वीरगन्ज,मंसिर १६।

आफूलाई नेपाल प्रहरीको घुमुवा भन्दै व्यापारीसँग रकम उठाइरहेको अवस्थामा प्रहरीले वीरगन्जबाट एकजनालाई पक्राउ गरेको छ ।

गैरकानुनी गतिविधि गरेको आरोपमा बाराको आदर्श कोतवाल गाउँपालिका–८, लक्ष्मीटोल निवासी ४५ वर्षीय गोविन्द महतो कोइरीलाई पक्राउ गरिएको हो ।

‘मधेस प्रदेश प्रहरी कार्यालय जनकपुरबाट बारा, पर्सा र रौतहट जिल्लामा  घुमुवा प्रहरीको जिम्मेवारीमा रहेको’ बताउँदै वीरगन्ज महानगरपालिका–२३, हरपतगञ्जस्थित व्यापारीसँग मासिक रूपमा रकम उठाइरहेको सूचनाका आधारमा कोइरीलाई पक्राउ गरिएको जिल्ला प्रहरी कार्यालय पर्साले जनाएको छ । रासस

जनकपुरधाम शनिबार, १६।

मुख्यमन्त्री सरोजकुमार यादवले शान्ति सुरक्षाको मध्यनजर गर्दै प्रदेशको आठ वटै जिल्ला सदरमुकाममा सीसीटीभी क्यामरा जडान गर्ने बताएका छन् ।

राजधानी जनकपुरधामस्थित मधेस प्रदेश प्रहरी कार्यालयको शुक्रबार शिलान्यास गर्दै प्रदेश सरकारले सुरक्षा व्यवस्थालाई थप सुदृढ बनाउन आठ वटै जिल्लाको सदरमुकाममा यसै वर्ष सीसीटीभी क्यामरा जडान गर्न लागेको जानकारी दिए ।

बारामा दिनदहाडै एक निजी विद्यालयका प्रिन्सिपलको हत्या भएको स्मरण गर्दै उनले भने– पुरानो सीसीटीभी क्यामराको फुटेजको आधारमा अपराधी पक्राउ परेको थियो । प्रदेशमा रहेको सुरक्षा चुनौतीको मध्यनजर गरेर सरकारले कुनै प्रकारको ढिलासुस्ती नगरी सुरक्षा व्यवस्था चुस्त दुरुस्त राख्न सुरक्षा निकायलाई हरसम्भव सहयोग गर्न तयार छ

मधेस प्रदेशमा कार्यरत प्रहरीका लागि प्रदेश सरकारले यसै वर्ष आवश्यक मेट्रेस (ओछ्याउने सामग्री) को व्यवस्था मिलाउँछ, मुख्यमन्त्री यादवले भने–प्रहरी चौकीहरूमा सवारीसाधनको लागि १५ करोड रुपैयाँ उपलब्ध गराउन लागेको छु । यसले प्रदेशको सुरक्षा व्यवस्था सुदृढ पार्न सहयोग पुग्नुका साथै सुरक्षा निकाय उच्च मनोबलका साथ अघि बढ्ने विश्वास लिएको छु ।

प्रहरी समायोजन नहुँदा समस्या भएको जिकिर गर्दै मुख्यमन्त्री यादवले प्रदेश मातहत प्रहरी आएपछि सबै सुविधा उपलब्ध गराउने बताए । प्रहरी प्रदेश सरकार मातहत आएमा राजश्व घट्ने होइन, डेढ गुणाले बढ्ने दाबी उनले गरे ।

राैतहट,मंसिर १३ गते राैतहट ।

चन्द्रपुर नगरपालिका वडा नम्बर १ स्थित ऐतिहासिक गोल्मा राजारानीको दरबार क्षेत्रलाई धार्मिक पर्यटकीय गन्तव्यको रुपमा विकास गरिने भएको छ । थाई सरकारले सहयोमा गरेको दुई करोड रुपैयाँ को लागतमा यही मंसिर १६ गते वुद्व भगवानको मुर्ति राख्न लातिएको समजसेवी वीर बहादुर रखालले बताए ।

ऐतिहासिक गोल्मा राजारानीको दरबार क्षेत्रमा मुर्ति स्थापना हुनलागेकोमा स्थानीय जनता निकै उत्तसाहित भएको समाजसेवी रखालले बताए । पाँच सय बर्ष अघिको शेनबंशिय राजा गोल्मा राजा रानीको दरबार क्षेत्रमा रहेको टुँडिखेलमा थाई सरकारको सहयोगमा दुई करोड रुपैयाँ पर्ने साँढे ९ फिटको बैरीबिनाश भगवान् बुद्धको मूर्ति स्थापना गरिने भएको खबरले आफु निकै हर्षित भएको चन्द्रपुर नगरपालिकाका नगरप्रमुख संजय कुमार काप्लेले बताए । सो क्षेत्रलाई ध्यानकेन्द्रको रुपमा विकास गरिने भएको छ । पुरातात्त्विक महत्त्व बोकेको सो क्षेत्रलाई धार्मिक पर्यटकीय गन्तव्यको रुपमा विकास गर्न स्थानीयको सहयोगमा गोल्माराजा बौद्ध बिहार जुटेको छ ।

