बज्जिकाञ्चल संवाददाता,राैतहट,१७ गते साउन ।
रौतहटको ईशनाथ नगरपालिका वडा नं. २, औरैयामा सञ्चालित बनाना रिसोर्ट (केराबारी) मा शनिबार बिहान भीषण आगलागी हुँदा ४० लाख रुपैयाँभन्दा बढीको सम्पत्ति नष्ट भएको छ ।
शनिबार बिहान करिब ३:४० बजे खाना पकाउने ग्यास सिलिन्डर लिक भएर अचानक आगो लाग्दा रिसोर्टमा रहेका कृषि प्रयोजनका मेसिन, खाद्यान्न, फर्निचर, फ्रिज, लत्ताकपडा, तथा अन्य भौतिक संरचना पूर्ण रूपमा जलेर नष्ट भएको सञ्चालक राकेश गुप्ताले जानकारी दिए ।
बनाना रिसोर्ट नेपाल सरकार र श्री जौहरीमाई कृषि तथा सहकारी संस्थाको संयुक्त लगानीमा सञ्चालित थियो । आगलागीबाट ठूलो परिमाणमा क्षति पुगेको गुप्ताले बताए ।
आगो नियन्त्रणमा लिनका लागि स्थानीयवासी, सशस्त्र प्रहरी र नेपाल प्रहरीको टोलीले संयुक्त रूपमा प्रयास गरेको थियो । ग्यास लिक भएर आगलागी भएको प्रारम्भिक आशंका गरिए पनि प्रहरीले घटनाबारे गहिरो अनुसन्धान भइरहेको जानकारी दिएको छ ।
घटनास्थल अवलोकन गर्न पुगेका नेपाली कांग्रेसका नेता तथा रौतहट क्षेत्र नं. २(क) का क्षेत्रीय सभापति लालबिहारी साहले पीडित व्यवसायीप्रति गहिरो सहानुभूति प्रकट गर्दै सम्भव भएसम्म सहयोग गर्ने प्रतिबद्धता व्यक्त गरेका छन् ।
सञ्चालक गुप्ताका अनुसार, आगलागीको कारणले रिसोर्टको पूरै सेवा सञ्चालन ठप्प भएको छ र अब पुनःस्थापना तथा क्षतिपूर्ति सम्बन्धी पहल आवश्यक रहेको छ ।
प्रहरीको अनुसन्धानपछि थप विवरण सार्वजनिक हुने अपेक्षा गरिएको छ ।
बज्जिकाञ्चल संवाददाता,राैतहट,१७ गते साउन ।
रौतहटकाे गरुडा नगरपालिका–४, गरुडा मा आज एक विशेष भेलामार्फत २५ सदस्यीय वार्ड कमिटी गठन गरिएको छ । उक्त कमिटी ‘बिजुली–पानी फ्री’ अभियानलाई सशक्त बनाउने उद्देश्यले गठन गरिएको हो ।
गठित वार्ड कमिटीको अध्यक्षमा महेसिया साह चयन भएका छन् भने उपाध्यक्षमा शोभा देवी साह, सचिवमा रामधारी साह, सह–सचिवमा मोरनी देवी, र कोषाध्यक्षमा सुगान्धी देवी साह चयन भएका छन् ।
त्यसैगरी, कमिटीमा सदस्यको रूपमा सोसिला देवी साह, चाँदतारा देवी साह लगायत २५ जना सर्वसाधारणको प्रतिनिधित्व रहने गरी चयन गरिएको छ ।
कार्यक्रमका प्रमुख अतिथि आम जनता पार्टीका सचिवालय सदस्य रविन्द्र यादव रहेका थिए भने विशिष्ट अतिथिमा केन्द्रीय सदस्य अमिन्द्र यादव, मञ्जु महतो, रिता शाह, शेहरा खातुन, कमल यादव, लालबाबु शाह, अफ्रोज आलम र राजकुमार शाह सहभागी थिए ।
भेलामा वक्ताहरूले जनताको आधारभूत सेवा, विशेषगरी विद्युत् र खानेपानीमा सुधार ल्याउन नवगठित कमिटीलाई सक्रिय रूपमा लाग्न आह्वान गरेका थिए । कार्यक्रममा स्थानियवासीको उल्लेख्य उपस्थिति रहेको थियो ।
सागर संगम ठाकुर, रौतहट, १७ गते साउन ।
