काठमाडौँ, २४ कार्तिक ।
लिभरपुल युइएफए युरोपा लिग अन्तर्गतको खेलमा फ्रेन्च क्लब टोउलोउससँग पराजित भएको छ ।
गएराती सम्पन्न समुह ई अन्तर्गतको खेलमा लिभरपुल टोउलोउससँग ३-२ गोल अन्तरले पराजित भएको हो ।
टोउलोउसको जितमा एरोन डोनम, थिस डालिंगा र् फ्र्यांक माग्रीले एक एक गोल गरेका थिए । त्यस्तै लिभरपुलका लागि डिओगो जोटाले एक गोल गरेका थिए भने एक गोल टोउलोउसका क्रिस्टियन कासेरेज जुनियरले आत्मघाती गोल गरेका थिए ।
यस सिजनको युरोपा लिगमा लिभरपुलको यो पहिलो हार हो । यो हारपछि समुह ई मा लिभरपुलको ४ खेलमा ९ अंक रहेको छ र समुहमा शिर्ष स्थानमा रहेको छ ।
त्यस्तै यो जितपछि टोउलोउसको भने ४ खेलमा ७ अंक भएको छ र समुहमा द्सोरो स्थानमा रहेको छ ।
काठमाडौँ , २४ कार्तिक ।
जारी आइसीसी क्रिकेट विश्वकपमा आज अफगानिस्तान र दक्षिण अफ्रिकाबीच खेल हुदैछ। अहमदावादस्थित नरेन्द्र मोदी स्टेडियममा हुने यो खेल नेपाली समय अनुसार अपराहन्न २: १५ बजेदेखि शुरु हुनेछ ।
जारी विश्वकपमा दक्षिण अफ्रिका सेमिफाइनलमा पुगिसकेको छ । दक्षिण अफ्रिका ८ खेलमा ६ जितसहित १२ अंक हासिल गरेर अहिले दोस्रो स्थानमा छ ।
सेमिफाइनलमा पुगिसकेको हुनाले दक्षिण अफ्रिका बिना दबाब यो खेल खेल्ने छ । यो खेलको नतिजाले दक्षिण अफ्रिकाको सेमिफाइनल समीकरणलाई कुनै असर गर्ने छैन र दक्षिण अफ्रिका सेमिफाइनलमा अस्ट्रेलियासँग खेल्ने यसअघि नै निश्चित भइसकेको छ ।
त्यस्तै अफगानिस्तानले ८ खेलमा ४ खेल जितेर ८ अंक हासिल गर्दै अंक तालिकामा छैटौं स्थानमा छ र सेमिफाइनलको दौडमा कायम रहेको छ । यसका लागि अफगानिस्तानले दक्षिण अफ्रिकालाई ठुलो अन्तरले पराजित गर्नुपर्ने भएको छ ।
दक्षिण अफ्रिका र अफगानिस्तानबीच अहिलेसम्म केवल एक एकदिवसीय खेल भएको छ । जुन २०१९ को विश्वकपमा भएको थियो र यो खेल दक्षिण अफ्रिका ९ विकेटले विजयी भएको थियो ।
दक्षिण अफ्रिकाको सम्भावित प्लेइङ ११- टेम्बा बाभुमा (कप्तान), क्विन्टन डी कक (विकेटकीपर), हेनरिक क्लासेन, रस्सी भान डेर दुस्सेन, एडेन मार्कराम, डेभिड मिलर, लुंगी एनगिडी, कागिसो रबाडा, केशब महाराज, गेराल्ड कोएत्जी र मार्को जेन्सेन ।
अफगानिस्तानको सम्भावित प्लेइङ ११- हस्मातुल्लाह शाहिदी (कप्तान), रहमानउल्लाह गुरबाज, इब्राहिम जद्रान, रहमत शाह, अज्मातुल्लाह ओमरजाई, इक्रम अलिखिल, राशिद खान, मोहमद नावी, मुजीब उर रहमान, फजलहक फारुकी र नवीन उल हक ।
काठमाडौं, कार्तिक २४/
नयाँदिल्ली — भारतीय पार्टी तृणमूल कंग्रेसकी लोकसभा सांसद महुआ मोइत्रामाथि पैसा लिएर संसद्मा प्रश्न गरेको आरोप लागेको छ । संसद्को एथिक्स कमिटीले बिहीबार उनलाई लोकसभाबाट निष्काशनको सिफारिस गरेको छ ।
