शिवनाथ कुशवाहा ,रौतहट,०८ गते असार ।

रौतहटको फतुवा विजयपुर नगरपालिका अन्तर्गत रहेको इलाका प्रहरी कार्यालय विजयपुर लक्ष्मिनियाका इन्चार्ज प्रहरी निरीक्षक सुरेन्द्र यादवको सफल कार्यकाल पूरा भई सरुवा भएपछि उहाँलाई मायाको चिनो प्रदान गर्दै भावपूर्ण बिदाइ गरिएको छ । कार्यक्रममा सहभागीहरूले इन्स्पेक्टर यादवले आफ्नो कार्यकालमा शान्ति सुरक्षा कायम गर्न, अपराध नियन्त्रण तथा नागरिकमैत्री प्रहरी सेवाको प्रवद्र्धन गर्न महत्वपूर्ण योगदान पु¥याएको उल्लेख गर्दै आगामी जिम्मेवारीका लागि शुभकामना व्यक्त गरेका थिए । यस अवसरमा सरुवा भई जाने क्रममा इन्स्पेक्टर सुरेन्द्र यादवलाई सफल र उज्ज्वल भविष्यको कामना गर्दै सम्मानसहित बिदाइ गरिएको थियो ।

त्यसैगरी, इलाका प्रहरी कार्यालय विजयपुर लक्ष्मिनियाको नयाँ इन्चार्जका रूपमा पदस्थापन भई आउनुभएका प्रहरी निरीक्षक रादेश खत्री लाई हार्दिक स्वागत गरिएको छ । स्थानीय सरोकारवाला तथा शुभेच्छुकहरूले इन्स्पेक्टर खत्रीको नेतृत्वमा यस क्षेत्रको शान्ति सुरक्षा व्यवस्था अझ प्रभावकारी र सुदृढ हुने विश्वास व्यक्त गरेका छन् । नवनियुक्त इन्चार्ज खत्रीलाई सफल कार्यकालको शुभकामना दिँदै समुदाय र प्रहरीबीचको सहकार्यलाई अझ मजबुत बनाउने अपेक्षा समेत व्यक्त गरिएको छ ।

शिवनाथ कुशवाहा ,रौतहट,०८ गते असार ।

रौतहटको बौधीमाई नगरपालिकाको १२ औँ नगरसभा तथा अधिवेशन (खुला सत्र) सोमबार नगरपालिकाको सभाहलमा भव्य रूपमा सम्पन्न भएको छ । नगर प्रमुख प्रदिप कुमार यादवको अध्यक्षतामा सम्पन्न सभामा नगर उपप्रमुख प्रमिला देवी विशिष्ट अतिथिका रूपमा सहभागी हुनुभएको थियो ।

सभामा आगामी आर्थिक वर्ष २०८३÷०८४ का लागि ६३ करोड १६ लाख ४ हजार रुपैयाँ रुपैयाँको बजेट, नीति तथा कार्यक्रम प्रस्तुत गरिएको थियो । प्रस्तुत बजेटले नगरको चौतर्फी विकास, आर्थिक समृद्धि तथा जनआकांक्षा सम्बोधन गर्ने लक्ष्य लिएको नगरपालिकाले जनाएको छ ।

कार्यक्रममा जनप्रतिनिधि, राष्ट्रसेवक कर्मचारी, पत्रकार तथा नगरवासीहरूको उल्लेखनीय सहभागिता रहेको थियो । नगरपालिकाका प्रमुख प्रशासकीय अधिकृत उदयशंकर चौधरी ले सभा सफलतापूर्वक सम्पन्न भएको जानकारी दिनुभयो । नगर प्रमुख प्रदिप कुमार यादवले सभा सफल बनाउन सहयोग पु¥याउने सम्पूर्ण जनप्रतिनिधि, कर्मचारी, सञ्चारकर्मी तथा नगरवासीप्रति हार्दिक धन्यवाद तथा आभार व्यक्त गर्नुभएको छ । यो अधिवेशन बौधीमाई नगरपालिका को आगामी आर्थिक वर्षको विकास योजना तथा बजेट पारित गर्ने महत्वपूर्ण मञ्चका रूपमा सम्पन्न भएको हो ।

