आरके श्रीवास्तव,रौतहट, कार्तिक २४ गते ।
रौतहटको कटहरिया नगरपालिकामा करार र ज्यालादारीका कर्मचारीहरूले तलब–भत्ताको बक्यौता भुक्तानीको माग गर्दै विगत १४ दिनदेखि गर्दै आएको तालाबन्दी अन्त्य भएको छ । कर्मचारीहरूले वडा नं. १ देखि ९ सम्मका सबै वडा कार्यालयहरू तथा नगरपालिकाको मुख्य कार्यालयमा तालाबन्दी गर्दै कार्यालय परिसरमै धर्ना दिइरहेका थिए ।
वडा अध्यक्ष, वडा सदस्य र कार्यपालिका सदस्यहरूले सामूहिक रूपमा कर्मचारीहरूको तलब–भत्ताको विषयलाई प्राथमिकता दिने प्रतिबद्धता जनाएपछि तालाबन्दी खोलिएको हो । उनीहरूले कार्यालय प्रमुख आएलगत्तै पहिलो कामका रूपमा तलब भुक्तानी गर्ने निर्णय गरेका छन् ।
कटहरिया नगरपालिका वडा नं. ८ का वडा अध्यक्ष समिश विक्रम शाहले भने, “पहिला तलब–भत्ता दिने, त्यसपछि मात्रै अन्य काम अघि बढाउँछौं । अब नगरपालिका भोलिदेखि नियमित रुपमा सञ्चालन हुनेछ।”
त्यस्तै वडा नं. ४ का अध्यक्ष चन्दन कुशवाहाले भने, “गैरजिम्मेवार मेयर र जनप्रतिनिधिलाई जिम्मेवार बन्न हामीले पाठ सिकाएका हौं । सेवाग्राहीको पीडा अन्तिम अवस्थामा पुगेपछि तीन दिनको निरन्तर प्रयासपछि तालाबन्दी खोलिएको हो । तलब दिएर मात्रै अन्य काम गर्न दिनेमा हामी एकमत छौं।”
वडा नं. ३ का अध्यक्ष श्यामाकान्त यादवले वडामा विभिन्न सेवा अवरुद्ध भएको जनाउँदै भने, “मेयर साहेब अजय प्रकाश जयसवाल आउनु भएन, त्यसैले हामी अग्रसर भएर ताला खोलाउन बाध्य भयौं । कर्मचारीहरूको तलब जसरी पनि दिलाउनेछौं।”
करारका कर्मचारी प्रमोद कुमार साहले पनि वडा अध्यक्षहरूको प्रयासको कदर गर्दै भने, “हामीले जनताको पीडा बुझ्दै ताला खोल्ने निर्णय गरेका हौं । हाम्रो तलब यथाशीघ्र पाइनुपर्छ।”
नि. प्रमुख प्रशासकीय अधिकृत रामनरेश यादवले तालाबन्दी खुलाउन सराहनीय भूमिका निर्वाह गरेका छन् । उनले प्रमुख प्रशासकीय अधिकृतको उपस्थितिमा पहिलो बैठकमै कर्मचारीहरूको तलब भुक्तानी गर्ने निर्णय हुने जानकारी दिएका छन् ।
नगरपालिकाका कार्यपालिका सदस्य मनोज जयसवालले तालाबन्दी सर्वसहमतिको आधारमा अन्त्य भएको जनाउँदै भने, “तालाबन्दीका कारण जनसाधारण सेवाबाट बञ्चित भएका थिए । आर्थिक कारोबारका लागि हाकिम नहुँदा समस्या उत्पन्न भएको हो । अब हाकिम आउने छन्, तलब तत्काल दिलाइनेछ।”