रौतहटको देवाही गोनाही नगरपालिका–९, धरहरीमा सञ्चालित आरपार कोचिङ सेन्टर परिवारले शिक्षक सेवा उत्तीर्ण परीक्षामा उल्लेखनीय सफलता प्राप्त गरेका विद्यार्थीहरूको स्वागत तथा सम्मान कार्यक्रम सम्पन्न गरेको छ ।
उक्त कार्यक्रम स्थानीय समाजसेवी हरिश्चन्द्र प्रसाद यादवको अध्यक्षतामा सम्पन्न भएको थियो भने प्रमुख अतिथि जय किसान नमूना माध्यमिक विद्यालय धरहरीका विद्यालय व्यवस्थापन समितिका अध्यक्ष श्यामनन्दन साह रहनुभएको थियो। २०७९ सालदेखि निरन्तर रूपमा सञ्चालनमा रहेको आरपार कोचिङ सेन्टरले हालैको परीक्षामा ८०% विद्यार्थीलाई सफलता दिलाएको छ।
यस वर्ष तीन जना विद्यार्थी शिक्षक सेवा आयोगको परीक्षामा सफल भएसँगै सम्मान कार्यक्रमको आयोजना गरिएको हो। कार्यक्रममा बोल्दै विद्यालयका प्रधानाध्यापक श्री संजय प्रसाद गुप्ताले कोचिङ सेन्टरको प्रयासको प्रशंसा गर्दै विद्यालय र आफ्नाे व्यक्तिगत तर्फबाट आवश्यक सबै किसिमको सहयोग गर्न तत्पर रहेको बताउनुभयो। कार्यक्रममा वडाध्यक्ष वीर बहादुर साहद्वारा अघिल्लो आर्थिक वर्षमा गरिएको एक लाख रुपैयाँको सहयोग विशेष रूपमा उल्लेख गरिएको थियो। उहाँले वडाका अति विपन्न तथा पिछडिएका वर्गका विद्यार्थीहरूलाई शिक्षामा पहुँच दिलाउन निरन्तर लागिरहेकै कुरा दोहोराउनुभयो।
कोचिङ सेन्टरका संस्थापक रामानन्द प्रसाद यादव र सह-संचालक मुकेश प्रसाद यादवको नेतृत्वमा संस्था शिक्षाको गुणस्तर उकास्न सफल भएको भन्दै विभिन्न वक्ताहरूले भविष्यमा पनि संस्थालाई साथ र सहयोगको प्रतिबद्धता जनाए। कार्यक्रमको अवसरमा प्रशिक्षकहरूलाई ड्रेस वितरण गरिनुका साथै समाजसेवीहरू र पत्रकार सागर संगम ठाकुरलाई दोसल्ला ओढाएर सम्मान गरिएको थियो।
आरके श्रीवास्तव,राैतहट,१७ गते साउन । लोकतान्त्रिक पत्रकार संघको संशोधित विधान अनुसार धनुषाकी प्रियंका शर्मा केन्द्रीय सदस्य पदमा मनोनीत भएकी छिन् । संघका अध्यक्ष कामरेन्द्र वर्माले एक औपचारिक पत्रमार्फत शर्मा लाई मनोनयन गरिएको जानकारी गराउँदै शुभकामना दिएका छन् ।
पत्रमा देश, मधेश, पत्रकारिता र पार्टीको हितमा शर्माको कार्यकाल उल्लेखनीय रहने विश्वास व्यक्त गरिएको छ । वर्माले शुभकामना सन्देशमा भनेका छन्, “यहाँलाई केन्द्रीय सदस्य पदमा मनोनयन गरिएको सहर्ष जानकारीका साथ हार्दिक बधाई छ।”
शर्माको पत्रकारिता क्षेत्रमा लामो अनुभव रहेको र लोकतान्त्रिक मूल्य र मान्यता प्रति प्रतिवद्ध पत्रकारको रूपमा चिनिएकी छिन् । उनको मनोनयनले मधेश क्षेत्रका पत्रकारमा उत्साह थपेको छ ।
काठमाडौं,१७ गते साउन ।
आम जनता पार्टी (आजपा)का अध्यक्ष एवं पूर्वमन्त्री प्रभु साहले बोलबम संस्कृतिले नेपाली समाजलाई प्रगाढरुपमा जोडदै गरहेको बताएका छन् । बोलबम संस्कृतीको सरकारले जर्गेना गर्नुपर्ने उनले बताए ।
