बज्जिकाञ्चल संवाददाता,रौतहट, असोज ३० गते ।
रौतहटको कटहरिया नगरपालिकामा मन्त्रालयबाट नयाँ प्रमुख प्रशासकीय अधिकृतका रूपमा खटाइएका उपसचिव कमल ज्ञवालीको कार्यशैलीलाई लिएर विवाद उत्पन्न भएको छ। नगरपालिकामा हाजिर नै नभई कोष तथा लेखा नियन्त्रक कार्यालय रौतहटका प्रमुख मानदेव ठाकुरसँगको समन्वयमा पालिकाको खाता सञ्चालन गरी उनी फर्किएको आरोप लागेको छ।
नगरपालिकामा यसअघि देखि नै विभिन्न समस्या रहँदै आएका बेला नयाँ प्रमुख प्रशासकीय अधिकृतको जिम्मेवारीमा आएका ज्ञवालीले समस्याको समाधान गर्न पहल नगरेको भन्दै नगरप्रमुख अजयप्रकाश जयसवालले असन्तुष्टि व्यक्त गरेका छन्।

बडादशैँको समयमा तलबभत्ता नपाएको भन्दै नगरपालिकामा कार्यरत करारका कर्मचारीहरूले ज्ञवाली आउनुअघि नै कार्यालयमा तालाबन्दी गरेका थिए। कर्मचारीको तलबभत्ता भुक्तानी, सेवाग्राहीको सामाजिक सुरक्षा भत्ता वितरण तथा अत्यावश्यक सेवाको सञ्चालनजस्ता विषयमा समस्या कायम रहेकै अवस्थामा नयाँ प्रमुख प्रशासकीय अधिकृतको कार्यशैलीले थप अन्योल सिर्जना गरेको नगरप्रमुख जयसवालको भनाइ छ।
त्यस्तै, कटहरिया नगरपालिका–५ मा सञ्चालित खानेपानी आयोजनाको विद्युत् महसुल भुक्तानी हुन नसक्दा नेपाल विद्युत् प्राधिकरणको मौलापुर वितरण केन्द्रले विद्युत् लाइन काटेको छ। यसका साथै केही लाभग्राहीले अझै सामाजिक सुरक्षा भत्ता पाउन नसकेको बताइएको छ।
चाडपर्वको समयमा कर्मचारीले तलबभत्ता नपाउनु, सामाजिक सुरक्षा भत्ता वितरणमा ढिलाइ हुनु र खानेपानीजस्तो अत्यावश्यक सेवा प्रभावित हुनु गम्भीर विषय भएको नगरप्रमुख जयसवालले बताएका छन्। उनका अनुसार, यस्ता समस्या समाधान गर्नुको सट्टा पालिकालाई थप अस्तव्यस्त बनाइएको छ।
नगरपालिकामा हाजिरसमेत नभई खाता सञ्चालन गरिएको र कार्यालयको जिम्मेवारी सम्हालेर समस्याको समाधान गर्नुपर्ने अवस्थामा सम्बन्धित अधिकारी फर्किएको विषयलाई लिएर कर्मचारी तथा जनप्रतिनिधिहरूले असन्तुष्टि व्यक्त गरेका छन्।

खाता सञ्चालनबारे कोष तथा लेखा नियन्त्रक कार्यालयको स्पष्टीकरण

यस विषयमा कोष तथा लेखा नियन्त्रक कार्यालय रौतहटका प्रमुख मानदेव ठाकुरसँग प्रतिक्रिया लिँदा उनले प्रमुख प्रशासकीय अधिकृत हाजिर भए वा नभएको जानकारी आफूलाई नभएको बताएका छन्। मन्त्रालयको सरुवा पत्रका आधारमा नगरपालिकाको खाता सञ्चालन गरिएको उनको भनाइ छ।