केन्द्रमा विपक्षी पार्टी तृणमूल कंग्रेसकी सांसद मोइत्रा प्रखर वक्ताका रूपमा चिनिन्छन् । उनले लोकसभामा भारतीय जनता पार्टी (भाजपा) नेतृत्वको सरकार र प्रधानमन्त्री नरेन्द्र मोदीको निरन्तर आलोचना गर्दै आएकी छन् । उद्योगपति गौतम अडानीसँग सरकारको सम्बन्धलाई लिएर पनि निरन्तर प्रश्न उठाउने सांसदमध्ये मोइत्रा पनि एक हुन् । भाजपाले यतिबेला उनीमाथि अर्को उद्योगपतिसँग पैसा लिएर अडानीसँग सम्बन्धित प्रश्न लोकसभामा उठाएको आरोप लगाएको छ । भाजपा सांसद निशिकांत दुबेले १५ अक्टोबरमा उक्त आरोप लगाउँदै मोइत्रामाथि कारबाही गर्न लोकसभा स्पिकर ओम बिरलालाई पत्राचार गरेका थिए । स्पिकरले त्यसमाथि अनुसन्धान गरी आवश्यक सिफारिसको जिम्मा एथिक्स कमिटीलाई दिएका थिए ।
एथिक्स कमिटीले सांसद मोइत्रासँग बयान लिएपछि बहुमत सदस्यहरूको मतबाट उनीमाथि कारबाही सिफारिस गरेको हो । अब बस्ने संसद् बैठकले त्यसमाथि अन्तिम निर्णय लिनेछ । कमिटीका १० सदस्यमध्ये ६ जनाले कारबाहीको पक्षमा र ४ जनाले विपक्षमा मतदान गरेका छन् । सांसद मोइत्रामाथि उद्योगपति दर्शन हीरानंदानीसँग पैसा लिएर संसद्मा प्रश्न सोधेको आरोप छ । मोइत्राले भने हीरानंदनी आफ्नो साथी रहेको तर उनीसँग पैसाको कुनै पनि कारोबार नभएको बताउँदै आएकी छन् । उनले एक अन्तर्वार्तामा आफ्नो मित्र हीरानंदानीसँग एक स्कार्फ, लिपिस्टिक र आइस्याडो गिफ्ट लिएको स्वीकार गरेकी थिइन् । हीरानंदानी दुबई बस्ने व्यवसायी हुन् ।
प्राविधिक जाँचमा सांसद मोइत्राको संसदीय लग इनको प्रयोग दुबईबाट भएको देखिएको छ । दुबईमा लग इन गरिएको समयमा मोइत्रा भने भारतमा थिइन् । मोइत्रामाथि आफ्नो संसद्को लग इन र पासवर्ड अर्को व्यक्तिलाई दिएको आरोप पनि लागेको छ । त्यसलाई मोइत्राले स्वीकार गरेकी छन् । उनले हीरानंदनीको स्टाफबाट प्रश्न टाइप गराउन लग इन र पासवर्ड दिएको बताएकी छन् । तर, त्यसबापत कुनै पैसाको लेनदेन नभएको उनको दाबी छ । उनले प्रत्येक सांसदले आफ्नो लग इन र पासवर्डको प्रयोग अर्को व्यक्तिबाट गराइरहेको समेत दाबी गर्दै आएकी छन् ।
मोइत्रा पछिल्लो समय युवापुस्ता माझ लोकप्रिय बन्दै थिइन् । उनले संसद्मा उठान गर्ने विषय र संसद्बाहिर दिने वक्तव्यले सञ्चारमाध्यममा राम्रो स्थान पाउँदै आएको थियो । लन्डनको एक प्रतिष्ठित बैंकको जागिर जाडेर राजनीतिमा आएकी मोइत्राले सन् २०१६ मा पश्चिम बंगालबाट विधानसभा र पछि २०१९ मा लोकसभा चुनाव जितेकी हुन् । आफूमाथिको आरोपले मानहानी भएको भन्दै उनी अदालतसमेत पुगेकी छन् ।
काठमाडौं कार्तिक २४,
पेरिस — लिभरपुलले युरोपा लिगको खेलमा बिहीबार टुलुजसँग ३–२ को आश्चर्यजनक हार बेहोरेको छ । खेलको अन्त्यतिर गोल गरेपछि त्यसलाई ‘भार’ ले मान्यता दिएपछि लिभरपुलको हार विवादास्पद पनि रह्यो।
