बज्जिकाञ्चल संवाददाता,राैतहट,२०८२ जेठ ०९ गते ।

चुरे तथा वनजंगल संरक्षण अभियानले मधेश प्रदेशका वन सचिव उद्धव घिमिरेलाई तत्काल बर्खास्त गरी कारबाहीको माग गरेको छ । शुक्रबार जारी प्रेस विज्ञप्तिमा अभियानले घिमिरेमाथि गम्भीर लापरवाही र वन संरक्षणमा असक्षमता देखाएको आरोप लगाउँदै उनलाई अन्यत्र सरुवा गरी योग्य व्यक्तिको नियुक्तिको माग गरेको हो ।

रौतहट डिभिजनका विभिन्न सव-डिभिजन कार्यालयहरू — गैडाटार, चन्द्रपुर, वृन्दावन, चोचा र पौराही क्षेत्रमा फैलिएको अवैध वन अतिक्रमण, काठ तस्करी र सरकारी संरचना निर्माणप्रति अभियानले गम्भीर चिन्ता व्यक्त गरेको छ। विशेष गरी चन्द्रपुर–२ मा पाँच बिगाहा भन्दा बढी वन क्षेत्र अतिक्रमण भई सयौं सिसौका रुख फँडानी गरिएको दाबी गरिएको छ ।

Oplus_0

अभियानले सार्वजनिक गरेको भिडियोमा अतिक्रमणको प्रमाण देखिएपछि उक्त प्रमाण मेटाउने उद्देश्यले वैशाख महिनाको अत्यधिक गर्मीमा वृक्षारोपण गरिएको उल्लेख छ। यस्तै, गुजरा–३ स्थित सिम्री सिक्टि टोलमा झण्डै पाँच बिगाहा वनमा मकै खेती भइसकेको छ।

२०८१ पुसमा भएको काठ लिलामी प्रक्रियामा समेत अनियमितता भएको भन्दै अभियानले राजदेवी, परवेज, सुरज, आरएन, कल्याणी, नन्दनी, सुरेन्द्र, लक्ष्मी लगायत काठ मिलहरूसँग गोप्य अवैध सम्झौता गरिएको आरोप लगाएको छ। रु. २२०० को दरमा काठ बिक्री गर्नुपर्नेमा रु. १४८० मा टेन्डर गरिएर राज्यलाई ठगी भएको दाबी गरिएको छ।

अभियानले मधेश प्रदेश सरकार, वन मन्त्रालय र सम्बन्धित निकायहरूलाई निष्पक्ष छानबिन गरी दोषीमाथि कडा कानुनी कारबाही गर्न आग्रह गरेको छ। साथै, चुरे तथा वनजंगल संरक्षणमा सबै सरोकारवालाहरू — राजनीतिक दल, सञ्चारमाध्यम र नागरिक समाज — को सक्रिय सहकार्यको आवश्यकता औंल्याएको छ।

यसैबीच, पूर्व वनमन्त्रीको बर्खास्तीलाई अभियानले सकारात्मक कदम भन्दै स्वागत गरेको छ र नव नियुक्त वनमन्त्री सञ्जय यादवलाई सफल कार्यकालको शुभकामना दिएको छ। मुख्यमन्त्री सतिश सिंहलाई वैशाख २१ मा बुझाइएको ज्ञापनपत्रपछि सुरु भएको विरोध कार्यक्रमले मन्त्री बर्खास्तीको मार्ग प्रशस्त गरेको अभियानको दाबी छ।

आरके श्रीवास्तव,राैतहट,२०८२ जेठ ०९ गते । 

“निर्वाचन अघि जनतालाई दिएका वाचाहरू जस्तै कोल्ड स्टोर, सय शय्याको नगर अस्पताल र प्रत्येक गाउँमा पक्की सडक निर्माण मेरो पहिलो प्राथमिकता हो,” नगरप्रमुख जलन्धर सिंह जैसवारले स्थानीय तहको भूमिकाबारे आयोजित न्युज २४ को ‘सीधा कुरा मेयरसँग’ कार्यक्रममा स्पष्ट पारेका छन् ।

