काठमाडौं, १६ कात्तिक ।
चालु साताको अन्तिम कारोबार दिन शुक्रबार प्रि–ओपन सेसनमा नेप्से परिसूचक सामान्य अंक घटेको छ ।
प्रि–ओपन सेसनमा ०.२९ अंक घटेर १८५८.२६ विन्दुमा झरेको छ। सो सेसनमा सेन्सेटिभ इण्डेक्स भने ०.०१ अंक घटेको छ।
यो सेसनमा ६ स्टकको ५० हजार ९९६ रुपैयाँ बराबरको १७५ कित्ता शेयर कारोबार भएको छ। जसमध्ये २ स्टकको मूल्य सो सेसनमा बढेको छ भने ६ स्टकको मूल्य घटेको छ।
काठमाडौं, १६ कात्तिक ।
काठमाडौंमा जारी टी–२० विश्वकप एसिया छनोट खेलमा ओमानले नेपालसामु १४६ रनको लक्ष्य दिएको छ ।
बिहीबार कीर्तिपुरस्थित त्रिवि क्रिकेट मैदानमा टस हारेर ब्याटिङको निम्तो पाएको ओमानले निर्धारित २० ओभरमा ९ विकेट गुमाएर १४५ रन बनाउन सक्यो ।
नेपालका करण केसीले ३ विकेट लिए भने सोमपाल कामी र सन्दीप लामिछानेले २÷२ विकेट हात पारे । गुल्सन झा र अविनाश बोहोराको नाममा एक÷एक विकेट रह्यो ।
काठमाडौं, १६ कात्तिक ।
सरकारले संघीय संसदको अधिवेशन अन्त्य गर्ने निर्णय गरेको छ ।
बिहीबार बसेको मन्त्रिपरिषद्को बैठकले संघीय संसद्को अधिवेशन बिहीबार मध्यरातिदेखि अन्त्य गर्ने निर्णय गरेको हो ।
काठमाडौं, १६ कार्तिक ।
संघीय संसदको चालु अधिवेशन आजदेखि अन्त्य गरिने भएको छ ।
संसदको जारी अधिवेशन अन्त्य गर्ने निर्णय लिनका लागि भर्खरै मन्त्रीपरिषद् बैठक सुरू भएको छ ।
प्रधानमन्त्री तथा मन्त्रिपरिषद् कार्यालय सिंहदरबारमा जारी बैठकमा संसद अधिवेसन अन्त्य गर्ने प्रमुख अजेन्डामा छलफल भईरहेको छ ।
गत बुधबार प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा र एमाले अध्यक्ष केपी शर्मा ओलीबीच भएको छलफलमा बिहिवार देखि संसदको अधिवेशन अन्त्य गर्ने सहमति भएको थियो।
काठमाडौं, १६ कार्तिक ।
नेपालले ओमानको दुई बिकेट लिन सफल भएको छ ।
त्रिभुवन बिश्वबिद्यालय, किर्तिपुरमा जारी खेलमा नेपालले दुई बिकेट लिएर दोस्रो सफलता हासिल गरेको हो ।
आइसिसी टी– २० विश्वकप एसिया क्षेत्रको फाइनल छनोटअन्तर्गत त्रिवि क्रिकेट मैदानमा जारी ओमानविरुद्धको खेलमा नेपालले खेल सुरु भएको आधा घन्टा भित्रमा नै दुई बिकेट लिन सफल भएको हो ।
जसअनुसार सोमपाल कामीले नेपालका लागि दोस्रो विकेट लिएका हुन् भने पहिलो बिकेट करन केसीले लिएका थिए ।
टस हारेर पहिला ब्याटिङ थालेको ओमानले १ ओभरमा १ विकेट गुमाउँदै ८ रन बनाएको थियाे भने ओमानले ४ ओभरमा २ विकेट गुमाउँदै २५ रन बनाएकाे छ। खेल जारी छ ।
नयाँदिल्ली, १६ कार्तिक ।
भारतको सर्वोच्च अदालतले चुनावी बन्ड अर्थात ‘इलेक्टोरल बन्ड’ योजनाको वैधतासँग सम्बन्धित मुद्दाको सुनुवाइ गरिरहेको छ।
