आरके श्रीवास्तव,राैतहट,०७ गते वैशाख ।
बज्जिका गित निकाल्ने बारे राैतहटकाे कटहरियामा छलफल गरिएको छ । कटहरिया बजार स्थित रहेकाे खुश्बु रेकर्डिङ स्टुडियोमा शुक्रबार गहन छलफल गरिएको छ । आफनै गित र संगित सहित निरन्तर रूपमा बज्जिकामा हरेक महिना कम्तीमा एउटा गित निकाल्नु पर्ने निष्कर्ष निकालिएको हाे ।
बज्जिका भाषाका शुभचिन्तक एवम् साहित्यकार संजय साह मित्र,बज्जिका भाषाका प्रथम आधुनिक उपन्यासकार बिजय यादव निर्विज,बज्जिका पत्रकार समाज राैतहटका अध्यक्ष राजु कुमार श्रीवास्तवले गायक साेनु कुशवाहा सँग बज्जिका भाषामा गितकाे अभावलाई पूरा गर्ने बारे विचारविमर्श गरेका छन् ।
बज्जिका भाषाले अन्य सबैक्षेत्रमा फड्को मारेपनि गितसंगितकाे क्षेत्रमा पनि अब द्रुत गतिमा फडकाे मार्ने उदेश्यले साे छलफल भएको छ । यसाे त बज्जिकामा दर्जनौं गितहरू बजारमा छन् । रिना फिल्मसबाट कयौं बज्जिका गितहरू बजारमा आएकै हुन् । तर यसकाे संख्या अझै बढाउनुपर्नेमा बज्जिका शुभचिन्तक एवम् साहित्यकार साहले जाेड दिएका छन् ।
उपन्यासकार यादवले पनि अब आफू कला संगितकाे क्षेत्रमा समय दिएर काम गर्ने बताए । त्यसमा पनि बज्जिका गित संगितकाे लागि विशेष समय दिई यसलाई निरन्तर अघि बढाउने प्रतिबद्धता जनाएका छन् ।
समाजका अध्यक्ष श्रीवास्तवले पनि बज्जिका गितकाे लागि आफनाे मिडियाले खेल्नुपर्ने आवश्यक भूमिका निर्वाह गर्ने बताएका छन् ।
जवाफमा गायक कुशवाहाले सबैकाे साथ सहयोग भएमा अब छिट्टै नै बज्जिका भाषाका गितहरू बजारमा आउनेछन् । आफनाे भाषाका लागि काम गर्न पाउँदा आफू पनि उत्साहित भएको प्रतिक्रिया दिएका छन् ।
बज्जिका भाषामा गित आउनुपर्छ भन्ने धारण पत्रकार रामशरण यादवले राख्नु भएको थियोे ।
कटहरियामा खुश्बु रेकर्डिङ स्टुडियो स्थापना भएदेखि गितसंगीतकाे क्षेत्रमा एउटा छुट्टै पहिचान स्थापित गर्दै गईरहेकाे छ । रिना फिल्मसकाे युटुब च्यानल मार्फत ग्रामीण क्षेत्रका गायक कलाकारहरूकाे विस्तारै नाम स्थापित गराउन सफल हुँदै गएको छ ।
राकेश यादव,गाैर, ५ गते वैशाख ।
रौतहट जिल्लाको दुर्गा भगवती गाउपालिका वडा नम्बर १ गंगा पिपरामा निर्वाचित वडा अध्यक्षले बर्षौ देखि भोग चलनमा रहेको जग्गा बल प्रयोग गरी आफ्नो नजिकको व्यक्तिलाइ कब्जा गराउन लागेको घटना बाहिरिएको छ।
दोस्रो कार्यकालको लागि स्थानीय तहको निर्वाचनमा जितेका वडा अध्यक्ष प्रधुमन चौधरीले बाजे बुबाको पाला देखि नै भोग चलनमा रहेको ५ धुर जग्गा बलपुर्बक सत्ताको दुरुपयोग गरी अरुलाइ कब्जा गराउन लागेको पिडित प्रभु महतोले आरोप लगाएका छन्।
