काठमाडौँ । नेपाल आयल निगमले बुधबारदेखि देशभर पुनः १४.२ किलोग्राम तौलको खाना पकाउने ग्यास सिलिन्डर बिक्री वितरण सुरु गरेको जनाएको छ।

निगमका अनुसार भारतका विभिन्न ग्यास भर्ने केन्द्र र प्रशोधन केन्द्रबाट ग्यास आपूर्तिमा सुधार आएपछि तथा उपभोक्ताबाट १४.२ किलोग्रामको सिलिन्डरको माग बढेकाले बुधबारदेखि साविककै तौलको ग्यास बिक्री गर्ने व्यवस्था गरिएको हो । यस सिलिन्डरको मूल्य दुई हजार ६० रुपैयाँ कायम गरिएको  निगमले जनाएको छ ।

यसअघि आपूर्ति व्यवस्थापन सहज बनाउन निगमले गत फागुन २९ गतेदेखि अर्को निर्णय नभएसम्म ७.१ किलोग्राम ग्यास भरेर बिक्री–वितरण गर्ने व्यवस्था लागू गरेको थियो । निगमले केही समयसम्म बजारमा ७.१ किलोग्राम र १४.२ किलोग्राम दुवै प्रकारका सिलिन्डर उपलब्ध हुन सक्ने जनाएको छ । त्यसैले उपभोक्तालाई ग्यास खरिद गर्दा सिलिन्डरको तौल र मूल्य यकिन गरेर मात्रै खरिद गर्न आग्रह गरिएको छ ।

निगमका अनुसार हाल भारतबाट नियमित रूपमा खाना पकाउने ग्यास आयात भइरहेकाले आवश्यकताअनुसार मात्र ग्यास खरिद गर्न र अनावश्यक रूपमा भण्डारण नगर्न पनि उपभोक्तासँग अनुरोध गरिएको छ ।एभरेष्ट न्यूज एजेन्सी

काठमाडौं । नक्कली भुटानी शरणार्थी प्रकरणमा काठमाडौं जिल्ला अदालतले पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँण, पूर्वगृहसचिव टेकनारायण पाण्डेसहित १५ जनालाई सजाय निर्धारण गरेको छ । न्यायाधीश तेजबहादुर खड्काको इजलासले कसुर अभियोगमा दोषी ठहर गर्दै सजाय तोकेको हो ।

अदालतले कसुर अनुसार कैद र जरिवाना भनी अलग अलग सजाय किटान गरे पनि जुन कसुरमा सबभन्दा बढी कैद सजाय तोकिएको छ, उनीहरूले त्यो मात्र भुक्तान गरे हुने कानुनी प्रावधान रहेको छ । जरिवानाको हकमा भने सबै कसुरमा तोकिएको जरिवाना तिर्नुपर्ने व्यस्था छ । नेपालको फौजदारी कसुर (सजाय निर्धारण तथा कार्यान्वयन) ऐन, २०७४ को ११ को २ र ३ मा यस सम्बन्धि व्यवस्था गरिएको छ ।

अदालतले तोकेको सजाय अनुसार पूर्वउपप्रधानमन्त्री टोपबहादुर रायमाझी, पूर्व गृहसचिव टेकनारायण पाण्डे, इन्द्रकुमार राई र आङटावा शेर्पाले ४ वर्ष कैद बस्नु पर्ने भएको छ ।

अदालतले उनीहरूलाई ठगीमा २ वर्ष कैद र २० हजार जरिवाना, संगठित अपराधमा ३ वर्ष कैद र ३० हजार जरिवाना, राज्यविरूद्धको कसुरमा १ वर्ष ६ महिना कैद र १५ हजार जरिवाना, त्यस्तै अतिरिक्त ६ , महिना कैद र एकीकृत कसुरतर्फ ४ वर्ष कैद र ४० हजार जरिवाना तोकेको छ । यसमध्ये अधिकतम कैद ४ वर्ष रहेकाले सो समय जेलमा बस्नुपर्ने भएको छ ।

