धनकुटा, १७ माघ । आम जनता पार्टीका अध्यक्ष तथा पूर्वमन्त्री प्रभु साहले सत्ता लम्ब्याउन चाहने सुशीला कार्कीहरु र जेनजी आन्दोलनबाट बढारिएका ओलीहरु चुनाव हार्ने डरले निर्वाचन भाँड्ने षड्यन्त्रमा लागेको आरोप लगाएका छन् । उनले देश र जनता निर्वाचनमा होमिएको अवस्थामा कसैले पनि संसद् ब्युँताउने वा अहिलेको सत्ता लम्ब्याउने षड्यन्त्र गरे जनताले प्रतिकार गर्ने चेतावनी दिए ।
आज (शनिबार) धनकुटामा आयोजित पार्टीको निर्वाचन परिचालनसम्बन्धी कार्यक्रमलाई सम्बोधन गर्दै साहले यस्तो बताएका हुन् । उनले सुशीला कार्कीहरु जेनजी आन्दोलनको अपहरणकारी भएको र आकस्मिक सत्तारोहण गरेको भन्दै उनीहरु नियन्त्रित अस्थिरताको पक्षमा रहेको आरोप लगाए । जेनजी आन्दोलनमा दमन गरेर र युवाहरुको हत्या गरेका ओलीहरु चुनावबाट बढारिने भयले निर्वाचन भन्दापनि संसद् पूनःस्थापनातर्फ आँखा लगाएर बसेको भन्दै दुवै अतिवादीहरुको गतिविधि जनताले नजिकबाट नियाँलिरहेको बताए ।
देशले परिवर्तन र असलस् बदलाव चाहेको भन्दै त्यसको लागि निर्वाचनलाई संघर्षकै रुपमा आफ्नो दलले उपयोग गरेको बताए । उनले यो निर्वाचनमार्फत जनताले नक्कली नायकहरूलाई कहिल्यै पनि उठ्न नसक्नेगरि परास्त गर्नुपर्ने बताए । नयाँ र पूराना भन्नेहरुले नक्कली नायक खडा गरेको र जनतामा मिठो भ्रम बाँडेको भन्दै कोही पनि देशभक्त र विकासप्रेमी जनता झुक्किननहुने साहको मत छ ।
बालेन शाह, रवि लामिछाने र कुलमान घिसिङले देशलाई दिशा दिन नसक्ने ठोकुवा गरे । उनले यही तीनै पात्र टेस्टेड क्यारेक्टर भएकोले अब नयाँ र विकल्प दिन्छौं भन्ने नाममा फेरि जनतालाई ठग्न आउन खोजेको भन्दै सचेत हुन आम जनतालाई अपिल गरे ।
अहिले रास्वपामा प्रवेश गरेर प्रधानमन्त्रीको उम्मेदवारको रुपमा अघि सारिएका बालेन पनि नयाँ नभएको र काठमाडौं महानगरमा तीन वर्षभन्दा लामो समय नेतृत्व प्रदान गर्दा असफल भएको बताए । उनले देशकै सबभन्दा जेठो र ठूलो महानगरलाई बालेनले सही तवरले नेतृत्व प्रदान नगर्दा काठमाडौंको विकास नभएको आरोप लगाए । २५ अर्बभन्दा बढि बजेट भएको महानरले पुँजीगत खर्च ५० प्रतिशत पनि पुर्याउन नसक्नु आँफैमा मेयरको असफलता भएको साहको टिप्पणी छ । महानगरले यहाँको शिक्षा र स्वास्थ्यमा उल्लेखनीय योगदान पुर्याउन नसकेको र जनतासँग भारी मात्रामा कर लिएर सुविधा नदिएको भन्दै साहले आलोचना गरे ।
उनले भने,‘काठमाडौं महानगरले जनतासँग करमाथि कर थुपरेको छ, तर बदलामा महानगरवासीलाई केही पनि सुविधा दिन सकेको छैन । वर्षौ २५ अर्बको बजेट आउँछ, तर पुँजीगत खर्च एकदमै न्यून छ । आज युवा र स्वतन्त्र मान्छेले मेयर जित्दा पनि काठमाडौंको मुहार फेरिएन ।’ उनले जनतासँगको सम्बन्ध नै विच्छेद गरेर ‘खोपीको देउता’ भएर बसेको भन्दै साहले उनले महानगरको नेतृत्वमा हुँदा जनताको हितको लागि काम नगरेको आरोप लगाए ।