जारेल क्वान्साले दोस्रो हाफको इन्ज्युरी समयको सातौं मिनेटमा गोललाई मान्यता दिइएको थिएन् । यससँगै लिभरपुलको प्रतियोगितामा शतप्रतिशत सुरुआत रोकिएको छ । लिभरपुल अझै पनि नौ अंकमा शीर्षमा छ । टुलुज भने सात अंकमा दोस्रोमा उक्लेको छ ।
बिहीबारका अन्य खेल इंग्लिस प्रिमियर लिग क्लबहरूका लागि सुखद रह्यो । यसक्रमा ब्राइटनले आयाक्सलाई २–० र वेस्ट ह्यामले ओलम्पियाकोजलाई १–० ले हरायो ।
काठमाडौँ,शुक्रबार, २४ ।
माध्यमिक शिक्षा परीक्षा (एसईई) का लागि रजिस्ट्रेसन फाराम भर्न आवेदन खुला भएको छ। राष्ट्रिय परीक्षा बोर्ड परीक्षा नियन्त्रण कार्यालय कक्षा १० ले एसईईको लागि रजिस्ट्रेसन आवेदन खुला गरेको हो ।
शैक्षिक सत्र २०८१ मा एसईई परीक्षाम समावेश हुनका लागि रजिस्ट्रेसन आवेदन खुला गरिएको हो। मङ्सिर मसान्तसम्म आवेदन दिन सकिने कार्यालयले जनाएको छ।
मङ्सिर मसान्तसम्म फाराम भर्दा ३०० रुपैयाँ राजश्व बुझाउनुपर्ने छ भने दोब्बर दस्तुरमा ६०० रुपैयाँ तोकिएको छ। दोब्बर दस्तुरका लागि पुस १ देखि १५ गतेसम्मको समय तोकिएको छ।
काठमाडौं, २४ कार्तिक ।
हाल नेपालमा पश्चिमी वायुको आंशिक प्रभाव रहेको छ।
जल तथा मौसम विज्ञान विभाग, मौसम पूर्वानुमान महाशाखाका अनुसार हाल कोशी, गण्डकी, कर्णाली र सुदूर(पश्चिम प्रदेशको पहाडी भू-भागमा आंशिक बदली रही बाँकी भू-भागको मौसम सामान्यतया सफा रहेको छ।
दिउँसो देशको पहाडी भू-भागमा आंशिक बदली रही बाँकी भू-भागको मौसम सामान्यतया सफा रहनेछ। गण्डकी, कर्णाली र सुदूर पश्चिम प्रदेशको पहाडी भू-भागका एक दुई स्थानमा मेघ गर्जन र चट्याङ्गसहित हल्का वर्षाको सम्भावना रहेको छ। देशको उच्च पहाडी तथा हिमाली भू-भागका एक दुई स्थानमा हल्का हिमपातको सम्भावना रहेको छ।
राती भने देशको सुदूर पश्चिम प्रदेश लगायत बाँकी पहाडी भू-भागमा आंशिक देखि सामान्य बदली रही बाँकी भू-भागको मौसम सामान्यतया सफा रहनेछ। कर्णाली र सुदूरपश्चिम प्रदेशको पहाडी भू-भागका एकदुई स्थानमा मेघ गर्जनरचट्याङ्ग सहित हल्का वर्षाको सम्भावना रहेको छ। देशको उच्च पहाडी तथा हिमाली भू-भागका एक दुई स्थानमा हल्का हिमपातको सम्भावना रहेको छ।
कोशी , गण्डकी, कर्णाली र सुदूर-पश्चिम प्रदेशको उच्च पहाडी तथा हिमाली भू-भागका एक-दुई स्थानमा हल्का हिमपातको सम्भावना रहेको साथै देशको उच्च पहाडी तथा हिमाली भू-भागका एक दुई स्थानमा हल्का हिमपातको सम्भावना रहेकोले त्यसबाट हुन सक्ने क्षतिबाट बच्न साथै क्रमिक रूपमा तापक्रम घटिरहेको हुँदा आवश्यक सतर्कता अपनाउन महाशाखाले अनुरोध गरेको छ।
काठमाडौं, २३ कार्तिक ।
राष्ट्रपति रामचन्द्र पौडेलसँग जनवादी गणतन्त्र चीनको स्वशासित क्षेत्र तिब्बतका सचिव वाङ जुनझेङ नेतृत्वको प्रतिनिधिमण्डलले शिष्टाचार भेट गरेको छ।
