बज्जिकाञ्चल संवाददाता,राैतहट,१० गते फाल्गुन ।
रौतहट । गाेविन्द चाैधरीले प्रतिनिधिसभा सदस्यका लागि (जसपा नेपाल) का उम्मेदवारका रूपमा रौतहट क्षेत्र नम्बर ३ अन्तर्गत आइतवार व्यापक चुनावी घरदैलो कार्यक्रम सम्पन्न गरेका छन् ।
उनले गरूडन–५ शिवनगर र कटहरिया–६ फत्तेपुरमा विशेष भेटघाट तथा घरदैलो कार्यक्रम गर्दै मतदातासँग प्रत्यक्ष संवाद गरेका हुन् ।
घरदैलोका क्रममा उम्मेदवार चौधरीले विगतका विकास गतिविधि, आगामी योजना र क्षेत्रको समग्र समृद्धिका विषयमा आफ्ना प्रतिबद्धता प्रस्तुत गर्दै चुनाव चिन्ह “छाताछाप”मा मतदान गर्न आग्रह गरेका छन् । उनले शिक्षा, स्वास्थ्य, कृषि, रोजगारी तथा पूर्वाधार विकासलाई प्राथमिकतामा राखेर काम गर्ने प्रतिबद्धता व्यक्त गरेका छन् ।
“रौतहट क्षेत्र नम्बर ३ लाई विकास र समृद्धिको नयाँ चरणमा पुर्याउन तपाईंहरूको साथ आवश्यक छ,” उनले भने, “यसपटक छाताछापमा मतदान गरी परिवर्तनको पक्षमा उभिनुहोस् ।”
कार्यक्रमका क्रममा स्थानीय बासिन्दाले उम्मेदवार चौधरीप्रति सकारात्मक प्रतिक्रिया जनाउँदै यसपालि “छाताछाप”लाई विजय गराउने प्रतिबद्धता व्यक्त गरेका थिए । विभिन्न टोल–बस्तीमा पुगेका चौधरीलाई स्थानीयले स्वागत गर्दै विकास र जनअपेक्षाअनुसार काम गर्न सुझावसमेत दिएका थिए ।
चुनावी माहोलसँगै क्षेत्र नम्बर ३ मा उम्मेदवारहरूको घरदैलो कार्यक्रम तीव्र बन्दै गएको छ । मतदातासँग प्रत्यक्ष संवादलाई प्राथमिकता दिँदै उम्मेदवारहरू आ–आफ्ना एजेन्डा र योजना लिएर घरदैलोमा सक्रिय देखिएका छन् ।
बारा, फाल्गुन ९ गते ।
आम जनता पार्टी (आजपा) का बारा निर्वाचन क्षेत्र नं. १ का प्रतिनिधि सभा सदस्य उम्मेदवार विजय यादव ‘निर्विज’ले गरीब, भूमिहीन तथा विपन्न वर्गका नागरिकका लागि योजनाबद्ध नयाँ वस्ती निर्माण गर्ने महत्वाकांक्षी एजेन्डासहित आफ्नो चुनावी अभियान तीव्र बनाएका छन्।
आदर्श कोतवाल गाउँपालिकाको वडा नं. ४ कोईलीडीह र हरनहिया, वडा नं. ३ बतरा, वडा नं. २ खजुरिया तथा बारागढी गाउँपालिकाको विसुनपूर्वा बजारमा आयोजित जनसम्पर्क तथा भेटघाट कार्यक्रममा सम्बोधन गर्दै यादवले जनतासँग प्रत्यक्ष संवाद, घरदैलो अभियान र सभामार्फत आफ्नो विकास दृष्टिकोण प्रस्तुत गरेका छन्।
“जनता पहिलो, आजपा हाम्रो भरोसा!” भन्ने नारासहित उनले आवास, रोजगारी र आधारभूत सेवामा पहुँचलाई आफ्नो प्रमुख चुनावी एजेन्डा बनाएको स्पष्ट पारे।
यादवले भने,
“घर नागरिकको अधिकार हो, विलासिता होइन। हजारौँ परिवार अझै सुरक्षित आवासबाट वञ्चित छन्। हाम्रो सरकार बनेपछि व्यवस्थित आवास परियोजना ल्याएर गरीब तथा भूमिहीनलाई स्थायी घर उपलब्ध गराइनेछ।”