शुक्रवार पचरौता नगरपालिका अन्तर्गत बेनाैली बजारमा सम्पन्न कार्यक्रमकाे प्रत्यक्ष प्रसारण गरिएको थियो । स्थानीय तहको अधिकार, सेवा प्रवाह र विकास निर्माणका विविध पक्षमा छलफल गरिएको कार्यक्रममा सिंहले आफ्नो तिन वर्षे कार्यकालमा शिक्षा, स्वास्थ्य, कृषि र भौतिक पूर्वाधारका क्षेत्रमा महत्वपूर्ण प्रगति भएको दाबी गरेका छन् ।

नगरप्रमुख जैसवारले नगरभित्र सुशासनसहितको समावेशी विकासमा जोड दिँदै, “सहमति, सहकार्य र पारदर्शितामार्फत विकास योजनाहरू अघि बढाइँदैछ,” भने । उनले एमबिबिएस अध्ययनका लागि एक छात्र र एक छात्रालाई वार्षिक १०/१० लाख रुपैयाँ छात्रवृत्ति दिने र एसईईमा उत्कृष्ट नतिजा ल्याउने विद्यार्थीलाई नगद पुरस्कार दिने योजना सार्वजनिक गरेका छन् ।

कार्यक्रममा सहभागी भएका वडा अध्यक्षहरू र स्थानीय जनप्रतिनिधिहरूले पारदर्शिता, जवाफदेहिता र सूचना प्रवाह सुधारमा जोड दिनुपर्ने आवश्यकता औंल्याएका थिए । कार्यक्रम न्युज २४ का प्रस्तोता सुमन ढुंगानाले सञ्चालन गरेकाे पचराैता नगरपालिकाका नगर प्रवक्ता लक्ष्मी यादवले जानकारी गराएका हुन् ।

काठमाडौं,२०८२ जेठ ०९ गते । 

सर्वोच्च अदालतले राष्ट्रिय स्वतन्त्र पार्टी (रास्वपा) का सभापति एवं पूर्वगृहमन्त्री रवि लामिछानेलाई थुनामा पठाउने उच्च अदालत बुटवलको आदेश सदर गरेको छ ।

न्यायाधीश डा. नहकुल सुवेदी र बालकृष्ण ढकालको इजलासले शुक्रबार लामिछानेलाई थुनामुक्त गराउन दायर गरिएको उनकी पत्नी निकिता पौडेलको बन्दीप्रत्यक्षीकरण निवेदन खारेज गरेको हो ।

अब सुप्रिम सहकारी ठगीसम्बन्धी मुद्दा जिल्ला अदालत रूपन्देहीबाट टुंगो नलागेसम्म लामिछाने थुनामा रहने छन् । उनी थुनामुक्त हुन जिल्ला अदालतबाट सफाइ पाउनुका साथै अन्य आरोपहरूबाट समेत उन्मुक्त हुनुपर्नेछ ।

सुप्रिम सहकारी प्रकरणमा उच्च अदालत बुटवलले जिल्ला अदालतको आदेश उल्ट्याउँदै लामिछानेलाई थुनामा पठाउने निर्णय गरेको थियो ।

उक्त आदेशविरुद्ध लामिछाने पत्नी पाैडेलले सर्वोच्चमा बन्दीप्रत्यक्षीकरणसहित आदेश बदरको निवेदन दर्ता गराएका थिए  । सभार फरकधार

काठमाडौं । आम जनता पार्टी (आजपा) का अध्यक्ष तथा पूर्वमन्त्री प्रभु साहले एयरपोर्टबाट भिजिट भिसाका नाममा भईरहेको मानव तस्करी सरकारकै संलग्नतामा भईरहेको बताएका छन् ।

काठमाडौं सिंहदरवार स्थित आजपाको संसदीय दलको कार्यालयमा आज (शुक्रबार) पत्रकारसंग कुराकानी गर्दै अध्यक्ष साहले यसको सम्पूर्ण जिम्मेवारी प्रधानमन्त्री केपी शर्मा ओलीले लिनुपर्ने बताए । भिजिट भिसाका नाममा मानव तस्करी खुलेयाम भईराख्दा समेत प्रधानमन्त्री ओली र गृहमन्त्री रमेश लेखक किन मौन बसेको भन्दै उनले नैतिकता प्रदर्शन गर्नुपर्ने बताए ।