राष्ट्रपति भवनमा बिहीबार भएको भेटमा दुई देशबीचको सम्बन्ध र आपसी हित र चासोका विषयमा छलफल भएको राष्ट्रपतिको कार्यालयले जनाएको छ।
त्यस अवसरमा राष्ट्रपति पौडेलले हालै जाजरकोट र रुकुम पश्चिममा भूकम्पबाट जनधनको ठूलो क्षति हुँदा चीन र त्यहाँका जनताले प्रदान गरेको सहयोगका लागि आभार व्यक्त गरेका थिए।
उनले विपद्पछिको पुनःउत्थान र पुनःनिर्माणका लागि प्राप्त चिनियाँ सहयोगको प्रशंसा गरेका थिए।
काठमाडौं, २३ कार्तिक ।
नेपाली महिला क्रिकेटर रुबिना क्षेत्रीलाई कप्तानीको जिम्मेवारीबाट बिदा गरिएको छ । हङकङमा नोभेम्बर १५ देखि हुने चार देशबीचको टी-२० सिरिजमा इन्दु बर्मालाई कप्तान बनाएसँगै ११ बर्ष लामो रुबिनाको राष्ट्रिय टिमको कप्तानी पारी टुंगिएको छ । नोभेम्बर १५ देखी १९ सम्म हङहङमा हुने यस सिरिजमा नेपालसहित युएई, हङकङ र मलेसिया खेल्दै छन् ।
उनी २०१२ देखि महिला क्रिकेट टिमको कप्तान रहेकी छन् । राष्ट्रिय टिमबाट २००९ मा सिंगापुरविरुद्ध डेभ्यु गरेकी रुबिनाले नेरी थापालाई रिप्लेस गर्दै २०१२ मा कप्तान बनेकी थिइन् । उनले महिला टी-२० अन्तर्राष्ट्रिय खेलमा भने २०१९ मा डेभ्यु गरेकी थिइन् ।
२९ बर्षिय रुबिना आफ्नो क्यारियरको अन्तिम चरणमा रहेको बेला कप्तानको जिम्मेवारीबाट बाहिरिएपनि अहिले टिममा भने महत्वपूर्ण खेलाडीको रुपमा रहेकी छन् । उनले नेपालका लागि टी-२० मा ४६ खेल खेल्दै ५०२ रन बनाएकी छन् भने ३३ विकेट समेत लिएकी छन् ।
राष्ट्रिय टिमको कप्तानीबाट हटाएको क्षणमा रुबिना भने सीता रानामगरसँगै हङकङको घरेलु प्रतियोगिता वुमन्स अल स्टार्स टी-२० सिरिज पनि खेल्न अहिले हङकङमा छन् । दुई टोलीबीच हुने उक्त सिरिज नोभेम्बर १० देखी सुरु हुनेछ । यो सिरिजपछि उनीहरुले हङकङमै राष्ट्रिय टिममा सामेल हुने छन् ।
काठमाडौं, २३ कात्तिक ।
गीतकार, कवि, संगीत, साहित्यसहित कलाको विभिन्न विधामा सक्रिय रहेकी साबु गदाल कार्की अन्तर्राष्ट्रिय नेपाली कलाकार समाज (इनास) ग्लोबलको वरिष्ठ उपाध्यक्ष पदमा सर्वसम्मत चुनिएकी छन् ।
इनासको पाँचौँ महाधिवेशनबाट चुनिएको अध्यक्ष रामचन्द्र थापा (अष्ट्रेलिया) को कार्यसमितिमा उनले दुई वर्ष वरिष्ठ उपाध्यक्षको हैसियतले कार्यभार सम्हाल्नेछिन् ।
‘मेरो कार्यकालमा नेपाली संस्कृति, कला, साहित्य र सिनेमालाई प्रवर्द्धन गर्न कुनै कसर बाँकी राखे छैन । सकारात्मक प्रभाव पार्ने परोपकारी कार्यक्रमहरू, सामाजिक परियोजनाहरूमा मेरो साथ र सहभगि अझैँ बढ्ने छ’, वरिष्ठ उपाध्यक्ष कार्कीले भनिन् ।
पाँचवटा सांगीतिक एल्बमको निर्माण र लेखनको अनुभव, म्युजिक भिडियो र फिल्म निर्माणको अनुभव, रेडियो नेपालमा प्रस्तोता, पटकथा लेखक र निर्माताको रूपमा काम गरेको अनुभवलाई सामाजिक कार्यमा प्रयोग गर्ने उनले बताइन् ।