यद्यपि, प्रमुख प्रशासकीय अधिकृतको हाजिरीको अवस्था, खाता सञ्चालनका लागि अपनाइएको प्रक्रिया तथा यसमा सम्बन्धित निकायहरूको भूमिकाबारे थप स्पष्टता आवश्यक देखिएको छ।
यस विषयमा प्रतिक्रिया लिन खोज्दा प्रमुख प्रशासकीय अधिकृत कमल ज्ञवालीको मोबाइल फोन स्विच अफ रहेकाले उनको भनाइ प्राप्त हुन सकेन। उनको प्रतिक्रिया प्राप्त भएमा समाचारमा समेटिनेछ।
नगरपालिकामा देखिएका समस्या समाधान गर्नुपर्ने जिम्मेवारी बोकेका अधिकारीहरूबीच समन्वयको अभाव हुँदा त्यसको प्रत्यक्ष असर कर्मचारी, जनप्रतिनिधि र सर्वसाधारण सेवाग्राहीमा परेको नगरप्रमुख जयसवालको भनाइ छ। अब सम्बन्धित निकायले खाता सञ्चालनको प्रक्रिया, कर्मचारीको तलबभत्ता, सामाजिक सुरक्षा भत्ता तथा खानेपानी सेवासम्बन्धी समस्याबारे स्पष्ट पार्दै आवश्यक कदम चाल्नुपर्ने देखिन्छ।

बज्जिकाञ्चल संवाददाता,रौतहट, असोज ३० गते ।

दशैंजस्तो महान् चाडपर्वका बेला कटहरिया नगरपालिकाका वडा नं. ४ र ५ का सर्वसाधारणलाई खानेपानीको समस्या हुन नदिन नगरप्रमुख अजय प्रकाश जयसवालको पहलमा विद्युत् लाइन सुचारु गराउन आवश्यक प्रक्रिया अघि बढाइएको छ ।

कटहरिया नगरपालिका अन्तर्गतका वडा नं. ४ र ५ मा खानेपानी सञ्चालनका लागि प्रयोग हुँदै आएको विद्युत् लाइन काटिएपछि स्थानीय बासिन्दालाई चाडपर्वको समयमा खानेपानीको समस्या भएको अवस्थालाई मध्यनजर गर्दै नगरप्रमुखले यसको समाधानका लागि पहल गरेका हुन् ।

नगरपालिकाको नगर कार्यपालिकाको कार्यालयले असोज २९ गते नेपाल विद्युत् प्राधिकरण, मौलापुर वितरण केन्द्रलाई पत्राचार गर्दै खानेपानीको विद्युत् लाइन तत्काल सुचारु गरिदिन आग्रह गरेको थियो । साथै, विद्युतको बाँकी बक्यौता रकमको यकिन विवरण उपलब्ध गराउनसमेत अनुरोध गरिएको छ ।

नगरपालिकाको अनुरोधपछि जिल्ला प्रशासन कार्यालय, रौतहटले पनि खानेपानीको विद्युत् लाइन दशैं अवधिभर सुचारु गराउन नेपाल विद्युत् प्राधिकरणलाई पत्र पठाएको छ ।

प्रमुख जिल्ला अधिकारी लक्ष्मीप्रसाद पौडेलद्वारा जारी पत्रमा नगरपालिकाले बाँकी बक्यौता रकम भुक्तानी गर्न प्रतिबद्धता जनाएको उल्लेख गर्दै दशैं अवधिभरका लागि विद्युत् सेवा सुचारु गराउन आवश्यक सहयोग गर्न आग्रह गरिएको छ ।

चाडपर्वको समयमा सर्वसाधारणलाई स्वच्छ खानेपानीको पहुँचबाट वञ्चित हुन नदिन नगरप्रमुखले देखाएको सक्रियताले स्थानीयको आधारभूत आवश्यकतालाई प्राथमिकता दिएको सन्देश दिएको छ । विद्युत् लाइन काटिँदा खानेपानी आपूर्तिमा पर्न सक्ने असरलाई समयमै सम्बोधन गर्न नगरपालिका र जिल्ला प्रशासनबीच समन्वयसमेत भएको छ ।

नगरपालिकाले विद्युत् प्राधिकरणसँग बक्यौताको विवरण माग गर्दै भुक्तानीको प्रतिबद्धता जनाएको र जिल्ला प्रशासन कार्यालयले समेत सहजीकरणका लागि पहल गरेपछि खानेपानी सेवा पुनः सञ्चालन हुने अपेक्षा गरिएको छ ।

