आरके श्रीवास्तव,राैतहट,०३ गते माघ ।
रौतहट । प्रतिनिधि सभा सदस्य निर्वाचन २०८२ का लागि रौतहट जिल्लामा कायम मतदाता, मतदान स्थल र मतदान केन्द्रसम्बन्धी विवरण सार्वजनिक भएको छ । जिल्ला निर्वाचन कार्यालय रौतहटका अनुसार जिल्लाभर कुल ४ लाख ३६ हजार ६११ मतदाता रहेका छन् ।
रौतहट जिल्लामा ४ वटा प्रतिनिधि सभा निर्वाचन क्षेत्र रहेका छन् । ती क्षेत्रमा जम्मा १५७ वडा, २७७ मतदान स्थल र ५४१ मतदान केन्द्र तोकिएका छन् ।
निर्वाचन क्षेत्रगत रूपमा हेर्दा निर्वाचन क्षेत्र नं. ४ मा सबैभन्दा बढी १ लाख १० हजार ३१४ मतदाता रहेका छन् । यस क्षेत्रमा ३० वडा, ६१ मतदान स्थल र १३४ मतदान केन्द्र छन् । यसपछि निर्वाचन क्षेत्र नं. २ मा १ लाख ८ हजार ८७२, निर्वाचन क्षेत्र नं. १ मा १ लाख ८ हजार ७२६ र निर्वाचन क्षेत्र नं. ३ मा १ लाख ८ हजार ६९९ मतदाता रहेका छन् ।
लैंगिक आधारमा हेर्दा रौतहट जिल्लामा पुरुष मतदाता २ लाख ४० हजार २६७ र महिला मतदाता १ लाख ९६ हजार ३४३ रहेका छन् । अन्य लिङ्गका मतदाता १ जना मात्र रहेको जिल्ला निर्वाचन कार्यालयले जनाएको छ ।
निर्वाचन क्षेत्र नं. १ मा ६० हजार २६९ पुरुष र ४८ हजार ५९७ महिला मतदाता छन् । निर्वाचन क्षेत्र नं. २ मा ६१ हजार १९४ पुरुष र ४७ हजार ६७८ महिला, निर्वाचन क्षेत्र नं. ३ मा ५९ हजार ९६८ पुरुष र ४८ हजार ७३० महिला तथा निर्वाचन क्षेत्र नं. ४ मा ५८ हजार ८३६ पुरुष र ५१ हजार ४७८ महिला मतदाता रहेका छन् ।
जिल्ला निर्वाचन कार्यालय रौतहटका अनुसार तोकिएका मतदान स्थल र केन्द्रमा आवश्यक पूर्वतयारी समयमै पूरा गरी निर्वाचनलाई स्वच्छ, निष्पक्ष र शान्तिपूर्ण रूपमा सम्पन्न गरिनेछ ।
काठमाडौं, ३ माघ ।
सांसद प्रत्यासी, समाजसेवी एवं विभिन्न क्षेत्रमा कार्यरत व्यक्तित्वहरु आम जनता पार्टी (आजपा) मा प्रवेश गरेका छन् । २१ फागुनमा हुने प्रतिनिधिसभा निर्वाचनमा आजपाको ‘मोवाइल’ चुनाव चिन्हबाट उनीहरु निर्वाचनमा सहभागि हुदैछन ।
काठमाडौंको कोटेश्वर स्थित आजपाको केन्द्रीय कार्यालयमा आज एक कार्यक्रमका बीच उनीहरुलाई पार्टी अध्यक्ष एवं पूर्वमन्त्री प्रभु साहले पार्टीमा स्वागत गरेका छन् । पार्टी प्रवेश गराउदै उनले एकजुट भएर निर्वाचनमा होमिन आग्रह समेत गरेका छन् ।
विगत तीन दशकदेखि वामपन्थी राजनीतिमा सक्रिय रहँदै आएका सुनसरी निर्वाचन क्षेत्र नं. १ का लोकप्रिय व्यक्तित्व तथा जागरण स्वतन्त्र मञ्चका संयोजक खगेन्द्र श्रेष्ठ र सुनसरीबाट सांसद पदका प्रत्यासी तथा लोकप्रिय युवा नेता निरञ्जन ठाकुरले आजपामा प्रवेश गरेका हुन् ।