सो क्षेत्रको विकासमा स्थानीयले श्रमदान गरी बाटो निर्माण गरिसकेका छन् भने जङ्गलको संरक्षण गर्दै विदेशमा रहेका नेपालीहरुले कुटीको निर्माण गरिदिएका छन् । सो क्षेत्रमा बेल र पारिजातका फूलहरु समेत रहेका छन्। यहि मंसिर १६ गते बैरीबिनाश भगवान् बुद्धको मूर्ति स्थापना हुने भिक्षु मेधंकर स्थबिरले बताए ।

उनका अनुसार ऐतिहासिक, पुरातात्वीक र किम्बदन्ति महत्त्व रहेको सो क्षेत्रको पहिचान गर्ने मात्र हैन पर्यटकीय धरोहरको रुपमा रहेको क्षेत्रको संरक्षणमा सबैको एकताको खाचो रहेको बताए । ऐतिहासिक रहेको गोल्माराजाको दरबारको इट्टा लगेर पौराई स्थित ब्रम्हस्थानमा रहेको इनारमा प्रयोग गरिएको छ भने ०११ सालतिर मानव बस्तिको बिस्तार सँगै अलपत्र रहेको सो दरबारको इट्टाको प्रयोग गरी स्थानीयले घर समेत निर्माण गरेको स्थानीयले बताएका छन् । भग्नावशेष रहेको दरबारको जीर्णोद्धारमा स्थानीयले जोड दिएका छ ।

तीनै तहको सरकारबाट ओझेलमा परेको सो क्षेत्रको संरक्षणमा भिक्षु मेधंकर स्थबिरले देखाएको चासोमा स्थानीयको भने सहयोग रहेको स्थानीय गोपाल घिमिरेले बताए । चन्द्रपुर नगरपालिका वडा नम्बर १ स्थित गैरीगाँउबाट आधा घण्टाको उकालोमा दरबारको टुँडिखेल पुगिन्छ भने टुँडिखेलबाट १५ मिनेट ओरालो र उकालो चढेपछि गोल्मा राजारानीको दरबार रहेको स्थानमा पुगिने स्थानीय समीरबाबु कार्कीले बताए ।

दरबार क्षेत्रमा रहेको टुँडिखेलमा गोल्मा राजाको शैनिकले परेड खेल्ने स्थानीय बृढापाकाहरु बताउँछन् । चन्द्रपुर वडा नम्बर १ का पुर्व अध्यक्ष बिरु रखाल मगरले दरवारको जीर्णोद्धार गरेर सङ्गग्राहलयको रुपमा विकास गर्न सकिने बताए । उनका अनुसार दरबारबाट स्थानीयले पुरानो गोल्कि पैसा, जाँतो, तरवार लगाएतका सामान स्थानीयसँग अझै सुरक्षित रहेको बताए । दरबार रहेको स्थानमा अझै त्यस बेलाको इट्टा, काटिएका ढुङ्गा रहेको छ ।

शेनबंशिय राजा गोल्मा राजा रानीको दरबारको जीर्णोद्धार र टुँडिखेल लाई समेत उपयोग गरेर पर्यटकीय क्षेत्र बनाउन सकिने नगरप्रमुख काफ्लेले बताए । प्रतिनिधि सभा सदस्य देवप्रसाद तिमलसिनाले गोल्मराजाको दरवारको संरक्षणमा सबै जुटनु पर्ने बताए । दरबारको विषयमा पुरातत्व विभागलाई जानकारी भैसकेको बताउँदै उनले यसको संरक्षण र प्रबद्धनमा सबैपक्ष जुट्ने हो भने मधेश प्रदेशकै पर्यटकीय गन्तव्य बन्ने सांसद तिमिल्सिनाले दाबी गरेका छन ।

बार,१४ मङ्सि।

बारा जिल्लाका दुई वटा इलाका प्रशासन कार्यालयले आफ्नो क्षेत्रभित्रका बासिन्दालाई पछिल्लो समय सेवा दिन सकेका छैनन् । इलाका प्रशासन कार्यालय सिम्रौनगढ र इलाका प्रशासन कार्यालय कोल्हवीका कार्यालय प्रमुख नहुँदा सेवा प्रवाह प्रभावित भएको हो ।