शिवनाथ कुशवाहा ÷ बारा, असार ८ गते।

“पूर्वाधार, कृषि, शिक्षा, स्वास्थ्य, खानेपानी तथा स्वरोजगार“ भन्ने मूल नारासहित बाराको बारागढी गाउँपालिकाको दोस्रो कार्यकालको गाउँसभाको नवौँ अधिवेशन तथा आर्थिक वर्ष २०८३÷०८४ को नीति, कार्यक्रम र बजेट प्रस्तुतिकरण कार्यक्रम सम्पन्न भएको छ । सोमबार गाउँपालिकाको कार्यालय खोपवामा आयोजित कार्यक्रममा गाउँपालिका उपाध्यक्ष लक्ष्मीदेवी राय चौधरीको तर्फबाट लेखा प्रमुख अजय चौधरीले आगामी आर्थिक वर्ष २०८३÷०८४ का लागि नीति, कार्यक्रम तथा बजेट प्रस्तुत गरेका हुन् । प्रस्तुत बजेट अनुसार आगामी आर्थिक वर्षका लागि गाउँपालिकाको कुल अनुमानित आय ३९ करोड ७१ लाख ६५ हजार रुपैयाँ रहेको छ ।

आयतर्फ संघीय सरकारबाट वित्तीय समानीकरण अनुदान अन्तर्गत ९ करोड ८७ लाख रुपैयाँ, सशर्त अनुदान अन्तर्गत शिक्षा, कृषि, पशु तथा स्वास्थ्य क्षेत्रमा १५ करोड ६० लाख रुपैयाँ, राजस्व बाँडफाँडबाट ८ करोड ७९ लाख ९६ हजार रुपैयाँ, समपूरक अनुदान १ करोड रुपैयाँ तथा विशेष अनुदान ५५ लाख रुपैयाँ प्राप्त हुने अनुमान गरिएको छ। त्यसैगरी प्रदेश सरकारबाट वित्तीय समानीकरण अनुदान ६८ लाख ३० हजार रुपैयाँ, राजस्व बाँडफाँड ४१ लाख ३९ हजार रुपैयाँ, सशर्त अनुदान ४० लाख रुपैयाँ, विशेष अनुदान ३० लाख रुपैयाँ तथा समपूरक अनुदान ३० लाख रुपैयाँ प्राप्त हुने जनाइएको छ। आन्तरिक आम्दानी ८० लाख रुपैयाँ तथा गत आर्थिक वर्षको बैंक मौज्दात १ करोड रुपैयाँ समेत समावेश गरी कुल बजेट अनुमान गरिएको हो ।

व्ययतर्फ चालु तथा प्रशासनिक खर्चका लागि ९ करोड ५९ लाख ९६ हजार रुपैयाँ विनियोजन गरिएको छ भने कार्यालय सञ्चालन तथा विकास निर्माणसहित पुँजीगत खर्चका लागि १२ करोड ९५ लाख ५९ हजार रुपैयाँ छुट्याइएको छ । संघीय सरकारको सशर्त अनुदान १५ करोड ६० लाख रुपैयाँ, समपूरक तथा विशेष अनुदान १ करोड ५५ लाख रुपैयाँ र प्रदेश सरकारबाट प्राप्त समपूरक, सशर्त तथा विशेष अनुदान गरी १ करोड रुपैयाँ खर्च हुने व्यवस्था गरिएको छ।

गाउँपालिकाले पुँजीगत विकास, आयोजना तथा कार्यक्रमका लागि करिब १३ करोड १४ लाख रुपैयाँ विनियोजन गरेको जनाएको छ । उक्त रकम विषयगत तथा वडागत सिलिङका आधारमा छवटै वडा कार्यालयमार्फत बस्ती तथा टोलस्तरबाट सहभागितामूलक ढंगले संकलित योजनामा खर्च गरिने जनाइएको छ । नेपाल सरकारबाट प्राप्त सशर्त अनुदान शिक्षा, कृषि, पशुपालन र स्वास्थ्यलगायतका क्षेत्रमा पूर्वनिर्धारित कार्यक्रमअनुसार खर्च गर्नुपर्ने भएकाले ती शीर्षकमा छुट्टै योजना निर्माण नगरिएको गाउँपालिकाले जनाएको छ ।