लगातार १४ दिनको तालाबन्दीका कारण नगरपालिकाका नागरिकता सिफारिस, राजस्व संकलन, सामाजिक सेवा लगायतका अत्यावश्यक कामहरू ठप्प भएका थिए । स्थानीय बासिन्दा अत्यधिक मर्कामा परेपछि वडा अध्यक्ष,वडा सदस्य,कार्यपालिका सदस्य प्रशासनसँगको सहमति अनुसार मंगलवार (कार्तिक २५) देखि कटहरिया नगरपालिका र सबै वडाहरूमा नियमित कामकाज पुनः सुरु हुने भएको छ ।
आरके श्रीवास्तव,राैतहट,कार्तिक २४ गते ।
आम जनता पार्टी (आजपा) का अध्यक्ष प्रभु साहले मधेश प्रदेशमा भएको मुख्यमन्त्रीको गोप्य नियुक्तिलाई संवैधानिक व्यवस्थाको असफलताको प्रमाण भएको बताएका छन् । उनले यो घटनाले वर्तमान संविधान र राजनीतिक प्रणालीको नैतिकता र विश्वसनीयतामाथि गम्भीर प्रश्न उठाएको टिप्पणी गरेका छन् ।
सामाजिक सञ्जालमार्फत प्रतिक्रिया जनाउँदै अध्यक्ष साहले भनेका छन्, “मधेशमा मुख्यमन्त्रीको गोप्य नियुक्तिले फेरि एकपटक पुष्टि गर्यो कि वर्तमान संवैधानिक व्यवस्था असफल मात्र होइन, अनैतिक राजनीतिक र लुट–भ्रष्टाचारको ओडार हो।”
उनका अनुसार समस्या व्यक्तिमा होइन, प्रणालीमै रहेको छ। साहले गलत संवैधानिक प्रावधानलाई वास्तविक समस्या मानेर त्यसको विरोधमा उत्रिन सबैलाई आह्वान गरेका छन्। उनले भने, “समस्याको मुख्य जडको रूपमा रहेको गलत संवैधानिक प्रावधानलाई छोडेर एक–अर्कालाई मात्र दोषारोपण गर्नु अर्को बेइमानी हुनेछ।”
अध्यक्ष साहले संविधान निर्माणका क्रममा भएका त्रुटिहरूको जिम्मेवारी संविधान निर्माताहरूले लिनुपर्ने बताएका छन्। “संविधान निर्माताहरूले आफ्ना गल्ती स्वीकारेर आत्मालोचित भई संविधान खारेजीको पक्षमा आउनु जरुरी छ,” उनले भने, “यसैमा सबैको भलाई निहित छ।”
उनले देशवासीलाई वर्तमान ‘लुटकारी व्यवस्था’माथि पुनर्विचार गर्न आग्रह गर्दै नयाँ र न्यायसंगत राजनीतिक व्यवस्थाको आवश्यकता औंल्याएका छन् ।
जनकपुरधाम,२४ गते कार्तिक ।
मधेश प्रदेशमा पुनः राजनीतिक अस्थिरताको संकेत देखिन थालेको छ । प्रदेश प्रमुख सुमित्रा सुवेदी भण्डारीले संविधानको धारा १६८ को उपधारा (३) बमोजिम नेकपा एमालेका संसदीय दलका नेता महोत्तरीका प्रदेशसभा सदस्य सरोज कुमार यादवलाई मधेश प्रदेशको मुख्यमन्त्रीमा नियुक्त गरेकी छिन् ।
प्रदेश प्रमुख भण्डारीले शुक्रबार (मिति २०८२/०७/२३) जारी गरेको पत्रमा यादवलाई मुख्यमन्त्रीमा नियुक्त गर्दै कार्यकालको सफलताको शुभकामना व्यक्त गरेकी छन् । नियुक्ति पत्रमा उल्लेख छ-“नेपालको संविधानको धारा १६८ को उपधारा (३) बमोजिम तपाईलाई मधेश प्रदेशको मुख्यमन्त्री पदमा नियुक्त गरेको छु । मुख्यमन्त्री पदमा नियुक्त हुनु भएकोमा तपाईलाई हार्दिक बधाई छ।”