यो मुद्दा ८ वर्षदेखि अदालतमा विचाराधीन छ । योजनालाई चुनौती दिने निवेदनमा दाताको पहिचान गोप्य राख्ने विषयमा प्रश्न उठाइएको छ । यसले कालो धनलाई प्रोत्साहन गर्न सक्छ भनेर याचिकाकर्ताहरू चिन्तित रहेका छन्। यो योजना ठूला व्यवसायीलाई आफ्नो परिचय नखुलाई पैसा दान गर्न सघाउने गरी डिजाइन गरिएको भन्ने आरोप पनि लागिरहेको छ ।
नोभेम्बर १, २०२३ मा प्रधानन्यायाधीश डीवाई चन्द्रचुडको पाँच सदस्यीय इजलासले सुनुवाइ गरेको थियो। यसै क्रममा प्रधानन्यायाधीश चन्द्रचुडले प्रश्न गरेका कि सत्तामा रहेको दलले किन बढी चन्दा लिन्छ ? यसबारे सरकारका तर्फबाट महान्यायाधिवक्ता तुषार मेहताले दाताले जहिले पनि पार्टीको क्षमताअनुसार चन्दा दिने जवाफ दिएका छन् । पाँच वर्षमा कुन दलले चुनावी ऋणपत्र मार्फत कति चन्दा प्राप्त गर्यो ? यो थाहा पाउनुहोस् ।
भाजपाको ५७ प्रतिशत इलेक्टोरल बन्ड
राजनीतिक दलहरूले निर्वाचन आयोगलाई दिएको जानकारीअनुसार विगत पाँच वर्षमा राजनीतिक दलहरूलाई चुनावी बन्डमार्फत करिब १० हजार करोड रुपैयाँ दिइएको थियो, जसमध्ये आधाभन्दा बढी रकम भारतीय जनता पार्टी (भाजपा) मा गएको थियो। इलेक्टोरल बन्ड मार्फत कांग्रेसले मात्र ९५२.२९ करोड रुपैयाँ पाएको छ । यो डाटा २०१७–२०१८ र २०२१– २०२२को लागि हो।
द इन्डियन एक्सप्रेसका अनुसार २०१७–२०१८ र २०२१–२०२२ मा स्टेट बैंक अफ इन्डियाले कुल ९२०८.२३ करोड रुपैयाँ बराबरको चुनावी बन्डहरू बेचेको जनाएको छ। बीजेपीले चुनावी बन्ड मार्फत कुल ५२७१.५७ करोड रुपैयाँ प्राप्त गरेको छ। योसँगै कांग्रेसले ९५२.९ करोड रुपैयाँ चन्दा प्राप्त गरेको छ ।
लामो समयदेखि राज्यमा सत्तामा रहेका टीएमसी, बीजेडी र डीएमके जस्ता राजनीतिक दलहरूले पनि चुनावी बन्डमार्फत ठूलो रकम प्राप्त गरेका छन्। ममता बनर्जीको तृणमूल कांग्रेसले ७६७.८८ करोड, ओडिशाका मुख्यमन्त्री नवीन पटनायकको पार्टी बिजु जनता दलले ६२२ करोड र तमिलनाडुका मुख्यमन्त्री एमके स्टालिनको द्रविड मुनेत्र कझगमले ४३१ करोड रुपैयाँको कोष पाएको छ।
उही समयमा, दिल्लीका मुख्यमन्त्री अरविन्द केजरीवालको आम आदमी पार्टी (आप) ले ४८.८३ करोड र नितिश कुमारको जनता दल युनाइटेड (जेडीयू)ले २४.४० करोड रुपैयाँ चुनावी बन्डमार्फत प्राप्त गरेको छ। यसबाहेक, शरद पवारको राष्ट्रवादी कांग्रेस पार्टी (एनसीपी) ले ५१.४ करोड रुपैयाँ कोष प्राप्त गरेको जनाईएको ।