यसैगरी, काठमाडौंबाट सांसद पदका प्रत्यासी, रेक्स ईन्टरटेनमेन्टका अध्यक्ष तथा पूर्व राष्ट्र सेवक नेपाली सेनाका सुवेदार खगेश रञ्जितले समेत आजपामा प्रवेश गरेका छन् । हालै विभिन्न राजनीतिक दलहरुका साथै विभिन्न संघसंगठनसंग समेत आजपाले पार्टी एकीकरण गर्दैै २१ फागुनको प्रतिनिधिसभा निर्वाचनमा सहभागि हुदैछ ।
काठमाडौं,२०८२ माघ ०३ गते ।
जनता समाजवादी पार्टी, नेपाल (जसपा) र लोकतान्त्रिक समाजवादी पार्टी, नेपाल (लोसपा) बीच भएको एकीकरणपछि आसन्न प्रतिनिधि सभा निर्वाचन २०८२ का लागि संयुक्त समन्वयका साथ निर्वाचन परिचालन गर्न परिपत्र जारी गरिएको छ ।
जसपाको केन्द्रीय कार्यालयबाट जारी परिपत्रअनुसार २०८२ पौष १३ गते दुई पार्टीबीच एकीकरण भएको र पौष २७ गते १२ बुँदे एकीकरण सम्झौता सार्वजनिक भइसकेको जनाइएको छ । सम्झौता पत्रको बुँदा नं. ८ अनुसार दुवै पार्टीका केन्द्रीय कार्यकारिणी समिति, पदाधिकारी समिति, केन्द्रीय समिति, भ्रातृ संगठन, विभाग तथा पार्टीप्रति आवद्ध संगठनहरूको समायोजन नहुँदासम्म निर्वाचनसम्बन्धी सम्पूर्ण गतिविधिमा आ–आफ्नो तहबाट सक्रिय सहभागिता जनाउन निर्देशन दिइएको छ ।
परिपत्रमा संगठन निर्माण, चुनावी प्रचार–प्रसार, संगठन परिचालन तथा दुवै पार्टीका सबै तहबीच समन्वय गरी आम मतदातालाई पार्टीको पक्षमा मतदान गर्न अभिप्रेरित गर्न आग्रह गरिएको छ । साथै, जनता समाजवादी पार्टी, नेपालबाट उम्मेदवारी दिने सबै उम्मेदवारको विजयको शुभकामना व्यक्त गरिएको छ ।
परिपत्रमा संरक्षक महन्थ ठाकुर र अध्यक्ष उपेन्द्र यादवको हस्ताक्षर रहेको छ ।
आरके श्रीवास्तव,राैतहट,०३ गते माघ ।
रौतहट । कानु हलवाई समाज महासंघ नेपाल तथा कानु समाज कल्याण समिति जिल्ला रौतहटको आयोजनामा जागरण सभा एवं सम्मान समारोह भव्य रूपमा सम्पन्न भएको छ । रौतहटको मौलापुरमा आयोजित उक्त कार्यक्रममा प्रमुख अतिथिका रूपमा राजकुमार साहको उपस्थिति रहेको थियो ।
कार्यक्रमको अध्यक्षता कानु समाज कल्याण समिति जिल्ला रौतहटका अध्यक्ष सर्फलाल गुप्ताले गर्नुभएको थियो । कार्यक्रममा पूर्व मन्त्री ज्वाला साह, बाबुलाल साहलगायत विभिन्न विशिष्ट व्यक्तित्वहरूको उल्लेखनीय उपस्थिति रहेको थियो ।