तर, यस निर्णयलाई कानुनी भन्दा पनि राजनीतिक कदमका रूपमा हेरिएको छ । एमालेको कोटाबाट प्रदेश प्रमुख बनेकी सुमित्रा सुवेदी भण्डारीले गरेको यो निर्णयले मधेश प्रदेशमा फेरि एकपटक राजनीतिक अस्थिरता र अविश्वासको वातावरण सिर्जना गरेको विश्लेषण गरिँदैछ ।
गत असार २३ र २४ गतेको आन्दोलनपछि मधेशको राजनीतिक तापक्रम केही समयका लागि शान्त देखिएको भए पनि, नयाँ नियुक्तिले पुनः विवाद र सत्ता संघर्षको संकेत दिएको छ । राजनीतिक विश्लेषकहरूका अनुसार, एमालेले अघिल्ला घटनाबाट सिक्ने अपेक्षा गरिएको भए पनि, “त्यही पुरानो शैली र घमण्ड” दोहोरिएको देखिएको छ ।
अबको राजनीतिक यात्राले मधेश प्रदेशलाई स्थायित्वतर्फ लैजान्छ वा पुनः उथलपुथलतर्फ धकेल्छ, त्यो समयले नै निर्धारण गर्नेछ । तर अहिलेका संकेतहरू शान्तिदायी छैनन् ।
बज्जिकाञ्चल संवाददाता,राैतहट,कार्तिक २३ गते ।
राैतहटकाे फतुवा बिजयपुर नगरपालिकाकी कार्यवाहक नगरप्रमुख अम्बेया खातुनले नगरपालिकामा उत्पन्न विभिन्न विवादका विषयमा पत्रकार सम्मेलनमार्फत आफ्नो धारणा सार्वजनिक गरेकी छन् ।
खातुनका अनुसार करारका कर्मचारीहरूलाई हटाउने कुनै निर्देशन आफूले नदिएको स्पष्ट पार्दै उनले भनिन्, “मैले कसैलाई रोक्न भनेकी छैन, संघीय मामिला तथा सरकारका निर्देशनअनुसार प्रमुख प्रशासकीय अधिकृत भरत यादवलाई आवश्यक प्रक्रिया पूरा गरेर अघि बढ्न भनेकी छु।”
उनका अनुसार कर्मचारी व्यवस्थापन हाकिमको जिम्मेवारी हो र आफूले दरबन्दीअनुसार मात्र कर्मचारी राख्न सुझाव दिएको बताइन् । कार्यपालिका बैठकका विषयमा पनि उनले आफू कहिल्यै पछि नहटेकी स्पष्ट पारिन्। “शान्ति सुरक्षा कायम भए र कुनै किसिमको हल्ला नभए जुनसुकै बेला बैठक बस्न तयार छु,” उनले भनिन्।
खातुनले जेनजी आन्दोलनका क्रममा जलेको नगरपालिकाको कार्यालय भवन पुनःनिर्माणका लागि बजेट छुट्याइएको जानकारी दिँदै भनिन्, “जलेको भवन मर्मत गर्ने काम हाकिमको हो, र कार्यालय स्थानान्तरणबारे छलफल कार्यपालिका बैठकमा हुनेछ।”
उनका अनुसार हाल प्रयोग भइरहेको भवनको भाडा ३८ लाख रुपैयाँ रहेको र नयाँ प्रस्तावित स्थानमा ५ लाख रुपैयाँमै फलैट उपलब्ध भएको कारण खर्च घटाउने उद्देश्यले कार्यालय सार्ने प्रस्ताव ल्याइएको बताइन् । तर, उक्त प्रस्तावप्रति वडा अध्यक्षहरूले असहमति जनाइरहेको पनि उनले बताइन् ।
खातुनले भनिन्, “वडा अध्यक्षहरूको काम वडा चलाउने हो, मेरो काम नगरपालिका सञ्चालन गर्ने हो।”