उनका अनुसार प्रस्तावित नयाँ वस्तीहरूमा स्वच्छ खानेपानी, स्वास्थ्य चौकी, विद्यालय, सडक, विद्युत्, शौचालय, डिजिटल सेवा तथा रोजगारी सिर्जना कार्यक्रमसमेत समेटिनेछ।
“भूमिहीनलाई जमिन, गरीबलाई मकान—आजपाको विकास अभियान!” भन्ने प्रतिबद्धतासहित उनले मधेश क्षेत्रमा अव्यवस्थित बसोबास र गरिबी समस्यालाई दीर्घकालीन रूपमा समाधान गर्ने लक्ष्य रहेको बताए।
स्थानीय बुद्धिजीवी, युवा तथा महिलाहरूले “सत्ता होइन सेवा, आजपाको प्रतिबद्धता!” भन्ने स्पष्ट नीति र गरीबमुखी विकास दृष्टिकोणलाई आशाको रूपमा लिएका छन्।
रामअधार प्रसाद यादव,राैतहट,१० गते फाल्गुन ।
रौतहटकाे फतुवा विजयपुर नगरपालिका–६ पेटभरवाका पूर्व वडा अध्यक्ष औपचारिक रूपमा मा प्रवेश गर्नुभएको छ । प्रतिनिधि सभा सदस्य पदका लागि रौतहट क्षेत्र नम्बर ३ बाट उम्मेदवार रहेकी लाई सघाउने उद्देश्यसहित उहाँ पार्टी प्रवेश गर्नुभएको हो ।
घरदैलो अभियानका क्रममा आयोजित विशेष कार्यक्रमबीच पार्टीका नेताहरू तथा कार्यकर्ताहरूले यादवलाई स्वागत गरेका थिए ।
यसअघि शुक्रबार नगरपालिका–३ का वडा अध्यक्ष पनि पार्टी प्रवेश गर्नुभएको थियो । पछिल्लो समय विभिन्न तहका जनप्रतिनिधि तथा राजनीतिक व्यक्तित्वहरू नेकपामा प्रवेश गर्ने क्रम बढ्दै गएको देखिएको छ ।
कार्यक्रममा नेता विन्देश्वर यादव, वडा प्रत्याशी सुखल यादव लगायत सयौँ नेता तथा कार्यकर्ताहरूको उल्लेखनीय उपस्थिति रहेको थियो ।
यसै क्रममा उम्मेदवार ले टेंग्राहा र पेटभरवामा घरदैलो कार्यक्रम तथा मतदाता भेटघाटलाई तीव्रता दिनुभएको छ । स्थानीय तहदेखि प्रतिनिधि सभासम्म चुनावी सरगर्मी बढ्दै जाँदा क्षेत्र नम्बर ३ मा राजनीतिक गतिविधि झनै सक्रिय बन्दै गएको छ ।
आरके श्रीवास्तव,राैतहट,१० गते फाल्गुन ।
जिल्ला प्रशासन कार्यालय राैतहट द्वारा गौर नगरपालिकाकाे क्षेत्रमा कर्फ्यू आदेश संशोधनसहित निरन्तरता दिएकाे छ ।
प्रमुख जिल्ला अधिकारी दिनेश सागर भुसालले स्थानीय प्रशासन ऐन, २०२८ को दफा ६(क) बमोजिम कर्फ्यू आदेश लागू गरिएको जानकारी दिएका छन् ।
जिल्ला सुरक्षा समिति रौतहटको निर्णयअनुसार २०८२ फागुन ९ गते दिउँसो १:०० बजेदेखि जारी गरिएको कर्फ्यू २०८२ फागुन १० गते बिहान ६:३० बजेसम्म निरन्तर रहने जनाइएको छ ।
प्रशासनले अत्यावश्यक कार्यका लागि २०८२ फागुन १० गते बिहान ६:३० देखि ८:३० बजेसम्म कर्फ्यू खुकुलो पार्ने निर्णय गरेको छ । यद्यपि, उक्त समयमा पनि कुनै प्रकारका भेला, सभा, जुलुस तथा प्रदर्शन गर्न नपाइने स्पष्ट गरिएको छ ।
त्यसपछि बिहान ८:३० बजेदेखि अर्को आदेश नभएसम्म पुनः कर्फ्यू लागू रहनेछ । कर्फ्यू लागू हुने क्षेत्र पूर्व मुडबलवा गेट,पश्चिम लालबकैया बाँध,उत्तर बम नहर र दक्षिण गौर भन्सार कार्यालय रहेको छ ।
