर्षहरूमा क्रिकेटको विस्तारका लागि एकदिवसीयभन्दा छोटो ढाँचालाई प्राथमिकता दिँदै आएको छ ।एभरेष्ट न्यूज एजेन्सी
काठमाडौँ । तीव्र गतिका बलर जसप्रित बुमराह इन्डियन प्रिमियर लिग (आईपीएल) टोली मुम्बई इन्डियन्सका आगामी कप्तान बन्न सक्ने सम्भावना बढेको छ । टोलीका वर्तमान कप्तान हार्दिक पाण्ड्या र एक पूर्व भारतीय कप्तानलाई अर्को टोलीमा पठाउने विषयमा पनि छलफल भइरहेको जनाइएको छ । मुख्य प्रशिक्षक महेला जयवर्धनेसहित प्रशिक्षक टोलीमा समेत परिवर्तन हुन सक्ने बताइएको छ ।
भारतीय सञ्चारमाध्यम टाइम्स अफ इन्डियाका अनुसार यी विषयमा अन्तिम निर्णय अर्को साता इङ्ल्यान्डमा हुने समीक्षा बैठकबाट हुन सक्नेछ । बैठकमा अम्बानी परिवारका सदस्य तथा टोलीका उच्च अधिकारी सहभागी हुनेछन् । पछिल्ला पाँच सिजनमा मुम्बई इन्डियन्सको प्रदर्शन अपेक्षाअनुसार हुन सकेको छैन । पछिल्लो सिजनमा टोलीले चार खेल मात्र जित्दै आठ अंकसहित नवौँ स्थानमा रहेर प्रतियोगिता अन्त्य गरेको थियो । मुम्बईले पछिल्लोपटक सन् २०२० मा रोहित शर्माको कप्तानीमा आईपीएल उपाधि जितेको थियो । त्यस फाइनलमा मुम्बईले दिल्लीलाई पाँच विकेटले पराजित गरेको थियो ।
मुम्बई इन्डियन्सले २७ नोभेम्बर २०२३ मा हार्दिक पाण्ड्यालाई अर्को टोलीबाट ल्याएर कप्तान बनाएको थियो । तर उनको नेतृत्वमा पनि टोलीको प्रदर्शनमा सुधार आउन सकेन। टोलीभित्र असमझदारी र समूहगत विवाद रहेको चर्चा बाहिर आए पनि यसबारे टोली व्यवस्थापन वा खेलाडीहरूले आधिकारिक प्रतिक्रिया दिएका छैनन् ।
ड्रेसिङ रुमको वातावरण र पटक पटक परिवर्तन भएका रणनीतिले टोलीको प्रदर्शनमा असर परेको बताइएको छ । हार्दिक पाण्ड्याको कप्तानीमा मुम्बईले ३९ खेल खेल्दा १५ खेलमा मात्र जित हात पारेको छ ।
मुम्बई इन्डियन्स सन् २०२७ को सिजनका लागि स्थायी कप्तान नियुक्त गर्ने योजनामा रहेको बताइएको छ । टोलीले अस्थायी कप्तानको भरमा अघि बढ्न नचाहेको जनाइएको छ। कप्तानीको दौडमा जसप्रित बुमराह सबैभन्दा अगाडि देखिएका छन् । पछिल्ला तीन सिजनमा उनको प्रदर्शन निरन्तर उत्कृष्ट रहँदै आएको छ । सन् २०२६ को आईपीएलमा हार्दिक पाण्ड्या र सूर्यकुमार यादव अनुपस्थित हुँदा बुमराहले पञ्जाब किङ्सविरुद्ध मुम्बईको कप्तानी गरेका थिए । त्यस क्रममा बुमराहले आफूले मुम्बईको कप्तानी गर्नुअघि भारतीय टेस्ट टोलीको कप्तान बन्ने कल्पना नगरेको बताएका थिए ।
बुमराहबाहेक तिलक वर्माको नाम पनि कप्तानीका लागि चर्चामा छ । तर छोटो ढाँचाको क्रिकेटमा उनको पछिल्लो प्रदर्शन अपेक्षाअनुसार नरहेको र कम उमेरमै कप्तानीको जिम्मेवारी दिँदा उनको ब्याटिङमा असर पर्न सक्ने अनुमान गरिएको छ ।