सो अवसरमा भारत छापरा विधानसभाकी नव निर्वाचित विधायक छोटी कुमारी साह कानुको विशेष उपस्थिति रहेको थियो । हालै सम्पन्न निर्वाचनमा भोजपुरीका चर्चित गायक कलाकार खेसारीलाल यादवलाई पराजित गर्दै विजयी भएकी विधायक साहलाई कार्यक्रममा भव्य स्वागत तथा सम्मान गरिएको थियो । कार्यक्रममा सम्बोधन गर्दै उनले कानु समुदायले शिक्षामा विशेष जोड दिनुपर्ने आवश्यकता औंल्याइन् ।
कार्यक्रममा देशभरबाट कानु समुदायका प्रतिनिधि तथा सदस्यहरूको सहभागिता रहेको थियो । साथै छिमेकी राष्ट्र भारतबाट समेत कानु समुदायका व्यक्तिहरूको उल्लेखनीय उपस्थिति देखिएको थियो । कार्यक्रममा कानु समुदायका जनप्रतिनिधि, विभिन्न सामाजिक व्यक्तित्व तथा पत्रकारहरूलाई पनि सम्मान गरिएको थियो ।
कानु समुदायको एकता, जागरण र शैक्षिक तथा सामाजिक विकासलाई केन्द्रमा राखेर आयोजना गरिएको यस कार्यक्रमले समुदायभित्र सकारात्मक सन्देश प्रवाह गरेको आयोजकले जनाएका छन् ।
- काठमाडौं,०२ गते माघ ।
निर्वाचन आयोगले विशेष महाविधेशन गरेर पार्टीलाई जीवन्त तुल्याएको गगनकुमार थापा नेतृत्वलाई आधिकारिकता दिएको छ । पार्टीको विधानअनुसार विशेष महाधिवेशन सफल पारेको गगन थापा नेतृत्वको कांग्रेसले आधिकारिकता पाएको आयोग उच्च स्रोतले बताएको छ ।
निर्वाचन आयोगको आज दिनभर बसेको बैठकले थापा नेतृत्वलाई आधिकारिकता प्रदान गरेको हो । गगन थापा नेतृत्वलाई आधिकारिकता प्रदान गरेसँगै सोहीअनुसार पार्टीको अद्यावधिक हुने भएको हो ।
यता आधिकारिकता माग्दै शेरबहादुर देउवा पक्षले धम्कीपूर्ण भाषा प्रयोग गर्दै निर्वाचन आयोगले आफूहरुको विपक्षमा निर्णय सुनाए देशैभर आन्दोलन गर्ने बताएको छ ।
पार्टी विधानविपरीत गएको देउवा पक्षका नेता पूर्णबहादुर खड्काले आगामी प्रतिनिधि सभा निर्वाचन नै प्रभावित पार्ने किसिमले देशैभर आन्दोलन गर्ने धम्की दिएका हुन् ।
तर कानूनका दफा दफा हेरेर दिनभर अनुसन्धान गरेका निर्वाचन आयोगका कार्यवाहक प्रमुख निर्वाचन आयुक्तसँगै आयुक्तहरुले थापा पक्षलाई आधिकारिकता दिएका हुन् ।
उनीहरु बेलुकी कडा सुरक्षाबीच आयोगबाट घर गएका थिए । उनीहरु गएपछिमात्र थापा पक्षलाई आधिकारिकता दिएको सूचना बाहिरिएको हो ।
यसअघि कार्यवाहक प्रमुख निर्वाचन आयुक्त रामप्रसाद भण्डारीले निर्वाचन आयोगले विधि, पद्धति, संविधान, ऐन, कानून र नियमको परिधिभित्र रहेर मात्रै निर्णय गर्ने बताएका थिए ।