सर्बे नापी हुनु भन्दा पहिला नै बाजेले सो जग्गा खरिद गरी सबैलाइ पानी खाने उदेश्यले इनार खनाएको उल्लेख गर्दै सो इनार माटोले पुरिए पछि जग्गा भोग गर्दै आएकोमा वडा अध्यक्ष चौधरी आफ्नो पक्षको तेज नारायण महतोलाइ कब्जा गराउन लागेको दावी गरे।
तेज नारायण महतोको जग्गा देखि टासिएर घर भएको र मेरो आउने जाने बाटो समेत भएकोमा बाटो निकास बन्द गराउन वाल निर्माण गराएको पिडितको भनाइ रहेको छ।
बाटो थुन्ने काम गरेकोले निकासको व्यवस्थापन गराई निर्माण कार्य रोक्का राख्नको लागि न्यायिक समितिमा उजुरी दिएको सुनाउदै पिडित महतोले न्यायिक समिति बाट चैत्र २९ गते निर्माण कार्य रोक्का गर्न ईलाका प्रहरी कार्यालय र वडा कार्यालय समेतमा पत्राचार गरिएकोमा सोको कुनै वास्ता नगरी वडा अध्यक्ष चौधरीले बल पुर्बक बर्षौ देखि भोग गर्दै आएको जग्गा खाली गराएको उल्लेख गरे।
सर्बे नापीमा सो जग्गा ऎलानी उल्लेख भएपनि भोगमा रहेको महतोको जिकिर रहेको छ। वडा अध्यक्ष चौधरी, प्रदेश सभा सदस्य प्रत्यासी राजेश चौधरी, मनोज चौधरी, अनिरुद्ध चौधरी, विनय चौधरी लगायतले आइ जग्गामा भएको हैन्ड पाइप, शौचालय समेत तोडी फाल्न लाग्दा बिरोध गर्दा हातपात समेत गरेको सोनफि महतोले बताए।
सार्बजनिक जग्गा मेरो अधिकार क्षेत्र भित्र रहेकोले खाली गराउन लागेको वडा अध्यक्षले भनेको उहाले सुनाए।
सार्बजनिक बाटो च्यापेर आफैले बनाएको घर पहिला भत्काएर आउनु भन्दा वडा अध्यक्ष चौधरी दुरव्यवहार समेत गरेको सोनफी महतोको आरोप रहेको छ।
गाउमा धेरै ठाउमा सार्बजनिक जग्गा रहेकोले सबै खालि गराए हामीले पनि सो जग्गा छोड्ने असर्फी महतो र भोजिन्द्र महतोको अडान रहेको छ।
वडा अध्यक्ष चौधरी भ्रस्टाचारमा लिप्त रहेको र पैसाको लोभमा परेर यस्तो गरिरहेको हुद्दा प्रतिकार गर्ने चेतावनी पिडितहरुको रहेको छ।
स्थानीय शम्भु महतोले भोट नदिएको कारण चौधरीले अन्याय गर्न लागेको टिप्पणी गरे। उहाले जसले बोट दिएको छ उसलाई आर्थिक लाभ दिने र लिने चौधरीको बानी रहेको दावी समेत गरे।
अगाडी सार्वजनिक जग्गा र पछाडी निजी जग्गा र त्यसको पछाडी प्रभु महतो, सोनफी महतो, असर्फी महतोको खपडाको घर रहेकोले तेज नारायण महतोले कम्पाउण्ड वाल लगाए पछि आवत जावत गर्ने निकास नै अबरुद्ध हुने भएकोले बाटोको निकास तथा सार्बजनिक जग्गाको संरक्षण गर्ने तर्फ गाउपालिकाले निर्णयाक भूमिका निर्वाह गर्नु पर्ने देखिन्छ।
आरके श्रीवास्तव,गरुडा, ०५ गते वैशाख ।
रौतहटको गढीमाई नगरपालिका ४ संग्रामपुर पर्सा माइती भई रौतहटकै दुर्गा भगवती गाउँपालिका ३ मत्सरीमा बिहे भएकी एक युवतीको हत्या गरी लास झुन्ड्याइदिएको आरोप आफन्तले लगाएको छ । रौतहटको गरुडास्थित होटल एनपि स्टारमा शुक्रबार आयोजित पत्रकार सम्मेलनमा मृतक २७ वर्षीया अलका ठाकुरका बुबा राम किशोर ठाकुर, आमा अनिता कुमारी ठाकुर र भाइ मनमोहन ठाकुरसहितका आफन्तहरुले मृतकका पति संजीव झा र घरपरिवारका अन्य सदस्य मिलेर हत्या गरी लास झुन्ड्याएको आरोप लगाएका हुन् ।