‘भिजिट भिसाका नाममा मानव तस्करी खुलेयाम भईरहेको छ । एयरपोर्टबाटै सरकारकै संलग्नता एवं सेटिङमा भईरहेको छ । यसको सम्पूर्ण जिम्मेवारी प्रधानमन्त्री र गृहमन्त्रीले नै लिनुपर्छ,’ आजपा अध्यक्ष साहले भने, ‘प्रधानमन्त्रीजी मौनता साधनु र गृहमन्त्रीजी प्रतिक्रिया विहिन हुनु भनेको सरकारको प्रत्यक्ष संलग्नता रहेको पुष्टि हुन्छ ।’

नक्कली भुटानी शरणार्थी घटनालाई नै विर्साउँने गरी एयरपोर्टबाटै भिटिज भिसाको नाममा भईरहेको मानव तस्करी घटनामा प्रधानमन्त्री ओली किन मौन बसेको भन्दै उनले प्रश्न उठाएका छन् । उनले प्रश्न गर्दै भने, ‘एयरपोर्टबाट खुलेयाम मानव तस्करीको बिषय सार्वजनिक भईराख्दा प्रधानमन्त्री ओली बोल्नुपर्दैन ? के यसको जिम्मेवारी प्रधानमन्त्रीले लिनुपर्दैन् ? यो गम्भिर प्रश्न हो, सरकारले जवाफ दिनुपर्छ, अलिकति नैतिकता छ भने नैतिकता प्रदर्शन गर्नुपर्छ ।’

एयरपोर्टबाटै सरकारकै संलग्नता र प्रत्यक्ष सेटिङमा भिजिट भिसाको नाममा भईरहेको मानव तस्करी घटनाले नक्कली भुटानी शरणार्थी काण्ड समेत विर्साउने गरि रहेको टिप्पणी उनले गरे । उनले भने, ‘हाम्रै चेलीबेटी समेतलाई बेचेर लुट्ने सरकारको विकल्प खोज्नुपर्छ । भुटानी शरणार्थी घटनालाई विर्साउने गरी भईरहेको एयरपोर्टको मानव तस्करीमा कांग्रेस र एमालेकै नेताहरुको संलग्नता देखियो ।’

पहिला पनि कांग्रेस–एमालेकै नेताहरु प्रत्यक्ष संलग्न रहेको भुटानी शरणार्थी काण्ड सबैलाई जानकारी भएकै बिषय भएको बताउदै उनले अहिले पनि नेपाली चेलिबेटी समेतलाई लुटने, मानव तस्करी गर्ने काम दुई तिहाईको शक्तिशाली सरकारले गर्नु दुखद भएको बताए ।

आरके श्रीवास्तव,राैतहट,२०८२ जेठ ०९ गते । राैतहट जिल्लाको कटहरिया नगरपालिका–५ मा अवस्थित माध्यामिक विद्यालय वलिरामपुरमा आज एक स्वागत कार्यक्रम आयोजना गरी नवआगन्तुक प्रधानाध्यापक अनिल कुमार निधिलाई स्वागत गरिएको छ ।

अनिल कुमार निधि कटहरिया नगरपालिकाको शिक्षा शाखामा समेत सक्रिय रहँदै आएका छन् । शिक्षा क्षेत्रमा लामो अनुभव बोकेका निधिले वलिरामपुर माविमा प्राचार्यको रूपमा कार्यभार सम्हाल्दै विद्यालयको शैक्षिक तथा भौतिक विकासमा नयाँ ऊर्जा थप्ने विश्वास व्यक्त गरिएको छ ।

कार्यक्रममा विद्यालयका शिक्षक, कर्मचारी, विद्यार्थी तथा अभिभावकहरूको उपस्थिति रहेको थियो । कार्यक्रममा बोल्दै प्रधानाध्यापक निधिले विद्यालयको गुणस्तरीय शिक्षामा सुधार ल्याउने प्रतिबद्धता व्यक्त गर्दै सबै पक्षसँग सहकार्यमा अघि बढ्ने जनाएका छन् ।

कटहरिया नगरपालिका शिक्षा शाखाले समेत प्रधानाध्यापक निधिलाई सफल कार्यकालको शुभकामना व्यक्त गरेको छ ।

राजेश निर्माणी,राैतहट,२०८२ जेठ ०९  । 
रौतहटको वृन्दावन नगरपालिकाका नगरप्रमुख विनोद प्रसाद कुर्मीले शुक्रबार एक समारोहका बीच विद्यालय भवनको शिलान्यास गरेका छन् ।