प्रशासनले कर्फ्यू आदेशको उल्लंघन गर्नेलाई कानूनबमोजिम कारबाही गरिने चेतावनी दिएको छ । जिल्लावासीलाई शान्ति–सुरक्षा कायम राख्न प्रशासनलाई सहयोग गर्न आग्रह गरिएको छ ।
शनिबार बिहान गौर नगरपालिका–६ स्थित सनगडा गाउँमा मुस्लिम समुदायले प्रार्थना गरिरहेका बेला हिन्दू समुदायले बाजा बजाएको भन्दै विवाद सिर्जना भएको थियो । उक्त विवाद भड्किएर हिंसात्मक रूप लिँदै झडपमा परिणत भएको थियो ।
आरके श्रीवास्तव,राैतहट,०९ गते फाल्गुन ।
राैतहट क्षेत्र नम्बर ३ बाट गोविन्द चौधरी (छाताछाप) ले शनिबारबार कटहरिया नगरपालिकाका विभिन्न वडामा चुनावी घरदैलो तथा मतदाता भेटघाट कार्यक्रम सम्पन्न गरेका छन् ।
उम्मेदवार चौधरीले कटहरिया नगरपालिका वडा नम्बर ८ को पिप्रा पोखरिया र बलुआ टोल तथा वडा नम्बर ९ को डुमरिया मुसहरी टोलमा पुगेर मतदातासँग प्रत्यक्ष भेटघाट गर्दै आफ्नो चुनाव चिन्ह छाताछापमा मतदान गर्न आग्रह गरेका थिए ।
घरदैलो अभियानका क्रममा बलुआ टोलका मतदाताहरूले यसपटक चौधरीलाई जिताउने योजना बनाइसकेको प्रतिक्रिया दिएका छन् । “अन्यलाई मुखले जवाफ दिइसकेका छौं, अब बैलेटबाट जवाफ दिनेछौं,” भन्दै स्थानीयले छाताछापलाई जिताउने प्रतिबद्धता व्यक्त गरेका थिए ।
त्यस्तै पिप्रा पोखरियाका मतदाताहरूले पनि चौधरीको जित सुनिश्चित हुने विश्वास व्यक्त गर्दै खुला समर्थन जनाएका छन् ।
यसैगरी कटहरिया–९ डुमरिया मुसहरी टोलमा मतदाताहरूले आफूहरू चौधरीको प्रतीक्षामा रहेको बताउँदै उनले चुनावी मैदानमा उम्मेदवारी दिएपछि साथ दिने प्रतिबद्धता व्यक्त गरेका छन् । “हामी तपाईंको साथमा छौं, छातालाई जिताउँछौं,” भन्ने मतदाताको प्रतिक्रिया रहेको थियो ।
चुनावी अभियानलाई तीव्रता दिँदै उम्मेदवार चौधरीले घरदैलोमार्फत मतदातासँग प्रत्यक्ष संवाद बढाइरहेका छन् ।
रामअधार प्रसाद यादव,राैतहट,०८ गते फाल्गुन ।
रौतहटकाे गुजरा नगरपालिका वडा नं. ३ सिमरीमा आज आयोजित एक विशेष कार्यक्रममार्फत विभिन्न राजनीतिक दलका नेताहरू औपचारिक रूपमा मा प्रवेश गरेका छन् ।
कार्यक्रममा नेकपा एमालेका नेता पलट चौधरी, निर्वाचित वडा अध्यक्ष गजेन्द्र चौधरी तथा पूर्व वडा अध्यक्ष मनोज चौधरी,नेता रुपेश दास लगायत सयौं समर्थकहरू पार्टीमा समावेश भएका हुन् ।
नवप्रवेशी नेताहरूलाई प्रमुख अतिथि राैतहट ३ प्रतिनिधि सभा सदस्य उम्मेदवार पुनम यादव, विशिष्ट अतिथि केन्द्रीय सदस्य वहिद अंसारी, प्रदेश सदस्य विनदेश्वर राय यादव तथा का मेयर प्रत्याशी अजय तिमल्सिनाले खादा तथा माला लगाई स्वागत गरेका थिए ।