साथै संघीय तथा प्रदेश सरकारबाट प्राप्त विशेष, समपूरक र सशर्त अनुदान सम्बन्धित योजनामै खर्च गरिने उल्लेख गरिएको छ । गाउँसभालाई सम्बोधन गर्दै अशोक कुमार जयसवालले गाउँपालिकाको समग्र विकास, सुशासन तथा जनमुखी सेवा प्रवाहलाई केन्द्रमा राखेर बजेट निर्माण गरिएको बताए। उनले विकास निर्माणका योजनालाई प्रभावकारी रूपमा कार्यान्वयन गर्दै गाउँपालिकाका सबै वडामा सन्तुलित विकास सुनिश्चित गरिने उल्लेख गरे।

अध्यक्ष जयसवालले कृषि, शिक्षा र स्वास्थ्य क्षेत्रको सुधारसँगै रोजगारी सिर्जना गर्ने कार्यक्रमलाई विशेष प्राथमिकता दिइएको जानकारी दिए। त्यसैगरी उपप्रमुख लक्ष्मी देवी राय ले बजेटले महिला, बालबालिका, ज्येष्ठ नागरिक, दलित तथा विपन्न समुदायको उत्थानका लागि विशेष कार्यक्रम समेटेको बताइन्। उनले समावेशी विकास र सामाजिक न्यायलाई गाउँपालिकाको मुख्य प्राथमिकता बनाइएको उल्लेख गर्दै स्थानीय आवश्यकताअनुसारका योजनाहरू कार्यान्वयन गरिने बताइन्। गाउँपालिकाका प्रमुख प्रशासकीय अधिकृत मुकेश मिश्र ले प्रस्तुत बजेट तथा कार्यक्रमलाई पारदर्शी, प्रभावकारी र परिणाममुखी ढंगले कार्यान्वयन गरिने बताए।

उनले सेवा प्रवाहलाई थप सहज, छिटो र गुणस्तरीय बनाउने प्रतिबद्धता व्यक्त गर्दै विकास योजनाहरू निर्धारित समयभित्र सम्पन्न गर्न प्रशासनिक संयन्त्र पूर्ण रूपमा प्रतिबद्ध रहेको जानकारी दिए। कार्यक्रममा विभिन्न वडाका वडा अध्यक्ष, कार्यपालिका सदस्य, वडा सदस्य, सुरक्षाकर्मी, सञ्चारकर्मी तथा स्थानीय बासिन्दाको उल्लेख्य उपस्थिति रहेको थियो ।

आरके श्रीवास्तव,रौतहट,०८ गते असार ।

रौतहटको दक्षिणी भेगस्थित इशनाथ नगरपालिका को १३औँ नगरसभा सम्पन्न भएको छ । नगरसभामा आगामी आर्थिक वर्ष २०८३÷८४ का लागि ५२ करोड ३० लाख ७० हजार रुपैयाँको बजेट प्रस्तुत गरिएको छ । नगरसभामा नगरको समग्र विकास, आधारभूत सेवा प्रवाहको सुदृढीकरण, पूर्वाधार निर्माण, शिक्षा, स्वास्थ्य, कृषि तथा सामाजिक विकासलाई प्राथमिकतामा राख्दै बजेट प्रस्तुत गरिएको हो ।

नगरसभालाई सम्बोधन गर्दै नगरप्रमुख कौश्लया देवीले नगरवासीको आवश्यकता र अपेक्षालाई केन्द्रमा राखेर बजेट तथा कार्यक्रम तर्जुमा गरिएको बताइन् । उनले सीमित स्रोत–साधनका बाबजुद नगरको दिगो विकास, सुशासन र जनमैत्री सेवा प्रवाहलाई थप प्रभावकारी बनाउने प्रतिबद्धता व्यक्त गरिन् ।

