आरके श्रीवास्तव,रौतहट,२६ गते पुस २०८१  ।
रौतहटको फतुवा विजयपुर नगरपालिको एक विधालयमा प्रधानाध्यापक फेरिएको छ । नयाँ हेडसर आज हाजिर भएका हुन् । सो नगरपालिको वडा नम्बर २ मा रहेको माध्यमिक विधालय शितलपुरमा नयाँ प्रधानाध्यापकको रुपमा मुकेश कुमार यादव हाजिर भएको फतुवा विजयपुर नगरपालिकाका शिक्षा सह संयोजक अनिल यादवले जानकारी गराएका हुन् ।

यस अघिका प्रधानाध्यापक बुनिलाल प्रसाद यादवलाइ माध्यमिक बिधालय हिमालीबाँसको जिम्मेवारीमा पठाइएपछि बिधालय हेडसर बिहिन बनेको थियो । शुक्रवारदेखि बिधालयले नयाँ हेडसर पाएको छ ।
हेडसरको जिम्मेवारी पाएपछि यादवले आफूले पाएको जिम्मेवारी राम्रो सँग निर्वाह गर्ने प्रतिबद्धता जनाएका छन् । आफनो पालामा गुणस्तरीय शिक्षा दिन पछाडी नहटने बताएका छन् । मावि दुधिअवामा निमावि सामाजिक शिक्षकको रुपमा कार्यरत यादवलाइ नगरपालिकाले मावि शितलपुरको हेडसर बनाएको हो ।
नयाँ हेडरसर हाजिरहुने अवसरमा फतुवा विजयपुर नगरवपालिकाका पूर्व शिक्षा संयोजक तेजनारायण यादव,पूर्व शिक्षा सह संयोजक सुुबोध प्रसाद यादव लगायत शिक्षक शिक्षिका,अभिावकहरुको पनि उपस्थिती रहेको थियो । फाेटाे फिचर:

बज्जिकाञ्चल संवाददाता,२५ गते पुस २०८१ ।

काठमाडौ । प्रतिनिधि सभाका सदस्य एवम पूर्वमन्त्री एकनाथ ढकालले मित्र राष्ट्र श्रीलंकाको नबनिर्बाचित प्रधानमन्त्री हरिणी अमरासुरियासंग बुधबार कोलम्बोमा भेट गरेका छन् । श्रीलंकाको प्रधानमन्त्री कार्यालयमा भएको भेटमा द्विपक्षीय हित र मित्रता अभिबृद्धि गर्ने बारे छलफल भएको ढकालको सचिवालयले जनाएको छ ।

सांसद ढकालले नेपालका प्रधानमन्त्री केपी शर्मा ओलीको तर्फवाट प्रधानमन्त्री हरिणी अमरासुरियालाइ शुभकामना दिदै उपयुक्त समयमा नेपालको मैत्रीपूर्ण भ्रमणको लागि समेत आग्रह गरे । प्रधानमन्त्री हरिणी अमरासुरियाले नेपालसंगको बिशेष मैत्रीपुर्ण सम्बन्धलाई जोड दिदै प्रधानमन्त्री केपी शर्मा ओलीलाई शुभकामना संदेश पठाएका थिए ।

साथै सांसद ढकालले श्रीलंकाली नबनिर्बाचित सभामुख डा जगत विक्रमारत्ने संग संसद भवनमा शिष्टाचार भेट गरि नेपालका सभामुख देबराज घिमिरेको तर्फवाट सभामुख डा जगत विक्रमारत्नेलाइ शुभकामना दिदै उपयुक्त समयमा गौतम बुद्ध जन्मस्थल लुम्बिनीको भ्रमणकोलागि समेत आग्रह गरे । त्यसै गरि सांसद ढकालले श्रीलंकाको संसद्को प्रमुख प्रतिपक्षी दलका नेता साजिथ प्रेमादासासंग समेत भेट गरि अन्तरक्रिया गरेका थिए । पूर्व मन्त्रि समेत रहेका ढकाल श्रीलंकाको २ दिने मैत्रीपुर्ण भ्रमणमा छन् । ढकाल प्रतिनिधि सभाको अन्तराष्ट्रिय सम्बन्ध तथा पर्यटन समिति सदस्य हुन् । नेपाल र श्रीलंका बीच सन् १९५७ मा कुटनैतिक सम्बन्ध स्थापना भएको हो ।

बज्जिकाञ्चल संवाददाता,२५ गते पुस २०८१ ।

काठमाडौं । नेपाल इन्जिनियरिङ कलेजमा साइबर सुरक्षाका नवीनतम प्रविधि र चुनौतिहरु बारे सरकारी क्षेत्र, विद्यार्थी, व्यवसायिक, तथा प्राविधिक क्षेत्रका व्यक्तिहरू विचको महत्वपूर्ण सम्मेलन सम्पन्न भएको छ । मंगलबार र बुधबार सम्पन्न साइबर सुरक्षा संगोष्टीमा सहभागीहरुले नेपालको साइबर कानुन, साइबर सुरक्षा, अपराध र चुनौतिका सवालमा छलफल र बहस गरे ।