घटना गत बैसाख १ गते सोमबारको भएको पीडित पक्षको भनाइ छ । बिहान साढे ९ बजेतिर छोरी ज्वाइँ संजीव ठाकुरले फोन गरेर छोरी मर्न लागेको जानकारी गराएका थिए । छोरीको अवस्था बुझ्न सदरमुकाम गौर नजिक रहेको सिसवाबाट आफन्तलाई पठाउँदा छोरीलाई झुन्डिएको अवस्थामा स्थानीय तथा प्रहरी प्रशासनले चारैतिरबाट घेरेर राखेको र लास उठाउने मुचुलका बनाइरहेको बताएपछि आफूहरु दौडेर त्यहाँ पुगेको ठाकुरको भनाइ छ ।
केही आफन्तसहित छोरीको घरमा पुगेका ठाकुरलाई त्यहाँको अवस्थाको बारेमा फोटोसमेत प्रहरीले खिच्न नदिएको आरोप रहेको छ । ठाकुरले भने – प्रहरीले फोटोसमेत खिच्न दिएन ।
त्यहाँ रहेका झा परिवारले भने जस्तै प्रहरीले एकोहोरो गरेको र लास उठाएपछि बलजफ्ती गौरमा पोस्टमार्टम गर्न खोज्दा आफूहरुले रोकेर काठमाडौँमा गर्ने अडान लिएको पत्रकार सम्मेलनमा ठाकुरले बताए । काठमाडौँमा पोस्टमार्टम गरेपछि अस्पतालले आफूलाई लासको जिम्मा दिएको मृतकको भाइ मनमोहन ठाकुरको भनाइ छ । आफूले लास बुझेको तर रौतहट ल्याएपछि तिन ट्रक प्रहरीले बलजफ्ती लास खोसेर मत्सरीका झा परिवारको जिम्मा दिएको आरोप लगाएका छन् । ठाकुरको भनाइ छ – आफूहरुले नै लासको सद्गति गर्न पाउनुपर्ने अडान राखेपछि प्रहरीले लछारपछार गरेको, लाठी चार्ज गरेको र आफूहरुमाथि अमानवीय व्यवहार गरेका थिए ।
ठाकुरले गत २०७६ जेठ ५ गते धुमधामसित साढे २२ लाख रुपैया खर्च गरेर छोरीको विवाह झासित गरेको बताउँदै पछि थप साढे तिन लाख रुपैया दिएको र छोरीले पनि ज्वाईँलाई चार चक्के गाडी किन्न सात लाख रुपैया दिएको बताएका छन् । बिहे भएको ६ वर्षसम्म झाले विवाह दर्ता नगराएको आरोप लगाउँदै पहिलेदेखि नै छोरीमाथि झा परिवारको कुदृष्टि रहेको आरोप लगाएका छन् । अनेक किसिमको दुव्र्यवहार सहँदै छोरीले एउटा इन्स्योरेन्स कम्पनीमा काम गरिरहेकी थिइन् । झा परिवारले हत्या गर्नुभन्दा दुई दिन पहिलेदेखि नै छोरी चढ्ने स्कुटरको साँचो खोसेर राखेका थिए । शनिवारदेखि कुरा समेत गर्न नदिएको झा परिवारले सोमवार छोरीको हत्या गरी झुन्ड्याएर प्रहरीको सहयोगमा आत्महत्यामा परिणत गरेको आरोप पीडित पक्षको रहेको छ ।
मृतकका बुबा र आमाले पत्रकारसामु भक्कानिएर रुँदै भने – आफूहरुको सहारा कोही छैन ।
पीडित परिवारले मानव अधिकारवादी संघसंस्थाहरुले पनि घटनाको छानबिन गरेर सत्यतथ्य बाहिर ल्याउनुपर्ने आग्रह गरेका छन् ।