उनले आजपा गठन गरेदेखि नै आफूले जनताको आवाज बोकेको र सडक–संघर्ष गरेको स्मरण गराए । उनले यो पटकको निर्वाचनमा भ्रष्टाचारीलाई कारबाही गर्नको लागि पनि पूराना र नयाँ दुवैतर्फबाट ठगहरुलाई पराजित गर्नुपर्ने बताए । धनकुटाको गौरव उठाउनको लागि पनि यसपटकको निर्वाचनमा सही व्यक्ति संसद्मा पुग्नुपर्ने उनको सुझाव छ । ‘यो जिल्ला राष्ट्रिय राजनीतिमा ख्याँतिकमाएको जिल्ला हो, यहाँबाट सुर्यबहादुर थापा प्रधानमन्त्री हुनुभयो, जिल्लाको विकासको कुरा तपाईंहरुलाई थाहा होला, अब नायक होईन, सेवक रोज्नुहोस ।’
आरके श्रीवास्तव,राैतहट,१७ गते माघ ।
रौतहट क्षेत्र नम्बर ३ का नेपाली काँग्रेसका उम्मेदवार रामकृपाल यादवले पत्रकारहरू सँग कुराकानी गर्नु हुँदै भावुक अभिव्यक्ति दिएका छन् । उनले शिक्षण पेशा तथा स्थायी जागिर त्यागेर राजनीतिमा आएको बताउँदै यो निर्णय व्यक्तिगतभन्दा बढी सामाजिक उत्तरदायित्वबाट प्रेरित भएको स्पष्ट पारेका छन् ।
यादवले भने, “मैले शिक्षण पेशा छोडेर आफ्ना छोरा–छोरीमाथि अन्याय गरेको जस्तो लाग्न सक्छ, तर मेरो परिवारमाथि अन्याय हुँदा पनि समाजमाथि अन्याय नहोस् भन्ने सोचले राजनीतिमा आएको हुँ ।” उनले देशमा अमेरिकाजस्तो नेतृत्व खोज्ने हो भने त्यस्तै सचेत र जिम्मेवार मतदाता तथा नागरिक पनि आवश्यक पर्ने धारणा राखे ।
आफूले ठूलो साहसका साथ राजनीतिमा प्रवेश गरेको उल्लेख गर्दै उनले यो चुनाव आफू मात्र होइन, क्षेत्र नम्बर ३ का जनताका लागि पनि “अग्निपरीक्षा” भएको बताए । “मतदाताले मलाई सेवकका रूपमा काम गर्ने अवसर दिनुहुन्छ कि शासक बन्न खोज्ने व्यक्तिलाई रोज्नुहुन्छ, त्यो निर्णय अब जनताको हातमा छ,” उनले भने ।
धेरैले आफूले जागिर छोडेर राजनीतिमा आउने कल्पना नगरेको स्मरण गर्दै यादवले राजनीति पैसा र शक्तिको खेलमा सीमित भए राम्रो सोच भएका र समाज निर्माणको अभियानमा लाग्न चाहने व्यक्तिहरू अघि नबढ्ने चेतावनी दिए । उनले नयाँ र पुरानोको बहसमा केही पुरानै अनुहार नयाँको आवरणमा आउने गरेको टिप्पणी पनि गरे ।
“हामी युवा नेतृत्वको सोचसहित परिवर्तन र सुशासन खोज्दै आएका छौं,” यादवले भने, “यसपटक क्षेत्र नम्बर ३ का प्रत्येक नागरिकले बदलाव चाहेका छन् ।”
पहिले आरामदायी जीवन बिताइरहेको उल्लेख गर्दै उनले अहिले जनतामाझ दौडधुप गरिरहेको बताए । “मैले पेशा छोडेको छु भने अवश्य नै मेरो भित्र समाजका लागि केही गर्ने दृढ सोच छ,” उनले भावुक हुँदै थपे ।
आरके श्रीवास्तव,राैतहट,१६ गते माघ ।