यसैबीच, कार्यवाहक नगरप्रमुख खातुनका श्रीमान् मोहमद सेराजले वडा अध्यक्षहरू विद्युत महसुल बुझाउने बारे लगाएको आरोप गलत हाे । उनका अनुसार माथिबाट विद्युत महसुल र वितरणमुखी कार्यक्रममा बन्देज लगाइएको भए पनि, “यदि नियमले अनुमति दिन्छ भने भुक्तानी गर्नुपर्छ,” भन्दै उनले नियम अनुसार काम गर्न आग्रह गरे ।
सेराजका अनुसार नगरपालिकाको १० कराेडकाे बजेट शीर्षकमा माइनस इण्ट्री गरिएको छ, जुन अस्वाभाविक भएको बताउँदै उनले थपे, “जसको जति बजेट छ, त्यत्तिकै चलाउनु पर्छ, मनोमानी गर्न मिल्दैन।”
उनले प्रमुख प्रशासकीय अधिकृतले अधिकांश बजेट कार्यक्रम सञ्चालनमा राखेको आरोप पनि लगाए । साथै, कर्मचारी हाजिरीमा विवाद सिर्जना गर्ने, रजिष्टार लुकाउने जस्ता कार्य नगरपालिकामा भइरहेका छन् भनेर असन्तुष्टि जनाए ।
खातुनले थपिन्, “तिहार र छठ पर्वको बेला मैले अधिकार अनुसार हस्ताक्षर गरेर सहयोग गरेकी थिएँ, अहिले हाकिमले मनपरि खर्च गर्न खोजिरहेका छन्।”
उनले आरोप लगाइन् कि, रिसइबीका क्रममा आफ्नै औषधि पसलमा आगजनी गरी करोडौंको क्षति पुर्याइएको छ। “कहिले मेयरको गाडी कब्जा गर्ने, कहिले अनावश्यक बहाना गर्ने—यी सबै घटनाले हामीलाई दुःखी बनाएका छन्,” खातुनले भनिन्।
अन्त्यमा उनले भनिन्, “यी सबै घटनाको मूल्यांकन अब फतुवा बिजयपुर नगरवासीहरूले गर्नुपर्नेछ।”
रौतहट, कार्तिक २२ गते ।
नेपाली कांग्रेस रौतहट जिल्ला कार्यसमितिले पार्टीका पूर्व सभापति, केन्द्रीय कार्यसमितिका पूर्व सदस्य तथा पूर्व मन्त्री मोहम्मद अफताब आलमको निधनप्रति गहिरो दुःख प्रकट गर्दै श्रद्धाञ्जली अर्पण गरेको छ ।
शनिबार बिहान ३ बजे ६३ वर्षको उमेरमा काठमाडौं मेडिकल कलेज हस्पिटलमा उपचारको क्रममा उहाँको असमायिक निधन भएको हो ।
स्व. आलमले नेपाली कांग्रेसको संगठन सुदृढीकरण र नेपालको लोकतान्त्रिक आन्दोलनमा दिएको योगदान अतुलनीय रहेको उल्लेख गर्दै, जिल्ला कार्यसमितिले उहाँको निधनले रौतहटले एक कुशल संगठक, असल अभिभावक र परिपक्व नेता गुमाएको जनाएको छ ।
नेपाली कांग्रेस रौतहटका सभापति एवम् मधेस प्रदेश सरकारका पूर्व अर्थमन्त्री सुनिल कुमार यादवद्वारा जारी शोक वक्तव्यमा स्व. आलमको आत्माको चिरशान्तिको कामना गर्दै, शोकसन्तप्त परिवारजनप्रति हार्दिक समवेदना प्रकट गरिएको छ ।
सर्लाही, कार्तिक २२ गते ।
सर्लाही क्षेत्र नं. ४ का युवा नेता, महाधिवेशन प्रतिनिधि तथा समाजसेवी सोनु कुमार कुशवाहाले सो क्षेत्रको अबको राजनीतिक नेतृत्व नेपाली कांग्रेस मधेश प्रदेशका उपसभापति, पूर्व मन्त्री तथा प्रदेश सांसद वीरेन्द्र सिंहले लिनु पर्ने धारणा व्यक्त गरेका छन् ।