नगरप्रमुखको पहलमा अघि बढाइएको यस प्रयासले दशैंको समयमा वडा नं. ४ र ५ का बासिन्दालाई खानेपानीको समस्या हुन नदिन स्थानीय सरकारको जिम्मेवारीबोध र जनताप्रतिको संवेदनशीलता झल्काएको छ।

बज्जिकाञ्चल संवाददाता,रौतहट,३० गते असाेज ।

रौतहटको कटहरियामा बडादसैँ तथा दुर्गा पूजा मेलाको अवसरमा आयोजित बेलन्यौतन कार्यक्रममा हजारौँ श्रद्धालु भक्तजनहरूलाई निःशुल्क निम्बु पानी वितरण गरिएको छ ।

कटहरिया स्थित निराला जेनरल स्टोरका सञ्चालक महाशक्ति निराला र सिंगापुर बेभरेज नेपालको संयुक्त सहकार्यमा सो सेवा उपलब्ध गराइएको हो । दुर्गा पूजा मेलाको अवसरमा बेलन्यौतन पूजाका लागि उपस्थित भएका ठूलो संख्याका श्रद्धालु भक्तजनहरूलाई शीतलता प्रदान गर्ने उद्देश्यले सिंगापुर बेभरेज नेपालबाट उत्पादित निम्बु पानी वितरण गरिएको सञ्चालक निरालाले जानकारी दिनुभयो ।
मेलामा सहभागी हजारौँ भक्तजनहरूले निम्बु पानी ग्रहण गर्दै आयोजक तथा सहयोगी संस्थाप्रति आभार व्यक्त गरेका छन् । धार्मिक तथा सांस्कृतिक परम्पराको संरक्षणसँगै सामाजिक सेवाको भावले यस्ता कार्यक्रमहरू आयोजना गरिएको सञ्चालक निरालाले बताउनुभयो ।

बज्जिकाञ्चल संवाददाता,राैतहट,३० गते असाेज ।

रौतहटको फतुवा विजयपुर नगरपालिका–१ स्थित बैरगनियाँ चोक दुर्गा पूजाको अवसरमा आकर्षक बत्तीहरूले झिलिमिली बनेको छ । स्थानीय युवाहरूको सक्रियतामा चोकलाई विभिन्न रंगका मनमोहक बत्तीहरूले सजाइएको हो ।

दुर्गा पूजालाई विशेष र आकर्षक बनाउन युवाहरूले देखाएको सक्रियताले बैरगनियाँ चोकको सौन्दर्य थप बढाएको छ । बत्तीको आकर्षक सजावटले चोकको वातावरण रमणीय बनेको छ भने यसले पर्वको उत्साह र रौनकसमेत बढाएको छ ।

धार्मिक तथा सांस्कृतिक पर्वका अवसरमा स्थानीय युवाहरूले देखाएको सहभागिता र सक्रियताले सामुदायिक एकता, सहकार्य र सामाजिक सद्भावको सन्देश दिएको छ ।

दुर्गा पूजाको अवसरमा बैरगनियाँ चोकलाई झिलिमिली बनाइएको जानकारी पत्रकार रूपेश यादवले दिनुभएको छ

असोज २० गते

रौतहट । रौतहटका अतिरिक्त हुलाक कर्मचारीले लामो समयदेखि न्यून पारिश्रमिकमा काम गर्नुपरेको भन्दै श्रमअनुसारको सुविधा उपलब्ध गराउन सरकारसँग माग गरेका छन्।

उनीहरूका अनुसार अहिले बिहान ९ देखि साँझ ५ बजेसम्म कार्यालयमा काम गर्नुपर्ने भए पनि मासिक ७ हजारदेखि ८ हजार रुपैयाँ हाराहारी मात्रै पारिश्रमिक पाउने गरेका छन्। यसले दैनिक खर्च चलाउनसमेत कठिन भएको कर्मचारीहरूको गुनासो छ।

फतुवा विजयपुर नगरपालिका–२ दुधियास्थित इलाका हुलाक कार्यालयका अतिरिक्त हुलाक कर्मचारी तथा पत्रवितरक आनन्द पौडेलले आफू २० वर्षदेखि सेवामा रहे पनि पारिश्रमिक र सेवा–सुविधामा अपेक्षित सुधार नभएको बताए।