नगरप्रमुख देवीले विकास निर्माणका कार्यलाई पारदर्शी र परिणाममुखी बनाउँदै नगरलाई समृद्धिको दिशामा अघि बढाइने बताइन् । त्यसैगरी उपप्रमुख मो.परवेजले प्रस्तुत बजेटले नगरका सबै वडालाई समेट्ने गरी सन्तुलित विकासको अवधारणालाई आत्मसात गरेको बताए । उनले शिक्षा, स्वास्थ्य, खानेपानी, कृषि तथा रोजगारी सिर्जनासँग सम्बन्धित कार्यक्रमलाई प्रभावकारी रूपमा कार्यान्वयन गरिने उल्लेख गरे ।

नगरसभामा बोल्दै प्रमुख प्रशासकिय अधिकृत महमद नावाज हुसेनले बजेट कार्यान्वयनलाई पारदर्शी, उत्तरदायी र प्रभावकारी बनाइने बताए । उनले नगरपालिकाको प्रशासनिक संयन्त्रलाई थप चुस्त बनाउँदै सेवा प्रवाहमा सुधार ल्याउने तथा विकास योजनाको समयमै सम्पन्नतामा विशेष ध्यान दिइने जानकारी दिए ।

नगरसभाबाट आगामी आर्थिक वर्षका नीति, कार्यक्रम तथा बजेटमाथि छलफल गरी आवश्यक निर्णयहरू समेत पारित गरिएको जनाइएको छ । नगरपालिकाले प्रस्तुत बजेटमार्फत पूर्वाधार विकास, सामाजिक क्षेत्रको सुदृढीकरण तथा आर्थिक गतिविधिको प्रवद्र्धनलाई प्राथमिकतामा राखेको जनाएको छ ।

बज्जिकाञ्चल संवाददाता÷रौतहट÷असार ८ गते ।

रौतहटको देवाही गोनाही नगरपालिकाको ११ औँ नगरसभा तथा आर्थिक वर्ष २०८३÷८४ को नीति, कार्यक्रम र बजेट सभा सोमबार सम्पन्न भएको छ । “समृद्ध देवाही गोनाही, सुशासन र दिगो विकास हाम्रो प्रतिबद्धता” भन्ने मूल नाराका साथ नगर कार्यपालिकाको कार्यालय प्रेमपुर गोनाहीमा आयोजित नगरसभामा आगामी आर्थिक वर्षका लागि ४४ करोड ६८ लाख ६५ हजार रुपैयाँ बराबरको बजेट प्रस्तुत गरिएको लेखाप्रमुख प्रदिप यादवले जानकारी गराउनु भएको हो । नगर प्रमुख प्रेमलाल साहको अध्यक्षतामा सम्पन्न नगरसभामा उपप्रमुख परनिया देवी पटेलको तर्फबाट वडा नं. ४ का वडा अध्यक्ष रामप्रवेश प्रसाद पटेलले नीति, कार्यक्रम तथा बजेट प्रस्तुत गर्नुभएको थियो। प्रस्तुत बजेटले नगरपालिकाको समग्र विकास, सुशासन प्रवद्र्धन तथा नागरिकको जीवनस्तर उकास्ने लक्ष्य लिएको जनाइएको छ ।

नगरपालिकाले आगामी आर्थिक वर्षका लागि शिक्षा, स्वास्थ्य, कृषि, खानेपानी, सरसफाइ, पूर्वाधार विकास, महिला तथा बालबालिका सशक्तीकरण, युवा स्वरोजगार, सामाजिक सुरक्षा तथा विपद् व्यवस्थापनका कार्यक्रमलाई प्राथमिकतामा राखेको देवाहीगोनाही नगरपालिकाका प्रमुख प्रशासकिय अधिकृत पवन कुमार केसरीले जानकारी गराउनु भयो । विशेषगरी कृषिलाई नगरको अर्थतन्त्रको मुख्य आधारका रूपमा विकास गर्दै उत्पादन वृद्धि, आधुनिक कृषि प्रविधिको प्रयोग तथा किसानलाई प्रोत्साहन गर्ने योजनाहरू बजेटमा समेटिएका छन्। त्यसैगरी गुणस्तरीय शिक्षाको पहुँच विस्तार, विद्यालयहरूको भौतिक पूर्वाधार सुधार, स्वास्थ्य संस्थाहरूको सेवा सुदृढीकरण तथा आधारभूत स्वास्थ्य सेवाको पहुँच सुनिश्चित गर्ने कार्यक्रमहरू पनि बजेटमा समावेश गरिएको छ । नगर क्षेत्रमा सडक, नाला, कल्भर्ट तथा अन्य भौतिक संरचनाको निर्माण र स्तरोन्नतिलाई समेत प्राथमिकतामा राखिएको छ। प्रस्तुत बजेटमा बेरोजगार युवाहरूका लागि सीपमूलक तालिम, उद्यमशीलता विकास तथा स्वरोजगार प्रवद्र्धनका कार्यक्रम सञ्चालन गरिने उल्लेख गरिएको छ ।