कार्यक्रमलाई सम्बोधन गर्दै नवप्रवेशी नेताहरूले प्रतिनिधि सभा सदस्य उम्मेदवार पुनम यादवलाई तन, मन र धनले सहयोग गर्ने प्रतिबद्धता व्यक्त गरेका छन् । उनीहरूले पार्टीको संगठन विस्तार, स्थानीय विकास र जनताको हितमा सक्रिय भूमिका निर्वाह गर्ने अठोटसमेत व्यक्त गरे ।
कार्यक्रममा स्थानीय नेता, कार्यकर्ता तथा सर्वसाधारणको उल्लेखनीय उपस्थिति रहेको थियो ।
बज्जिकाञ्चल संवाददाता,राैतहट,०८ गते फाल्गुन ।
रौतहट । सीमावर्ती रौतहट जिल्लामा अपराध, तस्करी र सवारी दुर्घटनाका घटनाले चुनौती थपिरहेकै बेला जिल्ला प्रहरी कार्यालयले माघ महिनाको प्रगति विवरण सार्वजनिक गरेको छ। सार्वजनिक प्रतिवेदनअनुसार अपराध नियन्त्रण, फरार प्रतिवादी पक्राउ, लागूऔषध नियन्त्रण, राजस्व छली रोकथाम तथा समुदाय–प्रहरी साझेदारी कार्यक्रमलाई प्राथमिकतामा राखिएको छ।
७७ मुद्दा दर्ता, बैंकिङ कसुर बढ्दो चुनौती
माघ महिनाभर जिल्लामा ७७ वटा विभिन्न प्रकृतिका मुद्दा दर्ता भएका छन्। तीमध्ये ज्यानसम्बन्धी ७, आत्महत्यासम्बन्धी ८, चोरीका २ र सामाजिक अपराधका २३ मुद्दा रहेका छन्। बैंकिङ कसुरका मात्रै १७ मुद्दा दर्ता भएको प्रहरीले जनाएको छ। डिजिटल कारोबार विस्तारसँगै ठगी, चेक बाउन्स र अनलाइन माध्यमबाट हुने आर्थिक अपराध बढ्दै गएको प्रहरीको विश्लेषण छ।
२८४ उजुरी, १७३ फर्छ्यौट
जिल्लाभर २८४ साधारण उजुरी दर्ता भएकोमा १७३ उजुरी फर्छ्यौट गरिएको र १११ उजुरी अनुसन्धान प्रक्रियामै रहेको प्रहरीले जनाएको छ। कार्यालयका प्रवक्ता डीएसपी विष्णु प्रदीप बस्यालका अनुसार विभिन्न मुद्दामा संलग्न ४१ जना फरार प्रतिवादीलाई विशेष अपरेशनमार्फत पक्राउ गरिएको छ।
लागूऔषधसहित एक पक्राउ
लागुऔषध नियन्त्रणअन्तर्गत एक जनालाई पक्राउ गरी उनको साथबाट डाइजेपाम ५०० पिस, फेनारगन ५०० पिस र नुरफिन ५०० पिस बरामद गरिएको छ। खुला सीमाको दुरुपयोग गरी लागूऔषध ओसारपसार हुने सम्भावनालाई मध्यनजर गर्दै निगरानी कडा पारिएको प्रहरीको भनाइ छ। युवामाझ नशालु औषधिको दुरुपयोग बढ्दै गएकाले विद्यालय र कलेज लक्षित सचेतना कार्यक्रम सञ्चालन गरिएको छ।
६२ लाखभन्दा बढीका अवैध सामान बरामद
सीमावर्ती जिल्ला भएकाले अवैध भन्सार छली तथा तस्करी नियन्त्रणमा कडाइ गरिएको प्रहरीले जनाएको छ। माघ महिनामा ६२ लाख ८९ हजार ९३० रुपैयाँ बराबरका अवैध सामान तथा पाँच सवारीसाधन बरामद गरिएको छ। राजस्व छलीतर्फ ६४ हजार ६५० रुपैयाँ बराबरका सामान बरामद गरिएको छ। प्राकृतिक स्रोत दोहनमा संलग्न दुई सवारीसाधन नियन्त्रणमा लिई ६ हजार रुपैयाँ जरिवाना गरिएको छ।
९२ सवारी दुर्घटना, ५ जनाको मृत्यु
माघ महिनामा जिल्लामा ९२ सवारी दुर्घटना भएका छन्। दुर्घटनामा पाँच जनाको मृत्यु भएको छ भने १२९ जना घाइते भएका छन्। चालकको लापरबाही, तीव्र गति, मादक पदार्थ सेवन तथा ट्राफिक नियम उल्लंघन मुख्य कारणका रूपमा देखिएका छन्।