त्यसैगरी नक्कली भुटानी शरणार्थी प्रकरणमा मतियार ठहर भएका पूर्वगृहमन्त्री बालकृष्ण खाँणलाई २ वर्ष कैद बस्नुपर्ने भएको छ । खाँणलाई किर्तेमा एक वर्ष कैद र १० हजार जरिबाना, ठगीमा ढेड वर्ष कैद र १५ हजार जरिबाना, संगठित अपराधमा ६ महिना कैद र पाँच हजार जरिबाना तथा एकीकृत कसुरमा २ वर्ष कैद र २० हजार जरिबानाको सजाय भएको छ । थप तीन महिना जेल साय समेत गरिएको छ ।  खाँणले बढी कैद सजाय तोकिएको एकीकृत कसुरमा २ वर्ष कैद भुक्तानी गर्नुपर्ने भएको छ ।

त्यस्तै, विक्रम भन्ने गोविन्द कुमार चौधरी, सन्देश शर्मा र सागर राईलाई पनि ४ वर्ष कैद हुनेछ भने भुटानी शरणार्थी नेता टेकनाथ रिजाललाई २ वर्ष कैद हुनेछ । यो प्रकरणका योजनाकार सानु भण्डारी र केशव दुलालले ४ वर्ष कैद सजाय तोकिएको छ । जिल्ला अदालतको फैसला अनुसार नरेन्द्र केसी, शमसेर मियाँ, हरिभक्त महर्जन र निरञ्जन कुमार खरेलले १ वर्ष कैद तोकिएको छ ।

२०८० जेठ १० गते पूर्वउपप्रधानमन्त्री रायमाझी, पूर्वगृहमन्त्री खाण, पूर्वगृहसचिव पाण्डे सहित ३० जनाविरूद्ध ठगी, लिखत किर्ते, राज्यविरूद्धको अपराध र संगठित अपराध सम्बन्धी कसुर लगाउँदै सरकारी वकिलले मुद्दा दायर गरेको थियो । जस मध्ये रामशरण केसी, टंककुमार गुरूङ, सन्दीप रायमाझी, प्रतीक थापा, लक्ष्मी महर्जन, केशव तुलाधर र आशिष बुढाथोकीले सफाई पाएका थिए ।

काठमाडौं जिल्ला अदालतको यो फैसलाविरुद्ध थुनामा रहेका र बाहिर रहेका कसुरदारले अब उच्च र सर्वोच्चमा पुनरावेदन गर्न पाउने कानुनी व्यवस्था रहेको छ ।एभरेष्ट न्यूज एजेन्सी

काठमाडौँ । वैज्ञानिकहरूले प्रयोगशालामा कृत्रिम रूपमा मानव शुक्राणु विकास गर्ने दिशामा महत्वपूर्ण सफलता हासिल गरेका छन् । अनुसन्धानकर्ताले मानव स्टेम सेलबाट भविष्यमा परिपक्व शुक्राणु बन्न सक्ने प्रारम्भिक शुक्राणु कोशिका विकास गर्न सफल भएका हुन् । यो उपलब्धिले पुरुष बाँझोपनको कारण बुझ्न र भविष्यमा प्रजनन उपचारको नयाँ आधार तयार गर्न सहयोग पुग्ने अपेक्षा गरिएको छ ।

अमेरिकाको पेन्सिल्भेनिया विश्वविद्यालयका अनुसन्धानकर्ताले गरेको यो अध्ययन वैज्ञानिक पत्रिका सेल स्टेम सेलमा प्रकाशित भएको छ । अनुसन्धानका क्रममा वैज्ञानिकहरूले पहिलोपटक मानव स्टेम सेलबाट तयार गरिएका प्रारम्भिक शुक्राणु कोशिकालाई विशेष जैविक वातावरणमा जीवित मुसाको शरीरमा विकास गराएका हुन् । उनीहरूको मुख्य उद्देश्य अहिले परिपक्व शुक्राणु उत्पादन गर्नु नभई मानव शुक्राणु बन्ने प्रारम्भिक जैविक प्रक्रिया राम्रोसँग बुझ्नु रहेको बताइएको छ ।