संगोष्टीको उद्घाटन गर्दै कलेजका प्राचार्य दुर्गाप्रसाद भण्डारीले पछिल्लो समय इन्टरनेटको माध्यमबाट धेरै अपराधहरु भइरहेको तथा साइबर सम्बन्धी नेपालको विद्यमान कानुन, नीति र व्यवसायिकताका बारेमा कलेजका विद्यार्थीहरुलाई सचेतना दिन संगोष्टी आयोजना गरिएको बताउनु भयो । साइबर सुरक्षा संगोष्टीबाट विद्यार्थीहरुले साइबर कानुन, साइबरमा जोखिम र सामाजिक, आर्थिक प्राविधिक ज्ञान प्राप्त गर्ने विस्वास व्यक्त गर्नुभयो ।

संगोष्टीको पहिलो दिन आयोजित प्यानल छलफलमा राष्ट्रिय साइबर सुरक्षा केन्द्रका निर्देशक तथा प्रवक्ता राजकुमार महर्जनले सरकारले साईबर अपराध, साइबर सुरक्षा र कानुनलाई बलियो बनाउन काम गरिरहेको बताउनु भयो । उहाँले सरकारी तवरबाट आम नागरिकलाई साइबर सम्बन्धी सचेतना दिने कार्यसँगै कानुनमा रहेका कमजोरीहरु सुधार गर्न सक्रियताका साथ कार्य भइरहेकोले सामाजिक सञ्जाल, इन्टरनेटका माध्यमबाट हुने अपराध बारे सबैले जानकारी राख्नुपर्नेमा जोड दिनुभयो ।

संगोष्टीमा बोल्दै राष्ट्रिय साइबर व्यूरोका एसपी दीपकराज अवस्थीले नेपालको साइबर कानुन, साइबर अपराधका बारेमा सहभागीहरुलाई जानकारी गराउनु भयो । उहाँले पछिल्लो पुस्ता साइबर अपराधमा जोडिनु दुखःद भएको बताउँदै नेपालमै रहेर भिओआईपी प्रयोग गरेर साइबर अपराध गर्ने क्रम बढेको र त्यस्ता कार्य गर्दा कुनै न कुनै दिन फसिने भएकोले विद्यार्थीहरुलाई त्यस्ता कार्यमा संलग्न नहुन अनुरोध गर्नुभयो ।

कलेजका सहायक प्राचार्य मोहनध्वज केसीले साइबर सुरक्षा संगोष्टीले विद्यार्थीहरुलाई साइबर सुरक्षा, कानुन र अपराधका बारेमा ज्ञान दिने जिकीर गर्नुभयो । उहाँले इन्टरनेटको माध्यमबाट हुने अपराधहरु बारे विशेषगरी युवा पुस्ता विद्यार्थीहरुले बढी जानकारी लिनुपर्नेमा जोड दिनुभयो ।

इसेवाका इन्जिनियर सुदिप पाठकले निजी क्षेत्रले खासगरी रकम भुक्तानी सम्बन्धी साइबर सुरक्षा, समस्या र चुनौति तथा अपनाउनु पर्ने सावधानीका बारेमा जानकारी दिनुभयो । संगोष्टीमा साइबर प्राइभेट लिमिटेडका प्रमुख कार्यकारी अधिकृत आशिष खनाल, ल इम्पेरियलका प्रबन्ध निर्देशक सुरेन्द्र तिवारी, मेरो शिक्षाका संस्थापक अनुप उप्रेती, आइसिटी अवार्ड विजेता क्रिमसन टेकका रुकेश दुवाल, कलेजका कम्प्युटर डिपार्टमेन्टका प्रमुख जीतबहादुर बोहरा, विद्यार्थी कल्याण समितिका अध्यक्ष विष्णुप्रसाद भण्डारी लगायतको सहभागीता रहेको थियो ।

दुई दिनसम्म चलेको साइबर सुरक्षा संगोष्टीमा कलेजमा स्नातक तहमा अध्ययनरत विद्यार्थीहरुको उल्लेख्य सहभागीता रहेको थियो ।

बज्जिकाञ्चल संवाददाता,पर्सा,२५ गते पुस २०८१ ।बिरगंज । आम जनता पार्टी (आजपा) का अध्यक्ष एवं पूर्वमन्त्री प्रभु साहले बिरगंजको बिकासमा राजनीतिक दल र नेताहरुले बेइमानी गरेको टिप्पणी गरेका छन् । नेताहरुको दोहोरो चरित्रका कारण बिरगंजको बिकास ओझेलमा परेको उनले बताए ।

बिरगंज स्थित नारायणी रंगशालाको आज निरक्षण गर्दै आजपा अध्यक्ष साहले सरकारको दोहोरो चरित्रका कारण नारायणी रंगशाला जिर्ण बनेको बताए । केही चोर नेताहरुका कारण नारायणी रंगशाला जिर्ण भएको र विभेदको शिकार बनेको बताउँदै अब प्रभु साह चुप लागेर नबस्ने चेतावनी समेत उनले दिए ।