भोलेनाथ बोलबम कावरिया संघद्धारा आज (शनिबार) काठमाडौंको कालिमाटीमा आयोजित बोलबम विशेष समारोहलाई सम्बोधन गर्दै आजपा अध्यक्ष साहले समाजलाई एकताबद्ध गर्न महत्वपूर्ण भूमिका निर्वाह गरिरहेको बोलबम संस्कृतिको सरकारले संरक्षण एवं प्रबद्र्धनका गर्नुपर्ने बताए ।
बोलबम संस्कृती सहितको मौलिक धर्म, संस्कृतीको जर्गेना गर्न सरकारले चासो नदिएको बताउदै उनले हिन्दु धर्मावलम्बीले नै हिन्दु धर्म, संस्कृती जोगाएको बताए । नेपालको बिभिन्न शिवालयमा साउन महिनामा बोलबम काँवरियाहरुले विशेष पुजापाठ गर्दैआइरहेको बताउदै उनले त्यसका लागि सरकारले समेत यस्तो कार्यका लागि बजेट बिनियोजन गर्नुपर्ने बताए ।
‘बोलबम काँवरियाहरुले आफ्नो निजि पैसा खर्च गरेर हिन्दु धर्म, संस्कृतीको जर्गेना गर्दै आइरहेका छन् । यस्तो कार्यमा सरकारले समेत बजेटको व्यवस्था गर्नुपर्ने हो । तर सरकारले यस्तो कार्यमा चासो दिनुको साटो अपवाह कार्यमा बढी ध्यान केन्द्रीत गरेको छ । यस्तो बिषयको जर्गेनामा सरकार उदासिन रहेको छ,’ आजपा अध्यक्ष साहले भने ।
कुर्सीका लागि प्रधानमन्त्री जस्तो गरिमामय जिम्मेवारीमा रहेका नेताले हावादारी गफ गरेर हिन्दु धर्मको जर्गेना नहुने बताउदै आजपा अध्यक्ष साहले यस्तो जिम्मेवार व्यक्ति जिम्मेवारीका साथ प्रस्तुत हुनुपर्ने बताए । तथ्य, तथ्यांक, इतिहास, प्रमाणका आधारमा मात्रै कुनै कुरा गर्दा राम्रो हुने बताउदै उनले सस्तो लोकप्रियताका लागि हावादारी गफ गर्न नहुने टिप्पणी गरे । साथै उनले प्रधानमन्त्री ओलीले हिन्दु धर्म, संस्कृतीसंग खेलवाड गरेको समेत बताए ।
भोलेनाथ बोलबम कवरिया संघका अध्यक्ष राजकुमार साह कलवारको अध्यक्षतामा भएको कार्यक्रममा सन्तोष अग्रवाल, त्रिभुवन साह, विपिन जयसवाल, चन्द्र भुषण साह लगायतको विशेष सहभागिता रहेको थियो ।
काठमाण्डौ,१७ गते साउन । पर्यावरण संरक्षणमा निरन्तर सक्रिय रहँदै आएकी अभियन्ता सुनिल यादवलाई “३१ औँ प्रकाश मानव अधिकार पुरस्कार २०८१” प्रदान गरिएको छ । पुरस्कार प्रदान कार्यक्रममा सहभागी हुँदै उनले अनौपचारिक क्षेत्र सेवा केन्द्र (इन्सेक) तथा अभियानमा काँधमा काँध मिलाउँदै साथ दिने सबै अभियन्ता, पत्रकार मित्र तथा वनकर्मीप्रति विशेष आभार प्रकट गरेका हुन् ।
उनले पुरस्कार स्वरूप प्राप्त नगद राशी ५० हजार रुपैयाँ सम्पूर्ण अभियानकर्मीहरूसँग साझा गर्दै, उक्त राशीबाट समाजका विभिन्न स्थानहरूमा वृक्षारोपण र विरुवा वितरण कार्यक्रम सञ्चालन गर्ने घोषणा गरेका हुन् ।