मुम्बई इन्डियन्सका अलराउन्डर तथा पूर्व कप्तान हार्दिक पाण्ड्याको भविष्यलाई लिएर पनि चर्चा बढेको छ। विभिन्न टोलीहरूले उनलाई भित्र्याउन इच्छा देखाएको बताइएको छ । अर्को साता हुने समीक्षा बैठकपछि मात्र हार्दिक पाण्ड्याको भविष्यबारे स्पष्ट निर्णय आउने सम्भावना रहेको छ र उनले मुम्बई छोड्ने लगभग निश्चित प्राय: रहेको दाबि गरिएको छ । एभरेष्ट न्यूज एजेन्सी
काठमाडौँ । स्पेनले फिफा विश्वकप फुटबलको सेमिफाइनलमा बलियो दाबेदार मानिएको फ्रान्सलाई २-० गोल अन्तरले पराजित गर्दै फाइनलमा स्थान बनाएको छ ।
डलास रङ्गशालामा भएको खेलमा स्पेनले सुरुदेखि नै उत्कृष्ट प्रदर्शन गर्दै फ्रान्सका आक्रमणलाई प्रभावहीन बनाएको थियो । अवसर कम सिर्जना भएको खेलमा स्पेनले बलमाथिको नियन्त्रण कायम राख्दै जित दर्ता गरेको हो ।
स्पेनका लागि पहिलो गोल मिकेल ओयारजाबालले पहिलो हाफको मध्यतिर पेनाल्टीमार्फत गरेका थिए । फ्रान्सका बायाँ रक्षक लुकास डिन्येले लामिन यामालमाथि फउल गरेपछि स्पेनले पेनाल्टीको अवसर पाएको थियो। ओयारजाबालले त्यसलाई सहज रूपमा गोलमा परिणत गर्दै टोलीलाई अग्रता दिलाएका थिए ।
दोस्रो हाफमा पनि स्पेनले आफ्नो लय कायम राख्यो । खेलको नियन्त्रण आफ्नो पक्षमा राखेको स्पेनका लागि पेड्रो पोरोले डानी ओल्मोसँग उत्कृष्ट पास आदानप्रदानपछि नजिकको कुनाबाट गोल गर्दै अग्रता दोब्बर बनाए ।
त्यसपछि फ्रान्सले खेलमा फर्कने प्रयास गरे पनि स्पेनको अनुशासित र संगठित रक्षापङ्क्ति तोड्न सकेन । प्रतियोगिताभर एक गोल मात्र बेहोरेको स्पेनले अन्तिमसम्म संयमित प्रदर्शन गर्दै सहज जित सुरक्षित गर्यो ।
यस हारसँगै लगातार तेस्रो पटक विश्वकपको फाइनल पुग्ने फ्रान्सको सपना समाप्त भएको छ । अब फ्रान्सले तेस्रो स्थानका लागि हुने खेल खेल्नेछ । साथै, १४ वर्षदेखि टोली सम्हालिरहेका मुख्य प्रशिक्षक डिडियर डेसचाम्पको कार्यकाल पनि यही प्रतियोगितापछि समाप्त हुनेछ ।
अब स्पेन उपाधि भिडन्तका लागि न्यु जर्सी पुग्नेछ। फाइनलमा स्पेनले इङ्ग्ल्यान्ड र अर्जेन्टिनाबीच हुने दोस्रो सेमिफाइनलको विजेतासँग प्रतिस्पर्धा गर्नेछ । स्पेन दोस्रो पटक विश्वकपको उपाधि जित्ने लक्ष्यमा रहेको छ । स्पेनले यसअघि २०१० मा विश्वकप उपाधि जितेको थियो ।एभरेष्ट न्यूज एजेन्सी
काठमाडौँ । भारतले पहिलो एकदिवसीय क्रिकेट खेलमा इङल्याण्डलाई ६ विकेटले पराजित गर्दै तीन खेलको सिरिजमा १-० को अग्रता बनाएको छ ।
पहिले ब्याटिङ गरेको इङल्याण्ड ४७.५ ओभरमा २५८ रनमा समेटियो । जवाफमा भारतले ४५.२ ओभरमा ४ विकेट गुमाउँदै २६२ रन बनाएर लक्ष्य पूरा गरेको थियो ।