मिठुअबा अतिरिक्त हुलाककी पत्रवितरक बिमला देवीले १२ वर्षदेखि काम गरे पनि ७ हजार २ सय रुपैयाँको पारिश्रमिकले परिवार धान्न मुस्किल भएको बताइन्।

कर्मचारीहरूले पोसाक तथा आवश्यक सामग्री जुटाउनसमेत समस्या रहेको जनाएका छन्। आफूहरूलाई बेवास्ता गर्दै विभिन्न स्थानीय तहमा करार कर्मचारी राख्दा राज्यको खर्च बढेको उनीहरूको भनाइ छ।

काम गर्ने समय बढे पनि पारिश्रमिकमा सुधार नभएको भन्दै अतिरिक्त हुलाक कर्मचारीले उचित पारिश्रमिक र सेवा–सुविधाको व्यवस्था गर्न सरकारसँग आग्रह गरेका छन्। रामआधार यादव

रामअधार यादव, राैतहट,१५ गते असाेज ।

रौतहटको कटहरिया नगरपालिका–९ डुमरियामा अवस्थित श्री बाबा बैजुनाथ सुगर मिलले आर्थिक वर्ष २०८२/०८३ मा उखु क्रसिङ तथा सञ्चालन गरे पनि उखु बिक्री गरेका किसानहरूले हालसम्म आफ्नो रकम तथा नेपाल सरकारबाट प्राप्त हुने अनुदानसमेत नपाएको विषय प्रतिनिधिसभाको बैठकमा उठाइएको छ।प्रतिनिधिसभाको बैठकमा बोल्दै सांसद धिरज पटेल (रविन्द्र) ले डुमरियास्थित श्री बाबा बैजुनाथ सुगर मिलमा उखु बिक्री गरेका किसानहरूले लामो समयदेखि भुक्तानी नपाएको भन्दै सरकारको ध्यानाकर्षण गराउनुभएको हो।

उखु किसानहरूले उखु चलान गरेको करिब ९–१० महिना बितिसक्दा पनि आफ्नो उत्पादनको रकम नपाएको गुनासो गरेका छन्। उखु नगदे बालीका रूपमा खेती गरिने भए पनि उत्पादन बिक्री गरेपछि समयमै भुक्तानी नपाउँदा किसानहरू आर्थिक समस्यामा परेको उनीहरूको भनाइ छ।किसानहरूका अनुसार उखु चलान गर्ने समयमा सामान्यतः ७ देखि १५ दिनभित्र भुक्तानी गर्ने प्रक्रिया तथा प्रतिबद्धता रहने गरे पनि मिल सञ्चालन पक्षले सोअनुसार नियमित रूपमा रकम भुक्तानी नगरेको गुनासो छ। मिल सञ्चालन पक्षले आफूखुसी ढंगले भुक्तानी गर्दै आएको भन्दै किसानहरूले आपत्ति जनाएका छन्।

विशेषगरी हिन्दू धर्मावलम्बीहरूको महान् चाड दसैँ, तिहार तथा छठ पर्व नजिकिँदै गर्दा समेत उखुको रकम भुक्तानी नहुँदा किसानहरू थप समस्यामा परेको बताएका छन्। चाडपर्वको समयमा घरायसी खर्च, बालबालिकाको शिक्षा, स्वास्थ्य उपचार तथा अन्य आवश्यक खर्च जुटाउनुपर्ने अवस्थामा आफ्नो उत्पादनको रकम नपाउँदा आर्थिक भार बढेको किसानहरूको गुनासो छ।सांसद पटेलले किसानहरूले आफ्नो उत्पादनको रकमसँगै नेपाल सरकारबाट प्राप्त हुने अनुदानसमेत पाउन बाँकी रहेको उल्लेख गर्दै सम्बन्धित उद्योग तथा सरकारी निकायबीच आवश्यक समन्वय गरी किसानले पाउनुपर्ने सम्पूर्ण रकम तत्काल उपलब्ध गराउन सरकारसँग आग्रह गर्नुभएको छ।