अनुसन्धानकर्ताका अनुसार यस प्रविधिबाट पुरुष बाँझोपनसम्बन्धी अनुसन्धानमा ठूलो सहयोग पुग्नेछ। हाल पुरुष बाँझोपनका करिब ४० प्रतिशत घटनामा वास्तविक कारण पत्ता लाग्न सकेको छैन। प्रारम्भिक शुक्राणु विकासको प्रक्रिया स्पष्ट रूपमा बुझ्न सके आनुवंशिक तथा जैविक कारण पहिचान गर्न सहज हुने र भविष्यमा नयाँ उपचार विधि तथा औषधि विकासको बाटो खुल्ने विश्वास गरिएको छ। यद्यपि प्रयोगशालामा तयार गरिएका यी कोशिका पूर्ण रूपमा कार्यक्षम छन् वा छैनन् भन्ने कुरा आगामी अध्ययनबाट पुष्टि गर्नुपर्ने अनुसन्धानकर्ताको भनाइ छ।

यस अध्ययनमा वैज्ञानिकहरूले मानव कोशिकालाई पुनः कार्यक्रम गरी बहुक्षमता स्टेम सेलमा रूपान्तरण गरेका थिए । त्यसपछि विशेष जैविक संकेतको प्रयोग गरेर ती कोशिकालाई प्रारम्भिक प्रजनन कोशिकामा परिवर्तन गरिएको थियो। ती कोशिकालाई विकासशील मुसाको अण्डकोषका सहायक कोशिकासँग मिसाएर मुसाको मिर्गौलामाथि बनाइएको विशेष जैविक थैलीमा प्रत्यारोपण गरिएको थियो, जहाँ कोशिकाले अनुकूल वातावरण पाएर विकास गरेका थिए।

करिब छ महिनापछि ती कोशिकाले अण्डकोषजस्तै नलीयुक्त संरचना बनाउँदै स्पर्मेटोगोनिया अवस्थासम्म विकास गरेको अनुसन्धानमा उल्लेख गरिएको छ । यही प्रारम्भिक कोशिकाबाट पछि परिपक्व शुक्राणु बन्ने प्रक्रिया सुरु हुने भएकाले यसलाई मानव प्रजनन विज्ञानमा महत्वपूर्ण उपलब्धिका रूपमा हेरिएको छ। साथै, विकसित कोशिकामा सक्रिय भएका जीनहरू सामान्य मानव स्पर्मेटोगोनियासँग धेरै हदसम्म मिल्दोजुल्दो रहेको पनि अनुसन्धानले देखाएको छ ।एभरेष्ट न्यूज एजेन्सी

चितवन । अविरल वर्षाका कारण नारायणगढ–मुग्लिन सडकखण्डका विभिन्न स्थानमा आइतबार साँझदेखि पहिरो र लेदो खस्दा सडक दुवैतर्फ अवरुद्ध भएको छ ।

सडक डिभिजन भरतपुरका अनुसार सडक अवरुद्ध हुँदा सडकखण्डको बीचमा अलपत्र परेका यात्रु तथा सवारीसाधनलाई आइतबार रातिसम्म पहिरो पन्छाएर सुरक्षित रूपमा गन्तव्यतर्फ पठाइएको थियो ।

तर लगातार वर्षा भइरहेका कारण यस क्षेत्रमा थप पहिरो जाने उच्च जोखिम रहेको भन्दै जिल्ला विपद् व्यवस्थापन समितिको आपत्कालीन बैठकको निर्णयअनुसार जिल्ला प्रशासन कार्यालय चितवनले अर्को सूचना जारी नभएसम्म नारायणगढ–मुग्लिन सडकखण्डमा सबै प्रकारका सवारीसाधन सञ्चालनमा रोक लगाएको जनाएको छ ।

हाल जलविरे नजिक पुनः पहिरो खसेको छ । अन्य स्थानमा खसेको पहिरो र लेदो हटाउन सम्बन्धित क्षेत्रमा आवश्यक उपकरण र मेसिन परिचालन गरिसकिएको सडक डिभिजनले जनाएको छ ।