जिल्ला प्रहरी कार्यालय रौतहटका प्रवक्ता डिएसपि दिपक कुमार रायले घटनाबारे प्रहरीले अनुसन्धान गरिरहेको बताएका छन् । पोस्टमार्टमको रिपोर्ट आएपछि सोहीअनुसार अगाडि बढ्ने रौतहट प्रहरीको भनाइ छ ।
आरके श्रीवास्तव,राैतहट,०४ गते चैत ।
लोकतान्त्रिक समाजवादी पार्टी (लोसपा) नेपालले वैशाख १५ गते सम्म सवै वडा र पालिका अधिवेशन गर्न परिपत्र गरेकाे छ ।
आज लाेसपा नेपालका केन्द्रीय अध्यक्ष महन्थ ठाकुरले परिपत्र जारी गर्दै वैशाख १५ गते सम्ममा अधिवेशन सक्न निर्देशन दिनु भएको हाे ।
लाेसपा नेपालकाे आसन्न महाधिवेशनलाई मध्यनजर गर्दै पार्टीको निर्वाचन निर्देशिका -२०८१ अनुसार धारा(१)(३) बमोजिम वडा र पालिका सम्बन्धित जिल्ला र सम्बन्धित निकायका सम्पूर्ण नेता,कार्यकर्ता तथा शुभचिन्तकहरू सामेल गराई अधिवेशन गर्न भनिएको हाे ।
यस अघि दुई चाेटी म्याद थप गरेर अधिवेशन सकाउन परिपत्र गरिएको थियोे । २०८१ चैत २० गतेमा गरिएको परिपत्रकाे समय सिमा थप गरि २०८२ वैशाख १५ गते सम्म कायम गरिएको लाेसपा नेपालका महासचिव मनिष मिश्रले जानकारी गराउनु भएको हाे ।
काठमाडौं । आम जनता पार्टी (आजपा) का अध्यक्ष तथा पूर्वमन्त्री प्रभु साहले वीरगंजमा भड्किएको सामाजिक सद्भाव कायम गर्न सरकार असफल रहेको टिप्पणी गरेका छन् ।
आजपा अध्यक्ष साहले आज सामाजिक सञ्जाल फेसबुकमा एक स्टाट्स लेख्दै वीरगंजमा सरकारले सामाजिक सद्भाव एवं अमनचैन कायम गर्न गम्भिर नदेखिएको भन्दै दुख व्यक्त गरेका छन् ।
विगत पाँच दिनदेखी वीरगंजमा साम्प्रदायिक तनाव एवं कफ्र्यूकोे सकसका बीच बाचिरहदा समेत सरकार किन कानमा तेल हालेर सुतेको होला भन्दै आजपा अध्यक्ष साहले प्रश्न गरेका छन् ।
‘वीरगंजवासी लगातार ५ दिनदेखि साम्प्रदायिक तनाव एवं कफ्र्यूको सकसमा बाचिरहदा सरकार किन कानमा तेल हालेर सुतेकोहोला ? वीरगंजबाट ३÷३ वटा संघिय मन्त्री रहेका ओली सरकारले वीरगंजको पिड़ादायी अवस्थाप्रति गम्भीर नदेखिनु दुःखद हो,’ आजपा अध्यक्ष साहले लेखेका छन् ।
देशको आर्थिक राजधानी एवं प्रमुख शहरको जनजिवन दिनदिनै विग्रदै गएको भए पनि सरकार मौन बस्नु लजास्पद रहेको टिप्पणी साहले गरेका छन् । प्रधानमन्त्री केपी शर्मा ओली नेतृत्वको संघीय सरकारमा वीरगंजबाट नेकपा (एमाले)का नेता राजकुमार गुप्ता संघीय मामिला मन्त्री, नेपाली कांग्रेसका नेता अजय चौरसिय कानून मन्त्री र जनता समाजवादी पार्टीका नेता प्रदिप यादव खानेपानी मन्त्री रहेका छन् ।
संघीय सरकारमा रहेका यि मन्त्री सहित स्वयम प्रधानमन्त्री समेत वीरगंज घटनाप्रति उदासिन हुनु दखद भएको बताउदै आजपा अध्यक्ष साहले वीरगंजमा सामाजिक सदभाव एवं अमनचैन कायम गर्न सरकारले विशेष पहलकदमी लिई घटनाको निष्पक्ष छानबिन गरी दोषीलाई कारवाही र पीडितलाई न्याय दिलाउन ध्यानाकर्षण गराएका छन् ।