‘‘विधि, पद्धति छ, संविधान छ, ऐन, कानून, नियम छ यसको परिधिभित्र रहेका निर्वाचन आयोगले अध्ययन विश्लेषण गर्ने हो । निर्वाचन आयोगले विधि र पद्धति बाहिर गएर निर्णय गर्दैन । हाम्रो संस्थागत परम्परा छ,’ उनले भने ।
आयोगले विधि र पद्धतिभन्दा बाहिर गएर कुनै निर्णय नगर्ने उल्लेख गर्दै भण्डारीले निर्वाचन आयोगको आफ्नै संस्थागत परम्परा रहेको दाबी गरे ।
भण्डारीले निर्वाचन आयोगले निर्वाचन सम्पन्न गर्ने उद्देश्यले आफ्ना कार्यतालिकाहरु प्रकाशित गरेको उल्लेख गर्दै निर्वाचन सम्पन्न गर्न आग्रहसमेत गरे । सभार वर्णन मिडिया
ललितपुर,०२ गते माघ ।
उपराष्ट्रपति रामसहाय प्रसाद यादवले होटल उद्योग तथा पर्यटन क्षेत्र नेपालको राष्ट्रिय अर्थतन्त्रको मेरुदण्डका रूपमा रहेको बताउनुभएको छ ।
उपराष्ट्रपति यादवले शुक्रबार ललितपुर ग्वार्कोस्थित होटल रोयल तुलिपमा होटल संघ नेपालद्वारा आयोजित ‘हिरक जयन्ती’ समारोहको उद्घाटन गर्दै उक्त कुरा बताउनुभएको हो ।
उहाँले होटल उद्योगले रोजगारी सिर्जना, सांस्कृतिक आदान–प्रदान, अन्तर्राष्ट्रिय पहिचान र कूटनीतिक सम्बन्ध सुदृढीकरणमा उल्लेखनीय योगदान पु¥याउँदै आएको बताउनुभयो । संघको छ दशक लामो यात्रा उपलब्धि र संघर्षले भरिएको प्रेरणादायी अध्याय भएको उल्लेख गर्दै उहाँले भविष्यका चुनौतीलाई अवसरमा रूपान्तरण गर्न व्यवसायीलाई आग्रह गर्नुभयो ।
‘होटल संघ नेपालको ‘हिरक जयन्ती’ विगतका सफलताहरूलाई स्मरण गर्दै भविष्यका चुनौतीलाई अवसरमा रूपान्तरण गर्ने प्रेरणा दिन्छ’ उहाँले भन्नुभयो, ‘नेपालको प्राकृतिक सौन्दर्य, सांस्कृतिक विविधता र अतिथिसत्कारको परम्परा विश्वकै अनुपम सम्पदा हुन् । यी सम्पदालाई व्यवस्थित, दिगो र नवप्रवर्तनशील होटल उद्योगमार्फत विश्वसामु प्रस्तुत गर्नु हाम्रो साझा जिम्मेवारी हो ।’
यस अवसरमा आयोजित ‘नेपाल हास्पिटेलिटी डे २०२६’ तथा ‘द होटल एक्स्पो एण्ड फूड फेस्ट २०२६’ जस्ता कार्यक्रमहरूले नेपालको पर्यटन उद्योगलाई विश्वसामु उजागर गर्ने विश्वास व्यक्त गर्दै उपराष्ट्रपतिले दिगो पर्यटन, हरित अर्थतन्त्र, डिजिटल रूपान्तरण र अन्तर्राष्ट्रिय साझेदारीलाई संघले प्राथमिकतामा राख्नुपर्ने आवश्यकता औंल्याउनुभयो ।
उहाँले विगतमा आन्दोलनका क्रममा होटल व्यवसायीले भोग्नुपरेका दुखद घटनाबाट पाठ सिकेर शान्तिपूर्ण संवाद र सहमतिको संस्कृतिलाई बलियो बनाउनुपर्नेमा जोड दिनुभयो । पर्यटकको सुरक्षा, सुविधा र सम्मान सुनिश्चित गर्नु सबैको साझा जिम्मेवारी भएको उल्लेख गर्दै उहाँले वातावरणमैत्री होटल सञ्चालन, गुणस्तरीय सेवा र आत्मीय आतिथ्यलाई आधुनिक प्रविधिसँग जोड्नुपर्ने धारणा व्यक्त गर्नुभयो ।