भारतको जितमा कप्तान शुभमन गिल, अक्षर पटेल र वासिङ्टन सुन्दरले अर्धशतकीय इनिङ्स खेलेका थिए । शुभमन गिलले ८० रन बनाएका बेला खुट्टामा समस्या देखिएपछि मैदान छाड्दै उपचारका लागि बाहिरिएका थिए । भारतको सुरुआत भने राम्रो हुन सकेन । रोहित शर्मा र विराट कोहली सस्तैमा आउट भएपछि शुभमन गिल र श्रेयस अय्यरले तेस्रो विकेटका लागि १०१ रनको महत्वपूर्ण साझेदारी गरेका थिए ।
गिल मैदानबाट बाहिरिएपछि श्रेयस अय्यर रनआउट भए भने केएल राहुल पनि धेरै समय टिक्न सकेनन् । त्यसपछि अक्षर पटेल र वासिङ्टन सुन्दरले जिम्मेवारी सम्हाल्दै पाँचौँ विकेटका लागि अविजित १०२ रनको साझेदारी गरेका थिए ।
अक्षरले ३९ बलमा अर्धशतक पूरा गर्दै अविजित ५७ रन बनाए भने वासिङ्टनले विजयी छक्का प्रहार गर्दै आफ्नो अर्धशतक पूरा गरेका थिए । उनी ५२ रनमा अविजित रहे । इङल्याण्डका लागि जोफ्रा आर्चर, जोस टङ र साम करनले समान एक-एक विकेट लिए ।
त्यस्तै इङल्याण्डका लागि जो रुटले ७६, लियाम डावसनले ६८ र बेन डकेटले ४३ रन बनाएका थिए भने भारतीय बलर अक्सर पटेलले ४ विकेट लिएका थिए भने गुरनूर ब्रार र प्रसिद्ध कृष्णले २-२ विकेट लिएका थिए ।
यो जितपछि भारतले सिरिजमा १-० को बढ्त बनाएको छ भने अब सिरिजको दोस्रो खेल विहिबार हुने छ ।एभरेष्ट न्यूज एजेन्सी
काठमाडौँ । जारी फिफा विश्वकप फुटबल अन्तर्गत पहिलो सेमिफाइनलमा आजराती फ्रान्स र स्पेन आमनेसामने हुँदैछन् । अमेरिकाको डलास रंगशालामा हुने यो खेल नेपाली समय अनुसार आजराती १२: ४५ बजेदेखि शुरु हुदैछ ।
प्रतियोगिताका दुई प्रमुख उपाधि दाबेदार मानिएका यी टोलीबीचको प्रतिस्पर्धालाई विश्वकपकै सबैभन्दा रोमाञ्चक खेलमध्ये एकका रूपमा हेरिएको छ । यस खेलको विजेताले उपाधिका लागि इङ्ग्ल्यान्ड वा अर्जेन्टिनासँग प्रतिस्पर्धा गर्नेछ ।
फ्रान्सले क्वार्टरफाइनलमा मोरक्कोलाई २-० ले हराउँदै यस विश्वकपमा लगातार छैटौं जित निकालेको थियो । अब स्पेनलाई पराजित गर्न सके फ्रान्स विश्वकप इतिहासमा लगातार सात खेल जित्ने दोस्रो युरोपेली टोली बन्नेछ । यसअघि इटालीले सन् १९३४ र १९३८ को विश्वकपमा लगातार सात जित हासिल गरेको थियो । विश्वकपको अन्तिम चारमा फ्रान्सको यो आठौं यात्रा हो । जर्मनीपछि सबैभन्दा धेरै पटक सेमिफाइनल पुगेको टोली पनि फ्रान्स नै हो । सन् १९९८, २००६, २०१८ र २०२२ मा फ्रान्सले लगातार चारपटक सेमिफाइनल जितेको छ । पछिल्ला तीन सेमिफाइनलमा उसले कुनै गोल पनि खाएको छैन । यदि फ्रान्स फाइनलमा पुग्न सफल भयो भने जर्मनी र ब्राजिलपछि लगातार तीन विश्वकप फाइनल खेल्ने तेस्रो राष्ट्र बन्नेछ । फ्रान्सका कप्तान किलियन एम्बाप्पे यस विश्वकपमा उत्कृष्ट प्रदर्शन गरिरहेका छन् । मोरक्कोविरुद्ध खेल्दा सामान्य समस्या देखिए पनि स्पेनविरुद्ध खेल्नेछन् ।