यस सडकमार्ग हुँदै यात्रा गर्ने यात्रुलाई सडकको पछिल्लो अवस्था बुझेर मात्र यात्रा गर्न तथा सुरक्षाकर्मीको निर्देशन पालना गर्दै सुरक्षित रूपमा यात्रा गर्न सडक डिभिजन भरतपुरले अनुरोध गरेको छ ।एभरेष्ट न्यूज एजेन्सी

काठमाडौं । प्रतिनिधि सभाको बैठक आज बिहान ११ बजेदेखि बस्दैछ । बैठकमा विभिन्न वार्षिक प्रतिवेदन पेस, विधेयक प्रस्तुत तथा अन्तर्राष्ट्रिय सन्धिमाथि छलफल र अनुमोदनसम्बन्धी प्रस्तावहरू अघि बढाइने कार्यसूची रहेको छ ।

बैठकमा प्रधानमन्त्री वालेन्द्र शाहको तर्फबाट कानुन, न्याय तथा संसदीय मामिला मन्त्री सोबिता गौतमले विभिन्न वार्षिक प्रतिवेदन पेस गर्ने कार्यक्रम रहेको छ ।

मन्त्री गौतमले न्याय परिषद्को आर्थिक वर्ष २०८१/०८२ को वार्षिक प्रतिवेदन, न्याय सेवा आयोगको आर्थिक वर्ष २०८१/०८२ को वार्षिक प्रतिवेदन तथा लोक सेवा आयोगको छैसट्ठीऔँ वार्षिक प्रतिवेदन (२०८१ साउनदेखि २०८२ असारसम्म) सदनमा पेस गर्ने कार्यसूची रहेको छ ।

त्यसैगरी बैठकमा अर्थमन्त्री डा. स्वर्णिम वाग्लेले ‘अर्थसम्बन्धी केही नेपाल कानुनलाई संशोधन र खारेज गर्ने विधेयक, २०८३’ प्रस्तुत गर्न अनुमति माग्ने प्रस्ताव राख्नेछन् । त्यसपछि उक्त विधेयक सदनमा प्रस्तुत गर्ने कार्यसूची रहेको छ ।

यस्तै, प्रधानमन्त्री शाहको तर्फबाट मन्त्री गौतमले ‘नेपाल विशेष सेवा ऐन, २०४२ को साविकको व्यवस्था जगाउने सम्बन्धी विधेयक, २०८३’ र ‘राष्ट्रिय सेवा दल विधेयक, २०८३’ लाई दफावार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत गर्नेछिन्।

त्यसैगरी बैठकमा अन्तर्राष्ट्रिय सन्धिमाथि पनि छलफल र अनुमोदनसम्बन्धी प्रक्रिया अघि बढाइनेछ । युवा, श्रम तथा रोजगारमन्त्री रामजी यादवले अन्तर्राष्ट्रिय श्रम संगठनको बाध्यकारी श्रम महासन्धि, १९३० सम्बन्धी सन् २०१४ को प्रोटोकल नं. २९ माथि छलफल गरियोस् भन्ने प्रस्ताव प्रस्तुत गर्नेछन्। साथै उक्त प्रोटोकल अनुमोदन गरियोस् भन्ने प्रस्ताव पनि राख्नेछन् ।

त्यसैगरी मन्त्री यादवले अन्तर्राष्ट्रिय श्रम संगठनको श्रम निरीक्षणसम्बन्धी महासन्धि, १९४७ (नम्बर ८१) माथि सामान्य छलफल गरियोस् र अनुमोदन गरियोस् भन्ने प्रस्ताव प्रस्तुत गर्ने कार्यसूची रहेको छ ।एभरेष्ट न्यूज एजेन्सी

काठमाडौँ । चालु आर्थिक वर्ष २०८२/८३ को ११ महिनामा नेपालको कुल वस्तु निर्यात १२.३ प्रतिशतले वृद्धि भई २ खर्ब ७७ अर्ब ९७ करोड रुपैयाँ पुगेको छ । अघिल्लो आर्थिक वर्षको सोही अवधिमा यस्तो निर्यात ७७.८ प्रतिशतले बढेको थियो ।