वृन्दावन नगरपालिका वडा नम्बर २ स्थित श्री नेपाल माध्यमिक विद्यालय,बिश्रामपुरमा आयोजित कार्यक्रममा मेयर कुर्मीले ३५ लाख रुपैयाँको लागतमा निर्माण हुन लागेको सुविधा सम्पन्न दुईतले भवनको शिलान्यास गरेका छन् ।

उक्त विद्यालयमा भवनको अभावका कारण विद्यार्थीहरू खुला चौरमा बसेर अध्ययन गर्न बाध्य हुँदै आएका थिए। सोही अभाव हटाउने र शिक्षा क्षेत्रलाई सुदृढ बनाउने उद्देश्यले भवन निर्माण थालिएको नगरप्रमुख कुर्मीले जानकारी दिएका छन् ।

उनका अनुसार विद्यालयकै जमिनमा पठनपाठनको सहज वातावरण सिर्जना गर्न नगरपालिका आफैंले बजेट विनियोजन गरी भवन निर्माण प्रक्रिया अघि बढाएको हो ।

स्थानीय बासिन्दा, विद्यालय परिवार तथा विद्यार्थीहरूले उक्त कदमलाई स्वागत गर्दै गुणस्तरीय शिक्षाको बाटो खोल्ने विश्वास व्यक्त गरेका छन् ।

आरके श्रीवास्तव,गरूडा,०९ गते जेठ । 

भौतिक पूर्वाधार विकास मन्त्रालयको सहयोगमा राैतहटकाे परोहा नगरपालिका–७ मा २५ लाख रुपैयाँको लागतमा सडक ढलान कार्य सुरु गरिएको छ । सो सडक निर्माणको शिलान्यास लोकतान्त्रिक समाजवादी पार्टी (लोसपा) नेपालका मधेस प्रदेश सचिव ओम लोक पटेलले एक कार्यक्रमकाबीच गरेका हुन् ।

शिलान्यास कार्यक्रमलाई सम्बोधन गर्दै सचिव पटेलले भने, “स्थानीय तहको समुचित विकास बिना समृद्धि सम्भव छैन । जनताको प्रत्यक्ष सुविधा हुने पूर्वाधार निर्माणमा हामी प्रतिबद्ध छौं । यो सडक ढलान परियोजना परोहाका बासिन्दाको लागि सुविधा र गर्वको विषय हो ।”

उनले थपे, “मधेसका प्रत्येक वस्तीमा बाटो, बिजुली, पानी र शिक्षा स्वास्थ्य जस्ता आधारभूत पूर्वाधार पुर्‍याउने हाम्रो लक्ष्य हो। हामी जनतासँग गरेका वाचा पूरा गर्दै अघि बढिरहेका छौं ।”

सडक ढलान सम्पन्न भएपछि सो क्षेत्रका स्थानीय बासिन्दाहरूले आवागमनमा सहजता पाउने र वर्षायाममा देखिने समस्याहरूको समाधान हुने विश्वास लिइएको छ । परियोजना चालू आर्थिक वर्ष भित्र सम्पन्न गरिने उनले जानकारी गराएका हुन् ।

कार्यक्रममा स्थानीय प्रतिनिधि, समाजसेवी तथा बासिन्दाहरूको उल्लेखनीय उपस्थिति रहेको थियो ।

बज्जिकाञ्चल संवाददाता,राैतहट,२०८२ जेठ ०८ गते । 

रौतहटको चन्द्रनिगाहपुरस्थित एएन प्लाजा होटलमा डिभिजन वन कार्यालयको आयोजनामा “वन संरक्षण प्रणालीमा आधारित दिगो वन व्यवस्थापन” विषयक दुईदिने तालिम सुरु भएको छ । तालिम सामुदायिक वन उपभोक्ता समूहका पदाधिकारीहरूलाई लक्षित गर्दै सुरु गरिएको हो ।

तालिम उद्घाटन समारोहमा डिभिजन वन प्रमुख हेमन्त प्रसाद साहले वन संरक्षण तथा सुशासनका सवालमा कडा धारणा प्रस्तुत गरे । उनले योजनाहरू स्थानीय उपभोक्ताको आवश्यकता अनुसार निर्माण हुनुपर्नेमा जोड दिँदै भने, “काठमाडौँ वा जनकपुरमा बसेर तयार गरिने कार्ययोजनाले वनको दिगो विकास सम्भव छैन। योजना समुदायकै आवश्यकता र वास्तविकता अनुरूप बन्नुपर्छ ।”