उखु किसानहरूले आफूहरूले मेहनत गरेर उत्पादन गरेको उखुको रकम लामो समयसम्म रोकिँदा खेतीपाती तथा दैनिक जीवन सञ्चालनमा समेत कठिनाइ भइरहेको बताएका छन्। उनीहरूले चाडपर्वलाई समेत ध्यानमा राख्दै बाँकी रहेको उखुको रकम र सरकारले उपलब्ध गराउने अनुदान रकम यथाशीघ्र भुक्तानी गर्न सम्बन्धित निकायसँग माग गरेका छन्।डुमरियास्थित बाबा बैजुनाथ सुगर मिलका उखु किसानको भुक्तानीको विषय प्रतिनिधिसभामै उठेपछि लामो समयदेखि रकमको प्रतीक्षामा रहेका किसानहरूले अब आफ्नो समस्या समाधान हुने अपेक्षा गरेका छन्।

बज्जिकाञ्चल संवाददाता,राैतहट,१५ गते असाेज ।

गौर नगरपालिका–अन्तर्गत बी.पी. चोकमा सञ्चालित फुलतारा डेरीमा जिल्ला प्रशासन कार्यालय, जिल्ला प्रहरी कार्यालय, घरेलु तथा साना उद्योग कार्यालय तथा गुणस्तर तथा नापतौल सम्बन्धी निकायको संयुक्त टोलीले छापा मारेको छ।

अनुगमनका क्रममा डेरीले सञ्चालन गर्दै आएको भान्सा तथा होटलमा बिक्रीका लागि राखिएका मिठाईलगायत विभिन्न खाद्य सामग्री गुणस्तरहीन अवस्थामा भेटिएको टोलीले जनाएको छ। त्यस्तै, मिठाई तथा खाद्य सामग्री तयार गर्ने भान्सा अत्यधिक फोहोर तथा दुर्गन्धित अवस्थामा रहेको पाइएको बताइएको छ।

खाद्य सामग्रीको गुणस्तर तथा सरसफाइमा गम्भीर लापरबाही भेटिएपछि सम्बन्धित निकायले फुलतारा डेरीलाई २ लाख रुपैयाँ जरिवाना गरेको जनाइएको छ।टोलीले जरिवानाबापतको रकम एक साताभित्र बुझाउन निर्देशन दिएको छ। तोकिएको समयभित्र जरिवाना रकम नबुझाए डेरीमा सिलबन्दी गर्ने चेतावनी समेत दिइएको बताइएको छ।

अनुगमन टोलीले खाद्य सामग्रीको गुणस्तर, भान्साको सरसफाइ तथा उपभोक्ताको स्वास्थ्यसँग प्रत्यक्ष सम्बन्धित विषयमा व्यवसायीहरूलाई आवश्यक मापदण्ड पालना गर्न निर्देशन दिएको छ।

बज्जिकाञ्चल संवाददाता,राैतहट,१५ गते असाेज ।
कटहरिया । कटहरिया फिडरअन्तर्गत जलैया पुलदेखि दुधीयाभारसम्मको क्षेत्रमा विद्युत लाइन आसपासका झाडी तथा बुस कटिङ (झाडी सफाइ) गर्ने कार्य हुने भएको छ ।
उक्त कार्यका कारण आज दिउँसो १ बजेदेखि ३:४५ बजेसम्म सो क्षेत्रको विद्युत आपूर्ति अनियमित हुन सक्ने नेपाल विद्युत प्राधिकरण माैलापुर वितरण केन्द्रले जनाएको छ।
विद्युत लाइनको सुरक्षित सञ्चालन तथा सम्भावित अवरोध न्यूनीकरणका लागि बुस कटिङको काम गर्न लागिएको हो । निर्धारित समयभन्दा अगावै कार्य सम्पन्न भएमा सोहीअनुसार विद्युत आपूर्ति पुनः नियमित गरिने जनाइएको छ।
सम्बन्धित क्षेत्रका विद्युत उपभोक्तालाई कार्य अवधिमा विद्युत आपूर्ति प्रभावित हुन सक्ने भन्दै आवश्यक सावधानी अपनाउन आग्रह गरिएको छ।