शनिबार काठमाडौंस्थित ग्लोबल ग्लोरी कन्सल्टेन्सीमा भएको भेटघाट कार्यक्रममा बोल्दै कुशवाहाले सिंहले विगतदेखि नै जनताका सुख–दुःखमा साथ दिँदै आएको बताउँदै विकास, शिक्षा, स्वास्थ्य र रोजगारका मुद्दामा निरन्तर सक्रिय रहेको उल्लेख गरे ।
उनले भने, “सर्लाही–४ का जनताको विश्वास जित्ने, सबैलाई एकतामा बाँध्ने र माटोको माया राख्ने नेता वीरेन्द्र सिंह हुनुहुन्छ। त्यसैले अबको प्रतिनिधि सभामा नेतृत्व उहाँले लिनु पर्छ।”
यसैबीच, मधेश प्रदेश कांग्रेसका सूचना तथा सञ्चार प्रचार प्रसार सचिव निकेश त्रिपाठीले पनि आम जनतामा सिंहप्रतिको विश्वास र चाहना बढ्दो क्रममा रहेको बताएका छन्। उनले पार्टी नेतृत्वलाई जनताको चाहना अनुसार निर्णय गर्न आग्रह गर्दै भने, “अब समय आएको छ कि निष्ठावान र जनमुखी नेताको नेतृत्वमा क्षेत्र अघि बढोस्।”
सर्लाही क्षेत्र नं. ४ मा हाल विभिन्न राजनीतिक दलका नेताहरु सक्रिय रहेका छन् भने आगामी प्रतिनिधि सभा निर्वाचनलाई लक्षित गर्दै पार्टीभित्र पनि नेतृत्वबारे छलफल सुरु भएको छ ।
जनकपुरधाम, कार्तिक २२ गते । मधेश प्रदेशका मुख्यमन्त्री जितेन्द्र प्रसाद सोनार ‘सोनल’ले पदबाट राजीनामा दिएका छन् । उहाँको राजीनामा मधेश प्रदेशकी प्रदेश प्रमुख सुमित्रा सुवेदी भण्डारीले आज मिति २०८२ साल कार्तिक २२ गते स्वीकृत गर्नुभएको छ ।
प्रदेश प्रमुखको कार्यालय, जनकपुर धनुषाबाट जारी विज्ञप्तिमा उल्लेख गरिएअनुसार, नेपालको संविधानको धारा १६९ उपधारा (१) को खण्ड (क) बमोजिम मुख्यमन्त्री सोनलले पदबाट राजीनामा दिएका हुन् । सो राजीनामा आजै प्रदेश प्रमुखले स्वीकृत गर्नुभएको हो ।
विज्ञप्तिमा भनिएको छ, “नेपालको संविधानको धारा १६९ को उपधारा (३) बमोजिम अर्को व्यवस्था नभएसम्मका लागि मौजुदा मन्त्रिपरिषद्लाई प्रदेशको मन्त्रिपरिषद्को कार्यभार सञ्चालन गर्न तोकिएको छ।”
यससँगै अब नयाँ सरकार गठनको प्रक्रिया संविधानको प्रावधान अनुसार अघि बढ्ने अपेक्षा गरिएको छ । मुख्यमन्त्री सोनलको राजीनामापछि मधेश प्रदेशको राजनीतिक परिदृश्य फेरि चासोको केन्द्रमा आएको छ ।
जनकपुरधाम,कार्तिक २२ ।
मधेश प्रदेशका मुख्यमन्त्री जितेन्द्र प्रसाद सोनार ‘सोनल’ले आज आफ्नो पदबाट राजीनामा दिएका छन् । उनले आजैका मितिमा प्रदेश प्रमुखलाई सम्बोधन गरी लिखित राजीनामा पेश गरेका हुन् ।