चुनावी बन्ड योजना कानुनी रूपमा वर्ष २०१८ वाट लागू भएको थियो। यो योजना कार्यान्वयन गर्दा राजनीतिक दलको कोषमा पारदर्शिता ल्याउने सरकारको तर्क थियो । चुनावी बन्डहरू राजनीतिक दलहरूलाई आर्थिक सहयोग गर्ने एउटा आर्थिक माध्यम हो। प्रत्येक वर्ष, जनवरी, अप्रिल, जुलाई र अक्टोबर महिनाहरूमा १० दिनको अवधिको लागि भारतीय स्टेट बैंकका चयन गरिएका शाखाहरूबाट चुनावी बन्डहरू बेचिन्छन्।
कुनै पनि नागरिकले आफ्नो इच्छा अनुसार ऋणपत्र किन्न र कुनै पनि पार्टीलाई दिन सक्छन। तर, उक्त नागरिकको परिचय भने गोप्य राखिने गरिएको छ । यो ऋणपत्र खरिद गरेको १५ दिन भित्र प्रयोग गरिसक्नु पर्नेछ । विभिन्न मूल्यका चुनावी बन्डहरू उपलब्ध छन्। तिनीहरूको मूल्य १ हजार, दश हजार, एक लाख, १० र १ करोड भारतीय रूपैयाँ रहेको हुन्छ ।
मुम्बइ, १६ कार्तिक ।
बलिउडका किंग खान अर्थात् शाहरुख खान आजबाट ५८ वर्षका भएका छन् ।
अभिनेताको जन्मदिन उनका फ्यानका लागि पर्वभन्दा कम हुँदैन । हरेक पटक झै यस पटक पनि बलिउडका बादशाहका हजारौं फ्यान सुपरस्टारको एक झलक पाउन र उनलाई जन्मदिनको शुभकामना दिन मन्नतबाहिर ठूलो संख्यामा जम्मा भएका छन् ।
किंग खान पनि गए राति आफ्नो घरको बालकनीमा आएर फ्यानहरुलाई बधाई तथा जन्मदिनको शुभकामना दिएकोमा धन्यवाद दिएका छन्।
सामाजिक सञ्जालमा भाइरल भइरहेको भिडियोमा मन्नतको गेटबाहिर फ्यानहरूको लाइन देख्न सकिन्छ । उनीहरुमध्ये कोही फोनबाट तस्विर र भिडियो खिचिरहेको देखिएका थिए भने कसैको हातमा किङ खानको पोस्टर थियो ।
काठमाडौं, १६ कार्तिक ।
नेपालले ओमानविरुद्ध पहिले बलिङ गर्ने भएको छ ।
आईसीसी टी–२० विश्वकप एसिया क्षेत्रको फाइनल छनोटमा नेपालले पहिलो बलिङ गर्ने भएको हो ।
त्रिभुवन विश्वबिधालय, क्रिकेट मैदान किर्तिपुरमा भर्खरै सुरू भएको खेलमा नेपालले टस जितेर बलिङ गर्ने निर्णय लिएको हो ।
सो खेल केही बेरमा नै अर्थात ९ बजेबाट सुरु हुदैँछ ।
यो खेलले समूह विजेता र उप विजेता टुंगो लगाउने छ । नेपाल समुह एमा रहेको छ ।
बिशाल बस्ने,महाेत्तरी, १६ कात्तिक ।
प्याट्रोलिङ्गको क्रममा बर्दिवासमा प्रहरीले भेटाएको ९ लाख रुपैया जिम्मा लगाईएको छ ।
अनुसन्धानको क्रममा उक्त पैसा महतो किराना पशलका संचालक जगदिश महतोको एकिन भएपछी महतोलाई हस्तान्तरण गरिएको हो ।
उधोग बाणिज्य संघ बर्दिवासका अध्यक्ष बिष्णु खडका, व्यवसायीहरु गुन्ज कार्की, ज्ञान बहादुर राउत, पत्रकार लगायतको रोहवरमा महतोलाई हस्तान्तरण गरिएको प्रहरीले जनाएको छ ।
कालो झोलाभित्र रहेको ९ लाख ५ सय ६२ रुपैया महतोलाई जिम्मा लगाइएको इलाका प्रहरी कार्यालयका प्रमुख विजय यादवले जानकारी दिए ।
कसरी फेला परेको थियो ?