सागर संगम ठाकुर, रौतहट — असोज ५

रौतहटको कटहरियाबाट प्रसारण हुँदै आएको बज्जिकाञ्चल एफएम ८९.२ मेगाहर्जप्रति श्रोताको आकर्षण पछिल्लो समय बढ्दै गएको पाइएको छ।
स्थानीय भाषा, समाचार, गीत–संगीत, मनोरञ्जन तथा स्थानीय सरोकारका विषयलाई प्राथमिकता दिँदै विभिन्न कार्यक्रम सञ्चालन गरेपछि एफएमप्रति श्रोताको रुचि बढेको हो।
सोमबार बज्जिकाञ्चल एफएमले सञ्चालन गरेको ‘बज्जिकाञ्चल बहस’ कार्यक्रममा सहभागी श्रोता गन्धिर यादवले प्रविधिको विकाससँगै रेडियो सुन्ने माध्यम परिवर्तन भए पनि एफएमले स्थानीय विषयवस्तुलाई प्राथमिकता दिएकाले आफ्नो प्रभाव कायम राख्न सफल भएको बताउनुभयो।

उहाँका अनुसार विगतमा फ्रिक्वेन्सीमार्फत नियमित रेडियो सुन्ने गरे पनि अहिले सामाजिक सञ्जाल तथा डिजिटल माध्यमबाट एफएमका कार्यक्रम सुन्ने क्रम बढेको छ। दैनिक तथा साप्ताहिक रूपमा प्रसारण हुने विविध कार्यक्रमका कारण बज्जिकाञ्चल एफएमप्रति श्रोताको आकर्षण बढ्दै गएको उहाँले बताउनुभयो। एफएमका सञ्चालक तथा प्रस्तोता आरके श्रीवास्तवका अनुसार एफएमले दैनिक समाचार बुलेटिनसँगै ‘शुभप्रभात भोजपुरिया धमाका’, ‘संगीत सफर’, विद्यार्थी केन्द्रित ‘ब्रेन चेक’, ‘पुरस्कार पाँच सय’, ‘उत्कृष्ट विचार’ र ‘सुनाइ अपन प्रतिभा’ लगायतका कार्यक्रम सञ्चालन गर्दै आएको छ।

श्रोता यादवले प्रत्येक शुक्रबार सञ्चालन हुने ‘क्युरी स्वाद संवाद’ कार्यक्रमले पुराना तथा नियमित श्रोतासँगको सम्बन्ध थप मजबुत बनाउन सहयोग पुगेको बताउनुभयो। स्थानीय भाषा, समाचार, गीत–संगीत, मनोरञ्जन तथा स्थानीय सरोकारका विषयलाई प्राथमिकता दिएकाले एफएमप्रति आफ्नो रुचि बढेको उहाँको भनाइ छ। कार्यक्रममा सहभागी अन्य श्रोताले पनि पछिल्लो समय एफएमको फ्रिक्वेन्सीमार्फत नियमित रूपमा कार्यक्रम सुन्न थालेको बताएका थिए।

स्थानीय समुदायका समस्या, आवाज, सुझाव तथा प्रतिभालाई सञ्चारमाध्यममार्फत बाहिर ल्याउन एफएमले महत्वपूर्ण भूमिका निर्वाह गरेको उनीहरूको भनाइ थियो। एफएमले श्रोतासँग प्रत्यक्ष संवाद गर्ने ‘क्युरी संवाद’ कार्यक्रममार्फत गाउँ तथा टोलमै पुगेर कार्यक्रम सञ्चालन गर्दै आएको जनाएको छ। उक्त कार्यक्रमअन्तर्गत पहिलोपटक फतुवा विजयपुर नगरपालिका–१ स्थित गमहरिया चोकबाट कार्यक्रम सुरु गरिएको थियो।

त्यसपछि कटहरिया नगरपालिकाको छेदी चोक र फतुवा विजयपुर नगरपालिका–४ स्थित टेंग्राहामा कार्यक्रम सञ्चालन गरिएको एफएमले जनाएको छ। स्थानीयस्तरमै रेडियो कार्यक्रम सञ्चालन हुँदा आफ्ना समस्या, विचार तथा सुझाव प्रत्यक्ष रूपमा राख्ने अवसर प्राप्त भएको भन्दै स्थानीयले कार्यक्रमप्रति उत्साहजनक सहभागिता जनाएका थिए। श्रोता तथा स्थानीय समुदायसम्म पुग्ने ‘क्युरी स्वाद संवाद’ कार्यक्रमको बिजनेस पार्टनर कटहरियास्थित निराला जनरल स्टोरप्रति श्रोता यादवले आभार व्यक्त गर्नुभयो। कार्यक्रममा सहभागी श्रोताले क्युरी मसालाको उत्पादन तथा स्थानीय बजारमा यसको उपलब्धताबारे समेत चर्चा गरेका थिए।