‘वीरगंजमा सामाजिक सद्भाव एवं अमनचैन कायम गर्न नेपाल सरकारको बिशेष पहलकदमीको माग गर्दै घटनाको निष्पक्ष छानबिन गरि दोषीलाई कारवाही एवं पीडÞितलाई न्याय दिलाउन गम्भीर ध्यानाकर्षण गराउदछु,’ आजपा अध्यक्ष साहले भनेका छन् ।
हनुमान जयन्तीको अवसरमा वीरगंजमा निकालिएको शोभायात्रका क्रममा हिन्दु र मुस्लिम समुदायका बीचमा झड्प भई सामाजिक सदभाव विग्रेको हो । प्रशासनले आश्रुग्यास सहित कफ्र्यू समेत जारी गरेको थियो । तर अहिले पनि वीरगंजको सामाजिक सदभाव कायम भएको छैन् ।
पछिल्लो समय भएको हिजो भएको घटनामा दुई पत्रकार समेत घाईत भएका छन् । आजपा अध्यक्ष साहले उनीहरुको स्वास्थ्यलाभको कामना समेत गरेका छन् । र यथासिघ्र वीरगंजको सामाजिक सद्भाव एवं अमनचैनका लागि सरकारले पहल गरोस् भन्ने माग समेत गरेका छन् ।
आरके श्रीवास्तव,गरुडा,०३ गते वैशाख ।
अशोक राइ नेतृत्वको जनता समाजवादी पार्टीलाइ स्मार्ट तरिकाले पार्टीको गतिविधिलाइ अगाडी बढाइरहेको जिल्ला अध्यक्ष नन्दकिशोर राय यादवले बताएका छन् । पार्टीले उनलाइ जिल्लाको जिम्मेवारी दिएपछि पहिलोचोटी सञ्चारकर्मीहरु समक्ष बोल्दै उनले यस्तो बताएका हुन् । स्मार्ट जमानामा स्मार्ट तरिकाले नै म पार्टीलाइ अगाडी बढाउने सोचमा छु ।
जिल्लाको १६ वटा नगरपालिका र २ वटा गाउँपालिकामा जसपाको गतिविधि द्रुत गतिमा बढाइरहेको उनको भनाइ छ । संगठन निर्माणको कामहरु धमाधम भइरहेको छ । छिट्टै नै कार्यक्रम गरि सार्वजनिक गर्नेछौं । अहिलेको पार्टीहरुले गर्न नसकेको काम हामी गरेर देखाउन चाहन्छौं ।
बिधार्थीकाल देखिनै पार्टीमा लागेको कारण त्यसकै मूल्यांकन स्वरुप आफूलाइ जिल्लाको जिम्मेवारी दिइएको छ । त्यसलाइ भरपुर रुपमा जिम्मेवारी निर्वाह गर्ने बताएका छन् । मधेश आन्दोलन देखि नै आफू पार्टीमा सक्रिय रहदै आएको बताए ।
पार्टी विभाजित भएपछि कुनै अब्बल र कुनै कमजोर हुन सक्छ । जसपा रौतहटमा बलियो पार्टीको रुपमा उभरेर आउने उनको भनाइ छ । आफनो नेतृत्वमा जसपा रौतहट बलियो बन्ने ठोकुवा गरेका छन् ।
उनले भने—पार्टीले जुन भरोसा जताएको छ त्यसमा आफू खरा उत्रने बताएका छन् । अन्त्यमा उनले बुढापाखाहरु मत्र नेतृत्व गर्न सक्छन् भन्ने दिन अब गए । हामी यूवाहरु नेतृत्व गर्न सक्षम छौं । यूवाहरुले देशको समृद्धि र विकासका लागि कम्मर कसेर लाग्नुपर्ने अहिलेको आवश्यकता हो ।
बज्जिकाञ्चल संवाददाता,राैतहट,०३ गते वैशाख ।
गुजरा नगरपालिका–५ मा विना सूचना उपभोक्ता समिति गठन गरिएको आरोपमा बिभिन्न दलका प्रतिनिधिले वडा कार्यालयमा तालाबन्दी गरेका छन् । सो वडाका वडाध्यक्ष शेख जमालुदिनले समिति गठनमा मनोमानी गरेको भन्दै उनिहरुले तालाबन्दी गरेका हुन ।