यस प्रतियोगितामा उनले आठ गोल गरिसकेका छन् । गोल्डेन बुटको दौडमा उनी लियोनेल मेसीसँग बराबरीमा छन् । विश्वकपका नकआउट चरणमा एम्बाप्पेको कुल गोल संख्या १२ पुगेको छ, जुन अहिलेसम्मकै सर्वाधिक हो । यद्यपि उनले यसअघि खेलेका दुवै सेमिफाइनलमा भने गोल गर्न सकेका छैनन् । एम्बाप्पे र उस्मान डेम्बेलेबीचको समझदारी पनि फ्रान्सका लागि बलियो पक्ष बनेको छ । उनीहरूले एकअर्काका लागि १९ अवसर सिर्जना गरिसकेका छन्, जुन विश्वकप इतिहासकै उत्कृष्ट साझेदारीमध्ये एक हो ।
अर्कोतर्फ स्पेनले यस विश्वकपमा उत्कृष्ट रक्षात्मक खेल प्रदर्शन गरेको छ । क्वार्टरफाइनलमा बेल्जियमलाई २-१ ले हराउदा चार्ल्स डे केटेलारेले गरेको हेडर नै प्रतियोगिताभर स्पेनले खाएको एकमात्र गोल हो । बेल्जियमविरुद्धको खेल अतिरिक्त समयमा जाने देखिएको अवस्थामा वैकल्पिक खेलाडी मिकेल मेरिनोले निर्णायक गोल गर्दै टोलीलाई सेमिफाइनल पुर्याएका थिए । उनी विश्वकप इतिहासमा नकआउट चरणका दुई खेलमा वैकल्पिक खेलाडीका रूपमा विजयी गोल गर्ने पहिलो खेलाडी बनेका छन् । सन् २०१८ विश्वकपयता स्पेनले प्रमुख अन्तर्राष्ट्रिय प्रतियोगितामा खेलेका २७ खेलमध्ये केवल एक खेल मात्र हारेको छ । सन् २०२२ को विश्वकपमा जापानसँग पराजित भएपछि स्पेन लगातार १४ खेलमा अपराजित छ । यस अवधिमा उसले केवल पाँच गोल मात्र खाएको छ र नौ खेलमा कुनै गोल खाएको छैन । स्पेन सन् २०१० पछि पहिलोपटक विश्वकपको सेमिफाइनलमा पुगेको हो ।
दुवै टोलीमा कुनै खेलाडी प्रतिबन्धमा छैनन् । फ्रान्सले विलियम सालिबा, दायो उपामेकानो र ओरेलिए चुआमेनीको शारीरिक अवस्थामाथि विशेष निगरानी राखेको छ । चुआमेनी मांसपेशीको समस्याका कारण पछिल्ला दुई खेल गुमाएका थिए । त्यस्तै स्पेनका निको विलियम्स चोटमुक्त भएपछि खेल्ने अपेक्षा गरिएको छ भने येरेमी पिनो पनि काँधको चोटबाट फर्किन सक्ने सम्भावना छ ।
विश्वकपमा फ्रान्स र स्पेनबीच यो दोस्रो भेट हुनेछ । यसअघि सन् २००६ को अन्तिम १६ को खेलमा फ्रान्सले ३-१ को जित निकालेको थियो । तर पछिल्ला १० अन्तर्राष्ट्रिय भेटमध्ये स्पेनले सात खेल जितेको छ भने फ्रान्सले केवल दुई खेलमा सफलता पाएको छ । स्पेनले पछिल्ला दुई भेटमा लगातार जित निकालेको छ ।