गत ३ असोजको राती इलाका प्रहरी कार्यालय गौरिडाडाको प्रहरी विट भोला वसन्त चोकवाट प्रहरी जवान अजय मण्डल प्याट्रोलिङ्ग गरिरहेका थिए । प्याट्रोलिङ्गको क्रममा ५० मिटर पर महतो किराना पशल नजिक पुगेपछि उनले एउटा कालो झोला देखे ।
झोलालाई आफैले बोकेको लौरोले यताउता चलाए । खासै संकास्पद नभएको अनुमान लगाएपछी सोही लौरोले ताने अनि खोलेर हेरे । खाेलेर हेरेका मात्र थिए, झोलाभरी पैसा नै पैसा देखेपछी उनी झसङ्ग भए । तत्काल प्रहरी बिटका इन्चार्ज असई मनसुरी गदिलाई जानकारी गराए । गदिले इलाका प्रहरी कार्यालयका प्रमुख विजय यादवलाई जानकारी गराए ।
यादवले केही स्थानियहरुको रोहवरमा पैसा गन्नु र गनेको पैसाको भिडियो पनि बनाउन निर्देशन दिए । गन्ने क्रममा महतो किराना पसलको केही विलहरु पनि भेटिए । पैसा गनिसक्दा जम्मा ९ लाख ५ सय ६२ रुपैया रहेको एकिन भयो । भोलीपल्ट बिहान ९ लाख भेटाएको बिषयमा निक्कै खैलावैला भयो । महतो किराना पसलको केही आधारहरु देखिए पछि स्थानियहरुले महतोलाई पनि जानकारी दिए ।
हप्तादिनसम्म महतोबाहेक दावी गर्न नआएपछी प्रहरीले उनकाे पैसा भएको निष्कर्ष निकाल्दै सोमवार पैसा जिम्मा लगाएको हो ।
महतो भन्छन : प्रहरी मेरा लागी भगवान जस्तै बने
पैसा हराएको थाहा पाएदेखी निक्कै चिन्तित बनेका महतोले प्रहरीको इमान्दारिता माथी नतमस्तक भएको वताए ।
`व्यापार भएको पैसा र अन्य पैसा भोलिपल्ट बैंकमा राख्ने भनेर स्टाफलाई भनेको थिए, झोला त बिर्सेर बाहिर नै छाडेछु,´ उन्ले भने ।
पैसा यदि प्रहरीले बाहेक अरुले भेटाएको भए भेटन निक्कै मुस्किल पर्ने बताउदै उनले यो खुसियालीमा प्रहरी विट तथा केही भौतिक संरचना बनाईदिने घोषणा गरेका छन । २५ हजार वरावरको प्रहरीको लागि संरचना बनाईदिने महतोले वताए ।
ब्यापार मन्दीको यो समयमा त्यति ठुलो रकम फेला पार्ने प्रहरी जवान मण्डललाई उनले धन्यवादसमेत दिएका छन् । प्रहरीले सर्वसाधारणको साथी मात्र हैन्र, गतिलो भरोसा हो भन्ने बिषयलाई प्रहरी जवानले देखाएको जिम्मेवारीप्रतिको इमान्दारिताले प्रमाणित गरेको स्थानियहरुको तर्क छ । न्युज कारखाना
भक्तपुर, १६ कार्तिक ।
भक्तपुरका इटा उद्योगीहरुले सरकारसँग कर्जाको किस्ता र ब्याँज बुझाउने अवधि बृद्धिको माग राखेका छन् ।