रौतहट निर्वाचन क्षेत्र नम्बर ३ बाट जनता समाजवादी पार्टी (जसपा) नेपालका तर्फबाट प्रतिनिधि सभा सदस्य पदका उम्मेदवार गोविन्द चौधरीले आज (शुक्रबार) गरूडा नगरपालिका वडा नम्बर ७ पिपरियामा मतदातासँग प्रत्यक्ष भेटघाट गरेका छन् ।
भेटघाटका क्रममा स्थानीय मतदाताहरूले आफूहरूले सांसद भएको अनुभूति गर्न नसकेको गुनासो गरेका थिए । शिक्षा र स्वास्थ्यजस्ता आधारभूत क्षेत्रमा अझै पनि क्षेत्र पछाडि रहेको भन्दै उनीहरूले असन्तुष्टि व्यक्त गरे । पिपरिया पुल अहिलेसम्म पनि निर्माण हुन नसक्नु विकासको स्पष्ट उदाहरण भएको मतदाताहरूको भनाइ थियो । “हामी परिवर्तन चाहन्छौं,” उनीहरूले बताएका थिए ।
मतदाताको जिज्ञासा र गुनासोको जवाफ दिँदै उम्मेदवार चौधरीले परिवर्तनको चाहना जनतामै रहेको उल्लेख गरे । “जनताको आग्रह र चाहनाका कारण नै मैले उम्मेदवारी दिएको हुँ,” उनले भने, “यदि तपाईंहरूलाई लाग्छ म परिवर्तन गर्न सक्छु भने मलाई मत दिनुहोस् । यो मेरो अन्तिम प्रयास हो।”
गोविन्द चौधरीले आफू जनताबाटै बनेको नेता भएको उल्लेख गर्दै भने, “गोविन्द चौधरीलाई जनताले गोविन्द चौधरी बनाएका हुन् । तपाईंहरूले चाहनुभयो भने परिवर्तन अवश्य सम्भव छ।”
कार्यक्रममा गरूडा नगरपालिकाका मेयर प्रत्यासी अनिल यादवसहित जसपा नेपालका अन्य नेता तथा कार्यकर्ताहरूको उपस्थिति रहेको थियो ।
आरके श्रीवास्तव,रौतहट,१६ गते माघ ।
रौतहट निर्वाचन क्षेत्र नम्बर ३ बाट नेकपा (एमाले) को तर्फबाट प्रतिनिधि सभा सदस्य पदका उम्मेदवार कुन्दन कुशवाहाले आफ्नो चुनावी एजेन्डाबारे पत्रकारहरूसँग जानकारी गराएका छन् ।
कटहरिया गाविसका पूर्व अध्यक्ष जादाेलाल महतोका छोरा कुशवाहा २०७४ सालको मधेस प्रदेश सभा निर्वाचनमा रौतहट क्षेत्र नम्बर ३ (ख) बाट निर्वाचित भएका थिए । हाल उनी कटहरिया नगरपालिकाको वडा नम्बर ४ का स्थायी बासिन्दा हुन् ।
पत्रकारहरू सँग बोल्दै कुशवाहाले सूर्य चिन्ह लिएर एमालेमा प्रवेश गरेपछि आफूले पदसमेत गुमाउनुपरेको स्मरण गरे । “तर पद गयो भन्दैमा जनताप्रतिको दायित्व कहिल्यै घटेन,” उनले भने, “रौतहट क्षेत्र नम्बर ३ का ४४ वटै वडाका हरेक समुदायको दुःख–सुखमा म सधैं साथ दिँदै आएको छु ।”
अब संघीय सांसदको रूपमा चुनावी मैदानमा उत्रिएको उल्लेख गर्दै उनले सबैको साथ र सहयोगको आवश्यकता रहेको बताए । “यो क्षेत्रको समग्र विकास कसरी सम्भव हुन्छ भन्ने विषयमा म स्पष्ट छु,” उनले भने, “जनतासँग मेरो आग्रह छ—मलाई एक पटक अवसर दिएर जाँच गर्नुहोस् ।”
‘किन तपाईंलाई भोट दिने?’ भन्ने पत्रकारको प्रश्नको जवाफ दिँदै कुशवाहाले विकासका हरेक मोडालिटीमा आफू सक्रिय रहने दाबी गरे । “प्रदेश सांसद हुँदा कटहरियालाई मलाही–कटहरिया–समनपुर र धनसरदेखि इनरवा, नरकटिया हुँदै कटहरियामा प्लस सडक बनाउने काम मैले नै गरेको हुँ,” उनले भने, “केही नेताले यसको श्रेय आफूले लिएको प्रचार गरिरहेका छन्, तर त्यो सत्य होइन् ।”