युरोकप २०२४ को सेमिफाइनलमा स्पेनले फ्रान्सलाई २-१ ले हराएको थियो । त्यसपछि गत वर्ष राष्ट्र लिगको अन्तिम चारको रोमाञ्चक खेलमा पनि स्पेनले फ्रान्सलाई ५-४ ले पराजित गरेको थियो ।
स्पेनका युवा स्टार लामिन यमालले सेमिफाइनलअघि भनेका छन्- ‘फ्रान्स लगातार तेस्रो विश्वकप फाइनलमा पुग्ने कि हामी उनीहरूलाई लगातार तेस्रो पटक हराउने भन्ने कुरा मैदानमै तय हुनेछ । जे भए पनि हामी फ्रान्ससँग डराएका छैनौँ ।’एभरेष्ट न्यूज एजेन्सी
काठमाडौँ । अस्ट्रेलियाले इङ्ल्यान्डलाई सात विकेटले पराजित गर्दै महिला टी- २० विश्वकप क्रिकेटको उपाधि सातौँ पटक जितेको छ । उत्कृष्ट बलिङ प्रदर्शनपछि बेथ मुनीको अर्धशतकीय इनिङ्सको मद्दतमा अस्ट्रेलियाले सहज जित दर्ता गरेको हो ।
टस जितेर पहिले बलिङ रोजेको अस्ट्रेलियाले इङ्ल्यान्डलाई निर्धारित २० ओभरमा चार विकेट गुमाएर १५० रनमा सीमित गरेको थियो । १५१ रनको लक्ष्य पछ्याएको अस्ट्रेलियाले १७.१ ओभरमा तीन विकेट मात्र गुमाएर १५३ रन बनाउँदै उपाधि आफ्नो नाममा लेखायो ।
महिला टी-२० विश्वकपको फाइनलमा अस्ट्रेलिया र इङ्ल्यान्डबीच भएको यो चौथो भेट थियो । यसअघिका सबै फाइनलमा जस्तै यसपटक पनि अस्ट्रेलियाले इङ्ल्यान्डलाई पराजित गर्दै आफ्नो वर्चस्व कायम राख्यो ।
यसअघि अस्ट्रेलियाले सन् २०१२, २०१४ र २०१८ को फाइनलमा पनि इङ्ल्यान्डलाई हराएर उपाधि जितेको थियो । सन् २०२६ को फाइनलमा समेत विजय हासिल गर्दै अस्ट्रेलियाले विश्वकप फाइनलमा इङ्ल्यान्डविरुद्ध आफ्नो शतप्रतिशत जितको कीर्तिमान कायम राखेको छ ।
योसँगै अस्ट्रेलियाले महिला टी-२० विश्वकपको इतिहासमा कीर्तिमानी सातौँ पटक उपाधि जित्दै आफ्नो प्रभुत्वलाई थप मजबुत बनाएको छ ।एभरेष्ट न्यूज एजेन्सी
काठमाडौँ । नेपाल प्रिमियर लिग (एनपीएल) को तेस्रो सिजनको खेलाडी अक्सन आज हुदैछ ।
खेलाडी अक्सन आज अपराहन्न ३: ४५ बजेदेखि हुने छ भने यसको प्रत्यक्ष प्रशारण एनपीएलको युट्युब च्यानलमा हुने क्यानले जानकारी दिएको छ ।
आज हुने अक्सनमा तीन क्याटोगरीमा १५५ खेलाडी रहेको नेपाल क्रिकेट संघ (क्यान) ले जानकारी दिएको हो ।
जस अनुसार क्याटोगरी ए मा अर्जुन घर्ति, बिबेक यादव, आसिफ सेख, रुपेश सिंह र तृतराज दास रहेका छन् । त्यस्तै क्याटोगरी बी मा २७ जना रहेका छन् भने १२३ जना क्याटोगरी सी मा रहेका छन् ।
त्यस्तै क्यानले यस अक्सनमा हरेक टिमले २-२ जना नेपाली खेलाडी थप भइ मार्की, ट्यालेन्ट हन्टसमेत गरि १४ जना खेलाडी समावेश रहने जानकारी दिएको छ । फ्रेंचाईजीहरुले अक्सनबाट यी मध्ये ५२ खेलाडी खरिद गर्ने छन् ।