‘केपी ओली प्रधानमन्त्री हुनुहुन्छ । उहाँ भर्खर बिरगंज आउँनुभएको थियो । के उहाँको नजरमा यो नारायणी रंशाला परेन ? के ठाकुरराम बहुमुखी क्याम्पस, नारायणी अस्पताल, चिनी मिल, कृषी औजार कारखाना उहाँको नजर परेन ? यहाँको घण्टाघर पञ्चायतकालमा बन्यो के उहाँको योग्दान केही हुनुपरेन ?’, बिरगंजको बिकासको बारेमा प्रश्न गर्दै आजपा अध्यक्ष साहले भने, ‘यहाँ आएर लम्बालम्बा भाषण गर्ने ? यहाँको बिकासको बारेमा केही नसोच्ने ? उहाँको अगाडीपछाडी गर्नेलाई सोध्ने बेला भएको छ । की त्यो पार्टी छोड या यहाँको बिकासको बारेमा केही गर । बिरगंजमा लुटने काम मात्रै उनीहरुले गरे ।’

बिरगंजबाट राजस्व लिने तर बिरगंजको बिकासका लागि सरकारले केही नगर्ने हो भने अब हामी चुप लागेर बस्ने बेला होईन यसको हिसाब किताब गर्नुपर्ने साहले भने । यहाँबाट ट्रक आउँजाउँ गर्दा त्यसको धुलोधुवा बीरगंजबासीले खानुपर्ने तर सरकारले बिकास नै नगरेपछि अब हामीले कर किन तिर्ने त्यसबारेमा सोच्ने बेला भएको उनले बताए ।

‘बिरगंजबाट चारगुणा बढी टयाक्स लिने तर सोही परिणाममा यहाँको बिकास किन नगरेको भन्ने बारेमा हामीले प्रश्न गर्नुपर्छ । जब यहाँबाट सरकारले बढीभन्दा बढी टयाक्स लिन्छ भने बढी भन्दा बढी बिकास गर्नुपर्छ’ आजपा अध्यक्ष साहले भने, ‘२१औं शताब्दीमा बिरगंजसंग जुन अन्याय, अत्याचार, विभेद भईरहेको छ हामी चुप लागेर बस्दैनौं । बिरगंजको मानसम्मान, बिकास, गौरबका लागि प्रभु साह चुप लागेर बस्दैन । हामी यसको हिसाबकिताब गर्छौं ।’

मधेस बिभिन्न खेलकुदमा मधेस अगाडी रहेको ईतिहास रहेको बताउँदै उनले मधेसलाई पछाडी पार्न खोज्नु दुर्भाग्य भएको बताए । क्रिकेट, कुस्ती, फुटवल, भलिवल लगायतका बिभिन्न खेलमा मधेस जहिले पनि अगाडी भएको बताउँदै उनले यहाँको रंगशालाको पुनर्निमाण गर्नुपर्ने, थप रंगशाला निर्माण गर्दै खेलकुदको बिकासका लागि आफूले योग्दान उनले बताए ।

पर्साका नेताहरु दलालीमा उत्रेको र यस्ता योजनालाई छोडेको प्रति उनले आक्रोश व्यक्त गर्दै प्रभु साहले यस्ता योजनालाई पुरा गर्नका लागि योगदान गर्ने प्रतिबद्धता व्यक्त गरे । मधेससंग विभेद, अत्याचार र सौताको व्यवहार सरकारले गरेको आरोप लगाउँदै उनले बिरगंजको बिकासका लागि आजपाले हरेक किसिमको सहयोग गर्न तयार रहेको बताए ।

बिरगंजको गौरवको रूपमा रहेको नारायणी रंगशालाको निरीक्षण पश्चात आजपा अध्यक्ष साहले सामाजिक सञ्जाल फेसबुकमा लेखेका छन्, ‘नारायणी रंगशालाको हाल बेहाल हेर्दा सरकारसंग केही प्रश्न गर्न मन लाग्यो । गौरवशाली इतिहास बोकेको यो रंगशालाप्रति विभेद किन ? रंगशालाको बिकास सरकारको प्राथमिकतामा किन परेन ? के यहाँको बालबालिकालाई खेलकुदको अधिकार छैन ? देश बदलावमा अग्रणी भुमिका खेलेको बिरगंजलाई यस्तो उजाड़ किन बनाउनु भो ? के बीरगंज प्रयोग गर्ने र फ्याक्ने ठाऊँ हो ? के कर तिर्ने बिरगंजले रिटर्न पाउने अधिकार राख्दैन ? सरकारै सरकार भएको देशमा बीरगंजको लागी सरकार बिहिनता किन ? अहिलेको २१ औ शताब्दीको लोकतान्त्रिक युगमा के यस्तो अत्याचार सहन सकिन्छ ? हेक्का राखनु चोरहरू, अब बिरगंज चुप लागेर बसदैन ।’

आरके श्रीवास्तव,रौतहट,२५ गते पुस ।
रौतहट । जिल्लाको गुजरा नगरपालिकाको दयालपुरमा ग्रामीण सडक धमाधम ढलान कार्य भइरहेको छ । चन्द्रनिगाहपुर जाने र नगरपालिकाको कार्यालय रहेको सिमराभवानीपुर लाई जोड्ने मुख्य ग्रामीण सडक अहिले पक्किरण भइरहँदा स्थानिय हर्षित भएका छन् ।

गुजरा नगरपालिका वडा नम्बर ९ दयालपुर स्थित रहेको दलित बस्ती भएर जाने सो सडकको ढलान कार्य अहिले अन्तिम चरणमा रहेको वडा अध्यक्ष प्रेम चौधरीले जानकारी गराएका हुन् ।