भक्तपुरका प्रमुख जिल्ला अधिकारीमार्फत नेपाल सरकार अर्थ मन्त्रालय सिंहदरवार काठमाडौंसमक्ष उनीहरुले उक्त माग राखेका हुन् । त्यसका लागि उनीहरुले बुधबार भक्तपुरका प्रमुख जिल्ला अधिकारी रोशनीकुमारी श्रेष्ठलाई ज्ञापनपत्र बुझाएका हुन् ।
भौतिक संरचना निर्माणको लागि आबश्यक सामग्रीहरुमध्ये ईटा प्रमुख वस्तुमा पर्दछ, ज्ञापनपत्रमा भनिएको छ, देशभर उत्पादित ईटाले यसको माग परिपूर्ति गर्दै आएको छ । यसले ईटा आयात गर्नुपर्ने अवस्था रहेको छैन ।
ईटा उद्योग सुख्खा याममा संचालन हुने र गरीवीको रेखामुनी रहेका जनताहरुलाई रोजगार दिने खुला आकाश मुनी सञ्चालन हुने मौसमी उद्योग भएको भन्दै यस उद्योग सञ्चालनको समयमा बेमौसमी वर्षाले ठूलो परिमाणमा काँचो ईटा नष्ट हुन गइ लगानी डुब्न जाने र कामदारहरुलाई पेश्की बाँड्नु पर्ने भएकोले लगानी जोखिम उद्योगको रुपमा पनि लिइने उनीहरुको भनाई छ ।
२०७६ सालको कोभिड १९ संक्रमणको समयदेखि नै ईटा उद्योग संचालनको अवस्था दयनीय रहेको, २०७७ सालमा पनि काभेडिको संक्रमणको अवस्था यथावत जस्तै रहेकोले सो बर्ष पनि पर्याप्त कामदारहरु नआएको उनीहरुको जानकारी गराए । यसले भक्तपुर जिल्लामा संचालित ईटा उद्योगहरु पूर्ण रुपमा बन्द रहेको उनीहरुले जनाए ।
‘आ.व. २०७८-७९ र २०७९-८० सम्म पनि जिल्लामा रहेका ईटा उद्योगहरुमध्ये ६०-७० प्रतिशत मात्र ईटा उद्योगहरु संचालनमा आएका र त्यसरी संचालित ईटा उद्योगहरुले पनि ५०-६० प्रतिशत अर्थात् २-३ राउण्ड मात्र ईटा उत्पादन गरी उद्योग बन्द गर्नुपरेको थियो,’ ज्ञापनपत्रमा भनिएको छ, यसरी ईटा उद्योगहरु संचालनको संख्यामा ¥हास आउनु र ईटा उद्योग संचालनमा नैराश्यता छाउनुमा कोइलाको मूल्यबृद्धि हुनु, कोइला खरिद गर्दा अग्रीम रकम पठाउनुपर्ने प्रावधान हो ।
यसले गर्दा गुणस्त्तरिय कोइला आपूर्ति नभएको र उद्योगीहरुमा वित्तीय संकटका कारण बिषम परिस्थिति सृजना हुन गएकोले यस आर्थिक संकटको अवस्थालाई मनन गरी ईटा उद्योगीहरुलाई पर्न गएको वित्तीय संकटलाई सम्वोधनको लागि पहल हुन मन्त्री समक्ष हार्दिक अनुरोध गरिएको छ । बैंक तथा वित्तीय संस्थाहरुवाट ऋण लगानी, पुर्नकर्जा लगानी हुन नसकेकोले उद्योगी व्यवसायी एवम् आम सर्वसाधारणले सहज तरिकाले कर्जा पाउन नसक्दा र विगतको कोभिड महामारीको असर तथा रसिया युक्रेन युद्धका कारणले व्यापार व्यवसायमा हास आउँदा भौतिक संरचना