कटहरियाको व्यापारिक विकासका लागि समेत आफू निरन्तर काम गरिरहेको उनको भनाइ छ । उनले क्षेत्रको मुख्य समस्या सरकारको पैसा व्यक्तिहरूले दुरुपयोग गर्नु रहेको आरोप लगाए । “नाम मात्रको विकास भइरहेको छ,” उनले भने, “जनता विकास भएको भ्रमबाट बाहिर निस्कन जरुरी छ । यी सबै सत्य चाँडै जनतामाझ आउनेछ।”
अन्त्यमा कुशवाहाले मतदातालाई आफूलाई मत दिएर परीक्षण गर्न आग्रह गर्दै रौतहट क्षेत्र नम्बर ३ लाई वास्तविक विकासको बाटोमा लैजाने प्रतिबद्धता व्यक्त गरेका छन् ।
आरके श्रीवास्तव,राैतहट,१६ गते माघ ।
रौतहट । रौतहट क्षेत्र नम्बर ३ बाट जनता समाजवादी पार्टी (जसपा)का उम्मेदवार गोविन्द चौधरीले आज गरुडा नगरपालिका वडा नम्बर ७ भिमडाबरमा मतदाताहरूसँग भेटघाट गरेका छन् । स्थानीय मतदातासँग प्रत्यक्ष संवाद गर्दै उनले आफ्नो चुनावी एजेन्डा र भावी योजनाबारे जानकारी गराएका थिए ।
उक्त कार्यक्रममा गरुडा नगरपालिकाका मेयर प्रत्यासी अनिल यादवको नेतृत्वमा स्थानीय नेता तथा कार्यकर्ताहरूको उल्लेखनीय उपस्थिति रहेको थियो । कार्यक्रममा बोल्दै उम्मेदवार चौधरीले विकास, सुशासन र जनताको अधिकारका लागि आफू प्रतिबद्ध रहेको उल्लेख गर्दै आगामी निर्वाचनमा छाता छाप मा मतदान गर्न मतदातासँग आग्रह गरे ।
भेटघाट कार्यक्रममा स्थानीय मतदाताहरूले विभिन्न समस्या तथा अपेक्षाहरू राखेका थिए । उम्मेदवार चौधरीले ती समस्या समाधानका लागि संसद्मा सशक्त रूपमा आवाज उठाउने प्रतिबद्धता व्यक्त गरे। कार्यक्रम सौहार्दपूर्ण वातावरणमा सम्पन्न भएको जनाइएको छ ।
बज्जिकाञ्चल,१६ गते माघ
यो चुनावको मुखमा गोविन्द चौधरीको बारेमा लेख्नु ‘गोविन्द चौधरी’ को प्रचार हुने जस्तो लागेर मैले केही पनि नलेख्ने विचार गरें । तर पुनः सोचें, मतदानको आधारमा आफ्नो जन प्रतिनिधि छनौट गर्दा मतदाताहरूले आफूले छनौट गर्ने जन प्रतिनिधिको बारेमा थाहा पाउन आवश्यक हुन्छ छ । मतदाताहरूलाई जे जति जानकारी उम्मेदवारहरूको बारेमा प्राप्त हुन्छ सोही अनुसार मतदाताहरूलाई योग्य जन प्रतिनिधि छनौट गर्न सजिलो हुन्छ । कसैको करकाप वा धाक धम्कीमा परेर होइन, कुनै लोभ लालचमा परेर होइन, मतदाताहरूले स्वतन्त्र रुपमा आफूले योग्य ठानेको जन प्रतिनिधि छनौट गर्न सजिलो हुन्छ ।
यस आलेखको आशय गौविन्द चौधरीलाई नै मत दिनु होस भनी मतदाताहरूलाई मनोवैज्ञानिक दबाब दिनु भने होइन् । यो आलेख गोविन्द चौधरीबारे मसङ्ग भएको अनुभव साझा गर्नु हो । गोविन्द चौधरीले यस क्षेत्रको विकासमा पुर्याएको योगदानको बारेमा भन्नु हो ।