जिल्ला ट्राफिक प्रहरी कार्यालयका अनुसार ट्राफिक नियम उल्लंघन गर्ने ७४५ सवारीसाधनलाई कारबाही गर्दै ७ लाख ८२ हजार ५०० रुपैयाँ राजस्व संकलन गरिएको छ। नियमित चेकजाँच, संयुक्त गस्ती र सचेतना अभियानलाई तीव्र पारिएको छ।
५६ सचेतनामूलक कार्यक्रम
समुदाय–प्रहरी साझेदारीअन्तर्गत माघ महिनामा लागूऔषध, आत्महत्या न्यूनीकरण तथा महिला हिंसाविरुद्ध ५६ कार्यक्रम सञ्चालन गरिएको छ। १२३ प्रहरी परिचालनमार्फत १ हजार २०८ जना प्रत्यक्ष लाभान्वित भएका छन्। विद्यालयहरूमा आत्महत्या, साइबर अपराध र लैङ्गिक हिंसाविरुद्ध १५ कार्यक्रम सञ्चालन गरी ६५७ विद्यार्थीलाई प्रशिक्षण दिइएको छ।
दीर्घकालीन रणनीति आवश्यक
माघ महिनाको तथ्यांकले जिल्लामा आर्थिक अपराध, सामाजिक हिंसा र सवारी दुर्घटना प्रमुख चुनौतीका रूपमा देखिएका छन्। बैंकिङ कसुर र आत्महत्यासम्बन्धी मुद्दाले मानसिक स्वास्थ्य र डिजिटल सचेतनाको आवश्यकता औंल्याएको छ।
जिल्ला प्रहरी कार्यालयले अपराध नियन्त्रण र सामाजिक शान्तिका लागि नागरिक सहयोग अपरिहार्य रहेको बताउँदै शंकास्पद गतिविधि देखिएमा तत्काल सूचना दिन सर्वसाधारणलाई आग्रह गरेको छ। प्रहरीको सक्रियता देखिए पनि बढ्दो आर्थिक अपराध र दुर्घटना न्यूनीकरणका लागि दीर्घकालीन रणनीति आवश्यक देखिएको छ। सभार क्रान्तिद्वार डट कम
संजय सहनी,गाैर, फागुन ०८ गते ।
रौतहट गौर नगरपालिका वडा नं. ६ सवगढाका भएको दुई समुदायको द्वन्द्व सामाधानको लागि गाउँवासी र समाजसेवीहरूबीच महत्वपूर्ण सहमति भएको छ।
शुक्रबार प्रमुख जिल्ला अधिकारी दिनेश सागर भुसालको प्रमुख उपस्थितिमा बसेको बैठकले गाउँमा देखिएको विवादलाई सुल्झाउन र आपसी सद्भाव कायम राख्न ६ वटा मुख्य निर्णय र सहमति भएको हो ।
बैठक बाट गाउँको शान्ति र सद्भाव बिगार्ने कुनै पनि प्रयासप्रति सामूहिक खेद प्रकट गर्दै त्यस्ता क्रियाकलाप रोक्ने प्रतिबद्धता जनाइएको छ।
गाउँमा वृद्धवृद्धा, महिला, बालबालिका, सुत्केरी र अपाङ्गता भएका व्यक्तिहरू पनि रहेको कुरालाई ध्यानमा राख्दै, कुनै पनि धार्मिक वा सांस्कृतिक कार्यक्रम गर्नुअघि आपसी छलफल र संवाद गर्ने सहमति समेत भएको प्रमुख जिल्ला अधिकारी भुसालले बताउनु भएको छ।
उहाँले २०८१ चैत्र ६ गते भएको सर्वपक्षीय सहमतिको अक्षरशः पालना गर्ने र सार्वजनिक शान्ति कायम राख्ने निर्णय गरिनुको साथै विभिन्न चाडविवाह, रमजान वा अन्य कुनै पनि चाडपर्वमा एक समुदायले अर्को समुदायको सम्मान र सहयोग गर्ने। यदि कसैले अवरोध सिर्जना गरेमा प्रहरी प्रशासनलाई खबर गरी कानुनी दायरामा ल्याउन सहयोग गर्ने सहमती भएको बताउनु भयो।