वडा स्तरीय योजना बाट जियालाल माझीको घरदेखि पुकार माझिको घरसम्म करिब ३ सय ८० मिटर लामो ढलान कार्य भइरहेको वडा चौधरीले बताएका हुन् । उक्त सडक निर्माण गर्न वडाको सेलिङ्ग बाट चालु आर्थिक वर्ष २०८१।०८२ मा ४० लाख बजेट विनियोजन गरिएको थियो । अहिले सोही बजेट बाट सडक ढलान भइहरेको छ ।

८ इन्च मोटाइ र ५ मिटर चौडाइ पिसिसि सडकको ढलान कार्य वडा अध्यक्ष चौधरीले उपभोक्ता समिति मार्फत गराइरहेका छन् । सडकमा ढलान गर्न सुरु गरेसँगै वडा अध्यक्ष चौधरी आफनै रोहबरमा गुणस्तरिय ढलान गराइ रहेका छन् ।

सडक ढलान भएसँगै हिलोका कारण आवतजावतमा भोग्नुपरेको सास्ती अन्त्य हुनुका साथै यातायात सञ्चालनमा सहज भएपछि स्थानीयवासीहरु खुशी भएका छन् । स्थानियहरुले भोग्दै आएको समस्याको मध्यनजर गरी नै वडामा सडक पक्किरणको कामलाइ प्राथमिकतामा राखेर काम गराइरहेको वडा अध्यक्ष चौधरीको भनाइ छ । आफनो वडामा करिब ९० प्रतिशत सडक ढलान र कालोपत्र गर्ने कार्य भइसकेको वडा चौधरीको दाबी छ । मुख्य सडकको केही भाग मात्रै बाँकि छ । त्यसलाइ पनि कालेपत्र अथवा ढलान गर्न पहल गरिरहेको उनी बताउँछन् ।

यसअघि सोही वडाको अमतवामा १० लाख र दयालपुरमा १० लाखको सडक ढलान कार्य गरिसकेको उनले बताएका छन् । वडा बाट अर्को सडक ढलान गर्ने योजना पनि बनाएको वडा चौधरीले बताए । वडालाई ५ वर्षभित्र हिलोमुक्त बनाउने अभियानअन्तर्गत धमाधम स्थानीय सडक निर्माण गर्ने कार्यलाई तीव्रता दिएको वडा अध्यक्ष प्रेम चौधरीले जानकारी दिनुभयो ।

सडक ढलान कार्यका उपभोक्ता समिति अध्यक्ष सुजित चौधरीले वडा अध्यक्ष चौधरीको पहलमा र वहाँकै बजेटमा दलित बस्तीका सडक ढलान भइरहेका छन् । जो एकदमै सराहनिय हो । सडक ढलान भएपछि वर्षात्को समय धेरै नै अप्ठ्यारो हुँदै आएको थियो । सो कठिनाइ अब हटने भएको छ ।

यता गुजरा नगरपालिकाका पूर्व वडा सदस्य बलिराम चौधरीले देशमा संघियता आएपछि मात्र सडक ढलान पक्किरणको काम हुन सम्भव भएको ठोकुवा गरे । स्थानिय सरकार नभएको भए यो सबै सम्भव थिएन् । उक्त ढलान कार्यमा समाजसेवी अनुठा चौधरी,नागेन्द्र माझी लगायतको स्थानियहरुले सहयोगी भूमिका खेलिरहेका छन् ।

फाेटाे फिचर

नूर आलम बादशाह, २४ गते पुस २०८१ । 

नेपाल प्रिमियर लिग (एनपीएल) प्रथम संस्करणका च्याम्पियन जनकपुर बोल्ट्सका खेलाडीहरूलाई आज पचरौतामा भव्‍य स्वागत तथा सम्मान सहित पचास पचास हजार नगद पुरस्कार प्रदान गरिएको छ ।

जनकपुर बोल्ट्सका क्याप्टेन समेत रहेका क्रिकेटर अनिल साह र सोही टीमका अर्का खेलाडी अरनिको यादवलाई पचरौता नगर प्रमुख जलन्धर सिंहले आज एक समारोहका बीच उक्त नगद राशी सहित दोसल्ला ओढाई सम्मान गरेका हुन्।

जीतको खुशीमा बुधबार पचरौताका जनप्रतिनिधि, नागरिक समाज, स्थानीय खेलप्रेमीहरुले एनपीएलको ट्रफी र खेलाडीलाई गाडीमा राखेर नगरपरिक्रमा गराउन विजयी यात्रा समेत निकालेका हुन् ।

विजय यात्रा कोतवालीको नहर चौकबाट सुरू भएर बेनौली चोक, बेनौली गाउँ हुँदै पालिका परिसरमा स्वागत तथा सम्मान कार्यक्रम गरी समापन गरिएको छ ।

सो अवरमा नगर प्रमुख सिंहले एनपीएलको प्रथम संस्करणमा ट्रफी हात पार्न सफल भएका जनकपुर बोल्टस टिमलाई बधाई र स्वागत गर्न पाउँदा आफू गौरवान्वित भएको बताए ।