गोविन्द चौधरीसङ्ग मैले समयको एक महत्वपूर्ण काल खण्ड साथ साथ रहेर बिताएका छु । सो क्रममा हामी दुई, गोविन्द चौधरी र म, हामी दुबैले एउटै थालमा खाएका छौ । एउटै कोठमा सुतेका छांै । साथ साथ हिँडेका छौं । यस हिसाबले गोविन्द चौधरीलाई नजिकबाट थाहा पाउने व्यक्तिहरू मध्ये म पनि एक पर्दछु । सिमरा भवानीपुरको स्कूलमा हामीले सङ्गै पढेको हो । मेरो घर पनि सिमरा भवानीपुरमा नै (थियो) हो ।
हामीले २०३३ सालमा सङ्गै एस एल सी परीक्षा गौरबाट दिएका हौ । एउटै कोठमा बसेर, सङ्गै अध्ययन गरेर परीक्षा दिएका हौ । सङ्गै उतिर्ण गरेका हौं । बाल्यकाल देखिनै गोविन्द चौधरीमा ज्ञानको ठूलो भोक थियो । उच्च शिक्षा हासिल गर्ने उद्देश्य थियो । सोही अनुसार उच्च शिक्षाका लागि, आफ्नो घरको वातावरण प्रतिकूल हुँदा हुँदै पनि, उनी उच्च शिक्षा प्राप्त गर्ने वनारस हिंडे । मेरो बुझाइमा, उनको पिता स्व रामसुरत चौधरीको मनसाय छोराले घर गृहस्थीको व्यवस्थापन गरोस भन्ने थियो । सम्पत्तिको संरक्षण गरोस भन्ने थियो । त्यसबेलमा रामसुरत चौधरीको स्वामित्वमा ३५० बिघाको आसपासमा जमिन थियो । यो मैले सुनेको हो । ठूलो लगानी–बझानी थियो । यो भने मैले स्वयंले देखेको हो ।
अब गोविन्द चौधरीसङ्ग मैले बिताएका केही महत्वपूर्ण क्षणहरूको चर्चा गर्ने अनुमति माग्छु । २०३२ सालतिर म र गोविन्द चौधरी मिलेर सिमरा भवानीपुर स्थिति आधार प्राइमरी स्कूल ( त्यस बेला पाँच कक्षासम्म मात्र पढाइने) मा एक पुस्तकालयको स्थापना गरेका थियौ । हामी दुईको उद्देश्य सिमरा भवानीपुर लगायत वरिपरिका गाउँका व्यक्तिहरूलाई सहजै र निःशुल्क अध्यन गर्न सजिलो होस भन्ने थियो । त्यो पुस्तकालयको स्थापनाले गोविन्द चौधरीमा युवा कालदेखि नै आफ्नो क्षेत्रका जनता साक्षर होस्, शिक्षित होस् भन्ने चाहना रहेको पुष्टि हुन्छ । उनी शिक्षा प्रेमी रहको पुष्टि हुन्छ । आज भन्दा दसकौ पहिले शिक्षाको चेत गोविन्द चौधरीमा थियो ।
अर्को एक घटना । यो घटना २०३७ सालतिरको हो । त्यसबेला हाम्रो बसाई (घर) वीरगंजमा थियो । मेरो पिता देवराज उपाध्याय मात्र सिमरा भवानीपुरमा बस्नु हुन्थ्यो र उहाँ काम विशेषले वीरगंजमा हुनु हुन्थ्यो । देवराज उपाध्याय सिमरा भवानीपुर स्थिति स्कूलको स्थापना कालदेखिको प्रधान अध्यापक हुनु हुन्थ्यो । पिता वीरगंज रहेको स्थितिमा, २०३७ साल तिर, केवल म मात्र सिमरा भवानीपुरमा थिए, खेती गराउनका लागि बसेको थिएँ ।
म सिमरा भवानीपुर रहेको बेला, २०३७ सालमा, मलाई– ‘काठमाण्डौ जानु, त्यहाँ अस्थाई जागिरे पाउने सम्भावन छ’ भनी जानकारी प्राप्त भयो । म काठमाडौ जान सुरिएँ । त्यो बेलामा सरकारी जागिर पाउनु भनेको भाग्य खुल्नु सरह थियो । तर मसङ्ग काठमाडौ जान एक पैसा पनि थिएन । अर्कोतिर खबर पाएको दुई दिन भित्रमा काठमाण्डौ जानु पर्ने बाध्यता थियो। के गर्ने ? म ठूलो समस्यामा परें ।