कार्यक्रम स्थलमै ५ हजार १ सय ५० रुपैयाँ बराबरका १५० वटा कागतीका विरुवा वितरण गर्दै अभियानको नयाँ यात्रा आरम्भ गरिएको हो । यस कदमले पर्यावरण संरक्षणको अभियानमा थप ऊर्जा प्रदान गर्ने विश्वास गरिएको छ ।
उक्त अवसरमा उनले भने, “म सधैँ अभियान सँगै रहने सबै सहकर्मी, पत्रकार र वनकर्मीप्रति उच्च सम्मानका साथ धन्यवाद प्रकट गर्छु। यो सम्मान केवल मेरो मात्र नभई सम्पूर्ण अभियानको हो।”
पर्यावरणीय न्याय, हरियाली संरक्षण र जनचेतना अभिवृद्धिका लागि उनी सक्रिय रहँदै आएका छन्। भविष्यमा पनि यस्ता अभियानलाई थप सशक्त बनाउँदै लैजाने उनको प्रतिबद्धता रहेको छ ।
आरके श्रीवास्तव,राैतहट,१६ गते साउन ।
नवप्रवेशी यूवा नेता राजाबाबु साहलाई जनता समाजवादी पार्टी (जसपा) नेपालमा भव्य स्वागत गरिएको छ ।
शनिबार कटहरिया बहुमुखी क्याम्पसमा आयोजित कार्यक्रममा साहलाई जसपा नेपाल नगर कमिटी कटहरियाले सम्मानपूर्वक स्वागत गरेको हो । कार्यक्रममा जसपा नगर अध्यक्ष रामसेवक यादवको अध्यक्षता रहेको थियो भने प्रमुख अतिथि जसपा नेपालका केन्द्रीय सदस्य चुल्हाई राय यादव रहेका थिए । कार्यक्रममा जसपा नेता बच्चा यादवलगायत पार्टीका अन्य नेता तथा कार्यकर्ताहरूको उल्लेख्य उपस्थिति थियो ।
यसअघि साहले काठमाडौंस्थित जसपा नेपालको केन्द्रीय कार्यालयमा आयोजित एक विशेष समारोहमा पार्टी प्रवेश गरेका थिए । जसपा नेपालका अध्यक्ष उपेन्द्र यादवले उनलाई पार्टीको सदस्यता प्रदान गर्दै टीका, माला र अविर लगाएर स्वागत गरेका थिए ।
राजाबाबु साह लामो समयदेखि नेपाली काँग्रेसमा सक्रिय रहँदै आएका थिए । उनले केही दिनअघि पार्टी परित्याग गरी एकाएक जसपा नेपालमा प्रवेश गरेका हुन् ।
उनको आगमनले जसपा नेपालमा थप ऊर्जा र सशक्त राजनीतिक धार प्रवेश हुने विश्वास गरिएको छ ।
बज्जिकाञ्चल संवाददाता,राैतहट,१५ गते साउन ।
राैतहटकाे मौलापुर नगरपालिकाले पत्रकार रविन्द्र प्रजापतिको असामयिक निधनप्रति गहिरो शोक व्यक्त गर्दै उहाँका परिवारजनप्रति समवेदना प्रकट गरेको छ । नगर प्रमुख रिना कुमारी साहको नेतृत्वमा पालिकाले दिवंगत पत्रकारका परिवारलाई नगद रू २५ हजार सहयोग प्रदान गरेको छ ।
नगर प्रमुख साह तथा प्रमुख प्रशासकीय अधिकृत रामबाबु साहले नगरपालिकाकाे तर्फबाट रविन्द्र प्रजापतिको घरमै पुगेर परिवारलाई सो सहयोग रकम हस्तान्तरण गर्नुभएको हो । सो अवसरमा उहाँहरूले स्व. प्रजापतिको आत्माको चिरशान्तिको कामना गर्दै श्रद्धाञ्जली अर्पण गर्नुभएको थियो ।
नगर प्रमुख साहले भनिन्, “पत्रकार रविन्द्र प्रजापतिको असामयिक निधनले हामी सबै स्तब्ध भएका छौं। पालिकाको तर्फबाट यो सानो सहयोग मार्फत उहाँका परिवारलाई केही राहत मिलोस् भन्ने हाम्रो चाहना हो।”