कार्यक्रममा सहभागी श्रोताले महिलाको सहभागिता बढाउन महिलाकेन्द्रित रेसिपी कार्यक्रम सञ्चालन गर्न सुझाव दिएका छन्। एफएम व्यवस्थापनले क्युरी मसालाको प्रायोजनमा महिला सहभागितालाई केन्द्रमा राखेर रेसिपी कार्यक्रम सञ्चालन गर्ने तयारी भइरहेको जनाएको छ। त्यसैगरी किसानका समस्या, कृषि उत्पादन, आधुनिक कृषि प्रविधि तथा कृषिसम्बन्धी आवश्यक जानकारी समेटिएको छुट्टै कार्यक्रम सञ्चालन गर्न पनि श्रोताले माग गरेका छन्। एफएम व्यवस्थापनले कृषिलगायत विभिन्न विषय केन्द्रित नयाँ कार्यक्रमको तयारी भइरहेको र ती कार्यक्रम छिट्टै प्रसारणमा ल्याइने जनाएको छ।

नेपाल हिन्द रेडियो श्रोता संघका सदस्य जफरुल्लाह अन्सारीसहित विभिन्न श्रोताले एफएमका कार्यक्रमलाई निरन्तरता दिनुपर्नेमा जोड दिएका थिए। उनीहरूले कुनै पनि कार्यक्रम छोटो समयमै बन्द नगरी निरन्तर सञ्चालन गर्न तथा श्रोता र रेडियोबीचको सम्बन्ध अझ मजबुत बनाउन सुझाव दिएका छन्।

त्यस्तै, बिछोडिएका साथीभाइ तथा आफन्तसँग पुनः सम्पर्क स्थापित गर्न सहयोग पुग्ने गरी ‘आफ्नो सन्देश’ जस्ता कार्यक्रम सञ्चालन गर्न पनि श्रोताले एफएमका सञ्चालक श्रीवास्तवलाई सुझाव दिएका थिए।
श्रोताले बज्जिकाञ्चल एफएमले स्थानीय समुदायका समस्या तथा आवाजलाई प्राथमिकताका साथ उठाउँदै आएको भन्दै आगामी दिनमा शिक्षा, स्वास्थ्य, कृषि, महिला, युवा तथा स्थानीय सरोकारका विषयलाई थप प्राथमिकता दिन आग्रह गरेका छन्।

कार्यक्रममा यादवले एफएमका प्राविधिक तथा सहकर्मीलाई धन्यवाद दिँदै एफएमप्रति निरन्तर माया, साथ र सहयोग गर्ने सम्पूर्ण श्रोताप्रति आभार व्यक्त गर्नुभयो। एफएम परिवारले पनि आगामी दिनमा थप नयाँ तथा श्रोतामैत्री कार्यक्रम सञ्चालन गर्दै गाउँ–गाउँसम्म पुग्ने प्रतिबद्धता जनाएको छ।