यस्तो बेलामा साथीलाई गुहार्नु पर्छ भनेर म गोविन्द चौधरीको घर पुगें । गोविन्द चौधरीलाई भने ‘म त ठूलो समस्यामा परें । ’ गोविन्द चौधरीले प्रश्न गरे, ‘के हो त्यस्तो ठूलो समस्या?’ मलै भने, मैले भोली नै चन्द्रनिगाहपुर, वीरगंज हुँदै काठमाडौ जानु छ । तर मसङ्ग खल्तीमा एक पैसा पनि छैन् ।’ मेरो कुरा सुनेर गोविन्द चौधरी एक छिन हाँसे । पछि हाँस्दै भने, ‘यो पनि कुनै समस्या हो ।’ उनले मेरो खल्तीमा काठमाडौ जान, त्यस बेलाको खर्च अनुसार, पुग्ने जति पैसा हालिदिए ।
गोविन्द चौधरीबाट पैसा पाएको भोलि पल्ट म काठमाण्डौ पुगे । जागिर पाएँ पनि । मन मनै गोविन्द चौधरीलाई हृदयभरिको धन्यवाद दिए । गोविन्द चौधरी आफ्नो युवा कालदेखि नै अति नै सहयोगी व्यक्ति रहेको मैले अनुभूत गरेको छु ।
माथि उल्लेख गरेका केही प्रतिनिधि घटनाहरू मात्र हुन् । गोविन्द चौधरीबाट मैले अनेक सहयोग पाएको छु । साथीको रुपमा अटुट स्नेह पाएको छु । यस क्षेत्रको विकासको लागि गोविन्द चौधरीले गरेका योगदानहरूको सूची लामो छ ।
एउटा महत्वपूर्ण प्रशंग यहाँ ल्याएर गोविन्द चौधरीसङ्गको मेरो अनुभव टुंयाउँ छु । राजनीतिमा लागेर अनेक व्यक्तिहरूले करोडौं कमाए । महल बनाए । तर गोविन्द चौधरीले, उल्टो, आफ्नो सम्पत्ति राजनीतिमा खर्च गरे । उनको पिता त्यसबेला रौटहट भरिमा, गिनेचुनेका दुई चार धनी मध्ये एकमा पथ्र्यो । त्यति सम्पति चौधरी परिवारसङ्ग थियो । तर गोविन्द चौधरीले आफ्नो सम्पत्ति राजनीतिमा लगाए । जनसेवामा केन्द्रित रहे । धन कमाउन पट्टी उनी लागेनन् । कुनै बेला ३५० बिघाको हाराहारीमा जग्गा हुने गोविन्द चौधरीसङ्ग अहिले केवल आठ दस बिघा जति मात्र बाँकि छ रे । यो मैले सिमरा भवानीपुरका बासिन्दाहरूले नै भनेको सुनेको हो ।
गोविन्द चौधरीसङ्ग मैले केही लाभ लिनु छैन् । मैले उनको लागि भक्ति–गान गाउनु पनि छैन् । मैले उनलाई जस्तो देखें त्यस्तै भनेको मानिसमा अनके किसिमका कमजोरीहरू पनि हुन्छन् । त्यस अर्थमा उनका पनि केही कमजोरी होलान् । तर आफ्नो क्षेत्रको विकासको लागि, आफ्नो क्षेत्रको जनताको सुख र समृद्धिका लागि, गोविन्द चौधरी कटिवद्ध रहेको मैले आफ्नै आँखाले देखेको छु । भोगेको छु ।
भबतु सब्ब मङगलम ।
विश्वराज आधिकारी
आरके श्रीवास्तव,राैतहट,१५ गते माघ ।
गरूडा । जनता समाजवादी पार्टी (जसपा) नेपालबाट रौतहट निर्वाचन क्षेत्र नम्बर ३ का उम्मेदवार गोविन्द चौधरीले आफूले कसैलाई समर्थन गर्ने भन्ने हल्लालाई कडा शब्दमा खण्डन गरेका छन् ।