प्रदेश सरकारबाट लक्ष्मीपुरदेखि घागी खोलासम्मको स्तरोन्नतिको लागी बिनियोजित ३५ लाखको बजेटमा कसैलाई जानकारी नदिई एकलौटी रूपमा उपभोक्ता समिति गठन गरिएको आरोप वडाध्यक्ष शेख जमालुदिनमाथि स्थानियले लगाएको छ ।
यस्तै सोहि वडामा रहेको हरिहरपुर स्वास्थ्य चौकीको भवन निर्माणको लागि आएको बजेटमा भने यसपटक विगतको गल्ती नदोहोर्याउने भन्दै सार्वजनिक भेला आयोजना गरिएको थियो ।
प्रदेश सरकारबाट सो भवन निर्माणको लागी २५ लाख रुपैयाँ बिनियोजित भएको छ । उक्त भवन निर्माणको लागी स्वास्थ्य चौकीको प्राङ्गणमै सर्वपक्षीय सहमतिमा उपभोक्ता समिति गठन गर्ने उद्देश्यले बैठक बसेपनि भेलामा सहमति जुट्न नसकेपछि विवाद चर्किएर झै झगडाको रुप लिएको थियो । विवादका क्रममा सेख कमरुदिन घाइते भएका थिए ।
नेपाली कांग्रेसका वाजिद अली, नेकपा एसका आलम बक्सिद, माओवादी केन्द्रका आस मोहम्मद मन्सुरी, जसपाका आरिफ मिया दर्जी लगायतका स्थानीय नेताहरूले वडाध्यक्षले निरन्तर रूपमा मनोमानी गर्दै आएको आरोप लगाउँदै आएका छन् ।
विवाद चुलिँदै गएपछि प्रहरी-प्रशासनको रोहवरमा वडाको कार्यालयमा तालाबन्दी गरिएको छ। करिव एक हप्ता देखी कार्यालय बन्द हुँदा सेवा लिन आएका नागरिक समस्यामा परेका छन् । नागरिकता सिफारिसका लागि पुगेका स्थानीय आविद हुसेनले भने, “वडामा काम नहुँदा हामी सर्वसाधारणले दुःख पाएका छौं।”
यस विषयमा वडा अध्यक्ष गम्भीर हुनुपर्ने सेवाग्राहीको भनाई छ ।
यता वडाध्यक्ष शेख जमालुदिनले आफुमाथी लागेको आरोपलाई खण्डन गर्दै भने, “समिति सहमतिमा बनाउने हो, तर तालाबन्दी गर्नु समाधान होइन।”
बिकासको काममा कोहि बाधक बन्न नहुने उनको तर्क छ ।
विवाद समाधानको लागि बुधबार गुजराका नगर प्रमुख सन्तलाल चौधरीको निवासमा बसेको सर्वपक्षीय बैठक पनि निष्कर्षविहीन बनेपछि समस्या झन पेचिलो बन्दै गएको छ ।
आरके श्रीवास्तव,राैतहट,०३ गते वैशाख ।
राैतहट प्रिमियर लिग (आरपिएल) मा बुधबार गुजरा राइडर्सले तेस्रो जित निकालेको छ । कटहरिया बाेल्टस विरूद्व उसले आफनाे जित निकालेको हाे ।
टस जितेर पहिले ब्याटिङ गरेको गुजरा राईडर्सले निर्धारित २० ओभरमा ८ विकेट गुमाउँदै १ सय ४४ रनकाे याेगफल तयार पार्न सफल भएको थियोे ।
जवाफी ब्याटिङमा उत्रेको कटहरिया बाेल्टसले १६ ओभर ४ मा अल आउट हुँदै ८२ रन मात्र बनाउन सक्याे । अन्ततोगत्वा गुजरा राइडर्सले ६२ रनकाे जित निकालेको छ ।
खेलमा राइडर्सका खेलाडी प्रदिप पासवान मैन अफ दि मैच घाेषित भएका थिए । उनले २२ रन बनाउँदै नट आउट रहँदै ४ विकेट समेत लिएका थिए ।