उपराष्ट्रपति यादवले संघको योगदानले नेपालको पर्यटनलाई विश्व बजारमा प्रतिस्पर्धी बनाउन मद्दत गर्ने विश्वास व्यक्त गर्दै भन्नुभयो, ‘होटल उद्योगलाई सुरक्षित राख्नु व्यवसायीको हित मात्र नभई राष्ट्रिय प्रतिष्ठा र अन्तर्राष्ट्रिय विश्वासको सवाल हो । पर्यटकलाई सुरक्षित वातावरण, गुणस्तरीय सेवा र आत्मीय आतिथ्य प्रदान गर्नु हाम्रो दायित्व हो, जसले नेपालको छवि विश्वसामु उजागर गर्ने मात्र होइन, दीर्घकालीन आर्थिक लाभ पनि सुनिश्चित गर्दछ ।’
उहाँले होटल संघ नेपालले दिगो पर्यटनलाई प्राथमिकतामा राखी वातावरणमैत्री होटल सञ्चालनमा जोड दिनुपर्ने, डिजिटल प्रविधि र नवप्रवर्तनलाई आत्मसात गर्दै सेवा प्रणालीलाई आधुनिक बनाउनुपर्ने तथा अन्तर्राष्ट्रिय साझेदारी र लगानीलाई आकर्षित गर्ने रणनीति अघि बढाउनुपर्ने आवश्यकता औंल्याउनुभयो ।
समारोहमा उपराष्ट्रपति यादवले होटल संघ नेपालका पदाधिकारी, सदस्य तथा सम्पूर्ण पर्यटन व्यवसायीलाई हार्दिक बधाई दिँदै भन्नुभयो, ‘तपाईंहरूको निरन्तर परिश्रम, लगनशीलता र समर्पणले नेपाललाई विश्व पर्यटन नक्सामा अझ उजागर गर्नेछ भन्ने दृढ विश्वास व्यक्त गर्दछु । नेपालको स्वतन्त्रता, सार्वभौमिकता, राष्ट्रिय एकता र स्वाभिमानलाई अक्षुण्ण राख्दै समृद्धि, विकास, सुशासन र दिगो शान्तिको यात्रामा होटल उद्योगले अग्रणी भूमिका निर्वाह गरोस् भन्ने शुभेच्छा व्यक्त गर्दछु ।’
आरके श्रीवास्तव,रौतहट, २ गते माघ ।
आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै रौतहट जिल्लामा निर्वाचन अधिकृतको कार्यालय स्थापना गरिएको छ । जिल्लाका चारवटै निर्वाचन क्षेत्रमा शुक्रबारदेखि निर्वाचन अधिकृतको कार्यालय सञ्चालनमा आएको जिल्ला निर्वाचन कार्यालयले जनाएको छ ।
रौतहट निर्वाचन क्षेत्र नम्बर ३ काे कटहरिया नगरपालिकाको कार्यालयमा निर्वाचन अधिकृतको कार्यालय स्थापना गरिएको छ । यस क्षेत्रमा निर्वाचनलाई व्यवस्थित, निष्पक्ष र प्रभावकारी रूपमा सम्पन्न गर्न आवश्यक सम्पूर्ण तयारी अघि बढाइएको जिल्ला निर्वाचन कार्यालयका प्रमुख छोटेलाल दासले जानकारी दिनुभयो ।
निर्वाचन क्षेत्र नम्बर ३ का लागि उपसचिव अवध किशोर प्रसाद कुश्वाहा निर्वाचन अधिकृतको जिम्मेवारीमा खटिनुभएको छ । उहाँको नेतृत्वमा निर्वाचनसम्बन्धी प्रशासनिक, प्राविधिक तथा व्यवस्थापकीय तयारीलाई तीव्रता दिइएको जनाइएको छ ।