गन्तव्यका आधारमा भारततर्फको निर्यात १३.६ प्रतिशत र अन्य मुलुकतर्फको निर्यात ९.२ प्रतिशतले वृद्धि भएको छ। भने चीनतर्फको निर्यातमा ३५.८ प्रतिशतले कमी आएको छ ।

वस्तुगत आधारमा भटमासको तेल, पाम तेल, अलैंची, च्याउचाउ, ब्रान्डलगायतका वस्तुको निर्यात बढेको छ। तर जिंक सिट, पार्टिकल बोर्ड, चिया, ऊनी गलैंचा र हस्तकलाका सामग्रीलगायतका वस्तुको निर्यात घटेको छ । समीक्षा अवधिमा कुल वस्तु आयात १५.२ प्रतिशतले वृद्धि भई १८ खर्ब ९४ अर्ब १० करोड रुपैयाँ पुगेको छ। अघिल्लो वर्षको सोही अवधिमा वस्तु आयात १३.१ प्रतिशतले बढेको थियो ।

मुलुकगत आधारमा भारतबाट हुने आयात ११.८ प्रतिशत, चीनबाट हुने आयात २१.५ प्रतिशत र अन्य मुलुकबाट हुने आयात १८.९ प्रतिशतले वृद्धि भएको छ ।

वस्तुगत आधारमा पेट्रोलियम पदार्थ, चाँदी, यातायात उपकरण, सवारी साधन तथा स्पेयर पार्ट्स, रासायनिक मल, भटमासको कच्चा तेललगायतका वस्तुको आयात बढेको छ । त्यस्तै खाने तेल, हट रोल्ड सिट इन क्वायल, लसुन, एमएस तार, छड, बार, क्वायल, एमएस बिलेटलगायतका वस्तुको आयात घटेको छ ।

चालु आर्थिक वर्षको ११ महिनामा कुल वस्तु व्यापार घाटा १५.७ प्रतिशतले वृद्धि भई १६ खर्ब १६ अर्ब १३ करोड रुपैयाँ पुगेको छ । अघिल्लो वर्षको सोही अवधिमा व्यापार घाटा ६.३ प्रतिशतले बढेको थियो । समीक्षा अवधिमा निर्यात-आयात अनुपात १४.७ प्रतिशत पुगेको छ। अघिल्लो वर्षको सोही अवधिमा यस्तो अनुपात १५.१ प्रतिशत रहेको थियो ।

११ महिनामा भारतबाट परिवर्त्य विदेशी मुद्रामा भुक्तानी गरी १ खर्ब ८० अर्ब १० करोड रुपैयाँ बराबरको वस्तु आयात भएको छ । अघिल्लो वर्षको सोही अवधिमा यस्तो आयात १ खर्ब ६७ अर्ब ३० करोड रुपैयाँ बराबर रहेको थियो ।

बृहत् आर्थिक वर्गीकरणअनुसार समीक्षा अवधिमा कुल निर्यातमा अन्तिम उपभोग्य, मध्यवर्ती र पुँजीगत वस्तुको हिस्सा क्रमशः ६९.३ प्रतिशत, ३० प्रतिशत र ०.७ प्रतिशत रहेको छ । अघिल्लो वर्षको सोही अवधिमा यी वस्तुको हिस्सा क्रमशः ६७.३ प्रतिशत, ३१.७ प्रतिशत र १ प्रतिशत रहेको थियो ।

त्यस्तै, कुल आयातमा अन्तिम उपभोग्य, मध्यवर्ती र पुँजीगत वस्तुको हिस्सा क्रमशः ३८.८ प्रतिशत, ५१.८ प्रतिशत र ९.४ प्रतिशत रहेको छ। अघिल्लो वर्ष यी अनुपात क्रमशः ३९.४ प्रतिशत, ५१.६ प्रतिशत र ९ प्रतिशत रहेका थिए । वार्षिक बिन्दुगत आधारमा २०८३ जेठ महिनामा भन्सार तथ्यांकमा आधारित निर्यातको एकाइ मूल्य सूचकांक ४.२ प्रतिशतले वृद्धि भएको छ भने आयात मूल्य सूचकांक २१ प्रतिशतले बढेको छ ।