प्रमुख जिल्ला अधिकारी भुसालले सामाजिक सद्भाव बिगार्ने वा कानुन उल्लंघन गर्ने जोकोहीलाई पनि कारबाही गर्न प्रशासनलाई पूर्ण सहयोग गर्ने र आगामी २०८२ फागुन २१ गते हुने प्रतिनिधि सभाको निर्वाचनका लागि अनुकूल र शान्तिपूर्ण वातावरण तयार पार्न आजकै मिति (२०८२/११/०८) देखि विवाद अन्त्य गर्ने निर्णय गरिएको प्रष्ट पारे।
बिहिबार राती गौर नगरपालिका–६ सवगढा बस्ने सत्य नारायण साहकी छोरीको विवाहको जन्ती बौधिमाई नगरपालिका–९ सरमुजवाबाट सवगढा आउने क्रममा मस्जिद अगाडी बाजा बजाएको विषयलाई लिएर मुस्लिम पक्ष र जन्ती पक्षबीच विवाद भएको थियो ।
सोही विषयलाई लिएर शुक्रबार विहान ९ बजेको समयमा दुबै पक्षका करिब ४०० देखि ५०० जनाको भीड जम्मा भई पुनः झडप सुरु भएको थियो।
दुवै पक्षबीच ढुंगा हानाहान हुन थालेको र स्थिति नियन्त्रण बाहिर जाने थालेपछि प्रहरी उपरीक्षक र सशस्त्र प्रहरी उपरीक्षकको कमाण्डमा नेपाली सेना सहित ५०० भन्दा बढि सुरक्षाकर्मी परिचालन गरिएको थियो।
स्थितिलाई नियन्त्रणमा लिन १२ राउण्ड ब्ल्याङ्क फायर र ४० राउण्ड अश्रुग्यास प्रहार गरिएको जिल्ला प्रहरी कार्यालय रौतहटका सूचना अधिकारी एवं डिएसपी विष्णुप्रदीप वस्यालले बताए ।
सोही क्रममा स्थानीयहरु संगै २ जना प्रहरी सहित केही सर्वसधारण समेत घाइते भएका थिए। घाइते सबैको अवस्था सामान्य रहेको र प्रादेशिक अस्पताल गौरमा
उपचारपछि डिस्चार्ज गरिएको प्रहरीले जनाएको छ।
कलैया, ७ फागुन ।
आम जनता पार्टी (आजपा) का नेता तथा बारा निर्वाचन क्षेत्र नं १ का प्रतिनिधि सभा सदस्य उम्मेदवार विजय यादव ‘निर्विज’ले घरदैलो तथा चुनावी छलफल, भेटघाट कार्यक्रमलाई तीव्रता दिएका छन् ।
आज सिम्रौनगढ नगरपालिका वडा नं ११, भगवानपुर, आदर्श कोतवाल गाउँपालिका वडा नं ६ पटेर्वा आयोजित भेटघाट तथा घर दैलो गर्ने क्रममा उमेदवार यादवले भने । आगामी २१ फागुनमा हुने प्रतिनिधि सभा सदस्य निर्वाचनमा ‘मोबाइल’ छापमा मतदान गरी आम जनता पार्टीका उम्मेदवारलाई विजयी बनाउन मतदातासँग अपिल गरेका छन् ।
यादवले बाराको समग्र विकाससँगै ऐतिहासिक तथा पुरातात्विक महत्व बोकेको सिम्रौनगढलाई युनेस्कोको विश्व सम्पदा सूचीमा सूचीकृत गराउन पहल गर्ने प्रतिबद्धता व्यक्त गरेका छन् । साथै शिक्षा, स्वास्थ्य, यातायात, खानेपानी लगायतका आधारभूत क्षेत्रको विकासका लागि ठोस योजना अनुसार काम गर्ने उनले बताएका छन् ।
पूर्ण साक्षर राष्ट्र निर्माण, स्मार्ट कक्षाकोठा तथा ‘एक स्थानीय तह, एक खेलमैदान’ कार्यक्रम लागू गर्ने प्रतिबद्धता उनले व्यक्त गरेका छन् । स्वास्थ्य क्षेत्रमा डिजिटल हेल्थ कार्ड, गम्भीर रोगको पूर्ण निःशुल्क उपचार तथा प्रत्येक पालिकामा विशेषज्ञ अस्पताल स्थापना गर्ने योजना अनुसार काम गर्ने उनले जनाएका छन् ।