यसैबीच, निर्वाचन क्षेत्र नम्बर १ का लागि सदरमुकाम गौरस्थित आन्तरिक करदाता सेवा कार्यालयमा निर्वाचन अधिकृतको कार्यालय स्थापना गरिएको छ भने निर्वाचन क्षेत्र नम्बर २ का लागि परोहा नगरपालिकास्थित कृषि, पशु तथा पन्छी सेवा केन्द्रमा कार्यालय सञ्चालनमा ल्याइएको छ । यस्तै, निर्वाचन क्षेत्र नम्बर ४ का लागि चन्द्रपुर नगरपालिका–५ मा निर्वाचन अधिकृतको कार्यालय स्थापना गरिएको छ ।
अन्य क्षेत्रहरूमा पनि निर्वाचन अधिकृतका रूपमा निर्वाचन क्षेत्र नम्बर १ मा जिल्ला न्यायाधीश मनोज केसी, निर्वाचन क्षेत्र नम्बर २ मा इजलास अधिकृत सिताराम खड्का तथा निर्वाचन क्षेत्र नम्बर ४ मा उपरजिस्ट्रार उद्धव ढोडारी खटिनुभएको जिल्ला निर्वाचन कार्यालयले जनाएको छ ।
अर्जुन यादव,रौतहट,२९ गते पुस ।
रौतहट जिल्लाको देवाही गोनाही नगरपालिकामा नयाँ प्रमुख प्रशासकीय अधिकृतका रूपमा पवन कुमार केशरीले औपचारिक रूपमा कार्यभार सम्हालेका छन्। नगरपालिकामा आयोजित एक संक्षिप्त तर अर्थपूर्ण कार्यक्रमबीच नगर प्रमुख प्रेमलाल साह र उप–प्रमुख परनिया देवी पटेलको रोहवरमा प्रमुख प्रशासकीय अधिकृत केशरीले पदभार ग्रहण गरेका हुन्।
कार्यभार ग्रहण कार्यक्रममा नगरपालिकाका विभिन्न शाखाका कर्मचारी, स्थानीय राजनीतिक दलका प्रतिनिधि तथा सरोकारवालाहरूको उल्लेखनीय उपस्थिति रहेको थियो। कार्यक्रममा बोल्दै नगर प्रमुख प्रेमलाल साहले नयाँ प्रमुख प्रशासकीय अधिकृतलाई सफल कार्यकालको शुभकामना व्यक्त गर्दै नगरपालिकाको समग्र विकास, सुशासन र सेवा प्रवाहलाई अझ प्रभावकारी बनाउने दिशामा सहकार्यको अपेक्षा व्यक्त गरे। उप–प्रमुख परनिया देवी पटेलले पनि नगरवासीको हितलाई केन्द्रमा राखी पारदर्शी र जवाफदेही प्रशासन सञ्चालन गर्न आग्रह गरिन्।
नव नियुक्त प्रमुख प्रशासकीय अधिकृत पवन कुमार केशरीले आफ्नो जिम्मेवारीप्रति प्रतिबद्धता जनाउँदै नगरपालिकाको प्रशासनिक कार्यलाई चुस्त, प्रभावकारी र जनमैत्री बनाउने बताए। उनले कर्मचारीहरूबीच समन्वय, नियम–कानुनको पालना र सेवा प्रवाहमा गुणस्तर अभिवृद्धिलाई प्राथमिकतामा राख्ने स्पष्ट पारे। साथै, स्थानीय तहमा देखिएका समस्या समाधानका लागि जनप्रतिनिधि, कर्मचारी र समुदायसँग मिलेर काम गर्ने प्रतिबद्धता व्यक्त गरे।
हनुमत कुमार यादव,गाैर,२७ गते पुस ।