अक्सनका लागि लुम्बिनी लायन्ससँग ४९ लाख २५ हजार, सुदूरपश्चिम रोयल्ससँग ४२ लाख ५० हजार, विराटनगर किंग्ससँग ५१ लाख ५० हजार, काठमाडौँ गोर्खाजसँग ३४ लाख, पोखरा एभेन्जर्ससँग ४५ लाख ५० हजार, कर्णाली याक्ससँग ४२ लाख, चितवन राइनोजसँग ४२ लाख र जनकपुर बोल्ट्ससँग ६६ लाख २५ हजार रकम रहेको छ । एभरेष्ट न्यूज एजेन्सी
काठमाडौँ । इंग्ल्यान्डले पाँच खेलको टी- २० अन्तर्राष्ट्रिय सिरिजको दोस्रो खेलमा भारतलाई चार विकेटले पराजित गर्दै सिरिजमा १-० को अग्रता बनाएको छ । वर्षाका कारण पहिलो खेल रद्द भएकाले यो सिरिजको पहिलो निर्णय भएको खेल थियो।
१९१ रनको लक्ष्य पछ्याएको इंग्ल्यान्डले १९ ओभरमै ६ विकेट गुमाएर जित हात पारेको थियो । भारत पराजित भए पनि खेलमा दुई ऐतिहासिक उपलब्धि बने । अक्षर पटेल टी-२० अन्तर्राष्ट्रियमा १०० विकेट पूरा गर्ने पहिलो भारतीय स्पिनर बने भने १५ वर्षीय वैभव सूर्यवंशी भारतका लागि सबैभन्दा कम उमेरमा अन्तर्राष्ट्रिय क्रिकेट खेल्ने खेलाडी बने ।
टस जितेर पहिले ब्याटिङ गरेको भारतले २० ओभरमा ७ विकेट गुमाउँदै १९० रन बनाएको थियो । अन्तर्राष्ट्रिय क्रिकेटमा डेब्यु गरेका वैभव सूर्यवंशीले सुरुमै दुई छक्का प्रहार गर्दै आक्रामक सुरुआत गरे पनि १४ रनमा स्टम्प आउट भएका थिए ।
त्यसपछि अभिषेक शर्माले २४ बलमा ४३ रनको तीव्र इनिङ्स खेले । मध्यक्रममा श्रेयस अय्यरले ३७ तथा ईशान किशनले ४९ रन बनाउँदै तेस्रो विकेटका लागि महत्वपूर्ण साझेदारी गरे । अन्तिम ओभरहरूमा तिलक वर्माले ११ बलमा अविजित २४ रन जोड्दै भारतलाई प्रतिस्पर्धात्मक योगफलसम्म पुर्याएका थिए ।
१९१ रनको लक्ष्य पछ्याएको इंग्ल्यान्डको सुरुआत भने निकै खराब रह्यो । अर्शदीप सिंहले पहिलो ओभरमै फिल साल्ट र जोस बटलरलाई आउट गर्दै घरेलु टोलीलाई दबाबमा पारेका थिए । तर कप्तान ह्यारी ब्रुकले केवल १५ बलमा ३९ रनको विस्फोटक इनिङ्स खेल्दै खेलको लय परिवर्तन गरे । त्यस्तै जेकब बेथेलले एक छेउ सम्हाल्दै अविजित ७६ रन बनाए भने टम ब्यान्टनले ३९ रनको योगदान दिए । भारतले बीचका ओभरमा पुनरागमन गरे पनि १७औं ओभर निर्णायक बन्यो । रवि विश्नोईले दुई नो-बलसहित २९ रन खर्चिएपछि इंग्ल्यान्डले खेल आफ्नो पक्षमा मोड्यो । बेथेलले फ्रिहिटको भरपुर फाइदा उठाउँदै टोलीलाई जित दिलाए ।
यो खेलको सबैभन्दा ठूलो आकर्षण १५ वर्षीय वैभव सूर्यवंशीको अन्तर्राष्ट्रिय डेब्यु रह्यो । १५ वर्ष ९९ दिनको उमेरमा उनले भारतका लागि अन्तर्राष्ट्रिय क्रिकेट खेल्दै नयाँ इतिहास रचेका छन् । यससँगै उनले १६ वर्ष २०५ दिनको उमेरमा डेब्यु गरेका सचिन तेन्दुलकरको ३७ वर्ष पुरानो कीर्तिमान तोडेका छन् ।
अब सिरिजको तेस्रो खेल मंगलबार हुदैछ । एभरेष्ट न्यूज एजेन्सी