बिहीबार गरुडा नगरपालिका वडा नम्बर ६ पोठियाहीमा आयोजित मतदाता भेटघाट कार्यक्रममा बोल्दै चौधरीले भने,
“आम जनतालाई गोविन्द चौधरीको आवश्यकता थियो, जनताको आदेशमै मैले उम्मेदवारी दिएको हुँ। अफवाहको पछि नलाग्न म सबैलाई आग्रह गर्दछु।”
उनले चुनावी मैदानमा आएपछि एक इन्च पनि पछि नहट्ने स्पष्ट चेतावनी दिँदै भने,“मेरो लागि सबैभन्दा ठूलो सम्पत्ति मेरो इज्जत र प्रतिष्ठा हो। चुनावमा आइसकेपछि म एक इन्च पनि पछाडि हट्दिन।”
आफूले आजसम्म कसैको समर्थन नगरेको दाबी गर्दै चौधरीले आफ्नो राजनीतिक इतिहास हेर्न चुनौतीसमेत दिए ।
“मेरो इतिहास हेर्नुहोस्, मैले कहिल्यै कसैको समर्थन गरेको छैन् । म स्वस्थ नभएकाे कारण यसअघिका चुनावमा उठ्न सकिन् ।”
उनले केही तत्वहरूले भ्रम र अफवाह फैलाएर भ्रामक प्रचार गरिरहेको आरोप लगाउँदै त्यसप्रति कडा आपत्ति जनाए ।
कार्यक्रममा जसपा नेपाल रौतहट निर्वाचन क्षेत्र नम्बर ३ का जननिर्वाचन परिचालन समितिका संयोजक रामप्रवेश दास, गरुडा नगरपालिकाका मेयर प्रत्यासी अनिल यादव लगायत जसपा नेपालका स्थानीय नेता तथा कार्यकर्ताहरूको उल्लेखनीय उपस्थिति रहेको थियो ।
गोविन्द चौधरीको यो स्पष्ट र आक्रामक अभिव्यक्तिले रौतहट क्षेत्र नम्बर ३ को चुनावी माहोल थप तातिएको छ ।
हनुमत कुमार यादव,गाैर,१५ गते माघ ।
गाैर । रौतहट जिल्लाको राजदेवी नगरपालिका–७, मुडवलवामा निर्माण हुन लागेको करिब ७ करोड रुपैयाँ लागतको कन्वेन्सन सेन्टरको विधिवत रूपमा शिलान्यास कार्यक्रम सम्पन्न भएको छ । धार्मिक तथा सांस्कृतिक विधिअनुसार सम्पन्न उक्त कार्यक्रममा जग्गादाता तथा स्थानीय जनप्रतिनिधिहरूको उल्लेखनीय उपस्थिति रहेको थियो ।
कन्वेन्सन सेन्टर निर्माणको पहिलो चरणअन्तर्गत चालु आर्थिक वर्षमा ३ करोड ३० लाख रुपैयाँ बराबरको निर्माण कार्य अघि बढाइने नगरपालिकाले जनाएको छ। उक्त निर्माण कार्यका लागि आवश्यक जग्गा पाँच जना स्थानीय जग्गादाताले निःशुल्क दान गरेर उदाहरणीय योगदान दिएका छन् ।
जग्गादाताहरूको सम्मानस्वरूप नगरपालिकाले शिलान्यास कार्यक्रममा उनीहरूलाई नै पूजाआजा गराई विधिवत रूपमा कार्यक्रम सम्पन्न गरेको हो । यस कार्यले स्थानीय तहमा विकासप्रति देखिएको सहकार्य, त्याग र सामाजिक उत्तरदायित्वको भावनालाई उजागर गरेको सहभागीहरूले बताएका छन् ।
निःशुल्क जग्गा दान गर्ने व्यक्तिहरू विजय शंकर प्रसाद यादव (वडा अध्यक्ष), रुपलाल राय यादव, जितेन्द्र प्रसाद यादव, अमरेन्द्र कुमार यादव, अनिल कुमार यादव रहेका छन् ।
नगरपालिकाका अनुसार कन्वेन्सन सेन्टर निर्माण सम्पन्न भएपछि स्थानीय तहमा विभिन्न सामाजिक, सांस्कृतिक, शैक्षिक तथा औपचारिक कार्यक्रम सञ्चालन गर्न सहज हुने अपेक्षा गरिएको छ । यस परियोजनाले क्षेत्रीय विकासमा टेवा पुग्ने विश्वास लिइएको छ ।