गाैर । राष्ट्रिय एकता दिवसको अवसरमा रौतहट जिल्लाको सदरमुकाम गौरस्थित प्रादेशिक अस्पताल गौरमा रक्तदान कार्यक्रम भव्य रूपमा सम्पन्न भएको छ । अस्पतालका अध्यक्ष अवधेश यादवको सक्रियतामा आयोजित उक्त कार्यक्रम अस्पताल प्रशासनको समन्वयमा विभिन्न सामाजिक संघ–संस्था, स्वास्थ्यकर्मी तथा स्थानीय युवाहरूको उल्लेखनीय सहभागितामा सम्पन्न भएको हो ।
कार्यक्रममा अस्पतालका चिकित्सक तथा कर्मचारी, स्थानीय जनप्रतिनिधि, समाजसेवी र सर्वसाधारणले उत्साहपूर्वक रक्तदान गरेका थिए । रक्त अभावका कारण बिरामीहरूलाई उपचारमा समस्या नहोस् भन्ने उद्देश्यले आयोजना गरिएको यस कार्यक्रमले आपतकालीन अवस्थामा उपचाररत बिरामीहरूको जीवन बचाउन महत्वपूर्ण सहयोग पुग्ने विश्वास लिइएको छ ।
कार्यक्रमलाई सम्बोधन गर्दै प्रादेशिक अस्पताल गौरका अध्यक्ष अवधेश यादवले रक्तदान मानव जीवनसँग प्रत्यक्ष जोडिएको महान् कार्य भएको उल्लेख गर्दै भने, “रक्त अभावकै कारण कुनै पनि बिरामीले ज्यान गुमाउन नपरोस् भन्ने हाम्रो उद्देश्य रहेको बताए । राष्ट्रिय एकता दिवसजस्तो महत्वपूर्ण दिनमा आयोजित यस कार्यक्रमले समाजमा मानवीय सेवा र एकताको सन्देश प्रवाह गर्छ भन्ने कुरा व्यक्त गरे । उनले यस्ता कार्यक्रमलाई विभिन्न पालिका, संघ-संस्था, सकृय युवा संग समन्वय गरी निरन्तरता दिने प्रतिबद्धता पनि व्यक्त गरे ।
त्यसैगरी कार्यक्रममा मन्तव्य राख्दै मे.सु. मुरारी ठाकुरले स्वस्थ व्यक्तिले नियमित रूपमा रक्तदान गर्नुपर्ने आवश्यकता औँल्याउँदै भने, “रक्तदान महादान हो । थोरै समय र इच्छाले अरूको जीवन बचाउन सकिन्छ । यस किसिमका कार्यक्रमले स्वास्थ्यप्रति सचेतना बढाउनुका साथै समाजमा सहयोगको भावना मजबुत बनाउँछ ।
प्रादेशिक अस्पताल गौरका व्यवस्थापन पक्षले सामाजिक उत्तरदायित्वलाई आत्मसात गर्दै भविष्यमा पनि यस्ता सामाजिक तथा मानवीय कार्यक्रमलाई निरन्तरता दिने जनाएको छ । राष्ट्रिय एकता दिवसको अवसरमा सम्पन्न यस रक्तदान कार्यक्रमले समुदायमा सकारात्मक सन्देश प्रवाह गर्नुका साथै आपसी सहकार्य र एकताको भावना अभिवृद्धि गरेको वे. स. स. ओमप्रकाश साह मधेशीयाको भनाइ रहेको छ ।
काठमाडौँ,२७ गते पुस ।
नेपाली राजनीतिक इतिहासमा आज एक महत्वपूर्ण मोड आएको छ । जनता समाजवादी पार्टी, नेपाल (जसपा, नेपाल) र लोकतान्त्रिक समाजवादी पार्टी, नेपाल (लोसपा, नेपाल) बीच औपचारिक एकीकरण सम्पन्न भएको छ । लामो समयदेखि अलग–अलग धारमा रहेका मधेश केन्द्रित दुई प्रमुख शक्तिहरूको यो एकीकरणलाई ऐतिहासिक उपलब्धिका रूपमा हेरिएको छ ।