साथै महिला, दलित, जनजाति, पिछडिएका वर्ग तथा विपन्न समुदायको सामाजिक तथा आर्थिक सशक्तीकरणका लागि विभिन्न लक्षित कार्यक्रम सञ्चालन गरिने जनाइएको छ । नगरसभालाई सम्बोधन गर्दै नगर प्रमुख प्रेमलाल साहले नगरवासीको आवश्यकता र अपेक्षालाई केन्द्रमा राखेर नीति तथा कार्यक्रम तयार गरिएको बताउनुभयो। उहाँले सीमित स्रोत–साधनका बाबजुद नगरको समग्र विकास, सुशासन कायम गर्ने तथा जनतालाई प्रभावकारी सेवा प्रवाह गर्ने प्रतिबद्धता व्यक्त गर्नुभयो । विकास निर्माणका कामलाई पारदर्शी, उत्तरदायी र परिणाममुखी बनाइने उहाँको भनाइ थियो ।

सभामा सहभागी जनप्रतिनिधिहरूले प्रस्तुत नीति तथा कार्यक्रमले नगरको समग्र विकासमा टेवा पुग्ने विश्वास व्यक्त गरेका थिए। विभिन्न वडाका अध्यक्षहरूले आ–आफ्नो क्षेत्रका आवश्यकता र प्राथमिकताबारे सुझाव प्रस्तुत गर्दै विकास योजनाको प्रभावकारी कार्यान्वयनमा जोड दिएका थिए । नगरसभामा वडा नं. १ देखि ९ सम्मका वडा अध्यक्ष, कार्यपालिका सदस्य, वडा सदस्य, विभिन्न राजनीतिक दलका प्रतिनिधि, बुद्धिजीवी, समाजसेवी, शिक्षक, कर्मचारी, नेपाल प्रहरी, सशस्त्र प्रहरी बलका प्रतिनिधि तथा सञ्चारकर्मीहरूको उल्लेखनीय सहभागिता रहेको थियो । नगरसभाले प्रस्तुत नीति, कार्यक्रम तथा बजेटमाथि छलफल गरी पारित गरेको छ। सभाबाट नगरको दिगो विकास, सुशासन प्रवद्र्धन, सेवा प्रवाहमा सुधार तथा नागरिकको जीवनस्तर उकास्ने लक्ष्यसहित आगामी आर्थिक वर्षका कार्यक्रमहरू प्रभावकारी रूपमा कार्यान्वयन गर्ने प्रतिबद्धता व्यक्त गरिएको छ ।

शिवनाथ कुशवाहा ,रौतहट,०८ गते असार । रौतहट । गढीमाई नगरपालिकाको १३औँ नगरसभा सम्पन्न भएको छ । नगरसभामा आर्थिक वर्ष २०८३÷०८४ का लागि ५९ करोड २२ लाख ५५ हजार रुपैयाँ बराबरको अनुमानित आय–व्यय, नीति तथा कार्यक्रम नगर प्रमुख श्याम प्रसाद यादवले एक कार्यक्रमबीच प्रस्तुत गर्नुभएको छ । नगरसभाको उद्घाटन मधेश प्रदेशका मुख्यमन्त्री कृष्ण प्रसाद यादवले दीप प्रज्वलन गरी गर्नुभएको थियो ।