त्यस्तै शिक्षा, स्वास्थ्य, खानेपानी र विद्युत् सेवा आधारभूत रूपमा निःशुल्क उपलब्ध गराउने प्रतिबद्धता पनि यादवले व्यक्त गरेका छन् । प्रधानमन्त्री र मुख्यमन्त्री प्रत्यक्ष निर्वाचित हुने व्यवस्था, संघ तथा प्रदेशमा पूर्ण समानुपातिक निर्वाचन प्रणाली तथा निर्वाचित जनप्रतिनिधिले काम नगरेमा जनताले कार्यकालमै फिर्ता बोलाउन पाउने ‘राइट टु रिकल’ अधिकार सुनिश्चित गर्ने प्रतिबद्धता आजपाको घोषणापत्रमा रहेको भन्दै सोही अनुसार काम गर्ने उनले बताए ।
यसैगरी पार्टी घोषणापत्र अनुसार ‘एक घर, एक रोजगारी’ कार्यक्रम लागू गर्ने, बेरोजगारलाई बेरोजगारी भत्ता दिने, नेपाललाई ‘ग्लोबल आईटी हब’ बनाउने लक्ष्यसहित युवा उद्यमीलाई १० लाखदेखि २५ लाख रुपैयाँसम्म बीउ पुँजी (सीड मनी) उपलब्ध गराउने योजना पूरा गर्ने उनले जनाए । साथै हरेक विद्यार्थीले अनिवार्य रूपमा कम्तीमा एक उच्च प्राविधिक सीप सिक्नुपर्ने व्यवस्थाको ग्यारेन्टी आजपाले गरेको उनले बताए ।
यादवले बारा–१ मा विकास, सुशासन र जनमुखी शासन प्रणाली स्थापना गर्न जनताको साथ आवश्यक रहेको भन्दै आगामी निर्वाचनमा आजपालाई जिताएर परिवर्तनको सुरुवात गर्न मतदातासँग आग्रह गरेका छन् ।
पवन प्रसाद साह,वीरगंज,फाल्गुण ७ गते ।
राष्ट्र, राष्ट्रियता, धर्म संस्कृति र नागरिक बचाउ महाअभियान नेपाल जिल्ला कार्यसमिति पर्साले विभिन्न माग राख्दै वीरगंजस्थित नेसनल ट्रेडिङ चोक मा मसाल जुलुस प्रदर्शन गरेको छ ।
प्रदर्शनका क्रममा सहभागीहरूले दुर्गा प्रसाईलाई रिहा गर्न, दुर्गा प्रसाई र नेपाल सरकारबीच भएको १२ बुँदे समझौता कार्यान्वयन गर्न, राजसंस्था पुनर्स्थापना गर्न तथा नेपाललाई हिन्दु राष्ट्र कायम गर्नुपर्ने लगायतका नाराबाजी गरेका थिए ।
मसाल जुलुसका क्रममा प्रदर्शनकारीहरूले “दुर्गा प्रसाईलाई रिहा गर”, “हाम्रो नेता दुर्गा प्रसाई र नेपाल सरकारबीच भएको १२ बुँदे समझौता लागू गर”, “राजा आउ, देश बचाउ” तथा “हिन्दु राष्ट्र कायम गर” जस्ता नारा लगाउँदै चोक क्षेत्र परिक्रमा गरेका थिए।
उक्त कार्यक्रम जिल्ला कार्यसमिति पर्साका अध्यक्ष शम्भु प्रसाद चौरसियाको अध्यक्षतामा सम्पन्न भएको थियो। कार्यक्रममा अजय पौडेल, उदित सहनी, बिरेन्द्र यादव,मेदिहसन गदी, हरिनारायण चौरसिया, सम्भु घिमिरे, राजेश गुप्ता,पवन साह लगायतका व्यक्तिहरूको उपस्थिति रहेको थियो।
कार्यक्रम शान्तिपूर्ण रूपमा सम्पन्न भएको आयोजकले जनाएको छ। आयोजक पक्षले आफ्ना मागहरू सम्बोधन नभए थप सशक्त आन्दोलनका कार्यक्रम घोषणा गर्ने चेतावनी समेत दिएको छ।