एकीकरणपछि पार्टीको नाम जनता समाजवादी पार्टी, नेपाल नै कायम रहनेछ । पार्टीको चुनाव चिन्ह छाता रहनेछ भने झण्डा रातो, सेतो र हरियो रंगको रहने सहमति भएको छ, जुन यसअघि लोसपा, नेपालले प्रयोग गर्दै आएको झण्डा हो । झण्डाको बीच भागमा ढल्किएको छाता रहने व्यवस्था गरिएको छ ।
एकीकरणसँगै महन्थ ठाकुर पार्टीको संरक्षक र उपेन्द्र यादव पार्टीको अध्यक्ष रहने सहमति भएको छ ।
मिति २०८२ साल पुस १३ गते दुवै पार्टीबीच सहमति भई एकीकरण गर्ने संयुक्त प्रेस विज्ञप्ति जारी गरिएको थियो । सोही विज्ञप्तिलाई आधार मानी एकीकरण प्रक्रिया अगाडि बढाइएको हो। एकीकरणसम्बन्धी सम्पूर्ण प्रक्रिया राजनीतिक दल सम्बन्धी ऐन, २०७३ तथा प्रचलित कानुन अनुसार सञ्चालन गरिने उल्लेख गरिएको छ।
एकीकृत पार्टी सञ्चालनका लागि ४३ सदस्यीय केन्द्रीय समन्वय समिति गठन गरिएको छ । सो समितिले पार्टीको संगठन सञ्चालन, परिचालन, निर्देशन तथा निर्णय गर्ने अधिकार पाउनेछ । साथै, समितिले आफ्नै सदस्यहरूमध्येबाट ११ सदस्यीय सचिवालय गठन गर्नेछ।
दुवै पार्टीका केन्द्रीय समिति पूर्ण रूपमा समायोजन नहुन्जेलसम्म केन्द्रीय समन्वय समिति नै पार्टीको सर्वोच्च निर्णायक निकाय रहनेछ । पार्टी मातहतका सबै तहका संगठन, भ्रातृ संगठन, शुभेच्छुक संगठन, विभाग तथा संयन्त्रहरू केन्द्रीय समन्वय समितिको निर्णयअनुसार जनता समाजवादी पार्टी, नेपालको मातहतमा रही क्रियाशील रहनेछन् ।
आगामी मिति २०८२ साल फागुन २१ गते हुने प्रतिनिधि सभाको निर्वाचन का लागि पेश गरिने उम्मेदवारको मनोनयन पत्रमा केन्द्रीय समन्वय समितिको निर्णयअनुसार महन्थ ठाकुर र उपेन्द्र यादवले संयुक्त रूपमा हस्ताक्षर गर्ने सहमति भएको छ ।
केन्द्रीय समन्वय समितिमा महन्थ ठाकुर, उपेन्द्र यादवसहित विभिन्न समुदाय, क्षेत्र र पृष्ठभूमिका ४३ जना नेताहरूलाई समेटिएको छ, जसले समावेशी प्रतिनिधित्व सुनिश्चित गर्ने अपेक्षा गरिएको छ ।
यो एकीकरणले मधेश आन्दोलन, समावेशिता, संघीयता, सामाजिक न्याय र लोकतान्त्रिक मूल्य–मान्यतालाई अझ सुदृढ बनाउने विश्वास लिइएको छ । विभाजित शक्तिहरू एक ठाउँमा आउँदा राष्ट्रिय राजनीतिमा जनता समाजवादी पार्टी, नेपालको भूमिका थप प्रभावशाली हुने नेताहरूको दाबी छ ।
आज सम्पन्न यो एकीकरणलाई मधेश केन्द्रित राजनीतिमा नयाँ अध्यायको सुरुआतका रूपमा हेरिएको छ ।