उद्घाटन समारोहलाई सम्बोधन गर्दै मुख्यमन्त्री यादवले गढीमाई नगरपालिकाको विकास तथा सञ्चालनका लागि चालु आर्थिक वर्षमा मधेश प्रदेश सरकारबाट ३० करोड रुपैयाँ बजेट विनियोजन गरिएको जानकारी दिनुभयो । उहाँले आफू मुख्यमन्त्री रहेसम्म नगरपालिकाभित्रका अधुरा विकास योजनाहरू सम्पन्न गर्ने प्रतिबद्धता व्यक्त गर्दै प्रतिनिधिसभा क्षेत्र नम्बर–४ अन्तर्गत पर्ने यस क्षेत्रलाई अन्य स्थानीय तहका लागि नमुना नगरका रूपमा स्थापित गरिने बताउनुभयो ।

मुख्यमन्त्री यादवले मधेश प्रदेशका किसानहरूलाई खेतीपातीका लागि पर्याप्त विद्युत् सुविधा उपलब्ध हुन नसकेको उल्लेख गर्दै सिँचाइ तथा कृषि कार्यलाई सहज बनाउन किसानहरूका लागि सोलार चार्जबाट सञ्चालन हुने बत्ती जडान गर्ने योजना रहेको समेत जानकारी दिनुभयो । कार्यक्रममा नगर उपप्रमुख स्मिता कुमारी यादव, प्रमुख प्रशासकीय अधिकृत इन्द्रदेव पाण्डेय, वडा नम्बर १ देखि ९ सम्मका निर्वाचित जनप्रतिनिधि, वडा अध्यक्षहरू, नगरपालिकाका कर्मचारी, महिला नगर प्रहरी, नेपाल प्रहरी तथा विभिन्न क्षेत्रका सयौँ सर्वसाधारणको उपस्थिति रहेको थियो ।

नगरसभामा प्रस्तुत बजेट तथा नीति–कार्यक्रममार्फत पूर्वाधार विकास, शिक्षा, स्वास्थ्य, कृषि तथा सामाजिक क्षेत्रलाई प्राथमिकतामा राख्दै समग्र नगरको दिगो विकासलाई अघि बढाउने लक्ष्य लिइएको नगरपालिकाले जनाएको छ । यद्यपि, सभामा बोल्ने अवसर नदिएको भन्दै वडा नम्बर १ का वडाध्यक्ष रामपुकार यादव ले असन्तुष्टि जनाउनुभएको छ । उहाँले नगरसभा औचित्यहीन बनेको आरोप समेत लगाउनुभएको छ ।

बारा । जितपुरसिमरा उपमहानगरपालिका–१० नितनपुर चोकस्थित वीरगञ्ज-पथलैया सडकखण्डमा यात्रुवाहक बस दुर्घटना हुँदा ११ जना घाइते भएका छन्। घाइतेमध्ये एक जनाको अवस्था गम्भीर रहेको छ ।

वीरगञ्जबाट सप्तरीतर्फ जाँदै गरेको ना ७ ख २३५ नम्बरको बस ओभरटेक गर्ने क्रममा अनियन्त्रित भई सडकमा पल्टिँदा दुर्घटना भएको प्रहरीले जनाएको छ ।

दुर्घटनामा सप्तरी तिलाठी कोइलाडी गाउँपालिका–१ का ४२ वर्षीय कमलेश यादव, उनकी ३४ वर्षीया श्रीमती रुबी यादव र १५ वर्षीया छोरी शिवानी यादव घाइते भएका छन्। त्यसैगरी पर्सा वीरगञ्ज महानगरपालिका–१३ का ६४ वर्षीय रामनरेश प्रसाद, सप्तरी कञ्चनरुप नगरपालिका–१ का ४७ वर्षीय सहचालक नरेश पंजियार, पर्सा पकाहा मैनपुर गाउँपालिका–५ का २८ वर्षीय धनञ्जय प्रसाद चौरसिया, पर्सा बहुदरमाई नगरपालिका–२ की ३४ वर्षीया सुनिता यादव, सिराहा कर्जन्हा नगरपालिका–११ का ६२ वर्षीय चिनीलाल श्रेष्ठ, बारा जितपुरसिमरा उपमहानगरपालिका–३ का ४० वर्षीय चन्द्र तामाङ, रौतहट चन्द्रपुर नगरपालिका–६ की ४५ वर्षीया दिपा घिमिरे तथा ठेगाना नखुलेका करिब ४० वर्षीय अमित कुमार गुप्ता घाइते भएका छन्।