उनले सामुदायिक वनमा रूख कटानी गर्दा सुकिसकेका, बुढा, ढलेका वा मर्न लागेको रूख मात्र काट्न निर्देशन दिए। वन सफाइको नाममा हुने अनावश्यक रूख फडानी रोक्न उनले कडा चेतावनी पनि दिए । “यस्तो कार्यमा संलग्न भए कडा कानुनी कारबाही हुनेछ,” साहले स्पष्ट पारे ।

वन क्षेत्रमा अनधिकृत संरचनाहरू—जसमा पोखरी, पैनी, मन्दिर, सामुदायिक भवन आदिको निर्माण भइरहेको सूचनामा प्रतिक्रिया दिँदै उनले भने, “यस्ता संरचना हटाउने प्रक्रिया अघि बढिसकेको छ। सम्बन्धित निकायलाई पत्राचार भइसकेको छ। अब त्यसमा कसरी भुक्तानी हुन्छ? यस्तो लगानी डुब्ने पक्का छ ।”

साहले सहभागीहरूलाई लाभान्वित घरधुरीको यथार्थ डेटा संकलन गर्न, महिला–पुरुष सहभागीताको विवरण राख्न र तथ्यमा आधारित अभिलेख राख्न आग्रह गरे। उनले वन व्यवस्थापनमा पारदर्शिता र जवाफदेहिता अनिवार्य रहेको उल्लेख गर्दै भने, “सुशासनका लागि कसैसँग सम्झौता हुँदैन ।”

तालिममा डिभिजन वन कार्यालयका विभिन्न विज्ञहरूले सहभागीहरूलाई दिगो वन व्यवस्थापन, वन ऐन तथा नियमावली, र प्राकृतिक स्रोत व्यवस्थापनसम्बन्धी विषयमा प्रशिक्षण दिइरहेका छन् । तालिममा रौतहट जिल्लाका विभिन्न सामुदायिक वन उपभोक्ता समूहका अध्यक्ष, सचिवलगायतका पदाधिकारीहरूको उपस्थिति रहेको छ ।

सहभागीहरूले तालिमबाट आफूहरू थप जिम्मेवार र सचेत हुने विश्वास व्यक्त गरेका छन् । तालिमको उद्देश्य सामुदायिक वन व्यवस्थापनलाई प्रभावकारी बनाउँदै पर्यावरणीय सन्तुलन कायम राख्नु र उपभोक्ताको क्षमता अभिवृद्धि गर्नु हो ।

आरके श्रीवास्तव,राैतहट,२०८२ जेठ ०८ गते । 

जनमत पार्टीका राष्ट्रिय उपाध्यक्ष माननीय ई.बसन्त कुशवाहा दोस्रोपटक मधेश प्रदेश सरकारमा मन्त्री नियुक्त भएका छन् ।  उनले उद्योग, वाणिज्य तथा पर्यटन मन्त्रालयको जिम्मेवारी सम्हाल्दै सपथ ग्रहण गरेका छन् ।

यसअघि कुशवाहा तत्कालीन मुख्यमन्त्री सरोज कुमार यादवको नेतृत्वको सरकारमा कृषि मन्त्री रहेका थिए ।  दोस्रोपटक मन्त्रिपदमा पुनः नियुक्त भएपछि रौतहटबासीबीच विकासको अपेक्षा अझ बलियो बनेको छ ।

जनमत पार्टीले हालै मधेश प्रदेश सरकारबाट आफ्ना दुई मन्त्रीहरूलाई फिर्ता बोलाएको छ । मन्त्री फिर्ता गरिएपछि वसन्त कुशवाहालाई उद्योग,वाणिज्य तथा पर्यटन मन्त्रालय र सञ्जय यादवलाई वन तथा वातावरण मन्त्रालयको जिम्मेवारी दिइएको हो ।

रौतहट जिल्लाबाट पुनः एकपटक मन्त्री नियुक्त भएसँगै स्थानीयवासीमा उत्साह छाएको छ भने जिल्लाको समग्र विकासमा नयाँ गति आउने विश्वास गरिएको छ ।

पार्टी तथा शुभेच्छुकहरूले मन्त्री कुशवाहालाई सफल कार्यकालको शुभकामना दिएका छन् ।