‘विजेता टोलीलाई स्वागत गर्न पाउनु पचरौतावासीका लागि गर्वको कुरा हो’ उनले भने।

नेपाल प्रिमयर लिगले क्रिकेट खेलको विकासका साथै युवाहरुलाई प्रेरणा, राष्ट्रिय एकता तथा सकारात्मक बाटोमा हिड्ने प्रेरणा र उर्जा समेत प्रदान गरेको नगर प्रमुख सिंहको भनाइ छ ।

कार्यभार सम्हालेको आर्थिक बर्ष देखि नै पचरौता नगरका खेलाडीहरुलाई तालिम, प्रतियोगिता तथा खेल सामग्रीका लागि नगद राशी सहयोग गर्दै आइरहेको र अगामी दिनमा उक्त किसिमको सहयोग निरन्तर रहने प्रतिबद्धता पुनः दोहोरयाउनु भयो।

पचरौता पालिकाले एनपीएल विजेता जनकपुर बोल्ट्सका खेलाडीहरूलाई अभिनन्दन कार्यक्रम आयोजना गरेको थियो ।

पुस ६ गते शनिबार त्रिवि क्रिकेट मैदानमा सुदूरपश्चिम रोयल्सलाई ५ विकेटले हराउँदै जनकपुर बोल्ट्स च्यापियन्स बन्न सफल भएको हो।

खेलाडीहरुको स्वागत तथा सम्मानका लागि आयोजित कार्यक्रम वडा नम्बर ७ का वडा अध्यक्ष बनारसी बिनको अध्यक्षता तथा प्रमुख आतिथ्यता नगर प्रमुख जलन्धर सिंहको रहेको थियो भने विशिष्ट अतिथिमा प्रमुख प्रशासकीय अधिकृत गौरी साह, वडा नम्बर ५ का वडा अध्यक्ष तथा पालिका प्रवक्ता लक्ष्मी यादव, वडा नम्बर ३ का वडा अध्यक्ष धेनुक राउत कुर्मी, ६ का मकबुल मियाँ अन्सारी, ८ का प्रेम चौधरी, ९ का गगनदेव यादव, अतिथिमा शिक्षा संयोजक पण्डित त्रिपाठी, शिक्षा सहायक मुकेश कुमार सिंह, स्थानीय समाजसेवी भैया राम सहनी, विजय पटेल, कलामुद्दीन अन्सारी, भोला अन्सारी, अच्छेलाल प्रसाद यादव, प्रभु ठाकुर, नरेश प्रसाद कुर्मी, उमेश सिंह, प्रमोद सिंह, बिनोद पटेल, सियाराम मुखिया, सकल मुखिया, अवध किशोर प्रसाद यादव, पोषण हजरा, जवाहर साह रौनियार, सोनालाल साह, अमिन मियाँ अन्सारी, इम्तियाज अन्सारी, रोशन अली, जिना खातुन, जगरनाथ मुखिया बिन, शम्भु कुशवाहा, मुन्ना अन्सारी, गोकुल पण्डित, खेलाडीहरु बुधराम मुखिया, मनिर अन्सारी, अरविन्द अकेला, लालु, नगर प्रहरी, सुरक्षाकर्मी लगायत पत्रकारका साथै ठूलो संख्यामा सर्वसाधारण उपस्थित भएका थिए।
कार्यक्रम सन्चालन सबिन्दर सहनीले गरेका थिए।

बज्जिकाञ्चल संवाददाता,राैतहट,२४ गते पुस । 

राैतहट । रौतहटको माधवनारायण नगरपालिकाका मेयर बैजनाथ प्रसाद यादवले एक वडामा ३० वटा डिप बोरिङ जडान गरेका छन्।

किसानहरुलाई सहज रुपमा सिँचाइको सुविधा उपलब्ध गराउने उद्देश्यले मेयर यादवले माधवनारायण नगरपालिका -८ पिप्रा रजवडामा ३० जना किसानको खेतमा डिप बोरिङ जडान गरेका हुन्।

च्वाइस नेपालको सहयोगमा जडान भएको उक्त बोरिङहरुको मेयर यादवले उद्घाटन गरेका छन्।

मंगलवार अबेर साझ आयोजित एक कार्यक्रमका बीच माधव नारायण नगर प्रमुख बैजनाथ प्रसाद यादव र सहयोगी संस्था च्वाइस नेपालका कार्यकारी निर्देशक प्रतीक शर्मा दुवैजनाले संयुक्त रूपमा बोरिङको उद्घाटन गरेका थिए।

बागमती नदी पारी जडान भएको ३० वटा डिप बोरिङले करिव २ सय भन्दा बढी बिघा खेतमा सिँचाइ सुविधा पुर्‍याउने र यस परियोजनाबाट हजारौं किसान लाभान्वित हुने मेयर यादवले विश्वास व्यक्त गरेका छन्।

त्यस्तै डिप बोरिङ जडान भएको ठाउँमा गाउँ बस्ती नहुँदा रातिको समयमा निल गाई, स्याल, बँदेल लगाएतको जनावरको आक्रमण तथा वर्षा, हुरीबतास, चिसो, घाम पानी आदिबाट किसानलाई जोगाउन मेयर यादवले पाँच वटा किचन बाथरूम, शौचालय सहितको एक तले पक्की भवन समेत निर्माण कार्य थालेका छन्।