‘अहिले प्रवासमा विस्तार भइरहेको चलचित्रको बजारलाई हामीले बलियो बनाउनुका साथै नयाँ बजार खोज्नु पर्छ । हाम्रो कला र संस्कृतिलाई जिवन्त राख्ने यो बलियो माध्यम हो’, उनले भनिन्,‘हामी एकतृत भएर आगामी दिनमा इनासको प्रभावकारितालाई झनै बलियो बनाउन सर्वसम्मत कार्यसमिति निर्माण गर्न सफल भएका छौँ ।’
नेपाली संगीत, सिनेमा र सञ्चार क्षेत्रमा स्थापित बनेकी कार्कीले सन् २००६ मा ‘सहारा’ र २०११ मा ‘रिवाज’ नामक म्युजिक एल्बम, २०१५ मा म्युजिक भिडियो ‘हे आमा’ गीतकार रहिसकेकी छिन् । उनले सन् २०१७ मा फिल्म ‘दर्पण छाया २’ निर्माण गरेकी थिइन् ।
साथै, महाधिवेशनले नयाँ कार्यसमितिसँगै महादेशीय (क्षेत्रीय), राष्ट्रिय र राज्य समितिका संयोजक र सहसंयोजक एवं पदाधिकारीलाई नयाँ कार्यकालका लागि जिम्मेवारी दिएको छ ।
नवनिर्वाचित कार्यसमितिमा अन्य पदाधिकारी अन्तर्गत उपाध्यक्षमा मित्रलाल पार्दै (पोल्याण्ड), अर्जुन काफ्ले (बेल्जियम), मनिषकुमार श्रेष्ठ (बेलायत), राधी क्षेत्री (इटाली) रहेका छन् । त्यसैगरी महासचिवमा राजमान तामाङ (डेनमार्क), सचिवमा आनन्दु लामा (अमेरिका) कोषाध्यक्षमा कुलराज थापा (नेपाल) रहेका छन्।
क्षेत्रीय संयोजकहरूमा प्रकाश तिवारी (युरोप) रुपा न्यौपाने (दक्षिण एसिया), कन्हैया सिङ्ग परियार (उत्तर अमेरिका) रहेका छन् । सह–संयोजकहरूमा श्याम श्रेष्ठ (युरोप) रहेका छन् ।
इन्दीप कोइराला,बारा, २३ कात्तिक ।
बारा प्रहरीले सिम्रौनगढ ११ बाट दुई पेस्तोल र दश थान गोलीसहित पाँचजनालाई पक्राउ गरेको छ ।
पक्राउ पर्ने जिल्ला बारा सिम्रोनगढ नगरपालिका वडा नं.११ भगवानपुर बस्ने ४० वर्षीय उपेन्द्र पटेल, २७ वर्षीय धिरेन्द्र पटेल, ६२ वर्षीय रुपलाल पटेल, रौतहट जिल्ला बौधीमाई नगरपालिका वडा नं.२ बस्ने ४४ वर्षीय राजमंगल पटेल र ८० वर्षीय शाेभा राउत रहेको जिल्ला प्रहरी कार्यालय बाराका प्रहरी नायव उपरीक्षक दधिराम न्यौपानेले जानकारी दिए।
बारा जिल्ला सिम्रौनगढ नगरपालिका वडा नं.११ भगवानपुर बस्ने रूलाल पटेलको छोरा उपेन्द्र पटेलले आफ्नो घर कोठामा अबैध रुपमा हतियारसहित मानिस लुकिछिपी बसेको सूचना पाएर गएको ईलाका प्रहरी कार्यालय सिम्रौनगढको प्रहरी टोलीले घर खनतलासी गर्दा कालो रंगको पोलिथिन झोला भित्र सेतो कपडाले बेरी लुकाई छिपाई राखेको एउटा नलकटुवा पेस्तोल सहित एक थान गोली र एउटा रिभाल्वर सहित सात थान गोली बरामत गरिएको हो । यो संगै प्रहरीले केएफ लेखिएको जंगी राउण्ड दुई थान गोली बरामद गरिएको बाराका प्रहरी नायब उपरिक्षक न्यौपानेले जानकारी दिए।
पक्राउ परेकालाई हातहतियार तथा खरखजाना ऐनअन्तर्गत अनुसन्धान भइरहेको प्रहरीले जनाएको छ ।