घाइतेहरूको वीरगञ्जस्थित नेशनल मेडिकल कलेज, तराई अस्पताल तथा अन्य स्थानीय स्वास्थ्य संस्थामा उपचार भइरहेको छ ।

बस चालक घटनापछि फरार रहेका छन् । उनको खोजी भइरहेको र घटनाबारे थप अनुसन्धान जारी रहेको प्रहरीले जनाएको छ ।एभरेष्ट न्यूज एजेन्सी

वीरगञ्ज । वीरगञ्जको मुख्य सडक क्षेत्रमा भत्काउन बाँकी रहेका घर तथा भवनमा आगामी आइतबारदेखि पुनः डोजर चलाइने भएको छ ।

सडक विभागअन्तर्गत सडक डिभिजन हेटौँडाले त्रिभुवन राजपथको मितेरी पुलदेखि गण्डक चोकसम्म सडकको केन्द्ररेखाबाट दायाँ-बायाँ २५-२५ मिटर सडक सीमाभित्र रहेका बाँकी संरचना हटाउने तयारी गरेको हो ।

यसअघि वैशाख ६ र ७ गते पहिलो चरणमा करिब एक हजार दुई सय घर तथा भवनमा आंशिक रूपमा डोजर चलाइएको थियो। त्यसपछि केही घरधनीले आफैं संरचना हटाए पनि घण्टाघर, माइस्थान, आदर्शनगर हुँदै अलखियामठ चोकसम्मका अधिकांश घर तथा भवन अझै खाली नगरिएको जनाइएको छ ।

सडक विभागले यसअघि सूचना जारी गर्दै सम्बन्धित घरधनीलाई निश्चित समयभित्र आफैं संरचना हटाउन आग्रह गरेको थियो । तर तोकिएको अवधि बितिसक्दा पनि संरचना नहटाइएकाले अब विभाग आफैंले डोजर प्रयोग गरेर बाँकी संरचना हटाउने निर्णय गरेको हो ।

यसका लागि सडक डिभिजन हेटौँडाले वीरगञ्ज महानगरपालिकालाई पत्राचार गर्दै आवश्यक जनशक्ति, सुरक्षा तथा समन्वयमा सहयोग गर्न अनुरोध गरेको छ । सडक विभागले सडक ऐन, २०३१ अनुसार सडक सीमा संरक्षण अभियानअन्तर्गत यो कार्य अघि बढाउन लागेको जनाएको छ ।एभरेष्ट न्यूज एजेन्सी

काठमाडौँ । अख्तियार दुरुपयोग अनुसन्धान आयोगले घुस लिएको आरोपमा महोत्तरीको सोनमा गाउँपालिकाका प्रमुख प्रशासकीय अधिकृत श्रीदेव यादवविरुद्ध विशेष अदालतमा भ्रष्टाचार मुद्दा दायर गरेको छ।

आयोगका अनुसार सडक ढलान योजनाको काम सम्पन्न भएपछि भुक्तानी प्रक्रिया अगाडि बढाउने क्रममा विभिन्न बहाना बनाई सेवाग्राहीलाई दुःख हैरानी दिँदै यादवले ७२ हजार रुपैयाँ घुस मागेका थिए । उजुरीका आधारमा बर्दिबासस्थित अख्तियारको टोलीले उनलाई सेवाग्राहीबाट ७२ हजार रुपैयाँ घुस लिइसकेको अवस्थामा नियन्त्रणमा लिएको थियो ।

अनुसन्धानबाट सडक ढलान योजना सम्झौताअनुसार सम्पन्न भइसकेपछि पनि भुक्तानी रोक्दै घुस मागी रकम लिएको पुष्टि भएको आयोगले जनाएको छ ।

आयोगले भ्रष्टाचार निवारण ऐन, २०५९ अनुसार ७२ हजार रुपैयाँ बिगो कायम गरी सोही बराबर जरिवाना र कानुनबमोजिम कैद सजायको माग गर्दै शुक्रबार विशेष अदालत, काठमाडौँमा आरोपपत्र दायर गरेको जनाएको छ ।एभरेष्ट न्यूज एजेन्सी