निर्माणको गति प्राय ठप्प हुन गइ निर्माण सामग्रीहरुको माग न्यून अवस्थामा रहेकोले विगत २-३ वर्ष अगाडिबाट उत्पादित ईटा समेत विक्रीवितरण हुन नसकी उद्योग परिसरमा नै ठूलो परिमाणमा ईटा स्टक रहंदा ईटा उद्योगी व्यवसायीहरुमा चरम वित्तीय संकट सृजना भएको उनीहरुले बताए । यस्तो अवस्थामा उद्योगीहरुले वैंक तथा वित्तीय संस्थावाट लिएको ऋणको किस्ता र व्याज तोकिएको भाखामा नै बुझाउन नसकेको यथार्थता रहेको पीडा उनीहरुले पोखेका छन् ।
एकातर्फ निर्माण कार्य गरे वापत व्यवसायीहरुले समयमा नै भुक्तानी पाउन नसक्दा यसको प्रत्यक्ष असर ईटा उद्योगहरुमा पर्न गएको छ भने अर्कोतर्फ नेपाल सरकारले आ.व. २०७७÷७८ र २०७८÷७९ मा पूंजीगत शीर्षकमा एकदमै न्यून रकम खर्च गरेको कारण भौतिक निर्माण कार्यले गति लिन नसक्दा अपेक्षाकृत रुपमा ईटा विक्री वितरण हुन नसकी ईटा उद्योगहरुमा पूजीँ अभाव भएको भनाई उनीहरुको थियो । आगामी दिनमा उद्योग संचालन गर्नसक्ने सामथ्र्य नै नभएर ईटा उद्योगीहरु पानी विनाको माछा झैं छटपटाइरहेका छन्, उनीहरुको सामूहिक भनाई थियो । हालका दिनमा उद्योग व्यवसायहरु आर्थिक संकटको चपेटाले तहस नहस भइरहेको उनीहरुले बताए । यस प्रकारको गंभिर आर्थिक संकटवाट ईटा उद्योगहरु पनि अछुतो रहेका छैनन्, उनीहरुले भने, जिल्लामा संचालित ईटा उद्योगहरुमाथि मडारिरहेको आर्थिक संकटको कालो वादल हटाउन मन्त्रीज्यूबाट पहल हुनेछ भन्ने विश्वास लिएका छौं ।
ऋण उपलव्ध गराउने वित्तीय संस्थाहरुले ईटा उद्योगीहरुले लिएको ऋणको किस्ता र व्याज बुझाउन ताकेता गर्दा भाखाभित्र साँवा र व्याँजको किस्ता बुझाउन नसक्दा धितो सुरक्षण वापत बैंक तथा वित्तीय संस्थालाई दिएको जेथाजमानी (घरजग्गा) लिलाम विक्रीको प्रक्रियालाई अगाडि वढाउंदै उद्योगीहरुको उठिबास गराउने काम भैरहेको उनीहरुको भनाई छ । यस संकटपूर्ण अवस्थाको गम्भीर्यतालाई हृदयंगम गरी तत्कालको लागि बैंकको व्याजदरलाई एकल अंक (सिंगल डिजिट) मा राखी ईटा उद्योगीहरुले लिइरहेको कर्जाको साँवा र व्याँजको किस्ता बुझाउने अवधी २०८२ साल आषाढ मसान्तसम्म कायम गर्ने गरी ईटा उद्योगीहरुको निर्विकल्पीय माग कार्यान्वयन गर्ने गराउने व्यवस्थाको लागि उनीहरुले अनुरोध गरे । ज्ञापनपत्र संघका कार्यबाहक अध्यक्ष आशाकाजी त्वानाबासुले हस्तान्तरण गरेका थिए ।