इलाका प्रशासन कार्यालय सिम्रौनगढमा एक महिनादेखि कार्यालय प्रमुख नहुँदा स्थानीयहरु नागरिकता बनाउन सदरमुकाम कलैया धाउन बाध्य भएका छन् ।

यसअघि गाउँ–ठाउँबाटै एक दिनमै नागरिकता पाएका सिम्रौनगढका स्थानीयले पछिल्लो समय सदरमुकाम धाउनु परेको गुनासो गरेका छन् । सिम्रौनगढ, जानकीनगरका पशु रामले नागरिकता बनाउन कलैया धाउनुपर्दा धेरै पैसा खर्च हुने र धेरै दिन धाउनुपरेको गुनासो गरे ।

सिम्रौनगढस्थित इलाका प्रशासन कार्यालयका प्रमुख दसैँलगत्तै सरुवा भएर अन्यत्र गएपछि नागरिकता जारी गर्ने कार्य रोकिएको हो ।

सो कार्यालयमा अहिले एक जना नायव सुब्बा, २ जना कार्यालय सहयोगी छन् । नयाँ नागरिकता, प्रतिलिपि नागरिकता र प्रमाणित कागजपत्र बनाउन जिल्ला प्रशासन कार्यालय कलैया पठाउने गरेको कार्यालय सहयोगी रामविश्वास कुशवाहाले जनाए ।

उनले इप्रका सिम्रौनगढबाट अभिलेख राख्ने र नागरिकता लिन आउनेलाई सबै कागजातहरु चुस्तदुरुस्त गरेर पठाउने गरेको बताए । इलाका प्रशासन कार्यालय सिम्रौनगढमा यसअघि दैनिक २५ देखि ३० वटा नयाँ नागरिकता र ८ देखि १० वटा प्रतिलिपि जारी हुने गर्दथ्यो ।

जिल्लाको दक्षिणतर्फ रहेको सिम्रौनगढ सँगसँगै उत्तरतर्फ रहेको इलाका प्रशासन कार्यालय कोल्हवीमा समेत पछिल्लो समय प्रमुख नहुँदा नागरिकता जारी हुने कार्य रोकिएको जिल्ला प्रशासन कार्यालय बाराले जनाएको छ ।

कोल्हवीका स्थानीयहरु पनि नागरिकता बनाउन कलैया धाउने गरेका छन् । जसले गर्दा जिल्ला प्रशासन कार्यालयमा कामको चाप बढेको बाराका प्रमुख जिल्ला अधिकारी नवराज सापकोटाले बताए ।

नियमित रुपमा जारी गरिने नागरिकता, प्रतिलिपि नागरिकता लिन आउने सेवाग्राहीको चाप बढेपछि गृह मन्त्रालयमा अधिकृत पठाइदिन पटक पटक अनुरोध गरे पनि सुनवाइ नभएको प्रजिअ सापकोटाले जनाए ।

 आरके श्रीवास्तव,राैतहट,१३ गते मंसिर/

राैतहटकाे राजपुर नगरपालिकामा प्रहरीले अवैध मदिरा उत्पादन गर्ने तीनवटा रक्सी भट्टी नष्ट गरेको छ । राजपुर नगरपालिका– ५ मा अबैध रूपमा सञ्चालन रहेको रक्सी भट्टी नष्ट गरिएको हो ।

विशेष सूचनाको आधारमा बुधबार दिउँसो सावा ३ बजेतिर गएको प्रहरी टोलीले अबैध रूपमा सञ्चालन गरेको उक्त रक्सी भट्टी नष्ट गरेको ईलाका प्रहरी कार्यालय राजपुरले जनाएको छ ।

भट्टी नष्ट गर्ने क्रममा ६० लिटर कच्चा पदार्थ नष्ट गरिएको प्रहरीले जनाएको छ । ३ वटा खाली जार प्रहरीकाे नियन्त्रणमा रहेको छ । प्रहरी बरिस्ठ नायब निरिक्षक प्रमानन्द प्रसाद यादवकाे कमान्डमा गएको प्रहरी टाेलीले पूर्ण रूपले रक्सी भठ्ठी नष्ट गरेको हाे । उक्त अबैध रक्सी भठ्ठी इलाका प्रहरी कार्यालय बाट ३ किलोमिटर पश्चिम उत्तरपर्ने ठाउँमा सञ्चालनमा रहेको बुझिएको छ ।