आरके श्रीवास्तव,राैतहट,१५ गते माघ ।
गरुडा । रौतहट निर्वाचन क्षेत्र नम्बर ३ बाट जनता समाजवादी पार्टी (जसपा) नेपालका तर्फबाट प्रतिनिधि सभा सदस्य पदका उम्मेदवार गोविन्द चौधरीले आज बिहानै गरुडा नगरपालिका–५ मा अवस्थित ऐतिहासिक तथा प्रसिद्ध शिवनगर महादेव मन्दिरमा पुजाआजा तथा दर्शन गर्नुभएको छ ।
उहाँको पूजा–अर्चना मन्दिरका महन्थ कृष्णदेव गिरीले विधिपूर्वक गराउनुभएको थियो । धार्मिक आस्थाको केन्द्र मानिने उक्त मन्दिरमा दर्शनपछि उम्मेदवार चौधरीले मन्दिरको संरक्षण, विकास तथा प्रवर्द्धनका लागि आफूले विगतदेखि नै पहल गर्दै आएको र आगामी दिनहरूमा पनि निरन्तर सहयोग रहने प्रतिबद्धता व्यक्त गर्नुभयो ।
उक्त अवसरमा जसपा नेपाल रौतहट निर्वाचन क्षेत्र नम्बर ३ का जननिर्वाचन परिचालन समितिका संयोजक रामप्रवेश दास, गरुडा नगरपालिकाका मेयर प्रत्यासी अनिल यादवलगायत जसपा नेपालका स्थानीय नेता तथा कार्यकर्ताहरूको उल्लेखनीय उपस्थिति रहेको थियो ।
धार्मिक, सामाजिक तथा जनसेवामूलक कार्यमा निरन्तर सक्रिय रहँदै आएका उम्मेदवार चौधरीको यस प्रकारको सहभागिताले स्थानीयवासीबीच सकारात्मक सन्देश प्रवाह भएको सहभागीहरूले बताएका छन् । चुनावी भेटघाटको व्यस्ततालाबीच पनि धार्मिक स्थलमा पुगेर आस्था प्रकट गर्नुले उहाँको संस्कार, मूल्य र समुदायप्रतिको सम्मान झल्काउने उनीहरूको भनाइ छ ।
आरके श्रीवास्तव,राैतहट,१४ गते माघ ।
कटहरिया । प्रेस चौतारी नेपाल रौतहट शाखाको आज बुधबार बसेको बैठकले स्वर्गीय फणिदेव महतको स्मृतिमा पत्रकारिता पुरस्कार स्थापना गर्ने निर्णय गरेको छ । सो पुरस्कार सञ्चालनका लागि अक्षयकोष स्थापना गरिने निर्णयसमेत बैठकले गरेको चाैतारी राैतहटका सचिव मुकेश कुमार साहले जानकारी गराएका हुन् ।
अक्षयकोष स्थापनाका लागि नेकपा (एमाले) को तर्फबाट रौतहट क्षेत्र नं. ४ का उम्मेदवार रामजी साहले २५ हजार रुपैयाँ सहयोग गर्ने घोषणा गर्नुभएको छ । यस्तै, प्रेस चौतारी नेपाल मधेश प्रदेशका इन्चार्ज तथा केन्द्रीय सदस्य अच्युत पौडेलले नगद ५ हजार रुपैयाँ सहयोग गर्ने घोषणा गर्नुभएको छ ।
प्रेस चौतारी नेपाल रौतहट शाखाले अक्षयकोष स्थापना कार्यमा सहयोग गर्ने सम्पूर्ण सहयोगदाताप्रति धन्यवाद व्यक्त गरेको छ । साथै आगामी दिनहरूमा शाखाले पत्रकारिताको व्यावसायिक विकास, क्षमता अभिवृद्धि तथा थप परिस्कृत र रचनात्मक गतिविधिहरू गर्दै जाने प्रतिबद्धता जनाएको छ ।
स्व. फणिदेव महत स्मृति पत्रकारिता पुरस्कारले जिल्लामा क्रियाशील पत्रकारहरूलाई प्रोत्साहन गर्ने विश्वास लिइएको छ ।