त्यस्तै, २०८३ जेठ महिनामा नेपालको व्यापारको सर्त (टर्म्स अफ ट्रेड) १३.९ प्रतिशतले घटेको छ ।एभरेष्ट न्यूज एजेन्सी

अन्नपूर्ण पोष्ट दैनिकका रौतहट संवाददाता प्रिमेश शिवाकोटीको निधन भएको छ । नेपाल प्रेस युनियन रौतहटका अध्यक्ष समेत रहेका चन्द्रपुर नगरपालिका-७ निवासी ३६ वर्षीय सञ्चारकर्मी शिवाकोटीको उपचारको क्रममा सोमबार बिहान निधन भएको हो।

विगत केही समयदेखि मृगौलाको समस्याबाट ग्रसित शिवाकोटीको चितवन नेशनल मेडिकल कलेजमा भइरहेको थियो । उपचारकै क्रममा उनको बिहान निधन भएको हो। उनको परिवारमा श्रीमति र एक छोरी छन् । अन्नपूर्ण

काठमाडौँ । मनोद्दीपक औषधि ट्रामाडोल ७२ हजार ९०० क्याप्सुलसहित लागुऔषध नियन्त्रण ब्युरोले काठमाडौँ महानगरपालिका–६ कुमारीगालबाट दुई जनालाई पक्राउ गरेको छ।

ब्युरोका अनुसार उच्च जोखिमयुक्त क्षेत्रमा निगरानी तथा विशेष अभियान सञ्चालन गर्ने क्रममा उनीहरूलाई पक्राउ गरिएको हो । पक्राउ परेकाहरू औषधिजन्य मनोद्दीपक पदार्थको अवैध कारोबारमा संलग्न रहेको प्रहरीको प्रारम्भिक अनुसन्धानबाट खुलेको छ ।

पक्राउ पर्नेमा सोलुखुम्बुको नेचा सल्यान गाउँपालिका–६ घर भएका २७ वर्षीय किरण सुनाम र मकवानपुरको हेटौँडा उपमहानगरपालिका–७ का २४ वर्षीय अनिल लामा रहेका छन् ।

प्रहरीले उनीहरूको साथबाट ट्रामाडोल ७२ हजार ९०० क्याप्सुल, बा.५७ प २४२४ नम्बरको एउटा स्कुटर र एक थान मोबाइल बरामद गरेको जनाएको छ ।

घटनाबारे थप अनुसन्धान भइरहेको लागुऔषध नियन्त्रण ब्युरोले जनाएको छ।एभरेष्ट न्यूज एजेन्सी

काठमाडौं । अभियन्ता एएवं मेडिकल व्यवसायी दुर्गा प्रसाईंलाई प्रहरीले विमानस्थलबाट नियन्त्रणमा लिएर घर पुर्‍याएको छ ।

झापाबाट आइतबार काठमाडौँ आएका प्रसाईंले विमानस्थलमै कार्यक्रम गर्न लागेपछि प्रहरीले नियन्त्रणमा लिएर घर पुर्याएको हो ।

निषेधित क्षेत्रभित्र कार्यक्रम गर्न खाजेपछि नियन्त्रणमा लिएर भक्तपुरस्थित घर पुर्‍याएको प्रहरीले जानकारी इद्येको छ ।

प्रसाईले गणेश नेपालीको मृत्यु प्रकरण लगाएका विषयमा आफ्ना समर्थकहरु र मिडियालाई विमानस्थलमै सम्बोधन गर्ने तयारी गरेका थिए । त्यसका लागि विमानस्थलमा ठुलो संख्यामा उनका समर्थक र मिडियाकर्मी विमानस्थलमा उपस्थित थिए ।एभरेष्ट न्यूज एजेन्सी