मुख्यमन्त्री सोनारले राजीनामा पत्रमा लेखेका छन्, “मधेश प्रदेश सरकारको मुख्यमन्त्री पदबाट राजीनामा दिएको छु। मुख्यमन्त्री पदमा रहँदा सबैबाट प्राप्त सहयोगका लागि सबैमा हार्दिक धन्यवाद व्यक्त गर्दछु।”
सोनारको राजीनामा पत्र प्रदेश प्रमुखको कार्यालयमा दर्ता गरिएको छ । उनले आफ्नो कार्यकालका क्रममा सहयोग गर्ने सबैप्रति आभार व्यक्त गरेका छन् ।
प्रदेश प्रमुखको स्वीकृतिपछि औपचारिक रूपमा सोनारको कार्यकाल समाप्त हुनेछ र नयाँ मुख्यमन्त्री चयनका लागि संविधान अनुसारको प्रक्रिया अघि बढ्नेछ।
आज बसेको मधेश प्रदेश सभाको बैठकमा मुख्यमन्त्री जितेन्द्र सोनलले विश्वासको मत लिन लाग्दा सांसदहरुबीच उत्पन्न विवादकाबीच मुख्यमन्त्री जितेन्द्र सोनलले राजीनामा दिएको घोषणा गरेका थिए ।
त्यसपछि सभामुख रामचण्द्र मण्डलले मेधश प्रदेश सभाको बैठक अर्को सूचना नहुन्जेलसम्मका लागि प्रदेश सभा बैठक स्थगित भएको घोषणा गरेका थिए ।
आरके श्रीवास्तव,राैतहट,२२ गते कार्तिक ।
नेकपा एमालेका केन्द्रीय सदस्य कुन्दन कुशवाहाले शनिबार कटहरिया नगरपालिका–४ मा आयोजित पार्टीको वडा स्तरीय भेलामा “गौरवशाली इतिहास र उज्ज्वल भविष्य”को नारा दिएर जनतालाई एकता, विकास र स्वाभिमानको बाटोमा अघि बढ्न आह्वान गर्नुभएको छ ।
भेलाको अध्यक्षता महान कम्युनिस्ट नेता हरदयाल महतोका छोरा रामपुकार महतोले गर्नुभएको थियो भने कार्यक्रममा स्थानीय अगुवाहरू, ज्येष्ठ नागरिक, महिला, युवा र कटहरियाका सयौं जनताको उपस्थितिले उत्साहपूर्ण माहोल सिर्जना भएको थियो ।
भेलामा सम्बोधन गर्दै केन्द्रीय सदस्य कुशवाहाले कटहरियाको ऐतिहासिक योगदान र जनताको संघर्षको प्रशंसा गर्दै देशमा बढ्दो भ्रष्टाचार, लुटपाट र विदेशी हस्तक्षेपको विरुद्ध सचेत रहन आग्रह गर्नुभयो ।
उहाँले भन्नुभयो,“देश फेरि संकटको मोडमा छ । आतंक र अव्यवस्थाले जनजीवन असुरक्षित बन्दैछ । हामी हाम्रो प्यारो नेपाललाई सिरिया वा युक्रेन बन्न दिन सक्दैनौं। त्यसैले अब इतिहासले फेरि हामीलाई पुकारेको छ । राष्ट्र र जनताको हितका लागि एकताबद्ध भएर अघि बढ्न।”
उहाँले हरदयाल महतोको नेतृत्वमा भएको ऐतिहासिक संघर्षको स्मरण गर्दै कटहरियाको भूमिलाई “इतिहास बोल्ने भूमि”को रूपमा वर्णन गर्नुभयो । उहाँका अनुसार, विकासका प्रत्येक चरणमा कटहरियाले अग्रणी भूमिका खेलेको छ र भविष्यमा पनि जनताको अधिकार, समानता र न्यायका लागि निरन्तर संघर्ष जारी रहनेछ।
कुशवाहाले कटहरियाको आगामी लक्ष्यबारे चर्चा गर्दै भन्नुभयो,“अबको मुख्य लक्ष्य युवालाई रोजगारी, आमाबुबालाई निःशुल्क स्वास्थ्य सेवा, बालबालिकालाई गुणस्तरीय शिक्षा र किसानलाई बजारको पहुँच सुनिश्चित गर्नु हो ।