मंगलबार पनि प्रतियोगितामा बलियो मानिएको तराइ टाइगर गरुडा विरुद्धको खेलमा गुजरा राइडर्सले विजयी हासिल गरेको थियोे ।
टस जितेर पहिले बैटिङ्ग गर्दै गुजरा राइडर्सले २० ओभरमा ८ विकेटको क्षतीमा १ सय २८ रन बनाएको थियो । जवाफी बैटिङ्गमा उत्रेको तराइ टाइगर गरुडाको टिमले १९ ओभर ३ बल खेल्दै सम्पूर्ण विकेट गुमाइ मात्र १ सय २० रन बनाउन सकेको थियो ।
यसरी ८ रनले गुजरा राइडर्स विजयी भएको थियोे । खेलमा ४९ रन र २ विकेट लिएका विशाल पटेलले मैन अफ द मैच घोषित भएका छन् ।
जारी आरपिएल खेलमा जिल्लाका पाँच वटा टिम सहभागी छन् । जसमा गौर वारियर्सल ,तराई टाईगर ,गुजरा राइडर्स,कटहरिया बोल्टस र राजदेवी सुपर किंग्स रहेका छन् ।
काठमाडौं, वैशाख ३ गते । लोकतान्त्रिक समाजवादी पार्टी, नेपालका अध्यक्ष महन्थ ठाकुरले पूर्वराजा ज्ञानेन्द्र शाहको नेपालमा कुनै अस्तित्व नरहेको बताउनु भएको छ ।
बुधवार पार्टी केन्द्रीय कार्यालय बबरमहलमा आयोजित नयाँ वर्षको शुभकामना आदानप्रदान कार्यक्रमलाई सम्बोधन गर्दै उहाँले यस्तो बताउनु भएको हो । उहाँले राजा देशबाट गइसकेको भन्दै पूर्वराजा शाह राजा नै नरहेको जिकिर गर्नुभयो । उहाँले अस्तित्व नभए पनि आफूलाई पूर्वराजा भनेर ठाउँ ठाउँमा हिँड्ने गरेको बताउनु भयो । उहाँले फागुन ७ गते र नयाँ वर्षको अवसरमा पूर्व राजा शाहले दिनुभएको शुभकामनाप्रति असन्तुष्टि जनाउनु भयो । पूर्वराजा शाहलाई संसदीय व्यवस्था मान्ने तर बदमासी गर्न खोजिरहेको आरोप लगाउनु भयो ।
अध्यक्ष ठाकुरले भन्नुभयो, ‘‘अहिले पनि हामी संघर्षकै अवस्थामा छौँ । माइतीघर मण्डला कहिल्यै खालि हुँदैन । त्यहाँ सधैँ नै जुलुस प्रदर्शन भइरहेको हुन्छ । चैत्र १५ गतेको घटना त देखेका नै छौँ । जसले देखेको छ, सबै आफ्नो आफ्नो व्याख्या गरिरहेका छन् । इतिहासको सबै चिज जे छ, त्यो सही मात्रै हुँदैन । घटना सही हुन्छ, त्यहाँ दुई जना मारिए, जुलुस प्रदर्शन भयो यो सही हो । तर अरु कुरा आफ्नो आफ्नो मूल्यांकन छ । यो सबै मिलाएर इतिहास हुन्छ । राजावादी आफ्नो व्याख्या गरिरहेका छन्, अरु आफ्नो व्याख्या गरिरहेका छन् । राजा त गइसकेका हुन् । उनी छँदै थिएनन् । उनको अस्तित्व नै छैन । तर पनि उनी आफूलाई पूर्वराजा भनेर हिँडेका छन् । ठाउँमा ठाउँमा उपस्थित भएका छन् । अघि बढ फागुन ७ गतेको उनको वक्तव्य । त्यत्तिकै आपत्तिजनक वक्तव्य नयाँ वर्षको उपलक्ष्यमा दिइएको छ । संसदीय व्यवस्था उनले मानेका छन्, तर त्यो आफ्नो अधीनमा हुनुपर्छ भनेर लागेका छन् । उनको बदमासी यहाँ पनि स्पष्ट देखिन्छ ।’
अध्यक्ष ठाकुरले आफूहरु अझै पनि संघर्षमै रहेको जिकिर गर्नुभयो । सभार गाेरखापत्र