स्व. प्रजापति लामो समयदेखि पत्रकारितामा सक्रिय रहँदै आएका थिए र उनले स्थानीयस्तरमा जनसमस्या उठाउने कार्यमा उल्लेखनीय भूमिका खेलेका थिए ।
स्मरणीय हाेस् गत साउन गते शनिबार राति पत्रकार प्रजापति आफ्नै घरमा झुण्डिएको अवस्थामा फेलापरेका थिए।
आरके श्रीवास्तव,राैतहट,१५ गते साउन ।
रौतहटकाे कटहरिया नगरपालिका–७ मा रहेको श्री मावि बगहीका पूर्व प्रधानाध्यापक सरोज साहलाई विशेष सम्मान गरिएको छ । आफ्नो दुई वर्षे कार्यकालमा इमानदारीपूर्वक सेवा दिएका साहको समर्पण र कर्मनिष्ठाको कदर गर्दै वडा कार्यालयले उनलाई सम्मान गरेको हो ।
समारोहमा वडा अध्यक्ष सहिद मियाँ धोबीले सरोज साहलाई मोबाइल, टाइटन घडी, दुई जोर कपडा, जुत्ता–मोजा, चप्पल, बेल्ट, रूमाल, डायरी, कलमसहित सम्मानपत्र प्रदान गरेका छन् ।
उक्त सम्मानलाई साहले अत्यन्त गहिरो सम्मानका साथ ग्रहण गर्दै सम्पूर्ण वडा परिवारप्रति आभार व्यक्त गरेका छन् ।
“कर्म इमानदारीपूर्वक गर्नुपर्छ, मुल्यांकन अवश्य हुन्छ,” साहले सम्मान ग्रहण गर्दै संक्षिप्त मन्तव्य दिएका थिए । कार्यक्रममा विद्यालयका शिक्षक, स्थानीय अभिभावक, समाजसेवी तथा वडा सदस्यहरूको उल्लेखनीय उपस्थिति रहेको थियो ।
यो सम्मान शिक्षक–शिक्षण पेशाप्रतिको आदर र समर्पणप्रतिको कदरको प्रतीक भएको बताइएको छ । शिक्षक साह हाल श्री जनता मावि कटहरियामा कार्यरत छन् ।
आरके श्रीवास्तव,राैतहट,१५ गते साउन ।
नेपाल विद्युत प्राधिकरणको ४० औं वार्षिकोत्सवको अवसरमा मौलापुर वितरण केन्द्रको प्राङ्गणमा वृक्षारोपण कार्यक्रम सम्पन्न गरिएको छ । कार्यक्रमको नेतृत्व वितरण केन्द्रका कार्यालय प्रमुख ई. रामदिनेश यादवले गर्नुभयो ।
ई. यादवका अनुसार यस प्रकारका कार्यक्रमले वातावरण संरक्षणमा योगदान पुर्याउनुका साथै कार्यालय परिसरलाई हरियालीयुक्त बनाउने उद्देश्य राखिएको छ ।
उहाँले भन्नुभयो, “विकास र पूर्वाधार निर्माणसँगै वातावरणीय सन्तुलन कायम राख्न वृक्षारोपण जस्ता कार्य अपरिहार्य छन् । विद्युत प्राधिकरणले आफ्नो सामाजिक उत्तरदायित्वअन्तर्गत यस्तो पहललाई निरन्तरता दिनेछ ।”
कार्यक्रममा वितरण केन्द्रका कर्मचारी, प्राविधिक टोली तथा स्थानीय समुदायका प्रतिनिधिहरूको सक्रिय सहभागिता रहेको थियो । विभिन्न जातका फलफूल तथा छायाँदिने बिरुवा रोपिएको जानकारी दिइएको छ ।
यस अवसरमा कार्यालय प्रमुख यादवले कर्मचारीहरूलाई नियमित रूपमा वृक्षहरूको हेरचाह गर्न आग्रह गर्नुका साथै भविष्यमा थप वृक्षारोपण कार्यक्रम सञ्चालन गर्ने प्रतिबद्धता व्यक्त गर्नुभयो ।
नेपाल विद्युत प्राधिकरणको वार्षिकोत्सवलाई सामाजिक तथा वातावरणीय सन्देशमूलक बनाउने प्रयासस्वरूप गरिएको यो वृक्षारोपण कार्यक्रम सराहनीय कदमको रूपमा लिइएको छ ।