आरके श्रीवास्तव,राैतहट,१३ गते मंसिर ।

राैतहटकाे दुई पालिकाले नयाँ प्रमुख प्रशासकीय अधिकृत पाएकाे छ । आज एकै दिन जिल्लाको देवाही गाेनाही नगरपालिकामा प्रमुख प्रशासकिय अधिकृत हाजिर भएका छन् भने यमुनामाई गाउँपालिकामा नयाँ प्रमुख प्रशासकीय अधिकृतलाई जिम्मेवारी दिइएको छ । देवाही गोनाही नगरपालिकाको प्रमुख प्रशासकिय अधिकृतको जिम्मेवारी सन्देश यादव हाजिर भएका हुन् ।

उनी यस अघिका प्रमुख प्रशासकीय अधिकृत शम्भु यादवकाे ठाउँमा आएका हुन् । देवाही गाेनाही नगरपालिकाका नगर प्रमुख प्रेमलाल साह, वडाध्यक्षहरु र कार्यालयका कर्मचारीहरुको उपस्थितिमा यादवले कार्यालय प्रमुखको रुपमा हाजिर भएका हुन् । कार्यालय प्रमुखको रुपमा नगर प्रमुख साहले यादवलाई स्वागत पनि गरेका छन् ।

यता उप प्रमुख परनिया देवी पटेलले भने, आफू सँग सल्लाहै नगरी हाजिर भएको भन्दै असंतुष्टी जनाएकी थिईन् । कार्यालयमा हाजिर भएपछि जवाफदिने क्रममा यादवले आफूले नियमानुसार कामकाज गर्ने उपप्रमुख समक्ष प्रतिबद्धता समेत जनाएका थिए । उता जिल्लाकाे यमुनामाइ गाउँपालिकाको निमित्त प्रमुख प्रशासकिय अधिकृतको जिम्मेवारी फेरि रामश्रेष्ठ यादवलाई दिइएको छ । यस अघि उनलेे उक्त गाउँपालिकाकाे जिम्मेवारी सम्हालीसकेका छन् ।

एक प्रदेश, एक स्वास्थ्य विज्ञान प्रतिष्ठान निर्माण गर्ने नीतिअनुसार १६ पुस ०७५ मा मन्त्रिपरिषद्कोे बैठकले राजविराजमा रामराजाप्रसाद सिंह स्वास्थ्य विज्ञान प्रतिष्ठान निर्माण गर्ने निर्णय गरेको थियो।

यसका लागि २१ जेठ ०७८ मा मन्त्रिपरिषद्ले प्रतिष्ठान निर्माण गर्न राजविराज नगरपालिका– १० बिरौलस्थित ६२ बिघा जग्गा प्रतिष्ठानका नाममा ३० वर्षका लागि लिजमा दिने निर्णय गरेको थियो।

जग्गाको टुंगो लागेपछि यही जग्गामा २२ असार ०७८ मा तत्कालीन प्रधानमन्त्री केपी ओलीले प्रतिष्ठानको भवन निर्माण कार्यको भर्चुअल माध्यमबाट शिलान्यास गरेका थिए। तर, शिलान्यासको दुई वर्षभन्दा बढी समय बितिसक्दा पनि निर्माण कार्य सञ्चालन हुन सकेको छैन।

गजेन्द्रनारायण सिंह अस्पतालको परिसरमा प्रतिष्ठानको पूर्वाधार तयारी विकास समितिको कार्यालय भए पनि नेतृत्वविहीन अवस्थामा छ।

समितिका अध्यक्ष डा. रोहित पोखरेल प्रदेश सभाको निर्वाचनमा उम्मेदवार बनेपछि र गजेन्द्रनारायण सिंह अस्पतालका तत्कालीन मेडिकल सुपरिटेन्डेन्ट एवं प्रतिष्ठानका कार्यकारी निर्देशक डा. रञ्जितकुमार झा सरुवा भएर अन्यत्र गएपछि कार्यकारी निर्देशकको पदसमेत रिक्त छ। त्यसपछि कार्यालयमा करारमा रहेको तीनजना कर्मचारीको म्यादसमेत थप गरिएको छैन।  यद्यपि, उनीहरू कार्यालय आउने–जाने भने गरिरहेका छन्।

आक्रोशित स्थानीयले प्रतिष्ठान निर्माण कार्यलाई यथाशीघ्र अघि बढाउनुपर्ने, प्रतिष्ठानको पूर्वाधार तयारी विकास समितिमा रिक्त भएका पदहरूमा अविलम्ब पदाधिकारी र कर्मचारी नियुक्त गर्नुपर्ने, प्रतिष्ठान निर्माणका लागि आवश्यक बजेटको व्यवस्थापन गर्नुपर्नेलगायतका माग राख्दै आन्दोलन थालेका छन्। नयाँ पत्रिका