त्यसका लागि सबै दल, धर्म र वर्गभन्दा माथि उठेर हामी एक परिवार कटहरिया परिवार बनेर अघि बढ्नुपर्छ।”
कार्यक्रममा वडा नं. ४ का वडा अध्यक्ष चन्दन कुशवाहा, सर्फलाल महतो, बिनोद साह र नजिर मियाँले पनि सम्बोधन गर्दै पार्टीका गतिविधि निरन्तर सञ्चालन गर्नुपर्ने आवश्यकता औंल्याउनुभयो । उहाँहरूले कटहरिया नगरपालिकामा देखिएको बेथिती र विकासका अवरोधहरूबारे कडा टिप्पणी गर्दै पारदर्शिता र जवाफदेहिताको माग गर्नुभयो ।
कार्यक्रमको अन्त्यमा उपस्थित जनसमुदायले एमालेको संगठन सुदृढीकरण, विकास र सुशासनका अभियानमा साथ दिने प्रतिबद्धता जनाएका थिए ।
जनकपुरधाम,२२ गते कार्तिक ।
मधेस प्रदेशका मुख्यमन्त्री जितेन्द्र सोनल आज प्रदेशसभामा विश्वासको मत लिन तयार छन् । नेपालको संविधानको धारा १६८(४) बमोजिम उनी आजको बैठकमा विश्वासको मतका लागि प्रस्तुत हुने भएका छन् ।
गत असोज २९ गते पूर्व मुख्यमन्त्री सतिशकुमार सिंहले पदबाट राजीनामा दिएपछि ५ दलका ५६ सदस्यको समर्थनमा सोनललाई मुख्यमन्त्रीमा नियुक्त गरिएको थियो । उनलाई लोसपा, जसपा नेपाल, जनमत पार्टी, नेकपा (माओवादी केन्द्र) र नेकपा (एकीकृत समाजवादी) पार्टीको समर्थन प्राप्त छ ।
सरकार गठनको समय सँगै ५ दलको समर्थन रहेको थियो भने अहिले नागरिक उन्मुक्ति पार्टी र रिजवान अन्सारी नेतृत्वको नेपाल सङ्घीय समाजवादी पार्टीले पनि समर्थन जनाएको छ । यसरी सोनल नेतृत्वको सरकारलाई हाल ५७ मतको समर्थन रहेको देखिन्छ ।
प्रदेशसभामा हाल १०४ कायम सदस्य रहेका छन् । विश्वासको मतका लागि आवश्यक बहुमत ५४ मत रहेको छ । सत्तारुढ दलहरूका अनुसार, जसपा नेपालका १८, जनमत पार्टीका १३, माओवादी केन्द्रका ९, लोसपा का ८, एकीकृत समाजवादीका ७ तथा नागरिक उन्मुक्ति पार्टी र नेपाल सङ्घीय समाजवादी पार्टीका १–१ सदस्य सोनलको पक्षमा मतदान गर्नेछन् ।
यद्यपि, जनमत पार्टीबाट निर्वाचित पूर्व मुख्यमन्त्री सतिशकुमार सिंह र पूर्व मन्त्री त्रिभुवन साह जनस्वराज पार्टीमा गएपछि उनीहरूको मतदान स्थिति अस्पष्ट रहेको छ । साथै, जसपा नेपालका सरोज सिंह कुशवाहा निलम्बित रहेकाले उनी विश्वासको मतमा सहभागी हुन सक्ने छैनन् ।
प्रदेशसभाका दुई ठूला दल नेपाली कांग्रेस र नेकपा (एमाले) सोनल सरकारको विपक्षमा छन् । सत्तारुढ दलहरूले आजको विश्वासको मत प्रक्रिया सफल हुनेमा आफूहरू विश्वस्त रहेको बताएका छन् ।