यो भवन निर्माण भएपछि नदिपारी खेतिबारी गर्न जाने किसानहरुलाई जनावर, चोर, डाँका र प्राकृतिक प्रकोपबाट जोगाउन ठूलो टेवा पुर्याउने उनले बताए।

किसानहरुलाई बस्न बागमती नदी पारी पक्की घर निर्माण गर्ने पहिलो मेयर बैजनाथ प्रसाद यादव हुन् । यो नयाँ कार्यको सुरुवात पनि हो । यस्तो काम अहिलेसम्म रौतहटका कुनै पनि जनप्रतिनिधिले गर्न सकेका छैनन्।

बोरिङ जडान भएपछि अब आफूहरुले चाहेका बेला नै बाली लगाउन पाइने र बालिबाट मनग्य आम्दानी लिन सक्ने भन्दै किसानहरुमा ठूलो आशा जागेको छ।

बोरिङ गाडिएपछि समयमै खेती गर्न प्रयाप्त पानीको व्यवस्था हुने छन् ।

बोरिङ सञ्चालनमा आएपछि सो क्षेत्रका किसानले पहिले हिउँदे र बर्खेबाली लगाउने गरेकोमा अब बाह्रैमास फरक खेती गर्न पाउनेछन् ।

माधवनारायण नगर प्रमुख यादवको प्रमुख आतिथ्य तथा वडा नं ८ का वडा अध्यक्ष योगेन्द्र प्रसाद कुशवाहाको अध्यक्षतामा भएको बोरिङ उद्घाटन कार्यक्रममा च्वाइस नेपालका कार्यकारी निर्देशक प्रतीक शर्मा, फिल्ड संयोजक जिसी, नगर उप प्रमुख निर्मला देवी, माधव नारायण नगरपालिकाका प्रमुख प्रशासकीय अधिकृत श्रीदेव यादव, इन्जिनियर नागेन्द्र यादव, कृषि शाखा प्रमुख अर्जुन दास, नेपाली कांग्रेसका युवा नेता नितेश कुमार गुप्ता, किसानहरू लगाएतका व्यक्तिहरूको उपस्थिति रहेको थियो।

प्रेमचन्द्र झा,राैतहट,२४ गते पुस २०८१ । 

राैतहट । माधव नारायण नगरपालिकाका नगर प्रमुख वैधनाथ प्रसाद यादवको कुसल नेतृत्वका कारण प्रधानाध्यापक विरुद्धको आन्दोलन विधार्थीहरुले स्थगित गरेका छन् । देवी माध्यमिक विद्यालय सखुअवाका विद्यार्थीहरूले प्रधानाध्यापक लखिन्द्र यादवलाई सरुवा गर्नुपर्ने मांग गर्दै आएको तीन दिन देखिको आन्दोलन स्थगित गरेको हो ।
सो आन्दोलन नगर प्रमुख यादवको आग्रहमा बुधवार देखी विद्यार्थी हरूले स्थगित गरेका छन् ।
सो समस्याको समधान माधव नारायण नगरपालिका नगर प्रमुख यादवले विद्यार्थीहरु बिच बसेर वार्ता गरी समस्यालाई समयमै हल गरि दिएका छन्। प्रधानाध्यापक यादवले गरेको भ्रष्टाचार लगातयका अनियमितता विरुद्ध कार्यवाही स्वरुप सरुवाको माग गर्दै आन्दोलित भएका थिए ।

बज्जिकाञ्चल संवाददाता,बारा,२४ गते पुस २०८१ । बारा । बारा जल्लाकाे बरियारपुरमा बिभिन्न वित्तिय संस्थाहरू रहेका छन् तर लघुउद्यमीहरूकाे पहिलाे राेजाइमा भने एनएमिव लघुवित्त रहेकाे छ । एनएमबी लघुबित्त बित्तीय संस्था लि. को शाखा कार्यालय बरियारपुर बाराले लघुउद्यमी ग्राहक केन्द्रीत विभिन्न कार्यक्रम संचालन गरे पश्चात ग्राहकहरूकाे आर्कषण लघुवित्तमा बढेकाे हाे ।

जिल्लाको महागढीमाई नगरपालिका वडा नं.८, का सदस्यहरू बिचमा संस्थाले पौष महिनाभर बिभिन्न कार्यक्रमहरू गरेकाे छ । बरियारपुर शाखाले अन्तरक्रिया तथा बित्तिय साक्षरता मार्फत चेतनामूलक कार्यक्रमको गरेको हाे ।

कर्जाकाे आवश्यकता, बचतको प्रकार, बचत तथा कर्जाको फाईदा र बेफाईदा, कर्जा लिदा ध्यानदिनु पर्ने कुराहरु, कर्जा सदुपयोगिता, आफूले गरेको व्यवसायको बिमा र त्यसको फाईदा र बेफाईदा, व्यवसायको छनोटले आफू र आफ्नो परिवारलाई हुने लाभ, पासबुकको प्रयोग र यसको फाईदा, जम्मा भैचरको महत्व, केन्द्र समुह र केन्द्र प्रमुखको भुमिका तथा केन्द्र संचालन लगाएतकाे बिषयमा ग्राहकहरूलाइ सचेतनामूलक कार्यक्रम गरिएकाे र कार्यक्रमले ग्राहकमा वित्तिय चेतना बढेकाे बरियारपुर शाखाको लेखापाल धर्मेन्द्र कुमार साहले जानकारी दिनुभयाे ।