राजेश निर्माणी, रौतहट, असोज ६

रौतहटको माधवनारायण नगरपालिका–१ दिपहीका शम्भु पासवानको खेतमा काम गर्ने क्रममा मृत्यु भएको छ। युरिया मल तथा विषादी छर्ने क्रममा खेतमा बेहोस भएर ढलेका पासवानको उपचारका क्रममा मृत्यु भएको परिवारले जनाएको छ।
विपन्न दलित परिवारका पासवान स्थानीय चन्देश्वर राय यादवको खेतमा काम गर्न गएको परिवारको भनाइ छ। काम गर्ने क्रममा उनी अचानक खेतमै ढलेर बेहोस भएको र तत्काल उद्धार तथा उपचार नगरिएका कारण उनको मृत्यु भएको परिवारले आरोप लगाएको छ।
परिवारका अनुसार घरमा कोही नभएको मौका छोपी यादव र उनका भाइ बिन्देश्वर राय यादवले पासवानलाई आफ्नो खेतमा काम गर्न लगेका थिए। खेतमा मल तथा विषादी छर्ने क्रममा उनी गम्भीर अवस्थामा ढलेपछि दुवै जनाले तत्काल उद्धार नगरी घटनास्थलमै छाडेर हिँडेको परिवारको आरोप छ।
पछि स्थानीयवासीले खेतमा पासवानलाई ढलिरहेको अवस्थामा देखेपछि परिवारलाई खबर गरेका थिए। त्यसपछि परिवारजन घटनास्थल पुगेर उनलाई एम्बुलेन्समार्फत उपचारका लागि शिवनगरस्थित आनन्द पोलिक्लिनिक पुर्‍याएका थिए। त्यहाँ उपचार सम्भव नभएपछि थप उपचारका लागि वीरगन्जस्थित तराई हस्पिटल लगिएको थियो। अस्पताल पुगेपछि चिकित्सकले उनलाई मृत घोषणा गरेको परिवारले जनाएको छ।
पासवानको मृत्यु भएपछि उनका दुई छोरा र एक छोरीसहितको परिवार संकटमा परेको छ। परिवारका अनुसार उनी नै घरको मुख्य कमाउने व्यक्ति थिए। उनीहरूको नाममा दुई धुर घडेरी र त्यसमा बनेको फुसको छाप्रोबाहेक अन्य सम्पत्ति नरहेको बताइएको छ।
घटनापछि परिवारले निष्पक्ष छानबिन गरी मृत्युको वास्तविक कारण सार्वजनिक गर्न माग गरेको छ। साथै घटनामा कसैको लापरवाही वा कमजोरी देखिए कानुनबमोजिम कारबाही गर्न र परिवारलाई उचित क्षतिपूर्ति उपलब्ध गराउन उनीहरूले माग गरेका छन्।
महाजन भन्छन्– ‘आरोप गलत र निराधार हो’
यता, घटनाबारे यादवको धारणा लिन सञ्चारकर्मीको टोली उनको निवास पुगेको थियो। सञ्चारकर्मीहरूले घटनाबारे भिडियोमार्फत आफ्नो धारणा राख्न आग्रह गरे पनि यादवले क्यामेरामा बोल्न अस्वीकार गरे।
यद्यपि अनौपचारिक कुराकानीमा यादवले आफूमाथि लगाइएको आरोप गलत र निराधार भएको दाबी गरे। उनका अनुसार पासवान लामो समयदेखि आफूअन्तर्गत कृषि मजदुरका रूपमा काम गर्दै आएका थिए।
यादवले पासवानलाई पाँच कठ्ठा खेतमा काम गर्न दिएको र त्यहाँको उब्जनी दुवै पक्षले उपभोग गर्ने गरी सहमति भएको दाबी गरे।
उनका अनुसार पासवानले खेतमा युरिया मल छरिसकेपछि नजिकैको पैनीमा नुहाउने भन्दै बसेका थिए। आफू भने घर फर्किएको र पछि बाटोमा रिँगटा लागेर रुखमुनि सुतेको अवस्थामा एक स्थानीयले देखेर खबर गरेपछि आफु घटनास्थल पुगेको यादवको भनाइ छ।
महाजन यादवले पासवानलाई पहिलेदेखि नै उच्च रक्तचापको समस्या रहेको र केही समयअघि पक्षघातसमेत भएको यादवले दाबी गरे। त्यसको उपचार आफूले गराइदिएको उनको भनाइ छ।
केही समयदेखि उनी उच्च रक्तचापको औषधि खान छाडेका कारण उनलाई हृदयघात भएको हुन सक्ने यादवको दाबी छ। उनले आफूहरूले नै एम्बुलेन्स बोलाएर सुरुमा उपचारका लागि आनन्द पोलि क्लिनिक शिवनगरमा पठाएको बताउँदै घटनामा आफ्नो कुनै लापरवाही नभएको दाबी गरे।
घटनाको वास्तविक कारण भने सम्बन्धित निकायबाट हुने अनुसन्धान र चिकित्सकीय परीक्षणबाट स्पष्ट हुने देखिन्छ।