लघुवित्तकाे कार्यक्रमले अाफुहरूमा ऋृणाकाे सदुपयाेग कसरी गर्ने भन्न्र कुराकाे वारेमा थाहा भएकाे र गाँउमा एनएमवि लघुवित्तकाे सेवा आए पश्चात बिना धिताे ऋृण लिएर ब्यवसाय गर्दा गाँउबासीमा खुसी छाएकाे कार्यक्रममा सहभागी स्थानिय वीरेन्द्र राउत बरैले बताउनुभयाे ।

कार्यक्रमकाे ब्यवस्थापनमा शाखाका कर्मचारीहरू राजीव कुमार ठाकुर र विजय कुमार चौधरीले सहयाेग गर्नुभएकाे छ । लघुवित्तले यस अघि जिल्लाको कलैया, परवानीपुर लगाएतका स्थानमा अन्तरक्रिया कार्यक्रम सम्पन्न गरिसकेको छ ।

बरियारपुर शाखाले हाल सम्म आठ सय भन्दा बढि घरधुरीलाई सेवा दिदै आएको यस लघुवित्तको बरियारपुर शाखाले जिल्लाको महागढीमाई नगरपालिका र यसकाे वरपर कार्य क्षेत्र बनाएर कार्य गर्दै आएको छ । पोखरा महानगरपालिका वडा नं.८ न्यूरोड कास्कीमा केन्द्रीय कार्यालय रहेको यस लघुवित्तले ७ वटै प्रदेशमा ७ वटा प्रादेशिक कार्यालय स्थापनागरि ६८ जिल्लामा १४८ वटा शाखा विस्तार गरी करिब एक लाख तीस हजार विपन्न घरपरिवारलाई लघुवित्तले सेवा प्रदान गदै आएको छ ।

काठमाडौं, २०८१ पुस २४ गते ।

दक्ष युवाहरु स्वदेशमै बसेर काम गर्न अवसर र संभावनाहरु प्रसस्त रहेको नेपाल इन्जिनियरिङ काउन्सिलका अध्यक्ष प्रा.डा. पदम बहादुर शाहीले बताउनु भएको छ । स्वदेशमा प्राविधिक जनशक्तिहरुको माग दिनप्रतिदिन बढिरहेको बताउँदै काउन्सिल अध्यक्ष शाहीले हरेक क्षेत्रमा मेहनत र संघर्ष गर्ने युवाहरुले सफलता प्राप्त गर्ने बताउनु भयो ।

मुनाफारहित सामाजिक शैक्षिक संस्थाका रुपमा सञ्चालित नेपाल इन्जिनियरिङ कलेज (नेक) बाट सिभिल तथा सिभिल एण्ड रुरल इन्जिनियरिङ उत्तिर्ण १९ औं ब्याचका विद्यार्थीहरुलाई विदाई गर्दै प्रा.डा. शाहीले प्राविधिक जनशक्ति खासगरी इन्जिनियरहरुले स्वदेशमै राम्रा अवसरहरु पाउने जिकीर गर्नुभयो । ‘विगतमा भन्दा अहिले इन्जिनियरिङ क्षेत्रमा स्कोप छ । तर, तपाईहरुले कलेजमा अध्ययन गरेको भन्दा बढ्ता मेहनत व्यवसायिक जीवनमा गर्नुपर्छ ।’ इन्जिनियरिङ अध्ययन गर्दैगर्दा असाइनमेन्ट सब्मीट गर्नु भयो, रिपोर्ट बनाउनु भयो भाइबा गर्नुभयो । हामीले पनि त्यही गरेर आएका हौं । तर, तपाईको अबको जीवन भनेको नम्बरमा मुल्यांकन हुँदैन अब तपाईको जीवन एस र नोट हो । कि तपाई पास हुनुहुन्छ कि फेल हुनुहुन्छ ।’ सफल हुनको लागि व्यवसायिक जीवनमा प्रत्येक पल परीक्षा दिइरहनु पर्ने भन्दै प्रा.डा. शाहीले भन्नुभयो ।

आफ्लाई सफल बनाउन समाज र समय अनुसार व्यवसायिक रुपमा ज्ञान अनुसार सीप हुनुपर्ने भन्दै प्रा.डा. शाहीले विश्वविद्यालयको अध्ययनले ज्ञान दिन सकेपनि सीप नदिएको बताउनु भयो । ‘विश्वको कुनैपनि विश्वविद्यालयले ज्ञान दिन्छ सीप दिँदैन, सीप सिक्नका लागि हरेक दिन आफ्नो फिल्डमा पढ्नु पर्छ । नयाँ कुरा जान्नैपर्छ ।’ व्यवसायिक जीवनमा इमान्दारिता, नैतिकता र लगनशीलता अपरिहार्य भएको भन्दै उहाँले देश र समाज बनाउन दक्ष युवा जनशक्तिको महत्वपूर्ण भूमिका रहने बताउनु भयो ।

कार्यक्रमका विशिष्ट अतिथी नेपाल सरकारका पूर्वसचिब तथा नेकका पुर्वप्राध्यापक मनिराम गेलालले नेपालको विकासमा इन्जिनियरहरुको भुमिका रहेको भएपनि सरकारी सेवामा पर्याप्त इन्जिनियरहरु नरहेको बताउनु भयो । नयाँ जनशक्तिलाई अनुभवको अभाव भन्दै अवसर नदिँदा उनीहरु अवसरको खोजीमा बाहिरिँदै गएकोमा चिन्ता व्यक्त गर्दै उहाँले नयाँलाई पनि अवसर दिइनुपर्ने बताउनु भयो । ‘हाम्रो पोलिसीमा कमजोरी छ । कन्सल्टिङ सर्भिसेसका लागि जनशक्ति माग गर्दा पनि १५, २० वर्ष सम्बन्धीत विषयमा काम गरेको अनुभव चाहिने मापदण्ड राख्छौं । नयाँ गोल्डमेडलिस्ट र टपरहरु भने बजारमा काम खोज्दै बस्नुपरेको अवस्था छ । यसलाई चेञ्ज गर्न आवश्यक छ ।’ सुखी नेपाली समुन्नत नेपाल निर्माणका लागि दक्ष प्राविधिक जनशक्ति नै चाहिने भएकाले नयाँलाई अवसर दिइनुपर्ने उहाँको जोड छ ।

गेलालले कामको मुल्यांकन गर्नेहरुको संख्या बढि र काम गर्नेहरुको संख्या कम हुँदा देशलाई घाटा भइरहेको बताउनु भयो । पूर्वाधार निर्माणका क्षेत्रमा बढी आरोपहरु लाग्ने भएकाले पेशागत मर्यादा र इमान्दारिता कायम गर्दै करियर डेभलपमेन्टमा अगाडी बढ्न नव इन्जिनियरहरुलाई शुभकामना दिनुभयो । साथै, नेपालमै केही गर्ने वातावरण बन्दै गइरहेकोले आशावादी भएर मेहनत गर्न सुझाब दिनुभयो ।

कलेजका प्राचार्य दुर्गाप्रसाद भण्डारीले कलेजबाट उच्च शिक्षा हासिल गरेका विद्यार्थीहरुले व्यवसायिक क्षेत्रमा प्राप्त गर्ने सफलता नै कलेजको सफलता भएको बताउँदै व्यवसायिक क्षेत्रमा मर्यादा र अनुशासन कायम गरेर अगाडी बढ्न अनुरोध गर्नुभयो । ‘तपाईहरु कलेजको ब्राण्ड एम्बेष्डर हो । तपाईहरुले प्राप्त गर्ने सफलता नै हाम्रो सफलता हो । जुनसुकै पदमा रहेर काम गर्दा म नेपाल कलेजको विद्यार्थी हुँ भन्ने नविर्सनु होला ।’ समाज र राष्ट्रसँग जोडिएर काम गर्नुपर्ने भएकाले व्यवसायिक जीवनमा पेशागत इमान्दारिता, नैतिकता र मर्यादा महत्वपूर्ण रहेको भन्दै प्राचार्य भण्डारीले भन्नुभयो ।

कलेज सञ्चालक समिति सदस्य समेत रहनु भएकी प्राध्यापक सावित्री त्रिपाठीले ४ वर्षको अध्ययन समाप्त गरेर ब्यवसायिक जीवनमा प्रवेश गर्दा नैतिकवान भएर अगाडी बढ्नुपर्ने बताउनु भयो । व्यवसायिक जीवनमा नैतिकता र इमान्दारिता ठूलो कुरा भएको जिकीर गर्दै ४ वर्षको पढाईले मात्र अगाडी बढ्न नसकिने भएकोले त्यसपछिको उच्च शिक्षा हासिल गर्न तथा व्यवसायिक जीवनमा हरेक दिन केही न केही सिक्नुपर्ने बताउनु भयो ।

यस्तै कलेजका सहायक प्राचार्य मोहनध्वज केसीले व्यवसायिक जीवनमा प्रवेश गर्ने विद्यार्थीहरुलाई शुभकामना दिँदै कलेजले आउँदा दिनहरुमा पनि जस्तोसुकै सहयोग गर्न तयार रहेको बताउनु भयो । उहाँले इमान्दार र नैतिकवान भएर अगाडी बढ्दा सफलता हासिल गर्न सकिने जिकीर गर्नुभयो ।

विदाई कार्यक्रममा नव इन्जिनियर विद्यार्थीहरुले ४ वर्षे स्नातक तहको अध्ययनका क्रममा विताएका पलहरुको स्मरण गर्दै प्राध्यापकहरु र कलेज परिवारलाई धन्यवाद दिएका थिए । कार्यक्रममा विद्यार्थीहरुलाई विभिन्न अवार्ड र पुरस्कारबाट सम्मानीत गरिएको थियो । चेयरमेयर गोल्ड अवार्ड राजेन्द्र पौडेल र शीतल पाण्डेले प्राप्त गर्दा प्रोग्राम टपर अवार्ड भने राजेन्द्र पौडेल र शीतल पाण्डेले संयुक्त रुपमा र बिबेक भण्डारीले प्राप्त गरेका थिए । कार्यक्रममा विषयगत अवार्डहरु पनि प्रदान गरिएको थियो ।